1. ¿Ximodo ruzeeteʼ Biblia naca guendarannaxhii ni dxandíʼ?

 SICARÍʼ ruzeeteʼ Biblia de guendarannaxhii ni dxandíʼ: «Bele stini nga bele naroʼbaʼ, bele stiʼ Jah. Nin nisa jma ziáʼ qué zanda gusuíʼ guendarannaxhii, ne qué zanda chiné ca guiiguʼ ni» (Cant. 8:6, 7). b ¡Nabé galán ca diidxaʼ riʼ! Rusihuinni ca ni zanda gaca guendarannaxhii ni napa ca ni maʼ bichaganáʼ nadipaʼ ne qué chuʼ dxi guirá ni.

2. ¿Xi zanda guni ca ni maʼ bichaganáʼ para cadi guirá guendarannaxhii ni nápacaʼ?

² Para cadi guirá guendarannaxhii ni napa ca guendaxheelaʼ ca la? caquiiñeʼ guni guirópacabe stipa. Guiníʼ íquenu bíninu ti guí ne para cadi guizuíʼ ni la? caquiiñeʼ cuʼnu yaga luni. Zaqueca rizaaca né ca ni maʼ bichaganáʼ: caquiiñeʼ guluiʼcaʼ nadxiisaacaʼ ti cadi guirá guendarannaxhii sticaʼ. ¿Xiñee yaʼ? Purtiʼ zanda guizuíʼ bele stiʼ guendarannaxhii stícabe pur ca guendanagana ni guidxaagalúcabe casi guiaadxaʼ laacabe bueltu, gaca huarácabe o gápacabe guendanagana ora maʼ cusiniisicabe xiiñicabe. Yanna, pa maʼ bichaganaluʼ, ¿xi zanda gúniluʼ para cadi guizuíʼ «bele stiʼ Jah» yaʼ? Lu artículo riʼ zadúʼyanu chonna cosa ni zacané ca ni maʼ bichaganáʼ chuʼcaʼ nayecheʼ ne cadi guirá guendarannaxhii sticaʼ. c

3. ¿Xiñee caquiiñeʼ ca ni maʼ bichaganáʼ gaca xhamígucaʼ Jehová? (Eclesiastés 4:12; biiyaʼ imagen ca).

³ Para cadi guizuíʼ «bele stiʼ Jah» la? caquiiñeʼ guni ca ni maʼ bichaganáʼ stipa para gaca xhamígucaʼ Jehová.  ¿Xiñee yaʼ? purtiʼ pa risaca para laacabe gaca xhamígucabe Jehová la? zacané ni laacabe chinándacabe ca conseju stiʼ. Ne neca guidxagalúcabe intiica guendanagana qué zusaana de gannaxhiicabe (biindaʼ Eclesiastés 4:12). Nga runi, ca ni naca xhamigu Jehová rúnicaʼ stipa gusihuínnicaʼ ca cualidad ni nápabe, casi gácacaʼ nachaʼhuiʼ, gápacaʼ paciencia ne gutiidiláʼdxicaʼ (Efes. 4:32–5:1). Ora rusihuinni ca ni maʼ bichaganáʼ ca cualidad riʼ la? riroobaʼ guendarannaxhii ni nápacaʼ. Ti hermana láʼ Lena, ni maʼ ziné jma de 25 iza de bichaganáʼ guníʼ: «¡Nin cadi nagana nga gannaxhiiluʼ ne guni respetarluʼ ti binni ni runi stipa chuʼ gaxha de Jehová!».

4. ¿Xiñee gulí Jehová José ne María para gácacaʼ bixhozeʼ Mesías?

⁴ Guzéʼtenu ti ejemplu ni zeeda lu Biblia. Lade guiráʼ ca ni zá de David gulí Jehová José ne María para gácacaʼ bixhoze Mesías. ¿Xiñee laapecabe nga gulibe yaʼ? Purtiʼ xhamígube laacaʼ ne nánnabe zuyúbicaʼ laabe para gacanebe laacaʼ lu xquendaxheelacaʼ. ¿Xi zanda guiziidiʼ ca ni maʼ bichaganáʼ de ejemplu stiʼ José ne María yaʼ?

5. ¿Ximodo zanda chinanda ca hombre ni maʼ bichaganáʼ ejemplu stiʼ José?

⁵ Siempre biyubi José gacané Jehová laa ne pur nga nácabe ti ejemplu galán para ca hombre ni maʼ bichaganáʼ. Chonna biaje gudxi Dios laabe xi caquiiñeʼ guninebe familia stibe. Ne nagueendaca biʼniʼ José ni neca nagana guca ni para laa (Mat. 1:20, 24; 2:13-15, 19-21). Pur bizuubaʼ José stiidxaʼ Jehová biiyabe ne gúpabe María, ne pur ngue guizáʼ gunnaxhii ne biʼniʼ respetar María laabe. Laatu ca ni maʼ bichaganáʼ zanda gácatu casi José ne guyúbitu chinándatu ni ná ca conseju zeeda lu Biblia ni zacané laatu gúʼyatu ne gápatu familia stitu. d Ne ora gúnitu ni ná ca ni neca gaca ni nagana para laatu la? zusihuínnitu dxandíʼ nadxiitu xheelatu ne laaca zacané ni laatu chuʼtu tobi si. Ti hermana de guidxi Vanuatu ni maʼ ziné jma de 20 iza de bichaganáʼ guníʼ: «Jma runeʼ respetar xheelaʼ ora ruuyaʼ rinábabe Jehová gacané laabe ne rinándabe ca conseju stiʼ. Racané ni naa gannaʼ dxiicheʼ ne gapaʼ confianza jneza ca decisión ni ricaabe».

6. ¿Xi rusiidiʼ ejemplu stiʼ María ca gunaa ni maʼ bichaganáʼ?

⁶ Guizáʼ guca xhamiga María Jehová. Runibiáʼ chaahuiʼ María Stiidxaʼ Dios ne laapebe nga biyúbibe gaca fe stibe naguidxi (biiyaʼ nota de estudiu stiʼ Lucas 1:46). Laaca gulee María tiempu para guiníʼ ique ni ná lu Stiidxaʼ Dios (Luc. 2:19, 51).  Cumu siempre biyubi María chuʼ gaxha de Jehová la? nácabe ti ejemplu galán para ca gunaa ni maʼ bichaganáʼ. Ne stale hermana rúnicaʼ stipa chinándacaʼ ejemplu stibe. Guidúʼyanu ni bizaacaʼ ti hermana ni láʼ Emiko, laa guníʼ: «Ante guichaganaʼyaʼ stubeʼ runeʼ ca cosa ni guchiña naa gaxha de Jehová. Peru ra maʼ bichaganayaʼ la? maʼ xheelaʼ nga runi orar pur guirópadu ne ruuyabe xi caquíʼñedu para chuʼdu gaxha de Jehová. Peru bidieeʼ cuenta maʼ ribezaʼ laabe nga gúnibe ca ni. Yanna, pa racalaʼdxeʼ gacaʼ xhamiguaʼ Jehová la? caquiiñeʼ guneʼ xiixa, ngue runi maʼ ribeeʼ tiempu para chuaaʼ stubeʼ ti ganda guneʼ orar Jehová, guundaʼ Stiidxaʼ ne guiníʼ iqueʼ ni cayuundaʼ» (Gál. 6:5). Laatu ca gunaa ni maʼ bichaganáʼ pa gúnitu stipa chuʼtu jma gaxha de Jehová la? guizáʼ ziecheʼ xheelatu ne jma zannaxhiicaʼ laatu (Prov. 31:30).

7. ¿Xi zanda guiziidiʼ ca guendaxheelaʼ de José ne María?

⁷ Biʼniʼ José ne María dxiiñaʼ juntu para chuʼcaʼ gaxha de Jehová. Gúnnacabe nabé risaca nga guni adorárcabe Jehová né familia stícabe (Luc. 2:22-24, 41; 4:16). Zándaca guyuu biaje guca ni nagana para laacabe, jmaruʼ si ra maʼ ziroobaʼ familia stícabe peru neca zaqué gunda bíʼnicabe ni. ¡Aque de galán ejemplu riʼ para ca guendaxheelaʼ ca! Pa nápatu xiiñitu zándaca gueeda gaca nagana para laatu chetu ca reunión ca ne gápatu adoración en familia. Dede zándaca gaca nagana para laatu guni estudiartu ne guni orartu juntu casi guendaxheelaʼ. Peru cadi guiaandaʼ laatu pa guni adorartu Jehová juntu ziuutu jma gaxha de laa ne jma zannaxhiisaatu. Nga runi, laquixhe ique guni adorartu Jehová primé lu xquendanabánitu.

8. ¿Ximodo zacané adoración en familia guendaxheelaʼ ni napa guendanagana?

⁸ Yanna, ¿xi zanda gúnitu pa nápatu guendanagana lu guendaxheelaʼ stitu yaʼ? Zándaca gaca nagana para laatu gápatu adoración en familia. Pa nga nga ni cazaacatu, ¿xiñee qué quixhe íquetu guzulú gúʼndatu xiixa nachucu ne ni chuuláʼdxitu yaʼ? Pa gúnitu ni la? zacané ni laatu gannaxhiitu jma ne chuuláʼdxitu guni adorartu Jehová juntu.

9. ¿Xiñee caquiiñeʼ cuee ca guendaxheelaʼ tiempu para chuʼcaʼ juntu?

⁹ Pa guni ca ni maʼ bichaganáʼ stipa chuʼcaʼ juntu qué zusaanaʼ de gannaxhiicaʼ. Zacané ni para guizaalaʼdxisaacaʼ, gánnacaʼ xi riníʼ ique cada tobi de laacaʼ ne xi runi sentircaʼ (Gén. 2:24). Guidúʼyanu ni bizaacaʼ Lilia ne Ruslán. Maʼ ziné guendaxheelaʼ riʼ jma de 15 iza de bichaganacaʼ peru cadi tan xadxí de bichaganácabe bidiicabe cuenta de xiixa. ¿Xii ni yaʼ? Lilia guníʼ: «Bidiʼdu cuenta qué gápadu tiempu para chuʼdu juntu casi guníʼ íquedu. Purtiʼ rúnidu dxiiñaʼ ne laaca riuu xhiiñadu ra yoo ne ra maʼ gúpadu xiiñidu jmaruʼ si huaxiéʼ tiempu gúpadu. Peru guníʼ íquedu pa qué cueedu tiempu para chuʼdu juntu la? chaahuiʼ chaahuiʼ maʼ qué ziuʼdu tobi si».

10. ¿Ximodo zanda chinanda ca ni maʼ bichaganáʼ ni ná Efesios 5:15, 16?

¹⁰ Caquiiñeʼ quixhe chaahuiʼ ca guendaxheelaʼ tiempu sticaʼ para ganda chuʼcaʼ juntu (biindaʼ Efesios 5:15, 16). Ti hermanu de Nigeria láʼ Uzondu, ná: «Ora riguixheʼ chaahueʼ ca cosa ni chiguneʼ, laaca ribeeʼ tiempu para tideniáʼ xheelaʼ juntu, purtiʼ nabe risaca ni» (Filip. 1:10). Guzéʼtenu ejemplu stiʼ xheelaʼ ti superintendente  de circuito de guidxi Moldavia, láʼ Anastasia, hermana riʼ bisiene ximodo jma jneza riquiiñeʼ tiempu stiʼ. Laabe guniʼbe: «Laga cayuni tender xheelaʼ ca dxiiñaʼ stiʼ runeʼ ca cosa stinneʼ ti zacá gápadu tiempu para chuʼdu juntu». Yanna, ¿xi zanda gúnitu pa qué gápatu tiempu para chuʼtu juntu yaʼ?

11. ¿Xi ca cosa riete lu Biblia biʼniʼ Áquila ne Priscila juntu?

¹¹ Guidúʼyanu xi zanda guiziidiʼ ca ni maʼ bichaganáʼ de Áquila ne Priscila, ti guendaxheelaʼ ni bibani lu primé siglu que (Rom. 16:3, 4). Neca qué ruzeeteʼ Biblia stale cosa de guendaxheelaʼ riʼ la? ruzeeteʼ ni guyuucabe juntu para gúnicabe dxiiñaʼ, guni predicárcabe ne gacanécabe xcaadxi (Hech. 18:2, 3, 24-26). Ne cada biaje guzeeteʼ Biblia de laacabe la? siempre riete Áquila ne Priscila.

12. ¿Xi zanda guni ca ni maʼ bichaganáʼ para gápacaʼ tiempu ne chuʼcaʼ juntu? (Biiyaʼ imagen ca).

¹² Laatu ca ni maʼ bichaganáʼ, ¿ximodo zanda chinándatu ejemplu stiʼ Áquila ne Priscila yaʼ? Galán guiníʼ íquetu ni runi cada tobi de laatu ¿Ñee nuu de laacani zanda gúnitu juntu la? Casi Áquila ne Priscila biʼniʼ predicarcaʼ juntu, ¿ñee laaca rúnitu nga la? Laaca biʼniʼ Áquila ne Priscila dxiiñaʼ juntu. Zándaca lii ne xheelaluʼ gadxé gadxé dxiiñaʼ rúnitu, peru ¿ñee zanda gúnitu ca dxiiñaʼ ni racá ndaaniʼ yoo juntu la? (Ecl. 4:9). Pa gacanésaatu zuni sentirtu nácatu ti equipu ne zacá zápatu tiempu para güitu diidxaʼ. Guidúʼyanu xi runi Robert ne Linda laacaʼ maʼ zinecaʼ jma de 50 iza de bichaganacaʼ. Robert guníʼ: «Huaxiéʼ tiempu nápadu. Peru ora naa maʼ caguiibeʼ traste ne xheelaʼ maʼ cucuiidxiʼ ca ni, ne ora maʼ cusiayaʼ jardín stidu ne guidxíñabe gacanebe naa la? guizáʼ riecheʼ, purtiʼ ra gúnidu ca cosa riʼ juntu, racané ni chuʼdu tobi si ne guiroobaʼ guendarannaxhii ni nápadu».

13. ¿Xi naquiiñeʼ guni ca ni maʼ bichaganáʼ para chuʼcaʼ tobi si?

¹³ Cadi guiaandaʼ laatu cadi ngueca diʼ nga chuʼtu juntu que chuʼtu tobi si. Ti hermana de guidxi Brasil ni maʼ bichaganáʼ guníʼ: «Pur guiráʼ ni raxha tiempu stidu, zanda guiníʼ íquedu maʼ nuudu juntu purtiʼ nabézadu ngueca yoo. Peru maʼ bidieeʼ cuenta cadi nga si nga laani, sínuque laaca risaca nga guuyaʼ xi caquiiñeʼ xheelaʼ». Yanna, guidúʼyanu xi runi sti guendaxheelaʼ, Bruno ne Tays, para guizaaláʼdxisaacaʼ. Bruno guníʼ: «Para cadi chuʼ xiixa ni guchiiñaʼ laadu ora maʼ nuudu ti ratu juntu la? rusaanadu ca teléfono ca sti lugar».

14. ¿Xi zanda guni ca ni maʼ bichaganáʼ ora qué riuuláʼdxicaʼ chuʼcaʼ juntu?

¹⁴ Yanna, ¿xi zacané laatu pa qué riuuláʼdxitu chuʼtu juntu, purtiʼ si gadxé gadxé ni riuuláʼdxitu gúnitu o nuu biaje ridxiichitu yaʼ? Laguietenalaʼdxiʼ guí ni  bizéʼtenu que, ora deruʼ guicaguí ni la? nahuiiniruʼ bele stini ne para ganda guiroobaʼ bele ca la? chaahuiʼ chaahuiʼ zaguʼnu yaga luni. Zaqueca laatu zanda cueetu tiempu guiráʼ dxi ti ganda chuʼtu juntu. Laguyubi gúnitu xiixa ni riuulaʼdxiʼ guirópatu ne ni cadi gudxiichi laatu (Sant. 3:18). Pa guzulú gúnitu caadxi cosa juntu neca ruluíʼ nahuiiniʼ ca ni la? zacanetu guiroobaʼ bele stiʼ guendarannaxhii ni nápatu.

15. ¿Xiñee nabé risaca chuʼ respetu ndaaniʼ ti guendaxheelaʼ?

¹⁵ Nabé risaca gapa ca guendaxheelaʼ respetu. Zeeda gaca ni casi oxígeno ni riquiiñeʼ ti guí, purtiʼ pa gastiʼ oxígeno la? zazuíʼ guí ca. Zaqueca nga rizaaca ndaaniʼ ti guendaxheelaʼ. Pa gastiʼ respetu la? chaahuiʼ chaahuiʼ zará guendarannaxhii ca. Peru pa nuu respetu la? qué zazuíʼ bele stiʼ guendarannaxhii stícabe. Ne galán guietenaláʼdxiluʼ, cadi lii si nga naquiiñeʼ guni sentirluʼ runi respetarluʼ xheelaluʼ sínuque laaca naquiiñeʼ guni sentir xheelaluʼ runi respetarluʼ laa. Guzéʼtenu ni bizaaca ti guendaxheelaʼ, Penny ne Aret, ni maʼ ziné 25 iza de bichaganacaʼ. Hermana ca guníʼ: «Cumu runi respetársaadu la? nadxiisaadu ne nga racané laadu guinidu ni runi sentirdu ne ni riníʼ íquedu purtiʼ nánnadu rusisaca cada tobi de laadu ni». Yanna, ¿xi zanda gúnitu para guni sentir xheelatu runi respetartu laa yaʼ? Guidúʼyanu ni biʼniʼ Abrahán ne Sara.

16. ¿Xi zanda guiziidiʼ ca hombre ni maʼ bichaganáʼ de ejemplu stiʼ Abrahán? (1 Pedro 3:7; biiyaʼ imagen ca).

¹⁶ Nabé gupa Abrahán respetu Sara. Bicaadiágabe ni riníʼ ique ne biiyabe xi runi sentir. Ti biaje guizáʼ nuu Sara xizaa dede bidxiichinebe Abrahán ne bigaanibe donda laa. Yanna, ¿xi biʼniʼ Abrahán yaʼ? qué nidxiichiné diʼ laabe ne laaca qué ñabi laabe diidxaʼ ni ñuniná laabe. Ne cumu nánnabe naca Sara ti gunaa ni runi respetar laabe ne runi respetar ca decisión ni ricaabe la? ngue runi bicaadiágabe laa ne biyúbibe modo guni chaahuibe guendanagana que (Gén. 16:5, 6). ¿Xi rusiidiʼ ni laanu yaʼ? Rusiidiʼ ni laanu, hombre ni maʼ bichaganáʼ nga naquiiñeʼ guicá decisión ndaaniʼ familia stiʼ (1 Cor. 11:3). Peru, cumu nadxiibe xheelabe la? ricaabe en cuenta ni riníʼ ique ne jmaruʼ si pa decisión ni chiguicaabe zuniná ni xheelabe (1 Cor. 13:4, 5). Yanna, zándaca chuʼ biaje guni sentir xheelaluʼ nuu estresada ne caquiiñeʼ guiníʼ ni cazaaca. ¿Ñee rucaadiaga chaahuiluʼ laabe ne rúniluʼ ni né respetu la? (Biindaʼ 1 Pedro 3:7). Angela ne Dimitri maʼ zinecaʼ biaʼ 30 iza de bichaganacaʼ. Ángela guníʼ, ximodo runi respetar xheelaʼ laa. Laabe guniʼbe: «Ora cadi galán guyé ni naa ne napaʼ gana guinieeʼ,  siempre rucaadiaga Dimitri naa. Ne laaca rápabe paciencia naa ora cadxiicheʼ o nuaaʼ triste».

17. ¿Xi rusiidiʼ ejemplu stiʼ Sara ca gunaa ni maʼ bichaganáʼ? (1 Pedro 3:5, 6).

¹⁷ Cumu qué niguicheruaa Sara ca decisión ni gucuaa Abrahán la? bisihuinni runi respetar xheelaʼ (Gén. 12:5). Ti biaje, guca Abrahán hospitalariu né caadxi hombre ni cadi cabeza guʼyaʼ. Ngue runi gunábabe Sara guni caadxi pan (Gén. 18:6). Ne neca guizáʼ nuu xhiiñaʼ Sara qué niguicheruaabe pur decisión ni gucuaa Abrahán que, sínuque nagueendaca bíʼnibe ni gunabaʼ laabe. Laatu ca gunaa ni maʼ bichaganáʼ zanda gácatu casi Sara ne cadi quicheruaatu pur ca decisión ni guicaa xheelatu. Pa gúnitu ni la? Zacané ni chuʼ guendaxheelaʼ stitu galán (biindaʼ 1 Pedro 3:5, 6). Dimitri, hermanu ni maca bizéʼtenu lu párrafo gudiʼdiʼ, guníʼ xi runi xheelaʼ para gusihuinni runi respetar laa. Laabe guniʼbe: «Runi respetar xheelaʼ ca decisión ni ricaaʼ dede né ora cadi nuube de acuerdu, ne ora qué riree ca ni jneza la? qué rábibe naa, maʼ biiyuʼ ¿Njaʼ? Nga runi, ¡rudieeʼ xquixe peʼ Angela pur naca zacá!». Ora runi respetar xheelaluʼ lii ¡nin cadi nagana gannaxhiiluʼ laa!

18. ¿Xi rizaaca ora runi ca ni maʼ bichaganáʼ stipa para cadi guiráʼ guendarannaxhii ni nápacaʼ?

¹⁸ Racalaʼdxiʼ Binidxabaʼ gusaana ca ni maʼ bichaganáʼ de gannaxhiicaʼ xheelacaʼ. Purtiʼ nánnabe pa gúnicaʼ ni la? zanda gueeda guixélecaʼ de Jehová. ¡Peru gastiʼ zanda gusirá guendarannaxhii ni dxandíʼ! Nga runi, galán gúnitu stipa gaca guendarannaxhii ni nápatu casi ni riete lu Cantar de los Cantares. ¿Ximodo yaʼ? Casi maʼ bizíʼdinu lu artículo riʼ, laguyubi gacané Jehová laatu lu guendaxheelaʼ stitu, lacuee tiempu para chuʼtu juntu ne lagusihuinni runi respetársaatu sin gusiaandatu xi runi sentir ne xi caquiiñeʼ cada tobi de laatu. Zacá zusisaca guendaxheelaʼ stitu Jehová purtiʼ de laa nga zeeda guendarannaxhii ni dxandíʼ. Ne zacá, qué zará guendarannaxhii ni nápatu biaʼ dxi guibánitu zeeda gaca ni casi guí ni qué nusaanacabe de niguucabe yaga lú.