1. ¿Ximodo gúcanu ante guni estudiarnu Biblia?

 ¿XIMODO gúcalu’ ante guni estudiarluʼ Biblia né ca testigu stiʼ Jehová? Nuu de laanu qué lica racaláʼdxinu guietenaláʼdxinu ni. Zándaca pur modo gúcanu ne ni bíninu bisihuinni ni rinándanu modo nabani binni ni qué runibiáʼ Dios. Pa zacá bizaacanu, qué ñápanu esperanza, purtiʼ qué runibia’nu Dios stinu (Efes. 2:12). Peru ra maʼ cayuni estudiarnu Biblia bichaʼnu modo nácanu.

2. ¿Xi biziidilu’ ora bizulú bi’ni’ estudiarluʼ Biblia?

² Ra cayuni estudiarluʼ Biblia, biziidiluʼ Jehová nga Bixhózeluʼ ne guizáʼ nadxiibe lii. Biziidiluʼ pa racaláʼdxiluʼ gusiécheluʼ Jehová, ne chuʼluʼ ndaaniʼ familia stiʼ, caquiiñeʼ guchaaluʼ modo nabániluʼ ne modo riníʼ íqueluʼ ne laaca biziidilu’ naquiiñeʼ guibániluʼ modo ná ca ley sti’ Dios (Efes. 5:3-5).

3. a) Casi ná Colosenses 3:9, 10, ¿xi racala’dxi’ Jehová gúninu? b) ¿Ximodo zacané artículo riʼ laanu?

³ Cumu Jehová nga bizáʼ laanu ne nácabe Bixhózenu la? nápabe derechu de guiniʼbe ximodo naquiiñeʼ guibani ca binni ni nuu ndaaniʼ familia stibe ne ndiʼ nga ni cayabi Jehová ca ni racala’dxi’ chúʼnisa: «Lagusaana modo gúcatu dxiqué ne ca cosa ni bí’nitu» * (biinda’ Colosenses 3:9, 10). Pa maʼ caníʼ íquelu’ chu’nísalu’, zacané artículo ri’ lii guicábiluʼ guionnaʼ pregunta riʼ: ¿xi riní’ ca diidxaʼ «lagusaana modo gúcatu dxiqué» o personalidad yooxhoʼ?, ¿xiñee racala’dxi’ Jehová gusaananu ni? ne ¿xi zacané laanu gúninu ni? Ne pa ma’ guyuʼnísanu la? zacané artículo ri’  laanu para cadi guibiguetaʼ gúninu ca cosa ni cadi jneza bíninu dxiqué.

4. ¿Xi runi ti binni ni qué naʼ gusaana modo guca dxiqué?

⁴ Tuuxa ni qué naʼ gusaana modo guca dxiqué, riní’ ique ne runi ni rinabaʼ xcuerpu laa o laani nga pecadu ni gulené. Zándaca nagueenda ridxiichibe, ruyúbibe puru si para laabe, qué rudiibe xquixe ne orgulloso laabe. Zándaca riuuláʼdxibe gúʼyabe pornografía, película inmoral o ra ridinde binni. Zándaca nápabe cualidad galán ne nánnabe cadi jneza ni rúnibe ne ni riniʼbe, peru raca nagana para laabe guchaabe (Gál. 5:19-21; 2 Tim. 3:2-5).

5. ¿Xi naquiiñeʼ gánnanu ora ruzeeteʼ Biblia gusaananu modo gúcanu dxiqué? (Hechos 3:19).

⁵ Cumu binni ruchee laanu la? raca nagana para laanu cadi guiníʼ íquenu cosa malu ne gápanu deseu ndaaniʼ ladxidoʼno, nuu biaje zaninu o zúninu xiixa ne despué zaca arrepentirnu (Jer. 17:9; Sant. 3:2). Peru ra gusaananu modo gúcanu dxiqué, maʼ rucueezanu laanu ne maʼ qué rúninu cosa ni cadi jneza (Is. 55:7; biindaʼ Hechos 3:19).

6. ¿Xiñee cayabi Jehová laanu gusaananu de guiníʼ íquenu cosa ni cadi jneza ne ca costumbre malu ni zándaca gúpanu dxiqué?

⁶ Rinabaʼ Jehová laanu gusaananu de guiníʼ íquenu cosa ni cadi jneza ne xiixa costumbre malu, ne rúnibe ni purtiʼ nadxiibe laanu ne racaláʼdxibe guibáninu galán (Is. 48:17, 18). Nánnabe, pa gúninu ca deseu malu stinu, zuninanu laanu, zuninanu xcaadxi ne laaca zuninanu laabe.

7. Casi ná Romanos 12:1, 2, ¿xi decisión naquiiñeʼ guicaanu?

⁷ Zándaca ziuu ora zuni burla ca familia stinu o ca xhamígunu laanu purtiʼ cayúninu stipa pur guchaʼnu (1 Ped. 4:3, 4). Zándaca gábicabe laanu guirutiʼ naquiiñeʼ gabi laanu ximodo guibáninu, sínuque zanda gúninu ni racaláʼdxinu. Peru ca ni qué riná chinanda ca ley stiʼ Jehová cadi dxandíʼ libre laacaʼ, purtiʼ ni dxandíʼ nga rudiicabe lugar guchaa guidxilayú stiʼ  Binidxabaʼ riʼ laacabe (biinda’ Romanos 12:1, 2). Guiranu caquiiñeʼ guicaanu ti decisión: gudi’nu lugar guchaa Jehová laanu o gudi’nu lugar guchaa pecadu ne guidxilayú stiʼ Binidxabaʼ laanu (Is. 64:8).

8. ¿Xi riquiiñeʼ Jehová para gacané laanu gusaana de guiníʼ íquenu cosa ni cadi jneza ne costumbre malu?

⁸ Jehová nanna naquiiñeʼ tidiʼ tiempu ne naquiiñeʼ gúninu stipa para gusaananu de guiní’ íquenu cosa ni cadi jneza ne ca costumbre malu (Sal. 103:13, 14). Peru riquiiñebe Stiidxabe, espíritu stibe ne organización stibe para gudiibe laanu guendabiaaniʼ ne stipa ni caquiiñenu para guchaʼnu. Zándaca ma’ biiyaluʼ ximodo huayacané Jehová lii. Yanna, guidúʼyanu xi zanda gúniluʼ para gusaanaluʼ modo gúcaluʼ dxiqué ne guchalu’ ca requisitu para chu’nísalu’.

9. ¿Xi zacané Stiidxa Dios lii guʼnuʼ?

⁹ Bidii lugar gacané Biblia lii gánnaluʼ paraa naquiiñeʼ guchaalu’. Stiidxa Dios zeeda gácani casi ti espeju ni zanda gacané lii gánnaluʼ xi riníʼ íqueluʼ, ximodo lii ne ximodo rini’lu’ (Sant. 1:22-25). Zanda gacané maestru stiluʼ lii ne xcaadxi hermanu ni napa experiencia. ¿Ximodo yaʼ? Ra iquiiñecabe Biblia para gacanécabe lii gánnaluʼ xii nga ca cosa ni cayúniluʼ jneza ne paraa naquiiñeʼ guchaaluʼ. Ne ra gusiidicabe lii iquiiñeluʼ información ni zeeda lu Biblia ni zanda gacané lii gusaana de guʼnuʼ cosa malu. Ne laaca nuu Jehová listu para gacané lii. Laabe nánnabe ximodo gacanebe lii purtiʼ nánnabe xi nuu ndaaniʼ ladxidoʼno (Prov. 14:10; 15:11). Nga runi, gupa costumbre guni orarlu’ Jehová ne guni estudiarlu’ Biblia guiráʼ dxi.

10. ¿Xi rizíʼdinu de ni bizaaca Elie?

¹⁰ Gunna dxiichiʼ jneza ca ley stiʼ Jehová. Guiráʼ ni rabi Jehová laanu riquiiñeʼ ca ni para guibáninu galán. Ca ni rinanda ca ley stibe ribánicaʼ galán ne nayecheʼ (Sal. 19:7-11). Peru ca ni qué rinanda ni racanacaʼ purtiʼ rúnicaʼ ni ná xcuérpucaʼ. Guidúʼyanu xi bizaaca ti hombre lá Elie, laa bizeeteʼ xi rizaaca ora qué rinanda binni ca ley stiʼ Dios. Neca nadxii bixhózebe ne jñaabe Jehová, dxi joven laabe gúpabe xhamígube ni qué runi ni ná Dios. Bizulú gudúʼbabe droga, gúpabe ti vida inmoral ne guláʼnabe. Laabe guniʼbe feu biʼniʼ tratarbe binni ne gúcabe ti binni ni riuula’dxi’ tinde. Sicaríʼ guni’be: «Bine’ ca cosa ni bisiidicabe naa cadi naquiiñeʼ guni ti xpinni Cristu». Peru qué ñaanda’ laabe ca cosa ni bisiidiʼ bixhózebe ne jñaabe laabe dxi nahuiinibe. Nga runi, gudi’di’ si tiempu biguetaʼ biʼniʼ estudiarbe Biblia. Bíʼnibe stale stipa para bisaanabe ca cosa ni cadi jneza bíʼnibe ne guyuunísabe lu iza 2000. ¿Xi huabeendube ra ma’ zinándabe ca ley stiʼ Jehová yaʼ? Sicaríʼ guniʼbe: «Rune’ sentir nuaaʼ gaxha de Dios ne nayá conciencia stinne’». * Casi bidúʼyanu ni bizaaca Elie, ca binni ni qué rinanda ca ley sti’ Jehová runinaca’ laca laaca’. Peru racaláʼdxibe gacanebe laacaʼ guchaacaʼ.

11. ¿Gunáʼ nga ca cosa ni nanalaʼdxiʼ Jehová?

¹¹ Biziidiʼ gacananaláʼdxiluʼ ca cosa ni nanalaʼdxiʼ Jehová (Sal. 97:10). Biblia ná nanalaʼdxiʼ Jehová «binni orgulloso, binni ni rusiguii, ne ni ruuti binni inocente» (Prov. 6:16, 17). Laaca «ribixhila’dxi’ Jehová ca binni ridinde ne ca ni rusiguii»  (Sal. 5:6). Qué riuulaʼdxiʼ Jehová guiráʼ ca cosa malu ca, ngue runi binitilube ca binni malu ni bibani lu Guidxilayú tiempu stiʼ Noé (Gén. 6:13). Ti cosa ni nanalaʼdxiʼ Jehová nga ni gúdxibe profeta Malaquías gucaa, laani nga guni traicionar binni xheelaʼ para gaca divorciar. Qué ricaa Jehová adoración sti’ ca binni ni runi zacá ne zanábabe cuenta laacaʼ (Mal. 2:13-16; Heb. 13:4).

12. ¿Xi riníʼ gacananaláʼdxinu cosa malu?

¹² Cayuni mandar Jehová laanu: «Lagacananalaʼdxiʼ ni nadxabaʼ» (Rom. 12:9). Diidxa’ lagacananala’dxi’ laaca laani nga guibixhiláʼdxinu o gucáʼnanu xiixa cosa ni cadi galán. Bixui’lú cudiicabe lii goloʼ ti guendaró ni maʼ guca feu, cadi dxandíʼ gú’yasiouʼ ni dede riuʼchaʼ ladxido’lo’ la? ngaca nga naquiiñeʼ guni sentirnu pa málasi guiníʼ íquenu gúninu cosa malu ni qué riuulaʼdxiʼ Jehová.

13. ¿Xiñee naquiiñeʼ chuʼnu cuidadu né ni guiníʼ íquenu?

¹³ Guyuu cuidadu né ni guiníʼ íqueluʼ. Pur ca ni rúninu rihuinni xi riníʼ íquenu. Nga runi, Jesús bisiidiʼ naquiiñeʼ cueenu de ndaaniʼ íquenu intiica cosa malu ni zándaca gucaa laanu guni cometernu ti pecadu grave (Mat. 5:21, 22, 28, 29). Pa racaláʼdxinu gusiéchenu Bixhózenu ni nuu guibáʼ la? nagueendaca naquiiñeʼ cueenu de ndaaniʼ íquenu intiica cosa malu.

14. ¿Xi rusihuinni ca diidxa’ ni rininu, ne gunáʼ nga ca pregunta ni naquiiñeʼ guiníʼ íquenu?

¹⁴ Guyuu cuidadu né ni riniʼluʼ. Jesús guní’: «Intiica cosa guiree de ruaa binni la? zeeda ni de ndaaniʼ ladxidóʼ» (Mat. 15:18). Ni rininu rusihuinni ni xi nuu ndaaniʼ ladxidoʼno. Guníʼ ique ndiʼ: «¿Ñee siempre rinieeʼ ni dxandíʼ neca nannaʼ zapaʼ guendanagana la? Pa maʼ bichaganaʼyaʼ, ¿ñee rapaʼ cuidadu cadi guneʼ coquetearniá’ sti binni la? ¿Ñee qué riniee’ o qué rucaadiaga’ diidxaʼ inmoral la? ¿Ñee ricabe’ né diidxaʼ nadóʼ ora chuʼ tu guchiichi naa la?». Gulee tiempu para guiníʼ íqueluʼ ca pregunta riʼ. Ca diidxaʼ ni rininu zeeda gácacani casi ca botón stiʼ ti lari, pa guindádinu ca botón ca la? jma nagueenda zabeenu lari ca ládinu. Nga runi pa gúninu stipa cadi guininu mal de binni, cadi gusiguiinu ne cadi guininu  diidxaʼ inmoral, jma nagueenda zusaananu modo gúcanu dxiqué. Casi ñaca nibeenu ti lari yooxhoʼ ládinu.

15. ¿Xi caquiiñeʼ gúninu para ganda gucaʼnu modo gúcanu dxiqué lu ti yaga?

¹⁵ Gucáʼnanu ca cosa malu. Biquiiñeʼ apóstol Pablo ti ejemplu para gacané laanu guiénenu pabiaʼ risaca guchaʼnu modo laanu. Laabe guniʼbe naquiiñeʼ gucaʼnu’ modo gúcanu dxiqué lu ti yaga (Rom. 6:6). Guyuu Jesús dispuestu gucaacabe laa lu ti yaga purti’ racala’dxi’ gusiecheʼ Jehová. Zacaca nga laanu pa racaláʼdxinu gusiéchenu Dios, naquiiñeʼ chuʼnu dispuestu gusaana de gúninu xiixa cosa malu ne costumbre ni nanalaʼdxiʼ Dios. Pa gúninu nga, zápanu ti conciencia nayá ne zápanu esperanza de guibáninu sin qué chuʼ dxi gátinu (Juan 17:3 ; 1 Ped. 3:21). Cadi guiaandaʼ laanu qué zuchaa di’ Jehová ca ley stiʼ para si gusiecheʼ laanu, sínuque laanu nga naquiiñeʼ guchaʼnu ne chinándanu ca ley stibe (Is. 1:16-18; 55:9).

16. ¿Xiñee cadi naquiiñeʼ gusaana de gudxiilunu ca deseu malu stinu?

¹⁶ Bidxiilú ca deseu malu ni nápaluʼ. Neca maʼ guyuunísaluʼ, bi’ni’ stipa gusaanalu’ ca cosa malu ni ñuulá’dxilu’ ñúniluʼ. Guzéʼtenu experiencia stiʼ Mauricio, dxi nácabe joven gúcabe muxe’. Gudiʼdiʼ si tiempu binibiaʼbe ca testigu stiʼ Jehová ne bizulú biʼniʼ estudiarbe Biblia, bichaabe modo nabánibe ne guyuunísabe lu iza 2002. Neca maʼ stale iza ziné Mauricio de cayuni ni ná Jehová. Sicaríʼ guni’be: «Runerua’ stipa para gudxieeluáʼ ca deseu malu stinneʼ». Peru qué rudiibe lugar cueeni gana laabe, purti’ sicaríʼ guni’be: «Riecheʼ ora riníʼ iqueʼ riechené Jehová naa ora qué rune’ ni ná ca deseu malu stinneʼ». *

17. ¿Xi rusiidiʼ ni bizaaca Nabiha lii?

¹⁷ Gunabaʼ Jehová gacané lii né espíritu santu stiʼ ne cadi guiníʼ íqueluʼ stúbisiouʼ zanda gúniluʼ ni (Gál. 5:22; Filip. 4:6). Para gusaananu ca cosa ni bíninu dxiqué ne maʼ cadi gúnirunu ni, naquiiñeʼ gúninu stale stipa. Guzéʼtenu ni bizaaca ti gunaa lá Nabiha. Bisaana bixhózebe laabe dxi nápabe xhoopaʼ iza. Sicaríʼ guniʼbe: «Guizáʼ bininá  ngue naa». Ne ra maʼ ziniisibe gúcabe ti binni ni guizáʼ naduxhuʼ. Bitoobe droga, gunaazecabe laabe ne biseguyoocabe laabe stale iza ndaaniʼ cárcel. Yeganna caadxi Testigu laabe ndaaniʼ cárcel ne bizulú bidiica’ estudiu laabe. Bizulú bichaabe modo nabánibe. Sicarí’ guní’ Nabiha: «Nuu viciu nagueendaca bisaanaʼ laa. […] Peru ni guca nagana para naa nga gusaanaʼ de cuba’ gueza». Jma de ti iza bí’nibe stipa gusaanabe viciu que dede ra bisaanabe ni. ¿Xi gucané laabe ya’? Laabe guni’be: «Ni gucané naa nga guizáʼ bineʼ orar Jehová para gunda bisaanaʼ viciu que». Ne guníʼrube: «Nannaʼ pa gunda bichaaʼ xcaadxi laaca zanda gúnini». *

18. Casi ná 1 Corintios 6:9-11, ¿xi huayuni stale siervu stiʼ Dios?

¹⁸ Lu primé siglu que, gulí Jehová caadxi hombre ne gunaa para guni mandarnecaʼ Cristu guibáʼ, peru ante gácacaʼ xpinni Cristu la? bí’nica’ cosa ni cadi jneza. Caadxi de laacaʼ gúpacaʼ jnadxiicaʼ, gúcacaʼ muxeʼ ne gúcacaʼ gubaanaʼ. Peru pur gucané espíritu santu laacabe gunda bichaacabe (biindaʼ 1 Corintios 6:9-11). Tiempu riʼ laaca huayacané Biblia millón de binni guchaa. * Ma’ bisaanacabe costumbre malu ni bíʼnicabe dxiqué. Ejemplu stícabe rusiidiʼ ni lii zanda guchaaluʼ ne gusaanalu’ ca cosa malu ni bí’nilu’ dxiqué ti zacá guchalu’ ca requisitu para chu’nísalu’.

19. ¿Xi zadúʼyanu lu sti artículo ca?

¹⁹ Cadi caquiiñeʼ si gusaana tuuxa modo bibani dxiqué para chúʼnisa, sínuque laaca naquiiñeʼ guibani modo rusiidiʼ Dios. Lu sti artículo ca zadúʼyanu ximodo zanda gúninu ni ne ximodo zanda gacané xcaadxi laanu.