Pablo bicaa: «Maʼ guteʼ para ley, laani biitini naa ti guibaneʼ para Dios» (Gál. 2:19).

Bicaa Pablo ca diidxaʼ riʼ dxi cusiene ti cosa nabé risaca para ca congregación ni nuu Galacia. Guyuu caadxi xpinni Cristu yenándacaʼ ni rusiidiʼ ca maestru falsu. Bisiidiʼ ca hombre riʼ para guicaa binni guendanabani naquiiñeʼ chinanda ni zeeda lu Ley stiʼ Moisés, ne gaca circuncidarcaʼ. Peru nanna Pablo maʼ cadi canabaʼ Dios gaca circuncidar ca xpinni. Bisihuinni Pablo cadi jneza ni rusiidiʼ ca hombre que ne biquídxibe fe ni napa ca hermanu lu guendaguti stiʼ Jesucristu (Gál. 2:4; 5:2).

Biblia ná ora maʼ guti ti binni maʼ qué ganna gastiʼ (Ecl. 9:5). Ora guníʼ Pablo «maʼ guteʼ para ley», caniʼbe maʼ cadi naquiiñeʼ chinándabe ni ná lu Ley stiʼ Moisés. Peru nánnabe pur fe ni nápabe lu guendaguti stiʼ Cristu maʼ bibánibe para Dios.

¿Ximodo nga bibani Pablo para Dios pur Ley que yaʼ? Sicaríʼ bisiénebe: «Qué raca diʼ ti binni nachaʼhuiʼ purtiʼ si guni ni ná ley, sínuque pur fe ni nápabe Jesucristu» (Gál. 2:16). Nabé gucané Ley que stale binni. Pablo gudxi ca hermanu de Galacia: «Guʼtaʼ ni para guihuinni paraa cuchee binni laga si gueeda xiiñiʼ Abrahán, binni bidii Dios promesa que» (Gál. 3:19). Bisihuinni Ley que qué zanda chinanda binni imperfectu ne pecador guiráʼ ni zeeda luni, caquiiñecabe tuuxa perfectu ni quixe ca donda stícabe tobi si tiru. Ngue runi gucané Ley que guidxi que gudii cuenta Jesús nga «xiiñiʼ Abrahán» ni gueeda que. Pa gapa tuuxa fe Jesucristu zanda guiníʼ Dios naca ti binni nachaʼhuiʼ (Gál. 3:24). Guca Pablo ti binni nachaʼhuiʼ purtiʼ pur Ley que biʼniʼ crebe Jesús ne gúpabe fe laa. Zaqué nga beeda gati Pablo para Ley ne bibani para Dios. Maʼ qué ninanda Pablo ni ná Ley stiʼ Moisés, peru bíʼnibe ni ná Dios.

Zacagá bizeeteʼ Pablo lu carta ni bicaa para ca xpinni Cristu de Roma: «Hermanu stinneʼ caʼ, laatu laaca maʼ gútitu para Ley pur cuerpu stiʼ Cristu [...]. Peru yanna maʼ nuunu libre de Ley. Dxiqué biʼniʼ mandarni laanu, peru yanna maʼ gútinu para laani» (Rom. 7:4, 6). Lu ca versículo riʼ ne lu Gálatas 2:19, cadi caníʼ diʼ Pablo naquiiñeʼ gatiʼ casi ti binni pecador purtiʼ qué ninanda ni ná Ley, sínuque caniʼbe zácabe libre de Ley que. Maʼ cadi naquiiñeʼ chinanda Pablo nin xcaadxi xpinni Cristu ni ná Ley stiʼ Moisés, purtiʼ maʼ libre laacaʼ pur fe ni nápacaʼ lu guendaguti stiʼ Cristu.