1. ¿Xi zanda guininu de ca jovenhuiiniʼ ni maʼ guyuunisa?

JOVEN caʼ, zanda gúnitu stale ndaaniʼ xquidxi Jehová purtiʼ nápatu stipa ne daʼtu gana (Prov. 20:29). Guizáʼ racanetu ndaaniʼ congregación. Stale de laatu racaláʼdxitu gácatu siervu ministerial, peru zándaca guiníʼ íquetu ruuyaʼ xcaadxi laatu nahuiinitu ne huaxiéʼ experiencia nápatu para guicaatu xiixa dxiiñaʼ ndaaniʼ congregación. Pa zacá riníʼ íqueluʼ, ¿xi zanda gúniluʼ yaʼ? Neca nahuiiniluʼ, zanda gúniluʼ stale cosa para gapa xcaadxi confianza lii ne guni respetar ca hermanu de congregación lii.

2. ¿Xi zazíʼdinu lu artículo riʼ?

² Lu artículo riʼ zazíʼdinu de rey David. Laaca zazíʼdinu caadxi cosa ni bizaaca chupa rey stiʼ Judá: Asá ne Jehosafat. Zadúʼyanu xi guendanagana bidxaagalúcabe, xi bíʼnicabe ne xi zanda guiziidiʼ ca jovenhuiiniʼ de ejemplu stícabe.

3. ¿Xi zanda guni ca jovenhuiiniʼ para gacanecaʼ ca hermanu ni maʼ huaniisi ni nuu ndaaniʼ congregación?

³ Dxi joven David, gunda biʼniʼ caadxi cosa para gacané xcaadxi. Rihuinni dxichi guyuuláʼdxibe guiziidibe  jma de Dios, bíʼnibe stipa gácabe ti buen músicu ne pur ngue gucanebe Saúl, rey ni gulí Dios (1 Sam. 16:16, 23). Cásica David, tiempu riʼ, stale jovenhuiiniʼ laaca zanda gacanecaʼ ndaaniʼ congregación. Guzéʼtenu ti ejemplu, nuu stale hermanu ni qué gánnacaʼ iquiiñecaʼ ca aparatu electrónicu para guni estudiarcaʼ o gaca prepararcaʼ para reunión. Joven, pa nánnaluʼ iquiiñeluʼ ca aparatu riʼ la? zanda gacaneluʼ laacabe.

4. Cásica David, ¿ximodo naquiiñeʼ gaca ca jovenhuiiniʼ? (Biiyaʼ imagen ni zeeda lu portada).

⁴ Guca David responsable ne guiráʼ dxi biʼniʼ stipa gapa xcaadxi confianza laa. Guzéʼtenu ti ejemplu, dxi joven laabe la? gúpabe ca dendxuʼ stiʼ bixhózebe ne bíʼnibe stipa gúnibe dxiiñaʼ que jneza neca nagana ni. Ti tiempu despué gudxi David rey Saúl ca diidxaʼ riʼ: «Señor stinneʼ, naa nga pastor stiʼ ca dendxuʼ stiʼ bixhozeʼ. Ti biaje beeda ti lión ne sti biaje beeda ti oso ne cada tobi de laacame ziné ti dendxuʼ. Yenandaʼ laacame ne bisabaʼ laacame ne guxhaʼ ca dendxuʼ que ruaacame» (1 Sam. 17:34, 35). Guca David responsable ne guca nadxibalú ra bilá ca dendxuʼ que. Joven caʼ, laaca zanda chinándatu ejemplu stiʼ David ora guicaatu xiixa dxiiñaʼ ndaaniʼ congregación.

5. Casi ná Salmo 25:14, ¿xii nga ni jma risaca naquiiñeʼ guni ca joven?

⁵ Dede dxi nahuiiniʼ David guca xhamigu Jehová. Jma bisisácabe gaca xhamígube Jehová que gácabe nadxibalú o gánnabe guxhídxibe arpa. Cadi guca si Jehová Dios stibe, sínuque laaca guca xhamígube (biindaʼ Salmo 25:14). Joven caʼ, ni jma risaca nga gaca xhamígutu Jehová, Bixhózetu ni nuu guibáʼ. Pa gúnitu ni la? zándaca zacaatu jma dxiiñaʼ ndaaniʼ congregación.

6. ¿Xi guníʼ ique binni de David?

⁶ Tobi de ca guendanagana ni bidxaagalú David nga guníʼ ique binni nahuiinirube ne cadi responsable laabe. Guzéʼtenu ti ejemplu, dxi gúdxibe Saúl chitindenebe Goliat, gudxi Saúl laabe nahuiinirube (1 Sam. 17:31-33). Ne maca ante gudxi bíʼchibe laabe  cadi responsable laabe (1 Sam. 17:26-30). Peru cadi zacá diʼ biʼyaʼ Jehová laabe, purtiʼ binibiáʼ chaahuiʼ laabe. Ne cumu gupa David confianza zudii Jehová stipa laa, gunda biitibe Goliat (1 Sam. 17:45, 48-51).

7. Joven, ¿xi zanda guiziidiluʼ de ni bizaaca David?

⁷ Joven, ¿xi zanda guiziidiluʼ de ni bizaaca David? Primé, naquiiñeʼ gápaluʼ paciencia. Zándaca gaca nagana para tuuxa ni runibiáʼ lii dede dxi nahuiiniluʼ guʼyaʼ lii casi ti jovenhuiiniʼ responsable. Peru gunna dxichi, nanna Jehová xi nuu ndaaniʼ ladxidoʼloʼ, laaca runibiaʼbe lii ne nánnabe xi zanda gúniluʼ (1 Sam. 16:7). Guiropa, biʼniʼ stipa gaca xhamíguluʼ Jehová. Nga peʼ nga ni biʼniʼ David, guleebe tiempu para gúʼyabe guiráʼ ni maʼ bizáʼ Jehová ne guiníʼ íquebe xi rusiidini laabe de Jehová (Sal. 8:3, 4; 139:14; Rom. 1:20). Guionna, naquiiñeʼ guinábaluʼ Jehová gudii stipa lii. Guzéʼtenu ti ejemplu, pa guni burla ca compañeru de scuela lii purtiʼ Testigu lii, gunabaʼ Jehová gacané lii guni huantarluʼ. Laaca zanda chinándaluʼ ca conseju ni zeeda lu Stiidxaʼ Dios, lu ca publicación ne lu ca videu. Cada biaje guinábaluʼ Jehová gacané lii tídiluʼ xiixa guendanagana zaca confianza ni nápaluʼ laabe jma naguidxi. Ne ora guʼyaʼ xcaadxi ruyúbiluʼ Jehová para gacané lii la? zaca xhamígucaʼ lii.

8, 9. a) ¿Xi gucané David gapa paciencia laga cabeza guni mandar? b) ¿Xi zanda guiziidiʼ ca jovenhuiiniʼ de ejemplu stiʼ David?

⁸ Guidúʼyanu sti guendanagana bidxaagalú David. Despué de gulí Dios laabe para gácabe rey, gupa xidé gulézabe stale iza para guni mandarbe (1 Sam. 16:13; 2 Sam. 2:3, 4). ¿Xi gucané laabe para gápabe paciencia yaʼ? Lugar de nireebe gana, gudixhe íquebe gúnibe xiixa. Guzéʼtenu ti ejemplu, laga canagucachilube región stiʼ Filistea la? bicaalube ca enemigu stiʼ guidxi Israel, zaqué nga gúpabe región stiʼ Judá (1 Sam. 27:1-12).

⁹ Joven, ¿xi zanda guiziidiluʼ de ejemplu stiʼ David? Ni zanda guiziidiluʼ nga naquiiñeʼ chuʼluʼ listu para gúniluʼ ni ná Jehová ne gacaneluʼ ca hermanu. Guidúʼyanu ni bizaaca Ricardo. * Neca jovenhuiiniʼ laabe la? racaláʼdxibe gácabe precursor regular, peru caʼruʼ máladiʼ chuʼbe listu. Lugar de nireebe gana la? gudixhe íquebe guni predicarbe jma. Sicaríʼ guniʼbe: «Ra bineʼ stipa guneʼ predicar jma la? gucaneni naa guneʼ progresar. Gudixheʼ iqueʼ gacaniáʼ binni ni napa gana guiziidiʼ de Jehová ne gacaʼ preparar para chigannaʼ laacaʼ sti biaje. Dede gupaʼ primé estudiu stinneʼ. Laga jma bineʼ predicar, jma qué nidxibeʼ diaʼ». Tiempu riʼ maʼ naca Ricardo siervu ministerial ne precursor regular.

10. ¿Xi biʼniʼ David ante guicaa ti decisión nabé risaca?

¹⁰ Guidúʼyanu xi sti guendanagana bidxaagalú David. Dxi canagucachilube ne ca soldadu stibe de Saúl, bisaanacabe familia stícabe ne guyécabe lu ti guerra. Cumu qué guínnicabe la? guyé ca enemigu ne zinecaʼ familia stícabe. Ñándaca niníʼ ique David cumu naca ti soldadu ni nanna tinde la? ñanda nucaalube laacaʼ, peru qué ñúnidibe ni, sínuque biyúbibe gacané Jehová laabe,  ngue runi gunabadiidxabe sacerdote Abiatar pa zaa chinándabe ca enemigu stibe, gudxi Jehová laabe chebe ne laaca gudxi laabe zuni ganarbe (1 Sam. 30:7-10). ¿Xi zanda guiziidiluʼ de ni bizaaca David yaʼ?

11. ¿Xi zanda gúniluʼ ante guicaaluʼ ti decisión?

¹¹ Ante guicaaluʼ ti decisión, gunabaʼ gudiicabe lii conseju, guniʼné bixhózeluʼ ne jñaaluʼ o ti ancianu ni napa experiencia. Zanda gudiicabe lii conseju galán. Maʼ gulí Jehová ca ancianu ne napa confianza laacabe, nga runi, lii laaca zanda gápaluʼ confianza laacabe. Naca ca ancianu ti regalu ndaaniʼ congregación (Efes. 4:8). Pa gaca fe stiluʼ casi fe stícabe ne gucaadiágaluʼ ca conseju gudiicabe lii la? zacaaluʼ decisión jneza. Guidúʼyanu yanna xi zanda guizíʼdinu de ejemplu stiʼ rey Asá.

12. ¿Xi cualidad galán gupa Asá dxi bizulú biʼniʼ mandar?

¹² Dxi nahuiiniʼ rey Asá, guca humilde ne nadxibalú. Guzéʼtenu ti ejemplu, dxi gutiʼ Abías, bixhózebe, gúcabe rey ne biʼniʼ mandarbe guinitilú ca bidóʼ ni nuu ndaaniʼ guidxi que, laaca «gúdxibe Judá guyubi Jehová, Dios stiʼ ca bixhozebiidaʼ, ne guni ni ná Ley ne ni ná mandamientu stiʼ» (2 Crón. 14:1-7). Ne ora guluu Zérah leʼ Judá né ti millón de soldadu, guca Asá ti binni nuu xpiaaniʼ ne gunabaʼ Jehová gacané laa. Sicaríʼ guniʼbe: «Jehová, para lii la? ngueca si nga gacaneluʼ ca ni naca stale ne gacaneluʼ ca ni huaxiéʼ napa stipa. Gucané laadu, Jehová, Dios stidu, purtiʼ dxandíʼ peʼ nápadu confianza lii». Né ca diidxaʼ riʼ bisihuinni Asá napa fe zulá Jehová laacaʼ. Gúpabe confianza Jehová ne «biʼniʼ ganar Jehová ca etíope» (2 Crón. 14:8-12).

13. ¿Xi bizaaca Asá, ne xiñee?

¹³ Nánnanu guca nagana para Asá gudxiilú ti millón de soldadu. Peru cumu gúpabe confianza Jehová la? biʼniʼ ganarbe. Ti tiempu despué bicaalú rey Baasá de Israel laabe. Neca cadi nagana peʼ ni cazaaca Asá, qué nuyubi ñacané Jehová laa, sínuque biyubi gacané rey stiʼ Siria laa ne pur ngue gupa jma guendanagana. Biquiiñeʼ Jehová  profeta Hananí para gabi Asá ca diidxaʼ riʼ: «Cumu gúpaluʼ confianza rey stiʼ Siria ne qué ñápaluʼ confianza Jehová, Dios stiluʼ la? nga runi maʼ zeʼ rey stiʼ Siria de lu naluʼ». Ne dede dxi que, siempre gupa Asá guerra (2 Crón. 16:7, 9; 1 Rey. 15:32).

14. a) Joven, ¿ximodo zanda gusihuínniluʼ nápaluʼ confianza Jehová? b) Casi ná 1 Timoteo 4:12, ¿xi zabeenduluʼ pa gúniluʼ ni?

¹⁴ Joven, ¿xi zanda guiziidiluʼ de ejemplu stiʼ Asá? Ni zanda guiziidiluʼ nga naquiiñeʼ gácaluʼ humilde ne gápaluʼ confianza Jehová. Dxi guyuunísaluʼ bisihuínniluʼ nápaluʼ fe ne confianza Jehová ne beeda gácaluʼ parte de familia stibe. ¡Ti ndaayaʼ guizáʼ naroʼbaʼ! Nga runi, biyubi gacané Jehová lii, nga zacané lii ante guicaaluʼ ti decisión, casi xi entretenimientu gúʼyaluʼ o quíteluʼ, xi dxiiñaʼ guicaaluʼ ne xi meta nápaluʼ gana ugaandaluʼ. Lugar de gúniluʼ ni ná si xquendabiaaniluʼ, biiyaʼ xi ná Biblia ne yenanda ni (Prov. 3:5, 6). Zacá zusiécheluʼ Jehová ne zuni respetar ca hermanu de congregación lii (biindaʼ 1 Timoteo 4:12).

15. Casi ná 2 Crónicas 18:1-3 ne 19:2, ¿xi cosa cadi jneza biʼniʼ rey Jehosafat?

¹⁵ Joven, cadi guiaandaʼ lii imperfectu lii ne nuu biaje zucheeluʼ, peru cadi cuee nga gana lii para gúniluʼ ni ná Jehová. Guníʼ ique ejemplu stiʼ rey Jehosafat. Gúpabe stale cualidad galán. Dede dxi bizulú biʼniʼ mandarbe la? biyúbibe Dios stiʼ bixhózebe ne bíʼnibe ni ná ca mandamientu stiʼ. Laaca biseendabe príncipe ndaaniʼ guidxi Judá para gusiidicaʼ guidxi que de Jehová (2 Crón. 17:4, 7). Peru neca nachaʼhuiʼ guca Jehosafat la? guyuu biaje gucuaabe decisión ni cadi jneza, ne pur ngue guluu jneza ti xpinni Jehová laabe (biindaʼ 2 Crónicas 18:1-3; 19:2). Guidúʼyanu xi zanda guiziidiluʼ de ni bizaacabe.

16. Joven, ¿xi zanda guiziidiluʼ de ni bizaaca Rajeev?

¹⁶ Nabé risaca guicaaluʼ ne chinándaluʼ ca conseju ni gudiicabe lii. Stale jovenhuiiniʼ raca nagana para laacaʼ gúnicaʼ ni ná Jehová primé lu xquendanabánicaʼ. Pa ngaca cazaacaluʼ, cadi guireeluʼ  gana. Guníʼ ique ni bizaaca ti hermanu ni láʼ Rajeev. Sicaríʼ guniʼbe: «Dxi joven naa la? qué gannaʼ diaʼ xi racalaʼdxeʼ, casi ca xcaadxi joven, nabé guyuuladxeʼ guneʼ deporte ne gacaʼ divertir que chaaʼ reunión ne guneʼ predicar». ¿Xi gucané laabe yaʼ? Bidii ti ancianu conseju laabe, sicaríʼ guniʼbe: «Gucané ancianu que naa guiníʼ iqueʼ ni ná 1 Timoteo 4:8». Guca Rajeev humilde ne yenanda conseju que ne biiyaʼ xii nga ni jma risaca para laa. Laabe guniʼbe: «Gudixheʼ iqueʼ guneʼ jma lu xhiiñaʼ Jehová». Laaca guniʼbe xi ndaayaʼ gucuaabe: «Caadxi iza despué, cumu yenandaʼ conseju ni bidiicabe naa que la? yanna maʼ nacaʼ siervu ministerial».

17. ¿Ximodo ruuyaʼ ca hermanu ca joven ni runi ni ná Jehová?

¹⁷ Joven, riecheʼ ca hermanu de congregación ora ruuyacaʼ runineluʼ laacaʼ xhiiñaʼ Jehová tobi si (Sof. 3:9). Nabé riuuláʼdxicaʼ gúʼyacaʼ rúniluʼ xhiiñaʼ Jehová né stale gana. Runi respetar ca hermanu riʼ lii ne nápacabe confianza lii (1 Juan 2:14).

18. Casi ná Proverbios 27:11, ¿ximodo ruuyaʼ Jehová ca joven ni runi ni nabe?

¹⁸ Joven, cadi guiaandaʼ lii nadxii ne napa Jehová confianza lii. Guniʼbe lu ca últimu dxi riʼ ziuu stale joven ni zuni ni nabe de guidubi ladxidóʼ (Sal. 110:1-3). Nanna Jehová nadxiiluʼ laa ne racaláʼdxiluʼ gúniluʼ ni ná. Nga runi, gupa paciencia ne cadi guireeluʼ gana. Ora gucheeluʼ la? gucuaa ca conseju gudiicabe lii ne cadi guidxiichiluʼ ora uguu jnézacabe lii. Cadi guiaandaʼ lii zeedacani de Jehová (Heb. 12:6). Biʼniʼ ca dxiiñaʼ gudiicabe lii jneza. Ne ni jma risaca, biʼniʼ stipa gusiécheluʼ Jehová, Dios ni nadxii lii (biindaʼ Proverbios 27:11).