1, 2. ¿Tu guiráʼ zanda gacané ti estudiante para chúʼnisa?

SICARÍʼ guníʼ Amy, ti gunaa nabeza Fiyi: «Riuuladxeʼ ni caziideʼ de lu Biblia, nannaʼ laani nga ni dxandíʼ, peru guca nagana para naa guchaaʼ. Ni gucané naa guchaaʼ ne chuaanisaʼ nga guidxaagaʼ ca hermanu». Ni bizaaca Amy riʼ rusiidini laanu ti cosa nabé risaca: jma nagueenda guni progresar ti estudiante ne chúʼnisa ora racané interu congregación laabe.

² Zanda gacané ca publicador para guiroobaʼ congregación (Efes. 4:16). Ti precursora de Vanuatu láʼ Leilani guníʼ: «Nuu ti refrán ni ná caquiiñeʼ gacané ti guidxi para guiniisi ti xcuidi. Ne ngaca nga rizaaca né dxiiñaʼ de gúninu discípulo, caquiiñeʼ gacané congregación para guidxiña ti estudiante Jehová». Para guiniisi ti xcuidihuiiniʼ la? racané familia stibe, ca xhamígube ne ca maestru stibe purtiʼ riguucaʼ gana ne rusiidicaʼ laabe. Zacaca nga rizaaca né ti estudiante, zanda gacané ca publicador laabe para chúʼnisabe ra gudiicaʼ conseju, cuʼcaʼ gana ne gácacaʼ ti ejemplu galán para laabe (Prov. 15:22).

3. ¿Xi rizíʼdinu de ni guníʼ Ana, Dorín ne Leilani?

³ Pa cudiʼnu estudiu ti binni, ¿xiñee naquiiñeʼ gudiʼnu lugar gacané xcaadxi publicador laabe yaʼ? Guzéʼtenu ni guníʼ Ana, ti precursora especial ni cayuni servir Moldavia: «Caquiiñeʼ ti estudiante tu gacané laa ne nuu biaje  cadi maestru si stibe zanda gúnini». Dorín, sti precursor especial ni cayuni servir Moldavia, guníʼ: «Nuu biaje rabi sti publicador estudiante stinneʼ xiixa ni qué lica huaníʼ iqueʼ gabeʼ laa ne rindani ndaaniʼ ladxidóʼ». Leilani guníʼ xiñee galán gudiʼnu lugar gacané xcaadxi laanu: «Ora rudii ti estudiante cuenta nadxii ca publicador laa, racaneni laa gudii cuenta nuu ndaaniʼ xquidxi Jehová» (Juan 13:35).

4. ¿Xi zazíʼdinu lu artículo riʼ?

⁴ Zándaca guinabadiidxanu ndiʼ: «¿Ximodo zanda gacaniaʼ ti estudiante pa cadi naa cudieeʼ estudiu laabe yaʼ?». Lu artículo riʼ zazíʼdinu xi naquiiñeʼ gúninu ora guni invitar ti hermanu laanu chinenu laa ti estudiu ne xi naquiiñeʼ gúninu ora guzulú ti estudiante cheʼ reunión. Laaca zadúʼyanu xi naquiiñeʼ guni ca ancianu para gacanecaʼ ti estudiante chúʼnisa.

5. ¿Xi naquiiñeʼ gúninu ora guni invitar ti hermanu laanu chinenu laa ti estudiu?

⁵ Ora cacaa ti binni estudiu la? maestru stibe nga naquiiñeʼ gacané laabe guiénebe Stiidxaʼ Dios. Pa guni invitar ti hermanu laanu chinenu laa ti estudiu cadi guiaandaʼ laanu ziuunu para gacanenu laa (Ecl. 4:9, 10). Peru ¿ximodo zanda gacanenu yaʼ?

6. Ora guni invitar tuuxa laanu chinenu laa ti estudiu, ¿ximodo zanda gúninu ni ná Proverbios 20:18?

⁶ Gaca prepararnu. Primé, zanda guinabadiidxanu maestru ca caadxi cosa de estudiante stiʼ (biindaʼ Proverbios 20:18). Zanda guinabadiidxanu laabe xi guendanagana cadiʼdiʼ estudiante ca, xi capítulo chiguni estudiárcabe ne xi racaláʼdxibe gusiidibe estudiante ca dxi ca. Laaca zanda guinabadiidxanu laabe xi zanda o xi qué zanda guininu ne ximodo zanda cuʼnu gana estudiante ca. Nánnanu qué zabi diʼ maestru ca laanu guiráʼ cosa ni cadi naquiiñeʼ gánnanu de estudiante ca, peru naquiiñeʼ gucaʼdiáganu ni gábibe laanu purtiʼ zanda gacaneni laanu. Nga peʼ nga ni runi ti misionera ni láʼ Joy, rábibe ca hermana ni riné laabe estudiu caadxi cosa de estudiante stibe. Sicaríʼ guniʼbe: «Ndiʼ racané compañera stinneʼ guizaalaʼdxiʼ estudiante stinneʼ ne ganna xi guiníʼ».

7. ¿Xiñee risaca gaca prepararnu?

⁷ Nabé risaca gaca prepararnu ora guni invitar tuuxa laanu ti estudiu (Esd. 7:10). Dorín, hermanu ni bizéʼtenu lu párrafo chonna que guníʼ: «Riecheʼ ora  raca preparar hermanu ni ziné naa estudiu purtiʼ zacá zanda gacanebe naa». Laaca rudii estudiante ca cuenta ora guca preparar maestru stiʼ ne xcompañeru ne nga zacané laa gaca preparar. Peru pa qué ñuni estudiar chaahuinu capítulo ca, naquiiñeʼ cueenu tiempu para guidúʼyanu xii nga ca cosa risaca ni cusiidini.

8. ¿Xi zacané laanu gánnanu xi guinábanu lu oración ni gúninu ante gudiʼnu estudiu?

⁸ Nabé risaca guni orarnu ante gudiʼnu ti estudiu. Nga runi, guiníʼ íquenu dede ante xi guininu lu oración stinu. Zacá zanda guinábanu ni peʼ caquiiñeʼ estudiante stinu (Sal. 141:2). Hanae, ti hermana de Japón, dede yanna rietenalaʼdxiʼ oración ni biʼniʼ hermana ni biʼniʼ acompañar maestra stiʼ. Sicaríʼ guniʼbe: «Bidieeʼ cuenta guizáʼ nadxii hermana que Jehová ne racalaʼdxeʼ gacaʼ casi laabe. Ne ora ruzeetebe laʼyaʼ lu oración stibe, bineʼ sentir guizáʼ nadxiibe naa».

9. Casi ná Santiago 1:19, ¿ximodo zanda gácanu ti buen compañeru ora chinenu ti hermanu estudiu?

⁹ Gacanenu maestru ca. Ti precursora especial de Nigeria ni láʼ Omamuyovbi guníʼ: «Ti buen compañeru la? rucaadiaga ora maʼ cudiʼnu estudiu. Laaca runi comentarbe peru qué riniʼbe stale purtiʼ nánnabe maestru ca nga cudii estudiu ca». Yanna, ¿pora nga naquiiñeʼ guininu ne xi naquiiñeʼ guininu yaʼ? (Prov. 25:11). Naquiiñeʼ gucaʼdiáganu maestru ca ne estudiante ca (biindaʼ Santiago 1:19). Zacá ziuʼnu listu para gacanenu. Laaca naquiiñeʼ gápanu cuidadu cadi guininu stale, cadi gucueezanu maestru ca ora caníʼ o guchaʼnu de diidxaʼ. Peru zanda gudiʼnu xiixa comentariu, guzéʼtenu ti ejemplu o gúninu ti pregunta ni gacané estudiante ca guiene chaahuiʼ ni caziidiʼ. Nuu tiru zudiʼnu cuenta cadi naquiiñeʼ peʼ guininu stale. Peru pa guni felicitarnu ne guizaaláʼdxinu estudiante ca, zacaneni laa guni progresar.

10. ¿Ximodo zanda gacané experiencia stinu ti estudiante?

¹⁰ Guzéʼtenu xiixa experiencia stinu. Zanda guinínenu estudiante ca ximodo bizíʼdinu de Jehová, ximodo bidxíʼlunu xiixa guendanagana o ximodo huayacané Jehová laanu (Sal. 78:4, 7). Zándaca ndiʼ nga ni caquiiñeʼ estudiante ca. Zacaneni laabe iguidxi fe stibe, chúʼnisabe o gánnabe ximodo gudxiilube ca guendanagana stibe (1 Ped. 5:9). Gabriel, ti precursor ni nabeza Brasil rietenalaʼdxiʼ xi gucané laa dxi cayuundanécabe laa Biblia. Sicaríʼ guniʼbe: «Experiencia stiʼ ca hermanu que bisiidini naa nanna Jehová xi problema cadideʼ. Ne pa laacabe  gunda gudíʼdicabe ni la? naa laaca zanda tideʼ cani».

11, 12. ¿Xiñee naquiiñeʼ guidxaagalunu ca estudiante ni cheʼ reunión?

¹¹ Para guni progresar ti estudiante ne chúʼnisa la? caquiiñeʼ guni stipa cadi guiaadxaʼ reunión ne guiaanané ni guiete luni (Heb. 10:24, 25). Zándaca primé biaje guyé ti estudiante reunión nga purtiʼ biʼniʼ invitar maestru stiʼ laa. Yanna, ¿xi zanda gúninu para gacanenu laabe cadi guiaadxabe yaʼ?

¹² Guidxaagalunu ca estudiante (Rom. 15:7). Pa guidxaagalunu ti estudiante ra Yoo stiʼ Reinu zándaca chuuláʼdxibe chebe sti biaje. Gudíʼnanu laabe ne guni presentarnu laabe xcaadxi hermanu peru sin gusidxáganu laabe. Guidxíñanu estudiante ca purtiʼ zándaca nuu xhiiñaʼ maestru stibe o caʼruʼ chindá ra Yoo stiʼ Reinu. Gucaʼdiáganu ne guizaaláʼdxinu laabe. Pa gúninu ni bizéʼtenu riʼ, ¿ximodo zanda gacaneni laabe yaʼ? Guidúʼyanu ni guníʼ Dimitri, ti hermanu ni guyuunisa raca caadxi iza ne yanna maʼ siervu ministerial laa. Ra bietenaláʼdxibe primé biaje guyebe reunión guniʼbe: «Biaanaʼ fuera de ra Yoo stiʼ Reinu, guizáʼ cadxibeʼ ne qué naʼyaʼ chuaaʼ. Peru ora biʼyaʼ ti hermanu naa bidxiña ra nuaaʼ ne yené naa ndaaniʼ Yoo stiʼ Reinu. Guizáʼ bidxagayaaʼ purtiʼ stale hermanu bidxaagalú naa, guyuuladxeʼ ne pa ñanda si guiráʼ dxi ñuu reunión. Guizáʼ galán bineʼ sentir».

13. ¿Ximodo zanda gacané ejemplu stinu ca estudiante?

¹³ Gudiʼnu ti ejemplu galán. Pa guʼyaʼ ti estudiante rúninu ni jneza zacaneni laa ganna dxandíʼ ni caziidiʼ (Mat. 5:16). Vitali, ti precursor de Moldavia guníʼ: «Ora biiyaʼ modo nabani ca hermanu, modo riníʼ íquecaʼ ne modo runi tratarcaʼ xcaadxi hermanu, bidieeʼ cuenta ca testigu stiʼ Jehová nga religión ni dxandíʼ».

14. ¿Ximodo zanda gacané ejemplu stinu ti estudiante guni progresar?

¹⁴ Pa racalaʼdxiʼ ti estudiante chúʼnisa, naquiiñeʼ guni ni caziidiʼ. Nuu biaje zaca ni nagana para laabe. Peru ora gúʼyabe ribeendunu ni galán purtiʼ zinándanu ca principiu stiʼ Biblia zándaca gucaani laabe chinándabe ejemplu stinu (1 Cor. 11:1). Guzéʼtenu ejemplu stiʼ Hanae, hermana ni bizéʼtenu lu párrafo xhono. Laa guníʼ: «Bidieeʼ cuenta runi ca hermanu que ni rusiidicaʼ, ngue runi biziideʼ cuaaʼ gana xcaadxi, guneʼ perdonar ne gannaxhieeʼ laacaʼ. Nabé riguu ca hermanu que gana xcaadxi,  ngue runi naa laaca gucalaʼdxeʼ gacaʼ casi laacabe».

15. Casi ná Proverbios 27:17, ¿xiñee naquiiñeʼ gaca xhamígunu ca estudiante ni rié reunión?

¹⁵ Gaca xhamígunu estudiante ca. Cada biaje cheʼ ti estudiante reunión, gusihuínninu rizaaláʼdxinu laa (Filip. 2:4). Gúninu stipa gunibiaʼnu laa sin chuʼnu lu xpida. Guinabadiidxanu laabe ximodo nuu familia stibe, ximodo cayé ni laabe ra dxiiñaʼ o ximodo cayuni sentirbe né estudiu ni cacaabe. Laaca naquiiñeʼ guni felicitarnu laabe purtiʼ cayúnibe stipa guchaabe. Zacá zaca xhamígunu estudiante ca, zacanenu laa guni progresar ne chúʼnisa (biindaʼ Proverbios 27:17). Yanna maʼ precursora regular Hanae ne bisiene xi biʼniʼ sentir dxi bizulú guyé reunión. Sicaríʼ guniʼbe: «Laga jma guca xhamiguaʼ ca hermanu de congregación, jma guyuuladxeʼ chaaʼ reunión. Ne nuu tiru neca maʼ bidxagaʼ, qué riaadxaʼ. Guyuuladxeʼ guidxaagaʼ ca hermanu ne ngue gucané naa guixeleʼ de ca binni ni qué runi ni ná Dios. Cumu racalaʼdxeʼ chuaaʼ gaxha de Jehová ne de ca hermanu la? guyuaanisaʼ».

16. ¿Xiruʼ zanda gúninu para gacanenu ti estudiante guni sentir galán ndaaniʼ congregación?

¹⁶ Ora maʼ ziyuni progresar ti estudiante, gacanenu laabe para guni sentirbe nácabe parte de congregación. Ti modo zanda gúninu ni nga ra gácanu hospitalariu (Heb. 13:2). Denís, ti hermanu ni runi servir Moldavia rietenalaʼdxiʼ xi bizaaca dxi cudiicabe estudiu laa. Sicaríʼ guniʼbe: «Stale biaje runi invitar ca hermanu naa ne xheelaʼ para gúnidu xiixa juntu. Ora rábicabe laadu ximodo gucané Jehová laacabe nabé riguu ngue gana laadu. Gucaneni laadu quixhe íquedu gúnidu ni ná Jehová ne gápadu ti esperanza galán». Ora raca ti estudiante publicador, zanda guni invitarnu laabe guni predicarnebe laanu. Ti hermanu de Brasil láʼ Diego guníʼ: «Nabé biʼniʼ invitar ca hermanu naa guneʼ predicarniaʼ laacaʼ. Zaqué binebiaʼyaʼ laacabe jma, biziideʼ stale ne bidxiñaʼ jma gaxha de Jehová ne de Jesús».

17. ¿Xi zanda guni ca ancianu para gacanecaʼ ca estudiante?

¹⁷ Cueecaʼ tiempu para ca estudiante. Ora rusihuinni ca ancianu nadxiicaʼ ne rizaaláʼdxicaʼ ca estudiante zacaneni laacaʼ chuʼnísacaʼ. Ancianu caʼ, ¿ñee zanda cueetu tiempu para guidxíñatu ca estudiante ante o despué de cada reunión la? Zudiicabe cuenta rizaaláʼdxitu laacabe ora guiniʼtu lácabe jmaruʼ si ora  guzulú guni comentárcabe. ¿Ñee zanda chinetu ti publicador ora chigudii estudiu la? Guizáʼ zacané ndiʼ estudiante ca. Jackie, ti precursora ni nabeza Nigeria guníʼ: «Guizáʼ ridxagayaa ca estudiante stinneʼ ora ránnacaʼ ancianu hermanu ni yené naa ora yegudieeʼ estudiu laacaʼ. Dede gudxi ti estudiante naa: “Qué ñuu dxi ñuni pastor stinneʼ nga. Laa rié ra lidxi si ca binni ni napa bueltu ne pa quíxecabe laa”». Yanna maʼ rié binni riʼ reunión.

18. ¿Ximodo zanda chinanda ca ancianu ni ná Hechos 20:28?

¹⁸ Gusiidicaʼ ne cuʼcaʼ gana ca maestru. Ancianu caʼ, nápatu ti dxiiñaʼ nabé risaca: gacanetu ca publicador gusiidicaʼ jma jneza (biindaʼ Hechos 20:28). Pa ridxibi ti publicador chiné laatu estudiu, lagabi laabe laatu gúnitu estudiu ca. Jackie, hermana ni bizéʼtenu lu párrafo ni gudiʼdiʼ que guníʼ: «Gatigá rinabadiidxaʼ ca ancianu naa ximodo ziniaʼ ca estudiante stinneʼ. Ne ora rabeʼ laacaʼ rapaʼ xiixa guendanagana ora maʼ cudieeʼ estudiu la? rudiicaʼ conseju naa». Zanda gacané ca ancianu ca maestru para cadi guireecaʼ gana (1 Tes. 5:11). Ne guniʼruʼ Jackie: «Riuuladxeʼ ora riguu ca ancianu gana naa ne rábicaʼ naa rusisácacaʼ stipa runeʼ. Ca diidxaʼ rábicabe naa zeeda gácani casi ti vasu nisa nagaʼndaʼ ora nandáʼ. Riuaaʼ gana pur ca conseju rudiicabe naa ne jma riuuladxeʼ gudieeʼ estudiu» (Prov. 25:25).

19. ¿Xi razón nápanu para chuʼnu nayecheʼ?

¹⁹ Neca qué gápanu ti estudiu, zanda gacanenu ti estudiante guni progresar. Ora chinenu ti hermanu chigudii estudiu zándaca qué zaninu stale peru galán nga guni prepararnu xiixa comentariu ni zanda gacané estudiante ca. Gaca xhamígunu laabe ora chebe ra Yoo stiʼ Reinu ne gudiʼnu ti ejemplu galán laabe. Ne zanda cuʼ ca ancianu gana ca estudiante ora cueecaʼ tiempu para laacabe ne ora gusiidicaʼ ne guni felicitarcaʼ ca maestru. Guizáʼ riéchenu purtiʼ guiranu zanda gacanenu ti estudiante gannaxhii Jehová ne guni ni nabe.