1. ¿Xi caquiiñeʼ gúninu para guilanu dxi gueeda dxi stiʼ Jehová?

 ORA riete lu Biblia «dxi stiʼ Jehová» caníʼ ni de ca dxi gunitilú Dios guiráʼ ca enemigu stiʼ ne gulá xquidxi. Ne maʼ bizaacaʼ nga dxiqué, dxi binduuxeʼ Jehová ca enemigu stiʼ (Is. 13:1, 6; Ezeq. 13:5; Sof. 1:8). Mayaca gueeda «dxi stiʼ Jehová» zuzulú ni dxi gucaalú ca gobiernu Babilonia guidxi roʼ ne zaluxe ni lu guerra stiʼ Armagedón. Para ganda guilanu «dxi» ca, dede ca yanna naquiiñeʼ chuʼnu listu. Ne Jesús bisiidiʼ naquiiñeʼ «chuʼnu listu» para ca dxi ra «ziuu stale yuubaʼ» o gran tribulación, ca diidxaʼ chuʼnu listu rusihuinni ca ni cadi caquiiñeʼ gusaana de gúninu ni (Luc. 12:40; Mat. 24:21).

2. ¿Ximodo zacané Primé Carta para ca Tesalonicenses laanu?

² Lu Primé Carta para ca Tesalonicenses, bichaaga Pablo caadxi cosa para gacanebe ca xpinni Cristu chuʼcaʼ listu ora guedandá dxi stiʼ Jehová. Neca nanna Pablo qué zazaaca ni ca dxi que (2 Tes. 2:1-3). Peru gúdxibe laacaʼ nabé risaca chuʼcaʼ listu purtiʼ maʼ gaxhadóʼ nuu ni. Laaca galán chinándanu conseju ca. Yanna, guidúʼyanu chonna cosa ni guniʼbe. Primé, modo guedandá dxi stiʼ Jehová, guiropa, tuu nga ca ni chiguilá ne guionna, xi zanda gúninu para chuʼnu listu.

3. ¿Ximodo nga zeeda dxi stiʼ Jehová casi reeda ti gubaanaʼ huaxhinni? (Biiyaʼ ca imagen ca).

³ «Casi reeda ti gubaanaʼ huaxhinni» (1 Tes. 5:2). Ndiʼ nga primé de ca guionna cosa ni bichaaga Pablo para guiníʼ ximodo  chigueedandá dxi stiʼ Jehová. Ca gubaanaʼ ca rindánacaʼ huaxhinni ne rúnicabe ni nagueenda ora nisiaasiʼ binni. Zaqueca nga dxi stiʼ Jehová, zeeda ni nagueenda ne ora guirutiʼ tu cabeza ni. Dede né ca ni dxandíʼ xpinni Cristu zándaca zadxagayaanu pabiáʼ nagueenda guizaaca ca cosa riʼ. Peru ca malu nga chiguinitilú, cadi laanu.

4. ¿Ximodo nga zeeda dxi stiʼ Jehová casi ora reeda yuubaʼ stiʼ ti gunaa ni chigapa baʼduʼ?

⁴ «Casi ora rinaazeʼ yuubaʼ ti gunaa ora maʼ gunda dxi gapa baʼduʼ» (1 Tes. 5:3). Ti gunaa chigapa baʼduʼ qué ganna pora guzulú gapa yuubaʼ. Peru nanna dxíchibe zedandá dxi ca, nánnabe málasi zedandá ni, naná ni ne gastiʼ zanda gucueeza ni. Ngueca nga ni zanda guininu de dxi stiʼ Jehová, neca qué gánnanu padxí ne pora gueeda ni nanna dxíchinu zeedandá ni. Ne nánnanu málasi zunitilú Dios ca enemigu stiʼ ne nin tobi de laacaʼ qué zalacaʼ.

5. ¿Ximodo nga zeeda gaca gran tribulación casi ora maʼ zirá gueelaʼ?

⁵ Casi ora rirá gueelaʼ. Lu guionna cosa ni bichaaga Pablo dxi stiʼ Jehová que, ruzeeterube de ca gubaanaʼ ni ribaʼnaʼ huaxhinni, peru yanna Pablo ruchaaga dxi stiʼ Jehová casi ora maʼ zirá gueelaʼ (1 Tes. 5:4). Cumu maʼ nuucabe cabáʼnacabe la? nin ránnacabe ridiʼdiʼ tiempu, rirá gueelaʼ ne zanda guʼyaʼ binni laacabe. Zacaca zazaaca dxi gueeda gran tribulación. Ca binni ni guni cosa malu laaca qué zudiicaʼ cuenta, cásica ca gubaanaʼ ni ribaʼnaʼ huaxhinni nin qué zánnacaʼ zedandá dxi que luguiacaʼ. Peru maʼ gadxé laanu de laacabe, laanu nuunu listu para ora gueeda dxi stiʼ Jehová. ¿Ximodo yaʼ? Ra gucáʼnanu guiráʼ ca cosa ni nanalaʼdxiʼ Jehová ne gúninu stipa cadi gusaana de «gácanu nachaʼhuiʼ, gúninu ni jneza ne guininu ni dxandíʼ» (Efes. 5:8-12). Despué bizeeteʼ Pablo chupa ejemplu para guiníʼ de ca ni qué zalá dxi gueeda dxi stiʼ Jehová.

6. ¿Xiñee zanda guininu nisiaasiʼ stale binni? (1 Tesalonicenses 5:6, 7).

⁶ «Ca ni nisiaasiʼ» (biindaʼ 1 Tesalonicenses 5:6, 7). Bizeeteʼ Pablo zeeda gaca ca ni qué zalá ora gueeda dxi stiʼ Jehová casi ca ni nisiaasiʼ. Ora nisiaasiʼ ti binni qué lica ranna xi guiráʼ cazaaca, qué ranna pa cadiʼdiʼ tiempu ne qué ridxela xi guni pa málasi gucuaaniʼ xiixa laa. Ngueca nga rizaaca ne ca binni ni qué runi ni ná Jehová: Stale de laacaʼ nisiaasicaʼ (Rom. 11:8). Neca cayuuyacaʼ cazaaca stale cosa peru qué runi crecaʼ pa maʼ nabáninu lu «ca últimu dxi» ne maʼ gaxha nuu gran tribulación. Ora guizaaca xiixa lu Guidxilayú nuu tu ruyubi guiziidiʼ de Reinu stiʼ Dios, peru ti ratuhuiiniʼ si rúnicabe ni purtiʼ nagueenda rásicabe sti biaje. Ne dede nuu tu runi cré zedandá dxi zuni juzgar Dios binni peru para laacabe qué zazaaca ni laga nabánicabe (2 Ped. 3:3, 4). Peru laanu nánnanu nabé risaca chinándanu conseju de chuʼnu listu ne cadi gásinu jmaruʼ si ca dxi nagana riʼ.

7. ¿Ximodo nga zeeda gaca ca binni ni chigunitilú Dios casi binni ni rixudxi?

⁷ «Ca ni rixudxi». Bichaaga apóstol Pablo ca binni ni chigunitilú Dios casi binnigüeʼ, ca ni rixudxi la? qué ránnacaʼ xi rúnicaʼ ne ricaacaʼ decisión ni cadi jneza. Ngueca nga rizaaca ca binni malu, qué rulábicaʼ ni rabi Dios laacaʼ, ribicaʼ guibánicaʼ modo ná íquecaʼ ne pur nga zanitilucaʼ. Nga runi gudxi apóstol Pablo ca xpinni Cristu cuʼcaʼ xpiaanicaʼ, gánnacaʼ xi cayúnicaʼ ne cadi gácacaʼ casi binni ni naxudxi (1 Tes. 5:6). Ti hombre ni nanna de Biblia guníʼ ora cadi naxudxi tuuxa «naca ti binni tranquilu, riníʼ ique chaahuiʼ xi chiguni ne nga racané laa guicaa decisión jneza». ¿Peru xiñee naquiiñeʼ chuʼnu tranquilu ne quixhedxinu xquendabiaaninu yaʼ? Para cadi chuʼnu lu política ne cadi guiábanu lu guiráʼ ni runi binni. Ne cumu jma maʼ gaxha nuu dxi stiʼ Jehová la? jma nga zucaa binni laanu gúninu guiropaʼ cosa ni bizéʼtenu ca. Peru cadi naquiiñeʼ guiníʼ ique xhaatanu xi chigúninu purtiʼ zacané espíritu stiʼ Dios laanu chuʼnu tranquilu ne guiníʼ ique chaahuinu xi gúninu ne laaca zacané ni laanu guicaanu decisión jneza (Luc. 12:11, 12).

8. Casi ná 1 Tesalonicenses 5:8, ¿xi cualidad zacané laanu para gatananu ne cuʼ xpiaaninu? (Biiyaʼ imagen ca).

⁸ Gácunu coraza ne cuʼnu cascu íquenu. Bichaaga Pablo laanu casi soldadu nexhená ne nacu armadura stiʼ (biindaʼ 1 Tesalonicenses 5:8). Ne ora nuu guerra la? nuuca ti soldadu listu para chitinde. Ngueca nga ni caquiiñeʼ gúninu. Zusihuínninu nuunu listu para ora gueeda dxi stiʼ Jehová pa gácunu coraza, laani nga fe ne guendarannaxhii, ne pa cuʼnu cascu íquenu ni zeeda gaca esperanza nápanu. Nabé zacané ca cualidad riʼ laanu.

9. ¿Ximodo racané fe ca laanu?

⁹ Cásica rapa ti coraza ladxidóʼ ti soldadu, zaqueca rapa fe ne guendarannaxhii ladxidoʼno. Racané ca cualidad riʼ laanu cadi gusaana de gúninu ni ná Jehová ne chinándanu Jesús. Racané fe ca laanu chuʼnu seguru dxandíʼ riguu Jehová ndaayaʼ ca ni qué gusaana de guyubi laa (Heb. 11:6). Ne laaca rucaa fe ca laanu cadi guixélenu de Líder stinu, Jesús, neca cadxaagalunu guendanagana. Para iguidxi fe stinu ne gudxíʼlunu ca guendanagana ni cadxaagalunu, galán guidúʼyanu xi huayacané caadxi hermanu cadi guixélecaʼ de Jehová neca canazanándacabe laacaʼ o pa huaxiéʼ bueltu nápacaʼ. Ne para cadi guicá íquenu gápanu cosa risaca la? zanda chinándanu ejemplu stiʼ ca ni nabaniné huaxiéʼ cosa, ni ruyubi Reinu stiʼ Dios primé lu xquendanabani. b

10. ¿Ximodo racané guendarannaxhii ni nápanu Dios ne binni laanu?

 ¹⁰ Para gatananu ne cuʼ xpiaaninu caquiiñeʼ gusihuínninu guendarannaxhii (Mat. 22:37-39). Racané guendarannaxhii ni nápanu Dios laanu para guni predicarnu neca guidxaagalunu guendanagana (2 Tim. 1:7, 8). Ne cumu laaca nadxiinu binni ni qué runi cré ni runi crenu la? rúninu stipa guni predicarnu laacabe dede nuu biaje rúninu ni pur teléfono o pur carta. Qué riníʼ íquenu maʼ qué zuchaacabe, sínuque ribézanu guedandá dxi guchaacabe ne gúnicabe ni jneza (Ezeq. 18:27, 28).

11. Ora gannaxhiinu ca hermanu, ¿ximodo racané ni laanu? (1 Tesalonicenses 5:11).

¹¹ Laaca nadxiinu ca hermanu stinu ne rusihuínninu ni ra riguʼnu gana laacaʼ ne ra gacanésaanu (biindaʼ 1 Tesalonicenses 5:11). Ora maʼ nuu ca soldadu lu guerra racanésaacaʼ. Peru zándaca ra cadíndecabe málasi guninácabe tobi de ca compañeru stícabe sin gudiicabe cuenta peru de laapecabe la? qué ziale guninácabe tobi. Zacaca nga laanu, laaca qué zuyúbinu guninanu ca hermanu stinu o guquíxenu ni gúnicaʼ laanu (1 Tes. 5:13, 15). Laaca rusihuínninu nadxiinu ca hermanu stinu ora runi respetarnu ca ni zániru ndaaniʼ congregación (1 Tes. 5:12). Guiníʼ íquenu ni bizaaca congregación de Tesalónica. Dxi bicaa Pablo ra nuucabe caʼruʼ lica gusaa congregación ca ti iza de guca formar. Zándaca huaxieʼruʼ nanna ca ancianu que ne rucheerucaʼ, peru neca zaqué naquiiñeʼ guni respetárcabe laacaʼ. Ra jma maʼ gaxha nuu gran tribulación jma zaquíʼñenu gacané ca ancianu de congregación laanu purtiʼ zándaca maʼ qué zacaanu instrucción stiʼ central mundial ne stiʼ sucursal para gánnanu xi gúninu. Pur nga dede ca yanna naquiiñeʼ gusihuínninu nadxiinu ca ancianu ne runi respetarnu laacaʼ. Nga runi intiica si guizaaca, cuʼnu xpiaaninu ne cadi guidúʼyanu ra cucheecabe, sínuque guietenaláʼdxinu caquiiñeʼ Jehová Jesús para guni guiar laacabe.

12. ¿Ximodo rapa esperanza ca xquendabiaaninu?

¹² Cásica rapa ti cascu ique ti soldadu, zacaca rapa esperanza stinu xquendabiaaninu.  Esperanza ni nápanu riʼ racané ni laanu cadi gusisácanu ca cosa risaca ni nuu lu Guidxilayú riʼ (Filip. 3:8). Laaca racané ni laanu gatadxí ladxidoʼno ne riguixhedxí ni xquendabiaaninu. Guidúʼyanu ximodo gucané esperanza riʼ Wallace ne Laurinda, laacabe cayuni servírcabe ndaaniʼ guidxi África. Lu chonna si semana, tobi de laacabe biniti jñaa ne stobi que bixhoze. Cumu nuu pandemia sti COVID-19 la? qué ñanda nibiguétacabe xquídxicabe para ñuunécabe familia stícabe. Hermanu que bicaa: «Esperanza de guiasa ca ni maʼ guti racané ni naa guiníʼ iqueʼ ximodo zabánicabe ca primé dxi chúʼcabe ndaaniʼ guidxilayú cubi ne cadi guiníʼ iqueʼ ximodo guca ca últimu dxi stícabe ndaaniʼ Guidxilayú riʼ. Racané esperanza riʼ naa gudxieeluáʼ yuubaʼ ni reeda ora runiti tuuxa ti familia stiʼ ne cadi chuaaʼ triste».

13. ¿Xi caquiiñeʼ gúninu para gudii Jehová laanu espíritu santu stiʼ?

¹³ «Cadi gusuiʼtu guí stiʼ espíritu» (1 Tes. 5:19).Bichaaga apostol Pablo espíritu santu casi ti guí ni nuu ndaaniʼ ladxidoʼno. Racané espíritu ca laanu gúninu xhiiñaʼ Jehová né guendanayecheʼ né stale gana, ne racané ni laanu chuuláʼdxinu gúninu ni jneza (Rom. 12:11). Yanna ¿xi zanda gúninu para gudii Jehová laanu espíritu santu stiʼ ya? Naquiiñeʼ guinábanu ni laabe, guidúʼndanu Stiidxabe ne cadi guixélenu de organización stibe. Pa gúninu ca cosa riʼ, zápanu ca «cualidad stiʼ espíritu» (Gál. 5:22, 23).

14. ¿Xi cadi naquiiñeʼ gúninu para cadi gaxha Dios laanu espíritu stiʼ? (Biiyaʼ ca imagen ca).

¹⁴ Rudii Jehová laanu espíritu stiʼ, peru naquiiñeʼ gápanu cuidadu. Qué racaláʼdxinu gusuiʼnu guí stiʼ espíritu. Para gudii Jehová laanu espíritu stiʼ, naquiiñeʼ gúninu ne guiníʼ íquenu puru si ni jneza. Pa guiníʼ íquenu ni cadi jneza ne gúninu ca ni la? zaxha Dios laanu espíritu stiʼ (1 Tes. 4:7, 8). ¿Xi sti cosa naquiiñeʼ gánnanu yaʼ? Apóstol Pablo guníʼ: «Cadi guni despreciartu ca profecía» (1 Tes. 5:20). Lu versículo riʼ, diidxaʼ «profecía» riníʼ ni de ca mensaje ni bidii Dios ra biquiiñeʼ espíritu stiʼ.  Lade ca ni riete de dxi stiʼ Jehová ne pabiáʼ maʼ gaxha nuu ni. Laanu qué riníʼ íquenu cayaadxaʼ stale para gueeda dxi stiʼ Jehová o qué zadúʼyanu dxi gueeda Armagedón, sínuque riníʼ íquenu maʼ cadi candaa para gueeda dxi stiʼ Jehová. Nga runi, rúninu stipa gaca conducta stinu nayá ne rúninu cosa ni rusihuinni runi adorarnu Dios guiráʼ dxi (2 Ped. 3:11, 12).

15. ¿Xi caquiiñeʼ gúninu para cadi quiteʼ guirutiʼ laanu? (1 Tesalonicenses 5:21).

¹⁵ Maʼ cadi candaa zaníʼ ca enemigu stiʼ Dios «¡Maʼ nuu paz ne seguridad!» (1 Tes. 5:3). Zuzulú zareeche mensaje stiʼ ca demonio ne zaguítecaʼ stale binni (Apoc. 16:13, 14). ¿Laanu yaʼ? ¿Ñee zudiʼnu lugar quítecabe laanu la? Qué zazaacanu nga pa chinándanu conseju riʼ: «Laguyubi chaahuiʼ xii nga ni jneza» (Biindaʼ 1 Tesalonicenses 5:21). Diidxaʼ griegu ni biquiiñeʼ raríʼ para gaca traducir «laguyubi chaahuiʼ» riquiiñecabe ni para guʼyaʼ chaahuicabe pa dxandíʼ xiixa guiibaʼ risaca casi oro ne plata Ngaca nga naquiiñeʼ gúninu, guʼyaʼ chaahuinu pa dxandíʼ ni runadiáganu o ni ridúʼndanu. Nabé risaca guni ca binni de Tesalónica ni bizéʼtenu riʼ, peru jma risaca gúninu ni yanna purtiʼ mayaca gueeda gran tribulación. Lugar de guni crenu intiica cosa gábicabe laanu, rúninu stipa iquíʼñenu guendabiaaniʼ stinu para guchaaganu ni ridúʼndanu o ni runadiáganu né ni rusiidiʼ Biblia ne ni ná organización stiʼ Jehová. Zacá qué zaguite nin ti mensaje stiʼ ca demonio laanu (Prov. 14:15; 1 Tim. 4:1).

16. ¿Xi esperanza nápanu ne xi caquiiñeʼ gúninu dede ca yanna?

¹⁶ Nánnanu zalá xquidxi Dios lu gran tribulación, peru qué ganna cada tobi nu xi zazaaca né xquendanabani guixíʼ (Sant. 4:14). Pa tídinu o gátinu ante de gran tribulación, zudii Jehová laanu guendanabani ni qué zaluxe pa qué guchéʼnenu laa. Ca xpinni Cristu ni naca ungidu ziuucaʼ né Cristu guibáʼ, ne ca ni naca de xcaadxi dendxuʼ zabánicaʼ ndaaniʼ paraísu lu Guidxilayú riʼ. Laga guedandá dxi ca la? guinaaze dxíchinu esperanza ni nápanu ne chuʼnu listu para ora guedandá stiʼ Jehová.