ARTÍCULO DE ESTUDIU 22
Cadi gusaana de sanu lu «Neza ni Nayá»
«Ne ziuu ti nezahuiiniʼ raqué, ya, ti neza ni láʼ Neza ni Nayá» (IS. 35:8).
CANCIÓN 31 Guzané Dios guiráʼ dxi
NI ZAZÍʼDINU a
1, 2. ¿Xi decisión nabé risaca gucuaa ca judíu ni nabeza ndaaniʼ guidxi Babilonia? (Esdras 1:2-4).
DXI maʼ napa jma de 70 iza de nuu ca judíu de esclavu ndaaniʼ guidxi Babilonia, guníʼ Ciro, rey de Persia, maʼ zanda guibiguétacabe xquídxicabe (biindaʼ Esdras 1:2-4). ¿Xiñee guníʼ rey Ciro zacá yaʼ? Guietenaláʼdxinu, guidxi Babilonia qué rundaa ca esclavu stiʼ, nga rusihuinni Jehová peʼ nga biʼniʼ ni (Is. 14:4, 17). Cumu maʼ lu náʼ ca medo ne ca persa nuu guidxi Babilonia ne maʼ guníʼ rey que maʼ zanda guireecabe la? para stale de ca ni naca xaíque ndaaniʼ familia, guca nagana para laacaʼ guicacaʼ decisión pa zareecaʼ o ziaanacaʼ. Guidúʼyanu xiñee.
2 Caadxi de laacaʼ maʼ huaniisicaʼ ne nagana zaca para laacaʼ guibiguétacaʼ Jerusalén. Ne cumu stale de laacaʼ gúlecaʼ Babilonia, qué runibiaʼcaʼ sti guidxi. Para laacabe la? guidxi Jerusalén naca ni ti guidxi ra bibani ca bixhozebiidacabe. Nuu de laacabe maʼ napa bueltu, negocio ne lidxi. Ngue runi guca nagana para laacabe chécabe Jerusalén purtiʼ para laacabe cadi xquídxicabe ni.
3. ¿Xi ndaayaʼ zacaa ca judíu ni guibiguetaʼ guidxi Israel?
3 Qué ñaca nagana para ca judíu ni nadxii Jehová nicaacaʼ decisión de nibiguétacaʼ Jerusalén, purtiʼ ndaaniʼ guidxi Babilonia nuu jma de 50 yuʼduʼ ra runi adorárcabe bidóʼ ne nin tobi ra guni adorárcabe Jehová. Nga runi para laacabe ti ndaayaʼ nga guibiguétacabe, purtiʼ raqué maʼ zanda gúnicabe ni ná Ley stiʼ Moisés ne gudiicabe sacrificiu Jehová. Ne laaca ti ndaayaʼ ni para laacabe purtiʼ huaxiéʼ si tu runi adorar Jehová ndaaniʼ guidxi Babilonia. Ngue runi guizáʼ maʼ racalaʼdxiʼ ca judíu ni nadxii Jehová guibiguétacaʼ xquídxicaʼ ne gúʼyacaʼ gaca adorar Jehová jneza.
4. ¿Xi gudxi Jehová ca judíu que?
4 Tapa beeu zandaa para chindácabe Jerusalén ne nagana chindácabe pur neza que. Peru Jehová gudxi laacabe zuni neza que galán. Sicaríʼ bicaa profeta Isaías: «¡Lagusiá neza stiʼ Jehová! Laguni ti neza derechu lu desiertu para Dios stinu. […] Naquiiñeʼ gaca chaahuiʼ layú ra nuu stale barranca ne gaca layú ra nuu stale loma planu» (Is. 40:3, 4). Ti ndaayaʼ naroʼbaʼ ndiʼ, ¿njaʼ? Purtiʼ jma nagueenda zaca para ca judíu que checaʼ lu ti neza derechu ne planu que quíbacaʼ ne guiétecaʼ lu ca dani ne ca valle que.
5. Casi bizeeteʼ Isaías, ¿ximodo láʼ neza ra chitídicabe para guibiguétacabe Jerusalén?
5 Stale de ca neza ca nápacaʼ lacaʼ o nuu de laacani ti númeru si. Yanna, ¿laga neza bizeeteʼ Isaías ca yaʼ? ¿Napa ni lani la? Napa ni pue. Biblia ná: «Ne ziuu ti nezahuiiniʼ raqué, ya, ti neza ni láʼ Neza ni Nayá. Ti binni nabiidiʼ qué zanda sáʼ luni» (Is. 35:8). ¿Ximodo biiyaʼ ca israelita que ca diidxaʼ riʼ? ¿Ne ximodo rúʼyanu ni laanu?
«NEZA NI NAYÁ» NI GUYUU DXIQUÉ NE NI NUU YANNA
6. ¿Xiñee riete naca neza riʼ nayá?
6 ¿Xiñee «Neza ni Nayá» biree lá neza riʼ yaʼ? Purtiʼ cadi naquiiñeʼ chuʼ ti binni nabiidiʼ ndaaniʼ xquidxi Dios, sínuque caquiiñeʼ gácacaʼ nayá. Nga runi, ca judíu que cadi naquiiñeʼ chinecaʼ ti vida inmoral, guni adorarcaʼ bidóʼ o gúnicaʼ ti pecadu. Ngue runi caquiiñeʼ gácacaʼ ca judíu ni guibiguetaʼ que «ti guidxi ni nayá» para Dios (Deut. 7:6). ¿Ñee riníʼ nga ca ni guiree de ndaaniʼ guidxi Babilonia cayúnicaʼ ni jneza la? Coʼ. Caquiiñeʼ guchaacabe para chuulaʼdxiʼ Jehová ni cayúnicabe.
7. ¿Xi caquiiñeʼ guni caadxi judíu? Bizeeteʼ ti ejemplu.
7 Casi maʼ guninu, stale de ca judíu que gúlecaʼ Babilonia, pur ngue maʼ gucuá modo riníʼ ique ca binni de raqué laacabe ne ca cosa ni cadi jneza rúnicaʼ. Gudiʼdiʼ si iza de bibiguetaʼ primé grupu de ca judíu guidxi Israel, gunna Esdras bichaganáʼ caadxi judíu gunaa de sti guidxi (Éx. 34:15, 16; Esd. 9:1, 2). Despué guizáʼ bidxagayaa gobernador Nehemías ra gunna qué riníʼ ca xiiñiʼ ca judíu que hebreu (Deut. 6:6, 7; Neh. 13:23, 24). Yanna, ¿ximodo guiénecabe Stiidxaʼ Dios ne guiziidicabe gannaxhiicabe ne guni adorárcabe Jehová yaʼ? (Esd. 10:3, 44). Nga runi, naquiiñeʼ guchaa ca judíu, peru qué zaca ni nagana para laacabe pa cuézacabe ndaaniʼ guidxi Israel, purtiʼ chaahuiʼ chaahuiʼ maʼ cabiguetaʼ cayuni adorárcabe Jehová modo racalaʼdxiʼ (Neh. 8:8, 9).
Dede lu iza 1919, maʼ biree de Babilonia guidxi roʼ millón de hombre, gunaa ne xcuidi ne maʼ nuucaʼ lu «Neza ni Nayaʼ». (Biiyaʼ párrafo 8).
8. ¿Xiñee rininu zanda gacané ni bizaaca ca judíu ca laanu? (Biiyaʼ imagen ni zeeda lu portada).
8 Zándaca ziuu tu laa zaníʼ ique: «Galán ruzeeteʼ Biblia ni bizaacaʼ ca judíu que, peru, ¿ñee zanda gacané ni bizaacacabe riʼ laanu la?». Zanda pue. Purtiʼ casi ñaca canazanu lu «Neza ni Nayá». Neza riʼ zacané ni laanu guni adorarnu Jehová tobi si ne modo racalaʼdxiʼ ndaaniʼ paraísu espiritual ne guicaanu ca ndaayaʼ ni guedané Reinu stibe. Nga runi, casi ca ungidu ne xcaadxi dendxuʼ caquiiñeʼ sanu lu «Neza ni Nayá» riʼ (Juan 10:16). b Dede iza 1919 millón de binni, hombre, gunaa ne xcuidi maʼ nuucaʼ lu neza riʼ purtiʼ maʼ bireecaʼ de Babilonia guidxi roʼ, xaíque stiʼ guiráʼ religión ni qué rusiidiʼ ni dxandíʼ. Neca bixeleʼ neza riʼ raca biaʼ ti gayuaa iza, ca dxiiñaʼ ni guca para bixeleʼ ni bizulú ca ni stale iza ante.
GUCA CHAAHUIʼ NEZA CA
9. Casi ná Isaías 57:14, ¿ximodo guca chaahuiʼ «Neza ni Nayá» que?
9 Biiyaʼ Jehová cadi chuʼ xiixa ni guchiiñaʼ neza ni nayá ra chizá ca judíu ni biree de Babilonia (biindaʼ Isaías 57:14). Ne laaca maʼ bisiá Jehová «Neza ni Nayá» ra zizá ca xpinni tiempu riʼ. ¿Ximodo yaʼ? Gayuaa iza ante de iza 1919, bizulú biquiiñeʼ Jehová caadxi hombre ni nayá ladxidóʼ ni nadxii Dios para gusiacaʼ neza ni nayá stibe (bichaaga ni né Isaías 40:3). Bizulú bíʼnicabe dxiiñaʼ para ganda gaca chaahuiʼ neza que. Ti zacá binni ni nayá ladxidóʼ guireecaʼ de Babilonia guidxi roʼ ne chuʼcaʼ ndaaniʼ paraísu espiritual, ne laani nga guni adorarcaʼ Jehová tobi si ne modo racalaʼdxiʼ. Guidúʼyanu caadxi dxiiñaʼ ni guca para guca chaahuiʼ neza ca.
Raca stale iza, caadxi hombre ni nayá ladxidóʼ ne ni nadxii Dios, bisiacaʼ neza que para ganda guiree binni de Babilonia guidxi ró. (Biiyaʼ párrafo 10 ne 11).
10, 11. ¿Xi ndaayaʼ gucuaa binni pur guca imprimir ne guca traducir Biblia? (Biiyaʼ imagen ca).
10 Dxiiñaʼ de gaca imprimir. Biaʼ galaa de siglu quince que, lu náʼcabe runi copiárcabe Biblia. Nabé nanene raca dxiiñaʼ riʼ ne rindaani. Ngue runi huaxiéʼ si Biblia nuu ne caru ca ni. Dxi maʼ bizulúcabe biquiiñecabe imprenta, jma maʼ guca Biblia ne maʼ nagueenda gupa binni tobi.
11 Dxiiñaʼ de gaca traducir. Stale iza lu diidxaʼ latín si nga guyuu Biblia. Ti diidxaʼ ni riene binni si ni guyé scuela tiempu que. Ra guyuu jma imprenta, hombre ni nachaʼhuiʼ ne nayá ladxidóʼ bíʼnicaʼ stipa guni traducircaʼ Biblia lu diidxaʼ ni riníʼ jma stale binni. Ne ca ni ruundaʼ Stiidxaʼ Dios maʼ gunda bichaagacaʼ ni rusiidicabe ndaaniʼ ca yuʼduʼ que ne ni ná lu Stiidxaʼ Dios.
Caadxi hombre ni nayá ladxidóʼ ne ni nadxii Dios, bisiacaʼ neza que para ganda guiree binni de Babilonia guidxi ró. (Biiyaʼ párrafo 12-14). c
12, 13. ¿Ximodo gúnnacabe ni dxandíʼ lu siglu diecinueve? Bizeeteʼ ti ejemplu.
12 Guyuu ni gucané laacabe para guni estudiárcabe Biblia. Ca ni gulee tiempu para biindaʼ chaahuiʼ Biblia, gúnnacaʼ ni dxandíʼ rusiidiʼ Biblia ne gucaláʼdxicaʼ ganna xcaadxi ni ne ngue bichiichini ca xaíque yuʼduʼ que. Guzéʼtenu ni bizaacaʼ lu siglu diecinueve. Caadxi hombre ni nayá ladxidóʼ guleecaʼ tratadu ne folletu ni rusihuinni gadxé ni rusiidiʼ ca xaíque yuʼduʼ ne ni rusiidiʼ Biblia.
13 Biaʼ lu iza 1835, ti hombre ruundaʼ Biblia láʼ: Henry Grew gulee ti folletu ni caníʼ xi rizaacaʼ binni ora rati. Tiempu que guyuu stale yuʼduʼ ni rusiidiʼ napa binni ti espíritu ni qué rati, peru hombre riʼ bisiene zanda guibani binni sin qué chuʼ dxi gatiʼ peru nga maʼ Dios gudii ni binni. Lu iza 1837, ti ministru religioso láʼ George Storrs bidxela ti copia stiʼ folletu stiʼ Henry Grew. Ora bíʼndabe ni biziidibe ti cosa nabé risaca, ngue runi guníʼnebe xcaadxi de laani. Lu iza 1842 bidiibe caadxi discursu, tema stini nga: «¿Ñee qué ziuu dxi gati ca binni malu la?». Ni bicaa George Storrs que guizáʼ gucané ni ti jovén láʼ Charles Taze Russell.
14. ¿Ximodo gucané dxiiñaʼ ni biʼniʼ xcaadxi, Russell ne ca xcompañeru? (Biiyaʼ imagen ca).
14 ¿Ximodo gucané ca dxiiñaʼ ni maʼ guca lu neza ni nayá riʼ hermanu Russell ne ca xcompañeru yaʼ? Gucané ni laacabe para ora guni estudiárcabe iquiiñecabe guiráʼ ni maʼ nuu casi diccionariu, concordancia ne gadxé gadxé traducción stiʼ Biblia. Laaca biziidicabe de ni maʼ biʼniʼ publicar Henry Grew, George Storrs ne xcaadxi hombre. Yanna, ¿Xi biʼniʼ Russell ne ca xcompañeru yaʼ? Guleecabe stale libru ne tratadu ni caníʼ de Biblia, zaqué gucanécabe dxiiñaʼ ni cayaca lu «Neza ni Nayá» que.
15. ¿Xi guiráʼ bizaaca lu iza 1919?
15 Lu iza 1919, biree xquidxi Dios de lu náʼ Babilonia guidxi ró, ca religión ni qué rusiidiʼ ni dxandíʼ. Ne lu iza que nga gulí Jesús mozo ni nuu xpiaaniʼ ne ni runi jneza, ne bizulú biʼniʼ dxiiñaʼ para ganda chuʼ ca binni ni nayá ladxidóʼ lu «Neza ni Nayá» que (Mat. 24:45-47). Pur dxiiñaʼ ni guca ante que, ca ni guyuu lu neza que jma gunda biziidicaʼ de Jehová ne de ca ni naguixhe ique guni (Prov. 4:18). Ne laaca bichaacabe xquendanabánicabe para gúnicabe ni ná Jehová. Zaqué bichaacabe modo biénecabe caadxi cosa. Ra maʼ zidiʼdiʼ iza, gucané Jehová xquidxi guiene caadxi cosa (biiyaʼ cuadru ni láʼ « Chaahuiʼ chaahuiʼ cusiá Jehová xquidxi»). Guizáʼ ziéchenu ora guedandá dxi chuulaʼdxiʼ Jehová guiráʼ xixé ni gúninu (Col. 1:10).
ZUXÉLERUʼ «NEZA NI NAYÁ» QUE
16. Dede lu iza 1919, ¿xi dxiiñaʼ huayaca lu «Neza ni Nayá»? (Isaías 48:17; 60:17).
16 Para chuʼ ti neza nayá caquiiñeʼ ni mantenimientu. Cadi dxandíʼ la? Nga runi dede lu iza 1919 cayaca dxiiñaʼ lu «Neza ni Nayá» que para ganda guiree jma binni de Babilonia guidxi roʼ. Mozo ni nuu xpiaaniʼ ne ni runi jneza bizulú biʼniʼ dxiiñaʼ riʼ. Lu iza 1921 biree ti libru ni láʼ El Arpa de Dios, gúcani para gacanécabe binni guiene ni rusiidiʼ Biblia. Ne biaaziʼ biaʼ xhoopaʼ millón de libru riʼ lu 36 diidxaʼ. Guizáʼ gucané libru riʼ guiziidiʼ binni ni dxandíʼ. Ne cadi tan xadxí maʼ nápanu ti libru ni rudíʼnenu estudiu binni ni láʼ ¡Zanda guibániluʼ nayecheʼ!, nga rusihuinni lu ca últimu dxi riʼ caquiiñeʼ Jehová organización stiʼ para gudii guendaró espiritual ni zacané laanu cadi gusaanaʼ de sanu lu «Neza ni Nayá» riʼ (biindaʼ Isaías 48:17; 60:17).
17, 18. ¿Paraa riluxe «Neza ni Nayá» que?
17 Ora ti binni ricaa estudiu, ruzulú rizá lu «Neza ni Nayá» ca. Peru nuu tu laa rusaana de guni estudiar casi ñaca ti ndaa si nizabe lu neza ca. Peru nuu xcaadxi la? qué rusaanacaʼ de saca lu neza ca, purtiʼ racaláʼdxicaʼ chindacaʼ ra riluxe ni. Peru ¿paraa nga riluxe ni yaʼ?
18 Para ca ni cabeza cheʼ guibáʼ «Neza ni Nayá» ca riluxe ni ndaaniʼ «paraísu stiʼ Dios» ni nuu guibáʼ (Apoc. 2:7). Ne para ca ni cabeza guibani lu Guidxilayú, riluxe neza ca ra guiluxe ti mil iza guni mandar Cristu ora maʼ naca guiráʼ binni perfectu. Pa zeluʼ lu neza riʼ, cadi gutixhiluluʼ, guzá dede chindaluʼ ra riluxe ni. «¡Sicarú cheluʼ!».
CANCIÓN 24 Quíbanu lu dani stiʼ Jiobá
a Cumu guníʼ Jehová zabiguetaʼ ca xpinni ni nuu ndaaniʼ guidxi Babilonia xquídxicaʼ, bixhélebe ti neza ni gulee labe «Neza ni Nayá». Tiempu riʼ laaca maʼ bixhele Jehová ti neza para ca xpinni. Dede iza 1919, stale binni maʼ biree de ndaaniʼ Babilonia guidxi roʼ ne maʼ canazacaʼ lu «Neza ni Nayá». Guiranu caquiiñeʼ gúninu stipa para cadi guireʼnu de lu neza riʼ ne chindanu ra riluxe ni.
b Biiyaʼ libru ni láʼ Las profecías de Isaías, una luz para toda la humanidad II, yaza 56, párrafo 19.
c NI RIHUIINI LU IMAGÉN RIʼ: Biquiiñeʼ hermanu Russell ne ca xcompañeru ca ni maca biʼniʼ publicar xcaadxi hombre para gunda biénecaʼ ni ná Biblia.