¿Xiñee guníʼ Fulano «zaniti» herencia stiʼ pa guichaganáʼ Rut? (Rut 4:1, 6).

Dxiqué pa qué ñapa ti hombre xiiñiʼ ne gueeda gati la? rucaani tobi guiníʼ ique: ¿Xi zazaaca né layú stibe yaʼ? ¿Ñee zaniti lá familia stibe la? Lu Ley stiʼ Moisés ruzeeteʼ xi rizaaca.

Pa gueeda gati ti hombre o gueeda gutoo layú stiʼ purtiʼ qué gapa bueltu la? biʼchiʼ o ti familia stiʼ zanda siʼ layú ca. Ne zacá maʼ qué zadiʼdiʼ layú ca lu náʼ sti familia (Lev. 25:23-28; Núm. 27:8-11).

¿Xi raca para cadi guiniti lá familia stiʼ hombre ni guti ca yaʼ? Cumu xheelabe biaana viuda la? richaganáʼ bíʼchibe gunaa riʼ para gápacaʼ ti xiiñicaʼ ni guni heredar layú que ne zaqué qué riniti lá hombre que. Pabiáʼ nachaʼhuiʼ Dios ra gudixhe Ley de guendaxheelaʼ de cuñadu o levirato, purtiʼ racané ni para cadi guiaana viuda que lu gubidxa (Deut. 25:5-7; Mat. 22:23-28). Ne tiempu stiʼ Rut costumbre riʼ nga yenándacabe.

Yanna, guiníʼ íquenu ni bizaacaʼ Noemí. Bichaganabe Elimélec peru beeda gati xheelabe ne ca xiiñibe ne maʼ qué ñuu nin ti hombre ñapa laabe (Rut 1:1-5). Dxi bibiguetaʼ Noemí Judá gúdxibe Rut, xuaalídxibe, guinabaʼ tobi de ca familia gaxha stiʼ Elimélec ni láʼ Boaz, siʼ ca layú stícabe (Rut 2:1, 19, 20; 3:1-4). Peru nanna Boaz nuu ti familia jma gaxha ne ni jma napa derechu que laa (Rut 3:9, 12, 13). Ne familia jma gaxha ca riétebe lu Biblia casi Fulano.

Primé guníʼ Fulano zazíʼ ca layú que (Rut 4:1-4). Neca nánnabe zunítibe bueltu peru laaca nánnabe maʼ huaniisi Noemí para gapa ti xiiñiʼ ni guicaa herencia stiʼ Elimélec. Zeeda gaca ca layú ca herencia stiʼ Fulano. Ngue runi ruluíʼ galán sibe ca ni.

Peru maʼ qué niná Fulano nizíʼ ca layú que ra bidii cuenta zachaganáʼ Rut. Ne guníʼ: «Qué zanda diʼ sieʼ ni purtiʼ pa guneʼ ni zaniti herencia stinneʼ» (Rut 4:5, 6). Yanna, ¿xiñee maʼ qué ninabe yaʼ?

Pa Fulano o tutiica familia gaxha guichaganáʼ Rut ne gueeda gapa Rut ti xiiñiʼ la? maʼ xiiñibe nga guiaanané ca layú stiʼ Elimélec. Yanna, ¿ximodo nga «zaniti» herencia stiʼ Fulano yaʼ? Qué ruzeeteʼ diʼ Biblia de laani peru guidúʼyanu ni ñándaca nizaaca.

• Primé, zándaca guníʼ ique Fulano zuniti si bueltu purtiʼ ziaanané xiiñiʼ Rut ca layú stiʼ Elimélec.

• Guiropa, maʼ laabe nga gápabe Noemí ne Rut.

• Guionna, pa ñapa Rut ne Fulano jma xiiñicaʼ, zalaa herencia que lu ca xiiñiʼ Rut ne ca xiiñibe.

• Guidapa, pa caʼruʼ gapa Fulano xiiñiʼ la? xiiñibe ni ñapanebe Rut ñaanané ca layú stibe ne ca layú stiʼ Elimélec. Ne zaqué ziaana ca layú stibe lu náʼ ti xiiñibe ni ziné lá Elimélec. Qué ninabe ñacanebe Noemí purtiʼ zaniti herencia stibe. Ne bisaanabe ni lu náʼ Boaz, purtiʼ laa nga sti binni ni napa derechu para siʼ ca layú que. Ne guná Boaz siʼ ca layú que, ¿xiñee yaʼ? Laa guníʼ: «Para cadi guixá lá hombre riʼ lu herencia stiʼ» (Rut 4:10).

Rihuínnica, ni jma risaca para Fulano nga herencia stiʼ ne cadi guiniti lá. ¡Pa ñanda si qué nuniti hombre riʼ nin ti degaayuʼ! Neca bíʼnibe ndiʼ para cadi guixá labe la? laaca si qué gánnanu tu labe ne binítibe ti ndaayaʼ ni gucuaa Boaz: zeeda lá lu lista ra riete lá ca bixhozebiidaʼ Mesías, Jesucristu. ¡Biaa pabiáʼ triste ndiʼ! Pur qué niná Fulano ñacané binni biniti ti privilegiu guizáʼ risaca (Mat. 1:5; Luc. 3:23, 32).