1. Casi ná 1 Pedro 5:2, ¿xi dxiiñaʼ risaca napa ca ancianu?

 BIDII JEHOVÁ dxiiñaʼ ca ancianu para gápacaʼ ca dendxuhuiiniʼ stiʼ. Nabé rusisácacabe dxiiñaʼ riʼ ne rúnicabe stipa gácacabe pastor chaʼhuiʼ (Jer. 23:4; biindaʼ 1 Pedro 5:2). ¡Rudiʼnu xquixe peʼ pur dxiiñaʼ nadipaʼ runi ca hermanu riʼ ndaaniʼ congregación!

2. ¿Xi guendanagana ridxaagalú caadxi ancianu?

² Ora cayuni ca ancianu dxiiñaʼ ni gucuaacaʼ ridxagalucaʼ stale guendanagana. Casi ora gápacabe congregación la? naquiiñeʼ gúnicabe dxiiñaʼ nadipaʼ. Guzéʼtenu ni bizaaca Tony, ti ancianu de Estados Unidos. Bidiibe cuenta caquiiñeʼ gánnabe xii nga ni zanda o qué zanda gúnibe ora gudiicabe laabe jma dxiiñaʼ. Laabe guniʼbe: «Dxi bizulú pandemia stiʼ COVID-19, guizáʼ stale dxiiñaʼ guyuu para gaca ca reunión ca ne predicación. Cumu riuuladxeʼ guneʼ dxiiñaʼ la? qué ñanda ninieeʼ qué zuneʼ ca ni, peru neca zaqué nuuruʼ stale dxiiñaʼ gaca. Chaahuiʼ chaahuiʼ maʼ qué ñuundaʼ Biblia, maʼ qué ñapaʼ estudiu personal ne maʼ huaxiéʼ bineʼ orar». Yanna, guidúʼyanu ni bizaaca ti ancianu de Kosovo láʼ Ilir. Nabézabe ti lugar ra cayaca guerra ne guca nagana para laabe chinándabe ca instrucción ni rudii organización. Laabe guniʼbe: «Ora biʼniʼ asignar sucursal naa gacaniáʼ caadxi hermanu ni nabeza ti lugar cadi seguru, guizáʼ bidxibeʼ dede guníʼ iqueʼ biaa xii nga canábacabe naa guneʼ. Guizáʼ nagana guca para naa gacaʼ nadxibalú». Ne ti misioneru de Asia láʼ Tim raca nagana para laa guni guiráʼ cosa ni caquiiñeʼ guni ti dxi, laabe guniʼbe: «Nuu biaje maʼ bidxagaʼ dede maʼ bidxaga xquendabiaaneʼ ne cadi nuaaʼ para gacaniáʼ ca hermanu». Yanna, ¿xi zanda guni ca ancianu para gudxiilucaʼ ca guendanagana ni bizéʼtenu riʼ yaʼ?

3. ¿Xiñee galán chinándanu ejemplu stiʼ Gedeón?

 ³ Guidúʼyanu xi zanda guiziidiʼ ca ancianu de ejemplu stiʼ juez Gedeón (Heb. 6:12; 11:32). Guca Gedeón pastor stiʼ xquidxi Dios ne gupa de guidxi ca (Juec. 2:16; 1 Crón. 17:6). Tiempu nagana riʼ cásica Gedeón maʼ bidii Jehová dxiiñaʼ ca ancianu para gápacaʼ xquidxi (Hech. 20:28; 2 Tim. 3:1). Zanda guiziidiʼ ca ancianu stale cosa de modo guca Gedeón, laa guca humilde, gunna nuu cosa ni qué zanda guni ne bizuubaʼ diidxaʼ, bisihuinni aguante lu guiráʼ ni biʼniʼ. Zacané ejemplu stiʼ Gedeón laanu gusisácanu dxiiñaʼ runi ca ancianu ne gacanenu laacaʼ de guidubi ladxidoʼno para gúnicaʼ xhiiñacaʼ (Heb. 13:17).

4. ¿Ximodo bisihuinni Gedeón nuu cosa ni qué zanda guni ne naca humilde?

⁴ Guca Gedeón humilde ne gunna nuu cosa ni qué zanda guni. b Ora gudxi ti ángel Gedeón gulí Jehová laa para gulá ca israelita de lu náʼ ca madianita, gúcabe humilde ne guniʼbe: «De lade familia stiʼ Manasés la? familia stinneʼ nga ni jma nahuiiniʼ ne naa nga ni jma huaxiéʼ risaca de lade ca xiiñiʼ bixhozeʼ» (Juec. 6:15). Guníʼ ique Gedeón qué zanda guni dxiiñaʼ que. Peru nanna Jehová zanda gúnibe ni ne cumu gucané laabe la? gunda bíʼnibe ni ne guleendube ni galán.

5 ¿Pora nga zanda gaca nagana para ca ancianu gusihuínnicaʼ nuu cosa ni qué zanda gúnicaʼ ne nácacaʼ humilde?

⁵ Runi ca ancianu stipa gácacaʼ humilde ne gánnacaʼ nuu cosa ni qué zanda gúnicaʼ (Miq. 6:8; Hech. 20:18, 19). Qué runi presumírcabe pur ca ni nánnacabe gúnicabe o pur ca ni rúnicabe. Laaca qué riníʼ íquecabe maʼ qué risácacabe ora rucheecabe ne ora qué riree ca cosa ca jneza. Peru neca zacá nuu biaje zaca nagana para ca ancianu gusihuínnicaʼ nuu cosa ni qué zanda gúnicaʼ ne guluiʼcaʼ nácacaʼ humilde. Casi ora guicaa ti ancianu stale dxiiñaʼ ne despué guʼyaʼ qué zanda guni guiráʼ ni. Ne ora guiníʼcabe cadi jneza modo bíʼnibe dxiiñaʼ stibe o gusisácacabe laabe pur dxiiñaʼ galán ni bíʼnibe. Yanna, ora guizaaca ndiʼ, ¿ximodo zanda gacané ejemplu stiʼ Gedeón ca ancianu yaʼ?

6. ¿Ximodo zanda chinanda ca ancianu ejemplu stiʼ Gedeón ra gánnacaʼ nuu cosa ni qué zanda gúnicaʼ? (Biiyaʼ imagen ca).

⁶ Laguinabaʼ gacanécabe laatu. Ti binni ni  napa modestia nanna qué zanda guni guiráʼ cosa. Casi Gedeón la? gunna nuu cosa ni qué zanda guni nga runi, gunábabe xcaadxi gacané laabe (Juec. 6:27, 35; 7:24). Ca ancianu ni riníʼ ique ante guni xiixa rúnicaʼ ni bizéʼtenu riʼ. Tony, ni bizéʼtenu lu párrafo 2 que, guníʼ: «Pur modo biniiseʼ, ricaaʼ stale dxiiñaʼ dede né ca ni qué zanda guneʼ. Nga runi, lu adoración en familia gudixheʼ iqueʼ guidúʼndadu ximodo nga ti binni ni napa modestia ne gunabadiidxaʼ xheelaʼ pa nacaʼ zacá. Ne laaca biiyaʼ ti videu ni nuu lu jw.org ni láʼ Casi Jesús, gusíʼdinu xcaadxi ne gápanu confianza laacaʼ». Gunabaʼ Tony gacanécabe laa ne guníʼ xi bizaaca. Laa guníʼ: «Maʼ nexheʼ chaahuiʼ guiráʼ ni ndaaniʼ congregación ne yanna jma maʼ napaʼ tiempu para chuaaʼ gaxha de Jehová».

7. ¿Ximodo zanda chinanda ca ancianu ejemplu stiʼ Gedeón ora guiníʼcabe cadi jneza dxiiñaʼ ni bíʼnicaʼ? (Santiago 3:13).

⁷ Cadi guidxiichitu pa guiníʼcabe cadi galán dxiiñaʼ ni bíʼnitu. Caquiiñeʼ gusihuinni ca ancianu nácacaʼ humilde ora guiníʼcabe cadi jneza dxiiñaʼ ni bíʼnicaʼ. Peru, ¿xi zanda gacané laacabe yaʼ? Guidúʼyanu ejemplu stiʼ Gedeón sti biaje. Gunna Gedeón naca binni ruchee ne ora guníʼ ca hombre de Efraín mal de laabe qué nicábibe naduxhuʼ (Juec. 8:1-3). Qué nidxiichibe, sínuque gúcabe humilde ne bicaadiágabe laacaʼ, né diidxaʼ nadóʼ gundétebe xiana sticaʼ. Zusihuinni ca ancianu nuu xpiaanicaʼ pa chinándacaʼ ejemplu stiʼ Gedeón. Ora guiníʼcabe mal de laacaʼ, galán gucaadiágacaʼ ne guicábicaʼ né diidxaʼ nadóʼ (biindaʼ Santiago 3:13). Zacá zacanécabe chuʼ congregación tobi si.

8. ¿Xi caquiiñeʼ guni ca ancianu ora gusisácacabe laacaʼ? Bizeeteʼ ti ejemplu.

⁸ Lagusisaca Jehová. Dxi biʼniʼ ganar Gedeón ca madianita nezalú guidxi que bisisácabe Jehová (Juec. 8:22, 23). ¿Ximodo zanda chinanda ca ancianu ejemplu stiʼ Gedeón yaʼ? Ra gusisácacabe Jehová ora gúnicabe xiixa (1 Cor. 4:6, 7). Casi, pa guni felicitárcabe ti ancianu pur modo rusiidiʼ la? zanda guiniʼbe ni bisiidibe ca zeeda ni lu Stiidxaʼ Dios ne guiranu rizíʼdinu gusiidinu jneza purtiʼ rusiidiʼ organización stiʼ Jehová laanu. Nga runi, galán guinabadiidxaʼ ca ancianu pa rusisácacaʼ Jehová ora rusiidicaʼ o rusisácacaʼ laca laacaʼ. Guidúʼyanu ni bizaaca ti hermanu láʼ Timothy. Dxi nacubi gúcabe ancianu, guizáʼ riuuláʼdxibe gudiibe discursu. Laabe guniʼbe: «Cumu nabé ruyubeʼ modo guneʼ introducir ca discursu rudieeʼ ne riquiiñeʼ ejemplu ni huaxiéʼ rusiene xcaadxi la? ngue runi rusisaca ca hermanu que naa pur modo runeʼ ni. Peru cadi galán ngue, purtiʼ maʼ qué rusisácacabe Jehová ne Biblia». Gudiʼdiʼ si tiempu, biiyaʼ Timothy naquiiñeʼ guchaa modo rusiidiʼ para cadi gusisácacabe laa (Prov. 27:21). ¿Xi bizaaca yaʼ? Laabe guniʼbe: «Ora gudieeʼ discursu rabi ca hermanu naa, guizáʼ gucané ni naa gudxieeluáʼ guendanagana ni cadideʼ o gucané ni naa guneʼ sentir nuaaʼ jma gaxha de Jehová. Yanna, jma riecheʼ gunadiagaʼ guiníʼcabe zacá que modo bisisácacabe naa dxiqué».

9 ¿Xiñee caquiiñeʼ gusihuinni Gedeón ruzuubaʼ diidxaʼ ne naca nadxibalú? (Biiyaʼ dibuju ni zeeda lu portada).

⁹ Despué si de biʼniʼ Jehová Gedeón juez la? caquiiñeʼ gusihuinni ruzuubaʼ diidxaʼ ne naca nadxibalú. ¿Xiñee yaʼ? Purtiʼ gucuaabe ti dxiiñaʼ ni zanda cuʼ xquendanabánibe ra naxoo: gunidebe altar stiʼ Baal ni napa bixhózebe (Juec. 6:25, 26). Ne despué, chupa biaje gunabaʼ Jehová laabe gusixieʼbe ejércitu stibe (Juec. 7:2-7). Ne últimu la? gudxi Jehová laabe gucaalube ca enemigu que huaxhinni (Juec. 7:9-11).

10. ¿Pora zanda gaca nagana para ca ancianu guzuubacaʼ diidxaʼ?

 ¹⁰ Ca ancianu naquiiñeʼ chuʼcaʼ listu para guzuubacaʼ diidxaʼ (Sant. 3:17). Ora ti ancianu ruzuubaʼ diidxaʼ qué raca nagana para laa chinanda ni ná Stiidxaʼ Dios ne ni rusiidiʼ organización stiʼ Jehová, ne zacá reeda gaca ti ejemplu para xcaadxi. Peru zándaca nuu biaje zaca nagana para laabe guzuubabe diidxaʼ. Purtiʼ naquiiñeʼ chuʼbe pendiente de ca instrucción ni guicaabe ne nuu biaje zándaca guiníʼ íquebe pa dxandíʼ naquiiñeʼ chinándacabe ca instrucción ca. O zándaca guinábacabe laabe gúnibe xiixa ne pur nga guseguyoocabe laabe. Ora guizaaca ndiʼ, ¿ximodo zanda guzuubaʼ ca ancianu diidxaʼ cásica biʼniʼ Gedeón ni?

11. ¿Xi zanda gacané ca ancianu guzuubacaʼ diidxaʼ?

¹¹ Lachinanda ca instrucción ni guicaatu. Gudxi Dios Gedeón ximodo gunidé altar ni napa bixhoze, paraa gucuibe altar stiʼ Jehová ne xi maniʼ naquiiñeʼ gudiibe casi sacrificiu. Qué niguicheruaa Gedeón ne yenándabe ni ná Jehová. Ca dxi stinu riʼ ruseendaʼ organización stiʼ Jehová carta, anunciu ne pauta para chinanda ca ancianu para gápacaʼ laanu ne chuʼnu gaxha de Jehová. Guizáʼ nadxiinu ca ancianu, purtiʼ rinándacaʼ ni ná xquidxi Dios ne rúnicaʼ stipa chuʼ congregación galán (Sal. 119:112).

12. ¿Ximodo zanda chinanda ca ancianu ni ná Hebreos 13:17 ora guidxaa xiixa ndaaniʼ xquidxi Dios?

¹² Laguiaa ora guidxaa xiixa. Guietenaláʼdxinu gudxi Jehová Gedeón guiaanané caadxi si soldadu (Juec. 7:8). Zándaca niníʼ íquebe: «¿Ñee caquiiñeʼ guneʼ nga la? ¿Zanda xa guni ganardu pa huaxieʼdu?». Neca zaqué bizuubaʼ Gedeón diidxaʼ. ¿Ximodo zanda chinanda ca ancianu ejemplu stibe yaʼ? Ora gúnicaʼ stipa chinándacaʼ ni guidxaa ndaaniʼ organización stiʼ Jehová (biindaʼ Hebreos 13:17). Casi lu iza 2014, guníʼ Grupu ni Zániru zadxaa modo guiaxa para cuíʼ ca Yoo stiʼ Reinu ne ca salón de asamblea (2 Cor. 8:12-14). Dxiqué rutiiñeʼ organización bueltu ca congregación para gucuicaʼ Yoo stiʼ Reinu ne naquiiñeʼ gudxiguétacaʼ bueltu que. Yanna guiráʼ ca congregación ca ruseendacaʼ ti ndaa nabiuxe ra nuu sucursal ne ridopa ni para cuíʼ Yoo stiʼ Reinu ra caquiiñeʼ ni, neca huaxiéʼ gudii ca congregación ni nuu lugar que. Ora gunna ti ancianu láʼ José de ni bidxaa riʼ qué ñuni cré ne guníʼ ique: «Nga la? zaquiiñeʼ ni sti guidxi peru raríʼ la? nin ti Salón qué zabí». Neca zaqué yenándabe instrucción que. ¿Xiñee yaʼ? Laabe guniʼbe: «Bietenaladxeʼ ni ná Proverbios 3:5, 6, caquiiñeʼ gapaʼ confianza Jehová. ¡Biiyaʼ, nabé galán biree ca cosa que! Ne cadi gurí si jma Yoo stiʼ Reinu, sínuque laaca maʼ bizíʼdidu gudiʼdu biaʼ nápadu ti zacá gacanedu ca hermanu ni qué ganda gudii».

13. a) ¿Xidé guyuu Gedeón seguru? b) ¿Ximodo zanda chinanda ca ancianu ejemplu stibe? (Biiyaʼ imagen ca).

¹³ Laguni xhiiñaʼ Jehová né guendanadxibalú. Bizuubaʼ Gedeón stiidxaʼ Jehová neca cadxibi ne nagana ni chiguni que (Juec. 9:17). Despué  de gunna Gedeón nuuné Jehová laa, guyuube seguru zacané Dios laabe gápabe xquidxi. Naca ca ancianu ni nabeza ca lugar ra cucaalú gobiernu xhiiñaʼ Dios casi Gedeón. Né stale guendanadxibalú riguixhe chaahuicabe modo gaca ca reunión ca, modo gaca predicar neca nánnacabe zanda guinaazeʼ o guni amenazar gobiernu laacabe, guníticabe dxiiñaʼ stícabe o guniná laacabe. c Ora guzulú gran tribulación, caquiiñeʼ gapa ca ancianu valor para chinándacaʼ ca instrucción ni guicaacaʼ neca guidxagalucaʼ guendanagana. Ne zándaca ca instrucción ni guicaacabe nga para gudiicabe mensaje nadipaʼ ni zeeda gaca casi ca guié naroʼbaʼ de granizu que. O zándaca para gánnacabe xi gúnicabe ora gucaalú Gog de Magog xquidxi Jehová (Ezeq. 38:18; Apoc. 16:21).

14. ¿Xi ñándaca nucueeza Gedeón de ñuni huantar?

¹⁴ Casi juez stiʼ guidxi Israel la? Gedeón biʼniʼ dxiiñaʼ nadipaʼ. Gueelaʼ bixooñelú ca madianita de laabe ne de ca soldadu stibe yenándabe laacaʼ dede valle stiʼ Jezreel hasta guiiguʼ Jordán, zándaca guriá ni nuu guixi gáʼ ne yaga guichi (Juec. 7:22). ¿Ñee ziaanadxí Gedeón de chinanda ca madianita la? ¡Coʼ! Neca maʼ bidxágabe ne laaca maʼ bidxaga ca chonna gayuaa hombre zinebe que peru qué nusaana de ninándacabe ca madianita, gudíʼdicabe guiiguʼ que ne despué bigaandacabe ca madianita ne biʼniʼ ganárcabe laacaʼ (Juec. 8:4-12).

15. ¿Pora nga zanda gueeda gaca nagana para ca ancianu guni huantarcaʼ?

¹⁵ Zanda gueeda guidxaga ti ancianu, guirá stipa stiʼ ne guiaadxaʼ gana laa pur rapa congregación ne familia stiʼ. Yanna, ¿ximodo zanda chinanda ca ancianu ejemplu stiʼ Gedeón yaʼ?

16, 17. a) ¿Xi gucané Gedeón guni huantar? b) ¿Xi nanna ca ancianu zuni Jehová pur laacaʼ? (Isaías 40:28-31; biiyaʼ foto ca).

¹⁶ Lagapa confianza zudii Jehová stipa laatu. Nga peʼ nga ni biʼniʼ Gedeón, ne qué nusaana Jehová laa (Juec. 6:14, 34). Ti biaje Gedeón  ne ca hombre stiʼ zinándacaʼ a pie chupa rey madianita, peru laacaʼ zándaca dxíʼbacaʼ camellu (Juec. 8:12, 21). Cumu gucané Jehová laacabe la? qué nireecabe gana, bigaandacabe ca Rey riʼ ne biʼniʼ ganárcabe laacaʼ. Tiempu riʼ, ca ancianu laaca zanda gápacaʼ confianza Jehová, purtiʼ «qué rirá stipa stibe ne qué ridxágabe». Qué zusaana de gudiibe stipa laatu ora caquiiñetu ni (biindaʼ Isaías 40:28-31).

¹⁷ Guidúʼyanu ni bizaaca Matthew, ti hermanu ni nuu lu Comité de Enlace né ca Hospital. ¿Xi racané laabe guni huantarbe? Laabe guniʼbe: «Huayuuyaʼ ximodo huayaca cumplir ca diidxaʼ ni zeeda lu Filipenses 4:13 lu xquendanabaneʼ. Stale biaje ora maʼ bidxagaʼ ne maʼ birá stipa stinneʼ, runeʼ rogar Jehová gudii naa stipa ni caquiiñeʼ ne quixhedxí xquendabiaaneʼ ne ladxiduáʼ ne ganda gacaniáʼ ca hermanu, óraca nga runeʼ sentir rudii Jehová naa espíritu stiʼ ni rudii stipa naa para guneʼ huantar». Cásica Gedeón, ca ancianu laaca rúnicaʼ dxiiñaʼ nadipaʼ para gápacaʼ né guendarannaxhii xquidxi Dios neca gácani nagana para laacaʼ. Ne cadi guiaandaʼ laacaʼ nuu cosa ni qué zanda gúnicaʼ neca ñuuláʼdxicaʼ ñúnicaʼ ni. Peru, nuucabe seguru rucaadiaga Jehová ca oración stícabe, zacané ne zudii stipa laacabe para guni huantárcabe (Sal. 116:1; Filip. 2:13).

18. Casi maʼ bizíʼdinu, ¿ximodo zanda chinanda ca ancianu ejemplu stiʼ Gedeón?

¹⁸ Casi maʼ bidúʼyanu, zanda guiziidiʼ ca ancianu stale de ejemplu stiʼ Gedeón. Caquiiñeʼ gápacaʼ modestia ne gácacaʼ humilde ora guicaacaʼ jma dxiiñaʼ ndaaniʼ xquidxi Dios ne ora guiníʼcabe mal o galán de laacaʼ. Laaca naquiiñeʼ guzuubacaʼ diidxaʼ ne gácacaʼ nadxibalú jmaruʼ si ra mayaca gueeda fin stiʼ guidxilayú riʼ. Ne caquiiñeʼ gápacabe confianza zacané Jehová laacabe gudxiilúcabe intiica ni guidxagalúcabe. Guizáʼ nadxiinu ca ancianu pur dxiiñaʼ nadipaʼ ni rúnicaʼ (Filip. 2:29).