1. Ora gunabadiidxaʼ stale binni xi naquiiñeʼ gúnicaʼ, ¿xi gudxi Pedro laacaʼ?

ZEEDA stale hombre ne gunaa Jerusalén. Zeedacaʼ de gadxé gadxé guidxi ne gadxé gadxé idioma riniʼcaʼ. Dxi que bizaaca ti cosa nabé risaca, málasi bizulú caníʼ caadxi judíu idioma stiʼ ca binni que. Peru ni jma risaca bizaaca dxi que nga ni gudxi ca judíu que ca binni que, ne ni gudxi apóstol Pedro laacaʼ. Tobi de ca cosa ni gudxi Pedro laacabe nga, zanda guilácabe pa gápacabe fe Jesucristu. Yendá ca diidxaʼ riʼ ndaaniʼ ladxidóʼ ca binni riʼ, ngue runi gunabadiidxacaʼ: «¿Xi naquiiñeʼ gúnidu yaʼ?». Para bicabi Pedro laacabe: «Chúʼnisa cada tobi de laatu» (Hech. 2:37, 38).

2. ¿Xi zazíʼdinu lu artículo riʼ? (Biiyaʼ foto ni zeeda lu portada).

² Sti cosa risaca ni bizaaca dxi que nga, guyuunisa biaʼ 3,000 binni ne beeda gácacaʼ discípulo stiʼ Cristu. Zaqué nga bizulú dxiiñaʼ ni biʼniʼ mandar Jesús ca xpinni, laani nga gacanecaʼ binni gaca discípulo. Ne dede yanna cayaca dxiiñaʼ ca. Ca dxi stinu riʼ, caquiiñeʼ tidiʼ tiempu para ganda gacanenu ti binni chúʼnisa. Para chúʼnisa ti estudiante la? zándaca caquiiñeʼ tidiʼ beeu o iza. Ca hermanu ni rudii estudiu nánnacaʼ naquiiñeʼ gúnicaʼ stipa para gacanecaʼ ca estudiante sticaʼ chuʼnísacaʼ. Lu artículo riʼ zazíʼdinu xi naquiiñeʼ gúninu para gacanenu ca estudiante stinu chuʼnísacaʼ.

3. Casi ná Mateo 28:19, 20, ¿xi naquiiñeʼ guni ti estudiante para chúʼnisa?

³ Ante chúʼnisa ti estudiante, naquiiñeʼ guni ni caziidiʼ de lu Biblia (biindaʼ Mateo 28:19, 20). Pa gúnibe ni, zeeda  gácabe casi «hombre nuu xpiaaniʼ» ni bizeeteʼ Jesús lu ejemplu ni guníʼ, hombre riʼ gundaa ti base gueteʼ para gucuí lidxi lu guié (Mat. 7:24, 25; Luc. 6:47, 48). Guidúʼyanu chonna cosa ni zanda gúninu para gacanenu estudiante stinu guni ni caziidiʼ.

4. ¿Ximodo zanda gacanenu estudiante stinu guni progresar ne chúʼnisa? (Biiyaʼ cuadru ni láʼ « Gucané estudiante stiluʼ quixhe ique ugaanda xiixa meta ne gúnini»).

⁴ Gacanenu estudiante stinu quixhe ique ugaanda xiixa meta. ¿Xiñee risaca gúninu ni yaʼ? Guzéʼtenu ti ejemplu, pa ziuunu ti lugar zitu, ne ziuunu a pie, zándaca zuzuhuáʼdxinu caadxi lugar ti cadi gaca viaje ca nagana ne zitu para laanu. Zacaca nga zanda guizaaca ora quixhe ique estudiante stinu ugaanda xiixa meta ante chúʼnisa, pa ugaandabe caadxi meta tobi gá la? zándaca zudiibe cuenta cadi nagana ugaanda chúʼnisabe. Zanda iquiiñenu cuadru ni láʼ «Biʼniʼ stipa gúniluʼ ndiʼ» ni zeeda lu libru Zanda guibániluʼ nayecheʼ para gacanenu estudiante ca guni progresar. Ora guiluxe guidúʼndanenu laabe ti lección, gusiénenu ximodo zanda gacané ni biziidibe ca laabe ugaandabe chuʼnísabe. Pa racaláʼdxinu gacanenu laabe ugaandabe sti cosa, gucaʼnu ni ra ná «Sti cosa ni zanda gúniluʼ». Ora guiluxe guidúʼndanenu estudiante ca ti lección, gusietenaláʼdxinu laabe xi cosa cá íquebe ugaandabe nagueenda ne xi cosa cá íquebe ugaandabe despué.

5. Casi ná Marcos 10:17-22, ¿xi gudxi Jesús ti hombre ricu, ne xiñee?

⁵ Gacanenu estudiante stinu guchaa modo nabani (biindaʼ Marcos 10:17-22). Gudxi Jesús ti hombre ricu gutoo guiráʼ ni napa, neca nanna zácani nagana para laabe (Mar. 10:23). ¿Xiñee gunabaʼ Jesús ndiʼ hombre ricu riʼ yaʼ? Purtiʼ nadxii laabe.  Zándaca nuu biaje qué zábinu estudiante stinu naquiiñeʼ guni ni caziidiʼ purtiʼ riníʼ íquenu cadi nuu listu para gúnini. Peru cadi guiaandaʼ laanu, riné tiempu para guibani ti binni modo cusiidiʼ Dios (Col. 3:9, 10). Nga runi, pa jma nagueenda guinínenu estudiante ca de tema riʼ jma nagueenda zúnibe ni caziidibe. Ne ora gábinu ndiʼ laabe zusihuínninu nadxiinu laabe (Sal. 141:5; Prov. 27:17).

6. ¿Xiñee risaca gúninu pregunta estudiante stinu?

⁶ Nabé risaca gúninu pregunta estudiante stinu para gánnanu xi riníʼ ique ne xi runi cré. Pa siempre guinabadiidxanu laabe, qué zaca nagana para laanu guinínenu laabe de tema ni zándaca gaca nagana guiénebe. Lu libru Zanda guibániluʼ nayecheʼ, zeeda caadxi pregunta ni zanda gúninu ca estudiante stinu. Lu lección 4 zeeda pregunta riʼ: «¿Ximodo rábiluʼ runi sentir Jehová ora guiniʼluʼ lá?». Ne lu lección 9 zeeda sti pregunta: «¿Xi ñuuláʼdxiluʼ nuzeeteluʼ lu ca oración stiluʼ?». Zándaca ora guzulunu gudiʼnu estudiu naquiiñeʼ cuézanu guicabi estudiante ca pregunta ni gúninu laa. Peru pa qué guicábibe la? zanda gacanenu laabe ora iquiiñenu textu ni zeeda lu Biblia ne ca imagen ni zeeda lu ca lección stiʼ libru ca para guicábibe.

7. ¿Ximodo zanda iquiiñenu experiencia stiʼ xcaadxi hermanu para gacanenu estudiante stinu?

⁷ Ora maʼ biene estudiante ca xi naquiiñeʼ guni, iquiiñenu experiencia stiʼ xcaadxi hermanu para gacanenu laabe gúnibe ni caziidibe. Guzéʼtenu ti ejemplu, pa raca nagana para laabe chebe reunión, guluinu laabe videu ni láʼ Rizaalaʼdxiʼ Jehová naa, ni zeeda lu sección «Biiyaʼ xiruʼ zanda guiziidiluʼ», stiʼ lección 14. Lu stale lección stiʼ libru Zanda guibániluʼ nayecheʼ zeeda experiencia lu sección «Guizíʼdirunu jma» ne «Nuu tu ná». * Cadi naquiiñeʼ guchaaganu estudiante stinu ne sti binni ne cadi gábinu laa: «Pa binni ca gunda biʼniʼ ni la? lii laaca zanda gúniluʼ ni». Gudiʼnu lugar stúbibe gudiibe cuenta xi naquiiñeʼ gúnibe. Guzéʼtenu ca cosa ni gucané binni ni bihuinni lu videu ca guni ni caziidiʼ lu Biblia, zándaca gúcani ti textu o xiixa cosa ni bíʼnibe. Dede biaʼ ra ganda, guluinu estudiante stinu ximodo gucané Jehová binni ni biete lu videu ca.

8. ¿Ximodo zanda gacanenu estudiante stinu gannaxhii Jehová?

⁸ Gacanenu estudiante stinu gannaxhii Jehová. Guidúʼyanu pora zanda guinínenu laabe de ca cualidad ni napa Jehová. Gacanenu laabe gúʼyabe naca Jehová ti Dios nayecheʼ ne racané ca binni ni nadxii (1 Tim. 1:11; Heb. 11:6). Guluinu laabe xi zabeendube pa gúnibe ni caziidibe ne gusiénenu laabe zusihuinni ca ni cueendube nadxii Jehová laabe (Is. 48:17, 18). Ra jma gannaxhii estudiante stinu Jehová, jma ziuulaʼdxiʼ guchaa modo nabani (1 Juan 5:3).

9. Casi ná Marcos 10:29, 30, ¿xi zacané ti binni gusaana caadxi cosa para chúʼnisa?

⁹ Para ganda chúʼnisa ti estudiante naquiiñeʼ guni caadxi sacrificiu. Casi hombre ricu ni biete lu párrafo gaayuʼ que, zándaca laaca caquiiñeʼ gusaana estudiante stinu caadxi cosa. Tobi de ca cosa  ni naquiiñeʼ gusaana estudiante stinu nga dxiiñaʼ ni cayuni pa cucaani laa gucheené Jehová. Zándaca laaca naquiiñeʼ gusaana de gaca xhamigu ca binni ni cadi nadxii Jehová. Ne tu laa rucaanáʼ familia stiʼ laa purtiʼ qué riuuláʼdxicaʼ ni rusiidiʼ ca testigu stiʼ Jehová. Guníʼ Jesús zaca nagana para caadxi binni guni ca sacrificiu riʼ. Peru laaca guniʼbe zaguu Jehová ndaayaʼ ca discípulo stibe ra gudii laacabe ti familia, ca hermanu ne ca hermana (biindaʼ Marcos 10:29, 30). ¿Ximodo zanda gacanenu estudiante stinu guidxaaga ca hermanu ne ca hermana yaʼ?

10. ¿Xi rizíʼdinu de ni guníʼ Manuel?

¹⁰ Gaca xhamígunu estudiante stinu. Nabé risaca gusihuínninu rizaaláʼdxinu laabe. ¿Xiñee yaʼ? Guidúʼyanu xi guníʼ ti hermanu de México láʼ Manuel, dxi cacaa estudiu: «Ante guzulú gudii maestru stinneʼ naa estudiu, rinabadiidxaʼ naa ximodo nuaaʼ. Ngue gucané naa cadi guidxibeʼ ne gabeʼ laabe xi cazaacaʼ. Bidieeʼ cuenta dxandíʼ rizaaláʼdxibe naa».

11. ¿Xiñee risaca cueenu tiempu para chuʼnu gaxha de estudiante stinu?

¹¹ Cásica biʼniʼ Jesús ne ca discípulo stiʼ, laanu laaca naquiiñeʼ cueenu tiempu para chuʼnu gaxha de ca estudiante stinu (Juan 3:22). Pa guidúʼyanu cayúnibe stipa pur guchaabe ne rábinu maʼ zanda, guni invitarnu laabe ti nagaʼndaʼ, ti guendaró ra lídxinu o guidúʼyanenu laabe Broadcasting. Zándaca guizáʼ ziecheʼ estudiante stinu pa guni invitarnu laa ra lídxinu ora raca xiixa saa purtiʼ zándaca óraca zuni sentirbe nuube stúbibe. Kazibwe, ti hermanu ni nabeza Uganda guníʼ: «Tiempu bineʼ convivirniáʼ hermanu ni bidii estudiu naa, biziideʼ stale cosa de Jehová ne laaca biziideʼ ni dxi bidiibe estudiu naa. Guizáʼ guyuuladxeʼ ora biiyaʼ rizaalaʼdxiʼ Jehová ca xpinni ne nabánicaʼ nayecheʼ. Ne zaqué nga gucalaʼdxeʼ guibaneʼ».

12. ¿Xiñee galán chinenu gadxé gadxé publicador ora chigudiʼnu estudiu?

 ¹² Guni invitarnu gadxé gadxé publicador ora chigudiʼnu estudiu. Zándaca nuu biaje jma nagueenda chuunu stúbinu o chinenu publicador ni maca rinenu. Peru pa chinenu gadxé hermanu o hermana, zabeendú estudiante stinu stale cosa galán. Dimitri, ti hermanu de Moldavia guníʼ: «Gadxé gadxé modo rusiene cada publicador dxi yegudiicaʼ estudiu naa. Ne biziideʼ gadxé gadxé cosa de laacaʼ. Laaca gucaneni naa cadi guituí luaʼ primé biaje guyaaʼ reunión purtiʼ maca runebiaʼyaʼ ca hermanu ne ca hermana».

13. ¿Xiñee naquiiñeʼ gacanenu estudiante stinu cheʼ reunión?

¹³ Gacanenu estudiante stinu cheʼ reunión. ¿Xiñee risaca gúninu ni yaʼ? Purtiʼ Jehová peʼ nga canabaʼ laanu chuunu reunión ne zacá nga runi adorarnu laabe (Heb. 10:24, 25). Laaca zeeda gaca ca hermanu de congregación casi familia stinu purtiʼ racanecaʼ laanu chuʼnu gaxha de Jehová. Ora rinenu laacabe reunión casi ñaca nidóʼnenu laacabe ti guendaró. Ora gacanenu ti estudiante cheʼ reunión, cayacanenu laa para chúʼnisa. Peru zándaca chuʼ ni gucueeza laabe para cadi gúnibe ni. ¿Ximodo zanda iquiiñenu libru Zanda guibániluʼ nayecheʼ para gacanenu laabe yaʼ?

14. ¿Ximodo zanda gacanenu estudiante stinu cheʼ reunión?

¹⁴ Zanda iquiiñenu lección 10 stiʼ libru Zanda guibániluʼ nayecheʼ para gacanenu estudiante stinu cheʼ reunión. Ante guiree libru riʼ, gunábacabe caadxi publicador ni napa experiencia para iquiiñecaʼ lección riʼ ne ca estudiante sticaʼ ne guleendúcabe ni galán. Peru cadi naquiiñeʼ cuézanu chindanu lu lección 10 para guni invitarnu ca estudiante stinu checaʼ reunión. Naquiiñeʼ gúninu ni ante ne gúninu ni gatigá. Gadxé gadxé nga cada estudiante ne gadxé guendanagana rápacaʼ. Nga runi, guidúʼyanu xi caquiiñeʼ cada tobi de laacabe ne guiníʼ íquenu ximodo zanda gacanenu laacaʼ. Cadi guireʼnu gana pa qué chécabe reunión primé biaje guni invitarnu laacabe. Gápanu paciencia ne cadi gusaana de guni invitarnu laacabe.

15. ¿Xi zándaca rizaaca caadxi estudiante?

¹⁵ Zándaca rietenaláʼdxinu dxi bizulú gucuaanu estudiu, bidxíbinu gácanu testigu stiʼ Jehová. Purtiʼ guníʼ íquenu qué zanda guni predicarnu de yoo pur yoo. O zándaca bidxíbinu gucaalú familia stinu o ca xhamígunu laanu. Pa zacá bizaacanu, zanda guiénenu xi runi sentir ti estudiante. Guníʼ Jesús nuu binni zadxibi. Peru guluube gana ca discípulo stibe cadi gudiicaʼ lugar gucueeza ni laacaʼ para gúnicaʼ ni ná Jehová (Mat. 10:16, 17, 27, 28). ¿Ximodo gucané Jesús ca discípulo stiʼ para cadi guidxíbicaʼ? Ne ¿Ximodo zanda gacanenu ca estudiante stinu para cadi guidxíbicaʼ?

16. ¿Ximodo zanda gacanenu estudiante stinu guiníʼ de ni caziidiʼ?

¹⁶ Chaahuiʼ chaahuiʼ gacanenu estudiante stinu para guiníʼ de ni caziidiʼ. Zándaca bidxibi ca discípulo stiʼ Jesús dxi biʼniʼ mandarbe laacaʼ guni predicarcaʼ. Peru gucané Jesús laacabe ora gudxi laacabe tu laa guni predicárcabe ne xi guiníʼcabe (Mat. 10:5-7). ¿Ximodo zanda chinándanu ejemplu stiʼ Jesús yaʼ? Zanda gacanenu  estudiante stinu ganna tu guni predicar. Guzéʼtenu ti ejemplu, zanda guinabadiidxanu laabe pa runibiaʼbe tuuxa ni zacané ni caziidibe ca laa. Despué zanda gacanenu laabe guni prepararbe ti presentación nachucu. Ne ora guidúʼyanu maʼ zanda, iquiiñenu sección «Nuu tu ná» ne «Nuu tu rinabadiidxaʼ» ni zeeda lu libru Zanda guibániluʼ nayecheʼ. Lu ca sección riʼ, gusíʼdinu estudiante stinu iquiiñeʼ Biblia para gusiene xiixa né diidxaʼ nadóʼ.

17. ¿Ximodo zanda iquiiñenu Mateo 10:19, 20, 29-31 para gacanenu estudiante stinu gapa confianza Jehová?

¹⁷ Gacanenu estudiante stinu gapa confianza Jehová. Gudxi Jesús ca discípulo stiʼ nadxii Jehová laacaʼ ne zacanebe laacaʼ (biindaʼ Mateo 10:19, 20, 29-31). Gusietenaláʼdxinu estudiante stinu laaca zacané Jehová laa. Zanda gusíʼdinu laabe guyúbibe gacané Jehová laabe ora guni orarnenu laabe ne guzéʼtenu ca cosa ni naguixhe íquebe gúnibe. Franciszek, ti hermanu ni nabeza Polonia, guníʼ: «Lu ca oración ni biʼniné maestru stinneʼ naa, stale biaje bizeetebe ca cosa ni cá iqueʼ ugaandaʼ. Ora biiyaʼ ximodo bicabi Jehová oración stibe, naa laaca bineʼ orar. Bineʼ sentir gucané Jehová naa ora gunabaʼ dxi ra dxiiñaʼ para chaaʼ reunión ne asamblea».

18. ¿Xi runi sentir Jehová pur ca hermanu ni rudii estudiu?

¹⁸ Yanna, pa qué gápanu nin ti estudiu yaʼ. ¿Ñee zándaruʼ gacanenu ca estudiante guni progresarcaʼ ne chuʼnísacaʼ la? Zanda. ¿Ximodo zanda gúninu ni yaʼ? Ora chinenu sti publicador chigudii estudiu. Rihuinni dxíchica rizaalaʼdxiʼ Jehová ca binni ni ricaa estudiu. Ne laaca rusisácabe stale ni rúninu para gacanenu binni guidxiña laabe ne nadxiibe laanu pur ca ni rúninu (Is. 52:7).