1. Casi ná Mateo 24:9, ¿xiñee cadi naquiiñeʼ guidxagayaanu gaca nanalaʼdxiʼ binni laanu?

BIZÁʼ JEHOVÁ laanu para gannaxhiinu ne gannaxhiicabe laanu. Nga runi racananu ne dede ridxíbinu ora ridúʼyanu nanalaʼdxiʼ binni laanu. Guzéʼtenu ti ejemplu, ti hermana de Europa láʼ Georgina guníʼ: «Guizáʼ guca nanalaʼdxiʼ jñaaʼ naa purtiʼ runeʼ ni ná Jehová. Dxi napaʼ 14 iza bineʼ sentir rucaanabe naa ne bizulú guníʼ iqueʼ pa cayuneʼ xiixa ni cadi jneza». * Ti hermanu láʼ Danilo guníʼ: «Guizáʼ bidxibeʼ ora gudiñe ca soldadu que naa, gudindenecaʼ ne biʼniʼ amenazarcaʼ naa purtiʼ testigu stiʼ Jehová naa». Pur guiráʼ ni bizéʼtenu riʼ, cadi naquiiñeʼ guidxagayaanu gaca nanalaʼdxiʼ binni laanu purtiʼ maca guníʼ Jesús zúnicabe ni (biindaʼ Mateo 24:9).

2, 3. ¿Xiñee nanalaʼdxiʼ binni laanu?

² ¿Xiñee nanalaʼdxiʼ binni laanu yaʼ? Purtiʼ cásica Jesús «cadi parte de guidxilayú riʼ» laanu (Juan 15:17-19). Runi respetarnu ca gobiernu peru qué runi adorarnu laacaʼ ne nin ca símbolo sticaʼ. Jehová si runi adorarnu ne rininu laasi nga napa derechu para guni mandar. Peru cadi nga nga ni rusiidiʼ Binidxabaʼ ne ca xpinni (Gén. 3:1-5, 15). Runi predicarnu Reinu si stiʼ Dios nga zuni chaahuiʼ guiráʼ guendanagana ni napa binni ne maʼ cadi candaa zunitiluni ca enemigu stiʼ Dios (Dan. 2:44; Apoc. 19:19-21). Guizáʼ galán noticia riʼ para ca ni runi ni jneza peru para ca binni malu la? coʼ (Sal. 37:10, 11).

 ³ Laaca nanalaʼdxiʼ binni laanu purtiʼ rinándanu ni ná Dios ne qué riníʼ íquenu modo riníʼ íquecaʼ. Tiempu riʼ stale binni runi practicar pecadu sexual casi ca binni de Sodoma ne Gomorra (Jud. 7). Stale binni runi burla laanu purtiʼ qué rinándanu modo riníʼ íquecaʼ, sínuque rúninu stipa gúninu ni ná Dios (1 Ped. 4:3, 4).

4. ¿Xi cualidad zacané laanu guni huantarnu ora gaca nanalaʼdxiʼ binni laanu?

⁴ ¿Xi cualidad naquiiñeʼ gápanu para guni huantarnu ora gaca nanalaʼdxiʼ ne guni insultar binni laanu yaʼ? Naquiiñeʼ gápanu fe zacané Jehová laanu para guni huantarnu. Zeeda gaca fe stinu casi ti escudu ni racané laanu para ganda gusuinu «ca flecha ni cá guí ni culaa Binidxabaʼ» luguianu (Efes. 6:16). Risaca gápanu fe, peru laaca naquiiñeʼ gannaxhiinu. ¿Xiñee yaʼ? Purtiʼ ora nadxii tuuxa «qué ridxiichi nagueenda», «runi soportar guiráʼ cosa» ne runi huantar (1 Cor. 13:4-7, 13). Yanna guidúʼyanu pa gannaxhiinu Jehová, ca hermanu stinu ne dede ca enemigu stinu, zacaneni laanu guni huantarnu ora gaca nanalaʼdxiʼ binni laanu.

5. ¿Xi biʼniʼ Jesús purtiʼ nadxii Bixhoze?

⁵ Gueelaʼ ante guuti ca enemigu stiʼ Jesús laa, gúdxibe ca discípulo stibe: «Para ganna binni nadxieeʼ Bixhozeʼ, cayuneʼ casi peʼ modo biʼniʼ mandar Bixhozeʼ naa» (Juan 14:31). Cumu nadxii Jesús Bixhoze la? ngue bidii stipa laa para gudxiilú ca prueba ni chitidiʼ. Ngaca nga laanu, pa gannaxhiinu Jehová laaca zacaneni laanu gudxíʼlunu ca prueba ni tídinu.

6. Casi ná Romanos 5:3-5, ¿ximodo riuu ca xpinni Jehová ora raca nanalaʼdxiʼ binni laacaʼ?

⁶ Cumu nadxiinu Jehová huayacaneni laanu guni huantarnu ora sananda binni laanu. ¿Xi biʼniʼ ca apóstol dxi biʼniʼ mandar Sanedrín gusaana de guni predicarcaʼ yaʼ? Cumu nadxiicaʼ Jehová la? guniʼcaʼ: «Jma naquiiñeʼ guzúʼbadu stiidxaʼ Dios casi gobernante que guzúʼbadu stiidxaʼ hombre» (Hech. 5:29; 1 Juan 5:3). Casi ca apóstol que, tiempu riʼ laaca canazananda gobiernu ca hermanu stinu peru cayuni huantarcaʼ purtiʼ nadxiicaʼ Jehová. Ora raca nanalaʼdxiʼ binni laanu qué riuʼnu triste, sínuque riuʼnu nayecheʼ (Hech. 5:41; biindaʼ Romanos 5:3-5).

7. ¿Xi naquiiñeʼ gúninu ora gucaalú familia stinu laanu?

⁷ Zándaca naquiiñeʼ guni huantarnu ora gucaalú familia stinu laanu. Ora guʼyaʼ familia stinu maʼ cayúninu ni ná Jehová zándaca gábicaʼ laanu caguite ca hermanu laanu o guiniʼcaʼ maʼ zeʼ xpiaaninu (bichaaga ni né Marcos 3:21). O zándaca dede gácacabe naduxhuʼ né laanu. Peru cadi guidxagayaanu purtiʼ Jesús guníʼ «laaca ndaaniʼ lidxi binni nga guiree ca enemigu stiʼ» (Mat. 10:36). Neca gaca nanalaʼdxiʼ familia stinu laanu la? laanu qué zaca nanaláʼdxinu laacaʼ. Lugar de nga la? ra jma gannaxhiinu Jehová, jma zannaxhiinu binni (Mat. 22:37-39). Ni jma risaca para laanu nga gúninu ni ná Jehová que gúninu ni ná binni.

8, 9. ¿Xi gucané ti hermana guni huantar dxi bicaalúcabe laa?

⁸ Georgina, hermana ni bizéʼtenu lu primé párrafo que, neca nadipaʼ modo bicaalú jñaa laa qué nusaana Jehová. Sicaríʼ guniʼbe: «Naa ne jñaaʼ bizulú biʼniʼ estudiardu Biblia né ca testigu stiʼ Jehová. Peru xhoopaʼ beeu despué gudxeʼ laabe napaʼ gana chaaʼ reunión peru biiyaʼ maʼ gadxé si laabe. Bidieeʼ cuenta riníʼnebe ca apóstata ne riquiiñebe ni rusiidicaʼ  para guiníʼnebe naa. Biʼniʼ insultarbe naa, biruuxhayube guicha iqueʼ, gudiebe yanneʼ ne bisáʼbibe guiráʼ publicación stinneʼ. Guyuaanisaʼ dxi napaʼ 15 iza. Peru cumu racaláʼdxibe guxhélebe naa de Jehová la? guluube naa ndaaniʼ ti internadu, raqué nuu stale joven ni riguʼbaʼ droga ne ni runi cosa malu. Guizáʼ nagana nga ora rucaalú familia stiluʼ lii».

⁹ Georgina guníʼ xi gucané laa guni huantar: «Dxi peʼ bizulú bicaalú jñaaʼ naa biluxeʼ biindaʼ guidubi Biblia. Bidieeʼ cuenta dxandíʼ ni rusiidiʼ Biblia ne bineʼ sentir nuaaʼ jma gaxha de Jehová. Gatigá runeʼ orar laabe ne gunna dxiicheʼ rucaadiágabe naa. Dxi nabezaʼ ndaaniʼ internadu que la? biʼniʼ invitar ti hermana naa chaaʼ ra lidxi ne runi estudiardu Biblia. Guizáʼ gucané ca hermanu naa tiempu que ne beeda gácacabe familia stinneʼ. Zaqué nga biiyaʼ jma nadipaʼ Jehová que tutiica gucaalú laanu».

10. ¿Xi nuunu seguru zuni Jehová pur laanu?

¹⁰ Apóstol Pablo guníʼ gastiʼ «qué zanda guxheleʼ laanu de guendarannaxhii stiʼ Dios ni rusihuinni Cristu Jesús Señor stinu» (Rom. 8:38, 39). Neca ziuu biaje zacananu, qué zusaana diʼ Jehová laanu. Zaguixhedxibe ladxidoʼno ne zudiibe stipa laanu. Ne cásica biquiiñebe ca hermanu para gacanebe Georgina la? ngaca zúnibe para gacanebe laanu.

11. Casi ná Juan 15:12, 13, ¿xi gudxi Jesús ca discípulo stiʼ gúnicaʼ, ne ximodo gucaneni laacaʼ? Bizeeteʼ ti ejemplu.

¹¹ Gueelaʼ ante gatiʼ Jesús gúdxibe ca discípulo stibe gannaxhiisaacaʼ (biindaʼ Juan 15:12, 13). Nanna Jesús pa gannaxhiisaa ca discípulo stiʼ ziuucaʼ tobi si ne zuni huantarcaʼ ora gaca nanalaʼdxiʼ binni laacaʼ. Guzéʼtenu ni bizaaca ca hermanu de Tesalónica, neca guzananda binni laacabe la? nabé gunnaxhiisaacaʼ ne biʼniʼ huantarcaʼ (1 Tes. 1:3, 6, 7). Gudxi Pablo ca hermanu riʼ gannaxhiicaʼ jma (1 Tes. 4:9, 10). Pa gannaxhiicabe zaguixhedxícabe ladxidóʼ ca hermanu stícabe ne zacanécabe ca ni caree gana (1 Tes. 5:14). Gucuaa ca xpinni Cristu que conseju bidii Pablo laacaʼ, ngue runi ti iza despué gúdxibe laacaʼ ca diidxaʼ riʼ: «Hermanu caʼ [...] zeʼ dxi jma ziroobaʼ fe stitu ne jma ziyannaxhiisaatu» (2 Tes. 1:3-5). Cumu gunnaxhiisaa ca hermanu riʼ la? ngue gucané laacaʼ guni  huantarcaʼ ora gápacaʼ guendanagana ne ora sananda binni laacaʼ.

12. ¿Ximodo bisihuinni caadxi hermanu nadxiisaacaʼ tiempu guyuu guerra?

¹² Guininu ni bizaaca Danilo, hermanu ni bizéʼtenu lu primé párrafo que. Dxi bizulú guca ti guerra guidxi ra nabézabe la? laabe ne xheelabe qué nusaana de ñécabe reunión, bíʼnicabe stipa guni predicárcabe ne bidiicabe de ni nápacabe ca hermanu ni caquiiñeʼ ni. Peru málasi ti dxi guyé caadxi soldadu ra lidxi Danilo. Sicaríʼ guniʼbe: «Gúdxicabe naa gusaanaʼ de gacaʼ Testigu. Peru cumu qué ninaʼyaʼ la? bíʼnicabe casi ora chigucuaagucabe naa peru gadxé ladu bicuaagucabe ne ante chécabe gúdxicabe naa zabiguétacabe para guilaxoocabe xheelaʼ. Nagueendaca gucané ca hermanu laadu ne biseendacaʼ laadu sti guidxi. Qué ziuu dxi guiaandaʼ naa pabiáʼ gunnaxhii ca hermanu que laadu. Ne ora yendadu sti guidxi que, guizáʼ galán bidxaagalú ca hermanu laadu. Bidiicaʼ ni guidoʼdo, bidxélacaʼ ti dxiiñaʼ para naa ne ti yoo ra guiaanadu. Gudiʼdiʼ si ti tiempu gunda guluʼdu caadxi hermanu ni cuxooñeʼ de guerra ra lídxidu». Ca experiencia riʼ racanécani laanu gánnanu pa gannaxhiisaanu zacaneni laanu guni huantarnu ora gaca nanalaʼdxiʼ binni laanu.

13. ¿Ximodo racané espíritu santu laanu gúninu ni ná Jehová neca gaca nanalaʼdxiʼ binni laanu?

¹³ Gudxi Jesús ca xpinni gannaxhiicaʼ ca enemigu sticaʼ (Mat. 5:44, 45). Nuu biaje zácani nagana para laanu peru risaca guinábanu Dios gudii espíritu santu stiʼ laanu. Pa gannaxhiinu binni, gápanu paciencia, gácanu amable, gácanu nadóʼ ne gucueezanu laaca laanu zacaneni laanu guni huantarnu ora gaca nanalaʼdxiʼ binni laanu (Gál. 5:22, 23). Stale binni ni bicaalú laanu dxiqué, maʼ bichaacaʼ purtiʼ maʼ biiyacaʼ xheelacaʼ, xiiñicaʼ o ti vecinu sticaʼ cusihuinni ca cualidad riʼ. Ne stale de laacaʼ maʼ testigu stiʼ Jehová laacaʼ. Nga runi, pa raca nagana para laanu gannaxhiinu ca ni nanalaʼdxiʼ laanu pur ni runi crenu, guinábanu Jehová gudii laanu espíritu santu stiʼ (Luc. 11:13). Ne cadi guiaandaʼ ndiʼ laanu: jma risaca gúninu ca cosa ca modo riuulaʼdxiʼ Jehová (Prov. 3:5-7).

14, 15. Ra biʼndaʼ ti hermana Romanos 12:17-21, ¿ximodo gucaneni laa ora bicaalú xheelaʼ laa?

 ¹⁴ Guidúʼyanu ni bizaaca Yasmín, ti hermana ni nabeza Oriente Medio. Gúcasibe testigu stiʼ Jehová guníʼ ique xheelabe caguítecabe laabe ne gucalaʼdxiʼ nucueeza laabe de ñúnibe ni ná Jehová. Biʼniʼ insultar hombre riʼ laabe, gunabaʼ familia stiʼ, ti xaíque yuʼduʼ ne ti hechiceru guni amenazarcaʼ hermana riʼ ne guiniʼcaʼ cayuni dividirbe familia. Dede guyé hombre riʼ ti reunión ne gúdxibe ca hermanu riʼ stale cosa feu. Guizáʼ biinaʼ Yasmín purtiʼ nabé feu modo biʼniʼ tratar xheelaʼ laa.

¹⁵ Ora rié hermana riʼ reunión, riguixhedxí ca hermana ne ca hermanu ladxidoʼbe ne racanecaʼ laabe. Gudxi ca ancianu laabe gúʼndabe ne chinándabe ni ná Romanos 12:17-21 (biindaʼ ni). Sicaríʼ guníʼ Yasmín: «Guca nagana para naa chinandaʼ ni ná Biblia, peru gunabaʼ Jehová gacané ne gudii stipa naa. Ngue runi, ora xheelaʼ piaʼ runi pur guni biidiʼ guzina la? rusiayaʼ ni, ora runi insultarbe naa rucueezaʼ laca naa ne ora raca huarabe la? ruuyaʼ laabe».

16, 17. ¿Xi rusiidiʼ ejemplu stiʼ Yasmín lii?

¹⁶ Guleendú Yasmín ni galán purtiʼ biʼniʼ stipa gannaxhii xheelaʼ. Sicaríʼ guniʼbe: «Gúpabe confianza naa purtiʼ nánnabe qué rusiguieeʼ. Biʼniʼ respetarbe naa ora rinidu de religión, maʼ nuudu tobi si ne yanna dede rábibe naa cadi guiaadxaʼ reunión. Maʼ raca llevardu bien ne maʼ nabánidu nayecheʼ. Ribezaʼ chuʼ ti dxi guiziidiʼ xheelaʼ de Jehová ne guni servirdu laa juntu».

¹⁷ Ejemplu stiʼ Yasmín rusiidiʼ ni laanu ora nadxii tuuxa ti binni «runi soportar guiráʼ cosa, runi cré guiráʼ cosa, ribeza guiráʼ cosa, runi huantar guiráʼ cosa» (1 Cor. 13:4, 7). Ora rusihuinni tuuxa guendarannaxhii, rannaxhii binni laa, peru ora coʼ la? runinabe binni ne racanabe. Ne ni jma galán, ora rusihuínninu guendarannaxhii rusiéchenu Jehová. Nga runi, zanda chuʼnu nayecheʼ neca gaca nanalaʼdxiʼ binni laanu. Guidúʼyanu ximodo.

18. ¿Ximodo zanda chuʼnu nayecheʼ neca gaca nanalaʼdxiʼ binni laanu yaʼ?

¹⁸ Jesús guníʼ: «Dichoso laatu ora gacananalaʼdxiʼ binni laatu» (Luc. 6:22). Qué riuuláʼdxinu gaca nanalaʼdxiʼ binni laanu ne qué ruyúbinu guninácabe laanu.  Yanna, ¿ximodo zanda chuʼnu nayecheʼ neca gaca nanalaʼdxiʼ binni laanu yaʼ? Guidúʼyanu chonna cosa xi pur zanda chuʼnu nayecheʼ. Primé, ora runi huantarnu riuulaʼdxiʼ Jehová ni rúninu (1 Ped. 4:13, 14). Guiropa, raca fe stinu jma naguidxi (1 Ped. 1:7). Ne guionna, zacaanu ti ndaayaʼ nabé galán, ti guendanabani ni qué zaluxe (Rom. 2:6, 7).

19. ¿Xiñee guyuu ca apóstol nayecheʼ neca guluu binni golpe laacaʼ?

¹⁹ Despué de biasa Jesús de lade gueʼtuʼ guyuu ca apóstol que nayecheʼ casi maca gudxi Jesús laacaʼ. Neca guluu binni golpe laacabe ne biʼniʼ mandarcaʼ gusaana de guni predicárcabe, qué nusaana de ñuucaʼ nayecheʼ «purtiʼ cudii Dios lugar laacaʼ guni sufrircaʼ pur lá Jesús» (Hech. 5:40-42). Cumu nadxiicabe Jesús la? qué nidxíbicabe ca enemigu stícabe. Ne bisihuínnicabe guendarannaxhii ca purtiʼ qué nusaana de ñuni predicárcabe. Tiempu riʼ stale hermanu cayuni ni ná Jehová neca cadíʼdicaʼ ra nagana. Ne nánnacaʼ qué zusiaandaʼ Jehová guiráʼ ni rúnicaʼ ne dede yanna cayúnirucaʼ ni ná Jehová purtiʼ rusihuínnicaʼ nadxiicaʼ nombre stibe (Heb. 6:10).

20. ¿Xi zazíʼdinu lu sti artículo ca?

²⁰ Biaʼ dxi guibáninu ndaaniʼ guidxilayú malu stiʼ Binidxabaʼ riʼ naquiiñeʼ guni huantarnu gaca nanalaʼdxiʼ binni laanu (Juan 15:19). Peru cadi naquiiñeʼ guidxíbinu. Lu sti artículo ca zazíʼdinu ximodo zacané ne zapa Jehová laanu (2 Tes. 3:3). Nga runi cadi gusaana de gannaxhiinu Jehová, ca hermanu stinu ne dede ca enemigu stinu. Pa gúninu ni la? ziuʼnu tobi si ne qué zaxélenu de Jehová, zusisácanu laabe ne zusihuínninu gástiruʼ sti cosa jma galán que gannaxhiinu.