1. ¿Xii ndiʼ ni zándaca guiníʼ ique caadxi de ca xpinni Jehová?

 ¡PABIÁʼ galán nga gánnanu «cayechené Jehová xquidxi»! (Sal. 149:4). Peru zándaca chuʼ tu guiree gana ne guiníʼ: «Dxandíʼ nga riechené Jehová guiráʼ ca xpinni, peru ¿cayechenebe naa la?». Stale de ca xpinni Dios ni bibani dxiqué guca nagana para laacaʼ guni crecaʼ pa cayechené Dios laacaʼ (1 Sam. 1:​6-10; Job 29:​2, 4; Sal. 51:11).

2. ¿Tuu nga ca ni riechené Jehová?

² Biblia ruzeeteʼ zanda gusiéchenu Jehová neca nácanu binni ruchee. Peru ¿xi caquiiñeʼ gúninu yaʼ? Caquiiñeʼ gusihuínninu nápanu fe Jesucristu ne chuʼnísanu (Juan 3:16). Zacá zusihuínninu nezalú binni maʼ guca arrepentirnu de ca pecadu stinu ne racaláʼdxinu gúninu ni riuulaʼdxiʼ Jehová (Hech. 2:38; 3:19). Guizáʼ riecheʼ Jehová ora rúninu ca ni bizéʼtenu ca para gaca xhamígunu laa. Pa gúninu stipa guni cumplirnu voto ni bíninu ra bidiʼnu xquendanabáninu Dios la? ziechenebe laanu ne zaca xhamígube laanu (Sal. 25:14).

3. ¿Xi pregunta chiguicábinu lu artículo riʼ?

³ Yanna, ¿xiñee nuu tu riníʼ ique cadi cayechené Jehová laa? ¿Ximodo rusihuínnibe cayechenebe laanu? ¿Ne xi zanda gacané laanu chuʼnu seguru cayechenebe laanu yaʼ?

XIÑEE NUU TU RINÍʼ IQUE CADI CAYECHENÉ JEHOVÁ LAA

4, 5. ¿Xi ti cosa zanda chuʼnu seguru neca runi sentirnu huaxiéʼ risácanu?

⁴ Stale de laanu maca dede dxi nahuíʼninu runi sentirnu menu laanu o huaxiéʼ risácanu (Sal. 88:15). Ti hermanu láʼ Adrián guníʼ: «Maʼ xadxí nga riníʼ iqueʼ qué risacaʼ.  Qué riaandaʼ naa dxi nahuiineʼ rinabaʼ Jehová ganda chuʼ familia stinneʼ ndaaniʼ Paraísu, peru riníʼ iqueʼ naa qué runeʼ merecer chuaaʼ ndaaniʼ ni». Ndiʼ nga ni bizeeteʼ Tony de modo bisiniisi bixhoze ne jñaa laa, cadi Testigu guirópacabe: «Qué ñuu dxi niníʼcabe rusiecheʼ laacabe o nadxiicabe naa. Pur ni rúnicabe ne ni rábicabe naa bicaacabe naa guneʼ sentir qué ziuu dxi guneʼ ca cosa ca modo ribézacabe guneʼ ni».

⁵ Pa chuʼ ora guni sentirnu qué risácanu la? guietenaláʼdxinu Jehová nga bichiña laanu ndaaniʼ xquidxi (Juan 6:44). Ruuyabe ca cualidad galán ni nápanu, neca laanu qué ridúʼyanu ca ni, ne nánnabe ximodo peʼ laanu (1 Sam. 16:7; 2 Crón. 6:30). Nga runi, ora riniʼbe risácanu la? zanda guni crenu laabe (1 Juan 3:​19, 20).

6. ¿Xi biʼniʼ sentir Pablo ora guníʼ ique guiráʼ ra bichee?

⁶ Zándaca dede yanna runi sentir caadxi de laanu nápanu donda pur ca cosa ni bíninu ante guizíʼdinu ni dxandíʼ (1 Ped. 4:3). Nuu xcaadxi maʼ xadxí de cayúnicaʼ ni ná Jehová peru cayúnicaʼ stipa gudxiilucaʼ ca debilidad ni nápacaʼ. ¿Lii yaʼ? ¿Huayuni sentirluʼ qué zuni perdonar Jehová lii la? Pa zacá ni la? zatadxí ladxidoʼloʼ ora gánnaluʼ laaca biʼniʼ sentir caadxi xpinni Jehová zacá. Casi apóstol Pablo, guizáʼ biuubaʼ ladxidóʼ ora guníʼ ique guiráʼ ra bichee (Rom. 7:24). Neca guca arrepentirbe de ca pecadu stibe ne guyuunísabe, biʼniʼ sentirbe laabe «nga ni jma nahuiiniʼ lade ca apóstol» ne «ni jma pecador» (1 Cor. 15:9; 1 Tim. 1:15).

7. ¿Xi ti cosa zanda chuʼnu seguru zazaaca pa gaca arrepentirnu?

⁷ Bixhózenu ni nuu guibáʼ maʼ biʼniʼ prometer zuni perdonar laanu pa gaca arrepentirnu (Sal. 86:5). Nga runi, pa riuubaʼ ladxidoʼno pur ca pecadu ni bíninu la? chuʼnu seguru maʼ biʼniʼ perdonarbe laanu (Col. 2:13).

8, 9. ¿Xi zacané laanu cadi guiníʼ íquenu qué risaca ni rúninu pur Jehová?

⁸ Guiranu racaláʼdxinu gudiʼnu Jehová ni jma galán de laanu. Peru zándaca nuu tu runi sentir huaxiéʼ risaca ni runi para gusiecheʼ Dios. Ndiʼ nga ni guníʼ ti hermana láʼ Amanda: «Riníʼ iqueʼ para ganda gudieeʼ Jehová ni jma galán de naa, naquiiñeʼ gudieeʼ laa jma cada dxi. Nga runi, runeʼ jma de biaʼ ni zanda guneʼ. Ne stale biaje ora qué runeʼ biaʼ gudixhe iqueʼ guneʼ la? runeʼ sentir cadi cayuulaʼdxiʼ Jehová ni cayuneʼ pur laa».

⁹ ¿Xi zacané laanu maʼ cadi guiníʼ íquenu qué risaca ni cayúninu para Jehová yaʼ? Cadi guiaandaʼ laanu, qué runi obligarbe laanu gúninu xiixa, sínuque riénebe laanu ne qué rinábabe laanu gúninu ni qué zanda gúninu. Pa cudiʼnu laabe ni jma galán de laanu, neca naroʼbaʼ o nahuiiniʼ ni, chuʼnu seguru nabé rusisácabe ni. Laaca zanda guiníʼ íquenu ca binni ni riete lu Biblia ni biʼniʼ ni ná Jehová de guidubi ladxidóʼ. Casi apóstol Pablo, pur stale iza biʼniʼ viajar zitu ne biʼniʼ stale dxiiñaʼ para guca formar stale congregación. Peru bedandá tiempu bichaa modo nabánibe ne maʼ qué ñanda ñuni predicarbe modo rúnibe ni dxiqué. ¿Ñee pur nga maʼ qué ñechené Jehová laabe la? Coʼ xa. Biʼniʼ Pablo ni zanda guni ne qué nusaana Jehová de niguu ndaayaʼ laabe (Hech. 28:​30, 31). Zaqueca nga laanu, ziuu biaje zudiʼnu Jehová stale o huaxiéʼ, peru ni jma risaca para laabe nga xiñee rúninu ni. Yanna, guidúʼyanu caadxi modo rusihuinni Jehová cayechené laanu.

 XIMODO RUSIHUINNI JEHOVÁ CAYECHENÉ LAANU

10. ¿Ximodo «riníʼ» Jehová nadxii laanu? (Juan 16:27).

¹⁰ Bidiibe laanu Biblia. Riuulaʼdxiʼ Jehová gusihuinni nadxii ca xpinni ne riechené laacabe. Lu Biblia riete chupa biaje gudxi Jehová Jesús laa nga Xhiiñibe ni nadxiibe ne ni rusiecheʼ laabe (Mat. 3:17; 17:5). ¿Ñuuláʼdxiluʼ niníʼ Jehová rusiécheluʼ laa la? Dxandíʼ, qué riníʼnebe laanu dede guibáʼ, peru riquiiñebe Stiidxabe para gúnibe ni. Ora ridúʼndanu ca diidxaʼ sicarú ni gudxi Jesús ca discípulo stiʼ, runi sentirnu casi ora Jehová nga cayabi laanu ca diidxaʼ ca (biindaʼ Juan 16:27). Yenanda Jesús ejemplu stiʼ Bixhoze. Nga runi, ora ridúʼndanu gudxi Jesús ca discípulo stiʼ pabiáʼ nadxiibe laacaʼ neca binni ruchee laacaʼ la? zanda guiníʼ íquenu cayabi Jehová laanu ca diidxaʼ ca (Juan 15:​9, 15).

11. Ora maʼ cadídinu lu xiixa prueba, ¿xiñee cadi naquiiñeʼ guiníʼ íquenu maʼ cadi cayechené Dios laanu? (Santiago 1:12).

¹¹ Rudiibe ni caquíʼñenu. Racalaʼdxiʼ Jehová gacané laanu, nga runi rudiibe laanu ni caquíʼñenu para guibáninu. Peru nuu biaje rudiibe lugar tídinu lu xiixa guendanagana, cásica bizaaca Job (Job 1:​8-11). Ora maʼ cadídinu lu xiixa prueba cadi guiníʼ íquenu maʼ cadi cayechené Dios laanu, sínuque guidúʼyanu prueba ca casi ti oportunidad para gusihuínninu pabiáʼ nadxiinu ne nápanu confianza laabe (biindaʼ Santiago 1:12). Ne ora jma peʼ nagana ra cadídinu nga zadúʼyanu ximodo né stale cariñu zacanebe laanu guni huantarnu.

12. ¿Xi rusiidiʼ ni bizaaca Dimitri laanu?

¹² Guidúʼyanu xi bizaaca ti hermanu de Asia ni láʼ Dimitri. Biaanabe sin dxiiñaʼ. Cumu maʼ gudiʼdiʼ stale beeu ne cadi cadxélabe dxiiñaʼ la? gudixhe íquebe guni predicarbe jma para gusihuínnibe nápabe confianza Jehová. Peru zidiʼdiʼ tiempu ne cadi cadxélabe dxiiñaʼ. Despué bizulú guca huarabe ne gudixhe guendahuará ca laabe. Ne pur guiráʼ ni cazaacabe riʼ, guníʼ íquebe cadi jneza cayuni tenderbe familia stibe ne maʼ cadi cayechené Jehová laabe. Peru ti gueelaʼ biʼniʼ xiiñihuiinibe ti guiʼchiʼ ra cá textu stiʼ Isaías 30:15: «Zápatu stipa pa cadi gaca lúgutu ne gápatu  confianza». Yenebe ni ra nuu bixhózebe ne gúdxibe laa: «Apá, bietenalaʼdxiʼ textu riʼ ora chuʼluʼ triste». Bidii Dimitri cuenta cayacané Jehová laa para gapa familia stiʼ ni gacuʼ, ni gó ne ti lugar ra cuézacaʼ. Laabe guniʼbe: «Ni caquiiñeʼ si guneʼ nga chuaaʼ tranquilu ne gapaʼ confianza Dios stinneʼ». Pa cadíʼdiluʼ lu xiixa guendanagana casi ni bizéʼtenu riʼ la? zanda chuʼluʼ seguru rizaalaʼdxiʼ Jehová lii ne zudii lii stipa ni caquiiñeluʼ para guni huantarluʼ.

13. ¿Xi sti modo rusihuinni Jehová riechené laanu?

¹³ Riquiiñebe ca hermanu stinu. Zanda gucaa Jehová ca xpinni gábicaʼ laanu diidxaʼ ni uguu gana laanu ora peʼ caquíʼñenu ni. Nga peʼ nga ni bizaaca ti hermana de Asia. Biaanabe sin dxiiñaʼ ne gúpabe ti guendahuará malu. Despué biʼniʼ cometer xheelabe ti pecadu grave ne bisaana de gaca ancianu. Nabé nagana ra cadiʼdiʼ hermana riʼ, ngue runi guníʼ: «Guca nagana para naa guieneʼ xiñee cazaacaʼ guiráʼ ngue. Guníʼ iqueʼ zándaca bineʼ xiixa ni cadi jneza ne pur ngue maʼ cadi cayechené Jehová naa». Ngue runi gunábabe Jehová guluíʼ nadxiiruʼ laabe, ne bicabi oración stibe. ¿Ximodo yaʼ? Laabe guniʼbe: «Guniʼné ca ancianu naa ne gucanécabe naa gudieeʼ cuenta nadxiiruʼ Jehová naa». Despué gunábabe Jehová gacané laabe sti biaje. ¿Xi bizaaca yaʼ? Laabe guniʼbe: «Dxi queca gucuaaʼ ti carta ni bicaa caadxi hermanu de congregación stinneʼ ra cayábicaʼ naa pabiáʼ nadxiicaʼ naa. Ora biindaʼ ni, bidieeʼ cuenta bicaadiaga Jehová naa». Casi maʼ bidúʼyanu, pur ca diidxaʼ sicarú ni gabi xcaadxi laanu zanda gudiʼnu cuenta riechené Jehová laanu (Sal. 10:17).

14. ¿Xi sti modo riquiiñeʼ Jehová ca hermanu stinu para gusihuinni riechené laanu?

 ¹⁴ Laaca rusihuinni Jehová cayechené laanu ra riquiiñeʼ ca hermanu stinu para gudiicaʼ conseju laanu. Casi lu primé siglu que la? biquiiñebe apóstol Pablo para gucaa 14 carta ra nuu ca xpinni Cristu, luni bidiibe laacaʼ conseju nadipaʼ, peru bíʼnibe ni né stale guendarannaxhii. ¿Xiñee biquiiñeʼ Jehová Pablo para gudii laacabe ca conseju ca yaʼ? Purtiʼ nachaʼhuiʼ Jehová ne nadxii laacabe, ne riguu jneza «cásica runi bixhoze binni né ti xiiñiʼ ni rusiecheʼ laa» (Prov. 3:​11, 12). Nga runi, pa iquiiñeʼ tuuxa Biblia para gudii conseju laanu, cadi guiníʼ íquenu maʼ cadi cayechené Dios laanu, sínuque rusihuinni ni nadxiirube laanu (Heb. 12:6). ¿Xi xcaadxi prueba nápanu ni rusihuinni nadxiiruʼ Jehová laanu yaʼ?

XCAADXI PRUEBA NI RUSIHUINNI RIECHENÉ JEHOVÁ LAANU

15. ¿Tuu nga ca ni rudii Jehová espíritu santu stiʼ, ne xi zanda chuʼnu seguru?

¹⁵ Rudii Jehová espíritu santu stiʼ ca ni rusiecheʼ laa (Mat. 12:18). Guníʼ ique pregunta riʼ: «¿Ñee rusihuinneʼ napaʼ ca cualidad ni rudii espíritu santu la?». ¿Ñee nápaluʼ jma paciencia yanna que ante gunibiaʼluʼ Jehová la? Mientra jma gúʼyaluʼ cusihuínniluʼ ca cualidad stiʼ espíritu santu, jma ziuuluʼ seguru cayechené Jehová lii. (Biiyaʼ cuadru ni láʼ « Cualidad stiʼ espíritu nga…»).

16. Casi ná 1 Tesalonicenses 2:​4, ¿tu riquiiñeʼ Jehová para guni predicar ca noticia galán? ¿Ne ximodo runi sentirluʼ ora gánnaluʼ ni?

¹⁶ Maʼ gulí Dios ca binni ni rusiecheʼ laa para guni predicarcaʼ ca noticia galán (biindaʼ 1 Tesalonicenses 2:4). Guidúʼyanu ximodo bidii ti hermana láʼ Jocelyn cuenta dxandíʼ ni caninu riʼ. Ti dxi birabe gueelaʼ sin gana. Laabe guniʼbe: «Qué gapaʼ stipa ne bineʼ sentir qué zanda guneʼ gastiʼ. Peru cumu cayuneʼ de presursora ne dxi que nga maʼ gudixheʼ iqueʼ guireeʼ predicación la? bineʼ orar Jehová ne bireeʼ ziaaʼ». Siadóʼ que guniʼné Jocelyn Mary, ti gunaa nabé nachaʼhuiʼ ni guná guicaa estudiu. Chupa chonna beeu despué, gudxi Mary Jocelyn cayuni orar Dios para gacané laa dxi bixhidxi náʼ ra puertaʼ stibe. ¿Xi biziidiʼ Jocelyn pur ni bizaaca riʼ yaʼ? Laabe guniʼbe: «Bineʼ  sentir cayabi Jehová naa: “Rusiécheluʼ naa”». Dxandíʼ, cadi guiráʼ diʼ binni zucaadiaga mensaje ni zinenu, peru zanda chuʼnu seguru riecheʼ Jehová ora ruuyaʼ rúninu stipa para guinínenu xcaadxi binni de ca noticia galán.

17. ¿Xi rusiidiʼ ni guníʼ Vicky lii de rescate? (Salmo 5:12).

¹⁷ Zulá rescate ca ca binni ni rusiecheʼ Jehová (1 Tim. 2:​5, 6). Peru ¿pa raca nagana para laanu guni crenu riuulaʼdxiʼ Jehová ni rúninu neca nápanu fe lu rescate ne maʼ guyuʼnísanu yaʼ? Cadi guiaandaʼ laanu, nuu biaje riguite ladxidoʼno laanu, peru nánnanu siempre zanda gápanu confianza Jehová. Para laabe la? naca ca ni napa fe lu rescate binni nachaʼhuiʼ, ne cayuni prometerbe zaguube ndaayaʼ laacaʼ (biindaʼ Salmo 5:12; Rom. 3:26). Nabé guleendú ti hermana láʼ Vicky ni galán ra guníʼ ique lu rescate. Neca raca nagana para laabe guni crebe nadxii Jehová laabe, biénebe ndiʼ: «Nabé xadxí gupa Jehová paciencia naa [ . . . ]. Neca zacá, casi ñaca cayabeʼ laabe: “Qué zanda gannaxhiiluʼ ti binni casi naa. Neca guti Xiiñiluʼ pur naa qué zanda guixiá ca pecadu stinneʼ”». Cásica Vicky, pa guiníʼ íquenu lu rescate, laaca zuni sentirnu nadxii Jehová laanu ne ziuʼnu seguru cayechenebe laanu.

18. ¿Xi nánnanu zazaaca pa qué gusaana de gannaxhiinu Bixhózenu ni nuu guibáʼ?

¹⁸ Neca gúninu stipa pur chinándanu ni bizíʼdinu lu artículo riʼ, ziuu biaje zándaca zareʼnu gana ne zaníʼ íquenu pa dxandíʼ cayechené Jehová laanu. Pa nga nga ni cazaacaluʼ, cadi guiaandaʼ lii, ca ni rusiecheʼ Jehová nga «ca ni qué gusaana de gannaxhii» laabe (Sant. 1:12). Nga runi biyubi chuʼluʼ jma gaxha de Jehová ne biʼniʼ stipa gúʼyaluʼ guiráʼ modo rusihuinni Jehová cayechené lii. Ne cadi guiaandaʼ lii, «cadi zitu diʼ nuube de cada tobi de laanu» (Hech. 17:27).