1, 2. a) ¿Xi bicaa ti hombre lu ti libru? b) ¿Xi zazíʼdinu lu artículo riʼ?

TIEMPU riʼ, stale binni riníʼ runi cré Jesús peru qué riuuláʼdxicaʼ gúnicaʼ ni bisiidibe (2 Tim. 4:3, 4). Ti hombre bicaa lu ti libru: «Pa ñuu sti Jesús ládenu tiempu riʼ ne nusiidiʼ cásica bisiidiʼ Jesús [...], ¿ñee nucáʼnanu laabe cásica biʼniʼ ca binni ni bibani raca chupa mil iza la? [...] Nucáʼnanu».

² Lu primé siglu, stale binni bicaadiaga ni bisiidiʼ Jesús ne biiyacaʼ bíʼnibe milagru, peru qué ñápacaʼ fe laabe. Lu artículo gudiʼdiʼ que bidúʼyanu tapa cosa ni bicaa stale binni cadi guni cré Jesús ne lu artículo riʼ zadúʼyanu xtapa cosa. Laaca zazíʼdinu xiñee qué riná stale binni gucaadiaga ca discípulo stiʼ Jesús tiempu riʼ ne xi zacané laanu cadi gusaana de gápanu fe.

3. ¿Xiñee bicaanáʼ caadxi binni Jesús?

³ Dxi guyuu Jesús lu Guidxilayú guniʼné guiráʼ binni. Gudónebe ca binni ricu ne ca ni napa autoridad, peru jma guyuube gaxha de ca binni pobre ne ca ni qué gapa tu gacané laa. Laaca bisihuínnibe riabe ca ni ruuyaʼ binni laacaʼ casi pecador. Ca binni orgulloso la? qué ñuni crecaʼ Jesús pur ni biʼniʼ ne gunabadiidxacaʼ ca discípulo stibe: «¿Xiñee rónetu ne réʼnetu ca ni runi cobrar impuestu ne  ca pecador pue?». Para bicabi Jesús laacabe: «Cadi caquiiñeʼ cheʼ binni nazaaca ra nuu doctor, peru ni huará la? caquiiñeʼ cheʼ. Cadi zedayubeʼ binni nachaʼhuiʼ, sínuque binni pecador para gaca arrepentir» (Luc. 5:29-32).

4. Casi bicaa profeta Isaías, ¿xi cadi naquiiñeʼ nidxagayaa ca judíu?

⁴ ¿Xi rusiidiʼ Biblia? Ante gueeda Mesías lu Guidxilayú, maca bicaa profeta Isaías qué zuni cré binni laabe. Sicaríʼ bicaa Isaías: «Biʼniʼ despreciárcabe hombre que ne qué niná binni nidxaaga laa [...]. Beeda gácabe tobi ni qué riná binni guyadxí. Biʼniʼ despreciárcabe laabe ne bidúʼyanu laabe casi tuuxa ni qué risaca» (Is. 53:3). Casi ná profecía riʼ, qué zaná binni guidxaaga Mesías, ngue runi cadi naquiiñeʼ nidxagayaa ca judíu bibani lu primé siglu xiñee bicaanáʼ binni Jesús.

5. ¿Xi riníʼ ique stale binni de ca discípulo stiʼ Jesús?

⁵ ¿Ñee ngaca rizaaca tiempu riʼ la? Ngaca. Stale líder stiʼ ca religión riuuláʼdxicaʼ guidxaagalucaʼ binni ricu ndaaniʼ yuʼduʼ sticaʼ, binni nuu xpiaaniʼ ne ni risaca neca nánnacaʼ cadi nabani ca binni ca modo ná Biblia. Neca nabani ca xpinni Jehová modo rusiidiʼ Biblia, runi despreciar ca líder stiʼ ca religión laacabe, purtiʼ para binni guidxilayú qué risácacabe. Casi guníʼ Pablo, gulí Dios ca ni runi despreciar binni (1 Cor. 1:26-29). Peru para Jehová la? guizáʼ risaca guiráʼ ca ni runi ni ná.

6. ¿Xi guníʼ Jesús lu Mateo 11:25, 26, ne ximodo zanda chinándanu ejemplu stiʼ?

⁶ ¿Xi zacané lii cadi gusaana de gápaluʼ fe? (Biindaʼ Mateo 11:25, 26). Cadi gulábiluʼ ni riníʼ ique binni guidxilayú de ca xpinni Dios. Cadi guiaandaʼ lii caquiiñeʼ Jehová ca binni humilde para guni ni ná (Sal. 138:6). Ne guníʼ ique xi guiráʼ huayuni Jehová ra huaquiiñeʼ ca xpinni, ca ni ruuyaʼ binni guidxilayú riʼ casi binni ni cadi nuu xpiaaniʼ.

7. ¿Xiñee guníʼ Jesús naca ca líder stiʼ ca religión hipócrita?

⁷ Qué nidxibi Jesús guníʼ cadi jneza ni cayuni ca líder stiʼ ca religión que. Guzéʼtenu ti ejemplu, gúdxibe ca fariseu nácacaʼ hipócrita purtiʼ jma rizaaláʼdxicaʼ quíʼbicaʼ nacaʼ que guizaaláʼdxicaʼ bixhózecaʼ ne jñaacaʼ (Mat. 15:1-11). Nabé bidxagayaa ca discípulo stiʼ Jesús pur ni guniʼbe que, ngue runi gúdxicaʼ laabe: «¿Ñee bidiiluʼ cuenta bidxiichi ca fariseu ora binadiágacaʼ ni guniʼluʼ la?». Para bicabi Jesús: «Guiráʼ yaga ni cadi Bixhozeʼ ni nuu guibáʼ bizuhuaa la? ziaaxha dede xcu. Zaa nuucabe. Nácacabe guía ciegu. Nga runi, pa guni guiar ti ciegu sti ciegu la? ziaba guirópacaʼ ndaaniʼ ti barranca» (Mat. 15:12-14). Neca bidxiichiné ca líder stiʼ ca religión Jesús, qué nusaana de niniʼbe ni dxandíʼ.

8. ¿Ximodo bisihuinni Jesús qué runi aceptar Dios ni rusiidiʼ guiráʼ religión?

⁸ Laaca guníʼ Jesús cadi jneza ni rusiidiʼ ca fariseu. Qué niníʼ diʼ Jesús runi aceptar Dios ni rusiidiʼ guiráʼ religión. Laabe guniʼbe stale binni zié lu neza xilaga ni ziné lu guendaguti peru caadxi si binni zié lu neza nabéʼ ni ziné lu guendanabani (Mat. 7:13, 14). Jesús guníʼ ziuu caadxi binni ni zaníʼ runi ni ná Dios, peru cadi dxandíʼ ni. Ngue runi sicaríʼ gúdxibe ca discípulo stibe: «Lachuu cuidadu né ca falsu profeta ni gueeda ra nuutu, ni zeeda gaca casi dendxuʼ, peru nácacaʼ  lobo ni ruxuuxe. Zunibiaʼtu laacaʼ pur ni rúnicaʼ» (Mat. 7:15-20).

9. Bizeeteʼ caadxi cosa guníʼ Jesús cadi jneza rusiidiʼ ca religión falsu.

⁹ ¿Xi rusiidiʼ Biblia? Ti profecía ni cá lu Stiidxaʼ Dios guníʼ zannaxhii Mesías lidxi Jehová ne zeeda gácani casi ti bele ni cacá guí ndaaniʼ ladxidóʼ (Sal. 69:9; Juan 2:14-17). Pur nadxii Jesús Jehová, bicaa ni laa guiníʼ cadi jneza ni riníʼ ne ni runi ca religión falsu. Guzéʼtenu ti ejemplu, runi cré ca fariseu napa binni ti alma ni qué rati, peru Jesús bisiidiʼ nisiaasiʼ ca ni maʼ guti (Juan 11:11). Ca saduceu qué runi crecaʼ pa zabani binni sti biaje, peru Jesús bisibani Lázaro, xhamigu (Juan 11:43, 44; Hech. 23:8). Ca fariseu que laaca riníʼ íquecaʼ rizaaca xiixa cosa pur destinu o purtiʼ nga nga ni ná Dios, peru Jesús bisiidiʼ zanda cuí binni guni ni ná Dios o coʼ (Mat. 11:28).

10. ¿Xiñee qué riná stale binni guni cré ni rusíʼdinu?

¹⁰ ¿Ñee ngaca rizaaca tiempu riʼ la? Ngaca. Stale binni qué riná guni cré ni rusíʼdinu purtiʼ rusihuínnini cadi dxandíʼ ni rusiidiʼ ca religión falsu. Ca líder stiʼ ca religión rusiidicaʼ runi castigar Dios binni malu ndaaniʼ infiernu ne rúnicaʼ ni para cadi gusaana binni laacaʼ. Peru laanu, ca ni rúninu ni ná Jehová, ti Dios ni rannaxhii, rininu cadi dxandíʼ ni rusiidiʼ ca religión ca. Laaca rusiidiʼ ca religión ca napa binni ti alma ni qué rati. Pa ñaca dxandíʼ ni la? maʼ cadi caquiiñeʼ diʼ gusibani Dios binni sti biaje. Peru laanu rusíʼdinu cadi lu Biblia zeeda guiráʼ ca cosa ca. Sti cosa ni rusiidiʼ ca religión ca nga napa binni destinu, peru laanu rusíʼdinu bidii Dios libertad laanu para cuinu pa zúninu ni ná o coʼ. Ridxiichi ca líder stiʼ ca religión ca ora runadiágacaʼ guiráʼ ni rusíʼdinu.

11. Casi guníʼ Jesús lu Juan 8:45-47, ¿xi ribeza Dios guni ca xpinni?

¹¹ ¿Xi zacané lii cadi gusaana de gápaluʼ fe? Pa dxandíʼ runi creluʼ ni rusiidiʼ Biblia, zúniluʼ ni ná Dios (biindaʼ Juan 8:45- 47). Cadi gácanu casi Binidxabaʼ, sínuque gúninu guiráʼ ni cazíʼdinu de lu Biblia ne qué chuʼ dxi gusaananu ni runi crenu (Juan 8:44). Ribeza Dios chinanda ca xpinni ejemplu stiʼ Jesús. Nga runi rábibe laanu: «Lagacananalaʼdxiʼ ni nadxabaʼ; laguni ni jneza» (Rom. 12:9; Heb. 1:9).

12. ¿Xiñee qué ñuni cré stale judíu Jesús pur modo gutiʼ?

¹² ¿Xi sti cosa bicaa ca judíu cadi guni crecaʼ Jesús yaʼ? Sicaríʼ guníʼ Pablo: «Laanu runi predicarnu guti Cristu lu yaga, ne naca ni casi ti guié ni rirenda ñee ca judíu» (1 Cor. 1:23). ¿Xiñee qué ñuni crécabe Jesús yaʼ? Purtiʼ guníʼ íquecabe pa ñaca Jesús nga Mesías qué ñátibe lu ti yaga casi ti gubaanaʼ ne ti pecador (Deut. 21:22, 23).

13. ¿Xi qué niná ca judíu que ñuni crecaʼ?

¹³ Qué ñuni cré stale judíu Jesús ne qué ninacaʼ niniʼcaʼ qué gápabe donda. Cadi dxandíʼ guiráʼ donda ni bigaanicabe luguiabe ne cadi jneza modo biʼniʼ juzgárcabe laabe. Nánnanu cadi jneza guca juiciu que purtiʼ qué ninanda Sanedrín que modo ná ley naquiiñeʼ gaca juzgar ti binni (Luc. 22:54; Juan 18:24). Lugar de nucaadiágacaʼ ca prueba ni cusihuinni qué gapa Jesús donda, laga biyúbicaʼ «ti testimonio falsu contra Jesús para gúticaʼ laabe». Cumu qué ñanda ñaca ni nácabe que la? biyubi sumo sacerdote que modo guiníʼ Jesús xiixa para ugaanicabe donda luguiáʼ. Peru maʼ cucheenécabe ley (Mat. 26:59; Mar. 14:55-64). Despué de biasa Jesús de lade gueʼtuʼ, bidii ca juez riʼ «stale moneda de plata» ca soldadu stiʼ Roma ni cayapa ra baʼ que para gusiguiicaʼ ne guiniʼcaʼ xiñee guirutiʼ nuu ndaaniʼ baʼ que (Mat. 28:11-15).

14. ¿Xi maca bicaa ca profeta de modo gatiʼ Mesías?

¹⁴ ¿Xi rusiidiʼ Biblia? Stale judíu ni bibani tiempu stiʼ Jesús cadi cabézacaʼ gatiʼ Mesías, guidúʼyanu xi maca bicaa ca profeta: «Bixhiibe rini stibe dede ra gútibe  ne guluucabe laabe lade ca binni pecador; guyuaʼbe pecadu stiʼ stale binni, ne guniʼbe pur ca binni pecador» (Is. 53:12). Nga runi, neca biiticabe Jesús casi ti binni pecador, cadi naquiiñeʼ diʼ nucaa ngue ca judíu nusaanacaʼ laabe.

15. ¿Xi huaníʼcabe de ca testigu stiʼ Jehová ne pur nga qué riná binni guni cré ni rusíʼdinu?

¹⁵ ¿Ñee ngaca rizaaca tiempu riʼ la? Ngaca. Cásica bíʼnicabe Jesús, laaca rugaaniʼ binni donda ique ca testigu stiʼ Jehová ne cadi jneza modo runi juzgárcabe laacaʼ. Guzéʼtenu caadxi ejemplu. Ndaaniʼ guidxi Estados Unidos, lu iza 1930 ne 1940 gupa xidé guyuunu nezalú tribunal stale biaje para guni defendernu derechu nápanu de guni adorarnu Dios. Guyuu caadxi juez ni bisihuinni runi menu ca Testigu. Ndaaniʼ guidxi Quebec (Canadá), bieeguʼ ca xaíque yuʼduʼ ne ca xaíque guidxi para gucueezacaʼ dxiiñaʼ stinu. Biseguyoocabe stale publicador purtiʼ cusiidicaʼ binni de Reinu stiʼ Dios. Ndaaniʼ guidxi Alemania biiti ca nazi stale joven ni qué niná nucheené Dios. Ne lu ca últimu iza riʼ, ndaaniʼ guidxi Rusia, huayuni juzgárcabe ne huaseguyoocabe stale hermanu purtiʼ cusiidicaʼ binni de lu Biblia. Ruuyaʼ ca autoridad ni casi ti dxiiñaʼ nabé peligroso. Ne laaca ndaaniʼ guidxi Rusia guníʼ gobiernu ti peligru nga gapa binni Traducción del Nuevo Mundo de las Santas Escrituras lu idioma ruso purtiʼ zeeda lá Jehová luni, nga runi biʼniʼ prohibírcabe ni.

16. Casi ná 1 Juan 4:1, ¿xiñee cadi naquiiñeʼ guni crenu ca cosa ni cadi dxandíʼ ni riníʼ binni de ca xpinni Jehová?

¹⁶ ¿Xi zacané lii cadi gusaana de gápaluʼ fe? Biʼniʼ investigar. Lu Sermón del Monte que guníʼ Jesús ziuu binni ni zusiguii ne zaníʼ «stale cosa malu» de ca discípulo stiʼ (Mat. 5:11). Zeedacani de Binidxabaʼ purtiʼ cadi dxandíʼ cani. Rucaabe ca enemigu stinu guiniʼcaʼ cosa ni cadi dxandíʼ de laanu (Apoc. 12:9, 10). Cadi guni creluʼ ca cosa ni cadi dxandíʼ ca ne cadi gudiiluʼ lugar guchibi cani lii ne gusirá cani fe stiluʼ (biindaʼ 1 Juan 4:1).

17. ¿Xi zándaca biʼniʼ caadxi binni pur caadxi cosa ni bizaaca ante gatiʼ Jesús?

¹⁷ Gueelaʼ ante gatiʼ Jesús, biʼniʼ traicionar tobi de ca 12 apóstol stiʼ laa. Sti apóstol biʼniʼ negar laabe chonna biaje, ne xcaadxi apóstol que bisaanacaʼ laabe (Mat. 26:14-16, 47, 56, 75). Peru qué nidxagayaa diʼ Jesús, purtiʼ nánnabe maca cá zazaaca ngue (Juan 6:64; 13:21, 26, 38; 16:32). Zándaca guyuu binni maʼ qué ñuni cré Jesús pur ni bizéʼtenu riʼ ne guníʼ íquecaʼ: «Pa nga nga ni runi ca apóstol stiʼ Jesús, ¿xi guneʼ gacaʼ apóstol stibe yaʼ?».

18. ¿Xi profecía guca cumplir ante gatiʼ Jesús?

¹⁸ ¿Xi rusiidiʼ Biblia? Stale iza ante gueeda Jesús lu Guidxilayú maca guníʼ Jehová lu Stiidxaʼ zuni traicionárcabe Mesías pur 30 moneda de plata (Zac. 11:12, 13). Ne tobi de ca xhamígube nga guni traicionar laabe (Sal. 41:9). Laaca bicaa Zacarías, zuni herírcabe pastor ne zareechendase ca dendxuʼ (Zac. 13:7). Ca binni ni dxandíʼ nadxii Dios, qué zucaanacaʼ Jesús pur ca cosa riʼ. Lugar de nga la? zaguidxi fe sticaʼ purtiʼ cayuuyacaʼ cayaca cumplir ca profecía que luguiáʼ Jesús.

19. ¿Xi nanna ca binni ni nadxii Dios?

¹⁹ ¿Ñee ngaca rizaaca tiempu riʼ la?  Ngaca. Caadxi testigu stiʼ Jehová maʼ bisaanacaʼ ni runi crecaʼ ne maʼ gúcacaʼ apóstata ne maʼ bicaacaʼ xcaadxi guixeleʼ de Dios. Riquiiñecabe Internet ne ca mediu de comunicación para guiníʼcabe cosa ni cuee gana binni ne guiníʼcabe cosa ni cadi dxandíʼ de ca testigu stiʼ Jehová. Peru ca binni ni dxandíʼ nadxii Dios, qué runi crecaʼ ca cosa riʼ purtiʼ nánnacabe maca cá lu Biblia zazaaca cani (Mat. 24:24; 2 Ped. 2:18-22).

20. ¿Xi zacané lii cadi guni creluʼ ni riníʼ ca ni maʼ bisaana xquidxi Jehová? (2 Timoteo 4:4, 5).

²⁰ ¿Xi zacané lii cadi gusaana de gápaluʼ fe? Cadi gusaana de guni estudiarluʼ para gápaluʼ ti fe naguidxi, biʼniʼ orar guiráʼ dxi ne cadi gusaana de gúniluʼ dxiiñaʼ ni bisaanané Jehová laanu gúninu (biindaʼ 2 Timoteo 4:4, 5). Pa nápaluʼ fe, qué zadxíbiluʼ ora gunadiágaluʼ guiníʼcabe cosa ni cadi dxandíʼ de laanu (Is. 28:16). Pa nadxiiluʼ Jehová, Stiidxaʼ ne ca hermanu stiluʼ zacaneni lii cadi guni creluʼ guiráʼ ni riníʼ ca binni ni maʼ bisaana xquidxi Dios.

21. ¿Xidé nuunu seguru neca stale binni qué riná gucaadiaga mensaje stinu tiempu riʼ?

²¹ Lu primé siglu que stale binni qué ñuni crecaʼ Jesús ne bicaanacaʼ laabe. Peru laaca guyuu stale tu biʼniʼ cré laabe, ládecabe nuu ti hombre ni guyuu lu Sanedrín ne zaqueca biʼniʼ cré «ti grupu naroʼbaʼ de sacerdote» laabe (Hech. 6:7; Mat. 27:57-60; Mar. 15:43). Tiempu riʼ, millón de binni maʼ zinanda Jesús. ¿Xiñee yaʼ? Purtiʼ nadxiicabe guiráʼ ni zeeda lu Biblia. Stiidxaʼ Dios ná: «Nexhedxí ladxidóʼ ca ni nadxii ley stiluʼ ne gastiʼ qué zanda gusaba laacaʼ» (Sal. 119:165).