1. ¿Xi rusiidiʼ Eclesiastés 3:1, 7 laanu?

NUU de laanu nabé riuuláʼdxinu guininu, peru nuu xcaadxi huaxiéʼ riníʼ. Casi ná textu stiʼ artículo riʼ, nuu tiempu para guininu ne tiempu para cadi guininu (biindaʼ Eclesiastés 3:1, 7). Neca zacá, zándaca nuu biaje ñuuláʼdxinu niníʼ tuuxa hermanu jma ne xcaadxi hermanu cadi niníʼ peʼ stale.

2. ¿Tu nga zanda gabi laanu pora ne ximodo naquiiñeʼ guininu?

² Ti regalu ni maʼ bidii Jehová laanu nga iquiiñenu ruaanu para guininu (Éx. 4:10, 11; Apoc. 4:11). Lu Stiidxabe, rusiidibe laanu iquiiñenu regalu riʼ jneza. Lu artículo riʼ zadúʼyanu ejemplu ni zeeda lu Biblia ni zacané laanu gánnanu pora guininu ne pora cadi guininu. Laaca zadúʼyanu ximodo ruuyaʼ Jehová ca diidxaʼ ni rábinu xcaadxi. Guidúʼyanu primeru pora nga caquiiñeʼ guininu.

3. Casi ná Romanos 10:14, ¿pora nga caquiiñeʼ guininu de Jehová ne de Reinu stiʼ?

³ Caquiiñeʼ chuʼnu dispuestu guininu de Jehová ne de Reinu stiʼ guiráʼ ora (Mat. 24:14; biindaʼ Romanos 10:14). Ora rúninu ni, rinándanu ejemplu stiʼ Jesús. Purtiʼ laa beeda lu Guidxilayú riʼ para gusiidiʼ binni ni dxandíʼ de Bixhoze (Juan 18:37). Peru caquiiñeʼ guietenaláʼdxinu laaca risaca nga modo guinínenu binni. Nga runi, ora guinínenu xcaadxi binni de Jehová, caquiiñeʼ gúninu ni «né diidxaʼ nadóʼ ne stale respetu», ne guicaanu en cuenta ni runi sentírcabe ne ni runi crécabe (1 Ped. 3:15). Nga runi, ora guni predicarnu la? qué zaninésinu binni, sínuque zusíʼdinu laacabe xiixa ne zándaca chindanu ndaaniʼ ladxidóʼcabe.

4. Casi ná Proverbios 9:9, ¿xiñee risaca gudii ca ancianu conseju?

 ⁴ Pa guʼyaʼ ca ancianu caquiiñeʼ ti hermanu o ti hermana xiixa conseju, naquiiñeʼ guiniʼnécabe laabe. Zuyúbicabe pora nga jma jneza guiniʼnécabe laabe, zándaca zúnicabe ni ti lugar ra guirutiʼ gunadiaga laacabe, para cadi guituí lú hermanu o hermana ca. Ora rudii ca ancianu conseju tuuxa, rúnicaʼ stipa guni respetarcaʼ binni ca. Ne ruluiʼcaʼ laabe ca principiu zeeda lu Biblia ni zacané laabe gúnibe ni jneza (biindaʼ Proverbios 9:9). ¿Xiñee risaca nga gácanu nadxibalú ne guininu ora caquiiñeʼ gúninu ni? Guidúʼyanu ejemplu stiʼ ti hombre ni qué niguu jneza ca xiiñiʼ ne de racá zadúʼyanu ejemplu stiʼ ti gunaa ni guniʼné ti rey.

5. ¿Xiñee zanda guininu qué ñuni Elí xiixa neca guluu jneza ca xiiñiʼ?

⁵ Napa sumo sacerdote Elí chupa xiiñiʼ, ne nabé nadxiibe laacaʼ. Peru qué ñuni respetar ca xiiñibe Jehová. Bíʼnicabe ti dxiiñaʼ risaca ndaaniʼ tabernáculo que, purtiʼ gúcacabe sacerdote. Peru biʼniʼ abusárcabe de autoridad stícabe, qué rusisácacabe ca ofrenda stiʼ Jehová ne runi cometércabe pecadu sexual (1 Sam. 2:12-17, 22). Casi ná Ley stiʼ Moisés, caquiiñeʼ gáticabe, peru gunalú Elí laacabe. Ne guluu jnézabe ca xiiñibe peru bíʼnibe ni né diidxaʼ nadóʼ ne bidiibe lugar gúnirucaʼ dxiiñaʼ ndaaniʼ tabernáculo que (Deut. 21:18-21). ¿Xi biʼniʼ Jehová yaʼ? Gudxi Jehová Elí: «¿Xiñee cadi cusaana de gusisácaluʼ ca xiiñiluʼ jma que naa pue?». Nga runi gudixhe íquebe gunduuxebe ca hombre malu que (1 Sam. 2:29, 34).

6. ¿Xi rusiidiʼ ni bizaaca Elí laanu?

⁶ Ni bizaacaʼ Elí rusiidiʼ ni laanu ti cosa nabé risaca. Pa gánnanu maʼ bicheené ti xhamígunu o ti familia stinu ley stiʼ Dios la? caquiiñeʼ guinínenu laabe ne gusietenaláʼdxinu laabe ca norma ni zeeda lu Biblia. De racá caquiiñeʼ guidúʼyanu gacané ca hermanu ni maʼ gulí Jehová laabe (Sant. 5:14). Qué racaláʼdxinu gácanu casi Elí ne gusisácanu ti xhamígunu o ti familia stinu jma que Jehová. Cadi fácil nga uguu jnézaluʼ ti binni, peru caquiiñeʼ gácaluʼ nadxibalú para gúniluʼ ni, ne despué zuuyaluʼ pabiáʼ risaca stipa bíʼniluʼ. Guidúʼyanu xiñee maʼ gadxé ni biʼniʼ Elí ne maʼ gadxé ni biʼniʼ ti gunaa israelita láʼ Abigaíl.

7. ¿Xiñee guniʼné Abigaíl David?

 ⁷ Abigaíl nga xheelaʼ Nabal, ti hombre ni napa stale bueltu ne stale layú. Dxi canagucachilú David ne ca xpinni de rey Saúl la? biaanacabe ra nuu ca pastor stiʼ Nabal ne gúpacabe ca dendxuʼ stiʼ de ca gubaanaʼ. Peru ¿ñee bidii Nabal xquixe peʼ laacabe pur ni bíʼnicabe la? Coʼ. Dxi gunabaʼ David laabe gudiibe laa ne ca xpinni caadxi nisa ne ni gocaʼ la? laga bidxiichi Nabal, guníʼ mal ne gudindené laacabe (1 Sam. 25:5-8, 10-12, 14). Ngue runi, guníʼ David zuuti guiráʼ ca hombre runi dxiiñaʼ ra lidxi Nabal (1 Sam. 25:13, 22). ¿Xi zanda gucueeza David para cadi guni ni maʼ gudixhe ique yaʼ? Nagueendaca bidii Abigaíl cuenta caquiiñeʼ guni xiixa. Gúcabe nadxibalú, guyebe ra nuu David ne ra nuu ca xpinni, tapa gayuaa hombre ni candaana, ni naaze guiibaʼ ne ni cadxiichi, ne guníʼnebe laa.

8. ¿Xi rizíʼdinu de ni bizaaca Abigaíl?

⁸ Ora guniʼné Abigaíl David, gúcabe nadxibalú ne guniʼbe né respetu, ne pur modo guniʼbe bicaabe David guchaa ni naguixhe ique guni. Neca qué gápabe donda pur ni guca que, gunábabe perdón David. Bidiibe cuenta napa David stale cualidad galán ne gúpabe confianza zacané Jehová laabe (1 Sam. 25:24, 26, 28, 33, 34). Cásica Abigaíl, laaca caquiiñeʼ gácanu nadxibalú para guinínenu ti binni ni chiguni ti cosa malu (Sal. 141:5). Caquiiñeʼ guinínenu laa né respetu ne cadi guidxíbinu. Ora rudiʼnu conseju tuuxa ni caquiiñeʼ ni ne gúninu ni né cariñu la? rusihuínninu dxandíʼ xhamígunu laabe (Prov. 27:17).

9, 10. ¿Xi caquiiñeʼ ganna ca ancianu ora gudiicaʼ conseju tuuxa hermanu?

⁹ Nabé risaca gaca ca ancianu nadxibalú  para guiníʼnecaʼ ca hermanu ni guni xiixa cosa malu (Gál. 6:1). Ca ancianu de congregación humilde laacaʼ, nánnacabe imperfectu laacabe casi guiráʼ hermanu, ne ziuu dxi zaquiiñecabe tu gudii conseju laacabe. Peru qué rudiicabe lugar gucueeza ca cosa ni bizéʼtenu riʼ laacabe para cadi uguu jnézacabe ca ni caquiiñeʼ ni (2 Tim. 4:2; Tito 1:9). Ora rudii ca ancianu conseju tuuxa, rúnicaʼ ni né diidxaʼ nadóʼ ne paciencia. Ne cumu nadxiicabe ca hermanu stícabe la? racanécabe laacaʼ (Prov. 13:24). Peru ni jma racaláʼdxicabe nga gusisácacabe Jehová ne guni defendércabe ca norma stiʼ ne gápacabe ca hermanu de congregación de intiica cosa malu (Hech. 20:28).

¹⁰ Maʼ bizíʼdinu pora nga caquiiñeʼ guininu. Peru ziuu ora jma galán cadi guininu gastiʼ. ¿Xi guendanagana zanda guidxaagalunu pur laacani yaʼ?

11. ¿Xi ejemplu biquiiñeʼ Santiago, ne xiñee biaʼsi peʼ ni?

¹¹ Nuu biaje raca nagana para laanu gucueezanu ni rininu. Santiago, ti hombre ni bicaa Biblia bizeeteʼ ti ejemplu para gusiene pabiáʼ nagana ni. Sicaríʼ guniʼbe: «Peru pa nuu tuuxa qué ruchee ora riníʼ la? laa huaxa naca ti binni ni qué gapa pecadu ne laaca zanda gucueeza laca laa» (Sant. 3:2, 3). Lu textu riʼ caníʼ Santiago de ti frenu ni riguucabe ruaa ne ique ti caballu. Ora rigubayú hombre ni dxiʼbaʼ laame doo stime, randa riné laame ladu ná o rucueeza laame. Peru pa gundaabe frenu stime la? zándaca guiree guxooñe caballu ca ne gacaname o guniná laabe. Zacaca nga laanu, pa qué gucueezanu ni rininu, zanda gacananu ne guninanu xcaadxi  binni. Guidúʼyanu pora caquiiñeʼ gucueezanu ruaanu ne cadi guininu gastiʼ.

12. ¿Pora nga jma galán cadi guininu?

¹² ¿Xi gúninu pa nanna ti hermanu xiixa información ni cadi naquiiñeʼ ganna binni? Guzéʼtenu ti ejemplu, pa runibiaʼnu tuuxa hermanu ni nabeza ti lugar ra cucueezacabe dxiiñaʼ stiʼ ca Testigu, ¿ñee ruyúbinu gábibe laanu ximodo raca dxiiñaʼ stinu lugar ca la? Zándaca canabadiidxanu ni cadi pur sti cosa. Nadxiinu ca hermanu stinu ne rizaaláʼdxinu xi cazaacacaʼ. Ne laaca racaláʼdxinu guininu lácabe ora guni orarnu pur laacabe. Peru ora guizaaca xiixa zacá, jma galán cadi guininu gastiʼ. Pa gucaʼnu tuuxa hermanu ni napa ti información ni cadi naquiiñeʼ ganna stobi gabi laanu ni nanna la? rusihuínninu cadi nadxiinu laa ne cadi nadxiinu ca hermanu ni napa confianza laabe. Ne qué racaláʼdxinu pur laanu gapa ca hermanu ni nabeza ca lugar ca guendanagana. Nin ti hermanu ni nabeza ca lugar ca qué zaníʼ ximodo peʼ raca predicar o ximodo raca xhiiñaʼ Dios lugar ca.

13. Casi ná Proverbios 11:13, ¿xi caquiiñeʼ guni ca ancianu, ne xiñee?

¹³ Caquiiñeʼ chinanda ca ancianu conseju ni zeeda lu Proverbios 11:13 (biindaʼ ni). Ne rúnicabe ni ora qué rudiicaʼ información ni cadi naquiiñeʼ ganna xcaadxi binni. Ne zándaca gácani nagana para ca ni maʼ bichaganáʼ. Riuu ti guendaxheelaʼ tobi si ora riniʼcaʼ ni riníʼ íquecaʼ, ni runi sentircaʼ ne ni naguu xizaa laacaʼ. Peru nanna ca ancianu cadi naquiiñeʼ guiniʼcaʼ «cosa confidencial» de ca hermanu de congregación. Purtiʼ pa gúnicabe ni, maʼ qué zapa ca hermanu confianza laacabe ne maʼ qué zuni respetarcaʼ laacabe. Nga runi, ca hermanu ni napa xiixa responsabilidad ndaaniʼ congregación cadi naquiiñeʼ «gusiguiicaʼ» (1 Tim. 3:8). Ndiʼ riníʼ cadi naquiiñeʼ quítecaʼ xcaadxi ne cadi guiniʼcaʼ chisme. Pa nadxii ti ancianu xheelaʼ, qué zabi laabe ni cadi naquiiñeʼ gánnabe.

14. ¿Xi zanda guni xheelaʼ ca ancianu para guni respetar ca hermanu de congregación xheelacaʼ?

¹⁴ ¿Xi zanda guni xheelaʼ ca ancianu para guni respetar ca hermanu de congregación xheelacaʼ? Cadi guinábacabe xheelacabe gabi laacabe cosa ni cadi naquiiñeʼ gánnacabe. Zacá, qué zacanesícabe xheelacabe, sínuque laaca zusihuínnicabe runi respetárcabe ca hermanu ni napa confianza xheelacabe. Ne ni jma galán nga zusiéchecabe Jehová, purtiʼ cuyúbicabe chuʼ congregación ca tobi si ne chuʼ paz ndaaniʼ ni (Rom. 14:19).

15. ¿Xi guníʼ Jehová de guionnaʼ hombre ni yeganna Job, ne xiñee?

¹⁵ Libru stiʼ Job rusiidiʼ ni laanu pora nga guininu ne xi guininu. Despué de gudiʼdiʼ Job caadxi guendanagana, guyé tapa hombre ra nuube para quixhedxicaʼ ladxidoʼbe ne gudiicaʼ conseju laabe. Xadxí guyuucabe ra nuube ne qué niníʼcabe gastiʼ. Peru ni gudxi Elifaz, Bildad ne Zofar Job rusihuínnini qué niquiiñecaʼ tiempu sticaʼ para niníʼ íquecaʼ modo gacanecaʼ Job. Lugar de nga la? laga guníʼ íquecaʼ ximodo guluiʼcaʼ Job biʼniʼ ti cosa malu. Neca dxandíʼ caadxi cosa ni guníʼcabe, jma stale cosa ni guníʼcabe de Job ne de Jehová cadi dxandíʼ ni. Ne nabé nadipaʼ biʼniʼ juzgárcabe Job (Job 32:1-3). ¿Xi biʼniʼ Jehová yaʼ? Guizáʼ bidxiichinebe guionnaʼ hombre riʼ. Guniʼbe nahuaticaʼ ne gúdxibe Job guni orar pur laacaʼ (Job 42:7-9).

16. ¿Xi zanda guizíʼdinu de ca cosa ni cadi jneza biʼniʼ Elifaz, Bildad ne Zofar?

 ¹⁶ Ni biʼniʼ Elifaz, Bildad ne Zofar rusiidiʼ laanu caadxi cosa. Primé, cadi naquiiñeʼ guni juzgarnu ca hermanu stinu (Mat. 7:1-5). Lugar de nga la? caquiiñeʼ gucaadiaga chaahuinu laacabe ante guininu. Pa gúninu ni, ziénenu ni cazaacacabe (1 Ped. 3:8). Guiropa, ora guininu, caquiiñeʼ gúninu ni né diidxaʼ nadóʼ ne guininu ni dxandíʼ (Efes. 4:25). Ne guionna, rizaalaʼdxiʼ Jehová ca ni rininu ora ruinu diidxaʼ.

17. ¿Xi zanda guizíʼdinu de ejemplu stiʼ Elihú?

¹⁷ Elihú nga guidapa hombre yeganna Job, ti hombre ni zá de Abrahán. Laga cayuíʼ Job ne guionnaʼ hombre que diidxaʼ, cucaadiaga si Elihú laacabe. Bicaadiaga chaahuibe ni guníʼ ca hombre riʼ, purtiʼ bidiibe conseju Job ni gudixhedxí ladxidóʼ ne gucaneni laa guchaa modo riníʼ ique (Job 33:1, 6, 17). Ni jma risaca para Elihú nga guisaca lá Jehová, ne cadi gusisácacabe laabe nin sti binni (Job 32:21, 22; 37:23, 24). Ejemplu stibe rusiidiʼ ni laanu nuu tiempu para guininu ne para gucaʼdiáganu (Sant. 1:19). Laaca bizíʼdinu ni jma risaca para laanu ora gudiʼnu conseju nga guisaca lá Jehová ne cadi gusisácacabe laanu.

18. ¿Ximodo rusihuínninu rudiʼnu xquixe peʼ purtiʼ randa rininu?

¹⁸ Ora rinándanu conseju zeeda lu Biblia ni ná pora guininu ne xi guininu rusihuínninu rudiʼnu xquixe peʼ Jehová purtiʼ bizáʼ laanu para ganda guininu. Pur espíritu stiʼ Dios bicaa rey Salomón ca diidxaʼ riʼ: «Casi manzana de oro ni nuu ndaaniʼ xiixa de plata nga ti diidxaʼ ni guiníʼcabe ora caquiiñeʼ» (Prov. 25:11). Pa gucaadiaga chaahuinu xcaadxi binni ne guiníʼ íquenu ante guininu, zeeda gaca ca diidxaʼ ni guininu casi manzana de oro: sicarú ne nabe risaca. Nga runi, pa rininu stale o pa huaxiéʼ rininu, zaguʼnu gana xcaadxi pur ni guininu ne zusiéchenu Jehová pur ni rúninu (Prov. 23:15; Efes. 4:29). Gástiruʼ sti modo para gusihuínninu rudiʼnu xquixe peʼ Jehová pur regalu riʼ.