1. ¿Xi bizaaca ora bizulú guníʼneluʼ binni ni caziidiluʼ de lu Biblia?

¿ÑEE rietenaláʼdxiluʼ xi biʼniʼ sentirluʼ dxi bizulú caziidiluʼ de Jehová la? Cadi nagana guca para lii guiéneluʼ ca ni rusiidiʼ Biblia. Guníʼ íqueluʼ laaca guiráʼ binni ziuulaʼdxiʼ guiziidiʼ de laacani, purtiʼ zacané ni rusiidiʼ Biblia laacaʼ guibánicaʼ nayecheʼ ne gápacaʼ ti esperanza para ca dxi ni zeeda ca (Sal. 119:105). Cumu guizáʼ cayécheluʼ la? bizulú guníʼneluʼ ca xhamíguluʼ ne ca familia stiluʼ de ni caziidiluʼ. Peru zándaca guyuuluʼ triste purtiʼ stale tu qué niná nucaadiaga lii.

2, 3. ¿Xi guníʼ ique stale binni de Jesús ne mensaje stiʼ?

² Cadi naquiiñeʼ guidxagayaanu ora qué naʼ binni gucaadiaga mensaje ni runi predicarnu. Dxi guyuu Jesús lu Guidxilayú, biʼniʼ milagru ni bisihuinni cayacané Jehová laa. Neca zacá, stale binni qué niná nucaadiaga laabe. Guzéʼtenu ti ejemplu, dxi gundísabe Lázaro de lade gueʼtuʼ qué niná ca líder stiʼ ca judíu que ñuni crecaʼ pa laabe nga Mesías, neca nánnacaʼ dxandíʼ bíʼnibe milagru que. Laga gucaláʼdxicaʼ ñuuticaʼ laabe ne Lázaro (Juan 11:47, 48, 53; 12:9-11).

³ Nanna Jesús stale binni qué zuni cré pa laa nga Mesías (Juan 5:39-44). Sicaríʼ gudxi Jesús caadxi de ca discípulo stiʼ Juan Bautista: «Dichoso nga ni qué gucueeza gastiʼ laa  para gapa fe naa» (Mat. 11:2, 3, 6). ¿Xiñee stale binni qué ñuni cré Jesús yaʼ?

4. ¿Xi zazíʼdinu lu artículo riʼ?

⁴ Lu artículo riʼ ne lu stobi ca, zazíʼdinu xiñee stale binni qué ñuni cré Jesús lu primé siglu. Laaca zadúʼyanu xiñee stale binni qué riná gucaadiaga mensaje ni rinenu ra nuucaʼ. Ne laaca zazíʼdinu xi zacané laanu guquídxinu fe ni nápanu Jesús ne cadi gusaananu laa.

5. ¿Xiñee guníʼ ique stale binni cadi Jesús ngue Mesías ni maca cá gueeda?

⁵ Stale binni maʼ qué ñuni cré Jesús ora gúnnacaʼ padé laabe. Nánnacabe guizáʼ nánnabe gusiidibe ne rúnibe milagru, peru para laacabe qué risaca Jesús purtiʼ xiiñiʼ ti carpinteru laa. Stale binni guníʼ ique huaxiéʼ risaca Nazaret, lugar ra biniisi Jesús. Dede Natanael, ti hombre ni beeda gaca discípulo stiʼ Jesús, guníʼ: «¿Zándaxa guiree xiixa galán de Nazaret?» (Juan 1:46). ¿Xiñee guníʼ Natanael sicaríʼ yaʼ? Zándaca purtiʼ para laabe qué risaca guidxi ra biniisi Jesús. O zándaca purtiʼ caníʼ íquebe profecía ni cá lu Miqueas 5:2, ra ná zale Mesías Belén ne cadi Nazaret.

6. ¿Xi naquiiñeʼ ñuni ca binni ni qué ñuni cré pa Jesús nga Mesías?

⁶ ¿Xi rusiidiʼ Biblia? Profeta Isaías maca guníʼ qué zuyubi ca enemigu stiʼ Jesús gánnacaʼ xcaadxi cosa de Mesías (Is. 53:8). Stale de ca profecía que maca ruzeetecani padé Mesías. Pa nuyúbicabe ñánnacabe jma de Mesías la? nudiicabe cuenta gule Jesús Belén ne zá de familia stiʼ rey David (Luc. 2:4-7). Biaʼsi lugar ra gule Jesús ne ni maca cá lu Miqueas 5:2. Yanna, ¿xiñee qué ñuni cré stale binni pa Jesús nga Mesías yaʼ? Purtiʼ qué nuyúbicabe ñánnacabe jma de laabe. Ngue runi maʼ qué ñuni crecaʼ Jesús ne bicaanacaʼ laabe.

7. ¿Xiñee stale binni qué riná ganna gastiʼ de xquidxi Jehová?

⁷ ¿Ñee ngaca rizaaca tiempu riʼ la? Ngaca. Stale de ca xpinni Jehová cadi binni ricu laanu ne cadi nácanu binni risaca. Stale binni ruuyaʼ laanu casi binni ni qué nizá scuela o binni ni qué risaca (Hech. 4:13). Riníʼ íquecabe qué zanda gusíʼdinu de Biblia purtiʼ qué ñuunu ti scuela risaca ra rusiidicabe de religión. Ne nuu tu laa riníʼ ti religión de Estados Unidos nga ca testigu stiʼ Jehová, neca jma huaxiéʼ Testigu nabeza Estados Unidos. Nuu tu laa rábicabe laacaʼ qué runi cré ca Testigu Jesús. Ne maʼ xadxí de riníʼ binni «ruchianu familia», nácanu «espía stiʼ Estados Unidos» ne «fanáticu» laanu. Ca ni runi cré ni riníʼ binni de ca testigu stiʼ Jehová, maʼ qué runi crecaʼ ni gábinu laacaʼ ne maʼ qué rinacaʼ gánnacaʼ gastiʼ de xquidxi Jehová.

8. Casi ná Hechos 17:11, ¿xi naquiiñeʼ gúniluʼ pa racaláʼdxiluʼ gánnaluʼ tuu nga ca xpinni Dios tiempu riʼ?

⁸ ¿Xi zacané lii cadi gusaana de gápaluʼ fe? Biʼniʼ investigar chaahuiʼ. Ndiʼ nga ni biʼniʼ Lucas. Ante gucaabe Evangeliu stibe, biʼniʼ investigar chaahuibe. Racaláʼdxibe chuʼ ca ni guʼndaʼ Evangeliu stibe seguru «dxandíʼ ca cosa» ni bicaabe de Jesús (Luc. 1:1-4). Ngaca nga biʼniʼ ca judíu ni bibani ndaaniʼ guidxi Berea. Primé biaje binadiágacabe ca noticia ni caníʼ de Jesús, biindaʼ chaahuicabe Stiidxaʼ Dios para gúʼyacabe pa dxandíʼ ni caziidicabe (biindaʼ Hechos 17:11). Ngaca nga ni naquiiñeʼ gúniluʼ, naquiiñeʼ guni investigarluʼ. Bichaaga ni rusiidiʼ ca testigu stiʼ Jehová ne ni ná Biblia. Laaca zanda guni estudiarluʼ historia stiʼ ca testigu  stiʼ Jehová. Pa guni investigar chaahuiluʼ, qué zuni creluʼ ca cosa ni cadi dxandíʼ ni guiníʼ binni de ca Testigu.

9. ¿Xi bizaaca ora qué niná Jesús nudii ti señal ni zeeda de Dios?

⁹ Tiempu bibani Jesús, guyuu binni ni gucalaʼdxiʼ ñúnirube xcaadxi cosa ne cadi nusiidisibe. Gunábacabe Jesús guluíʼ laacabe «ti señal ni zeeda de Dios» para gusihuinni laa nga Mesías (Mat. 16:1). Zándaca gunábacabe Jesús ti señal purtiʼ cadi jneza modo biénecabe Daniel 7:13, 14. Peru cadi ngue nga tiempu gudixhe Jehová gaca cumplir profecía que. Ni bisiidiʼ si Jesús ca binni que naquiiñeʼ nucaani laacaʼ ñuni crecaʼ laabe nga Mesías. Peru cumu qué ninabe nudiibe ti señal laacaʼ la? bisaana de gápacaʼ fe laabe ne bicaanacaʼ laabe (Mat. 16:4).

10. ¿Ximodo biʼniʼ cumplir Jesús ni guníʼ Isaías de Mesías?

¹⁰ ¿Xi rusiidiʼ Biblia? Ndiʼ nga ni guníʼ Isaías de Mesías: «Qué zucaabe ridxi ne qué zandísabe ridxi, ne qué zúnibe xiixa para gunadiaga binni laabe ndaaniʼ calle» (Is. 42:1, 2). Biʼniʼ Jesús xhiiñaʼ Dios, peru qué ñúnibe ni para si nidxagayaa binni laabe. Qué nucuibe templu naroʼbaʼ, qué ñácube xiixa lari especial ne qué ninabe niquiiñeʼ binni ti título risaca para guiniʼné laabe. Dxi cayuni juzgárcabe Jesús qué niná ñuni ti milagru para si guidxagayaa rey Herodes laa neca nuu xquendanabani lu peligru (Luc. 23:8-11). Dxi biʼniʼ predicar Jesús, biʼniʼ caadxi milagru, peru ni jma risaca para laa nga guni predicar ca noticia galán stiʼ Reinu. Ngue runi gúdxibe ca discípulo stibe: «Purtiʼ para nga bendaʼ» (Mar. 1:38).

11. ¿Xi cosa cadi jneza riníʼ ique binni de ca testigu stiʼ Jehová?

¹¹ ¿Ñee ngaca rizaaca tiempu riʼ la? Ngaca. Stale binni riuulaʼdxiʼ ca yuʼduʼ naroʼbaʼ ne ni napa stale cosa risaca. Riuuláʼdxicabe gucaadiágacabe ca líder stiʼ religión ni riuulaʼdxiʼ iquiiñeʼ binni título risaca  para guiniʼné laa. Ne laaca riuuláʼdxicabe ca ceremonia ni rúnicaʼ neca cadi zeeda cani lu Biblia. Peru ca binni ni rié ndaaniʼ ca yuʼduʼ riʼ huaxiéʼ caziidicaʼ de Dios ne ni naguixhe íquebe gúnibe. Maʼ gadxé ca binni ni rié ca reunión stiʼ ca testigu stiʼ Jehová purtiʼ laacaʼ caziidicaʼ xi rinabaʼ Jehová gúninu ne ximodo gúninu ni ná. Ca Yoo stiʼ Reinu stinu, cadi de luju cani, peru nayá cani. Ca ni zániru ndaaniʼ congregación qué rácucaʼ ti lari especial ne qué riquiiñenu xiixa título risaca para guinínenu laacaʼ. Guiráʼ ni rusíʼdinu ne ni runi crenu zeedacani de lu Stiidxaʼ Dios. Neca zacá stale binni maʼ qué rinacaʼ guni crecaʼ ni rusíʼdinu purtiʼ para laacaʼ nabé sencillu modo runi adorarnu Dios ne qué riuuláʼdxicaʼ ni.

12. Casi ná Hebreos 11:1, 6, ¿xi zacané laanu gaca fe stinu naguidxi?

¹² ¿Xi zacané lii cadi gusaana de gápaluʼ fe? Sicaríʼ gudxi apóstol Pablo ca xpinni Cristu de Roma: «Rapa binni fe ora maʼ binadiaga mensaje riʼ, ne runadiaga binni mensaje riʼ ora raca predicar stiidxaʼ Cristu» (Rom. 10:17). Pa racaláʼdxinu gaca fe stinu naguidxi, naquiiñeʼ guni estudiarnu Biblia ne cadi chuʼnu lu ca eventu ni runi ca religión ni qué rusiidiʼ ni dxandíʼ neca ruluíʼ galán cani. Ni guizíʼdinu lu Biblia zacaneni gaca fe stinu naguidxi purtiʼ «pa qué gápanu fe qué ziuulaʼdxiʼ Dios ni rúninu» (biindaʼ Hebreos 11:1, 6). Para chuʼnu seguru dxandíʼ ni cazíʼdinu, cadi caquiiñenu ti señal ni zeeda de Dios. Caquiiñeʼ guni estudiar chaahuinu ni zeeda lu Biblia, purtiʼ nga nga zacané laanu iguidxi fe stinu ne guidxélanu respuesta stiʼ ca duda ni gápanu.

13. ¿Xiñee qué ñuulaʼdxiʼ stale binni ni biʼniʼ Jesús?

¹³ Tiempu bibani Jesús, bidxagayaa ca xpinni Juan Bautista xiñee qué runi ayunar ca discípulo stiʼ Jesús. Bisiene Jesús laacabe cadi naquiiñeʼ guni ayunar ca xpinni laga nabani (Mat. 9:14-17). Neca  zacá, ca fariseu ne ca enemigu stiʼ Jesús guniʼcaʼ cadi jneza ngue runi Jesús purtiʼ cadi zinanda ca costumbre ne ca tradición sticaʼ. Ne bidxiichicaʼ dxi bíʼyacaʼ cusiándabe binni dxi sábadu (Mar. 3:1-6; Juan 9:16). Ca hombre riʼ runi crecaʼ laacaʼ purtiʼ runi cumplircaʼ ni ná ley stiʼ sábadu, peru rúnicaʼ negocio ra templu. Bidxiichicabe dxi gudxi Jesús laacabe cadi jneza ni cayúnicabe (Mat. 21:12, 13, 15). Ne dxi biʼniʼ predicar Jesús ndaaniʼ sinagoga ni nuu Nazaret, bizeetebe ni bizaaca ndaaniʼ guidxi Israel para gábibe ca ni cucaadiaga laabe qué gápacaʼ fe ne ruyúbicaʼ puru si para laacaʼ (Luc. 4:16, 25-30). Stale binni maʼ qué niná ñuni cré Jesús purtiʼ qué ñúnibe ni racaláʼdxicaʼ (Mat. 11:16-19).

14. ¿Xiñee guníʼ Jesús cadi jneza ca tradición stiʼ ca judíu?

¹⁴ ¿Xi rusiidiʼ Biblia? Biquiiñeʼ Jehová profeta Isaías para guiníʼ: «Riníʼ si guidxi riʼ ridxiña naa ne de diidxaʼ ruaa si runi respetar naa, peru zitu nuu ladxidóʼ de naa, ne ridxibi naa peru casi ná mandatu stiʼ binni, mandatu ni bisiidiʼ stobi laa» (Is. 29:13). Biaʼsi ngue ni biʼniʼ Jesús ora guníʼ cadi jneza ca tradición ne modo rusiidiʼ ca judíu purtiʼ cadi zeedacani lu Stiidxaʼ Dios. Ca binni ni yenanda ca tradición ne ni rusiidiʼ binni lugar de ninanda ni ná Stiidxaʼ Dios, bidxiidéchecaʼ Jehová ne Mesías.

15. ¿Xiñee ridxiichiné stale binni ca testigu stiʼ Jehová?

¹⁵ ¿Ñee ngaca rizaaca tiempu riʼ la? Ngaca. Stale binni ridxiichiné ca testigu stiʼ Jehová purtiʼ qué rinándanu tradición ni cadi zeeda lu Biblia casi lanibidóʼ ne Navidad. Ne nuu tu laa ridxiichi purtiʼ qué runi celebrarnu dxi festivu ne ca costumbre ni runi binni ora gatiʼ tuuxa jmaruʼ si pa gucaani laanu guchéʼnenu Dios. Zándaca nuu binni runi cré Dios ne riníʼ ique riuuláʼdxibe ni rúnicaʼ. Peru rinándacabe tradición stiʼ binni guidxilayú lugar de ninándacabe ni rusiidiʼ Biblia, ne pur nga qué riuulaʼdxiʼ Jehová ni rúnicabe (Mar. 7:7-9).

16. ¿Xi naquiiñeʼ gúniluʼ ne xi cadi naquiiñeʼ gúniluʼ? (Salmo 119:97, 113, 163-165).

¹⁶ ¿Xi zacané lii cadi gusaana de gápaluʼ fe? Gunnaxhii Jehová ne ca ley stiʼ (biindaʼ Salmo 119:97, 113, 163-165). Pa nadxiiluʼ Jehová, zacaneni lii gucaanaluʼ ca costumbre ni qué riuuláʼdxibe. Ne qué zudiiluʼ lugar gucueezaʼ xiixa lii para cadi gannaxhiiluʼ Jehová.

17. ¿Xi guleza stale binni ñuni Mesías?

¹⁷ Tiempu bibani Jesús, gucalaʼdxiʼ binni nidxaa gobiernu ni cayuni mandar laacaʼ. Gulézacabe nulá Mesías laacabe de lu náʼ gobiernu stiʼ Roma. Peru ora gucaláʼdxicabe ñúnicabe Jesús rey, qué niná (Juan 6:14, 15). Ne guyuu binni ne sacerdote, bidxíbicaʼ nuchaa Jesús modo raca mandar ne nuchiichini ca romanu ne pur ngue ñáxhacaʼ autoridad ni gucuaa ca líder stiʼ religión. Stale judíu guyuu xizaa nidinde binni pur política ne pur ngue maʼ qué ñuni crecaʼ Jesús.

18. ¿Xi profecía ni caníʼ de Mesías maʼ qué nulabi stale judíu?

¹⁸ ¿Xi rusiidiʼ Biblia? Maca cá lu ca profecía zadinde Mesías lu ti guerra ne zuni ganar, peru laaca maca cá primeru napa xidé gátibe pur ca pecadu stinu (Is. 53:9, 12). Yanna, ¿xiñee cadi jneza ni cabeza ca judíu que ñaca yaʼ? Purtiʼ jma bicaa  íquecabe gúʼndacabe ca profecía ni caníʼ modo gaca chaahuiʼ ca guendanagana stícabe, ne maʼ qué nulábicabe xcaadxi profecía (Juan 6:26, 27).

19. ¿Xiñee stale binni qué riná guni cré ni rusíʼdinu?

¹⁹ ¿Ñee ngaca rizaaca tiempu riʼ la? Ngaca. Stale binni qué riná guni cré ni rusíʼdinu purtiʼ qué riuʼnu lu política. Riníʼ íquecabe naquiiñeʼ ñuni votarnu. Peru nánnanu zudxiʼdéchenu Jehová pa guni votarnu pur ti binni para guni mandar laanu (1 Sam. 8:4-7). Zándaca laaca nuu binni riníʼ ique naquiiñeʼ nucuí ca testigu stiʼ Jehová hospital, ñúnicaʼ scuela ne ñúnicaʼ xcaadxi cosa para gacanecaʼ binni. Nga runi, stale binni qué riná guni cré ni rusíʼdinu purtiʼ jma ricá íquenu guni predicarnu, lugar de nicá íquenu ñuni chaahuinu ca guendanagana napa binni.

20. Casi guníʼ Jesús lu Mateo 7:21-23, ¿xii nga ni jma naquiiñeʼ gúninu?

²⁰ ¿Xi zacané lii cadi gusaana de gápaluʼ fe? (Biindaʼ Mateo 7:21-23). Cadi guiaandaʼ lii xi dxiiñaʼ jma risaca bisaana Jesús gúninu (Mat. 28:19, 20). Cadi naquiiñeʼ guicá íquenu guni chaahuinu ca guendanagana ni nuu lu política ne ca guendanagana ni napa binni. Ca testigu stiʼ Jehová nadxiinu binni ne rizaaláʼdxinu laacaʼ, peru ni jma galán gúninu pur binni nga gusíʼdinu laacaʼ de Reinu stiʼ Dios ne gacanenu laacaʼ gaca xhamígucaʼ Jehová.

21. ¿Xi naquiiñeʼ quixhe íquenu gúninu?

²¹ Lu artículo riʼ maʼ bidúʼyanu tapa cosa ni bicaa stale binni cadi guni crecaʼ Jesús ne bicaanacaʼ laabe, ne pur ngaca qué riná stale binni gucaadiaga ca discípulo stiʼ Jesús tiempu riʼ. Peru cadi nga si. Lu sti artículo ca, zadúʼyanu xtapa cosa. Quixhe íquenu gaca fe stinu naguidxi ne cadi gudiʼnu lugar chuʼ xiixa ni gucaa laanu maʼ cadi gápanu fe.