1. ¿Xi maʼ biʼniʼ Jehová pur cada tobi de laanu?

MAʼ BICHIÑA JEHOVÁ cada tobi de laanu ra nuu (Juan 6:44). ¿Xi riníʼ ndiʼ yaʼ? Guníʼ ique ndiʼ, ora biʼyaʼ Jehová xi nuu ndaaniʼ ladxidóʼ guiráʼ binni nabeza lu Guidxilayú, biiyabe xiixa nabé risaca ndaaniʼ ladxidoʼno, biiyabe zanda gannaxhiinu laabe (1 Crón. 28:9). Runibiáʼ Jehová laanu, riene ne nadxii laanu. ¿Cadi dxandíʼ riguixhedxí ndiʼ ladxidoʼno la?

2. ¿Xi ejemplu gudixhe Jesús para guiénenu pabiáʼ nadxii Jehová cada tobi de laanu?

² Guizáʼ nadxii Jehová lii ne laaca nadxiibe ca hermanu stinu. Para ganda guiénenu guendarannaxhii stiʼ Jehová, gudixhe Jesús ti ejemplu. Pa napa ti pastor 100 dendxuʼ ne guiniti tobi de laacame, ¿xi zúnibe? «Zusaanabe 99 que lu ca dani ne ziyúbibe ni cananiti que», ne ora guidxélabe dendxuʼ ca la? qué zadxiichinebe laame, sínuque guizáʼ ziéchebe. ¿Xi rusiidiʼ ejemplu riʼ laanu? Rusiidiʼ ni laanu guizáʼ risaca cada dendxuʼ para Jehová, ni zeeda gaca casi ti pastor. Jesús guníʼ qué racalaʼdxiʼ Jehová «guiniti nin tobi de ca ni nahuiiniʼ» (Mat. 18:12-14).

3. ¿Xi zadúʼyanu lu artículo riʼ?

³ Qué racaláʼdxinu gúninu o guininu xiixa ni cuee gana ca hermanu stinu. Lu artículo riʼ zacábinu ca pregunta riʼ: ¿Xi zanda gúninu para cadi guninanu xcaadxi? Ne ¿xi gúninu pa bininácabe laanu? Peru ante la? guininu tuu nga «ca ni nahuiiniʼ» ni riete lu capítulo 18 stiʼ Mateo.

4. ¿Tuu nga «ca ni nahuiiniʼ»?

⁴ Laacabe nga guiráʼ ca xpinni Jesús. Biaʼ tiica iza nápacabe  zeeda gácacabe «casi xcuidihuiiniʼ» purtiʼ rudiicabe lugar gusiidiʼ Jesús laacabe (Mat. 18:3). Neca de gadxé gadxé lugar ne cultura laacabe, gadxé ni riuuláʼdxicabe ne gadxé modo laacabe guirácabe nápacabe fe Cristu. Ne guizáʼ nadxii Cristu laacabe (Mat. 18:6; Juan 1:12).

5. ¿Ximodo runi sentir Jehová ora chuʼ tuuxa guniná o guni pur guchee tobi de ca xpinni?

⁵ Guizáʼ risaca «ca ni nahuiiniʼ» para Jehová. Para guiénenu ximodo ruuyaʼ Jehová laacabe guiníʼ íquenu ximodo ridúʼyanu ca xcuidihuiiniʼ. Para laanu guizáʼ risaca ca xcuidihuiiniʼ, racaláʼdxinu gápanu laacabe purtiʼ huaxiéʼ stipa ne experiencia nápacabe ne qué gánnacabe biaʼ nanna ti binni huaniisi. Dxandíʼ qué riuuláʼdxinu ora cayacaná tuuxa binni, peru pa guidúʼyanu cayuniná tuuxa ti xcuidihuiiniʼ guizáʼ ridxiichinu. Zacaca rizaaca né Jehová, racalaʼdxiʼ gapa ca xpinni ne ora chuʼ tuuxa guniná o guni pur guchee tobi de laacaʼ guizáʼ ridxiichibe (Is. 63:9; Mar. 9:42).

6. Casi ná 1 Corintios 1:26-29, ¿ximodo ruuyaʼ binni guidxilayú ca xpinni Jesús?

⁶ ¿Xi sti modo zeeda gaca ca xpinni Jesús casi «ca ni nahuiiniʼ»? Guiníʼ íquenu, ¿tuu nga ca ni rusisaca binni guidxilayú? Ca binni ricu, ca famoso ne ca ni napa autoridad. Peru ca xpinni Jesús cadi zacá diʼ laacaʼ. Nga runi, ruuyaʼ binni laacabe casi «ca ni nahuiiniʼ» o ca ni huaxiéʼ risaca (biindaʼ 1 Corintios 1:26-29). Peru cadi zacá ruuyaʼ Jehová laacabe.

7. ¿Ximodo racalaʼdxiʼ Jehová guni tratarnu ca hermanu stinu?

⁷ Nadxii Jehová guiráʼ ca xpinni, neca huaxiéʼ tiempu de cayúnicaʼ ni nabe o maʼ zinecaʼ stale iza. Pa rusisaca Jehová ca hermanu stinu, laanu laaca naquiiñeʼ gúninu ni. Racaláʼdxinu gannaxhiinu «guiráʼ ca hermanu» ne cadi caadxi si (1 Ped. 2:17). Caquiiñeʼ chuʼnu dispuestu gacanenu ne gápanu ca hermanu stinu. Pa gánnanu bichiichinu o bininanu ti hermanu, cadi guiníʼ íquenu qué gápanu donda o guiníʼ íquenu nabé nadabe ne naquiiñeʼ gusiaandabe ni bíninu laabe. ¿Xi zándaca gucaa tuuxa guidxiichi yaʼ? Zándaca pur modo biniisibe o zándaca nacubi nuube ndaaniʼ xquidxi Jehová ne caʼruʼ guiziidibe guni perdonarbe ora guchee tuuxa. Intiica si cosa gucaa ca hermanu guidxiichi, caquiiñeʼ gúninu stipa chuʼnu tobi si né laacabe. Peru pa tuuxa nabé nagueenda ridxiichi, naquiiñeʼ guchaa modo laa. Naquiiñeʼ gúnibe ni ti zacá chuʼbe nayecheʼ ne chuʼbe tobi si né ca hermanu.

8. ¿Xi guníʼ ique ca discípulo stiʼ Jesús ne xiñee zaqué guníʼ íquecaʼ?

⁸ ¿Xiñee guníʼ Jesús de «ca ni nahuiiniʼ» yaʼ? Purtiʼ gunabadiidxaʼ ca discípulo stibe laabe: «¿Tuu nga ni jma risaca lu Reinu ni nuu guibáʼ?» (Mat. 18:1). Tiempu que, nabé guyuulaʼdxiʼ ca judíu guʼyaʼ xcaadxi laacaʼ casi binni risaca. Ti hombre ni nanna de Biblia guníʼ: «Nabé guyuulaʼdxiʼ ca binni que chuʼ tu gusisaca laacaʼ, gácacaʼ famoso, chuulaʼdxiʼ binni ni rúnicaʼ ne guni respetárcabe laacaʼ».

9. ¿Xi caquiiñeʼ guni ca discípulo stiʼ Jesús?

⁹ Nanna Jesús caquiiñeʼ guni ca discípulo stiʼ stipa ti gusaana de guiníʼ íquecaʼ casi riníʼ ique ca judíu. Sicaríʼ gúdxibe laacaʼ: «Ni gaca casi tobi ni huaniisi ládetu, naquiiñeʼ gaca casi tobi ni jma nahuiiniʼ, ne tobi ni guni dirigir la? naquiiñeʼ guni tender xcaadxi» (Luc. 22:26). Para ganda gácanu «casi tobi ni jma nahuiiniʼ» caquiiñeʼ guiníʼ íquenu jma risaca xcaadxi  que laanu (Filip. 2:3). Ora jma gúninu stipa pur guiníʼ íquenu zacá qué zuninanu ne qué zucaʼnu xcaadxi guchee.

10. ¿Xi conseju bidii apóstol Pablo naquiiñeʼ chinándanu?

¹⁰ Guiráʼ hermanu ne hermana nánnacaʼ gúnicaʼ xiixa ni laanu qué gánnanu. Ne qué raca nagana para laanu guiénenu ndiʼ ora ridúʼyanu ca cosa galán ni rúnicabe. Naquiiñeʼ chinándanu conseju bidii apóstol Pablo ca hermanu de Corinto, sicaríʼ gúdxibe laacaʼ: «¿Tu ná jma risácaluʼ que stobi yaʼ? ¿Cadi dxandíʼ nuu tu bidii lii guiráʼ ni nápaluʼ la? Yanna, pa nuu tu bidii ni lii, ¿xiñee runi presumirluʼ casi ora guirutiʼ nudii ni lii yaʼ?» (1 Cor. 4:7). Nga runi, cadi guyúbinu gusisaca xcaadxi laanu o guiníʼ íquenu jma risácanu que xcaadxi. Pa nanna ti hermanu gudii discursu o pa napa ti hermana stale estudiu, siempre naquiiñeʼ gudiicaʼ xquixe peʼ Jehová.

11. ¿Xi rizíʼdinu de ejemplu ni guníʼ Jesús stiʼ ti rey ne esclavu stiʼ?

¹¹ Despué de gudxi Jesús ca discípulo stiʼ cadi guninacaʼ o gucaacaʼ xcaadxi binni guchee, guniʼné laacabe ejemplu stiʼ ti rey ne tobi de ca esclavu stiʼ. Biʼniʼ perdonar rey riʼ esclavu stiʼ neca stale ni nuzaabiʼ laabe purtiʼ qué zanda quixe ni. Despué, qué niná esclavu riʼ ñuni perdonar sti esclavu ni jma huaxiéʼ nuzaabiʼ laa. Gunna si rey que ni bizaaca riʼ, guluu xa esclavu ni qué ñuni perdonar sti esclavu que ndaaniʼ cárcel. ¿Xi rizíʼdinu de ejemplu riʼ? Jesús guníʼ: «Zacaca zuni tratar Bixhozeʼ ni nuu guibáʼ laatu pa qué guni perdonartu ca bíʼchitu de guidubi ladxidoʼto» (Mat. 18:21-35).

12. ¿Xiñee zuninanu xcaadxi pa qué guni perdonarnu?

¹² Ni biʼniʼ esclavu riʼ bininá ni laa ne laaca bininá ni xcaadxi binni. Primé la? qué ñabe compañeru stibe «ne biʼniʼ mandarbe guieguyoo dede ora maʼ gudixe ni nuzaabiʼ». Ne laaca bininabe xcaadxi esclavu ni biʼyaʼ ni bíʼnibe que. Jesús guníʼ: «Ora biʼyaʼ xcaadxi esclavu que ni bíʼnibe, nabé bidxiichicaʼ». Zaqueca nga laanu, ni gúninu zanda gacané o guniná ni xcaadxi. Pa guni tratar ti hermanu laanu mal ne qué guni perdonarnu laa, ¿xi zándaca guizaaca yaʼ? Zándaca guninanu laa, zaca nagana para laanu gannaxhiinu laa o dede maʼ qué zanínenu laa. Laaca zándaca guni sentir ca hermanu de congregación mal purtiʼ caʼruʼ guni perdonarnu binni ca.

13. ¿Xi rizíʼdinu de ni bizaaca ti precursora?

¹³ Pa guni perdonarnu ca hermanu stinu ziuʼnu galán ne laaca ziuu xcaadxi binni galán. Nga nga ni bizaaca ti precursora ni láʼ Crystal. * Rietenaláʼdxibe pabiáʼ feu modo biʼniʼ tratar ti hermana de congregación laabe. Sicaríʼ guniʼbe: «Nabé naná ca diidxaʼ ni gúdxibe naa, casi ñaca nutaabibe ti gudxiú naa. Ora maʼ ziguni predicardu, qué rinaʼyaʼ chaaʼ ndaaniʼ carru ra zebe. Maʼ qué ñuaaʼ nayecheʼ ne maʼ qué ñapaʼ gana guneʼ predicar». Guníʼ ique Crystal napa razón para guidxiichi, peru qué nidaa xiana ne qué nudii lugar ñuniná ni cayuni sentir que laa. Gúcabe humilde ne yenándabe ca conseju stiʼ Biblia ni zeeda lu artículo ni láʼ «Perdonemos de corazón», ni biree lu La Atalaya 15 de octubre de 1999. Ngue runi biʼniʼ perdonarbe hermana que. Laabe guniʼbe:  «Yanna maʼ rieneʼ guiranu nga cayúninu stipa pur guibáninu modo ná Dios ne laaca maʼ bieneʼ runi perdonar Jehová laanu guiráʼ dxi. Runeʼ sentir maʼ nuaaʼ galán yanna ne maʼ nuaaʼ nayecheʼ sti biaje».

14. a) Casi ná Mateo 18:21, 22, ¿xi guendanagana zándaca gupa apóstol Pedro, ne xi riziidiluʼ de modo bicabi Jesús laabe? b) ¿Xi zanda gacané laanu pa cazaacanu ni bizaaca Pedro?

¹⁴ Nánnanu caquiiñeʼ guni perdonarnu. Neca zacá, zándaca gácani nagana para laanu. Nga ca nga ni bizaaca apóstol Pedro caadxi biaje (biindaʼ Mateo 18:21, 22). ¿Xi zanda gacané laanu yaʼ? Primé, naquiiñeʼ guiníʼ íquenu panda biaje maʼ biʼniʼ perdonar Jehová laanu (Mat. 18:32, 33). Qué gapa Jehová xi pur guni perdonar laanu, peru rúnibe ni stale biaje (Sal. 103:8-10). Zaqueca laanu «laaca nuunu obligadu gannaxhiisaanu». Nga runi, cadi cayabi Jehová laanu pa zanda guni perdonarnu, naquiiñeʼ gúninu ni (1 Juan 4:11). Guiropa cosa ni zacané laanu nga guiníʼ íquenu xi rizaaca ora runi perdonarnu. Racanenu binni ni biʼniʼ tratar laanu mal, racanenu chuʼ congregación tobi si, qué rusaana de gaca xhamígunu Jehová ne riuʼnu nayecheʼ (2 Cor. 2:7; Col. 3:14). Guionna cosa ni zacané laanu nga guni orarnu Jehová purtiʼ laa rinabaʼ laanu guni perdonarnu xcaadxi. Cadi gudiʼnu lugar guxheleʼ Binidxabaʼ laanu de ca hermanu stinu (Efes. 4:26, 27). Caquiiñenu gacané Jehová laanu para cadi guiábanu lu ca trampa stiʼ Binidxabaʼ.

15. Casi ná Colosenses 3:13, ¿xi caquiiñeʼ gúninu pa guni ti hermanu o hermana xiixa ni guchiichi laanu?

¹⁵ Ne pa guni ti hermanu xiixa ni guchiichi laanu yaʼ. Caquiiñeʼ gúninu stipa cadi chuʼdindenenu laabe. Guni orarnu  Jehová ne gábinu laa xi cayuni sentirnu. Guinábanu Jehová gacané hermanu ni bichiichi laanu ne gacané laanu guidúʼyanu hermanu riʼ casi ruuyabe laa (Luc. 6:28). Pa qué ganda gusiáʼndanu ni bíʼnibe laanu, guyúbinu ti ora guinínenu laabe. Jma galán guiníʼ íquenu qué ñúnibe ni para guninabe laanu (Mat. 5:23, 24; 1 Cor. 13:7). Ora guinínenu laabe guiníʼ íquenu cadi laapebe gúpabe donda. Peru pa qué nabe guni chaahuibe ca cosa ca yaʼ. Biblia ná: «Laguni huantarsaa». Cadi guireʼnu gana ne gápanu paciencia hermanu stinu (biindaʼ Colosenses 3:13). Ne ni jma risaca, cadi guidaʼnu xiana purtiʼ zuxheleʼ ni laanu de Jehová. Cadi gudiʼnu lugar gucaa ni laanu gucheʼnu. Zacá zusihuínninu nadxiinu Jehová (Sal. 119:165).

16. ¿Xi naquiiñeʼ guni cada tobi de laanu?

¹⁶ ¡Guizáʼ riéchenu purtiʼ nácanu «ti grupu si» de dendxuʼ ni runi ni ná Jehová ne nápanu «ti pastor si»! (Juan 10:16). Libru Organizados para hacer la voluntad de Jehová, yaza 165 ná: «Naquiiñeʼ gúninu stipa chuʼnu tobi si». Ne laaca ruzeeteʼ ni: «Ziuʼnu galán pa guizíʼdinu guidúʼyanu ca hermanu stinu cásica ruuyaʼ Jehová laacaʼ». Ruuyaʼ Jehová laanu casi «ca ni nahuiiniʼ» ne guizáʼ rusisaca laanu. Ne zacaca naquiiñeʼ guidúʼyanu ca hermanu stinu. Cadi guiaandaʼ laanu ruuyaʼ Jehová ne rusisaca guirá ni rúninu pur gacanenu ne gápanu laacabe (Mat. 10:42).

17. ¿Xi maʼ gudixhe íquenu gúninu?

¹⁷ Nadxiinu ca hermanu stinu. Nga runi quixhe íquenu cadi gúninu «xiixa ni gusirá fe stiʼ tuuxa hermanu o ni cueechú laa» (Rom. 14:13). Guiníʼ íquenu jma risaca ca hermanu stinu que laanu ne guni perdonarnu de guidubi ladxidoʼno. Cadi gudiʼnu lugar ni guni xcaadxi guniná o gucaa laanu gucheʼnu, sínuque «gúninu biaʼ gándatiʼ para chuʼnu en paz né binni ne para gacanésaanu» (Rom. 14:19).