1. ¿Xi decisión nabé risaca naquiiñeʼ guicaa binni?

 TIEMPU riʼ, naquiiñeʼ guicaa binni ti decisión nabé risaca: ¿zúnicabe ni ná Jehová, ni runi mandar lu guidubi naca universu la? o zúnicabe ni ná Binidxabaʼ, enemigu stiʼ Dios? Naquiiñeʼ guicaacabe decisión ca pa racaláʼdxicabe guibánicabe sin qué chuʼ dxi gáticabe (Mat. 25:31-33, 46). Lu gran tribulación zacá ca xpinni Jehová ni qué guchee ti marca para guilacaʼ (Apoc. 7:14; Ezeq. 9:4, 6). Ne zanitilú ca binni ni guicá marca stiʼ bestia salvaje (Apoc. 14:9-11).

2. a) ¿Xi cayabi Hebreos 10:35-39 laanu gúninu? b) ¿Ximodo racané libru stiʼ Apocalipsis laanu?

² (Biindaʼ Hebreos 10:35-39). Pa maʼ cayúniluʼ ni ná gobiernu stiʼ Jehová guizáʼ jneza decisión gucuaaluʼ. Zándaca laaca racaláʼdxiluʼ gacaneluʼ xcaadxi gúnini. Zanda gacané libru stiʼ Apocalipsis lii gúniluʼ ni. Zacaneni lii gánnaluʼ xi zazaaca ca binni ni rucaalú Jehová. Ne laaca zánnaluʼ xii nga ca ndaayaʼ ni zacaa ca binni ni guni ni ná gobiernu stiʼ Dios. Guizáʼ galán guni estudiarnu ni rusiidiʼ libru stiʼ Apocalipsis purtiʼ zacané ca ni laanu quixhe íquenu gúninu jma lu xhiiñaʼ Jehová. Ne laaca zanda iquiiñenu ni maʼ bizíʼdinu para gacanenu xcaadxi guicaacaʼ decisión jneza ne cadi guireecaʼ gana.

3. ¿Gunáʼ nga ca pregunta ni zacábinu lu artículo riʼ?

³ Lu artículo riʼ zacábinu ca pregunta riʼ: ¿xi zazaaca ca ni cayuni ni ná gobiernu stiʼ Dios? ne ¿xi zazaaca ca ni  guni ni ná bestia salvaje naxiñáʼ rini ni riete lu libru stiʼ Apocalipsis?

4. ¿Tu biʼyaʼ apóstol Juan zuhuaané Jesús guibáʼ?

⁴ Lu ti visión, biiyaʼ apóstol Juan chupa grupu de binni ni cayuni ni ná gobiernu stiʼ Jehová ne cacaacaʼ guendanabani ni qué zaluxe ne stale ndaayaʼ. Lu primé grupu ca nuu 144,000 binni (Apoc. 7:4). Guirácabe de lu Guidxilayú riʼ laacabe ne ziécabe guibáʼ para guni mandarnécabe Jesús lu ti Reinu o gobiernu. Ne zuni mandárcabe Guidxilayú riʼ (Apoc. 5:9, 10; 14:3, 4). Biiyaʼ Juan zuhuaanécabe Jesús lu dani Sion guibáʼ (Apoc. 14:1).

5. ¿Xi zazaaca ca xpinni Cristu ungidu ni nuuruʼ lu Guidxilayú?

⁵ Dede dxi bibani ca apóstol hasta tiempu riʼ, cabí Jehová binni para chuʼcaʼ lade 144,000 (Luc. 12:32; Rom. 8:17). Peru lu visión que laaca binadiaga Juan maʼ xcaadxi si binni ni nuu lu grupu que zabani lu ca últimu dxi. Ante guzulú gran tribulación, ca xpinni Cristu ungidu ni nuuruʼ lu Guidxilayú, zacacaʼ ti «sellu» ni qué zaxiá ni culuíʼ maʼ stiʼ Jehová laacaʼ (Apoc. 7:2, 3; 12:17). Ne ora maʼ nuunu lu gran tribulación, zié ca ungidu ni nuuruʼ lu Guidxilayú guibáʼ para chuʼcaʼ ra nuu xcaadxi ungidu ni maʼ nuu raqué, zacá nga guizaa 144,000. Zuni mandarnécabe Jesús lu Reinu stiʼ Dios (Mat. 24:31; Apoc. 5:9, 10).

6, 7. a) ¿Xi sti grupu biʼyaʼ Juan, ne xi nánnanu de laacabe? b) ¿Xiñee naquiiñeʼ ganna ca ungidu ne gran muchedumbre ni zeeda lu capítulo gadxe stiʼ Apocalipsis?

⁶ Despué de biiyaʼ Juan grupu riʼ guibáʼ, laaca biiyabe «stale binni» o ti gran muchedumbre. Maʼ gadxé grupu riʼ de 144,000 que, purtiʼ guirutiʼ zanda ugabaʼ laacabe (Apoc. 7:9, 10; nota). ¿Xi nánnanu de grupu riʼ yaʼ? Juan binadiaga: «Laacabe nga ca ni gudiʼdiʼ lu stale yuubaʼ ne maʼ gudiibicabe xhábacabe ne maʼ bisiquíchicabe ni né rini stiʼ Dendxuhuiiniʼ» (Apoc. 7:14). Tidiʼ si ca binni riʼ o gran muchedumbre lu gran tribulación, zabánicaʼ lu Guidxilayú riʼ ne zacaacaʼ stale ndaayaʼ (Sal. 37:9-11, 27-29; Prov. 2:21, 22; Apoc. 7:16, 17).

⁷ Pa gulí Dios laanu para chuunu guibáʼ o para guibáninu lu Guidxilayú, ¿ñee ridúʼyanu né laanu nuunu «lu foto» ni riete lu capítulo gadxe stiʼ Apocalipsis la? o ¿ñee runi crenu zaca cumplir ca cosa ni riete lu Apocalipsis la? Guizáʼ galán ca ndaayaʼ ni chiguicaa guiropaʼ grupu riʼ. Ziuʼnu nayecheʼ purtiʼ gudixhe íquenu gúninu ni ná gobiernu stiʼ Jehová. ¿Xiruʼ riete lu libru stiʼ Apocalipsis zazaaca lu gran tribulación yaʼ? (Mat. 24:21).

8. ¿Ximodo zuzulú gran tribulación, ne xi zuni stale binni?

⁸ Casi bidúʼyanu lu artículo ni gudiʼdiʼ que, maʼ cadi candaa zucaalú guiráʼ gobiernu políticu Babilonia guidxi roʼ, laani nga guiráʼ religión falsu ni nuu lu Guidxilayú (Apoc. 17:16, 17). Racá nga guzulú gran tribulación. ¿Ñee zucaa nga guiráʼ binni guni adorarcaʼ Jehová la? Coʼ. Lu capítulo xhoopaʼ stiʼ Apocalipsis riete zuyubi ca binni ni qué runi ni ná Jehová guilacaʼ ra nuu ca gobiernu políticu ne sistema comercial stiʼ Guidxilayú riʼ. Ruchaaga Biblia ca sistema riʼ casi dani. Cumu qué zuyubi ca binni ca Reinu stiʼ Dios la? zuuyaʼ Jehová laacabe  casi enemigu stiʼ (Luc. 11:23; Apoc. 6:15-17).

9. ¿Xiñee zuyadxí stale binni xquidxi Jehová lu gran tribulación, ne xi zazaaca?

⁹ Lu gran tribulación, guizáʼ zuyadxícabe ca xpinni Jehová. Purtiʼ laasicaʼ nga grupu ni guni ni ná Jehová lu Guidxilayú riʼ ne qué zanacaʼ gúnicaʼ ni ná «bestia salvaje» (Apoc. 13:14-17). Guizáʼ zadxiichi ca enemigu stiʼ Jehová ora gúʼyacaʼ cadi caxélenu de laabe. Ne pur nga zucaalú ti grupu de guidxi roʼ xquidxi Dios lu guidubi Guidxilayú. Biblia ribee lani ora gucaalú Gog de Magog laanu (Ezeq. 38:14-16).

10. Casi ná Apocalipsis 19:19-21, ¿xi zuni Jehová ora gucaalúcabe xquidxi?

¹⁰ ¿Xi zuni Jehová ora gucaalúcabe xquidxi yaʼ? Laapebe maʼ guniʼbe zusihuínnibe xiana stibe (Ezeq. 38:18, 21-23). Lu capítulo 19 stiʼ Apocalipsis cusiene xi chiguizaaca. Zuseendaʼ Jehová Xiiñiʼ para gulá xquidxi ne gunitilú ca enemigu stiʼ. Cadi stubi si Jesús chitinde, zacané «ca ejércitu ni nuu guibáʼ laabe», laacabe nga guiráʼ ángel stiʼ Dios ne 144,000 (Apoc. 17:14; 19:11-15). ¿Xi zazaaca lu guerra riʼ yaʼ? Zanitilú guiráʼ binni ne organización ni rucaalú Jehová (biindaʼ Apocalipsis 19:19-21).

11. ¿Gunáʼ nga ti cosa guizáʼ galán ni ruzeeteʼ libru stiʼ Apocalipsis chiguizaaca?

¹¹ Guizáʼ ziecheʼ ca xpinni Cristu ni guilá ora gunitilú Dios ca enemigu stiʼ. Laaca ziecheʼ ca ni nuu guibáʼ ora guinitilú Babilonia guidxi roʼ. Peru nuu sti cosa ni jma zusiecheʼ guiráʼ ca xpinni Dios (Apoc. 19:1-3). Apocalipsis ruzeeteʼ laani nga: «boda stiʼ Dendxuhuiiniʼ» (Apoc. 19:6-9).

12. ¿Padxí gaca boda stiʼ Dendxuhuiiniʼ? (Apocalipsis 21:1, 2).

¹² ¿Padxí chigaca boda riʼ yaʼ? Neca maʼ nuu 144,000 riʼ guibáʼ ante guzulú Armagedón, cadi dxi ca diʼ nga chigaca boda stiʼ Dendxuhuiiniʼ (biindaʼ Apocalipsis 21:1, 2). Zaca boda ca despué de Armagedón, ora maʼ binitilú guiráʼ ca enemigu stiʼ Dios (Sal. 45:3, 4, 13-17).

13. ¿Xi zabeendú ca ni guni participar lu boda stiʼ Dendxuhuiiniʼ?

¹³ ¿Xi zabeendú ca ni guni participar lu boda stiʼ Dendxuhuiiniʼ yaʼ? Lu ti boda la? richaganáʼ ti hombre ne ti gunaa. Yanna lu boda ni riete lu Apocalipsis, zachaganáʼ Rey, Jesucristu, ne novia stiʼ, 144,000. Ra gaca boda riʼ, zuzulú zuni mandar Jesús né 144,000 lu Guidxilayú 1,000 iza (Apoc. 20:6).

14, 15. ¿Xi ruchaaga Apocalipsis 21 que 144,000? (Biiyaʼ dibuju ni zeeda lu portada).

¹⁴ Lu capítulo 21 stiʼ Apocalipsis ruchaagani 144,000 né ti guidxi ni guizáʼ sicarú ni láʼ «Jerusalén Nacubi» (Apoc. 21:2, 9). Zuba «guidxi que lu 12 guié», ne lú cada tobi de guié que «cá 12 nombre stiʼ 12 apóstol stiʼ Dendxuhuiiniʼ». Zándaca guizáʼ bidxagayaa Juan ora biʼyaʼ ndiʼ. ¿Xiñee yaʼ? Purtiʼ biiyabe cá labe lu tobi de ca guié que. ¡Pabiáʼ sicarú privilegiu ca! (Apoc. 21:10-14; Efes. 2:20).

¹⁵ Gástiruʼ sti guidxi casi ni ruzeeteʼ Apocalipsis riʼ. De oro puru calle principal stiʼ guidxi que, ne 12 perla nga 12 puertaʼ stini. Muru stiʼ guidxi que ne ca base stini zuchaahuiʼ ca ni né guiráʼ  clase guié sicarú ne cuadradu guidxi que (Apoc. 21:15-21). Peru bidii Juan cuenta cayaadxaʼ xiixa. ¿Xii ni yaʼ? Laabe guniʼbe: «Qué ñuuyaʼ nin ti templu ndaaniʼ guidxi que, purtiʼ Jehová Dios, ni jma napa poder nga templu stini, laa ne Dendxuhuiiniʼ que. Cadi caquiiñeʼ diʼ guzaaniʼ gubidxa ne beeu ndaaniʼ guidxi que, purtiʼ gloria stiʼ Dios nga ruzaaniʼ ndaaniʼ ni ne Dendxuhuiiniʼ que nga lámpara stini» (Apoc. 21:22, 23). Ca ni chigaca parte de Jerusalén Nacubi, ziuucaʼ ra nuu Jehová (Heb. 7:27; Apoc. 22:3, 4). Ngue runi bizeetebe Jehová ne Jesús nga templu stiʼ guidxi que.

16. ¿Xi guiráʼ ndaayaʼ zacaa binni ora maʼ guni mandar Reinu stiʼ Dios ti mil iza?

¹⁶ Guizáʼ riecheʼ ca ungidu ora guiníʼ íquecaʼ guidxi riʼ. Peru laaca naquiiñeʼ guiecheʼ ca xpinni Cristu ni chiguibani lu Guidxilayú. Ora maʼ cayuni mandar Reinu stiʼ Dios ti mil iza, zedané Jerusalén Nacubi stale ndaayaʼ lu Guidxilayú. Biiyaʼ Juan zeeda gaca ca ndaayaʼ que casi ti guiiguʼ ni napa «nisa de guendanabani» ne «guriá guiiguʼ que zuhuaa yaga de guendanabani [...] Ne riquiiñeʼ bandaga stícani para guianda guiráʼ nación» (Apoc. 22:1, 2). Guiráʼ binni ni guibani lu Guidxilayú riʼ tiempu ca, zuuyacaʼ guiráʼ ca ndaayaʼ sicarú ca. Ne guiráʼ binni guzuubaʼ diidxaʼ, chaahuidugá zácacaʼ perfectu. Maʼ qué ziuu guendahuará, nin yuubaʼ ne maʼ guirutiʼ tu zuunaʼ (Apoc. 21:3-5).

17. ¿Tuu nga ca ni zacaa ca ndaayaʼ ni guedané Reinu stiʼ Dios lu ti mil iza? (Apocalipsis 20:11-13).

¹⁷ ¿Tu laa guʼyaʼ ca ndaayaʼ sicarú ca yaʼ? Laacabe nga gran muchedumbre ni zalá lu Armagedón ne ca baʼduhuiiniʼ ni gale lu guidxilayú nacubi. Peru cadi laasicabe. Lu capítulo 20 stiʼ Apocalipsis riete zabani stale binni ni maʼ guti (biindaʼ Apocalipsis 20:11-13). ¿Tuu nga ca ni ziasa para guibani lu Guidxilayú riʼ yaʼ? Ziasa «ca ni biʼniʼ ni jneza», laacabe nga ca xpinni Jehová ni bizuubaʼ diidxaʼ ni bibani dxiqué. Laaca ziasa «ca ni qué ñuni ni jneza», laacabe nga ca binni ni qué ñunibiáʼ Jehová (Hech. 24:15; Juan 5:28, 29). Yanna lu ti mil iza ca, ¿ñee ziasa guiráʼ xixé binni ni maʼ  guti la? Coʼ. Ca ni qué niná ñuni ni ná Jehová ante ñáticaʼ maʼ qué zabánicaʼ. Gúpacabe tiempu niziidicabe de Jehová peru qué ñúnicabe ni, ne qué nusihuínnicabe racaláʼdxicabe guibánicabe ndaaniʼ Paraísu (Mat. 25:46; 2 Tes. 1:9; Apoc. 17:8; 20:15).

18. ¿Xi zazaaca guiráʼ binni ora guiluxe ti mil iza?

¹⁸ Ra guiluxe ti mil iza, guiráʼ ca ni guibani lu Guidxilayú zácacaʼ perfectu. Maʼ guirutiʼ qué zuni sufrir pur pecadu ni bisaanané Adán laanu (Rom. 5:12). Maʼ qué zahuinni guiráʼ cosa malu ni bizaaca pur pecadu stiʼ Adán. Nga runi zanda guininu óraruʼ guizaa ti mil iza ca, óraca ruʼ nga dxandíʼ zabani guiráʼ binni purtiʼ maʼ zácacaʼ perfectu (Apoc. 20:5).

19. ¿Xiñee naquiiñeʼ tidiʼ binni lu ti últimu prueba?

¹⁹ Guca Jesús ti hombre perfectu dxi guyuu lu Guidxilayú, ne qué nucheené Dios neca gudixhe Binidxabaʼ stale prueba nezalú. Peru ¿ñee zacaca zuni guiráʼ binni ora gucaa Binidxabaʼ laacaʼ gucheecaʼ la? Ora guiluxe ti mil iza ne guilaa Binidxabaʼ cada tobi zusihuinni pa qué zucheené Jehová (Apoc. 20:7). Ca ni qué gucheené Jehová lu últimu prueba zacaacaʼ guendanabani ni qué zaluxe ne dxandíʼ peʼ zácacaʼ libre (Rom. 8:21). Peru ca ni qué naʼ guzuubaʼ diidxaʼ, zanitilucaʼ para siempre, cásica chiguinitilú Binidxabaʼ né ca demonio stiʼ (Apoc. 20:8-10).

20. ¿Ximodo runi sentirluʼ ra maʼ bidúʼndanu ca profecía ni zeeda lu Apocalipsis?

²⁰ ¿Xi runi sentirluʼ yanna ra maʼ bidúʼndanu caadxi cosa ni riete lu libru stiʼ Apocalipsis? ¿Ñee riécheluʼ cayuuyaluʼ lii «lu foto» ra cayaca cumplir ca profecía riʼ la? ¿Ñee rucaani lii guni invitarluʼ xcaadxi binni guni adorarcaʼ Dios stinu la? (Apoc. 22:17). Ra maʼ bidúʼndanu guiráʼ ca cosa ni chiguizaaca, guizáʼ nuunu nayecheʼ ne racaláʼdxinu guininu casi guníʼ apóstol Juan: «¡Amén! Gudáʼ Señor Jesús» (Apoc. 22:20).