1. ¿Xiñee nuu biaje runi sentir caadxi xpinni Jehová nuucaʼ stúbicaʼ?

ZÁNDACA guiranu huayuu biaje huayuni sentirnu nuunu stúbinu. Nuu tu laa ti ratu si runi sentir zacá, peru nuu xcaadxi binni raca nagana para laa gusaana de guni sentir nuu stubi. Laaca nuu tu laa runi sentir nuu stubi neca nuu stale binni gaxha de laa. Nuu tu laa raca nagana para laa guiaa ti congregación nacubi, ne nuu tu laa riuu triste pur bisaana familia stiʼ ora rindeza sti lugar, purtiʼ maʼ biaa chuʼ gaxha de laacabe. Laaca nuu tu laa maʼ guti ti binni ni nadxii ne guizáʼ ribanaʼ laabe. Ne nuu caadxi xpinni Cristu ni nacubi guyuu ndaaniʼ xquidxi Dios, runi sentircaʼ nuucaʼ stúbicaʼ purtiʼ rucaanáʼ familia sticaʼ laacaʼ ne ca ni guca xhamígucaʼ ni cadi naca Testigu.

2. ¿Xi pregunta zacábinu lu artículo riʼ?

² Runibiáʼ ne riene Jehová laanu. Nga runi nánnabe pora runi sentirnu nuunu stúbinu ne racaláʼdxibe gacanebe laanu. Lu artículo riʼ zacábinu ca pregunta riʼ: ¿ximodo racané Jehová laanu para cadi guiníʼ íquenu nuunu stúbinu?, ¿xi zanda gúninu pa cayuni sentirnu nuunu stúbinu? ne ¿ximodo zanda gacanenu ca hermanu de congregación ni cayuni sentir nuu stubi?

3. ¿Ximodo bisihuinni Jehová nanna xi cayuni sentir Elías?

³ Guizáʼ rizaalaʼdxiʼ Jehová chuʼ ca xpinni galán. Nuube  gaxha de cada tobi de laanu ne nánnabe pora maʼ careʼnu gana (Sal. 145:18, 19). Guidúʼyanu ximodo gucanebe profeta Elías. Bibani profeta riʼ tiempu jma guyuu guendanagana ndaaniʼ guidxi Israel. Guzananda binni ni napa autoridad ca xpinni Dios ne guyuucaʼ ñuuticaʼ Elías(1 Rey. 19:1, 2). Guníʼ ique Elías maʼ laasi profeta stiʼ Jehová nabani tiempu que, ngue runi guizáʼ bidxibi (1 Rey. 19:10). Peru gucané Jehová Elías. Biseendaʼ ti ángel ra nuube para gabi laabe cadi stúbibe nuube ne nuuruʼ stale israelita ni runi ni ná Dios (1 Rey. 19:5, 18).

4. ¿Ximodo rusihuinni ni ná Marcos 10:29, 30 rizaalaʼdxiʼ Jehová cani maʼ bisaana familia stiʼ laa?

⁴ Nanna Jehová maʼ bíninu stale sacrificiu para gúninu ni ná. Zándaca maʼ bisaana familia stinu ne ca xhamígunu laanu. Ti biaje, nuu apóstol Pedro xizaa gudxi Jesús: «Maʼ bisaanadu guiráʼ cosa para guedanándadu lii. ¿Xi nuu para laadu yaʼ?» (Mat. 19:27). Né diidxaʼ nadóʼ gudxi Jesús ca discípulo stiʼ zápacaʼ ti familia naroʼbaʼ ni runi ni ná Dios (biindaʼ Marcos 10:29, 30). Ne Jehová, Bixhózenu ni nuu guibáʼ, zacané ca ni runi ni ná (Sal. 9:10). Guidúʼyanu ximodo zanda chuʼnu gaxha de familia ni maʼ bidii Jehová laanu para cadi guni sentirnu stúbinu.

5. ¿Xiñee galán guiníʼ íquenu ximodo huayacané Jehová laanu?

⁵ Guiníʼ íquenu ximodo cayacané Jehová laanu (Sal. 55:22). Ndiʼ zacané laanu cadi guiníʼ íquenu nuunu stúbinu. Ti hermana soltera láʼ Carol, * ni laasi naca Testigu ndaaniʼ familia stiʼ guníʼ: «Ni racané naa para cadi guneʼ sentir nuaaʼ stubeʼ nga guiníʼ iqueʼ ximodo huayacané Jehová naa ora huayapaʼ guendanagana. Ne racané ndiʼ naa gana dxicheʼ que lica zusaana Jehová naa».

6. ¿Ximodo racané ni ná 1 Pedro 5:9, 10 ca ni runi sentir nuu stubi?

⁶ Guiníʼ íquenu ximodo cayacané Jehová ca hermanu ni runi sentir nuu stubi  (biindaʼ 1 Pedro 5:9, 10). Ti hermanu láʼ Hiroshi ni laasi naca Testigu ndaaniʼ familia stiʼ maʼ xadxí, guníʼ: «Ndaaniʼ congregación, guiranu nga nápanu guendanagana. Ora qué riaandaʼ laanu cayúninu ni ná Jehová de guidubi ladxidoʼno, riguuni gana ca hermanu ne ca hermana ni napa familia ni cadi Testigu».

7. ¿Ximodo racané oración lii?

⁷ Cadi gusaana de guni orarnu, guidúʼndanu Biblia ne chuunu reunión. Nabé risaca gábinu Jehová guiráʼ ni nuu ndaaniʼ ladxidoʼno ne ni runi sentirnu (1 Ped. 5:7). Guidúʼyanu xi guníʼ Massiel, ti hermana ni bisaana familia stiʼ laa purtiʼ runi ni ná Jehová: «Tobi de ca cosa ni jma gucané naa cadi guneʼ sentir nuaaʼ stubeʼ nga guneʼ orar Jehová né guiráʼ stipa stinneʼ. Ruuyaʼ laabe casi Bixhozeʼ. Rinieniáʼ laabe guiráʼ dxi, runeʼ ni stale biaje ne rabeʼ laabe xi cayuneʼ sentir».

8. Ra gúʼndaluʼ Stiidxaʼ Dios ne guiníʼ íqueluʼ ni cayuundaluʼ, ¿ximodo zacané ni lii?

⁸ Laaca nabé risaca guidúʼndanu Stiidxaʼ Dios guiráʼ dxi ne guiníʼ íquenu lu ca relatu ni rusietenalaʼdxiʼ laanu pabiáʼ nadxii Jehová laanu. Bianca, ti hermana ni napa xidé guni huantar ca cosa ni rabi familia stiʼ laa guníʼ: «Ni racané naa nga guundaʼ ca historia ni zeeda lu Biblia ne historia stiʼ ca xpinni Jehová ni cadiʼdiʼ lu ca guendanagana ni cadideʼ ne guiníʼ iqueʼ xi zanda guiziideʼ de laacani». Nuu xcaadxi hermanu riziidicaʼ textu de memoria ni riguu gana laacaʼ, casi Salmo 27:10 ne Isaías 41:10. Ne nuu tu laa raca preparar para reunión o riquiiñeʼ grabación ni nuu lu audio ora ruundaʼ Biblia. Racané ca cosa riʼ laacabe para cadi guni sentírcabe nuucabe stúbicabe.

9. ¿Ximodo racané ca reunión lii?

⁹ Naquiiñeʼ gúninu stipa para cadi guiáʼdxanu reunión, purtiʼ riuʼnu gana ora riuunu ne racaneni laanu gunibiáʼ chaahuinu ca hermanu (Heb. 10:24, 25). Massiel, hermana ni bizéʼtenu lu párrafo gadxe que guníʼ: «Neca nacaʼ ti binni natuí, bineʼ stipa cadi guiaadxaʼ nin ti reunión ne gudieeʼ ti comentariu. Gucané ndiʼ naa para guneʼ sentir nacaʼ parte de congregación».

10. ¿Xiñee nabé risaca gaca xhamígunu ca hermanu ni nadxii Jehová?

¹⁰ Gaca xhamígunu ca hermanu ni nadxii Jehová. Gaca xhamígunu ca hermanu ni zanda gacané laanu neca cadi biaʼca laanu laacaʼ o gadxé cultura laacaʼ. Biblia rabi laanu nuu xpiaaniʼ ca binni ni maʼ huaniisi (Job 12:12). Laaca zanda guiziidiʼ ca hermanu ni maʼ huaniisi de  ca joven. Jma nahuiiniʼ David que Jonatán peru guizáʼ guca xhamígucaʼ (1 Sam. 18:1). Guirópacabe bíʼnicabe stipa gúnicabe ni ná Jehová neca bidxaagalúcabe guendanagana (1 Sam. 23:16-18). Irina, ti hermana ni cadi Testigu familia stiʼ, guníʼ: «Zanda gueeda gaca ca hermanu ne hermana bixhózenu, jñaanu, bendanu o bizáʼnanu. Zanda iquiiñeʼ Jehová laacabe para gácacabe familia ni caquiiñenu».

11. ¿Xi caquiiñeʼ gúninu para gápanu xhamígunu ni gacané laanu?

¹¹ Zándaca raca nagana para caadxi hermanu guidxélacaʼ tu gaca xhamígucaʼ, jmaruʼ si pa natuicaʼ. Guidúʼyanu ni guníʼ Ratna, ti hermana ni natuí ne biʼniʼ huantar ora bicaalúcabe laa purtiʼ caziidiʼ de lu Biblia. Laa guníʼ: «Bidieeʼ cuenta caquiiñeʼ gacané ca hermanu ne ca hermana naa». Zándaca gaca nagana para laanu gábinu tuuxa xi cazaacanu, peru pa gúninu ni la? jma zaca xhamígunu laa. Cadi guiaandaʼ laanu, racalaʼdxiʼ ca xhamígunu cuʼcaʼ gana ne gacanecaʼ laanu. Peru naquiiñeʼ gábinu laacabe xi cayuni sentirnu.

12. Ora runi predicarnu, ¿ximodo racaneni laanu para guidxélanu xhamígunu?

¹² Sti modo zanda guidxélanu tu gaca xhamígunu nga ora guni predicarnu né ca hermanu ne ca hermana. Carol, hermana ni bizéʼtenu lu párrafo gaayuʼ que, guníʼ: «Huadxelaʼ hermana gaca xhamigaʼ ora riguneʼ predicarniaʼ laacaʼ ne ora rúnidu xcaadxi cosa lu xhiiñaʼ Dios. Lu ca iza ni maʼ gudiʼdiʼ riʼ, huaquiiñeʼ Jehová ca xhamigaʼ para gacanecaʼ naa». Nabé risaca guyúbinu gaca xhamígunu ca binni ni nadxii Jehová. Riquiiñeʼ Jehová laacabe para gacané laanu ora cadídinu ra nagana casi ora cayuni sentirnu nuunu stúbinu (Prov. 17:17).

13. ¿Xi caquiiñeʼ guni guiranu?

¹³ Guiranu zanda gacanenu chuʼ guendarannaxhii ne chuʼnu tobi si ndaaniʼ congregación. Zacá guirutiʼ zuni sentir nuu stubi (Juan 13:35). Ni gúninu ne ni guininu, zanda cuʼ ni gana xcaadxi. Ti hermana guníʼ: «Ora biziideʼ de Jehová, beeda gaca ca hermanu ne ca hermana familia stinneʼ. Pa qué ñacanécabe naa la? qué ñanda diʼ ñacaʼ ti testigu stiʼ Jehová». ¿Xi zanda gúninu para gacanenu ca hermanu ni cadi Testigu familia stiʼ guni sentircaʼ nácacaʼ parte de congregación yaʼ?

14. ¿Ximodo zanda gaca xhamígunu ca ni nacubi ndaaniʼ congregación?

¹⁴ Guyúbinu gaca xhamígunu xcaadxi. Zanda gúninu ni ra guzulú guidxaagalunu ca ni nacubi ndaaniʼ congregación (Rom. 15:7). Peru cadi ngasi, ra tidiʼ tiempu naquiiñeʼ guyúbirunu gaca xhamígunu laacabe. Para nga la? naquiiñeʼ gácanu nachaʼhuiʼ ne gusihuínninu rizaaláʼdxinu ca ni nacubi. Gúninu stipa guiénenu ca guendanagana ni nápacabe, peru sin chuʼnu lu xpídacabe purtiʼ nuu tu laa zándaca raca nagana para laa guiníʼ xi cayuni sentir, nga runi naquiiñeʼ gápanu cuidadu cadi guni obligarnu laacabe guiníʼcabe. Ni zanda gúninu nga guinabadiidxanu laacabe né diidxaʼ nadóʼ ne gucaadiáganu laacabe né paciencia. Guzéʼtenu ti ejemplu, zanda guzulú guinabadiidxanu laacabe ximodo bizulú biziidicabe de Jehová.

15. ¿Ximodo zanda gacané ca hermanu ni naguidxi fe stiʼ xcaadxi hermanu ni nuu ndaaniʼ congregación?

 ¹⁵ Ora ca hermanu ni naguidxi nuu fe stiʼ, jmaruʼ si ca ancianu, rizaaláʼdxicaʼ xcaadxi hermanu naguidxi riuu congregación. Melissa, ti hermana ni bisiidiʼ jñaa laa de lu Biblia, guníʼ: «Qué gapaʼ diidxaʼ para gudieeʼ xquixe ca hermanu ni beeda gaca casi bixhozeʼ. Siempre bicaadiágacaʼ naa ora caquiiñeʼ guinieniáʼ laacaʼ». Guidúʼyanu ni bizaaca Mauricio, ti hermanu joven, guyuube triste dxi beeda gaca hermanu ni bisiidiʼ laabe de lu Biblia inactivu. Sicaríʼ guniʼbe: «Tobi de ca cosa ni jma gucané naa nga ora bizaalaʼdxiʼ ca ancianu naa. Guleecabe tiempu para guiniʼnécabe naa, yenécabe naa predicación, guniʼnécabe naa de xiixa perla ni bidxélacabe ra bíʼndacabe Biblia ne dede yegúnidu deporte». Tiempu riʼ, cayuni servir Melissa ne Mauricio Betel.

16, 17. ¿Gunáʼ nga caadxi modo zanda gacanenu ca hermanu stinu?

¹⁶ Gacanenu ca hermanu (Gál. 6:10). Sicaríʼ guníʼ Leo, ti misioneru ni runi servir zitu de familia stiʼ: «Nuu biaje ni caquiiñeʼ tuuxa nga gacanécabe laa ora caquiiñeʼ ni. Rietenalaʼdxeʼ ni bizaacaʼ dxi gupaʼ ti accidente né carru stinneʼ. Ora yendayaʼ ra lidxeʼ guizáʼ cadxibeʼ. Peru biʼniʼ invitar ti guendaxheelaʼ naa ra lidxi para guidoʼdo xiixa. Qué rietenalaʼdxeʼ xi gudoʼdo dxi que, peru qué ziaandaʼ naa modo biʼniʼ tratárcabe ne bicaadiágacabe naa. Ngue gucané naa guneʼ sentir galán».

¹⁷ Guiranu riéchenu ora riuunu asamblea purtiʼ ridúʼyanu ca hermanu ne rinínenu laaca de ni rizíʼdinu lu programa ca. Guidúʼyanu xi guníʼ Carol, hermana ni maca bizéʼtenu que: «Guizáʼ raca nagana para naa ora riaaʼ asamblea, purtiʼ neca nuu stale hermanu ne hermana raqué, stale de laacabe nuucabe né familia stícabe. Nabé runeʼ sentir stubeʼ». Nuu stale hermanu raca nagana para laacaʼ checaʼ asamblea despué de guti xheelacaʼ. ¿Ñee runibiaʼnu tuuxa ni cadiʼdiʼ lu ca guendanagana riʼ la? ¿Ñanda ñuni invitarnu laabe nibínebe laanu lu sti asamblea ca la?

18. Casi ná 2 Corintios 6:11-13, ¿ximodo zanda gusihuínninu nácanu hospitalariu?

 ¹⁸ Chuʼnu gaxha de ca hermanu ne de ca hermana. Ora chigúninu xiixa, gúninu stipa guni invitarnu ca hermanu ne ca hermana jmaruʼ si ca ni cayuni sentir nuu stubi. Racaláʼdxinu guidxíñacabe laanu ne gaca xhamígunu laacabe casi ñaca nuxhélenu ladxidoʼno para laacabe (biindaʼ 2 Corintios 6:11-13). Melissa, hermana ni bizéʼtenu lu párrafo 15 que guníʼ: «Naa ne jñaaʼ, riéchedu ora runi invitar caadxi familia laadu ra lidxi o chizánecaʼ laadu paxaraa». ¿Ñee nuu tuuxa ndaaniʼ congregación stinu ni ñanda nusihuínninu nácanu hospitalariu né laa la?

19. ¿Pora nga caquiiñeʼ ca hermanu chuʼnu gaxha de laacaʼ?

¹⁹ Nuu dxi, guizáʼ ñuulaʼdxiʼ ca hermanu ñuʼnu gaxha de laacaʼ. Guzéʼtenu caadxi ejemplu, zándaca raca ni nagana para hermanu ni cadi Testigu familia stiʼ ora runi familia sticaʼ xiixa saa. Ne xcaadxi hermanu riuucaʼ triste ora rusaa tuuxa binni ni nadxiicaʼ iza de guti. Ora cueenu tiempu para chuʼnu gaxha de ca hermanu riʼ, rusihuínninu dxandíʼ rizaaláʼdxinu laacaʼ (Filip. 2:20).

20. ¿Ximodo zanda gacané ca diidxaʼ ni zeeda lu Mateo 12:48-50 laanu ora guni sentirnu stúbinu?

²⁰ Nuu stale cosa ni zanda gucaa laanu guni sentirnu nuunu stúbinu. Peru cadi guiaandaʼ laanu nanna Jehová ximodo runi sentirnu ne zanda iquiiñeʼ ca hermanu ne ca hermana para gacané laanu (biindaʼ Mateo 12:48-50). Zanda gusihuínninu rudiʼnu xquixe peʼ Jehová ora gacanenu ca hermanu ne ca hermana stinu. Neca chuʼ ora guni sentirnu stúbinu la? cadi zacádini purtiʼ cayacané Jehová laanu ne nuu gaxha de laanu.