1. ¿Xi guendanagana cadxaagalú ca xpinni Jehová?

¿ÑEE cadídinu xiixa guendanagana la? Zándaca bininá ti hermanu laanu (Sant. 3:2). O zándaca runi burla ca compañeru de scuela o de dxiiñaʼ laanu purtiʼ rúninu ni ná Jehová (1 Ped. 4:3, 4). ¿Ñee cucueeza ti familia stinu laanu para cadi chuunu reunión o gusaana de guininu de ni runi crenu la? (Mat. 10:35, 36). Pa cayaca nagana para laanu gudxíʼlunu ca guendanagana riʼ, zándaca zareʼnu gana. Peru cadi guiaandaʼ laanu intiica guendanagana gápanu, zudii Jehová laanu guendabiaaniʼ ne stipa para gudxíʼlunu cani.

2. Casi ná Romanos 15:4, ¿xi zabeendunu ora guidúʼndanu Biblia?

² Guníʼ Jehová guicá lu Biblia xi biʼniʼ caadxi binni para gunda bidxiilucaʼ ca guendanagana ni gúpacaʼ. Biʼniʼ Jehová ni para guizíʼdinu de ca binni riʼ. Nga peʼ nga ni bicaa apóstol Pablo lu Romanos 15:4 (biindaʼ ni). Pa guidúʼndanu ca relatu ca, zatadxí ladxidoʼno ne zápanu ti esperanza. Peru cadi caquiiñeʼ si guidúʼndanu Biblia, sínuque laaca caquiiñeʼ gudiʼnu lugar guchaani modo riníʼ íquenu ne chindani ndaaniʼ ladxidoʼno. Pa racaláʼdxinu gudxíʼlunu xiixa guendanagana, zanda gúninu guidapaʼ cosa riʼ: 1) guni orarnu, 2) guxuíʼlunu, 3) guiníʼ íquenu ne 4) gúninu ni cazíʼdinu. Lu artículo riʼ zadúʼyanu ximodo zanda gúninu guidapaʼ cosa riʼ. * Despué zaquiiñenu cani para  guizíʼdinu de ejemplu stiʼ rey David ne stiʼ apóstol Pablo.

3. ¿Xi caquiiñeʼ gúninu ante guidúʼndanu Biblia, ne xiñee?

³ 1) Guni orarnu. Ante guzulunu guidúʼndanu Biblia, guinábanu Jehová gacané laanu cueendunu ni galán lu ni chiguidúʼndanu. Guzéʼtenu ti ejemplu, pa cuyúbinu guni chaahuinu xiixa guendanagana, guinábanu Jehová gacané laanu guidxélanu lu Biblia principiu ni gacané laanu (Filip. 4:6, 7; Sant. 1:5).

4. ¿Xi zacané laanu ora maʼ cadúʼndanu xiixa relatu ni zeeda lu Biblia?

⁴ 2) Guxuíʼlunu. Nácani ti regalu ni bidii Jehová laanu. Ora cadúʼndanu xiixa relatu ni zeeda lu Biblia, guxuíʼlunu laanu nga binni ni cayete lu relatu ca. Gúninu stipa guidúʼyanu ni bíʼyabe ne guni sentirnu ni biʼniʼ sentirbe.

5. ¿Xi caquiiñeʼ gúninu ora maʼ cadúʼndanu Biblia, ne xi zacané laanu gúninu ni?

⁵ 3) Guiníʼ íquenu. Ora maʼ cadúʼndanu Biblia caquiiñeʼ guiníʼ íquenu lu ni cadúʼndanu ne xi rusiidiʼ ni laanu. Racaneni laanu guiene chaahuinu tema ni cadúʼndanu. Pa guidúʼndanu Biblia sin guiníʼ íquenu zeeda gácani casi ora nidúʼyadxinu reche ndase ca pieza stiʼ ti rompecabeza lu ti mexaʼ. Ne ora riníʼ íquenu, zeeda gácani casi ora nuquíʼdinu guiráʼ ca pieza stiʼ rompecabeza ca. Ti cosa ni zacané laanu guiníʼ íquenu nga guyúbinu gánnanu respuesta stiʼ ca pregunta riʼ: «¿Xi biʼniʼ binni ca para biʼniʼ chaahuiʼ guendanagana stiʼ? ¿Ximodo gucané Jehová laabe? ¿Ximodo zanda gacané ejemplu stibe naa para gudxieeluáʼ ca guendanagana stinneʼ?».

6. ¿Xiñee naquiiñeʼ gúninu guirá ni cazíʼdinu?

⁶ 4) Gúninu ni cazíʼdinu. Jesús guníʼ pa qué gúninu ni cazíʼdinu, zeeda gácanu casi ti hombre ni bicuí lidxi lu yuxi. Bíʼnibe stale dxiiñaʼ peru qué nisaca diʼ guirani. ¿Xiñee yaʼ? Purtiʼ ora biaba nisaguié ne bilaahua, biaba yoo que (Mat. 7:24-27). Ngaca nga laanu, pa guni orarnu, guxuíʼlunu ne guiníʼ íquenu peru qué gúninu ni cazíʼdinu la? pur gana si guiráʼ ni bíninu. Purtiʼ cadi naguidxi ziuu fe stinu ora gueeda xiixa prueba o sananda binni laanu. Peru pa guni estudiarnu ne gúninu ni cazíʼdinu, zacaanu decisión jneza, jma galán zabáninu ne naguidxi zaca fe stinu (Is. 48:17, 18). Chinándanu guidapaʼ cosa riʼ para guidúʼyanu xi zanda guizíʼdinu de relatu stiʼ rey David.

7. ¿Xi relatu zeeda lu Biblia chiguidúʼyanu?

⁷ ¿Ñee gúpanu confianza ti xhamígunu o ti familia stinu peru biʼniʼ traicionar laanu la? Pa zacá ni, galán guidúʼndanu relatu stiʼ Absalón, xiiñiʼ rey David. Biʼniʼ traicionarbe bixhózebe ne gucaláʼdxibe ñáxhabe reinu stiʼ (2 Sam. 15:5-14, 31; 18:6-14).

8. ¿Xi naquiiñeʼ gúninu para gacané Jehová laanu?

⁸ 1) Guni orarnu. Ante guidúʼndanu relatu riʼ, gábinu Jehová ximodo cayuni sentirnu pa bininá tuuxa laanu (Sal. 6:6-9). Despué, guinábanu laabe gacanebe laanu guidxélanu xiixa principiu ni gacané laanu gánnanu xi gúninu.

9. ¿Ximodo nusiéneluʼ relatu stiʼ David ne Absalón?

⁹ 2) Guxuíʼlunu. Guxuíʼlunu xi guiráʼ bizaaca lu relatu stiʼ David ne Absalón ne guiníʼ íquenu ximodo bininá ni rey David. Xadxí biyubi Absalón gannaxhii binni laa (2 Sam. 15:7). Ne ora bíʼyabe  maʼ zanda gucaalube David, bixhózebe, biseendabe espía guidxi Israel para gucuudxibe ca binni que ti gúʼyacaʼ laabe casi rey. Laaca bicuudxibe Ahitofel, xhamigu David, para guieeguʼ laabe. De raqué biʼniʼ Absalón laa rey ne gucalaʼdxiʼ ninaazeʼ ne ñuuti David, zándaca para tiempu que huará David (Sal. 41:1-9). Ora gunna David xi racalaʼdxiʼ Absalón guni, biree de Jerusalén. Últimu la? bicaalú ejércitu stiʼ Absalón ca soldadu stiʼ David. Biʼniʼ ganar ca soldadu stiʼ David, ne guti Absalón.

10. ¿Xi ñándaca ñuni rey David?

¹⁰ Guxuíʼlunu ximodo biʼniʼ sentir David. Nadxiibe Absalón ne nápabe confianza Ahitofel peru biʼniʼ traicionar ca hombre riʼ laabe. Guizáʼ bininacaʼ laabe ne guyuucaʼ ñuuticaʼ laabe. Ñándaca ñuni dudar David de xcaadxi xhamigu ne pur ngue nusaana de ñapa confianza laacabe. Ne laaca ñándaca nicá ique David ni cayuni sentir ne nuxooñeʼ de guidxi que stubi. O nireebe gana ne nudiibe lugar ñuuti ca hombre que laabe. Peru qué ñúnibe ni, sínuque bidxiilube guendanagana que. ¿Ximodo bíʼnibe ni yaʼ?

11. ¿Xi biʼniʼ rey David para gunda bidxiilú ca guendanagana ni gupa?

¹¹ 3) Guiníʼ íquenu. ¿Xi zanda guizíʼdinu de relatu riʼ yaʼ? Zanda guiníʼ íquenu ndiʼ: «¿Xi biʼniʼ David para bidxiilú guendanagana que?». Neca bidxíbibe qué nudiibe lugar nucueeza ni laabe ne qué nicaabe decisión sin niníʼ íquebe, sínuque biʼniʼ orarbe Jehová para guinábabe laa gacané laabe. Laaca gunábabe gacané ca xhamígube laabe. Ne ora gudixhe íquebe gúnibe xiixa, bíʼnibe ni nagueendaca. Neca guyuu David triste, qué nidxiichi, sínuque qué nusaana de ñapa confianza Jehová ne ca xhamigu.

12. ¿Ximodo gucané Jehová David?

¹² ¿Ximodo gucané Jehová David yaʼ? Pa guyúbinu gánnanu jma de ni bizaaca David la? zazíʼdinu bidii Jehová laabe stipa ni caquiiñebe para guni huantarbe guendanagana ni cadíʼdibe que (Sal. 3:1-8; encabezamiento). Guluu ndaayaʼ Jehová guiráʼ ca decisión gucuaa David ne laaca gucanebe ca xhamigu David, ca ni gupa laa.

13. ¿Ximodo zanda chinándanu ejemplu stiʼ David pa guniná tuuxa laanu? (Mateo 18:15-17).

¹³ 4) Gúninu ni cazíʼdinu. Guiníʼ íquenu ndiʼ: «¿Ximodo zanda chinandaʼ ejemplu stiʼ David?». Gúninu xiixa para guni chaahuinu guendanagana ni nápanu. Zanda gacané conseju ni bidii Jesús lu Mateo capítulo 18 laanu ora guni chaahuinu xiixa guendanagana (biindaʼ Mateo 18:15-17). Peru cadi naquiiñeʼ gacalúgunu ora guicaanu xiixa decisión. Guinábanu Jehová quixhedxí ladxidoʼno ne gudii laanu guendabiaaniʼ para gudxíʼlunu guendanagana ca. Laaca naquiiñeʼ gápanu confianza ca xhamígunu ne gudiʼnu lugar gacanécabe laanu (Prov. 17:17). Ne ni jma risaca nga chinándanu ca conseju ni rudii Jehová laanu lu Biblia (Prov. 3:5, 6).

14. ¿Pora zanda gacané 2 Timoteo 1:12-16 ne 4:6-11, 17-22 laanu?

¹⁴ ¿Ñee ribee familia stinu gana laanu para cadi gúninu ni ná Jehová la? O ¿nabézanu ndaaniʼ ti guidxi ra qué riná gobiernu gúninu xhiiñaʼ Dios la? Pa zacá ni, guidúʼndanu 2 Timoteo 1:12-16 ne 4:6-11,  17-22, * zacané ca textu riʼ laanu. Nuu Pablo ndaaniʼ cárcel dxi bicaa carta riʼ.

15. ¿Xi zanda guinábanu Jehová lu oración?

¹⁵ 1) Guni orarnu. Ante guidúʼndanu ca textu ca, gábinu Jehová xi peʼ guendanagana cadídinu ne ximodo cayuni sentirnu. Ora guidúʼndanu ca guendanagana bidxaagalú Pablo, guinábanu Jehová gacané laanu guidxélanu xiixa conseju ni gacané laanu para gudxíʼlunu ca guendanagana stinu.

16. ¿Xi guendanagana gudiʼdiʼ Pablo?

¹⁶ 2) Guxuíʼlunu. Guxuíʼlunu guendanagana cadiʼdiʼ Pablo. Nuube ndaaniʼ cárcel, guidxi Roma. Neca maruʼ guyuube ndaaniʼ cárcel, peru biaje riʼ nuube seguru zuuticabe laabe. Maʼ bisaana caadxi de ca xcompañérube laabe ne guizáʼ maʼ bidxágabe (2 Tim. 1:15).

17. ¿Xi ñándaca ñuni Pablo?

¹⁷ Pa niníʼ ique Pablo nicaa sti decisión dxiqué la? zándaca qué nuseguyoocabe laa. Ñándaca nidxiichinebe ca hombre de provincia stiʼ Asia ni bidxiideche laabe ne maʼ qué ñápabe confianza ca xhamígube. Peru qué ñúnibe nga. Yanna, ¿xiñee qué nusaana Pablo de ñapa confianza Jehová ne ca xhamigu yaʼ?

18. ¿Xi biʼniʼ Pablo para bidxiilú ca guendanagana ni gupa?

¹⁸ 3) Guiníʼ íquenu. Guníʼ ique ndiʼ: «¿Xi biʼniʼ Pablo para bidxiilú guendanagana ni gupa?». Neca nánnabe zuuticabe laabe, ni jma risaca para laabe nga gusisácabe Jehová. Guluube gana xcaadxi ne biʼniʼ orarbe Jehová de guidubi ladxidoʼbe (2 Tim. 1:3). Qué ñuube triste purtiʼ bisaana xcaadxi laabe, sínuque bidiibe xquixe peʼ ca xhamígube ni gucané laabe. Laaca qué nusaana de ñuni estudiarbe Stiidxaʼ Dios (2 Tim. 3:16, 17; 4:13). Ne ni jma risaca, nanna Pablo nadxii Jehová ne Jesús laa, qué zusaanacaʼ ne zaguucaʼ ndaayaʼ laabe.

19. ¿Ximodo gucané Jehová Pablo yaʼ?

¹⁹ Maca gudxi Jehová Pablo zazananda binni laa purtiʼ naca xpinni Cristu (Hech. 21:11-13). ¿Ximodo gucané Jehová Pablo yaʼ? Bicábibe ca oración stiʼ ne bidiibe stipa laa (2 Tim. 4:17). Gucuaa Pablo premiu ni gudxi Jehová chigudii laa, purtiʼ qué nusaana laabe ne laaca biquiiñeʼ Jehová ca xhamigu Pablo para gacanecaʼ laabe.

20. Casi ná Romanos 8:38, 39 ¿xi zanda gúninu para gaca fe stinu casi fe stiʼ Pablo?

²⁰ 4) Gúninu ni cazíʼdinu. Guníʼ ique ndiʼ: «¿Ximodo zanda chinandaʼ ejemplu stiʼ Pablo yaʼ?». Cásica Pablo, nánnanu laaca zazananda binni laanu pur ni runi crenu (Mar. 10:29, 30). Para cadi guixélenu de Jehová, naquiiñeʼ guni orarnu de guidubi ladxidoʼno ne cadi gusaana de guni estudiarnu. Cadi guiaandaʼ laanu, tobi de ca cosa jma risaca para laanu nga gusisácanu Jehová. Zanda chuʼnu seguru qué ziuu dxi gusaanabe laanu ne gastiʼ qué zanda guxheleʼ laanu de guendarannaxhii stibe (biindaʼ Romanos 8:38, 39; Heb. 13:5, 6).

21. ¿Xi gucané Aya ne Hector gudxiilucaʼ ca guendanagana sticaʼ?

²¹ Intiica si guendanagana nápanu, zacané ca ejemplu ni zeeda lu Biblia laanu. Guzéʼtenu ti ejemplu, Aya, ti precursora  de Japón, guníʼ huayacané historia stiʼ Jonás laa para cadi guidxibi guni predicar ca lugar ra ridiʼdiʼ stale binni. Ne Hector, ti joven de Indonesia, neca cadi Testigu bixhózebe ne jñaabe, guniʼbe ejemplu stiʼ Rut racané laabe chuuláʼdxibe guiziidibe jma de Jehová ne gúnibe ni ná.

22. ¿Ximodo zanda cueendunu ni galán ora guidúʼyanu ca videu, gunadiáganu ca grabación stiʼ ca historia zeeda lu Biblia ne sección «Ca ni gupa fe»?

²² ¿Paraa zanda guidxélanu ejemplu stiʼ ca binni ni riete lu Biblia ni zanda gacané laanu? Zadxélanu cani lu ca videu, ca grabación stiʼ ca historia zeeda lu Biblia ne lu sección ni láʼ «Ca ni gupa fe». * Ante guidúʼyanu, gunadiáganu o guidúʼndanu información riʼ, guinábanu Jehová gacané laanu guidxélanu xiixa conseju ni gacané laanu lu xquendanabáninu. Guxuíʼlunu xi guiráʼ cayaca binni ni riete lu relatu ni cadúʼndanu ca, guiníʼ íquenu xi bíʼnibe ne ximodo gucané Jehová laabe para gudxiilube ca guendanagana stibe. De racá, gúninu guiráʼ ni cazíʼdinu. Últimu la? gudiʼnu xquixe peʼ Jehová purtiʼ racané laanu ne ti modo zanda gusihuínninu ni nga ra cuʼnu gana ne gacanenu xcaadxi.

23. ¿Xi cayuni prometer Jehová laanu lu Isaías 41:10, 13?

²³ Ridxaagalunu stale guendanagana ne nuu tiru qué ridxélanu xi gúninu purtiʼ nabáninu ndaaniʼ guidxilayú stiʼ Binidxabaʼ (2 Tim. 3:1). Peru cadi naquiiñeʼ chuʼnu xizaa o guidxíbinu. Nanna Jehová xi cazaacanu. Siempre racanebe laanu ora caquiiñenu ni (biindaʼ Isaías 41:10, 13). Nanna dxíchinu zacané Jehová laanu ne rudii Biblia stipa laanu para gudxíʼlunu intiica guendanagana.