1, 2. ¿Ximodo nga nabáninu cásica tiempu bibani Lot?

 ORA ridúʼyanu ximodo nabani binni tiempu riʼ runi sentirnu cásica biʼniʼ sentir Lot, ti hombre ni bibani dxiqué ni biʼniʼ ni jneza. Laabe nabé biuubaʼ ladxidoʼbe pur guiráʼ guendaquéiquiiñeʼ biʼniʼ «ca binni malu que sin guituí lucaʼ» purtiʼ nánnabe nanalaʼdxiʼ Bixhózenu ni nuu guibáʼ gaca xpiaʼ binni zacá (2 Ped. 2:7, 8). Ne cumu nadxii ne guizáʼ runi respetar Lot Jehová la? guca nanaláʼdxibe modo guca xpiaʼ binni ni nuu gaxha de laabe. Tiempu riʼ, laaca nabáninenu binni ni qué runi respetar ca ley stiʼ Dios. Peru pa nadxiinu Dios ne guizíʼdinu guni respetarnu laabe de guidubi ladxidoʼno la? zanda chuʼnu nayá nezalube (Prov. 14:2).

² Zacané Jehová laanu gúninu ni pa chinándanu ca conseju ni zeeda lu libru stiʼ Proverbios. Guiráʼ ca xpinni Cristu —hombre, gunaa, joven ne ca ni maʼ huaniisi…— guizáʼ zacané ca conseju riʼ laanu.

3. ¿Xi conseju zeeda lu Proverbios 17:3 ni racané laanu gápanu ladxidoʼno? (Biiyaʼ ca imagen ca).

³ Ti razón risaca para gápanu ladxidoʼno nga purtiʼ Jehová ruuyaʼ xi nuu ndaaniʼ ladxidoʼno. Ndiʼ riníʼ, ruuyabe ni qué randa ruuyaʼ binni, ruuyabe ni nácanu pur dentru (biindaʼ Proverbios 17:3). Zannaxhii Jehová laanu pa guuyaʼ rúninu stipa chinándanu ca conseju stiʼ. Zaca qué zudiʼnu lugar chuʼ ndaaniʼ ladxidoʼno ca guendarusiguii stiʼ Binidxabaʼ ne ca cosa ni cadi jneza runi binni lu guidxilayú riʼ (Juan 4:14; 1 Juan 5:18, 19). Ne ora maʼ guidxíñanu Jehová la? jma zannaxhiinu ne  zuni respetarnu laa. Qué zúninu xiixa ni guniná Bixhózenu ni nuu guibáʼ, dede zacananaláʼdxinu guiníʼ íquenu guchéʼnenu laabe. Ora gudxiilunu xiixa tentación, zaníʼ íquenu: «¿Ximodo naa piaʼ guyubeʼ gunenaʼyaʼ tuuxa ni guizáʼ nadxii ne huayuni stale cosa pur naa yaʼ?» (1 Juan 4:9, 10).

4. Pur bidxibi ti hermana gucheené Jehová, ¿ximodo gucané ni laa?

⁴ Ti hermana de guidxi Croacia láʼ Marta b gupa ti tentación de guni xiixa inmoral. Laabe bicaabe: «Qué randa riníʼ iqueʼ chaahueʼ. Guca nagana para naa gucanaʼyaʼ ca deseu de guneʼ ni cadi jneza. Peru cumu ridxibeʼ gucheeniáʼ Jehová la? ngue gucané naa». ¿Ximodo yaʼ? Marta bizeeteʼ, pur bidxibi gucheené Jehová bicaa ni laa guiníʼ íque guiráʼ ca cosa malu ni zándaca guizaaca pa guicaa xiixa decisión ni cadi jneza. Laanu laaca zanda guiníʼ íquenu zacá ora tídinu lu xiixa tentación. Guietenaláʼdxinu ni jma feu zanda gueeda guizaaca nga, cuʼnu triste Jehová ne gunítinu ndaayaʼ de guni adorarnu laabe para siempre (Gén. 6:5, 6).

5. ¿Xi riziidiluʼ de ni bizaaca Leo?

⁵ Ti binni ni ridxibi Jehová runi stipa cadi guidxaaga binni ni runi ni cadi jneza. Ne nga ti cosa ni biziidiʼ Leo, ti hermanu de guidxi República Democrática del Congo. Tapa iza si despué de guyuunísabe, bizulú bidxaagabe binni ni runi ni cadi jneza. Guníʼ íquebe, cumu cadi laabe nga cayúnibe xiixa cosa malu la? qué zucheenebe Jehová. Peru qué nindaa gucuá xpiaʼ ca xhamígube que laabe, bizulú guxúdxibe ne biábabe lu pecadu sexual. Yanna, ¿xi bíʼnibe yaʼ? Bietenaláʼdxibe guiráʼ ni bisiidiʼ bixhózebe ne jñaabe ni nácacaʼ Testigu laabe ne pabiáʼ nayecheʼ guyuube dxi bíʼnibe ni ná Jehová, ngue gucané laabe  gúʼyabe cadi jneza ni cayúnibe que. Gucané ca ancianu laabe guibiguétabe ra nuu Jehová. Yanna, maʼ nácabe ancianu ne precursor especial ne guizáʼ nayecheʼ cayúnibe xhiiñaʼ Jehová.

6. ¿De tu chupa gunaa nga chiguininu lu artículo riʼ?

⁶ Yanna, chiguidúʼyanu ni zeeda lu Proverbios capítulo 9, ra cayete de guendanuuxpiaaniʼ ne guendahuati. Ne ruchaaga ni chupa gunaa tobi nuu xpiaaniʼ ne stobi nahuati. c Laga cayúʼndanu xcaadxi párrafo ni zeeda ca, guietenaláʼdxinu ndaaniʼ guidxilayú stiʼ Binidxabaʼ riʼ nabé rica ique binni sexo ne pornografía (Efes. 4:19). Nga runi, cadi naquiiñeʼ gusaananu de guizíʼdinu guidxíbinu Jehová ne gucáʼnanu ni cadi jneza (Prov. 16:6). Guiropaʼ gunaa riʼ rucaacaʼ ridxi «ca ni qué gana gastiʼ», ca ni cayaadxaʼ laacaʼ guendabiaaniʼ. Casi ñaca ñuni invitarcaʼ laacabe nitócabe ra lídxicaʼ (Prov. 9:1, 5, 6, 13, 16, 17). Yanna, ¿xi guizaaca de ca ni guicaa invitación stícabe yaʼ?

7. Casi ná Proverbios 9:13-18, ¿xi zazaaca ca ni guicaa invitación stiʼ «gunaa nahuati» que? (Biiyaʼ imagen ca).

⁷ Primé, guidúʼyanu xi invitación cudii «gunaa nahuati» que (biindaʼ Proverbios 9:13-18). Qué rituílube cucaabe ridxi: «¡Guiráʼ ca ni qué ganna gastiʼ latáʼ raríʼ!». ¿Ximodo riluxe guiráʼ tu chuu ra lídxibe yaʼ? Biblia ná: «Raqué nga nuu ca ni maʼ gutiʼ». Cadi primé biaje nga riete lu Proverbios de ti gunaa zacá. Lu xcaadxi capítulo stini riete gápanu laanu de ti gunaa ni qué runi respetar ca ley moral stiʼ Dios ne runi cometer pecadu sexual. «Purtiʼ ra lídxibe nuu guendaguti» (Prov. 2:11-19). Proverbios 5:3-10 laaca ruzeeteʼ ni gápanu cuidadu de sti gunaa, ni qué runi respetar ca ley moral stiʼ Dios. Sicaríʼ nani de gunaa riʼ: «Riete ñeebe dede ra nuu guendaguti».

8. ¿Xi decisión caquiiñeʼ guicaa ca ni gunadiaga stidxi «gunaa nahuati» que?

⁸ Guiráʼ tu gunadiaga stidxi «gunaa nahuati» que caquiiñeʼ guicaacaʼ ti decisión: zacaacaʼ invitación stibe la? o zucáʼnacaʼ ni. Laaca zanda guizaacanu ndiʼ, ¿pora yaʼ? Casi ora gucaa tuuxa laanu guni cometernu ti pecadu sexual o pa málasi guihuinni xiixa imagen lu internet ni gucaa laanu gúʼyanu pornografía. ¿Xi decisión zacaanu ora guidxaagalunu ni yaʼ?

9, 10. ¿Xiñee caquiiñeʼ gucáʼnanu inmoralidad sexual?

⁹ Nuu razón risaca para gucáʼnanu ca pecadu sexual ca. Casi ná libru stiʼ Proverbios, «gunaa nahuati» ca riníʼ: «Nanaxhi ca nisa ni guláʼnacabe». ¿Xii nga «nisa ni guláʼnacabe»  ca yaʼ? Biblia ruchaaga ca relación sexual ndaaniʼ guendaxheelaʼ casi nisa ni rusigaandaʼ (Prov. 5:15-18). Hombre ne gunaa ni maʼ bichaganáʼ ante ley zanda gápacaʼ relación sexual nayá. Peru «nisa ni guláʼnacabe» ca maʼ gadxé si ca ni. Zándaca zeeda gaca ca ni ca relación sexual ni rucheené ley stiʼ Dios. Ca binni ni runi cometer pecadu sexual runi ca ni nagaʼchiʼ, cásica runi ti gubaanaʼ ora chindanaʼ. «Nisa ni guláʼnacabe» ca nanaxhi ni para ca binni ni rucaachiʼ ca cosa yuudxuʼ ni rúnicaʼ. Peru caguítecaʼ laca laacaʼ ne qué zanda quítecaʼ Jehová purtiʼ laa ruuyaʼ guiráʼ ni. Pa gunítinu ndaayaʼ stiʼ Jehová qué zabáninu nayecheʼ (1 Cor. 6:9, 10). Ne cadi nga si nga ni rizaaca.

¹⁰ Zándaca ca ni runi cometer pecadu sexual guituílucaʼ pur ni bíʼnicaʼ, guiníʼ íquecaʼ qué risácacaʼ, gueeda gaca xiiñicaʼ o guninacaʼ familia sticaʼ. Ni jma jneza guni tobi nga, gucaanáʼ invitación stiʼ «gunaa nahuati» que. Stale de ca ni runi practicar pecadu sexual qué ratisicaʼ neza lu Dios, sínuque laaca raca contagiarcaʼ de xiixa guendahuará ni ruuti laacaʼ (Prov. 7:23, 26). Ra si guiluxe versículo 18 stiʼ capítulo 9 ná: «Ca invitadu stibe nuucaʼ ndaaniʼ Baʼ». Yanna, ¿xiñee stale tu ricaa invitación stiʼ gunaa riʼ pa guendananá nga redané ni? (Prov. 9:13-18).

11. ¿Xiñee nabé malu nga guuyaʼ tuuxa pornografía?

¹¹ Guiráʼ ladu nga maʼ nuu pornografía. Ne nuu tuu ná gastiʼ naca guʼyaʼ ni. Peru, ¿ñee zacá ni la? Coʼ. Pornografía ca runiná ni, reeda gaca ni ti viciu, ne runi ni guni sentirluʼ qué risácaluʼ. Ca imagen yuudxuʼ ca nagana para guixiá ca ni ndaaniʼ xquendabiaaninu. Ne qué rucueeza pornografía ca deseu malu stiʼ tuuxa sínuque rucaa ni laa guiaba lu pecadu sexual (Col. 3:5; Sant. 1:14, 15). Ne ca ni ruuyaʼ pornografía riábacaʼ lu ná pecadu sexual.

12. ¿Xi caquiiñeʼ gúninu pa málasi guihuinni ti imagen ni zucaa laanu guníʼ íquenu gúninu xiixa inmoral?

¹² ¿Xi caquiiñeʼ guni ti xpinni Cristu pa málasi guihuinni ti imagen de diidxaʼ guidxa lu teléfono o tableta stiʼ yaʼ? Caquiiñeʼ gusaana de gúʼyabe ni oraqueca. Ne ni zacané laanu gúninu ni nga, guietenaláʼdxinu ni jma risaca para laanu nga gaca xhamígunu Jehová. Laaca cadi galán guidúʼyanu ca imagen ni zanda gucaa laanu guiníʼ íquenu cosa ni cadi jneza neca ruluíʼ cadi pornografía ni. ¿Xiñee yaʼ? Purtiʼ qué racaláʼdxinu tidiʼ ndaaniʼ íquenu guni cometernu pecadu sexual (Mat. 5:28, 29). Ti ancianu de guidxi Tailandia láʼ David, guníʼ: «Gatigá riníʼ iqueʼ: “¿Ñee ziuulaʼdxiʼ Jehová guuyaʼ ca imagen riʼ neca ruluíʼ cadi de diidxaʼ guidxa ca ni la?”. Guiníʼ iqueʼ zacá huayacané ni naa guicaaʼ decisión jneza».

13. ¿Xi zacané laanu guicaanu decisión ni chuulaʼdxiʼ Jehová?

¹³ Pa guizíʼdinu guidxíbinu Jehová, jma qué zaca nagana para laanu guicaanu decisión ni riuuláʼdxibe. Nga runi, Proverbios 9:10 ná «guendanuuxpiaaniʼ ca ruzulú ni ora ridxibi binni Jehová». Ne zaca peʼ ruzeeteʼ ra ruzulú capítulo 9 stiʼ Proverbios ni, ra cuchaaga ni «guendabiaaniʼ ni dxandíʼ» ca né ti gunaa.

14. ¿Xi sti invitación riete lu Proverbios 9:1-6?

¹⁴ (Biindaʼ Proverbios 9:1-6). Raríʼ riete de ti invitación ni zeeda de Jehová, Dios ni bizáʼ laanu ne ra ridá guendanuuxpiaaniʼ (Prov. 2:6; Rom. 16:27). Lu ejemplu ni riete lu textu riʼ caníʼ ni de ti yoo naroʼbaʼ ni napa gadxe columna. Ndiʼ rucaa laanu guiníʼ íquenu naca Jehová ti Dios ni rudii de ni napa ne riechené guiráʼ ca ni riná chinanda ca conseju stibe.

15. ¿Xi invitación cayuni Dios laanu?

¹⁵ Naca Jehová ti Dios ni rudii de ni napa ne  rudii stale cosa ni galán. Ne zaca rusihuinni gunaa ni riete lu capítulo 9 stiʼ Proverbios, ni runi representar «guendabiaaniʼ ni dxandíʼ». Lu relatu riʼ riete maʼ biʼniʼ prepararbe beela para guendaró, vinu ne maʼ gudixhe chaahuibe mexaʼ (Prov. 9:2). Ne ndiʼ nga ni ruzeeteʼ versículo 4 ne 5, «guendabiaaniʼ ni dxandíʼ» ca cayabi ni ca ni riaadxaʼ guendabiaaniʼ laacaʼ: «Latáʼ lagó pan stinneʼ». ¿Xiñee caquiiñeʼ guicaanu invitación stiʼ gunaa ni zeeda gaca guendabiaaniʼ ni dxandíʼ ca yaʼ? Purtiʼ racalaʼdxiʼ Jehová gapa ca xiiñiʼ ne gudii laacabe guendanuuxpiaaniʼ. Qué racalaʼdxiʼ Jehová gacananu ne guiuubaʼ ladxidoʼno pur ca cosa ni cadi jneza bíninu dxiqué. Nga runi rudiibe guendabiaaniʼ ca binni runi ni jneza (Prov. 2:7). Pa guidxíbinu Jehová zúninu ni gusiecheʼ laa ne zinándanu ca conseju stiʼ. Ra gúninu zacá zabáninu nayecheʼ (Sant. 1:25).

16. Cumu ridxibi Alain Jehová, ¿xi decisión gucuaa ne xi guleendú?

¹⁶ Guzéʼtenu ti ejemplu ni rusihuinni, guidxíbinu Jehová racané ni laanu guicaanu decisión jneza. Sicaríʼ guníʼ Alain, ti ancianu de congregación ni runi dxiiñaʼ de maestru ra scuela. Laabe guniʼbe: «Stale de ca compañeru de dxiiñaʼ stinneʼ riníʼ íquecaʼ racané ca película de pornografía ca lu educación sexual». Peru nanna Alain cadi dxandíʼ ni. Laabe bizeetebe: «Cumu ridxibeʼ Jehová la? qué ninaʼyaʼ ñuuyaʼ ca película que. Ne laaca bisieneʼ xcaadxi maestru que, xiñee qué runeʼ ni». Ra biʼniʼ Alain ndiʼ yenanda conseju ni rudii «guendabiaaniʼ ni dxandíʼ» laanu sanu lu neza stiʼ guendariene (Prov. 9:6). Pur ni biʼniʼ Alain guizáʼ bidxagayaa ca compañeru stibe dede bizulú gucuaacaʼ estudiu ne guyecaʼ reunión.

17, 18. ¿Xi ndaayaʼ rapa ca ni ricaa invitación stiʼ «guendabiaaniʼ ni dxandíʼ»? ¿Ne xi ndaayaʼ zacaacabe despué? (Biiyaʼ imagen ca).

¹⁷ Ra bichaaga Jehová guendanuuxpiaaniʼ ne guendahuati chupa gunaa, rusiidibe laanu xi naquiiñeʼ gúninu para guibáninu nayecheʼ. Ca binni ni ricaa invitación stiʼ «gunaa nahuati» ca ruyúbicaʼ ca placer stiʼ inmoralidad sexual. Rúnicabe ni riuuláʼdxicabe ne qué riníʼ íquecabe pa ni cayúnicabe ca zuniná ni laacabe despué. Peru laanu nánnanu «ndaaniʼ Baʼ» nga guilúxecabe (Prov. 9:13, 17, 18).

¹⁸ Ca ni ricaa invitación stiʼ guendabiaaniʼ ni dxandíʼ ca riuucaʼ nayecheʼ purtiʼ ricaacaʼ guendaró espiritual ni napa gadxé gadxé guendaró nanixe ni guca preparar chaahuiʼ ne ni zacané guendanabani sticaʼ (Is. 65:13). Biquiiñeʼ Jehová profeta Isaías para guníʼ: «Lagucaadiaga chaahuiʼ naa, lagó ni galán ne zudiitu cuenta xii nga ni dxandíʼ nanixe» (Is. 55:1, 2). Ne nga nga ni cayúninu, cazíʼdinu  gannaxhiinu Jehová ne gaca nanaláʼdxinu ni nanaláʼdxibe (Sal. 97:10). Ne ridxá tipa ladxidoʼno ra guni invitarnu xcaadxi guicaacaʼ «guendabiaaniʼ ni dxandíʼ». Nácanu casi ca sierva ni riete lu capítulo 9 stiʼ Proverbios, ni cucaacaʼ ridxi «dede ca lugar jma nasoo stiʼ guidxi que». Cásica laacabe rininu: «¡Guiráʼ ca ni qué ganna gastiʼ, latáʼ raríʼ!». Ca ni ricaa invitación riʼ cadi yanna si zápacaʼ ndaayaʼ sínuque para siempre. Pa cadi gusaana de sanu lu neza stiʼ guendariene, zanda guicanu guendanabani ni qué zaluxe (Prov. 9:3, 4, 6).

19. Casi ná Eclesiastés 12:13, 14, ¿xi caquiiñeʼ gúninu? (Biiyaʼ recuadru ni láʼ « Ca ndaayaʼ ni zápanu pa guidxíbinu Dios»).

¹⁹ (Biindaʼ Eclesiastés 12:13, 14). Cumu nabáninu lu ca últimu dxi ra jma maʼ nuu stale cosa malu. Nga runi, racaláʼdxinu cadi gusaananu de guidxíbinu Jehová. Purtiʼ zacá zápanu ladxidoʼno, ziuunu nayá nezalú Jehová ne maʼ gaxha de laabe. Cumu runi respetarnu ne nadxiinu laabe stale la? qué zusaana de guni invitarnu guiráʼ xixé binni para guyúbicaʼ «guendabiaaniʼ ni dxandíʼ» ne guicaacaʼ ca ndaayaʼ stini.