1. ¿Gunáʼ nga caadxi de ca ndaayaʼ ni ricaanu pur nuunu ndaaniʼ organización stiʼ Jehová?

 PABIÁʼ galán nga nuunu ndaaniʼ organización stiʼ Jehová. Neca jma maʼ nagana nabáninu lu ca últimu dxi riʼ, rudiʼnu xquixe peʼ Jehová purtiʼ nápanu ti familia espiritual ni nuu tobi si (Sal. 133:1). Pur ni rusiidiʼ Dios laanu zanda guibaninenu familia stinu nayecheʼ (Efes. 5:​33–6:1). Laaca rusiidibe laanu xi naquiiñeʼ gúninu para gudxíʼlunu ni runi sentirnu ne chuʼnu nayecheʼ.

2. ¿Xi caquiiñeʼ gúninu, ne xiñee?

² Neca zacá, para cadi gusaana de gúninu xhiiñaʼ Jehová, caquiiñeʼ gúninu ti stipa naroʼbaʼ. ¿Xiñee yaʼ? Purtiʼ zanda guniná ni guiníʼ o ni guni xcaadxi laanu. Laaca zanda guireʼnu gana ora gueeda gucheʼnu, jmaruʼ si ora laaca ngueca ni gusaba laanu stale biaje. Zacané artículo riʼ laanu para cadi gusaana de gúninu ni ná Jehová: primé, ora guniná ti hermanu laanu, guiropa, ora guni xheelanu xiixa ni cadi cabézanu, ne guionna, ora guireʼnu gana pur bíninu xiixa ni cadi jneza. Lu cada tobi de ca puntu riʼ zazíʼdinu ejemplu stiʼ ti binni ni riete lu Biblia.

ORA GUNINÁ TI HERMANU LAANU

3. ¿Xi guendanagana ridxaagalú ca xpinni Jehová?

³ Guendanagana. Ni dxandíʼ nga ziuu hermanu ni zuni cosa ni zuchiichi laanu. Nuu tu laa zuni cosa ni cadi cabézanu o huaxiéʼ galán modo guni tratarcaʼ laanu. Ne nuu biaje laaca ruchee ca ancianu ca. Zanda gucaa ca ni bizéʼtenu riʼ tuuxa guiníʼ ique pa ndiʼ nga organización stiʼ Dios. Lugar de guninécabe ca hermanu xhiiñaʼ Jehová tobi si la? zándaca gusaana de guiniʼnécabe ca ni bichiichi laacabe o dede gusaana de chécabe reunión (Sof. 3:9). ¿Ñee jneza  nga la? Guidúʼyanu xi zanda guizíʼdinu de ejemplu stiʼ ti binni ni riete lu Biblia ni gupa ca tipu guendanagana riʼ.

4. ¿Xi guendanagana bidxaagalú apóstol Pablo?

⁴ Ejemplu stiʼ ti binni ni riete lu Biblia. Nanna apóstol Pablo binni ruchee ca hermanu stiʼ. Dxi bizulú guyebe congregación de Jerusalén, stale tu bidxibi ne qué ñapa confianza laabe (Hech. 9:26). Laaca guyuu tu guníʼ mal de laabe neza déchebe (2 Cor. 10:10). Despué biiyaʼ Pablo ti hermanu ni gucuaa ti decisión ni cadi jneza, ni zándaca nucaa xcaadxi xpinni Cristu nuchee (Gál. 2:​11, 12). Laaca qué ñuuláʼdxibe ni biʼniʼ Marcos, tobi de ca compañeru stibe (Hech. 15:​37, 38). Ñanda niníʼ ique Pablo napa stale razón para maʼ cadi guidxaaga ca hermanu ni bininá laa. Peru qué nudiibe lugar nuxheleʼ ngue laabe de Jehová, sínuque bíʼnibe xhiiñaʼ né stale gana ne qué nidxiichinebe ca hermanu que. ¿Xi gucané laabe gúnibe ni yaʼ?

5. ¿Xi gucané Pablo cadi guixeleʼ de ca hermanu stiʼ? (Colosenses 3:​13, 14; biiyaʼ dibuju ca).

⁵ Cumu nabé nadxii Pablo ca hermanu que la? biiyabe ca cualidad galán ni nápacaʼ ne cadi ra cucheecaʼ. Laaca gucané guendarannaxhii ca laabe guni perdonarbe laacaʼ, ne nga peʼ nga ni bizeetebe lu Colosenses 3:​13, 14 (biindaʼ ni). Guidúʼyanu ximodo biʼniʼ chaahuiʼ Pablo guendanagana ni gupané Marcos. Neca bisaana Marcos laabe lu primé viaje ni bíʼnibe casi misioneru, qué nidxiichinebe laa. Despué, né stale guendarannaxhii bicaabe ti carta ra nuu congregación ni nuu Colosas, raqué bizeetebe nabé risaca Marcos ne nabé riguixhedxí ladxidoʼbe (Col. 4:​10, 11). Ne dxi maʼ nuube cárcel ndaaniʼ guidxi Roma, gunábabe chigacané Marcos laabe (2 Tim. 4:11). Biʼniʼ perdonar Pablo ca hermanu stiʼ ne guyuube gaxha de laacaʼ. ¿Xi rusiidiʼ ndiʼ laanu yaʼ?

6, 7. ¿Xi zacané laanu gusihuínninu nadxiinu ca hermanu stinu neca nácanu binni ruchee? (1 Juan 4:7).

⁶ Ni rizíʼdinu. Racalaʼdxiʼ Jehová gusihuínninu nadxiinu ca hermanu ne ca hermana stinu (biindaʼ 1 Juan 4:7). Pa guni tratar tuuxa hermanu laanu mal, cadi guiníʼ íquenu bíʼnibe ni para guninabe laanu, sínuque guiníʼ íquenu cayúnibe stipa gúnibe ni jneza (Prov. 12:18). Nadxii Jehová laanu neca nácanu binni ruchee. Qué rusaanabe laanu stúbinu ora rucheʼnu ne qué ridaabe xiana (Sal. 103:9). Nabé risaca nga chinándanu  ejemplu stiʼ Bixhózenu ni nuu guibáʼ ne guni perdonarnu xcaadxi (Efes. 4:​32–5:1).

⁷ Ne cadi guiaandaʼ laanu, cumu maʼ gaxha nuu fin stiʼ guidxilayú riʼ la? caquiiñeʼ chuʼnu tobi si né ca hermanu stinu. Nánnanu jma zazanándacabe laanu ne zándaca dede zaguucabe laanu cárcel. Óraca nga jma zaquíʼñenu gacané ca hermanu stinu laanu (Prov. 17:17). Zacá ga nga ni bizaaca ti ancianu de España láʼ Josep. a Guluucabe laabe ne xcaadxi hermanu ndaaniʼ cárcel pur gúcacabe neutral. Laabe guniʼbe: «Cumu ti lugar si nuu guiradu la? nagueenda zanda guchiichi sti hermanu laadu, nga runi caquiiñeʼ guni huantarsaadu ne guni perdonardu de guidubi ladxidoʼdo. Ngue gucané laadu chuʼdu tobi si ne gápasaadu laadu de ca ni cadi naca Testigu ni nuu ndaaniʼ cárcel que. Rietenaladxeʼ ti biaje gucaná nayaʼ ne guluucabe ni yesu. Cumu qué zanda guneʼ caadxi cosa stubeʼ la? gucané ti hermanu naa, gudiibibe xhabaʼ ne gúpabe naa. Bineʼ sentir dxandíʼ nadxiicabe naa, gucanécabe naa ora peʼ caquiiñeʼ ni». ¡Ndiʼ rusiidiʼ laanu pabiáʼ risaca nga guni chaahuinu ca guendanagana ni gapanenu ca hermanu stinu!

ORA RUNI XHEELANU XIIXA NI CADI CABÉZANU

8. ¿Xi guendanagana ridxaagalú ca guendaxheelaʼ ca?

⁸ Guendanagana. Maca cá lu Biblia guiráʼ ca guendaxheelaʼ ca «zápacaʼ problema lu xquendanabánicaʼ» (1 Cor. 7:28). ¿Xiñee yaʼ? Purtiʼ binni ruchee guirópacabe. Laaca gadxé gadxé modo nácacabe ne gadxé gadxé ni riuuláʼdxicabe. Zándaca de gadxé guidxi laacabe ne gadxé modo biniisicabe. Zándaca gúʼyacabe xiixa de xheelacabe ni qué ñuuyacabe dxi nácacabe novio. Ne pur ca ni bizéʼtenu riʼ zándaca gápacabe guendanagana lu xquendaxheelacabe. Lugar de guiníʼ íquecabe guirópacabe nga bicheecabe ne ñúnicabe dxiiñaʼ tobi si para ñuni chaahuicabe ca guendanagana ca, zándaca ugaanisaacabe donda íquecabe o guiníʼ íquecabe ni jma galán nga gusabixheelacabe o gaca divorciárcabe. Peru ¿nga nga ni jma jneza la? b Guidúʼyanu ejemplu stiʼ ti binni ni riete lu Biblia ni qué niree gana neca gupa stale guendanagana lu xquendaxheelaʼ.

9. ¿Xi guendanagana bidxaagalú Abigaíl?

⁹ Ejemplu stiʼ ti binni ni riete lu Biblia. Bichaganáʼ Abigaíl Nabal, ne lu Biblia riete naduxhuʼ hombre riʼ ne runi cosa malu (1 Sam. 25:3). Xi que nagana guibaniné tuuxa clase binni ca yaʼ. Ti biaje bilá nixiá xquendaxheelaʼ Abigaíl. Ti dxi, David, hombre ni chigaca rey stiʼ guidxi Israel, gucalaʼdxiʼ ñuuti Nabal, purtiʼ guluu dí Nabal laabe ne ca xpínnibe (1 Sam. 25:​9-13). Ñanda nuxooñeʼ Abigaíl ne nudii lugar ñuuti David xheelabe. Peru qué ñúnibe nga, sínuque bicueezabe David para cadi guuti Nabal (1 Sam. 25:​23-27). ¿Xi bicaa laabe gúnibe nga yaʼ?

10. ¿Xi gucané Abigaíl cadi guiree gana neca gupa stale guendanagana lu xquendaxheelaʼ?

¹⁰ Nabé gunnaxhii Abigaíl Jehová, ne para laabe nabé risaca modo ruuyaʼ Jehová guendaxheelaʼ. Zándaca nánnabe ni gudxi Jehová Adán ne Eva dxi bicheelaʼ  laacabe (Gén. 2:24). Gunna dxichi Abigaíl nabé risaca guendaxheelaʼ nezalú Dios. Ne cumu riuuláʼdxibe gúnibe ni ná Dios la? ngue bicaa laabe gulabe xheelabe ne familia stibe. Para cadi guuti David Nabal, nagueendaca biyubi Abigaíl guni xiixa ne yenabaʼ perdón neca cadi laa bichee. Nánnanu nabé nadxii Jehová gunaa riʼ purtiʼ guca nadxibalú ne gucané xcaadxi. ¿Xi zanda guiziidiʼ ca gunaa ne ca hombre ni maʼ bichaganáʼ de ejemplu stiʼ Abigaíl yaʼ? Guidúʼyanu ni.

11. a) ¿Xi racalaʼdxiʼ Jehová guni ca ni maʼ bichaganáʼ? (Efesios 5:33). b) ¿Xi rusiidiʼ ejemplu stiʼ Carmen lii? (Biiyaʼ ca imagen ca).

¹¹ Ni rizíʼdinu. Racalaʼdxiʼ Jehová gusisaca ca ni maʼ bichaganáʼ xquendaxheelacaʼ, neca nabé feu xpiaʼ xheelacaʼ. Riecheʼ Dios ora guʼyaʼ runi ca guendaxheelaʼ ca stipa para guni chaahuicaʼ ca guendanagana sticaʼ, gannaxhiicaʼ ne guni respetársaacaʼ (biindaʼ Efesios 5:33). Guidúʼyanu ni bizaaca Carmen. Maʼ zinebe xhoopaʼ iza de bichaganabe dxi bizulú biʼniʼ estudiarné ca Testigu laabe ne guyuunísabe. Laabe guniʼbe: «Qué ñuulaʼdxiʼ xheelaʼ decisión ni gucuaaʼ. Ridxiichibe purtiʼ puru de Jehová maʼ canieeʼ, riguudibe naa ne riniʼbe zusaanabe naa». Neca zacá, qué niree Carmen gana. Biʼniʼ tratarbe xheelabe né guendarannaxhii ne respetu, ne biaʼsi 50 iza bíʼnibe zacá. Laaca bizeetebe: «Ra gudiʼdiʼ tiempu biziideʼ guieneʼ xheelaʼ ne guinieniáʼ laa né cariñu. Nannaʼ nabé rusisaca Jehová guendaxheelaʼ. Ngue runi bineʼ guiráʼ ni nuu lu nayaʼ para cadi guixiá xquendaxheeladu. Guendarannaxhii ni napaʼ Jehová nga ni gucané naa guneʼ huantar». c Pa gápaluʼ guendanagana lu xquendaxheelaluʼ, gunna dxichi zacané Jehová lii guni huantarluʼ ne cadi guireeluʼ gana.

ORA GUIREʼNU GANA PUR BÍNINU XIIXA NI CADI JNEZA

12. ¿Xi zándaca guni sentirnu pa guni cometernu ti pecadu grave?

¹² Guendanagana. Zándaca guiníʼ íquenu maʼ qué gápanu remediu pa gúninu ti pecadu grave. Lu Biblia riete zanda gucaa ca pecadu ca laanu gápanu «ti ladxidóʼ ni maʼ gucadé ne ni nuu naná» (Sal. 51:17). Nga peʼ nga ni bizaaca Robert, ti hermanu ni biʼniʼ stale stipa para guca siervu ministerial. Biʼniʼ cometerbe ti pecadu grave ne bidiibe cuenta bidxiidéchebe Jehová. Laabe guniʼbe: «Nabé bichiiñaʼ xquendabiaaneʼ naa, ne bineʼ sentir casi ora ñaba  ti tonelada ladriu luguiaʼyaʼ. Bibixhiladxeʼ ni bineʼ que, bizuluáʼ cayuunaʼ ne bineʼ orar Jehová. Rietenalaʼdxeʼ guníʼ iqueʼ maʼ qué zucaadiaga Dios ca oración stinneʼ. Ne guníʼ iqueʼ zaqué purtiʼ nannaʼ bicheeniaʼ laabe». Pa guni cometernu ti pecadu grave, zacadé ladxidoʼno ne zándaca gucaa nga laanu guiníʼ íquenu maʼ bisaana Jehová laanu ne maʼ xi para gúninu ni nabe (Sal. 38:4). ¿Ñee huayuni sentirluʼ zacá la? Pa zacá ni, zacané ejemplu stiʼ ti xpinni Jehová lii. Laabe la? qué nixélebe de Jehová neca biʼniʼ cometerbe ti pecadu grave.

13. ¿Xi pecadu grave biʼniʼ Pedro, ne xiñee biábabe lu pecadu ca?

¹³ Ejemplu stiʼ ti binni ni riete lu Biblia. Gueelaʼ ante guuticabe Jesús, stale biaje guníʼ ne biʼniʼ apóstol Pedro caadxi cosa ni cadi jneza ne pur ngue bíʼnibe ti pecadu jma naroʼbaʼ. Primé la? né stale confianza guniʼbe qué zaxélebe de Jesús neca xcaadxi apóstol que guni ni (Mar. 14:​27-29). Ne despué, ndaaniʼ jardín de Getsemaní, gucuá bacaandaʼ laabe chupa chonna biaje (Mar. 14:​32, 37-41). Despué, ora gunaazecabe Jesús, bisaanabe laa (Mar. 14:50). Ne últimu la? chonna biaje guníʼ Pedro qué runibiáʼ laabe, dede biʼniʼ jurar ni (Mar. 14:​66-71). ¿Xi biʼniʼ Pedro ora bidii cuenta biʼniʼ ti pecadu grave yaʼ? Guizáʼ biuubaʼ ladxidoʼbe pur ni bíʼnibe que dede biinabe (Mar. 14:72). ¿Ñee riníʼ íqueluʼ ximodo biʼniʼ sentirbe ora bíʼyabe cá xhamígube lu yaga que la? Nanna pabiáʼ feu ni biʼniʼ sentirbe yaʼ.

14. ¿Xi gucané Pedro cadi guixeleʼ de Jehová? (Biiyaʼ dibuju ni).

¹⁴ Qué niree Pedro gana ne qué nixeleʼ de Jehová. ¿Xi gucané laabe yaʼ? Qué nixélebe de xcaadxi, sínuque biyúbibe chuʼbe gaxha de ca hermanu stibe, ne laacaʼ gudixhedxicaʼ ladxidoʼbe (Luc. 24:33). Ne biasa si Jesús de lade gueʼtuʼ, bihuinni nezalú Pedro, zándaca para uguu gana laabe (Luc. 24:34; 1 Cor. 15:5). Ne lugar de ñábibe Pedro cadi jneza ni biʼniʼ la? laga bidiibe laa xcaadxi dxiiñaʼ jma risaca (Juan 21:​15-17). Qué niree Pedro gana neca nanna biʼniʼ ti pecadu grave. ¿Xiñee yaʼ? Purtiʼ nánnabe nadxiiruʼ Jesús laabe ne zacaneruʼ ca hermanu stibe laabe. Guidúʼyanu xi rusiidiʼ ejemplu stibe laanu.

15. ¿Xi racalaʼdxiʼ Jehová gánnanu? (Salmo 86:5; Romanos 8:​38, 39; biiyaʼ imagen ca).

¹⁵ Ni rizíʼdinu. Racalaʼdxiʼ Jehová gánnanu nadxii laanu ne racalaʼdxiʼ guni perdonar laanu (biindaʼ Salmo 86:5; Romanos  8:​38, 39). Ora rucheʼnu, normal nga guni sentirnu nápanu donda ne galán nga guni sentirnu zacá. Peru qué chuʼ dxi guiníʼ íquenu maʼ cadi nadxii Jehová laanu ne qué ziuu dxi guni perdonar laanu. Ni jma galán nga guyúbinu gacanécabe laanu nagueendaca. Sicaríʼ guníʼ Robert, hermanu ni bizéʼtenu lu párrafo 12 que: «Biabaʼ lu pecadu purtiʼ guníʼ iqueʼ stubeʼ siaʼ zanda gudxieeluáʼ tentación que». Bidii Robert cuenta caquiiñeʼ guiniʼné ca ancianu. Sicaríʼ guniʼbe: «Ora gunieniáʼ laacabe, gucanécabe naa gudieeʼ cuenta nadxiiruʼ Jehová naa. Qué niníʼ ique ca ancianu maʼ qué gapaʼ remediu, sínuque gucanécabe naa guuyaʼ caʼruʼ gusaana Jehová naa». Cásica Robert, zanda chuʼnu seguru guizáʼ nadxii Jehová laanu ne runi perdonar laanu pa gaca arrepentirnu de ca pecadu ni bíninu, pa guyúbinu gacanécabe laanu ne pa gúninu stipa cadi guiábanu lu ngueca pecadu (1 Juan 1:​8, 9). Ra guiníʼ íquenu nadxiiruʼ Jehová laanu, nga zacané laanu cadi guireʼnu gana neca guirenda ñeenu o guiábanu lu xiixa pecadu.

16. ¿Xiñee racaláʼdxiluʼ gúniluʼ ni ná Jehová sin guireeluʼ gana?

¹⁶ Rusisaca Jehová guiráʼ stipa ni rúninu para gúninu ni ná lu ca últimu dxi nagana riʼ. Racanebe laanu cadi guireʼnu gana ne cadi guixélenu de laabe neca guizaaca cosa ni cadi cabézanu. Zanda gannaxhiinu ca hermanu stinu ne guni perdonarnu laacaʼ ora guninacaʼ laanu. Zanda gusihuínninu nadxiinu Jehová ne runi respetarnu guendaxheelaʼ ora gúninu stipa guni chaahuinu ca guendanagana ni gapanenu xheelanu. Ne pa gúninu ti pecadu grave la? zanda guyúbinu gacané Jehová laanu, gudiʼnu lugar gannaxhiibe ne guni perdonarbe laanu, ne cadi gusaana de gúninu ni nabe. «Nga runi, cadi guireʼnu gana de gúninu ni jneza», purtiʼ nánnanu nabé zaguu Jehová ndaayaʼ laanu (Gál. 6:9).