1, 2. a) ¿Padxí, paraa ne xi pur bicaa Pablo Carta para ca xpinni Cristu de Éfeso? b) ¿Xi chupa pregunta chiguicábinu lu artículo riʼ?

 LAGA deguyoo Pablo ndaaniʼ ti yoo guidxi Roma, biyubi modo cuʼ gana ca hermanu. Peru cumu qué zanda chigánnabe laacaʼ la? bicaabe caadxi carta para laacaʼ. Tobi de laacani nga ni biseendabe ra nuu ca xpinni Cristu de Éfeso lu iza 60 o 61 (Efes. 1:1; 4:1).

² Ma raca biaʼ chii iza de guyé Pablo ndaaniʼ guidxi Éfeso para biʼniʼ predicar ne bisiidiʼ binni de ca noticia galán (Hech. 19:​1, 8-10; 20:​20, 21). Nabé nadxiibe ca hermanu stibe ne nuube gacanebe laacaʼ para cadi guixélecaʼ de Jehová. Yanna, ¿xiñee bicaabe ra nuu ca xpinni Cristu ungidu para guiniʼbe de biaaniʼ ne de guelacahui? ¿Ne xi zanda guizíʼdinu de ca conseju ni bidiibe laacaʼ yaʼ? Lu artículo riʼ zacábinu guiropaʼ pregunta ca.

BIREECABE DE LU GUELACAHUI PARA GUYUUCABE RA NUU BIAANIʼ

3. ¿Xi ejemplu bizeeteʼ Pablo lu Efesios capítulo 5?

³ Pablo gudxi ca xpinni Cristu de Éfeso: «Guyuu ti tiempu gúcatu casi guelacahui, peru yanna maʼ nácatu casi biaaniʼ» (Efes. 5:8). Biquiiñebe biaaniʼ ne guelacahui para gusiénebe ca xpinni Cristu de Éfeso modo bichaacaʼ. Primé la? guidúʼyanu xiñee gúdxibe laacaʼ «guyuu ti tiempu gúcatu casi guelacahui».

4. ¿Xiñee zanda guininu guyuu ca binni de Éfeso lu guelacahui stiʼ religión ni qué rusiidiʼ ni dxandíʼ?

⁴ Guyuucabe lu guelacahui stiʼ religión ni qué rusiidiʼ ni  dxandíʼ. Ante guiziidiʼ ca binni de Éfeso ni dxandíʼ ne gácacaʼ xpinni Cristu biʼniʼ crecaʼ stale cosa ni rusiidiʼ religión ni cadi dxandíʼ ne biʼniʼ crecaʼ brujería. Ne ndaaniʼ guidxi Éfeso guyuu ti templu ni nabé runibiáʼ binni ra runi adorárcabe diosa Ártemis. Para ca dxi que la? laani nga tobi de ca templu jma risaca. Rié binni raqué para guni adorarcaʼ stale bidóʼ. Nuu stale binni runi ganarcaʼ stale bueltu lugar ca purtiʼ ruzaʼcaʼ ne rutoocaʼ templuhuiiniʼ stiʼ Ártemis (Hech. 19:​23-27). Ne nabé runibiáʼcabe ca binni que purtiʼ rúnicaʼ brujería (Hech. 19:19).

5. ¿Xiñee zanda guininu guyuu ca binni de Éfeso lu guelacahui pur bíʼnicaʼ cosa yuudxuʼ?

⁵ Guyuucabe lu guelacahui purtiʼ bíʼnicabe cosa yuudxuʼ. Nabé biʼniʼ ca binni de Éfeso cosa yuudxuʼ o pecadu sexual ne qué lica rituí lucaʼ pur ni cayúnicaʼ. Puru si de inmoralidad sexual riete lu ca obra de teatru ne ca saa ni rúnicabe (Efes. 5:3). Maʼ que ganna ca binni que «xii nga ni jneza ne ni cadi jneza», ni riníʼ ca diidxaʼ riʼ nga maʼ bisaana de guni sentírcabe yuubaʼ (Efes. 4:​17-19). Ni nuunu guininu nga maʼ qué ruchiiñaʼ xquendabiaanicabe ne riníʼ íquecabe qué zabidxi Jehová cuenta laacabe. Cumu maʼ qué ganna ca binni de Éfeso xii nga ni jneza ne ni cadi jneza la? ngue runi guníʼ Pablo «nacahui xquendabiaanicaʼ [ne] qué gápacaʼ guendanabani ni rudii Dios».

6. ¿Xiñee gudxi Pablo ca binni de Éfeso «yanna maʼ nácatu casi biaaniʼ»?

⁶ Peru biree caadxi de ca binni de Éfeso de lu guelacahui ca, ngue runi gudxi Pablo laacabe: «Yanna maʼ nácatu casi biaaniʼ purtiʼ nuunetu Señor tobi si» (Efes. 5:8). Bizulú bibánicabe casi ná Stiidxa Dios, ni zeeda gaca casi ti biaaniʼ ni cayabi laacabe pa neza sácabe (Sal. 119:105). Maʼ qué ñúnicabe ni rusiidiʼ religión ni cadi dxandíʼ ne laaca maʼ qué ñúnicabe cosa yuudxuʼ. Yenándacabe ejemplu stiʼ Dios ne bíʼnicabe stipa guni adorárcabe laa ne gúnicabe ni riuulaʼdxiʼ (Efes. 5:1).

7. ¿Xiñee zanda guchaaganu laanu ne ni bizaaca ca xpinni Cristu de Éfeso?

 ⁷ Ngueca nga ni bizaacanu ante guizíʼdinu ni dxandíʼ, guyuʼnu lu guelacahui stiʼ religión ni qué rusiidiʼ ni dxandíʼ ne zándaca bíninu cosa ni cadi jneza. Zándaca nuu de laanu biʼniʼ xiixa saa ni runi religión ni cadi dxandíʼ ne nuu tu laa zándaca biʼniʼ xiixa pecadu sexual. Peru dxi binibiaʼnu Jehová, bichaʼnu modo nabáninu ne bizíʼdinu chinándanu ca ley stibe, ni rabi laanu xii nga ni jneza ne ni cadi jneza. Ne stale modo huayacané ni laanu (Is. 48:17). Neca zacá, nuu biaje raca nagana para laanu chuʼnu zitu de guelacahui ca ne guibáninu casi nabani ca xiiñiʼ biaaniʼ o ca xpinni Dios. Guidúʼyanu xi zacané laanu gúninu ni.

GUIXÉLENU DE GUELACAHUI

8. Casi ná Efesios 5:​3-5, ¿xi naquiiñeʼ gucaanáʼ ca binni de Éfeso?

⁸ (Biindaʼ Efesios 5:​3-5). Para maʼ cadi guni ca xpinni Cristu de Éfeso cosa yuudxuʼ gupa xidé bicaanacaʼ ca cosa ni qué riuulaʼdxiʼ Jehová, zacatiʼ gunda bixélecabe de guelacahui ca. Cadi inmoralidad sexual si nga naquiiñeʼ gucaanácabe, sínuque laaca naquiiñeʼ gusaanacabe de guiníʼcabe diidxaʼ guidxa o diidxaʼ dxabaʼ. Bisietenalaʼdxiʼ Pablo laacabe naquiiñeʼ gucaanácabe ca cosa ca pa racaláʼdxicabe guicaacabe «herencia lu Reinu stiʼ Cristu ne stiʼ Dios».

9. ¿Xiñee naquiiñeʼ gucáʼnanu ca cosa yuudxuʼ o inmoral?

⁹ Laanu laaca naquiiñeʼ gápanu laanu para cadi chuʼnu «lu ca cosa qué iquiiñeʼ ni raca lu guelacahui» (Efes. 5:11). Maʼ bihuinni ora qué rusaana ti binni de guʼyaʼ, gucaadiaga o guiníʼ de cosa yuudxuʼ o de inmoralidad sexual la? jma nagueenda riaba lu pecadu (Gén. 3:6; Sant. 1:​14, 15). Ndaaniʼ ti guidxi stale Testigu bizaʼcaʼ ti grupu para guseendacaʼ mensaje. Primeru ga que la? puru de cosa espiritual riniʼcaʼ. Peru chaahuiʼ chaahuiʼ guniʼcaʼ de xcaadxi cosa ne despué puru si de sexo maʼ caniʼcaʼ. Ra gudiʼdiʼ tiempu stale de laacabe guníʼ pur ni riete lu ca mensaje que biʼniʼ cometércabe pecadu sexual.

10. ¿Xi racalaʼdxiʼ Binidxabaʼ guni? (Efesios 5:6).

¹⁰ Ti trampa ni riquiiñeʼ Binidxabaʼ nga riguite binni para cadi gudiicaʼ cuenta xii nga ni jneza ne ni cadi jneza (Is. 5:20; 2 Cor. 4:4). Nga runi, qué ridxagayaanu ora gacalaʼdxiʼ binni gucaa laanu guiníʼ íquenu cadi malu ca cosa ni ná Jehová nabiidiʼ ne inmoral (2 Ped. 2:19). Ne pur nga nuu stale película, programa de televisión ne página de internet ra rusiidicabe cosa ni qué riuulaʼdxiʼ Jehová. Racalaʼdxiʼ Binidxabaʼ guiníʼ íquenu normal guiráʼ cosa yuudxuʼ ni runi binni yanna ne modo nabánicaʼ, nuube guiníʼ íquenu galán ca ni ne qué zuniná ca ni laanu (biindaʼ Efesios 5:6).

11. Pur ni bizaaca Angela, ¿xiñee nabé risaca chinándanu conseju ni zeeda lu Efesios 5:7? (Biiyaʼ ca imagen ca).

¹¹ Racalaʼdxiʼ Binidxabaʼ guidxaaganu binni ni gucaa laanu guchéʼnenu Jehová. Nga runi, gudxi Pablo ca binni de Éfeso cadi guidxaagacaʼ ca binni ni runi cosa malu. Gúdxibe laacaʼ: «Cadi gúnitu ni rúnicabe» (Efes. 5:7). Yanna riʼ jma caquiiñeʼ gápanu laanu que ca binni de Éfeso que. ¿Xiñee yaʼ? Purtiʼ ca dxi riʼ maʼ cadi naquiiñeʼ peʼ chuʼnu gaxha de ca tipu binni ca, laaca nuucabe lu ca red social. Ti hermana de guidxi Asia ni láʼ Angela a cayabi laanu xiñee nabé peligroso ca  red social ca: «Sin gudiiluʼ cuenta chaahuiʼ chaahuiʼ zanda guchaa ca ni modo riníʼ íqueluʼ. Bedandá ti ora maʼ normal guca para naa gapaʼ xhamiguaʼ ni qué runi respetar ca principiu zeeda lu Biblia. Ne despué bizulú guníʼ iqueʼ cadi malu guneʼ ca cosa ni qué riuulaʼdxiʼ Jehová». ¡Galán nga né stale cariñu gucané ca ancianu laabe guchaabe! Laabe guniʼbe: «Yanna riʼ jma ruyubeʼ guneʼ cosa ni gacané naa chuaaʼ jma gaxha de Jehová que chuaaʼ lu ca red social ca».

12. ¿Xi caquiiñeʼ gúninu para guzúʼbanu stiidxaʼ Jehová?

¹² Neca guiníʼ binni gastiʼ naca gúninu cosa inmoral, cadi gudiʼnu lugar quítecabe laanu purtiʼ nánnanu cadi dxandíʼ ni (Efes. 4:​19, 20). Guiníʼ íquenu ndiʼ: «¿Ñee runeʼ stipa cadi guidxaagaʼ ca compañeru de scuela, de dxiiñaʼ o ca binni ni qué ruzuubaʼ stiidxaʼ Jehová la? ¿Ñee racaʼ nadxibalú ne runeʼ defender ca principiu zeeda lu Biblia neca guiníʼ binni qué runeʼ respetar laacaʼ la?». Ne casi ná 2 Timoteo 2:​20-22, laaca naquiiñeʼ gápanu cuidadu ora cuinu tu gaca xhamígunu ndaaniʼ congregación. Cadi guiaandaʼ laanu, cadi guirácabe zacanécabe laanu chuʼnu gaxha de Jehová.

GUIBÁNINU «CASI NABANI CA XIIÑIʼ BIAANIʼ»

13. ¿Xi riníʼ guibáninu «casi nabani ca xiiñiʼ biaaniʼ»? (Efesios 5:​7-9, nota).

¹³ Despué de gudxi Pablo ca xpinni Cristu de Éfeso guireecaʼ de lu guelacahui, laaca gúdxibe laacaʼ: «Laguibani casi nabani ca xiiñiʼ biaaniʼ» (biindaʼ Efesios 5:​7-9; nota). ¿Xi riníʼ nga yaʼ? Ni nabe nga ora tiica si gusihuínninu dxandíʼ nácanu xpinni Cristu. Naquiiñeʼ gúninu caadxi cosa para ganda gúninu ni. Tobi de laacani nga guidúʼndanu ne guni estudiarnu Biblia ne ca publicación stinu. Ora gúninu ni guiduʼyaʼ chaahuinu xi guiráʼ guníʼ, biʼniʼ ne bisiidiʼ Jesucristu, «biaaniʼ stiʼ guidxilayú» (Juan 8:12; Prov. 6:23).

14. ¿Ximodo zanda gacané espíritu santu laanu?

¹⁴ Laaca caquíʼñenu gacané espíritu santu stiʼ Dios laanu para guibáninu «casi nabani ca xiiñiʼ biaaniʼ». ¿Xiñee yaʼ? Purtiʼ  nagana nga chuʼnu nayá ndaaniʼ guidxilayú biidiʼ riʼ (1 Tes. 4:​3-5, 7, 8). Zanda gacané espíritu santu laanu cadi guicá modo riníʼ ique binni guidxilayú laanu, purtiʼ nánnanu cadi jneza ruuyaʼ Jehová modo riníʼ íquecabe. Ne laaca zanda gacané ni laanu «gácanu nachaʼhuiʼ, gúninu ni jneza ne guininu ni dxandíʼ» (Efes. 5:9).

15. ¿Xi caquiiñeʼ gúninu para guicaanu espíritu santu? (Efesios 5:​19, 20).

¹⁵ Jesús guníʼ zudii Jehová «espíritu santu ca ni guinabaʼ ni laa» (Luc. 11:13). Ne para ganda gudiibe ni laanu naquiiñeʼ guinábanu ni laabe lu oración. Laaca rudii Jehová laanu espíritu stiʼ ora rusisácanu laa lu ca reunión stinu (biindaʼ Efesios 5:​19, 20). Zanda gacané espíritu santu laanu guibáninu modo riuulaʼdxiʼ Dios.

16. ¿Xi zacané laanu guicaanu decisión jneza? (Efesios 5:​10, 17).

¹⁶ Ante guicaanu xiixa decisión risaca, primé naquiiñeʼ guiduʼyaʼ chaahuinu xii nga racalaʼdxiʼ Jehová gúninu, ne oracaruʼ maʼ zanda guicaanu ti decisión (biindaʼ Efesios 5:​10, 17). Ora rúninu stipa guyúbinu ca principiu ni zacané laanu guicaanu xiixa decisión, rusihuínninu nuunu gánnanu xi riníʼ ique Jehová de ni racaláʼdxinu gúninu. Pa chinándanu ca principiu ca la? zacaanu decisión jneza.

17. ¿Xi zacané laanu iquíʼñenu tiempu stinu jneza? (Efesios 5:​15, 16; biiyaʼ imagen ca).

¹⁷ Laaca gudxi Pablo ca xpinni Cristu de Éfeso iquiiñecaʼ tiempu sticaʼ jneza (biindaʼ Efesios 5:​15, 16). Guizáʼ ñuulaʼdxiʼ Binidxabaʼ ñuuyaʼ cayúninu jma pur guidxilayú riʼ dede maʼ qué ñápanu tiempu para gúninu xhiiñaʼ Dios (1 Juan 5:19). Guizáʼ nagueenda zanda guicá ndaaniʼ ique ti xpinni Cristu gapa bueltu, sáʼ scuela o gapa ti dxiiñaʼ galán que guyubi guni jma lu xhiiñaʼ Jehová. Pa guizaacanu nga, zahuinni maʼ cacá modo riníʼ  ique binni guidxilayú laanu. Cadi canídinu malu ca cosa riʼ, peru cadi laadicani nga ni jma naquiiñeʼ guisaca lu xquendanabáninu. Para guibáninu «casi nabani ca xiiñiʼ biaaniʼ» la? iquíʼñenu tiempu stinu jneza, ni caninu nga, gúninu ca cosa ni dxandíʼ risaca.

18. ¿Xi biʼniʼ Donald para biquiiñeʼ tiempu stiʼ jneza?

¹⁸ Guyúbinu gúninu jma lu xhiiñaʼ Jehová. Nga peʼ nga ni biʼniʼ Donald, ti hermanu ni nabeza Sudáfrica. Laabe guniʼbe: «Guníʼ iqueʼ modo nabaneʼ ne gunabaʼ Jehová gacané naa guneʼ jma lu xhiiñaʼ. Gunabaʼ laabe gacanebe naa guidxelaʼ ti dxiiñaʼ ni gudii lugar guneʼ predicar jma. Gucané Jehová naa guidxelaʼ dxiiñaʼ ca. Ne pur nga, naa ne xheelaʼ bizulú bínidu dxiiñaʼ lu serviciu de tiempu completu».

19. ¿Xi naquiiñeʼ gúninu para cadi gusaana de guibáninu «casi nabani ca xiiñiʼ biaaniʼ»?

¹⁹ Carta ni bicaa Pablo para ca binni de Éfeso que gucané ni laacabe para cadi guixélecabe de Jehová, ne laaca zanda gacané ni laanu ca dxi riʼ. Casi maʼ bidúʼyanu lu artículo riʼ, racané carta ca laanu cuinu entretenimientu stinu ne tu gaca xhamígunu. Laaca racané ni laanu guiduʼndaʼ chaahuinu Biblia ti zacá gudiʼnu lugar guzaaniʼ biaaniʼ ni dxandíʼ ca neza ra zizanu. Rusietenalaʼdxiʼ ni laanu pabiáʼ risaca guinábanu espíritu santu, ni racané laanu gápanu cualidad galán. Pa chinándanu ca conseju ni bidii Pablo, zanda guicaanu decisión ni gusiecheʼ Jehová. Pa gúninu guiráʼ ndiʼ qué ziuʼnu lu guelacahui stiʼ guidxilayú riʼ ne ziaananu lu biaaniʼ.