1. ¿Xi rizaaca stale de laanu?

 ¿ÑEE raca nagana para lii ugaandaluʼ xiixa meta espiritual la? b Pa zacá ni cadi lii si risácaluʼ ni. Guidúʼyanu ni bizaaca ti hermanu láʼ Philip, gudíxhebe meta gaca ca oración stibe jma galán ne cadi gusaana de gúnibe ni, peru raca nagana para laabe cueebe tiempu para guiníʼnebe Jehová. Ti hermana láʼ Erika gudixhe ique chindá tempranu lu ca reunión ni raca ante guireecabe predicación, peru neca zaqué rindárube huadxí. Sti hermanu láʼ Tomáš gudixhe meta guundaʼ Biblia. Laabe guniʼbe: «Rireeʼ gana guundaʼ Biblia, bizuluáʼ bineʼ ni chonna biaje peru lu libru si stiʼ Levítico riaanaʼ».

2. ¿Xiñee cadi naquiiñeʼ guireʼnu gana pa caʼruʼ ugaandanu xiixa meta?

² Pa maʼ gudixhe íqueluʼ ti meta ne caʼruʼ ugaandaluʼ ni la? cadi guireeluʼ gana zanda ugaandaluʼ ni. Para ugaandaluʼ xiixa meta dede ni jma nahuiiniʼ la? caquiiñeʼ ni tiempu ne gúniluʼ stipa. Pa qué guireeluʼ gana zusihuínniluʼ risaca para lii chuʼluʼ gaxha de Jehová ne racaláʼdxiluʼ gudiiluʼ laa xiixa ni galán. Guizáʼ rusisaca Jehová stipa ni rúniluʼ, bietenalaʼdxiʼ qué ribézabe gudiiluʼ jma de biaʼ zanda gudiiluʼ (Sal. 103:14; Miq. 6:8). Nga runi, ora quixhe íqueluʼ xiixa meta la? biiyaʼ pa zanda ugaandaluʼ ni. Ne pa maʼ gudíxheluʼ xiixa meta la? guidúʼyanu xi zacané lii ugaandaluʼ ni.

3. ¿Xi zacané lii jma chuuláʼdxiluʼ ugaandaluʼ ca meta stiluʼ?

³ Risaca nga chuuláʼdxinu ugaandanu xiixa meta espiritual. ¿Xiñee yaʼ? Purtiʼ ti binni ni riuulaʼdxiʼ guni xiixa runi  stipa para guni ni. Chuuláʼdxinu ugaandanu xiixa meta zeeda gaca ni casi bi ni rundubi vela stiʼ ti barcu. Pa cadi guiaana dxi de gundubi bi zindá barcu ca ra zeʼ. Ne jma nagueenda zindá barcu caʼ pa nadipaʼ cundubi bi. Ngaca nga rizaaca ne ca meta stinu, pa dxandíʼ racaláʼdxinu ca ni jma nagueenda zugaandanu ca ni. Sicaríʼ guníʼ ti hermanu láʼ David de guidxi El Salvador: «Ora riuuláʼdxiluʼ xiixa la? rúniluʼ stipa para ugaandaluʼ ni». Yanna, ¿xi zacané lii jma chuuláʼdxiluʼ ugaandaluʼ ca ni yaʼ?

4. ¿Xi zanda guinábanu Jehová? (Filipenses 2:13; biiyaʼ imagen ca).

⁴ Gunabaʼ Jehová guiale de lii ugaandaluʼ ca meta stiluʼ. Zudii Jehová lii espíritu santu stiʼ para ganda chuuláʼdxiluʼ ugaandaluʼ ca meta stiluʼ (biindaʼ Filipenses 2:13). Cumu nánnanu caquiiñeʼ quíxhenu xiixa meta la? rúninu ni, peru nuu biaje qué gápanu deseu de gúninu ni. Ne nga nga ni bizaaca ti hermana láʼ Norina de guidxi Uganda. Gudixhe hermana riʼ ti meta de gapa ti estudiu, peru huaxiéʼ deseu nápabe de gúnibe ni purtiʼ riníʼ íquebe qué gánnabe gusiidibe. ¿Xi gucané laabe yaʼ? Laabe guniʼbe: «Guiráʼ dxi gunabaʼ Jehová gacané naa chuulaʼdxeʼ gudieeʼ estudiu. Ne bineʼ stipa guneʼ ni canabaʼ Jehová que, biyubeʼ modo gusiideʼ jma jneza. Chupa chonna beeu despué, maʼ riuuladxeʼ gudieeʼ estudiu. Ne iza queca bizuluáʼ chupa estudiu».

5. ¿Xi zacané laanu ugaandanu ca meta stinu?

⁵ Guníʼ ique ni maʼ biʼniʼ Jehová pur lii (Sal. 143:5). Cumu guníʼ ique apóstol Pablo modo guca Jehová nachaʼhuiʼ né laa la? gucané ni laabe gúnibe xhiiñaʼ Dios de guidubi ladxidoʼbe (1 Cor. 15:9, 10; 1 Tim. 1:12-14). Pa guiníʼ íqueluʼ guiráʼ ni maʼ biʼniʼ Jehová pur lii la? zacané ni lii chuuláʼdxiluʼ ugaandaluʼ ca meta stiluʼ (Sal. 116:12). Guidúʼyanu xi gucané ti hermana de Honduras, ugaanda meta de gaca precursora regular. Laa guníʼ: «Guníʼ iqueʼ pabiáʼ nadxii Jehová naa, guluube naa ndaaniʼ xquídxibe ne rápabe naa. Guizáʼ gucané ni naa gannaxhieeʼ laabe jma ne chuuladxeʼ ugaanda ca meta ni maʼ gudixheʼ iqueʼ casi gaca precursora».

6. ¿Xiruʼ zanda gacané laanu chuuláʼdxinu ugaandanu ca meta stinu?

⁶ Guníʼ ique ca ndaayaʼ ni zacaaluʼ pa ugaandaluʼ ca meta stiluʼ. Guidúʼyanu xi gucané Erika gaca puntual, hermana ni bizéʼtenu lu párrafo tobi que. Laabe guniʼbe: «Bidieeʼ cuenta pa chindayaʼ tempranu ante guireecabe predicación la? napaʼ jma tiempu para ugapadiuʼxeʼ laacabe ne zaqueca randa rucaadiaʼgaʼ ni guiníʼ hermanu ni chindee grupu que». Cumu biiyaʼ Erika ca ndaayaʼ ni redané gaca binni puntual la? bigaandabe meta stibe. Yanna, ¿xi ndaayaʼ racaláʼdxiluʼ guicaaluʼ yaʼ? Pa meta stiluʼ nga gúʼndaluʼ Biblia  o guni orarluʼ la? guníʼ ique pabiáʼ zacané ni lii chuʼluʼ jma gaxha de Jehová (Sal. 145:18, 19). Ne pa racaláʼdxiluʼ gápaluʼ xiixa cualidad, guníʼ ique ximodo zacané ni lii ora guidxaagaluʼ xcaadxi (Col. 3:14). ¿Xiruʼ zanda gúniluʼ yaʼ? Galán gucaaluʼ ximodo racaláʼdxiluʼ ugaandaluʼ meta stiluʼ ne gatigá biiyaʼ ca ni bicaaluʼ. Tomáš hermanu ni bizéʼtenu lu párrafo tobi que, guníʼ: «Ora riníʼ iqueʼ ca razón ni napaʼ para ugaanda meta stinneʼ, racané ni naa cadi guireeʼ gana ne guneʼ stipa para ugaandaʼ ni».

7. ¿Xi biʼniʼ Julio ne xheelaʼ para bigaandacaʼ meta sticaʼ?

⁷ Bidxaaga binni ni cuʼ gana lii (Prov. 13:20). Guidúʼyanu ni biʼniʼ Julio ne xheelaʼ. Laacabe racaláʼdxicabe chécabe sti lugar ra jma caquiiñeʼ gaca xhiiñaʼ Jehová. Laabe guniʼbe xi gucané laacabe: «Guca xhamígudu ca hermanu ni gucané laadu ugaandadu ca meta stidu ne rábidu laacaʼ xi naguixhe íquedu gúnidu. Cumu nuu de laacabe jma bigaandacabe meta cásica ca meta stidu la? bidiicabe laadu conseju ni gucané laadu, ne gatigá rinabadiidxacabe laadu ximodo zeʼ ca meta stidu ne riguucabe gana laadu ora caquíʼñedu ni».

8. ¿Xi zazaaca pa ora si nuunu gana gúninu stipa ugaandanu xiixa meta? (Biiyaʼ imagen ca).

⁸ Guiranu caquiiñeʼ chuʼ tu cuʼ gana laanu. Peru ¿ñee caníʼ nga maʼ qué zanda ugaandanu ca meta stinu la? Coʼ. Guiníʼ íquenu ndiʼ, racané bi ca ti barcu ni napa vela para chindá ra zeʼ. Peru cadi guiráʼ diʼ biaje nadipaʼ rundubi bi ca; ne nuu dxi la? gastiʼ bi. ¿Ñee riníʼ nga ziaanacá barcu que la? Coʼ. ¿Xiñee rininu ni yaʼ? Purtiʼ nuu barcu ni napa vela riquiiñeʼ ti motor ne xcaadxi la? riquiiñeʼ remu. Nga runi zanda iquiiñeʼ marineru ni ziné barcu que tobi de laacani para chindá ra zeʼ. Zaqueca reeda guizaaca ne laanu, nuu dxi la? qué gápanu gana peru qué riníʼ diʼ nga gusaananu meta stinu. ¿Xiiñeʼ yaʼ? Purtiʼ pa ora si nuunu gana nga gúninu stipa la? zándaca qué zugaandanu ca meta stinu. Peru, cásica ruyubi marineru que ximodo chindá ra zeʼ neca huaxiéʼ bi nuu la? laanu laaca neca huaxiéʼ gana nápanu zanda gúninu stipa para ugaandanu ca meta stinu, purtiʼ pa gúninu ni, zabeendunu ni galán. Ante guidúʼyanu ni zacané laanu ugaandanu ca meta stinu neca huaxiéʼ gana nápanu la? guicábinu ti pregunta ni zándaca gueeda guiníʼ ique tuuxa.

9. ¿Xiñee caquiiñeʼ gúninu stipa ugaandanu xiixa meta neca qué gápanu gana?

⁹ Racalaʼdxiʼ Jehová chuʼnu nayecheʼ ora gúninu ni ná ne gúninu ni de guidubi ladxidoʼno (Sal. 100:2; 2 Cor. 9:7). Yanna, ¿xiñee caquiiñeʼ gúninu stipa ugaandanu xiixa meta pa qué gápanu gana gúninu ni yaʼ? Guidúʼyanu ejemplu stiʼ apóstol  Pablo. Laa guníʼ: «Runeʼ castigar cuerpu stinneʼ ne runeʼ controlar ni casi rúnicabe né ti esclavu» (1 Cor. 9:25-27). Gudixhe ique apóstol Pablo guni ni jneza dede ne ora huaxiéʼ racaláʼdxibe gúnibe ni. ¿Ñee guyuulaʼdxiʼ Jehová xhiiñabe la? guyuulaʼdxiʼ pue. Ne guluu Jehová ndaayaʼ laabe pur dxiiñaʼ nadipaʼ ni bíʼnibe (2 Tim. 4:7, 8).

10. ¿Xi ndaayaʼ zacaanu pa gúninu stipa pur ugaandanu ca meta stinu neca huaxiéʼ gana nápanu?

¹⁰ Riecheʼ Jehová ora guuyaʼ cayúninu stipa pur ugaandanu xiixa meta neca huaxiéʼ gana nápanu. ¿Xiñee yaʼ? Purtiʼ nánnabe rúninu ni purtiʼ nadxiinu laabe neca nuu biaje huaxiéʼ riuuláʼdxinu gúninu ni gudixhe íquenu ugaandanu ca. Zaguu Jehová ndaayaʼ laanu pur ca stipa gúninu pur ugaandanu ca meta stinu cásica bíʼnibe né apóstol Pablo (Sal. 126:5). Ra guidúʼyanu ca ndaayaʼ ni gudii Jehová laanu, zacané ca ni laanu chuuláʼdxinu ugaandanu ca meta ni nápanu. Ti hermana láʼ Lucyna de guidxi Polonia, guníʼ: «Neca nuu biaje qué gapaʼ gana chiguneʼ predicar purtiʼ maʼ bidxagaʼ. Peru runeʼ stipa chaaʼ ne ora ribiguetaʼ guizáʼ nayecheʼ riuaaʼ, zeeda gácani casi ti regalu galán». Yanna, guidúʼyanu xi zanda gacané laanu ora huaxiéʼ gana nápanu.

11. ¿Ximodo racané Jehová laanu para ganda gucueezanu laca laanu?

¹¹ Gunabaʼ Jehová ganda gucueezaluʼ laca lii. Ganda gucueeza ti binni laca laa nga, ganda gucueeza ni runi ne ni runi sentir. Stale biaje riquíʼñenu diidxaʼ, gucueezanu laca laanu para cadi gúninu ni cadi jneza. Peru laaca riquíʼñenu ni para ganda gúninu stipa gúninu ni jneza, jmaruʼ si ora gaca ni nagana o qué gápanu gana gúninu ni. Guietenaláʼdxinu gucueeza tobi laca laa, zeeda gácani tobi de ca cualidad ni rudii espíritu. Nga runi pa guinábanu Jehová gudii laanu espíritu santu la? zacanebe laanu gápanu cualidad riʼ (Luc. 11:13; Gál. 5:22, 23). Guidúʼyanu xi gunabaʼ David, hermanu ni bizéʼtenu lu párrafo chonna que, lu oración. Laabe guniʼbe: «Cumu gunabaʼ Jehová ganda gucueezaʼ laca naa la? gunda bizuluáʼ gupaʼ estudiu personal ne dede yanna cayuneʼ ni».

12. ¿Ximodo racané Eclesiastés 11:4 laanu para ugaandanu ca meta stinu?

¹² Cadi guiníʼ íqueluʼ ora gápaluʼ jma tiempu nga gúniluʼ ni. Ndaaniʼ Guidxilayú riʼ stale cosa nga ni riguʼbaʼ tiempu stinu, pa guiníʼ íquenu cuézanu gápanu tiempu la? qué zanda ugaandanu meta ni naguixhe íquenu gúninu (biindaʼ Eclesiastés 11:4). Ti hermanu láʼ Dayniel guníʼ: «Pa cueeluʼ tiempu la? zuuyaluʼ zata chaahuiʼ ca cosa ca». Ti hermanu de guidxi Uganda láʼ Paul, ruzeeteʼ sti razón ni zanda gacané laanu ugaandanu ca meta stinu ne cadi gusaananu ni para despué, laabe guniʼbe: «Ora guzululuʼ gúniluʼ ni maʼ gudixhe íqueluʼ ugaandaluʼ neca cudxiiluluʼ guendanagana la? rudiiluʼ Jehová xiixa ni cuʼ ndaayaʼ» (Mal. 3:10).

13. ¿Xiñee galán guzulunu chaahuiʼ chaahuiʼ?

¹³ Bizulú chaahuiʼ chaahuiʼ. Zándaca nuu tiru zareʼnu gana purtiʼ ridúʼyanu nagana para ugaandanu ca meta stinu. Pa nga nga ni cazaacaluʼ, ¿xiñee qué quixhe íqueluʼ gúniluʼ caadxi cosa ni zacané lii ugaandaluʼ ca meta stiluʼ chaahuiʼ chaahuiʼ yaʼ? Casi pa racaláʼdxiluʼ gusihuínniluʼ ti cualidad stiʼ Jehová, ¿xiñee qué quixhe íqueluʼ gusihuínniluʼ ni dede lu ca cosa nahuiiniʼ ni rúniluʼ yaʼ? Yanna, pa racaláʼdxiluʼ  gúʼndaluʼ Biblia, ¿xiñee qué quixe íqueluʼ gúʼndaluʼ tindaa de laani chupa chonna si minutu yaʼ? Guidúʼyanu xi biʼniʼ Tomáš, hermanu ni bizéʼtenu ra bizulú artículo riʼ para gunda bigaanda meta de guʼndaʼ Biblia lu ti iza. Laabe guniʼbe: «Bidieeʼ cuenta nagana raca para naa guundaʼ Biblia lu ti iza. Ngue runi guníʼ iqueʼ guundaʼ caadxi versículo guiráʼ dxi ne cadi guneʼ ni nagueenda, sínuque guiníʼ iqueʼ ni cayuundaʼ. Ngue gucané naa chuuladxeʼ guundaʼ Biblia». Yanna, cumu jma maʼ riuulaʼdxiʼ Tomáš guʼndaʼ Biblia la? biquiiñeʼ jma tiempu stiʼ para guni ni. Ne zacá biluxe biindabe guidubi Biblia. c

14. ¿Xi caadxi cosa zanda gucueeza laanu ugaandanu ca meta stinu?

¹⁴ Neca racaláʼdxinu ugaandanu xiixa meta ne rúninu stipa para gúninu ni, zándaca guidxaagalunu xiixa ni gucueeza laanu. Casi guizaaca xiixa cosa «ora cadi cabézanu» ne gaxhaʼ ni tiempu ni caquíʼñenu para ugaandanu meta stinu (Ecl. 9:11). O zándaca guidxaagalunu xiixa guendanagana ni cuee gana o gusaana laanu sin stipa (Prov. 24:10). Ne cumu nácanu binni ruchee la? nga laaca zanda gucueeza laanu de ugaandanu ca meta stinu (Rom. 7:23). O zándaca guni sentirnu maʼ bidxáganu (Mat. 26:43). Yanna, ¿xi zanda gacané laanu yaʼ?

15. ¿Xiñee cadi naquiiñeʼ guireʼnu gana ora chuʼ xiixa ni gucueeza laanu? (Salmo 145:14).

¹⁵ Bietenalaʼdxiʼ neca nuu xiixa ni gucueeza lii la? zándaruʼ ugaandaluʼ meta stiluʼ. Rusiidiʼ Biblia zadxaagalunu guendanagana, peru laaca rusiidiʼ ni nuu Jehová para gacané laanu ugaandanu ca meta stinu (biindaʼ Salmo 145:14). Philip ni bizéʼtenu lu primé párrafo que, guníʼ: «Qué rireeʼ gana ora qué rugaandaʼ xiixa meta, sínuque runeruaʼ stipa pur ugaandaʼ ca ni». Yanna, guzéʼtenu ni guníʼ  David, hermanu ni maca bizéʼtenu de laa. Laa guníʼ: «Ora rapaʼ guendanagana qué rucueeza ca ni naa, sínuque racané ca ni naa guluéʼ pabiáʼ nadxieeʼ Jehová». Pa gúninu stipa ugaandanu ca meta stinu neca nápanu guendanagana la? cusihuínninu racaláʼdxinu gúninu ni ná Jehová. ¿Ñee riníʼ íqueluʼ pabiáʼ riecheʼ Jehová ra guuyaʼ cayúniluʼ stipa ugaandaluʼ ca meta stiluʼ la?

16. ¿Xi zanda guizíʼdinu de ca cosa ni rucueeza laanu para ugaandanu meta stinu?

¹⁶ Biiyaʼ xi zanda guiziidiluʼ de ca cosa ni rucueeza lii. Biiyaʼ xi cucueeza lii ne guníʼ ique xi zanda gúniluʼ para cadi guizaacaruʼ ni (Prov. 27:12). Yanna, pa maʼ bíninu ni nuu lu nanu ne qué ganda ugaandanu meta stinu la? zanda guiníʼ íquenu, ¿ñee cadi caquiiñeʼ guchaaʼ meta ca la? Ne pa nga nga ni cazaacaluʼ la? galán gúʼyaluʼ pa zanda ugaandaluʼ d meta ni gudixhe íqueluʼ ca. Ne Jehová qué zaníʼ ique maʼ bicheeluʼ purtiʼ si qué ñanda nugaandaluʼ meta stiluʼ (2 Cor. 8:12).

17. ¿Xiñee galán cadi guianda laanu ca meta ni maʼ bigaandanu?

¹⁷ Cadi guianda lii ca ni maʼ bigaandaluʼ. Biblia ná: «Jneza runi Dios ne qué zusiaandaʼ guiráʼ ni maʼ bíʼnitu» (Heb. 6:10). Nga runi, lii laaca cadi gusiaandaluʼ ca ni. Guníʼ ique ca ni maʼ gunda bíʼniluʼ, maʼ nácaluʼ xhamigu Jehová, rusiidiluʼ binni de laabe, runi predicarluʼ o maʼ guyuu nizaluʼ. Rusihuinni guiráʼ ca meta ni maʼ bigaandaluʼ ca zándaruʼ guiniisiluʼ ndaaniʼ xquidxi Jehová ne zanda ugaandaluʼ ca meta ni naguixhe íqueluʼ gúniluʼ (Filip. 3:16).

18. ¿Xi caquiiñeʼ gúniluʼ laga cayúniluʼ stipa ugaandaluʼ ca meta stiluʼ? (Biiyaʼ imagen ca).

¹⁸ Zacané Jehová lii ganda ugaandaluʼ ca meta stiluʼ ne ziuuluʼ nayecheʼ cásica ora rindá xa hombre ni ziné barcu que ra zeʼ. Stale marineru riuucaʼ nayecheʼ ante chindacaʼ ra zecaʼ purtiʼ ruuyadxicaʼ guiráʼ ni nuu gaxha de laacaʼ. Lii laaca zanda chuʼluʼ nayecheʼ laga cayúniluʼ stipa ugaandaluʼ ca meta stiluʼ pa guyadxiluʼ ximodo cayacané ne caguu Jehová ndaayaʼ lii (2 Cor. 4:7). Pa cadi guireeluʼ gana la? zacaaluʼ jma ndaayaʼ de ni cabézaluʼ (Gál. 6:9).