1, 2. ¿Xiñee naquiiñeʼ guizaaláʼdxinu gánnanu jma de libru stiʼ Apocalipsis?

 ¿ÑEE hualuíʼ tuuxa lii ca foto stiʼ la? Zándaca biiyaluʼ stale binni ni qué runibiaʼluʼ lu cani. Peru málasi biiyaluʼ ti foto ra caluʼ. Laga cayuuyaluʼ ni caníʼ íqueluʼ padxí ne paraa bireeluʼ foto ca. Laaca nuuluʼ guietenaláʼdxiluʼ tuu nga ca binni ni bireeneluʼ luni, purtiʼ guizáʼ risaca foto riʼ para lii.

² Zanda guininu zeeda gaca libru stiʼ Apocalipsis casi foto ni cadúʼyanu ca. ¿Xiñee yaʼ? Guzéʼtenu chupa razón. Primé la? purtiʼ gucuani para laanu. Sicaríʼ ná ra ruzulú ni: «Ti revelación ni bidii Dios Jesucristu, para guluíʼ ca esclavu stiʼ ca cosa ni mayaca guizaaca» (Apoc. 1:1). Nga runi cadi para guiráʼ diʼ binni nga gucuá libru riʼ, sínuque gucuani para laanu, ca xpinni Dios. Ne qué ridxagayaanu gánnanu cayacanenu para gaca cumplir ca profecía ni zeeda lu ni. Zacá nga casi ñaca canu lu foto ca.

3, 4. Casi ná libru stiʼ Apocalipsis, ¿padxí gaca cumplir ca diidxaʼ ni zeeda luni, ne ximodo zaca cumplir ca ni luguianu?

³ Guiropa razón ca nga tiempu ni naquiiñeʼ tidiʼ para gaca cumplir ca profecía ca. Bizeeteʼ apóstol Juan de tiempu riʼ ora guníʼ: «Biluíʼ espíritu santu naa ca cosa ni chiguizaaca lu dxi stiʼ Señor» (Apoc. 1:10). Biaʼ lu iza 96 nga bicaa apóstol Juan ca diidxaʼ riʼ. Para tiempu bicaabe ca ni, cayaadxaruʼ stale para guedandá «dxi stiʼ Señor»  (Mat. 25:14, 19; Luc. 19:12). Peru ca profecía ni zeeda lu Biblia rusihuinni bizulú dxi ca lu iza 1914, dxi guca Jesús Rey guibáʼ. Ne dede lu iza ca bizulú guca cumplir ca profecía stiʼ Apocalipsis luguiáʼ xquidxi Dios. Nga runi zanda guininu nabáninu lu «dxi stiʼ Señor».

⁴ Cumu nabáninu tiempu cayaca cumplir ca profecía riʼ, cadi naquiiñeʼ guiaandaʼ laanu conseju sicarú ni zeeda lu Apocalipsis 1:3. Ná ni: «Dichoso nga ni guʼndaʼ ca diidxaʼ ni cá lu profecía riʼ en voz alta, ne dichoso nga ca ni gucaadiaga ni ne guni ca cosa ni cá luni, purtiʼ maʼ gaxha nuu tiempu que». Nga runi, naquiiñeʼ guidúʼndanu «ca diidxaʼ ni cá lu profecía riʼ en voz alta», gucaʼdiáganu ca ni ne gúninu ca cosa ni cá luni. Yanna, ¿gunáʼ nga ca diidxaʼ ni zeeda luni ni naquiiñeʼ chinándanu yaʼ?

5. ¿Ximodo rusihuinni libru stiʼ Apocalipsis pabiáʼ risaca nga chuulaʼdxiʼ Jehová modo runi adorarnu laa?

⁵ Dede lu primé capítulo stiʼ Apocalipsis cayabi laanu nanna Jesús guiráʼ ni rizaaca ndaaniʼ ca congregación (Apoc. 1:12-16, 20; 2:1). Rihuinni zacá ni pur ca mensaje ni biseendabe ra nuu ca congregación ni guyuu Asia Menor. Ca conseju ni bicaabe ra nuu ca xpinni Cristu lu primé siglu que gucaneni laacaʼ gánnacaʼ xi naquiiñeʼ gúnicaʼ para chuulaʼdxiʼ Jehová adoración sticaʼ. Ne laaca racané ca conseju riʼ guiráʼ ca xpinni Dios tiempu riʼ. ¿Xi rusiidiʼ ndiʼ laanu yaʼ? Rusiidiʼ ni laanu nanna dxichi Líder stinu, Jesucristu, ximodo nuunu nezalú Jehová. Rábibe laanu paneza chuunu, rápabe laanu ne nanna dxíchibe guiráʼ ni rúninu. Nánnabe xi caquiiñeʼ gúninu para cadi guchéʼnenu Jehová. Yanna, ¿gunáʼ nga ca conseju ni bidiibe ni naquiiñeʼ chinándanu tiempu riʼ yaʼ?

6. a) Casi ná Apocalipsis 2:3, 4, ¿xi guendanagana gupa ca xpinni Cristu de Éfeso? b) ¿Xi rusiidiʼ ni laanu?

⁶ (Biindaʼ Apocalipsis 2:3, 4). Cadi gusaana de gannaxhiinu Jehová cásica bíninu ni dxi binibiaʼnu laa. Ca diidxaʼ ni gudxi Jesús ca xpinni Cristu de Éfeso bisihuinni ni pabiáʼ maʼ biʼniʼ huantarcaʼ ne qué huasaana de gúnicaʼ ni ná Jehová neca cadíʼdicaʼ lu guendanagana. Peru bisaana de gannaxhiicabe Jehová casi bíʼnicabe ni dxi binibiáʼcabe laa. Nga runi naquiiñeʼ guibiguetaʼ gannaxhiicabe Jehová sti biaje ti chuulaʼdxiʼ modo runi adorárcabe laa. Ngaca rizaaca tiempu riʼ, cadi caquiiñeʼ si guni huantarnu guendanagana, sínuque naquiiñeʼ gúninu ni purtiʼ nadxiinu Dios. Qué ruuyaʼ si Jehová ca ni rúninu, laaca ruuyabe xiñee rúninu ca ni. Ribézabe guni adorarnu laabe purtiʼ nadxiinu laabe ne rudiʼnu xquixe peʼ laabe pur ni rúnibe pur laanu (Prov. 16:2; Mar. 12:29, 30).

7. a) Casi ná Apocalipsis 3:1-3, ¿xi guendanagana biʼyaʼ Jesús napa congregación ni guyuu Sardis? b) ¿Xi caquiiñeʼ gúninu?

⁷ (Biindaʼ Apocalipsis 3:1-3). Gatananu ne cueenu bacaandaʼ lunu. Maʼ gadxé guendanagana gupa ca hermanu de congregación ni guyuu Sardis. Neca dxiqué bíʼnicabe xhiiñaʼ Jehová né stale gana, peru bisaana de gúnicabe ni. Nga runi gudxi Jesús laacabe naquiiñeʼ cueecabe bacaandaʼ lúcabe. Laaca caguixhená ca diidxaʼ riʼ laanu. Nánnanu qué rusiaandaʼ Jehová guiráʼ ni rúninu  pur laa (Heb. 6:10). Peru cadi jneza guiníʼ íquenu maʼ cadi naquiiñeʼ gúnirunu jma lu xhiiñaʼ Jehová. Zándaca yanna maʼ qué randa rúninu biaʼ bíninu dxiqué, peru cadi naquiiñeʼ gusaana de gúninu «xhiiñaʼ Señor», gatananu ne cueenu bacaandaʼ dede ora gueeda fin (1 Cor. 15:58; Mat. 24:13; Mar. 13:33).

8. ¿Xi rizíʼdinu de ca diidxaʼ ni gudxi Jesús ca xpinni Cristu de Laodicea? (Apocalipsis 3:15-17).

⁸ (Biindaʼ Apocalipsis 3:15-17). Guni adorarnu Jehová de guidubi ladxidoʼno né stale gana. Lu ca diidxaʼ ni bicaa Jesús ra nuu ca xpinni Cristu de Laodicea, bizeetebe sti guendanagana ni gúpacaʼ. Bichaabacabe guni adorárcabe Jehová. Ngue runi guníʼ Jesús maʼ cadi nayecheʼ nuucabe dede peʼ ñáʼ binni laacabe. Naquiiñeʼ guibiguetaʼ guni adorárcabe Jehová né stale gana sti biaje (Apoc. 3:19). ¿Xi rusiidiʼ ndiʼ laanu yaʼ? Pa maʼ cadi nayecheʼ rúninu xhiiñaʼ Jehová casi bíninu ni dxiqué caquiiñeʼ guiníʼ íquenu pabiáʼ risaca guiráʼ ni rudii Jehová laanu ne organización stiʼ (Apoc. 3:18). Cadi guicá íquenu gápanu stale cosa risaca purtiʼ zuxheleʼ ni laanu de Jehová. Ni racaláʼdxinu nga gúninu ni nabe primé lu xquendanabáninu.

9. Pur ni gudxi Jesús ca congregación de Pérgamo ne Tiatira, ¿xi naquiiñeʼ gúninu?

⁹ Cadi gucaadiáganu ni rusiidiʼ ca apóstata. Gudindené Jesús caadxi xpinni Cristu de Pérgamo purtiʼ cuxhélecaʼ ca hermanu (Apoc. 2:14-16). Peru guluube gana ca xpinni Cristu de Tiatira, ca ni qué ninanda ni rusiidiʼ Binidxabaʼ ne guluube gana laacaʼ cadi guixélecaʼ de lu neza ni dxandíʼ (Apoc. 2:24-26). Gupa xidé guca arrepentir ca xpinni Cristu que, ca ni cadi naguidxi nuu fe stiʼ, purtiʼ bicaadiágacaʼ ca cosa ni rusiidiʼ Binidxabaʼ. Laanu laaca cadi naquiiñeʼ gucaʼdiáganu intiica cosa ni cadi zeeda de Jehová. Zándaca zusihuinni ca apóstata «casi ora runi adorarcaʼ Dios, peru pur modo nabánicaʼ zahuinni cadi dxandíʼ ni» (2 Tim. 3:5). Pa runi estudiarnu Stiidxaʼ Dios la? qué zaca nagana para laanu gucáʼnanu ca cosa ni zeeda de Binidxabaʼ (2 Tim. 3:14-17; Jud. 3, 4).

10. ¿Xiruʼ rizíʼdinu de ni gudxi Jesús congregación stiʼ Pérgamo ne Tiatira?

¹⁰ Cadi guni practicarnu inmoralidad  sexual. Ndaaniʼ congregación de Pérgamo ne Tiatira guyuu sti guendanagana. Guyuu caadxi xpinni Cristu ni biʼniʼ prácticar inmoralidad sexual, ngue runi guluu jneza Jesús laacaʼ (Apoc. 2:14, 20). Ndiʼ rusiidiʼ laanu zadxiichi Jehová pa guni practicarnu inmoralidad sexual neca maʼ zinenu stale iza de cayúninu ni nabe o nápanu privilegiu ndaaniʼ organización stibe (1 Sam. 15:22; 1 Ped. 2:16). Neca zeʼ dxi jma qué runi binni ni jneza, ribeza Jehová guni respetarnu ca ley stiʼ (Efes. 6:11-13).

11. ¿Xi maʼ bizíʼdinu lu ca párrafo ni maʼ gudiʼdiʼ ca? (Biiyaʼ cuadru ni láʼ « Ni rizíʼdinu»).

¹¹ ¿Xi maʼ bizíʼdinu lu ca párrafo riʼ? Maʼ bizíʼdinu nabé risaca chuulaʼdxiʼ Jehová modo runi adorarnu laa. Pa cayúninu xiixa cosa ni cadi jneza naquiiñeʼ guchaʼnu nagueendaca (Apoc. 2:5, 16; 3:3, 16). Bizeeteruʼ Jesús xcaadxi cosa para ca congregación que. ¿Xi laaca ni yaʼ?

12. ¿Xi rusiidiʼ ca diidxaʼ ni gucuá para congregación de Esmirna ne Filadelfia laanu? (Apocalipsis 2:10).

¹² Guidúʼyanu yanna xi gudxi Jesús congregación ni guyuu Esmirna ne Filadelfia. Gúdxibe laacaʼ cadi guidxíbicaʼ ora sananda binni laacaʼ purtiʼ zaguu Jehová ndaayaʼ stipa ni gúnicaʼ pa cadi gucheenecaʼ laabe (biindaʼ Apocalipsis 2:10; 3:10). ¿Xi rusiidiʼ ca diidxaʼ ni guníʼ Jesús laanu? Rusiidiʼ ni laanu zazananda binni laanu ne naquiiñeʼ chuʼnu listu para guni huantarnu ni (Mat. 24:9, 13; 2 Cor. 12:10). ¿Xiñee nabé risaca gánnanu ndiʼ?

13, 14. ¿Xi huazaaca ca xpinni Dios pur ca cosa ni riete lu capítulo 12 stiʼ Apocalipsis?

¹³ Lu libru stiʼ Apocalipsis riete zazanándacabe ca xpinni Dios lu «dxi stiʼ Señor», o tiempu nabáninu riʼ. Lu capítulo 12 riete «bizulú ti guerra guibáʼ» despué de bizulú cayuni mandar Reinu stiʼ Dios. Gudindené Jesucristu ne ca ángel stiʼ, Binidxabaʼ ne ca demonio (Apoc. 12:7, 8). Biniti ca enemigu stiʼ Dios ne gulacaʼ lu Guidxilayú riʼ ne pur nga nabé runinácabe binni (Apoc. 12:9, 12). Peru ¿xi huazaaca ca xpinni Dios pur nga yaʼ?

¹⁴ Apocalipsis ruzeeteʼ xi biʼniʼ Binidxabaʼ. Cumu guládxicabe laabe guibáʼ la? nga runi cucaalube ca ungidu, ca representante stiʼ Reinu stiʼ Dios ni nuu lu Guidxilayú, ne cudiicaʼ «testimonio de Jesús» (Apoc. 12:17; 2 Cor. 5:20; Efes. 6:19, 20). ¿Ximodo cayaca cumplir profecía riʼ yaʼ?

15. ¿Tuu nga «chupa testigu» ni riete lu capítulo 11 stiʼ Apocalipsis, ne xi bizaacacabe?

 ¹⁵ Bicaa Binidxabaʼ ca enemigu stiʼ Dios gucaalucaʼ ca hermanu ungidu, ca ni biʼniʼ dirigir dxiiñaʼ de gaca predicar. Ládecabe guyuu hermanu ni gupa stale responsabilidad ndaaniʼ xquidxi Dios. Laacabe nga «chupa testigu» b ni riete lu libru stiʼ Apocalipsis ne zuuti ca enemigu stiʼ Dios laacabe (Apoc. 11:3, 7-11). Lu iza 1918, bigaanicabe donda ique xhono hermanu ni biʼniʼ dirigir dxiiñaʼ stiʼ Dios ne gucuaacabe sentencia para guiaanacabe stale iza ndaaniʼ cárcel. Ruluíʼ raqué nga biluxe dxiiñaʼ que.

16. ¿Xi bizaaca lu iza 1919, ne xi huayuni Binidxabaʼ dede dxiqué?

¹⁶ Profecía ni zeeda lu capítulo 11 stiʼ Apocalipsis laaca caniʼni zabani guiropaʼ testigu que sti biaje despué de ti tiempu. Ne guca cumplir profecía riʼ ante guizaa ti iza de deguyoo ca hermanu que. Lu beeu marzo iza 1919, biree ca hermanu riʼ de ndaaniʼ cárcel, purtiʼ qué nidxélacabe donda luguiacaʼ. Nagueendaca biguetaʼ biʼniʼ dirigir ca hermanu riʼ dxiiñaʼ stiʼ Reinu sti biaje. Peru dede dxiqué, qué huasaana Binidxabaʼ de gucaalú ca xpinni Dios (Apoc. 12:15). Nga runi caquiiñeʼ guni huantarnu ne gápanu fe (Apoc. 13:10).

17. ¿Ximodo huayacané Jehová ca xpinni neca huacaalú Binidxabaʼ laacaʼ?

¹⁷ Despué, lu capítulo 12 stiʼ Apocalipsis caníʼ gucané Dios ca xpinni purtiʼ raqué ná «bixheleʼ ruaa guidxilayú ne gubi guiiguʼ» que, ndiʼ riníʼ bisaana de sanándacabe ca xpinni Dios (Apoc. 12:16). Ne nga peʼ nga ni huazaaca. Nuu biaje huayacané ca ley ni riguixhe gobiernu xquidxi Dios. Stale biaje huayuni ganar ca xpinni Jehová nezalú tribunal ne huadiicabe laacaʼ libertad para guni adorarcaʼ Dios. Riquiiñecabe libertad ca para gúnicabe dxiiñaʼ ni bisaanané Jehová laacabe (1 Cor. 16:9). ¿Xii nga dxiiñaʼ ni bisaananebe laanu yaʼ?

18. ¿Gunáʼ nga dxiiñaʼ ni jma risaca para laanu lu ca últimu dxi riʼ?

¹⁸ Jesús guníʼ zuni predicar ca discípulo  stiʼ «ca noticia galán stiʼ Reinu lu guidubi guidxilayú» ante gueeda fin (Mat. 24:14). Para gúnicabe dxiiñaʼ riʼ racané ti ángel o stale ángel laacabe, ni canacaaʼ «noticia galán ni qué ziuu dxi guinitilú para ca binni ni nabeza lu guidxilayú: binni de guiráʼ nación, tribu, idioma ne guidxi» (Apoc. 14:6).

19. ¿Xi sti mensaje zuni predicar ca binni ni nadxii Jehová?

¹⁹ Peru cadi runi predicar si ca xpinni Dios ca noticia galán stiʼ Reinu. Laaca racanécabe ca ángel ni riete lu capítulo 8 hasta 10 stiʼ Apocalipsis. Caníʼ ca ángel riʼ guirá guendananá chigueeda luguiáʼ ca ni cucaanaʼ Reinu stiʼ Dios. Nga runi laanu, ca testigu stiʼ Jehová cudiʼnu ti mensaje nadipaʼ ni zeeda gaca casi «granizu ne guí». Mensaje riʼ caniʼni xi chiguni Dios guiráʼ sistema ni nuu lu guidxilayú stiʼ Binidxabaʼ (Apoc. 8:7, 13). Caquiiñeʼ ganna binni mayaca guinitilú guidxilayú malu riʼ. Zacá zanda guchaacaʼ ne guilacaʼ dxi gueeda xiana stiʼ Jehová (Sof. 2:2, 3). Peru, cumu stale binni qué riuulaʼdxiʼ gunadiaga mensaje riʼ la? nga runi naquiiñeʼ gácanu nadxibalú. Ne lu gran tribulación jma nadipaʼ mensaje ni zudiʼnu binni (Apoc. 16:21).

20. ¿Xi zazíʼdinu lu xhupa artículo ca?

²⁰ Nabé risaca chinándanu «ca diidxaʼ ni cá lu profecía» stiʼ Apocalipsis purtiʼ laaca nuunu lu foto que o cayacanenu gaca cumplir ni ná ca profecía stini (Apoc. 1:3). Peru ¿ximodo zanda guni huantarnu ora sanándacabe laanu ne guni predicarnu ca mensaje riʼ sin guidxíbinu yaʼ? Nuu chupa cosa ni zacané laanu gúninu ni: primé la? gánnanu xi ruzeeteʼ Apocalipsis zazaaca ca enemigu stiʼ Dios, ne guiropa, gánnanu ca ndaayaʼ ni zacaanu pa qué guchéʼnenu Dios. Lu xhupa artículo ca zazíʼdinu de laacani.