Qué riníʼ diʼ Biblia xiñee, peru ruzeeteni chupa chonna cosa ni galán gánnanu ne zándaca nga nga ni bicaa laacabe guiaanacabe raqué.

Dxi gudxi ti ángel María zacaxiiñiʼ ne zapa ti baʼduhuiiniʼ, laabe ne José nabézacabe Nazaret, ti guidxi stiʼ Galilea (Luc. 1:26-31; 2:4). Ne despué dxi bireecabe de Egipto biguétacabe Nazaret. Cumu ndaaniʼ guidxi ca nga biniisi Jesús la? zanda guininu nazareno laabe (Mat. 2:19-23). Nga runi ora guiete de José, María ne Jesús la? nagueendaca riníʼ íquenu de guidxi Nazaret.

Peru galán gánnanu ti cosa, maca runibiáʼ María guidxi Judea. ¿Ximodo nánnanu ni yaʼ? Purtiʼ nápabe familia ni nabeza nezaqué. Laaca nezaqué nabeza Elisabet, laa nga xheelaʼ sacerdote Zacarías ne laabe nga jñaa Juan Bautista (Luc. 1:5, 9, 13, 36). Yeganna María Elisabet ne biaananebe laa chonna beeu, despué biguétabe Nazaret (Luc. 1:39, 40, 56).

Ra gudiʼdiʼ tiempu biree ti orden para gaca registrar guiráʼ binni. Ne para gaca registrárcabe la? biree José guidxi Nazaret para cheʼ Belén, laani nga «guidxi stiʼ David» ne maca raqué nga ruzeeteʼ ca profecía ca zale Mesías (Luc. 2:3, 4; 1 Sam. 17:15; 20:6; Miq. 5:2). Raqué nga gule Jesús. Ne nánnanu qué ñabi José María guibiguétacabe purtiʼ zitu ngue nuucabe ne deruʼ gule baʼduhuiiniʼ que. Biaanacabe Belén purtiʼ gaxha nuuni de Jerusalén, biaʼ gaʼ kilómetru si. Aque naguudxi gunaazecabe ni purtiʼ zaqué zanda chinécabe baʼduhuiiniʼ que ndaaniʼ templu ne gudiicabe ofrenda ni rinabaʼ ley que. (Lev. 12:2, 6-8; Luc. 2:22-24).

Laaca naquiiñeʼ gánnanu gudxi ángel stiʼ Dios María zacaa xiiñibe «trono stiʼ David» ne zaca rey. Zándaca biene José ne María nabé risaca nga gale Jesús ndaaniʼ guidxi stiʼ David (Luc. 1:32, 33; 2:11, 17). Ne pur nga zándaca guníʼ íquecabe jma galán guiaanacabe Belén ne cuézacabe xiruʼ gabi Dios laacabe.

Ne biaʼ ra nánnanu la? xadxiruʼ biaanacabe ndaaniʼ guidxi Belén. Neca qué gánnanu pabiáʼ tiempu zinécabe raqué dxi yeganna ca astrólogo que laacabe la? ca dxi que maʼ cadi ti baʼduhuiiniʼ Jesús, sínuque maʼ ti xcuidihuiiniʼ ne maʼ napa familia stibe ti yoo ra nabeza (Mat. 2:11). Nga runi lugar de nibiguétacabe Nazaret, biaanacabe ndaaniʼ guidxi Belén ti tiempu.

Biseendaʼ Herodes «tu guuti guiráʼ hombrehuiiniʼ de chupa iza o menu ni nuu Belén» (Mat. 2:16). Cumu gudxi ti ángel José xi chiguizaaca la? laabe ne María bireecabe de ndaaniʼ guidxi ne yenécabe Jesús Egipto, ne biaanacabe raqué dede dxi guti Herodes. Despué yené José familia stiʼ ndaaniʼ guidxi Nazaret. ¿Xiñee qué ñeecabe Belén yaʼ? Purtiʼ para tiempu que Arquelao nga cayuni mandar Judea laabe nga xiiñiʼ Herodes ne nabé malu laabe ne gudxi ti ángel ni José. Pa guiaanacabe Nazaret gastiʼ qué zaca Jesús ne zanda guiniisibe casi ti xpinni Dios (Mat. 2:19-22; 13:55; Luc. 2:39, 52).

Zándaca maʼ gutiʼ José ante gudii Jesús guendanabani stiʼ, para ganda gapa binni ti oportunidad de cheʼ guibáʼ. Pa zacá ni la? ziasa José de lade guetu para guibani lu Guidxilayú riʼ ne zuni biaʼ stale binni laabe ne zanabaʼ diidxacaʼ laabe xi bicaa laacabe guiaanacabe Belén despué de gule Jesús.