1, 2. ¿Xi zándaca guiníʼ íquenu?

 ZÁNDACA guiníʼ íqueluʼ pa ricabi Dios ca oración ni rúniluʼ. Stale hermanu huaníʼ íquecaʼ zacá ora cadíʼdicaʼ lu guendanagana. Ne laaca zándaca raca nagana para laanu guidúʼyanu ximodo ricabi Dios ca oración stinu maruʼ si ora cayacananu.

² Lu artículo riʼ zadúʼyanu, xiñee caquiiñeʼ chuʼnu seguru ricabi Jehová oración stiʼ ca xpinni (1 Juan 5:15). Laaca zadúʼyanu, xiñee nuu biaje ruluíʼ qué ricabi Jehová ca oración ni rúninu ne ximodo ricábibe ca oración stinu.

3. ¿Xiñee canabaʼ Jehová guni orarnu laa?

³ Ruzeeteʼ Biblia guizáʼ nadxii Jehová laanu ne risácanu para laabe (Ageo 2:7; 1 Juan 4:10). Nga runi, cayabibe laanu guinínenu laabe ne guinábanu gacanebe laanu (1 Ped. 5:6, 7). Purtiʼ racaláʼdxibe chuʼnu gaxha de laabe ne gacanebe laanu gudxíʼlunu ca guendanagana stinu.

4. ¿Ximodo ricabi Jehová ca oración stiʼ ca xpinni? (Biiyaʼ imagen ca).

⁴ Lu Biblia zeeda stale relatu ni rusihuinni ricabi Jehová ca oración stiʼ ca xpinni. Guiníʼ íquenu ejemplu stiʼ rey David. Cumu nabé gúpabe enemigu la? stale biaje biyúbibe gacané Jehová laabe. Ti biaje sicaríʼ guníʼnebe laa: «Jehová bicaadiaga oración stinneʼ; bicaadiaga naa,  cayuneʼ rogar lii gacaneluʼ naa. Pur nácaluʼ fiel ne rúniluʼ ni jneza bicabi naa» (Sal. 143:1). Bicabi Jehová ca oración stibe ne bilá laabe (1 Sam. 19:10, 18-20; 2 Sam. 5:17-25). Ngue runi gunna dxichi David: «Nuu Jehová gaxha de guiráʼ ca ni rucaa ridxi laa». Laanu laacaʼ zanda gápanu confianza casi gupa David (Sal. 145:18).

5. ¿Ñee bicabi Jehová ca oración stiʼ ca xpinni casi modo cabeza ca ni la? Bizeeteʼ ti ejemplu. (Biiyaʼ imagen ca).

⁵ Zándaca cadi modo cabézanu guicabi Jehová oración stinu. Nga peʼ nga ni bizaaca apóstol Pablo. Chonna biaje gunábabe Dios cuee ti guichi lu beela ládibe. ¿Ñee bicabi Jehová ca oración stibe la? Bicabi pue, peru cadi modo cabeza Pablo ni. Qué nibee Jehová guendanagana que, peru bidii laabe stipa ni caquiiñebe para cadi gusaana de gúnibe ni ná (2 Cor. 12:7-10).

6. ¿Xiñee nuu biaje ruluíʼ qué ricabi Jehová ca oración stiluʼ?

⁶ Ziuu biaje cadi modo cabézanu nga zacabi Jehová ca oración stinu. Peru zanda chuʼnu seguru nanna Jehová xii nga ni jma galán para cada tobi de laanu dede zanda «gúnibe jma que biaʼ rinábanu o jma que biaʼ riníʼ íquenu» (Efes. 3:20). Nga runi, zanda guicábibe ca oración stinu ora peʼ cadi cabézanu ni o modo peʼ cadi caníʼ íquenu ni.

7. ¿Xiñee nuu biaje caquiiñeʼ guchaʼnu ni rinábanu Jehová lu ca oración ni rúninu? Bizeeteʼ ti ejemplu.

⁷ Ora riénenu xii nga ni racalaʼdxiʼ Jehová la? zándaca caquiiñeʼ guchaʼnu ni rinábanu laabe lu ca oración stinu. Guidúʼyanu ni bizaaca ti hermanu ni láʼ Martin Poetzinger. Cadi xadxí de bichaganabe, biseendacabe laabe ndaaniʼ campu de concentración nazi. Nacubi yendabe raqué rinábabe Jehová cueecabe laabe para ganda gúʼyabe xheelabe ne ganda guni predicarbe. Peru gudiʼdiʼ chupa semana ne ruluíʼ cadi cacabi Jehová oración stibe. Ngue runi gúdxibe Jehová: «Rinabaʼ lii gacaneluʼ naa gannaʼ xi racaláʼdxiluʼ guneʼ». Ne bizulú guníʼ íquebe guiráʼ ca guendanagana ni cadiʼdiʼ xcaadxi hermanu ni nuu raqué. Stale de laacaʼ nuucaʼ xizaa pur xheelacaʼ ne ca xiiñicaʼ. Ngue runi gudxi hermanu riʼ Jehová: «Xquixe peʼ lii pur asignación  nacubi riʼ, gucané naa gacaniáʼ ne cuaaʼ gana ca hermanu stinneʼ». Ne nga nga ni biʼniʼ hermanu riʼ gáʼ iza guyuu raqué.

8. ¿Xi cadi naquiiñeʼ guianda laanu ora guni orarnu?

⁸ Jehová napa ti propósitu ne zuni cumplirbe ni. Zabeebe guiráʼ guendanagana ni runiná laanu, desastre natural, guendahuará ne guendaguti. Zaquiiñeʼ Jehová Reinu stiʼ para guni cumplir ni maʼ gudixhe ique guni lu Guidxilayú riʼ (Dan. 2:44; Apoc. 21:3, 4). Peru ante guedandá ora gúnibe ni la? cudiibe lugar guni mandar Binidxabaʼ lu Guidxilayú riʼ (Juan 12:31; Apoc. 12:9). b ¿Xiñee yaʼ? Purtiʼ pa nibee Jehová guiráʼ guendanagana ni runiná binni la? nuluíʼ ni jneza modo runi mandar Binidxabaʼ. Neca caʼruʼ guni Jehová ni maʼ gudixhe ique guni la? cadi caníʼ diʼ nga qué zacanebe laanu. Guidúʼyanu xi runi Jehová pur laanu.

9. ¿Ximodo racané Jehová laanu ora guicaanu xiixa decisión? Bizeeteʼ ti ejemplu.

⁹ Rudiibe laanu guendabiaaniʼ. Cayuni prometer Jehová zudii laanu guendabiaaniʼ ni caquíʼñenu para guicaanu decisión jneza. Ne jmaruʼ si ora caquiiñeʼ guicaanu decisión ni zuchaa xquendanabáninu, casi pa zachagananu o coʼ (Sant. 1:5). Guidúʼyanu ni bizaaca ti hermana ni caʼruʼ guichaganáʼ láʼ María. c Guizáʼ nayecheʼ cayúnibe ni ná Jehová casi precursora regular ora binibiaʼbe ti hermanu. Laabe guniʼbe: «Ra zidiʼdiʼ ca dxi que nabé guca xhamígudu ne maʼ bizulú guyuuláʼdxisaadu. Gunnaʼ caquiiñeʼ guicaaʼ ti decisión, ngue runi xadxí bineʼ orar Jehová. Laaca gunnaʼ caquiiñeʼ gacané Jehová naa, peru nannaʼ dxiicheʼ naa nga caquiiñeʼ guicaaʼ decisión que». Bidii María cuenta bicabi Jehová ca oración stiʼ ne bidii laabe guendabiaaniʼ. ¿Ximodo yaʼ? Biyúbibe información lu ca publicación stinu ne bidxélabe caadxi artículo ni gucané laabe gúʼyabe xi gúnibe. Ne cumu jñaabe laaca Testigu laa la? bidii laabe conseju ni gucané laabe gánnabe xi peʼ cayuni sentirbe. Pur ni biʼniʼ María riʼ jneza decisión ni gucuaa.

10. Casi ná Filipenses 4:13, ¿ximodo racané Jehová ca xpinni? Bizeeteʼ ti ejemplu. (Biiyaʼ imagen ca).

¹⁰ Rudiibe laanu stipa para guni huantarnu. Laaca zudii Jehová laanu stipa cásica bidiibe ni apóstol Pablo, para ganda gudxíʼlunu ca guendanagana stinu (biindaʼ Filipenses 4:13). Guidúʼyanu ximodo gucané Jehová ti hermanu láʼ Benjamin. Dxi nahuiinibe stale iza  guleza familia stibe ra riuu ca refugiadu ndaaniʼ guidxi África. Laabe guniʼbe: «Qué nusaanaʼ de ñuneʼ orar Jehová, gunabaʼ laabe gudiibe naa stipa para ganda guneʼ ni jneza. Gudixhedxibe ladxiduáʼ, bidiibe naa valor para cadi gusaanaʼ de guneʼ predicar ne laaca bidiibe naa ca publicación ni gucané naa chuaaʼ jma gaxha de laabe, zacá nga bicabi Jehová ca oración stinneʼ». Ne guníʼrube: «Ra biindaʼ experiencia stiʼ xcaadxi Testigu ne biiyaʼ ximodo gucané Jehová laacabe, nabé guluu ni gana naa para cadi gusaanaʼ de gacaʼ fiel Jehová».

11, 12. ¿Ximodo zanda iquiiñeʼ Jehová ca hermanu stinu para guicabi ca oración ni gúninu? (Biiyaʼ imagen ca).

¹¹ Riquiiñebe ca hermanu stinu. De guidubi ladxidóʼ Jesús biʼniʼ orar Jehová gueelaʼ ante gatiʼ que. Gunábabe Jehová cadi gudii lugar guni condenar ca binni que laabe purtiʼ nacaʼ caniʼbe contra Dios. ¿Xi biʼniʼ Jehová yaʼ? Biseendaʼ ti ángel, ti bíʼchibe ni nuu guibáʼ, para gudii stipa laabe (Luc. 22:42, 43). Laaca zanda gacané Jehová laanu ra iquiiñebe ti hermanu o ti hermana para chiganna o guiniʼné laanu pur teléfono. Guiranu zanda gacanenu ca hermanu stinu ra gábinu laacaʼ ti diidxaʼ galán (Prov. 12:25).

¹² Guidúʼyanu ni bizaacaʼ ti hermana láʼ Míriam. Chupa chonna semana si de gutiʼ xheelabe, caquiiñeʼ guiníʼnebe tuuxa purtiʼ guizáʼ cayuunabe, nuube triste ne naná nuu ladxidoʼbe. Laabe guniʼbe: «Qué gapaʼ stipa para guinieniaʼ tuuxa, dede cayuunaʼ ora cayuneʼ orar. Nin caʼruʼ guiluxeʼ guneʼ orar málasi guxidxi teléfono stinneʼ. Guca si ni ti ancianu ni guizáʼ xhamígudu». Ancianu que ne xheelaʼ gudixhedxicaʼ ladxidóʼ hermana riʼ. Gunna dxichi hermana riʼ biquiiñeʼ Jehová ancianu que para guiniʼné laabe.

13. Bizeeteʼ ti ejemplu para gusiéneluʼ ximodo huaquiiñeʼ Jehová binni ni qué runi adorar laa para guicabi ca oración stiʼ ca xpinni.

¹³ Zanda iquiiñebe binni ni qué runi adorar laabe (Prov. 21:1). Nuu biaje riquiiñeʼ Jehová binni ni qué runi adorar laa para gacané ca xpinni. Guzéʼtenu ti  ejemplu, biquiiñebe rey Artajerjes para gudii lugar guibiguetaʼ Nehemías Jerusalén ne gucuí guidxi que sti biaje (Neh. 2:3-6). Ca dxi stinu riʼ laaca zanda iquiiñeʼ Jehová ca binni ni cadi naca Testigu para gacanecaʼ laanu ora caquíʼñenu ni.

14. ¿Ximodo racané experiencia stiʼ hermana riʼ laanu? (Biiyaʼ imagen ca).

¹⁴ Ti hermana láʼ Soo Hing bidii cuenta biquiiñeʼ Jehová doctor stiʼ para gacané laa. Napa xiiñibe caadxi guendahuará ni runiná xquendabiaaniʼ binni ne gupa ti accidente. Ngue runi laabe ne xheelabe gupa xidé bisaanacabe dxiiñaʼ stícabe para gúʼyacabe xiiñicabe riʼ. Biaanacabe sin bueltu ne guizáʼ nagana guca ni para laacabe. Ruluíʼ maʼ qué zanda gudxiilú hermana riʼ guendanagana que, purtiʼ para laa maʼ birá stipa stiʼ. Yanna, ¿xi bíʼnibe yaʼ? Bixhélebe ladxidoʼbe nezalú Jehová, gunábabe gacané laabe. Qué nindaa gucané doctor que laacabe, biyubi modo guicaacabe ti apoyo stiʼ gobiernu ne ti lugar ra ganda cuézacabe. Hermana Soo Hing guníʼ: «Gunna dxíchidu Jehová nga “ni rucaadiaga oración”» (Sal. 65:2).

15. ¿Xi gucané ti hermana gudii cuenta ricabi Jehová ca oración ni runi?

¹⁵ Cadi cabézanu ti milagru para guicabi Jehová ca oración stinu. Peru jneza modo ricábibe ca ni purtiʼ nga peʼ nga ni caquíʼñenu para cadi gusaana de gúninu ni nabe. Nga runi, galán cueenu tiempu ne guidúʼyanu ximodo ricabi Bixhózenu ni nuu guibáʼ ca oración stinu. Ti hermana láʼ Yoko, para laa ruluíʼ qué ricabi Jehová ca oración stiʼ. Ngue runi bizulú bicaabe lu ti cuadernu guiráʼ ni rinábabe Jehová. Ne gudiʼdiʼ si ti tiempu, biiyabe cuadernu que ne bidiibe cuenta maʼ bicabi Jehová stale de ca oración que, dede né ca ni maʼ qué rietenaláʼdxibe. Laanu laaca zanda gúninu casi biʼniʼ hermana riʼ, cueenu tiempu para guiníʼ íquenu ximodo maʼ bicabi Jehová ca oración stinu (Sal. 66:19, 20).

16. ¿Xiñee caquiiñeʼ gápanu fe ora guni orarnu? (Hebreos 11:6).

¹⁶ Caquiiñeʼ gápanu fe ora guni orarnu ne zaqueca ora guicabi Jehová ca oración stinu, ¿xiñee yaʼ? Purtiʼ zanda guicábibe  ni modo cadi cabézanu (biindaʼ Hebreos 11:6). Guidúʼyanu ni bizaaca ti guendaxheelaʼ, Mike ne Chrissy, gúpacabe meta chiguni servírcabe Betel. Hermanu ca guníʼ: «Stale biaje bichadu solicitud ne qué nusaana de ñuni orardu Jehová, peru qué ñaca invitardu». Neca zaqué qué nusaana guendaxheelaʼ riʼ de ñapa confianza Jehová purtiʼ laa nga nanna paraa zaquiiñeʼ laacabe. Ngue runi qué nusaana de ñácacabe precursor, guyécabe ra jma caquiiñeʼ gaca predicar, laaca gucanécabe lu construcción ne yanna maʼ nácacabe de circuito. Mike guníʼ: «Siempre ricabi Jehová ca oración stidu dede nuu biaje ricábibe laadu jma galán que modo cabézadu».

17, 18. Casi ná Salmo 86:6, 7, ¿xi nanna dxíchinu?

¹⁷ (Biindaʼ Salmo 86:6, 7). Guyuu David seguru rucaadiaga ne ricabi Jehová ca oración stiʼ. Lii laaca zanda chuʼluʼ seguru rucaadiaga ne ricabi Jehová ca oración stiluʼ. Ca ejemplu ni bidúʼyanu lu artículo riʼ rusiidiʼ ca ni laanu rudii Jehová guendabiaaniʼ ne stipa ni caquíʼñenu para guni huantarnu. Ne laaca bidúʼyanu zanda iquiiñebe ca hermanu o ca binni ni qué runi adorar laabe para gacanebe laanu.

¹⁸ Nánnanu zacabi Jehová ca oración stinu neca nuu biaje qué zúnibe ni modo cabézanu. Zudii Jehová laanu ni peʼ caquíʼñenu ne ora peʼ caquíʼñenu ni. Nga runi, cadi gusaana de gápanu fe ora guni orarnu, chuʼnu seguru zapa Jehová laanu ne ndaaniʼ Guidxilayú cubi ca zudiibe «guiráʼ ni racalaʼdxiʼ ca ni nabani» (Sal. 145:16).