1, 2. ¿Tu guca Sadoc? (1 Crónicas 12:​22, 26-28).

 GUNÍʼ ique dagulisaa jma de chonna gayuaa cuarenta mil hombre para gúnicaʼ David rey ti guni mandar guidubi guidxi Israel. Pur chonna gubidxa guyuucabe lu ca dani ni nuu gaxha de Hebrón, cayuíʼcabe diidxaʼ, cuxídxicabe ne nayecheʼ cayuundacabe para gusisácacabe Jehová (1 Crón. 12:39). Ne lade ca binni que nga nuu ti joven láʼ Sadoc, huaxiéʼ si tu nanna nuube raqué. Peru Jehová nanna nuube raqué ne racalaʼdxiʼ gánnanu ni (biindaʼ 1 Crónicas 12:​22, 26-28). Peru ¿tu guca Sadoc yaʼ?

² Guca Sadoc ti sacerdote ni biʼniné sumo sacerdote Abiatar dxiiñaʼ. Laaca gúcabe ti hombre ni ruuyaʼ visión, ni caninu raríʼ nga, gúcabe ti binni ni bidii Jehová laa guendanuuxpiaaniʼ ti zacá guiénebe ni racalaʼdxiʼ Dios guni (2 Sam. 15:27). Rié binni ra nuube para gudiibe conseju galán laacaʼ. Laaca gúcabe ti hombre nabé nadxibalú. Ne lu artículo riʼ zazíʼdinu ximodo bisihuinni Sadoc naca nadxibalú.

 3. a) ¿Xiñee caquiiñeʼ gácanu nadxibalú? b) ¿Xi zadúʼyanu lu artículo riʼ?

³ Lu ca últimu dxi riʼ, jma cucaalú Binidxabaʼ xquidxi Dios (1 Ped. 5:8). Laga cabézanu gunduuxeʼ Jehová Binidxabaʼ ne guidxilayú malu riʼ, caquiiñeʼ gácanu nadxibalú (Sal. 31:24). Guidúʼyanu chonna modo zanda guluinu nácanu nadxibalú casi Sadoc.

GÚNINU NI NÁ REINU STIʼ DIOS

 4. ¿Xiñee caquiiñeʼ gácanu binni nadxibalú para gúninu ni ná Reinu stiʼ Dios? (Biiyaʼ imagen ca).

⁴ De guidubi ladxidóʼ ca xpinni Jehová rúnicaʼ ni ná Reinu stiʼ Dios, peru nuu biaje caquiiñeʼ gácacabe nadxibalú para gúnicabe ni (Mat. 6:33). Guzéʼtenu ti ejemplu, lu guidxilayú malu riʼ caquiiñeʼ gápanu valor para guibáninu casi ná ca ley  stiʼ Jehová ne guni predicarnu ca noticia galán stiʼ Reinu (1 Tes. 2:2). Cumu lu guidxilayú riʼ nuudinde binni pur política la? jma peʼ caquiiñeʼ gácanu nadxibalú para gácanu neutral (Juan 18:36). Ne stale de ca xpinni Jehová nápacaʼ guendanagana pur bueltu, nuu de laacaʼ riguíñecabe laacaʼ o nuucaʼ cárcel purtiʼ qué rinacaʼ chuʼcaʼ lu política o gácacaʼ soldadu.

 5. ¿Xiñee guca Sadoc nadxibalú para gacané David?

⁵ Dxi guyé Sadoc Hebrón para gusisaca David purtiʼ chigaca rey la? nuucabe listu para tíndebe lu guerra (1 Crón. 12:38). Bisihuínnibe racaláʼdxibe gácabe tobi de ca xpinni David ni rié lu guerra ne tíndebe pur guidxi Israel. Zándaca huaxiéʼ nánnabe tíndebe, peru nácabe ti hombre guizáʼ nadxibalú.

 6. ¿Ximodo gucané ejemplu stiʼ David Sadoc para gaca nadxibalú? (Salmo 138:3).

⁶ ¿Ximodo guca Sadoc ti binni guizáʼ nadxibalú yaʼ? Zándaca ni gucané laabe nga ejemplu stiʼ xcaadxi hombre nadipaʼ ne nadxibalú ni runibiaʼbe. Ne tobi de laacaʼ nga David. Cumu biʼniʼ dirigir David ca soldadu stiʼ guidxi Israel ora riecaʼ lu guerra né stale guendanadxibalú la? ngue runi interu guidxi Israel guná gácabe rey (1 Crón. 11:​1, 2). Qué nusaana David de ñapa confianza Jehová ne ora guzananda ca xhenemígube laabe la? biyúbibe gacané Jehová laabe (Sal. 28:7; biindaʼ Salmo 138:3). Laaca gucané ejemplu stiʼ xcaadxi hombre nadxibalú de tiempu que Sadoc, casi Jehoiadá ne Benaya xiiñibe ni naca ti soldadu nadipaʼ, ne zaqueca 22 xaíque stiʼ ca tribu ni biʼniʼ apoyar David (1 Crón. 11:​22-25; 12:​26-28). Guirácabe gudixhe íquecabe gacanécabe David gaca rey.

 7. a) ¿Tu ejemplu stiʼ zanda chinándanu pur nácacaʼ nadxibalú? b) ¿Xi rusiidiʼ videu stiʼ hermanu Nsilu laanu?

⁷ Ora guiníʼ íquenu de ca ejemplu stiʼ  ca xpinni Jehová ni rúnicaʼ ni ná Reinu stibe, rudii ni stipa laanu ne racaneni laanu gácanu nadxibalú. Jesucristu, Rey stinu, qué niná ñuu lu política purtiʼ nanna Binidxabaʼ naaze guidxilayú riʼ (Mat. 4:​8-11; Juan 6:​14, 15). Qué nusaanabe de ñápabe confianza Jehová purtiʼ nánnabe laa nga zudii laabe stipa. Laaca nápanu ejemplu stiʼ ca joven de tiempu stinu riʼ, purtiʼ nadxibalucaʼ qué rinacaʼ checaʼ de soldadu ne laaca qué riuucaʼ lu política. ¿Xiñee qué quixhe íqueluʼ gúʼndaluʼ caadxi de ca experiencia stícabe lu jw.org? a

GACANENU CA HERMANU STINU

 8. ¿Pora nga caquiiñeʼ gaca ca ancianu nadxibalú para gacanecaʼ ca hermanu?

⁸ Riuulaʼdxiʼ ca xpinni Jehová gacanésaacaʼ (2 Cor. 8:4). Peru nuu biaje caquiiñeʼ gácabe nadxibalú. Casi ora guzulú ti guerra, nanna ca ancianu caquiiñeʼ tu cuʼ gana, tu gacané, tu laa gudii guendaró espiritual ca hermanu ne zaqueca ca cosa ni caquiiñecaʼ. Cumu nadxii ca ancianu ca dendxuhuiiniʼ stiʼ Jehová la? maʼ gudixhe íquecaʼ gudiicaʼ guiráʼ ni caquiiñeʼ ca hermanu neca chuʼ xquendanabánicaʼ ra naxoo (Juan 15:​12, 13). Zacá zusihuinni ca ancianu nácacaʼ binni nadxibalú cásica Sadoc.

 9. Casi na 2 Samuel 15:​27-29, ¿xi gudxi David Sadoc guni? (Biiyaʼ imagen ca).

⁹ Nuu guendanabani stiʼ David ra naxoo. Gudixhe ique Absalón, xiiñibe, gutiʼ laabe ne gaca rey lugar stibe (2 Sam. 15:​12, 13). Ngue runi gudixhe ique David nagueendaca guiree de guidxi Jerusalén. Gúdxibe ca xpínnibe: «¡Chuu, guireʼnu de raríʼ o nin tobi de laanu qué zalá lu náʼ Absalón!» (2 Sam. 15:14). Ora maʼ bireecabe de guidxi que bidii David cuenta caquiiñeʼ guiaana tuuxa Jerusalén para gabi laabe xi naguixhe ique Absalón guni. Ngue runi gúdxibe  Sadoc ne xcaadxi sacerdote guibiguétacaʼ guidxi que para gúnicaʼ dxiiñaʼ riʼ (biindaʼ 2 Samuel 15:​27-29). Napa xidé gápacabe stale cuidadu purtiʼ dxiiñaʼ ni chigúnicabe riʼ zaguu ni xquendanabánicabe ra naxoo. Naca Absalón ti binni ni ruyubi puru para laasi, riuulaʼdxiʼ tinde ne runi traicionar. Guníʼ ique, ¿xi nizaaca de ca hombre riʼ pa málasi ñanna Absalón xi cayúnicabe para gápacabe David?

10. ¿Ximodo gupa Sadoc ne xcaadxi hombre que David?

¹⁰ Gudixhe ique David guni xiixa ne gunábabe Sadoc ne Husái, sti xhamígube, gacanecaʼ laabe (2 Sam. 15:​32-37). Biʼniʼ Husái casi gudxi David laa, zaqué guca Husái ti binni de confianza stiʼ Absalón ne gúdxibe Absalón ximodo zanda gucaalú David, peru ni bíʼnibe riʼ zacané ni David para chuʼ listu ora gucaalú Absalón laa. Despué, gudxi Husái Sadoc ne Abiatar xi conseju bidiibe Absalón (2 Sam. 17:​8-16). Zaqué biseendaʼ tidxicabe David ni naguixhe ique Absalón guni (2 Sam. 17:17). Gucané Jehová, Sadoc ne xcaadxi sacerdote para gápacabe David ne cadi gutiʼ Absalón laa (2 Sam. 17:​21, 22).

11. ¿Ximodo zanda gácanu nadxibalú cásica Sadoc ora guinábacabe laanu gacanenu ca hermanu stinu?

¹¹ ¿Ximodo zanda gácanu nadxibalú cásica Sadoc ora guinábacabe laanu gacanenu ca hermanu stinu ora nuu xquendanabánicaʼ ra naxoo ne caquiiñecaʼ tu gacané laacaʼ? Primé, chinándanu ni gábicabe laanu. Ora guizaaca ca cosa riʼ, nabé risaca nga gácanu binni ni ruzuubaʼ diidxaʼ ti zacá ganda chuʼnu tobi si. Nga runi, gúninu guiráʼ ni gabi ca hermanu de sucursal laanu (Heb. 13:17). Ca ancianu gatigá naquiiñeʼ gúʼndacaʼ ca instrucción ni ricaacaʼ ni caníʼ xi naquiiñeʼ gúninu ne ximodo chuʼnu listu ora guizaaca ti desastre (1 Cor. 14:​33, 40). Guiropaʼ, galán gácanu binni nadxibalú, peru laaca gácanu  binni nuu xpiaaniʼ (Prov. 22:3). Guníʼ ique ante gúniluʼ xiixa. Cadi gúniluʼ xiixa ni cuʼ xquendanabániluʼ ra naxoo. Guionna, gupa confianza Jehová. Rizaalaʼdxiʼ Jehová guiranu ne racaláʼdxibe cadi gacananu. Laabe zanda gacanebe laanu gudiʼnu ni caquiiñeʼ ca hermanu stinu peru sin cuʼnu xquendanabáninu ra naxoo.

12, 13. ¿Xi rusiidiʼ ejemplu stiʼ Víktor ne Vitali lii? (Biiyaʼ imagen ca).

¹² Guidúʼyanu ni biʼniʼ Víktor ne Vitali, chupa ancianu ni yené guendaró ne nisa ra nuu ca hermanu de guidxi Ucrania. Víktor guníʼ: «Guiráʼ ladu yeyúbidu guendaró. Guyuu biaje binadiágadu guleecabe tiru gaxha de laadu. Biʼniʼ donar ti hermanu guendaró ni nuu ndaaniʼ bodega stiʼ, ne pur laani gupa stale de ca publicador que ni caquiiñecaʼ para guibaninecaʼ ti tiempu. Rietenalaʼdxeʼ ora cudxiibadu ca cosa que ndaaniʼ carru málasi biaba ti bomba gaxha de laadu, biaʼ gande metru de ra zuhuaʼdu, peru qué ñaca explotar ni. Dxi que guizáʼ bineʼ orar Jehová, gunabaʼ laabe gudiibe naa valor para cadi gusaana de gacaniaʼ ca hermanu».

¹³ Vitali guníʼ: «Caquiiñeʼ gaca binni nadxibalú», ne bizeetebe: «Primé viaje bineʼ, bindaaʼ 12 hora para chindayaʼ ra ziaaʼ que. Guidubi neza que bineʼ orar Jehová». Guca Vitali nadxibalú peru laaca gúcabe ti binni nuu xpiaaniʼ. Ne guníʼrube: «Qué nusaanaʼ de ninabaʼ Jehová gacané naa para cadi cuaaʼ xquendanabaneʼ ra naxoo ne gudii naa guendabiaaniʼ. Lu ca carretera si ni bidii Gobiernu lugar bizayaʼ. Guizáʼ biguidxi fe stinneʼ ra biiyaʼ cayuni ca hermanu que dxiiñaʼ juntu. Guleecabe ca cosa ni cuchiiñaʼ lu neza, bitópacabe ne bidxiibacabe ca despensa que ndaaniʼ carru, bidiicabe naa ne Víktor guendaró ne ra biaanadu».

CADI GUSAANALUʼ JEHOVÁ

14. ¿Ximodo runi sentirnu ora tuuxa ni nadxiinu gusaana Jehová?

¹⁴ Tobi de ca yuubaʼ jma naná ridiʼdiʼ tuuxa nga ora gusaana ti familiar o ti xhamigu Jehová (Sal. 78:40; Prov. 24:10). Jmaruʼ si naná ni pa nabé gucayebarbe binni ca. Pa cazaacaluʼ ni bizéʼtenu riʼ zacané ejemplu stiʼ Sadoc lii purtiʼ laa guca ti binni leal.

15. ¿Xiñee caquiiñeʼ gaca Sadoc nadxibalú para cadi gusaana Jehová? (1 Reyes 1:​5-8).

¹⁵ Ra maʼ ziluxe tiempu guni mandar David, maʼ huaniisibe ne maʼ yaca gátibe, Adonías, xiiñibe, gucalaʼdxiʼ ñaca rey neca Jehová maʼ gulí Salomón para gaca rey (1 Crón. 22:​9, 10). Que nusaana Sadoc de ñaca leal Jehová, peru Abiatar, xhamígube, gudixheʼ ique guni apoyar Adonías (biindaʼ 1 Reyes 1:​5-8). Zaqué bisaana Abiatar de gaca leal David ne zaqueca de gácabe leal Jehová. Guníʼ ique pabiáʼ triste biʼniʼ sentir Sadoc ne biuubaʼ ladxidóʼ. Jma de 40 iza bininebe Abiatar dxiiñaʼ casi sacerdote (2 Sam. 8:17). Guirópacabe yenécabe «Arca stiʼ Dios ni dxandíʼ» (2 Sam. 15:29). Gucanécabe David ne bíʼnicabe stale cosa juntu ra bíʼnicabe ni ná Jehová (2 Sam. 19:​11-14).

16. ¿Xi gucané Sadoc cadi gusaana Jehová?

¹⁶ Neca Abiatar bisaana Jehová ra gucuaa decisión de gudxiideche David, peru Sadoc qué nusaana Jehová, ne David gunna qué zusaana Sadoc laa. Ora gúdxicabe David xi naguixhe ique Adonías guni la? nagueendaca biyúbibe Sadoc, Natán ne Benaya para guni nombrarcaʼ Salomón rey (1 Rey. 1:​32-34). Nabé guyuu Sadoc gana ora biiyaʼ ejemplu stiʼ xcaadxi xpinni Jehová, cani qué nusaana Dios ne gucanecaʼ David, tobi de ca binni ca nga Natán (1 Rey. 1:​38, 39). Ne dxi maʼ naca  Salomón rey, «bisaanabe sacerdote Sadoc lugar stiʼ Abiatar» (1 Rey. 2:35).

17. ¿Ximodo zanda chinándaluʼ ejemplu stiʼ Sadoc, pa gusaana tuuxa ni nadxiiluʼ Jehová?

¹⁷ ¿Ximodo zanda chinándaluʼ ejemplu stiʼ Sadoc? Pa bisaana tuuxa ni nadxiiluʼ Jehová, lii bisihuinni qué zusaanaluʼ Jehová (Jos. 24:15). Zudii Jehová lii stipa ne valor ni caquiiñeluʼ. Guniʼné laabe lu oración ne cadi guixéleluʼ de ca xpínnibe ni cayuni ni nabe. Zusisaca Jehová stipa ni cayúniluʼ ra cadi gusaanaluʼ laa ne zaguube ndaayaʼ lii (2 Sam. 22:26).

18. ¿Xi rusiidiʼ ejemplu stiʼ Marco ne Sidse laanu?

¹⁸ Guidúʼyanu ni bisaca Marco ne Sidse, xheelabe. Bisaana guiropaʼ baʼdudxaapaʼ stícabe Jehová. Hermanu ca guníʼ: «Dede ora rale ca xiiñiluʼ guizáʼ rannaxhiiluʼ laacaʼ. Ne rúniluʼ intiica cosa para gápaluʼ laacaʼ. Nga runi, ora gusaanacabe Jehová la? casi ñaca ñacadé ladxidoʼloʼ». Ne guníʼrube: «Peru Jehová huayacané laadu guni huantardu. Huayacanebe laadu cuʼsaadu gana laadu. Ora naa nuaaʼ triste pur ni bizaaca que la? nuucaʼ xheelaʼ para gacané naa ne cuʼ gana naa, ne ora laabe nuube triste la? naa riguaaʼ gana laabe». Ne hermana ca guníʼ: «Huayuni huantardu purtiʼ Jehová huadii laadu stipa. Nabé riuaaʼ triste purtiʼ riníʼ iqueʼ naa ngue napa donda bisaana ca xiiñeʼ Jehová. Ngue runi gudxeʼ ni Jehová. Despué, bidxiña ti hermana ra nuaaʼ ni maʼ napa iza qué huayuuyaʼ, gudixhe nabe xiqueʼ, biiyadxibe naa ne gúdxibe naa: “Sidse, bietenalaʼdxiʼ cadi lii nápaluʼ donda pur ni bizaaca ca”. Pur huayacané Jehová naa nayecheʼ cayuneʼ ni ná».

19. ¿Xi naguixhe íqueluʼ gúniluʼ?

¹⁹ Racalaʼdxiʼ Jehová gaca ca xpinni nadxibalú casi Sadoc (2 Tim. 1:7). Peru qué racalaʼdxiʼ Jehová guiníʼ íquenu stúbinu zanda, ni racaláʼdxibe nga gápanu confianza laabe. Nga runi, ora cadídinu lu xiixa guendanagana ra caquiiñeʼ gusihuínniluʼ nácaluʼ nadxibalú la? biyubi Jehová. Zanda chuʼluʼ seguru zacanebe lii gácaluʼ nadxibalú cásica Sadoc (1 Ped. 5:10).