ARTÍCULO DE ESTUDIU 10
¿Xiñee caquiiñeʼ chuʼnísaluʼ?
«Chúʼnisa cada tobi de laatu» (HECH. 2:38).
CANCIÓN 34 Qué lica zucheeniáʼ lii
NI ZAZÍʼDINU a
1, 2. a) ¿Xi rizaaca ora riuunisa tuuxa? b) ¿Xi zadúʼyanu lu artículo riʼ?
¿ÑEE huayuuyaluʼ ca ni chichuunisa la? Né stale gana ricábicabe ca pregunta ni runi hermanu ni cudii discursu que. Nabé nayecheʼ riuu familia stícabe ne ca xhamígucabe. Guizáʼ nayecheʼ riuucabe despué de guireecabe ndaaniʼ nisa ne rigapanáʼ ca ni cayuuyaʼ laacabe. Riuunisa stale mil binni cada semana. Ne zacá rudiicaʼ xquendanabánicaʼ Jehová ne reeda gácacaʼ Testigu stibe.
2 Pa ca íqueluʼ chuʼnísaluʼ la? rusihuínniluʼ cuyúbiluʼ Jehová ne reeda gácaluʼ casi ti biaaniʼ lu guidxilayú cahui riʼ (Sal. 14:1, 2). Pa nahuiiniluʼ o maʼ huaniisiluʼ gucuá artículo riʼ para lii. Raríʼ zadxélaluʼ chonna razón ni zacané lii gúniluʼ ni ná Jehová. Ne pa maʼ guyuʼnísanu la? zacané artículo riʼ lii cadi gusaanaluʼ de gúniluʼ ni ná Dios stinu para siempre.
GUNNAXHII NI DXANDÍʼ NE BIʼNIʼ NI JNEZA
Maʼ raca stale mil de iza cayuni biidiʼ Binidxabaʼ lá Jehová. (Biiyaʼ párrafo 3 ne 4).
3. Laanu, ca xpinni Jehová, ¿xiñee nadxiinu ni dxandíʼ ne riuuláʼdxinu gúninu ni jneza? (Salmo 119:128, 163).
3 Bidii Jehová mandatu riʼ ca xpinni: lagannaxhii ni dxandíʼ (Zac. 8:19). Ne guníʼ Jesús risaca guyúbinu gaca ni jneza (Mat. 5:6). Ndiʼ riníʼ caquiiñeʼ guiale de laanu gúninu ni jneza ne ni nayá nezalú Dios. Cumu nadxiiluʼ ni dxandíʼ ne riuuláʼdxiluʼ gúniluʼ ni jneza la? nanaláʼdxiluʼ guendarusiguii ne cosa malu (biindaʼ Salmo 119:128, 163). Rusihuinni ca binni ni rusiguii nácacaʼ casi Binidxabaʼ, ni cayuni gobernar guidxilayú riʼ (Juan 8:44; 12:31). Racalaʼdxiʼ Binidxabaʼ guni biidiʼ lá Jehová. Bizulube guniʼbe ni cadi dxandíʼ de Dios dede dxi bicaalube laa ndaaniʼ jardín de Edén que, casi xa ñaca niniʼbe qué ganna Jehová guni mandar, ruyubi puru si para laa, rusiguii ne qué rudii binni cosa ni galán (Gén. 3:1, 4, 5). Pur guendarusiguii stiʼ Binidxabaʼ, stale binni riníʼ ique mal de Jehová. Ora qué rannaxhii binni ni dxandíʼ la? rucaa Binidxabaʼ laacaʼ gúnicaʼ cosa ni cadi jneza ne cosa malu (Rom. 1:25-31).
4. ¿Ximodo maʼ bisihuinni Jehová laa nga «Dios ni riníʼ ni dxandíʼ»? (Biiyaʼ imagen ca).
4 Jehová nga «Dios ni riníʼ ni dxandíʼ» ne rusiidibe ni dxandíʼ guiráʼ ca ni nadxii laabe (Sal. 31:5). Racanebe laacaʼ cadi guni crecaʼ ca guendarusiguii stiʼ Binidxabaʼ. Rusiidiʼ Jehová ca xpinni gúnicaʼ ni jneza ne cadi gusiguiicaʼ, rusisácabe laacaʼ ne riguixhedxibe ladxidoʼcaʼ (Prov. 13:5, 6). ¿Cadi dxandíʼ runi sentirluʼ zacá ora cayuundanécabe lii Biblia la? Maʼ biziidiluʼ neza si stiʼ Jehová nga jma galán para lii ne para binni guidxilayú (Sal. 77:13). Nga runi, racaláʼdxiluʼ guibániluʼ modo ná ca ley stiʼ Jehová (Mat. 6:33). Ne laaca racaláʼdxiluʼ guni defenderluʼ ni rusiidiʼ Biblia ne gusihuínniluʼ cadi dxandíʼ guiráʼ ni maʼ guníʼ Binidxabaʼ de Dios. ¿Ximodo zanda gúniluʼ ni yaʼ?
5. ¿Xi zúniluʼ para gusihuínniluʼ runi defenderluʼ ni dxandíʼ ne ni jneza?
5 Para gusihuínniluʼ rucaanaluʼ ca guendarusiguii stiʼ Binidxabaʼ, runi defenderluʼ ni dxandíʼ, racaláʼdxiluʼ guni mandar Dios lii ne gúniluʼ ni ná ca ley stibe la? caquiiñeʼ guni prometerluʼ Jehová lu ti oración qué ziuu dxi gusaanaluʼ de gúniluʼ ni ná. Despué caquiiñeʼ chuʼnísaluʼ para guluiʼluʼ nezalú guiráʼ binni maʼ bidiiluʼ xquendanabániluʼ Dios. Ra gannaxhiiluʼ ni dxandíʼ ne gúniluʼ ni jneza zucaani lii chuʼnísaluʼ.
GUNNAXHII JESUCRISTU
6. Casi ná Salmo 45:4, ¿gunáʼ nga ca razón nápanu para gannaxhiinu Jesucristu?
6 ¿Xiñee nadxiiluʼ Jesucristu? Lu Salmo 45:4 (biindaʼ ni) ridxélanu caadxi razón. Nadxii Jesús ni dxandíʼ ne ni jneza ne rusiidiʼ laanu gácanu humilde. Pa nadxiiluʼ ni dxandíʼ ne ni jneza la? laaca nadxiiluʼ Jesús. Né stale valor bisihuinni Jesús nadxii ni dxandíʼ ne ni jneza (Juan 18:37). Peru ¿ximodo rusiidiʼ Jesús laanu gácanu humilde yaʼ?
7. ¿Xi jma riuuláʼdxiluʼ de modo bisihuinni Jesús naca humilde?
7 Rusiidiʼ guiráʼ ni guníʼ ne ni biʼniʼ Jesús laanu gácanu humilde. Guca Jesús humilde ra bisisaca Bixhoze ne qué nuyubi nusisácacabe laa (Mar. 10:17, 18; Juan 5:19). Bisihuinni Jesús humilde laa, ¿xi rusiidiʼ ni laanu? ¿Ñee rucaa nga lii gannaxhiiluʼ Xiiñiʼ Dios ne chinándaluʼ ejemplu stiʼ la? Yanna, ¿xiñee naca Jesús humilde yaʼ? Purtiʼ naca Bixhózebe humilde, nadxiibe Jehová ne nácabe casi laa (Sal. 18:35; Heb. 1:3). ¿Cadi dxandíʼ rucaa nga lii gannaxhiiluʼ Jesús la?
8. ¿Xiñee riuuláʼdxinu naca Jesús Rey stinu?
8 Nadxiinu Jesús purtiʼ naca Rey stinu ne gastiʼ stobi casi laa. Jehová peʼ bisiidiʼ laabe ne gulí laabe para gácabe Rey (Is. 50:4, 5). Laaca zanda guiníʼ íquenu pabiáʼ gunnaxhii Jesús laanu (Juan 13:1). Cumu naca Jesús Rey stinu la? caquiiñeʼ gannaxhiinu laabe. Bisiene Jesús ca ni dxandíʼ xhamigu la? zusihuínnicaʼ rusisácacaʼ ni dxandíʼ ne zinándacaʼ ca mandamientu stibe (Juan 14:15; 15:14, 15). ¡Ti privilegiu guizáʼ naroʼbaʼ nga gaca xhamígunu Xiiñiʼ Jehová!
9. ¿Xiñee zanda guchaaganu dxi guyuunisa Jesús ne ora riuunisa ca xpinni?
9 Tobi de ca mandamientu bidii Jesús nga chúʼnisa ca xpinni (Mat. 28:19, 20). Ne laapebe gudíxhebe ejemplu ca. Neca maʼ gadxé ni gucaʼ para chúʼnisa Jesús ne maʼ gadxé ni raca para chúʼnisa ca discípulo stibe la? nuu ra zanda guchaaganu guiropaʼ ni (biiyaʼ cuadru ni láʼ « Maʼ gadxé ni gucaʼ para chúʼnisa Jesús ne maʼ gadxé ni raca para chúʼnisa ca discípulo stiʼ»). Dxi guyuunisa Jesús bisihuinni maʼ gudixhe ique guni ni ná Bixhoze (Heb. 10:7). Zaqueca ora riuunisa ca xpínnibe, rusihuínnicaʼ nezalú binni maʼ biidicaʼ laacaʼ Jehová ne maʼ gudixhe íquecaʼ chinándacaʼ ejemplu stibe ra gúnicaʼ ni ná Dios lu xquendanabánicaʼ.
10. ¿Xi razón nápaluʼ para gannaxhiiluʼ Jesús ne xi zucaa guendarannaxhii ca lii gúniluʼ?
10 Maʼ runi creluʼ Jesús nga tobi lucha xiiñiʼ Jehová ne maʼ gulí Dios laabe para gácabe Rey ne guni mandarbe laanu. Maʼ nánnaluʼ naca Jesús humilde ne ruluiʼbe laanu modo naca Bixhózebe. Maʼ biziidiluʼ biyaanabe ca ni candaana, gudixhedxibe ladxidóʼ ca ni cayacaná ne dede bisiándabe ca ni huará (Mat. 14:14-21). Ne maʼ biiyaluʼ laabe nga cayuni dirigirbe congregación ra nuu ca xpínnibe tiempu riʼ (Mat. 23:10). Ne laaca nánnaluʼ zúnibe stale cosa galán huidxe si, purtiʼ laabe nga Rey stiʼ Reinu stiʼ Dios. ¿Ximodo zanda gusihuínniluʼ nadxiiluʼ laabe yaʼ? Ra chinándaluʼ ejemplu stibe (Juan 14:21). Nga runi, tobi de ca cosa ni caquiiñeʼ gúniluʼ nga gudiiluʼ xquendanabániluʼ Jehová ne chuʼnísaluʼ.
GUNNAXHII JEHOVÁ
11. ¿Gunáʼ nga razón jma risaca para chuʼnísaluʼ ne xiñee?
11 ¿Gunáʼ nga razón jma risaca para chuʼnísaluʼ? Bizeeteʼ Jesús ni ora guníʼ gunáʼ nga mandamientu ni jma risaca. Laabe guniʼbe: «Gunnaxhii Jehová Dios stiluʼ de guidubi ladxidoʼloʼ, guidubi xhiálmaluʼ, guidubi xquendabiaaniluʼ ne guiráʼ stipa stiluʼ» (Mar. 12:30). ¿Ñee zacá runi sentirluʼ nadxiiluʼ Dios la?
Ti regalu ni cudii Jehová lii nga guiráʼ cosa ni nápaluʼ yanna ne ni guicaaluʼ despué. (Biiyaʼ párrafo 12 ne 13).
12. ¿Xiñee nadxiiluʼ Jehová? (Biiyaʼ ca imagen ca).
12 Nuu stale razón para gannaxhiiluʼ Jehová. Maʼ biziidiluʼ ra nuube nga «cadá guendanabani» ne rudiibe laanu «guiráʼ regalu sicarú ne guiráʼ cosa nachaʼhuiʼ» (Sal. 36:9; Sant. 1:17). Guiráʼ ca cosa ni nápaluʼ zeeda ca ni de Jehová, purtiʼ laa rudii de ni napa ne guizáʼ nadxii laanu.
13. ¿Xii nga ni jma risaca bisigaʼdeʼ Jehová laanu?
13 Ti cosa nabé risaca nga: bidiibe lugar gatiʼ Xiiñibe. ¿Xiñee risaca ni yaʼ? Guiníʼ íquenu pabiáʼ nadxiisaa Jehová ne Xiiñiʼ. Jesús guníʼ: «Nadxii Bixhozeʼ naa» ne «Nadxieeʼ Bixhozeʼ» (Juan 10:17; 14:31). Biroobaʼ guendarannaxhii stícabe ra guyuucabe juntu stale millón de iza (Prov. 8:22, 23, 30). Yanna, guníʼ ique pabiáʼ biuubaʼ ladxidóʼ Jehová ra bidii lugar gucaná Xiiñiʼ ne biiticabe laa. Cumu guizáʼ nadxii Jehová binni la? bidii Xiiñiʼ ni jma nadxii beeda gatiʼ pur laanu ti zacá ganda guibáninu sin qué chuʼ dxi gátinu (Juan 3:16; Gál. 2:20). ¿Cadi dxandíʼ rucaa nga lii gannaxhiiluʼ Dios la?
14. ¿Gunáʼ nga decisión jma galán ni zanda guicaaluʼ?
14 Ra jma ziziidiluʼ de Jehová jma ziroobaʼ guendarannaxhii ni nápaluʼ laa. Zanda guidxíñaluʼ jma gaxha de Jehová ne gaca xhamíguluʼ laa yanna ne para siempre. Zanda gusiécheluʼ ladxidóʼ Jehová pur ni gúniluʼ ne ni guiniʼluʼ. Jehová peʼ canabaʼ ni lii né stale cariñu (Prov. 23:15, 16). Né ni gúniluʼ zusihuínniluʼ pa dxandíʼ nadxiiluʼ Jehová (1 Juan 5:3). Decisión jma galán ni zanda guicaaluʼ lu xquendanabániluʼ nga gúniluʼ ni ná Jehová.
15. ¿Ximodo zanda gusihuínniluʼ nadxiiluʼ Jehová?
15 ¿Ximodo zanda gusihuínniluʼ nadxiiluʼ Jehová? Primé, caquiiñeʼ gudiiluʼ xquendanabániluʼ tobi lucha Dios ni dxandíʼ lu ti oración ra gábiluʼ laa qué ziuu dxi gusaanaluʼ de gúniluʼ ni ná (Sal. 40:8). Despué, caquiiñeʼ chuʼnísaluʼ para gusihuínniluʼ nezalú binni maʼ bidiiluʼ xquendanabániluʼ Dios. Casi maʼ biete lu artículo riʼ ziécheluʼ ora chuʼnísaluʼ, naca ni ti dxi nabé risaca, purtiʼ dede dxi ca maʼ nabániluʼ para gúniluʼ ni ná Jehová (Rom. 14:8; 1 Ped. 4:1, 2). Zándaca guiníʼ íqueluʼ: «pa chuaanisaʼ zuchaa xquendanabaneʼ», ne zacá ni, purtiʼ zabániluʼ jma galán. Guidúʼyanu xiñee.
16. Casi ná Salmo 41:12, ¿xi zudii Jehová ca ni gudii xquendanabani laa ne guni ni ná?
16 Naca Jehová binni ni jma rudii de ni napa. Biaʼ tiica gudiiluʼ laabe, laabe zudiibe lii jma que ni bidiiluʼ (Mar. 10:29, 30). Ne neca nabániluʼ lu Guidxilayú malu riʼ, zacanebe lii guibániluʼ galán ne nayecheʼ. Despué de chuʼnísaluʼ cadi gudiiluʼ lugar chuʼ ni gucueeza lii de gúniluʼ ni ná Jehová. Zanda guni servirluʼ Bixhózeluʼ ni nuu guibáʼ para siempre. Zaroobaʼ guendarannaxhii ni nápaluʼ Jehová ne zabániluʼ para siempre cásica laabe (biindaʼ Salmo 41:12).
17. ¿Xi zanda gusigáʼdeluʼ Jehová?
17 Jehová nga bidii lii guiráʼ cosa galán ni nápaluʼ ne zanda gusigáʼdeluʼ ni bizáʼ guibáʼ ne Guidxilayú riʼ xiixa ni qué gapa, ¿xii ni yaʼ? Laani nga: cadi guixéleluʼ de laa ne gúniluʼ ni ná. Ora rudiiluʼ lii Jehová ne riuunísaluʼ, rápaluʼ privilegiu gudiiluʼ Bixhózeluʼ ni nuu guibáʼ xiixa nabé risaca (Job 1:8; 41:11; Prov. 27:11). Gástiruʼ sti cosa jma galán ni zanda gúniluʼ lu xquendanabániluʼ. Guendarannaxhii ni nápaluʼ Jehová nga ni zucaa lii chuʼnísaluʼ.
¿ÑEE MAʼ NUULUʼ LISTU PARA CHUʼNÍSALUʼ LA?
18. ¿Gunáʼ nga ca pregunta ni zanda guiníʼ íqueluʼ?
18 Pur ca ni maʼ bizíʼdinu, ¿ñee ziuunísaluʼ la? Lii si zanda guicábiluʼ ni. Ni zanda gacané lii nga guiníʼ íqueluʼ ndiʼ: «¿Ñee maʼ nuaaʼ listu para chuaanisaʼ la?» (Hech. 8:36). Lu artículo riʼ maʼ bidúʼyanu chonna cosa ni zacané lii chuʼnísaluʼ. Primé, gunnaxhii ni dxandíʼ ne biʼniʼ ni jneza. Guníʼ ique ndiʼ: «¿Ñee racalaʼdxeʼ guedandá dxi guiníʼ binni ni dxandíʼ ne guni ni jneza la?». Guiropa, gunnaxhii Jesucristu. Guníʼ ique ndiʼ: «¿Ñee racalaʼdxeʼ gaca Xiiñiʼ Dios Rey stinneʼ ne chinandaʼ ejemplu stibe la?». Ne, guionna ne ni jma risaca, gunnaxhii Jehová. Guníʼ ique ndiʼ: «¿Ñee racalaʼdxeʼ guneʼ ni ná Jehová ne gusiecheʼ ladxidóʼ la?». Pa bicábiluʼ racaláʼdxiluʼ lu guionnaʼ pregunta ca la? ¿xiñee que chuʼnísaluʼ yaʼ? ¿Xi cucueeza lii gúniluʼ ni yaʼ? (Hech. 16:33).
19. ¿Xiñee cadi naquiiñeʼ gunítiluʼ tiempu para chuʼnísaluʼ? Bizeeteʼ ti ejemplu (Juan 4:34).
19 Pa caʼruʼ guicaaluʼ decisión de chuʼnísaluʼ, guníʼ ique ejemplu ni guníʼ Jesús (biindaʼ Juan 4:34). Guníʼ Jesús guendaró stiʼ nga guni ni ná Bixhoze. ¿Xiñee guniʼbe zacá yaʼ? Purtiʼ racané guendaró laanu. Nanna Jesús guiráʼ ni rinabaʼ Jehová laanu zacanécani laanu. Ne qué rinabaʼ Jehová laanu gúninu xiixa ni guniná laanu. Ni racalaʼdxiʼ Dios nga chuʼnísaluʼ (Hech. 2:38). Nga runi, zanda chuʼluʼ seguru zieni lii galán ra gúniluʼ ni ná mandamientu riʼ. Cásica qué runítiluʼ tiempu para guiníʼ íqueluʼ pa zoloʼ ti guendaró guizáʼ nanixe la? laaca cadi naquiiñeʼ gunítiluʼ tiempu para chuʼnísaluʼ.
20. ¿Xi zadúʼyanu lu sti artículo ca?
20 ¿Xi rucueeza binni para cadi chúʼnisa? Zándaca riníʼ íquecabe cadi nuucabe listu para gúnicabe ni. Decisión ni jma risaca ni caquiiñeʼ guicaaluʼ nga gudiiluʼ lii Jehová ne chuʼnísaluʼ. Nga runi, galán guiníʼ ique chaahuiluʼ, cadi gaca lúguluʼ ne gúniluʼ stipa para chuʼluʼ listu. Yanna, pa racaláʼdxiluʼ chuʼnísaluʼ, ¿xi zacané lii chuʼluʼ listu para gúniluʼ ni yaʼ? Lu sti artículo ca zadúʼyanu ni.
CANCIÓN 28 Ximodo gaca xhamígunu Jiobá
a Nabé risaca chúʼnisa ca binni ni cayuni estudiar Biblia. ¿Xi zucaa laacabe gúnicabe ni yaʼ? Lu artículo riʼ zadúʼyanu chonna cosa ni zucaa laacabe chuʼnísacabe. Laaca zadúʼyanu ximodo reeda guchaa xquendanabani ti binni ora maʼ guyuunisa.
