1, 2. ¿Xiñee maʼ gadxé ridúʼyanu caadxi conseju ni zeeda lu Biblia ora ruchaa xquendanabáninu?

 BEDANDÁ dxi guichaganáʼ novio ne novia ca. Guizáʼ zuchaahuicabe cucaadiágacabe ca conseju ni zeeda lu Biblia ni cudii hermanu ni cudii discursu stícabe. Maʼ runibiáʼcabe ca conseju ca. Peru yanna maʼ naquiiñeʼ chinándacabe ni purtiʼ maʼ bichaganácabe.

² Ngaca nga rizaaca ora cusiniisi binni xiiñiʼ. Zándaca stale guendaxheelaʼ maʼ binadiágacaʼ stale discursu ni caníʼ ximodo naquiiñeʼ gusiniisi binni xiiñiʼ. Peru óraruʼ maʼ nápacabe xiiñicabe nga rinándacabe ca conseju ca. ¡Ti dxiiñaʼ naroʼbaʼ nga rapa ca guendaxheelaʼ ca ora maʼ nápacaʼ xiiñicaʼ! Racá ridúʼyanu ora guchaa xquendanabáninu maʼ gadxé modo ridúʼyanu ca principiu ni zeeda lu Biblia ni runibiáʼ chaahuinu. Nga runi laanu, ca xpinni Jehová, ridúʼndanu Biblia «guirá dxi», cásica biʼniʼ ca rey stiʼ Israel ne runi meditarnu ni nani (Deut. 17:19).

3. ¿Xi zadúʼyanu lu artículo riʼ?

³ Padre caʼ, ti privilegiu naroʼbaʼ nga nápatu: gusiiditu ca xiiñitu gunibiacaʼ Jehová. Peru cadi naquiiñeʼ si gusiiditu laacabe de Dios, sínuque laaca naquiiñeʼ gacanetu laacabe gannaxhiicabe Jehová de guidubi ladxidóʼcabe.  ¿Ximodo zanda gúnitu ni yaʼ? Lu artículo riʼ zadúʼyanu tapa principiu ni zeeda lu Biblia ni zacané laatu (2 Tim. 3:16). Laaca zadúʼyanu xi huabeendú caadxi hermanu pur yenándacaʼ ca conseju ni zeeda lu Biblia.

4. ¿Xi principiu zanda gacané ca padre para gacanecaʼ ca xiiñicaʼ gannaxhiicaʼ Jehová de guidubi ladxidoʼcaʼ? (Santiago 1:5).

⁴ Primé: laguyubi gacané Jehová laatu. Para gacanetu ca xiiñitu gannaxhiicaʼ Jehová, caquiiñetu guendabiaaniʼ. Nga runi laguinabaʼ ni laabe (biindaʼ Santiago 1:5). Jehová nga ni jma nanna gudii conseju. ¿Xiñee yaʼ? Purtiʼ laabe nga Bixhózenu ni jma napa experiencia lu guidubi naca universu (Sal. 36:9). Ne sti razón nga purtiʼ ribeendunu ni galán ora rinándanu ca conseju stibe (Is. 48:17).

5. a) ¿Ximodo racané organización stiʼ Jehová ca padre? b) ¿Xi rusiidiʼ videu stiʼ hermanu Amorim ca padre?

⁵ Rudii Jehová ca padre stale guendaró espiritual ni zeeda lu Biblia ne organización stiʼ, ti zacá ganda gacanecaʼ ca xiiñicaʼ gannaxhiicaʼ Jehová (Mat. 24:45). Padre caʼ, zadxélatu stale conseju lu sección «Cani rusiidiʼ Biblia > Guendaxheelaʼ ne Familia» ni nuu lu sitiu jw.org. Zadxélatu stale videu lu sitiu stinu ni nuu lu internet, ni zacané laatu chinándatu ca conseju ni cudii Jehová para gusiniisitu ca xiiñitu (Prov. 2:4-6). b

6. ¿Xi guníʼ ti hermanu ra huayuuyaʼ ximodo huayacané organización stiʼ Jehová laa ne xheelaʼ?

⁶ Stale padre rudiicaʼ xquixe peʼ Jehová purtiʼ racané organización stiʼ laacaʼ. Sicaríʼ guníʼ ti hermanu láʼ Joseph: «Napaʼ chonna xiiñeʼ ne huayaca nagana para laadu gusiniisidu laacabe lu neza stiʼ Jehová. Naa ne xheelaʼ siempre rinábadu Jehová gacané laadu. Ne nuu biaje ora peʼ nápadu xiixa guendanagana riree ti artículo o ti videu ni racané laadu. Siempre rinándadu ca  conseju stiʼ Jehová». Riquiiñeʼ Joseph ne xheelaʼ artículo ne videu para gacanecaʼ ca xiiñicaʼ gaca xhamígucaʼ Jehová.

7. ¿Xiñee nabé risaca gudii ca padre ca ti ejemplu galán ca xiiñicaʼ? (Romanos 2:21).

⁷ Guiropa: lagaca ti ejemplu galán para ca xiiñitu. Nabé ruuyadxí ca xcuidi ni runi bixhózecaʼ ne jñaacaʼ ne despué maʼ laacaʼ rúnicani. Laaca nánnanu cadi perfectu ca padre ca (Rom. 3:23). Peru ca ni nuu xpiaaniʼ rúnicaʼ stipa gudiicaʼ ti ejemplu galán ca xiiñicaʼ (biindaʼ Romanos 2:21). Sicaríʼ guníʼ ti padre: «Naca ca xcuidihuiiniʼ ca casi ti esponja, purtiʼ riaananecaʼ guirá ni ruuyacaʼ ne ni runadiágacaʼ». Laaca guniʼbe: «Ne ora gúʼyacaʼ cadi cayúninu ni cusíʼdinu laacaʼ la? zábicaʼ ni laanu». Nga runi pa racaláʼdxinu gannaxhii ca xiiñinu Jehová, naquiiñeʼ gúʼyacabe laaca nadxiinu Jehová.

8, 9. ¿Xi rusiidiʼ ni bizaaca Andrew ne Emma lii?

⁸ Zanda guni ca padre stale cosa para gusiidicaʼ xiiñicaʼ gannaxhiicaʼ Jehová. Sicaríʼ guníʼ Andrew, ti hermanu de 17 iza: «Huasiidiʼ bixhozeʼ ne jñaaʼ naa nabé risaca nga guneʼ orar. Guiráʼ gueelaʼ runi orarné bixhozeʼ naa, neca maʼ bineʼ oración. Siempre gudxi bixhózedu ne jñaadu laadu zanda guni orardu Jehová guiráʼ biaje gacaláʼdxidu. Ngue runi nabé risaca para naa guneʼ orar. Yanna la? runeʼ sentir galán ora runeʼ orar Jehová, ne ruuyaʼ laabe casi ti padre ni nadxii naa». Padre caʼ, cadi guiaandaʼ laatu pa nadxiitu Jehová la? zacaneni ca xiiñitu.

⁹ Guidúʼyanu ni bizaaca Emma. Dxi bisaana bixhózecabe laacabe biaanané jñaacabe stale deuda. Sicaríʼ guníʼ Emma: «Stale biaje qué rugaanda bueltu stiʼ jñaaʼ. Peru siempre rábibe laadu rapa Jehová ca xpinni ne rudiibe ni caquiiñecaʼ. Ne pur ca decisión ni ricaabe, bidieeʼ cuenta dxandíʼ ngue ni nabe. Bisiidibe naa né ejemplu stibe». ¿Xi rusiidiʼ ndiʼ ca padre yaʼ? Rusiidiʼ ni laacabe neca nápacabe guendanagana, zanda gusiidicabe ca xiiñicabe né ejemplu stícabe (Gál. 6:9).

10. ¿Pora gunda guniʼné ca padre israelita ca xiiñicaʼ? (Deuteronomio 6:6, 7).

¹⁰ Guionna: laguiniʼné ca xiiñitu. Gudxi Jehová ca padre israelita que naquiiñeʼ gusiidicaʼ ca xiiñicaʼ de laabe guiráʼ dxi (biindaʼ Deuteronomio 6:6, 7). Guiráʼ dxi, zanda guiniʼnécabe ca xiiñicabe ne gacanécabe laacaʼ gannaxhiicaʼ Jehová. Ca hombrehuiiniʼ israelita racanecaʼ bixhózecaʼ gudxiibacaʼ o guindísacaʼ cosecha. Ca dxaapahuiiniʼ que la? racanecaʼ jñaacaʼ né ca buelta ni raca ra yoo ne quíbacaʼ. Ca cosa ni bizéʼtenu riʼ, racaneni ca padre iquiiñecaʼ tiempu sticaʼ para guiníʼnecaʼ ca xiiñicaʼ de ca cualidad ni napa Jehová ne ximodo rápabe familia sticaʼ.

11. ¿Pora zanda guiniʼné ca hermanu xiiñicaʼ?

¹¹ Tiempu riʼ, ndaaniʼ stale guidxi huaxiéʼ rapa ca padre tiempu para ca xiiñicaʼ, purtiʼ nuucaʼ ra dxiiñaʼ ne ca xiiñicaʼ nuucaʼ ra scuela. Nga runi, naquiiñeʼ cuee ca padre ca tiempu para ca xiiñicaʼ ne guiníʼnecaʼ laacabe (Efes. 5:15, 16; Filip. 1:10). Padre caʼ, ti cosa ni zacané laatu nga gúnitu adoración en familia. Sicaríʼ guníʼ ti hermanuhuiiniʼ láʼ Alexander: «Siempre ribee bixhozeʼ tiempu para gápadu adoración en familia ne  qué rudiibe lugar chuʼ xiixa ni gucueeza laadu. Ne guilúxhesidu la? maʼ cayuidu diidxaʼ».

12. ¿Xi naquiiñeʼ guietenalaʼdxiʼ xaíque stiʼ ti familia ora maʼ cayúnicaʼ adoración en familia?

¹² ¿Xi zanda guni xaíque stiʼ ti familia para chuulaʼdxiʼ ca xiiñiʼ adoración en familia? Ti cosa ni zanda gúnitu nga guni estudiárnetu laacabe libru ¡Zanda guibániluʼ nayecheʼ! Pa guni estudiartu libru riʼ juntu la? zápatu stale tema galán xidé guiniʼtu. Cumu racaláʼdxitu gabi ca xiiñitu laatu xi runi sentircaʼ ne xi riguu xizaa laacaʼ la? cadi iquiiñetu adoración en familia ca para tindenetu laacabe. Ne pa nuu xiixa ni zeeda lu Biblia cadi cayene chaahuicabe la? cadi guidxiichinetu laacabe. Ni zanda gúnitu nga gudiitu xquixe peʼ laacabe purtiʼ guníʼcabe ni nuu ndaaniʼ ladxidóʼcabe ne lacuu gana laacabe guinabadiidxacabe ne cadi guidxíbicabe. Pa gabi ca xiiñitu laatu xi riníʼ íquecaʼ la? qué zaca nagana para laatu gacanetu laacabe.

13. ¿Pora ruʼ zanda gacané ca padre ca xiiñicaʼ guidxíñacaʼ Jehová?

¹³ Padre caʼ, guirá dxi laguyubi ora para gacanetu ca xiiñitu guidxíñacaʼ Jehová. Cadi ora si cuínetu laacabe para guni estudiartu Biblia nga guiníʼnetu laacabe de Dios ni nadxii laanu. Sicaríʼ guníʼ ti hermana láʼ Lisa: «Naa ne xheelaʼ gucanedu ca xiiñidu gunibiáʼ chaahuicaʼ Jehová pur ca cosa ni bizaʼbe. Casi ora runi biʼcuhuiiniʼ stidu xiixa ni rusixidxi laadu la? rusietenaláʼdxidu ca xiiñidu naca Jehová ti Dios nayecheʼ ne bizáʼ guiráʼ ca cosa ca para guibáninu nayecheʼ».

14. ¿Xiñee nabé risaca gacané ca padre ca xiiñicaʼ cuicaʼ tu gaca xhamígucaʼ? (Proverbios 13:20).

¹⁴ Guidapa: lagacané ca xiiñitu gápacaʼ xhamígucaʼ ni gacané laacaʼ. Qué ruchee diʼ Stiidxaʼ Dios ora riníʼ ca xhamígunu zanda gacanecaʼ laanu o guninacaʼ laanu (biindaʼ Proverbios 13:20). Padre caʼ, ¿ñee nánnatu tuu nga ca xhamigu ca xiiñitu la? ¿Runibiaʼtu laacabe ne huayuninetu laacabe xiixa la?  ¿Xi zanda gúnitu para gacanetu ca xiiñitu gaca xhamígucaʼ ca binni ni nadxii Jehová yaʼ? (1 Cor. 15:33). Ora gúnitu xiixa cosa né familia stitu, laguni invitar ca binni ni dxandíʼ cayuni stipa pur gaca xhamigu Jehová (Sal. 119:63).

15. ¿Xi zanda guni ca padre para gacanecaʼ ca xiiñicaʼ gápacaʼ xhamígucaʼ ni zacané laacaʼ?

¹⁵ Guidúʼyanu xi huayuni Tony ne xheelaʼ para gacanecaʼ ca xiiñicaʼ gápacaʼ xhamígucaʼ ni zacané laacaʼ. Sicaríʼ guníʼ Tony: «Naa ne xheelaʼ maʼ xadxí de runi invitardu ca hermanu ne hermana de gadxé gadxé iza ne gadxé gadxé lugar ra lídxidu, ridoʼdo juntu ne rúninedu laacabe adoración en familia. Para laadu la? sicaríʼ nga ti modo zanda gunibiaʼdu ca binni ni nadxii Jehová ne ni cayuni xhiiñabe né guendanayecheʼ. Ne laaca huayuni hospedardu ca superintendente de circuito, misioneru ne xcaadxi hermanu ra lídxidu. Ca experiencia stiʼ ca hermanu riʼ, guendanayecheʼ stícabe ne sacrificiu ni huayúnicabe lu xhiiñaʼ Jehová huayacaneni ca xiiñidu para chuʼcaʼ jma gaxha de Jehová». Padre caʼ, laguni biaʼ gándatiʼ para gacanetu ca xiiñitu gápacaʼ xhamígucaʼ ni zacané laacaʼ.

16. ¿Xi cadi naquiiñeʼ guiaandaʼ ca padre pa gusaana tobi de ca xiiñicaʼ Jehová?

¹⁶ Yanna, pa neca maʼ bíʼnitu stale stipa para gacanetu ca xiiñitu peru tobi de laacaʼ gábicaʼ laatu maʼ qué racalaʼdxiʼ guni ni ná Jehová yaʼ. Cadi guiníʼ íquetu qué risaca guiráʼ stipa ni bíʼnitu. Maʼ bidii Jehová libertad guiráʼ binni dede né ca xiiñitu para cuicaʼ pa zúnicaʼ ni nabe o coʼ. Pa maʼ bisaana xiiñiluʼ Jehová, cadi guireeluʼ gana zándaca ziuu ti dxi zabiguétabe. Laguietenalaʼdxiʼ ni guníʼ Jesús de hijo pródigo (Luc. 15:11-19, 22-24). Bireechú hombrehuiiniʼ riʼ, peru despué biguetaʼ bíʼnibe ni jneza. Peru zándaca guiníʼ íquetu: «Ti cuentu si ni, qué rizaaca binni nga». Ni bizaaca ti hombrehuiiniʼ láʼ Elie rusihuinni dxandíʼ rizaaca ni.

17. ¿Ximodo racané ni bizaaca Elie lii?

 ¹⁷ Sicaríʼ guníʼ Elie: «Biʼniʼ jñaaʼ ne bixhozeʼ stale stipa para gacanecaʼ naa gannaxhieeʼ Dios ne Stiidxaʼ, Biblia. Peru dxi biniiseʼ maʼ qué nuzuubaʼ stiidxacabe». Nagaʼchiʼ biʼniʼ Elie cosa ni cadi jneza ne qué ninabe ñacané bixhózebe ne jñaabe laabe nibiguetaʼ ñaca xhamígube Jehová. Bisaanabe bixhózebe ne jñaabe ne jmaruʼ si maʼ qué ñúnibe ni ná ca ley stiʼ Jehová. Neca zaqué, guníʼnerube ti xhamígube de Jehová ne de Biblia. Elie guníʼ: «Ra jma gunieniaʼ xhamiguaʼ que, jma guníʼ iqueʼ Jehová. Chaahuidugá, guiráʼ ca cosa ni bisiidiʼ bixhozeʼ ne jñaaʼ naa de lu Biblia bicaani naa guibiguetaʼ guneʼ cosa ni jneza». Gudiʼdiʼ si tiempu, biguetaʼ Elie lu neza ni dxandíʼ. c Cumu de dxi nahuiiniʼ Elie bisiidicabe laa gannaxhii Jehová, ¿ñee ruxuíʼlutu pabiáʼ biecheʼ bixhózebe ne jñaabe dxi biguétabe la? (2 Tim. 3:14, 15).

18. ¿Xi riníʼ íqueluʼ de ca padre ni cayuni stale stipa pur gusiidiʼ ca xiiñiʼ gannaxhii Jehová?

¹⁸ Padre caʼ, maʼ bidii Jehová laatu ti privilegiu guizáʼ naroʼbaʼ, laani nga gacanetu ca xiiñitu gácacaʼ xpinnibe (Sal. 78:4-6). Nánnadu ti dxiiñaʼ nadipaʼ ni, nga runi cayuni felicitardu laatu de guidubi ladxidoʼdo pur laani ne stipa ni cayúnitu. Cadi gusaana de gúnitu guiráʼ ni nuu lu natu para gacanetu ca xiiñitu gannaxhiicaʼ Jehová ne gusiniisitu laacaʼ casi ná ca conseju stiʼ (Efes. 6:4). Pa gúnitu ni, laganna dxichi guizáʼ zusiéchetu Bixhózetu ni nuu guibáʼ pur dxiiñaʼ ni cayúnitu.