1, 2. Casi ná Salmo 25:14, ¿xi caquiiñeʼ gúninu pa racaláʼdxinu gaca xhamígunu Jehová?

 ¿XI CUALIDAD naquiiñeʼ gapa ti buen amigu? Zándaca guiníʼ íqueluʼ, ti buen amigu la? rannaxhii ne racané. Qué zadiʼdiʼ ndaaniʼ íqueluʼ caquiiñeʼ gácabe ti binni ni ridxibi para gácabe ti buen amigu, ¿njaʼ? Peru casi ruzeeteʼ textu stiʼ artículo riʼ, tu gacalaʼdxiʼ gaca xhamigu Jehová caquiiñeʼ guidxibi laabe (biindaʼ Salmo 25:14).

² Nga runi, biaʼ tiica iza zinenu de cayúninu ni ná Jehová, guiranu caquiiñeʼ guidxíbinu laabe. Peru ¿xi riníʼ guidxíbinu o guni respetarnu Dios yaʼ? ¿Xi zacané laanu gápanu respetu Jehová? ¿Xi zanda guizíʼdinu de respetu ni gupa ti mozo ni láʼ Abdías ne sumo sacerdote Jehoiadá Jehová? Ne ¿xi caquiiñeʼ gúninu para cadi gácanu casi rey Jehoás?

3. Pa ridxíbinu, ¿ximodo zanda gacané ni laanu?

³ Ora nuu xiixa ni rábinu zuniná laanu la? ridxíbinu. Ne gastiʼ naca guni sentirnu zacá, purtiʼ zacané ni laanu gánnanu xi gúninu, rápani laanu. Guidúʼyanu caadxi ejemplu. Ora ridxíbinu, rucaani laanu cadi sanu ti lugar ra nasoo, purtiʼ nánnanu zanda guiábanu. Ne laaca rucaani laanu guxóʼñenu de xiixa ni zanda cuʼ xquendanabáninu ra naxoo. Racané guendaridxibi  ca laanu cadi guininu o gúninu xiixa ni guniná ti xhamígunu.

4. ¿Xi racalaʼdxiʼ Binidxabaʼ guni sentirnu pur Jehová?

⁴ Racalaʼdxiʼ Binidxabaʼ gúʼyanu Jehová casi ti Dios malu dede guidxíbinu laa ne guiníʼ íquenu dxandíʼ ca diidxaʼ ni gudxi Elifaz Job. Elifaz guníʼ: naca Jehová ti Dios ni ruquixe ni gúnicabe laa, nabé ridxiichi ne qué riuu nayecheʼ né ni rúninu pur laa (Job 4:18, 19). Ni racalaʼdxiʼ Binidxabaʼ nga gucueezaʼ dxiibi ca laanu de gúninu ni ná Jehová. Para gucáʼnanu trampa riʼ, caquiiñeʼ guidxíbinu Jehová ne gápanu respetu laa.

5. ¿Xi riníʼ guidxíbinu Jehová?

⁵ Ti binni ni ridxibi gucheené Dios o ni runi respetar laabe de guidubi ladxidóʼ la? nadxii laabe ne qué racalaʼdxiʼ guni xiixa ni guxheleʼ laa de laabe. Ne Jesús nga ti ejemplu galán de tuuxa ni bidxibi gucheené Dios, purtiʼ bizuubaʼ stiidxabe (Heb. 5:7). Ne qué ñuni Jesús ni purtiʼ si ridxibi guni Jehová laa xiixa (Is. 11:2, 3). Sínuque bíʼnibe ni purtiʼ nadxiibe Bixhózebe de guidubi ladxidoʼbe ne biale de laabe gúnibe ni ná (Juan 14:21, 31). Laanu laaca nápanu stale respetu Jehová ne rúninu ni ná purtiʼ naca ti Dios ni rannaxhii, nuu xpiaaniʼ, runi ni jneza ne napa stale poder. Ne laaca nánnanu guizáʼ nadxiibe laanu ne riuubaʼ ladxidoʼbe ora qué ruzúʼbanu stiidxabe. Pur ca cosa ni gúninu, zanda gusiéchenu ladxidóʼ Jehová o cuʼnu laa triste (Sal. 78:41; Prov. 27:11).

6. ¿Xi zanda gúninu para guizíʼdinu guidxíbinu guchéʼnenu Jehová? (Salmo 34:11).

⁶ Caquiiñeʼ guizíʼdinu guidxíbinu guchéʼnenu Jehová purtiʼ qué ralenenu ni (biindaʼ Salmo 34:11). Ti modo gúninu ni nga ra guidúʼyadxinu guiráʼ ni maʼ bizaʼbe. Purtiʼ «rusihuinni ca ni bizaʼbe» pabiáʼ nuu xpiaanibe, guizáʼ nápabe poder ne guizáʼ nadxiibe laanu (Rom. 1:20). Ti hermana láʼ Adrienne guníʼ: «Ora guuyaʼ guiráʼ ni bizáʼ Jehová, ridxagayaaʼ pabiáʼ nuu xpiaanibe ne racané ni naa gudieeʼ cuenta laabe nga nánnabe xii nga ni jma galán para naa». Pur guníʼ ique hermana riʼ ca cosa ni bizéʼtenu riʼ, guniʼbe: «Qué ziuu dxi guneʼ xiixa ni guxheleʼ naa de Jehová, Dios ni bidii naa guendanabani». Yanna, ¿lii yaʼ? ¿Ñee zanda cueeluʼ tiempu semana riʼ para guiníʼ íqueluʼ xiixa ni bizáʼ Jehová la? Pa gúniluʼ ni zacané ni lii gápaluʼ respetu ne gannaxhiiluʼ laabe jma (Sal. 111:2, 3).

7. ¿Ximodo racané ca oración ca laanu guidxíbinu guchéʼnenu Jehová?

⁷ Sti modo zanda guizíʼdinu guidxíbinu guchéʼnenu Jehová nga cadi gusaana de guni orarnu. Ora jma rinínenu Jehová, jma ridúʼyanu laabe casi ti binni. Cada biaje guinábanu laabe stipa para gudxíʼlunu xiixa prueba riníʼ íquenu pabiáʼ poder nápabe. Ora rudiʼnu xquixe peʼ laabe pur guendaguti stiʼ Xiiñibe, rietenaláʼdxinu guendarannaxhii ni nápabe laanu. Ne ora rinábanu Jehová gacané laanu gudxíʼlunu xiixa guendanagana qué riaandaʼ laanu pabiáʼ nuu xpiaanibe. Racané ca oración riʼ laanu gápanu jma respetu Jehová ne gucáʼnanu intiica cosa ni zanda guxheleʼ laanu de laabe.

8. ¿Xi zanda gúninu para cadi gusaana de guidxíbinu guchéʼnenu Jehová?

⁸ Para cadi gusaana de guidxíbinu guchéʼnenu Jehová, caquiiñeʼ guni estudiarnu Biblia para ganda guizíʼdinu de ca ejemplu galán ne ni cadi galán zeeda luni. Guidúʼyanu chonna de laani. Primé la? chupa ejemplu galán stiʼ ca xpinni Jehová: Abdías, mozo stiʼ rey Acab, ne sumo sacerdote Jehoiadá. Ne despué la? ni biʼniʼ Jehoás, rey stiʼ guidxi Judá, primerugá que bizuubabe stiidxaʼ Jehová peru despué bixhélebe de laa.

9. Ra guca Abdías ti hombre ni nabé ridxibi Jehová, ¿ximodo gucané ni laa? (1 Reyes 18:3, 12).

⁹ Primé biaje riete de Abdías b lu Biblia, riétebe casi: «ti binni ni nabé ridxibi Jehová» (biindaʼ 1 Reyes 18:3, 12). Yanna, guidxibi Abdías gucheené Dios, ¿ximodo gucané ni laa? Gucané ni laabe gácabe ti binni honradu ne tobi ni zanda gápacabe confianza laa. Bidii rey que laabe gápabe lidxi (bichaaga ni né Nehemías 7:2). Ne laaca gucané ni laabe gápabe valor, ti cualidad ni caquiiñebe. ¿Xiñee yaʼ? Purtiʼ bibánibe tiempu biʼniʼ mandar rey Acab, rey ni biʼniʼ cosa feu nezalú Jehová jma que xcaadxi rey ni guyuu ante de laa (1 Rey. 16:30). Ne Jezabel nga xheelaʼ Acab, ti gunaa ni runi adorar Baal ne nabé nanalaʼdxiʼ Jehová dede guyuu nunduuxeʼ guiráʼ tu runi adorar Jehová, lu reinu ni nuu ladu guiaʼ stiʼ guidxi Israel. Ne biiti gunaa riʼ stale profeta stiʼ Dios ni dxandíʼ (1 Rey. 18:4). ¡Aque nagana guca para guni adorárcabe Jehová ca dxi que!

10. ¿Ximodo bisihuinni Abdías guizáʼ nadxibalú?

¹⁰ ¿Ximodo bisihuinni Abdías napa valor? Dxi guzananda Jezabel ca profeta stiʼ Dios para guuti laacabe, gucuaa Abdías ti gayuaa de ca profeta que ne bicaachibe laacaʼ ndaaniʼ ti cueva. Bíʼnibe chupa grupu ne bidiibe laacaʼ pan ne nisa (1 Rey. 18:13, 14). Pa ñanna Jezabel ni bíʼnibe que, ñuuti laabe. Cumu naca Abdías casi laanu la? bidxibi gatiʼ. Peru, pur guizáʼ nadxiibe Jehová ne ca xpinni, gunabe chuʼ xquendanabánibe ra naxoo.

11. ¿Ximodo rinanda ca xpinni Jehová ejemplu stiʼ Abdías? (Biiyaʼ imagen ca).

¹¹ Ca dxi stinu riʼ, stale de ca xpinni Jehová nabézacabe lugar ra cucueeza gobiernu xhiiñaʼ Dios. Peru rusihuínnicabe nápacabe respetu ca autoridad. Ne cásica Abdías, qué rusaana ca hermana ne hermanu stinu de guni adorarcaʼ Jehová (Mat. 22:21). Rusihuínnicabe jma risaca para laacabe guzuubacabe stiidxaʼ Dios que stiidxaʼ hombre (Hech. 5:29). Nga runi, qué rusaana de guni predicárcabe ne gúnicabe ca reunión stícabe peru rúnicabe ni sin gudii ca autoridad cuenta (Mat. 10:16, 28). Ne laaca qué rusaana de gúʼyacabe guicaa  ca hermanu guendaró espiritual ni caquiiñecaʼ. Guidúʼyanu ni biʼniʼ ti hermanu ni láʼ Henri, ni nabeza ndaaniʼ tobi de ca guidxi stiʼ África, ra bicueeza gobiernu xhiiñaʼ Jehová. Tiempu que Henri nga tobi de ca ni yené publicación ra nuu ca hermanu. Laabe bicaabe: «Nacaʼ ti binni natuíʼ ne ridxibeʼ nga runi, nuaaʼ seguru ni gucané naa gapaʼ valor guneʼ ni nga, respetu ni napaʼ Jehová». ¿Ñee zanda gácaluʼ nadxibalú casi Henri la? Zanda pue, ra guiziidiluʼ gápaluʼ stale respetu Jehová.

12. ¿Ximodo bisihuinni Jehoiadá ne xheelaʼ qué nusaanacaʼ de ñúnicaʼ ni jneza?

¹² Cumu bidxibi sumo sacerdote Jehoiadá nucheené Jehová la? Bicaa ni laabe cadi guixélebe de Jehová ne biyúbibe gaca adorar Dios jneza. Dxi biʼniʼ Atalía, xiiñiʼ Jezabel, ti dxiiñaʼ ni qué nudii Dios laa, gaca reina stiʼ guidxi Judá, bisihuinni Jehoiadá pabiáʼ ridxibi gucheené Dios. Nabé mala guca Atalía, ne cumu gucaláʼdxibe ñápabe poder ne guni mandarbe guidubi guidxi que la? biyúbibe ñuutibe guiráʼ xixé ca ni zanda gueeda gaca rey, dede né ca xhiágabe. Peru bilá Jehoás, tobi de ca ni zanda gaca rey (2 Crón. 22:10, 11). ¿Ximodo yaʼ? Purtiʼ Jehosabeat, xheelaʼ Jehoiadá, bilá Jehoás dxi naca baʼduhuiiniʼ. Laabe ne xheelabe bicaachicabe baʼduhuiiniʼ riʼ ne gúpacabe laa. Zaqué qué nusaana de ñaca tobi de ca ni zá de David rey. Cumu qué nidxibi Jehoiadá Atalía la? Qué nusaana de ñuni ni jneza neca maʼ huaniisi (Prov. 29:25).

13. ¿Ximodo bisihuinni Jehoiadá sti biaje qué nixeleʼ de Jehová?

¹³ Dxi napa Jehoás gadxe iza, bisihuinni Jehoiadá sti biaje qué nixheleʼ de Jehová. Gudixhe íquebe gúnibe xiixa, pa guiree ni jneza la? zaca Jehoás rey, tobi ni zá de David. Ne pa qué guiree ni jneza la? zati Jehoiadá. Peru cumu guluu Jehová ndaayaʼ laabe la? jneza biree guiráʼ ni bíʼnibe que. Gucané ca xaíque de familia ne ca levita para gaca Jehoás rey, ne biʼniʼ mandar Jehoiadá gatiʼ Atalía (2 Crón. 23:1-5, 11, 12, 15; 24:1). «Despué biʼniʼ Jehoiadá ti acuerdu né Jehová, rey que ne guidxi que, ra bidii stiidxacabe, zácacabe xquidxi Jehová» (2 Rey. 11:17). «Laaca guluube ca ni rapa ra puertaʼ stiʼ lidxi Jehová para cadi chuu tuuxa ni cadi nayaʼ» (2 Crón. 23:19).

14. ¿Xi ndaayaʼ gucuaa Jehoiadá pur bisisaca Jehová?

¹⁴ Maca guníʼ Jehová: «Ca ni gusisaca naa la? zusisacaʼ laacaʼ», ne nga peʼ nga ni bíʼnibe né Jehoiadá (1 Sam. 2:30). Biiyabe guicá lu Stiidxabe guiráʼ cosa galán ni biʼniʼ sumo sacerdote riʼ para ganda guizíʼdinu de laa (Rom. 15:4). Ne dxi guti Jehoiadá, gucuaa ti ndaayaʼ naroʼbaʼ, «bicaachicabe laabe ndaaniʼ guidxi stiʼ David lade ca rey que, purtiʼ bíʼnibe ni jneza para Israel ne para Dios ne para lidxi Dios» (2 Crón. 24:15, 16).

15. ¿Xi rizíʼdinu de Jehoiadá?

¹⁵ Racané ni biʼniʼ Jehoiadá laanu guidxíbinu guchéʼnenu Dios. Zanda chinanda ca ancianu ejemplu stibe, chuʼcaʼ listu para gúʼyacaʼ ne gápacaʼ ca dendxuʼ stiʼ Dios (Hech. 20:28). Ca hermanu ni maʼ huaniisi, zanda guiziidicaʼ pa guidxíbicaʼ Jehová ne cadi guixélecaʼ de laabe, zanda iquiiñeʼ Jehová laacabe para gúnicabe ni racalaʼdxiʼ purtiʼ qué rusiaandaʼ Jehová laacabe. Ca joven ca zanda guiziidicaʼ de modo bisisaca Jehová Jehoiadá ne zacá gusisácacaʼ ca hermanu ni maʼ huaniisi, guluiʼcaʼ nápacaʼ respetu laacabe, ne jmaruʼ si ca hermanu ni maʼ ziné stale iza de cayúnicaʼ ni ná Jehová (Prov. 16:31). Ne últimu la? guiranu zanda guizíʼdinu de ni biʼniʼ ca xaíque stiʼ familia  ne ca levita: cadi gusaana de gacanenu ne guzúʼbanu stiidxaʼ ca ni cayuni dirigir laanu (Heb. 13:17).

16. ¿Ximodo bisaana rey Jehoás de guni ni ná Jehová?

¹⁶ Dxi maʼ nahuiiniʼ rey Jehoás biʼniʼ stipa pur guni ni ná Jehová purtiʼ gucané Jehoiadá laabe gácabe ti binni nachaʼhuiʼ (2 Rey. 12:2). Peru, despué si de guti Jehoiadá la? biʼniʼ Jehoás ni ná ca príncipe ni maʼ bidxiideche Jehová. Ngue runi, laabe ne guidxi que bizulú biʼniʼ adorárcabe ca poste sagradu ne ca bidóʼ (2 Crón. 24:4, 17, 18). Neca guizáʼ biuubaʼ ladxidóʼ Jehová, «qué nusaana [...] de nuseendaʼ profeta ra nuucabe para guibiguétacabe» ra nuu. Peru qué ninácabe nucaadiágacabe. Qué nulábicabe Zacarías, xiiñiʼ Jehoiadá, ni naca profeta ne sacerdote stiʼ Jehová ne xprimu Jehoás. Ne laaca biseendaʼ guti Jehoás Zacarías familia ndaʼ stiʼ nga biʼniʼ stale cosa para gunda bilabe dxi nahuiinibe (2 Crón. 22:11; 24:19-22).

17. ¿Xi bizaacaʼ Jehoás pur bisaana de guidxibi Jehová?

¹⁷ Cumu bisaana Jehoás de guidxibi Jehová la? qué ñeni laa galán, purtiʼ Jehová maca guníʼ, ca ni gudxii deche laa la? zudxii déchebe laacaʼ (1 Sam. 2:30). Gudiʼdiʼ si tiempu, ti ejércitu ni napa huaxiéʼ soldadu stiʼ ca siriu, biʼniʼ ganarcaʼ ejércitu naroʼbaʼ stiʼ Jehoás, ne guizáʼ gucaná Jehoás raqué. Zeʼ si ca siriu, biiti ca xpínnibe laabe purtiʼ biitibe Zacarías. Ne cumu guizáʼ malu gúcabe la? qué nucaachicabe laabe ra rigaachiʼ ca rey (2 Crón. 24:23-25; biiyaʼ nota de estudiu stiʼ Mateo 23:35, lu diidxastiá «hijo de Baraquías»).

18. Casi ná Jeremías 17:7, 8, ¿xi caquiiñeʼ gúninu para cadi gácanu casi Jehoás?

 ¹⁸ ¿Xi bizíʼdinu de ni bizaaca Jehoás? Beeda gácabe casi ti yaga ni nuu xcu luguiáʼ si, ni caquiiñeʼ ti estaca para guzuhuaa dxiichiʼ, ne Jehoiadá nga guca estaca stibe. Peru ora guti Jehoiadá ne bidale ca binni ni bidxiideche Jehová la? bisaana Jehoás de guni ni ná Jehová, casi ñaca ñábabe purtiʼ bindubi ti bi yooxhoʼ. ¿Xi rusiidiʼ ndiʼ laanu yaʼ? Rusiidiʼ ni laanu cadi guidxíbinu guchéʼnenu Jehová purtiʼ si ca hermanu stinu ne familia stinu rúnicaʼ ni o racané ca laanu gúninu ni. Nga runi, para cadi gusaana de gúninu ni ná Jehová, caquiiñeʼ gusiróʼbanu guendarannaxhii ne respetu ni nápanu laabe. Ne zanda gúninu ni ra guni estudiarnu Stiidxabe, guiníʼ íquenu ni cadúʼndanu ne cadi gusaana de guni orarnu laabe (biindaʼ Jeremías 17:7, 8; Col. 2:6, 7).

19. ¿Xi cabeza Jehová gúninu?

¹⁹ Qué rinabaʼ Jehová laanu xiixa ni qué zanda gúninu. Ni racaláʼdxibe nga gúninu ni ná Eclesiastés 12:13: «Bidxibi Dios ni dxandíʼ ne biʼniʼ ni ná guiráʼ ca mandamientu stiʼ, purtiʼ nga nga ni naquiiñeʼ guni guiráʼ binni». Pa guidxíbinu guchéʼnenu Jehová, zanda gudxíʼlunu intiica guendanagana ni gueeda ne qué zusaananu de gúninu ni ná Dios cásica biʼniʼ Abdías ne Jehoiadá. Ne gastiʼ zuxheleʼ laanu de Jehová.