1, 2. ¿Xi naquiiñeʼ guni tuuxa ante chúʼnisa?

 LU GAAYUʼ iza ni maʼ gudiʼdiʼ riʼ, maʼ guyuunisa jma de ti millón de binni ne yanna maʼ nácacaʼ testigu stiʼ Jehová. Stale tu laa dede dxi nahuiiniʼ biziidiʼ ni dxandíʼ, casi discípulo Timoteo (2 Tim. 3:​14, 15). Xcaadxi la? binibiaʼcaʼ Jehová dxi maʼ huaniisicaʼ o dxi maʼ nagólacaʼ. Casi ti gunaa ni cayuundané ca testigu stiʼ Jehová Biblia guyuunisa dxi napa 97 iza.

² Pa cayuundaluʼ Biblia o pa naca bixhózeluʼ ne jñaaluʼ testigu stiʼ Jehová ne cusiidicaʼ lii ni dxandíʼ, ¿ñee caníʼ íqueluʼ chuʼnísaluʼ la? ¡Galán pa zacá ni! Peru nuu ti cosa ni naquiiñeʼ gúniluʼ ante chuʼnísaluʼ: naquiiñeʼ gaca dedicarluʼ o gudiiluʼ xquendanabániluʼ Jehová. Zusiene artículo riʼ laanu xi riníʼ gaca dedicar tuuxa. Laaca zadúʼyanu xiñee cadi naquiiñeʼ guidxíbiluʼ gaca dedicarluʼ ne chuʼnísaluʼ pa maʼ nuuluʼ listu para gúniluʼ ni.

¿XI RINÍʼ GACA DEDICAR TUUXA?

3. Bizeeteʼ caadxi binni ni guca dedicar Dios tiempu que.

³ Lu Biblia, ora riete gaca dedicar tuuxa riniʼni maʼ bireechú tuuxa para guni xiixa risaca, ni caninu nga maʼ bireechube para gúnibe xhiiñaʼ Dios. Guca guidxi Israel ti guidxi ni maʼ guca dedicar Jehová. Peru guyuu caadxi israelita gadxé peʼ modo guca dedicarcaʼ Jehová. Tobi de laacabe nga Aarón, gulí Jehová laabe para gácabe sumo sacerdote. Ngue runi delante de turbante stibe cá ti placa  de oro ni ruzaaniʼ, nga riníʼ maʼ guca dedicarbe Jehová (Lev. 8:9). Laaca gadxé peʼ modo guca dedicar ca nazareu que Jehová. Zeeda diidxaʼ nazareu de diidxaʼ hebreu nazír, ni riníʼ «maʼ bireechú» o maʼ guca dedicar. Ne lu Ley stiʼ Moisés riete nuu caadxi cosa ni cadi naquiiñeʼ gúnicabe (Núm. 6:​2-8).

4. a) Para laanu, ¿xi riníʼ gaca dedicarnu Jehová? b) ¿Xi riníʼ cadi guibani tuuxa para laa? (Biiyaʼ dibuju ca).

⁴ Para laanu, ¿xi riníʼ gaca dedicarnu Jehová? Riniʼni gácanu discípulo stiʼ Jesús ne gúninu ni ná Jehová primé lu xquendanabáninu. ¿Ximodo nga yaʼ? Jesús peʼ guníʼ: «Pa nuu tu racalaʼdxiʼ gaca xpinneʼ la? cadi guibani para laa» (Mat. 16:24). Diidxaʼ griegu ni guca traducir «cadi guibani para laa» laaca zanda gaca traducir ni sicaríʼ «cadi guni ni riuulaʼdxiʼ». Ora gaca dedicarluʼ Jehová, napa xidé gucaa naluʼ guiráʼ ni qué riuuláʼdxibe (2 Cor. 5:​14, 15). Ne lade ca ni zeeda «ca deseu stiʼ xcuerpu binni», casi inmoralidad sexual (Gál. 5:​19-21; 1 Cor. 6:18). ¿Ñee nagana ni la? Coʼ, qué zaca diʼ ni nagana pa nadxiiluʼ Jehová ne pa nuuluʼ seguru jneza ca norma stibe ne zacané ca ni lii (Sal. 119:97; Is. 48:​17, 18). Sicaríʼ guníʼ ti hermanu láʼ Nicholas: «Zándaca guchaagaluʼ ca norma stiʼ Jehová casi ora niguucabe lii ndaaniʼ cárcel, purtiʼ raca qué zanda gúniluʼ ni racaláʼdxiluʼ, o zándaca guchaagaluʼ ca ni ca reja ni nuu ndaaniʼ ti zoológico, ni rapa lii para cadi guiaaxha ca lión luguialuʼ».

5. a) ¿Ximodo nga gaca dedicar tuuxa Jehová? b) ¿Xiñee maʼ gadxé nga gaca dedicar tuuxa Jehová que chúʼnisa? (Biiyaʼ ca imagen ca).

⁵ ¿Ximodo nga raca dedicar tuuxa Jehová yaʼ? Rúnibe ti oración ne runi prometerbe Jehová zuni adorarbe laasi ne ni jma zasaca para laabe nga gúnibe ni ná. Ni riníʼ ca diidxaʼ riʼ nga  runi prometerbe Jehová qué zusaana de gannaxhiibe laa de guidubi ladxidoʼbe, guidubi xhiálmabe, guidubi xquendabiaanibe ne guiráʼ stipa stibe (Mar. 12:30). Ora raca didicarluʼ Jehová rudiiluʼ xquendanabániluʼ laa ne rábiluʼ ni laabe lu ti oración. Ne ora riuunisaluʼ rusihuínniluʼ nezalú guiráʼ binni maʼ bidiiluʼ xquendanabániluʼ Dios. Guizáʼ risaca voto ni rúniluʼ ora rudiiluʼ xquendanabániluʼ Jehová. Nga runi rúniluʼ stipa para guni cumplirluʼ ni ne zaqueca ribeza Jehová gúniluʼ ni (Ecl. 5:​4, 5).

¿XI ZUCAA LII GACA DEDICARLUʼ JEHOVÁ?

6. ¿Xi rucaa tuuxa gaca dedicar Jehová?

⁶ Razón ni jma risaca nápaluʼ para gaca dedicarluʼ Jehová nga purtiʼ nadxiiluʼ laa. Cadi málasi gunnaxhiiluʼ Jehová, sínuque chaahuiʼ chaahuiʼ gunnaxhiiluʼ laabe ra ziziidiluʼ de laabe ne ra ziyene chaahuiluʼ jma de laabe ne ni naguixhe íquebe gúnibe (Col. 1:9). Ra biʼniʼ estudiarluʼ Stiidxaʼ Dios gunna dxíchiluʼ, primé, naca Jehová ti Dios nabani, guiropa, biquiiñebe espíritu stibe para gucuá Biblia ne guionna, riquiiñebe organización stibe para gúnibe ni racaláʼdxibe.

7. ¿Xi caquiiñeʼ ganna tuuxa pa racalaʼdxiʼ gaca dedicar Jehová?

⁷ Pa racalaʼdxiʼ tuuxa gaca dedicar Jehová, naquiiñeʼ gánnabe ca cosa ni cadi nagana zeeda lu Biblia, guibánibe casi ná ca norma stiʼ Dios ne guiníʼnebe xcaadxi de ni runi crebe ora ganda gúnibe ni (Mat. 28:​19, 20). Laaca nabé nadxiibe Jehová ne racaláʼdxibe guni adorarbe laasi de guidubi ladxidoʼbe. ¿Ñee  ngueca runi sentirluʼ la? Pa nadxiiluʼ Jehová né guiráʼ stipa stiluʼ, qué zaníʼ íqueluʼ gaca dedicarluʼ Jehová ne chuʼnísaluʼ para si gusiécheluʼ binni ni rudii estudiu lii. Ne pa joven lii, qué zúniluʼ ni para si gusiécheluʼ bixhózeluʼ ne jñaaluʼ o purtiʼ si cayuunisa ca xhamíguluʼ.

8. Ra gudiiluʼ xquixe peʼ Dios, ¿ximodo zacané ni lii gudiiluʼ laa xquendanabániluʼ? (Salmo 116:​12-14).

⁸ Pa guiníʼ íqueluʼ guiráʼ ni maʼ biʼniʼ Jehová pur lii, zacané ni lii gudiiluʼ xquixe peʼ laabe ne zúniluʼ ni ra gudiiluʼ xquendanabániluʼ laabe (biindaʼ Salmo 116:​12-14). Biblia ná «guiráʼ regalu sicarú ne guiráʼ cosa nachaʼhuiʼ» zeeda ca ni de Jehová (Sant. 1:17). Regalu jma risaca ni maʼ bidiibe laanu nga: bidiibe lugar gatiʼ Jesús, Xiiñibe, pur laanu. Pur regalu guizáʼ sicarú riʼ, zanda gaca xhamíguluʼ Dios ne guibániluʼ para siempre (1 Juan 4:​9, 10, 19). Ti modo zanda gudiiluʼ xquixe peʼ pur guendarannaxhii ne guiráʼ ni maʼ biʼniʼ Dios pur lii nga gudiiluʼ xquendanabániluʼ laabe (Deut. 16:17; 2 Cor. 5:15). Ne nga peʼ nga ruzeeteʼ libru ¡Zanda guibániluʼ nayecheʼ!, lu lección 46, punto 4, luni zeeda ti videu de chonna minutu ni láʼ Xi zanda gusigáʼdenu Dios.

¿ÑEE MAʼ NUULUʼ LISTU PARA GACA DEDICARLUʼ DIOS NE CHUʼNÍSALUʼ LA?

9. ¿Xiñee cadi galán gaca lugu tuuxa para gaca dedicar Jehová?

⁹ Zándaca guni sentirluʼ cadi nuuluʼ listu para gaca dedicarluʼ Dios ne chuʼnísaluʼ. Zándaca caquiiñeʼ guchaaluʼ xiixa lu xquendanabániluʼ para ganda guzuubaluʼ stiidxaʼ Jehová o caquiiñeluʼ jma tiempu para guquídxiluʼ fe stiluʼ (Col. 2:​6, 7). Cadi guianda lii, nuu estudiante jma nagueenda runi progresar que xcaadxi. Ne nuu joven jma nagueenda rudii xquendanabani Jehová ne riuunisa que xcaadxi. Nga runi, galán nga gúʼyaluʼ pabiáʼ maʼ biʼniʼ progresarluʼ ne cadi guchaagaluʼ lii né xcaadxi (Gál. 6:​4, 5).

10. ¿Xi zanda gúniluʼ pa cayuni sentirluʼ cadi nuuluʼ listu para gudiiluʼ xquendanabániluʼ Jehová ne chuʼnísaluʼ? (Biiyaʼ cuadru ni láʼ « Pa Testigu bixhózeluʼ ne jñaaluʼ»).

¹⁰ Pa runi sentirluʼ cadi nuuluʼ listu para gudiiluʼ xquendanabániluʼ Jehová, cadi guireeluʼ gana ne biʼniʼ stipa ugaandaluʼ meta ca. Gunabaʼ gacané Jehová lii para ganda guchaaluʼ ni caquiiñeʼ guchaaluʼ (Filip. 2:13; 3:16). Gunna dxichi zucaadiaga ne zucabi Jehová ca oración stiluʼ (1 Juan 5:14).

XIÑEE NUU TU LAA QUÉ RINÁ GA GACA DEDICAR JEHOVÁ NE CHÚʼNISA

11. ¿Xi zuni Jehová para gacané laanu gácanu fiel?

¹¹ Nuu tu laa maʼ nuu listu para gaca dedicar Jehová ne chúʼnisa, peru qué rinacaʼ gúnicaʼ ni. Zándaca ridxíbicabe guni cometércabe ti pecadu grave ne gaca expulsárcabe. Peru Biblia ná zudii Jehová guiráʼ ni caquiiñeʼ ca xpinni para guibánicaʼ casi nabani ca binni ni runi xhiiñabe (Col. 1:10). Nga runi zanda chuʼluʼ seguru zudii Jehová lii stipa ni caquiiñeluʼ para ganda gúniluʼ ni jneza, purtiʼ maca huayacanebe xcaadxi guni ni (1 Cor. 10:13). Ne pur razón ca huaxiéʼ si tu raca expulsar ndaaniʼ xquidxi Dios. Zanda gácanu fiel purtiʼ racané Jehová laanu.

12. ¿Xi zacané laanu cadi gúninu ti pecadu grave?

¹² Cumu nácanu binni ruchee la? ruquiinde laanu gúninu cosa malu (Sant. 1:14). Peru ora guidxaagaluluʼ ti tentación, maʼ lu naluʼ riaana pa ziábaluʼ luni o pa coʼ. Nuu binni riníʼ ique qué zanda  gucueeza ca deseu ni ruquiinde laa guni cosa malu, peru cadi dxandíʼ ni. Zanda guizíʼdinu gucueezanu ni runi sentirnu ne ni rúninu. Ne nuu stale cosa ni zanda gacané laanu: guni orarnu Jehová guiráʼ dxi, gápanu ti programa de estudiu personal, chuunu reunión ne guni predicarnu. Pa qué gusaana de gúninu ca cosa riʼ, zápanu stipa para guni cumplirnu voto ni bíninu ra bidiʼnu xquendanabáninu Jehová. Qué chuʼ dxi guiaandaʼ lii cadi stúbinu nuunu cayacané Jehová laanu (Gál. 5:16).

13. ¿Xi rusiidiʼ ejemplu stiʼ José laanu?

¹³ Qué zaca nagana para laanu chuʼnu gaxha de Jehová pa dede ante guiníʼ íquenu xi gúninu ora guidxaagalunu ti tentación. Lu Biblia ridxélanu ejemplu stiʼ caadxi binni ni biʼniʼ zacá, ne laaca gúcacabe binni ruchee casi laanu. Tobi de laacabe nga José. Nabé guziñe xheelaʼ Potifar laabe para gatanebe laa. Peru maca nánnabe xi gúnibe pa guizaaca ngue. Lu Biblia riete «qué ninabe» ne gúdxibe gunaa que: «¿Ximodo ndiʼ guneʼ guendaquéiquiiñeʼ riʼ ne gucheeniáʼ Dios yaʼ?» (Gén. 39:​8-10). Ndiʼ rusiidiʼ laanu maca nanna José xi guni dede ante gabi xheelaʼ Potifar laa gatané laa. Nga runi, ora bidxaagalube tentación que, qué ñaca nagana para laabe nucaanabe ni.

14. ¿Xi zacané lii gucaanaluʼ ca cosa ni nanalaʼdxiʼ Jehová?

¹⁴ ¿Ximodo zanda chinándanu ejemplu stiʼ José ne quixhe íquenu cadi guixélenu de Jehová yaʼ? Galán dede ca yanna guiníʼ íquenu xi gúninu ora guidxaagalunu ti tentación. Naquiiñeʼ guizíʼdinu gucáʼnanu guiráʼ ni nanalaʼdxiʼ Jehová, ne galán gúninu ni nagueendaca sin gunítinu tiempu (Sal. 97:10; 119:165). Nga zacané laanu cadi gúninu ti pecadu grave. Ne ora guidxaagalunu ti tentación, dxandíʼ peʼ zánnanu xi gúninu.

15. ¿Ximodo zanda gusihuínniluʼ nácaluʼ tobi de ca ni cuyubi Jehová né stale gana? (Hebreos 11:6).

¹⁵ Zándaca maʼ biziidiluʼ ni dxandíʼ ne racaláʼdxiluʼ gúniluʼ ni ná Jehová de guidubi ladxidoʼloʼ. Peru ¿ñee nuu xiixa ni cucueeza lii para cadi gudiiluʼ xquendanabániluʼ Jehová ne chuʼnísaluʼ la? Pa zacá ni, zanda gúniluʼ ni biʼniʼ rey David ne gábiluʼ Jehová ca diidxaʼ riʼ: «Biiyaʼ  chaahuiʼ guidubi nacaʼ Dios, ne binibiáʼ ladxiduáʼ. Biiyaʼ ni nuu dentru de naa ne biiyaʼ xi cuchiiñaʼ xquendabiaaneʼ. Biiyaʼ pa cayuneʼ xiixa ni cadi jneza, ne yené naa lu neza ni qué zaluxe» (Sal. 139:​23, 24). Ra gúniluʼ stipa gudiiluʼ xquendanabániluʼ Jehová ne chuʼnísaluʼ, cusihuínniluʼ né stale gana cuyúbiluʼ Jehová. Ne lu Biblia peʼ riete riguube ndaayaʼ ca ni runi zacá (biindaʼ Hebreos 11:6).

BIYUBI CHUʼLUʼ JMA GAXHA DE JEHOVÁ

16, 17. ¿Ximodo ruchiña Jehová xiiñiʼ ca Testigu ndaaniʼ congregación? (Juan 6:44).

¹⁶ Jesús guníʼ Jehová nga ruchiña binni ndaaniʼ xquidxi (biindaʼ Juan 6:44). ¿Ñee huaníʼ íqueluʼ xiñee nabé galán ca diidxaʼ ca la? Ruuyaʼ Jehová xiixa nabé galán de cada binni ni ruchiña ndaaniʼ xquidxi. Para laabe nabé risaca cada tobi de ca xpínnibe (Deut. 7:6). Ne laaca zaqueca ruuyabe lii.

¹⁷ Joven, pa cusiidiʼ bixhózeluʼ ne jñaaluʼ lii ni dxandíʼ, zándaca guni sentirluʼ nuuluʼ ndaaniʼ congregación purtiʼ si rinécabe lii, ne cadi purtiʼ Jehová bichiña lii ra nuu. Peru biiyaʼ xi ruzeeteʼ Biblia: «Laguidxiña ra nuu Dios ne laa zadxiña laatu» (Sant. 4:8; 1 Crón. 28:9). Nga runi pa guyúbiluʼ guidxíñaluʼ gaxha de laabe, laabe laaca zadxíñabe gaxha de lii. Cadi nácaluʼ parte de ti montón de binni. Guiráʼ binni ni nuu ndaaniʼ ti congregación nuucabe raca purtiʼ Jehová nga bichiña laacabe tobi pur tobi. Ne ládecabe nuu ca xiiñiʼ ca testigu stiʼ Jehová. Ora ruyubi tuuxa guidxiña gaxha de Jehová laaca ridxíñabe laa casi riete lu Santiago 4:8 (bichaaga ni né 2 Tesalonicenses 2:13).

18. ¿Xi zazíʼdinu lu stiʼ artículo ca? (Salmo 40:8).

¹⁸ Dxi guyuunisa Jesús, de guidubi ladxidóʼ gudixhe ique guni guiráʼ ni guinabaʼ Bixhoze laa guni (biindaʼ Salmo 40:8; Heb. 10:7). Ora gudiiluʼ xquendanabániluʼ Jehová ne chuʼnísaluʼ zusihuínniluʼ zinándaluʼ ejemplu stiʼ Jesús. Zacané stiʼ artículo ca lii para cadi gusaana de gúniluʼ ni ná Jehová despué de maʼ guyuunísaluʼ.