1. ¿Xi cosa nabé risaca bisiidiʼ Jehová Abrahán?

 QUÉ nusiaandaʼ diʼ Abrahán ni bizaaca riʼ. Biquiiñeʼ Jehová ti ángel, ne gúdxibe Abrahán zunitilube guidxi Sodoma ne Gomorra. Neca guca Abrahán ti hombre ni napa fe Dios, peru guca nagana para laabe guiénebe ni cayabi Jehová laabe, ngue runi gunabadiidxabe: «¿Ñee dxandíʼ zunitilulú binni ni runi ni jneza ne binni malu la? […] ¿Ñee qué zuni Juez stiʼ guidubi naca guidxilayú ni jneza la?». Bisiidiʼ Jehová, xhamigu ni nabé nadxii, né stale paciencia ti cosa nabé risaca: qué ziuu dxi gunitilube ca binni ni runi ni jneza. ¡Aque riguixhedxí nga ladxidoʼno! (Gén. 18:​23, 25).

2. ¿Xiñee nánnanu jneza modo runi juzgar Jehová ne riá binni?

² ¿Xiñee nanna dxíchinu jneza modo runi juzgar Jehová ne riá binni yaʼ? Purtiʼ nánnanu «Jehová ruuyaʼ ni nuu ndaaniʼ ladxidóʼ binni» (1 Sam. 16:7). Ne runibiaʼbe ladxidóʼ cada tobi (1 Rey. 8:39; 1 Crón. 28:9). ¡Pabiáʼ sicarú gánnanu nga! Nabé nuu xpiaaniʼ Jehová ne qué rugaanda diʼ guiénenu guiráʼ ni rúnibe ora guni juzgarbe. Nga runi apóstol Pablo guníʼ de Jehová: «Tu laa zanda guiene ca juiciu stibe» (Rom. 11:33).

3, 4. ¿Xi zándaca guiníʼ íquenu ne xi zadúʼyanu lu artículo riʼ? (Juan 5:​28, 29).

³ Neca zacá ziuu ora zándaca guiníʼ íquenu cásica guníʼ ique Abrahán. Zándaca guiníʼ íquenu: «¿Ñee zanda guibani ca binni ni Jehová peʼ binitilú casi ca binni de Sodoma ne Gomorra la? ¿Ñee ziásacabe lade ca binni “ni qué ñuni ni jneza” la?» (Hech. 24:15).

 ⁴ Chiguininu ni riénenu de ora riasa binni de lade gueʼtuʼ. Cadi tan xadxí biene chaahuinu ni maca nánnanu xi riníʼ ziasa binni para guibani ne ziasa binni para gaca juzgar (biindaʼ Juan 5:​28, 29). a Ra biene chaahuinu ni, bicaa ni laanu guchaʼnu caadxi cosa ni chiguidúʼyanu lu artículo riʼ ne lu stobi ca. Primé zadúʼyanu xi qué gánnanu de modo runi juzgar Jehová ne despué zadúʼyanu ni maʼ nánnanu de laani.

NI QUÉ GÁNNANU

5. ¿Xi huazeeteʼ ca publicación stinu de ca binni ni gutiʼ ndaaniʼ guidxi Sodoma ne Gomorra?

⁵ ¿Xi zazaaca né ca binni ni Jehová peʼ binitilú purtiʼ nácacaʼ binni ni qué runi ni jneza, casi ca ni bibani ndaaniʼ guidxi Sodoma ne Gomorra yaʼ? Dxiqué biʼniʼ crenu qué ziasa ca binni riʼ de lade gueʼtuʼ. Peru despué de biʼniʼ orar ne biʼniʼ estudiar chaahuiʼ mozo ni nuu xpiaaniʼ, maʼ bidiibe cuenta qué zanda diʼ guininu zacá peʼ nga chigaca ni. Guidúʼyanu xiñee.

6. ¿Bizeeteʼ chupa chonna historia ra binduuxeʼ Jehová binni ni qué ñuni ni jneza, ne xi qué zanda guininu?

⁶ Nuu stale historia stiʼ Biblia ra riete Jehová peʼ nga binduuxeʼ ca binni ni qué ñuni ni jneza nezalube. Casi lu Diluvio que gutiʼ guiráʼ xixé binni nabeza lu Guidxilayú, peru bilá Noé ne familia stiʼ. Despué biʼniʼ mandar Jehová ca israelita guuticaʼ guiráʼ binni ni nabeza ndaaniʼ gadxe guidxi ni nuu lu Tierra Prometida que. Ne ti biaje biʼniʼ mandarbe guuti ti ángel ti gayuaa ochenta y cinco mil soldadu asiriu ti gueelaʼ si (Gén. 7:23; Deut. 7:​2, 3; Is. 37:​36, 37). Peru ¿ñee ruzeeteʼ Biblia binduuxeʼ Jehová laacabe para siempre la? ¿Ñee qué zápacabe esperanza de guibánicabe sti biaje la? Qué gánnanu ni. Guiene chaahuinu ni.

7. ¿Xi qué gánnanu de ca binni ni gutiʼ lu Diluvio que ne de ca binni de guidxi Canaán? (Biiyaʼ dibuju).

⁷ Neca nánnanu juntu binitilú Jehová guiráʼ binni que, peru qué gánnanu ximodo biiyaʼ Jehová cada tobi de laacabe ne laaca qué gánnanu pa gunda biziidiʼ ca ni gutiʼ que de laabe ne pa guca arrepentircaʼ. Biblia rabi laanu ante gueeda Diluvio que guca Noé «hombre ni biʼniʼ predicar ni jneza» (2 Ped. 2:5). Peru qué riníʼ diʼ ni, pa bíʼnibe stipa pur guni predicarbe guiráʼ xixé ne cada tobi de ca binni ni nuu lu Guidxilayú ca dxi cuzaʼbe arca que. Laaca qué gánnanu pa guiráʼ binni malu ni guleza ndaaniʼ guidxi Canaán gúpacaʼ oportunidad de guiziidicaʼ de Jehová ne guyúbicaʼ guchaacaʼ xquendanabánicaʼ.

8. ¿Xi qué gánnanu de ca binni ni guleza ndaaniʼ guidxi Sodoma ne Gomorra?

⁸ ¿Xi zanda guininu de ca binni ni guleza ndaaniʼ guidxi Sodoma ne Gomorra yaʼ? Nánnanu ndaaniʼ guidxi Sodoma guleza Lot, ti binni ni biʼniʼ ni jneza. Peru qué gánnanu pa biʼniʼ predicarbe guiráʼ xixé binni ni nuu raqué. Dxandíʼ nácacabe binni qué iquiiñeʼ, peru ¿ñee gúnnacabe xii nga ni jneza ne ni cadi jneza la? Ruluíʼ si cadi zacá ni, purtiʼ ruzeeteʼ Biblia stale hombre de guidxi Sodoma gucaláʼdxicaʼ nilaxoocaʼ ca binni ni yeganna Lot. Lu grupu de binni que la? nuu binni nahuiiniʼ ne zándaca qué rienecaʼ pabiáʼ malu ngue ca cosa ni cayúnicaʼ (Gén. 19:4; 2 Ped. 2:7). ¿Ñee zanda guininu o nuunu seguru maʼ gucuaa Jehová decisión de cadi guindisaʼ nin tobi de ca binni riʼ, pa nácabe ti Dios ni guizáʼ riá binni la? Dxandíʼ, pur ni gudxi Jehová Abrahán la? bisiénebe laa zándaca gastiʼ nin chii binni nachaʼhuiʼ ndaaniʼ guidxi que  (Gén. 18:32). Ngue runi nácacabe binni ni qué runi ni jneza ne biʼniʼ Jehová ni jneza ra binitilú laacabe. Yanna, ¿ñee nuunu seguru nin tobi de ca binni riʼ qué zabánicaʼ ra guiasa ca binni ni qué ñuni ni jneza la? Qué zanda guininu zacá ni.

9. ¿Xi qué gánnanu de Salomón?

⁹ Laaca ruzeeteʼ Biblia guyuu binni ni biʼniʼ ni jneza, peru bisaana de gúnicabe ni ne gúcacabe binni ni qué runi ni jneza, casi rey Salomón. Laabe runibiáʼ chaahuibe Jehová ne nánnabe ximodo naquiiñeʼ gaca adorar, ne bidii Jehová laabe stale ndaayaʼ. Peru gudiʼdiʼ si ti tiempu bizulú biʼniʼ adorarbe ca dios falsu. Guizáʼ bichiichi ngue Jehová ne guizáʼ gucaná guidxi que stale iza pur ca pecadu ni biʼniʼ Salomón. Dxandíʼ, ruzeeteʼ Biblia dxi gútibe la? biziiláʼdxibe ra caziilaʼdxiʼ ca bixhozebiidabe, ládecaʼ nuu rey David (1 Rey. 11:​5-9, 43; 2 Rey. 23:13). Yanna, ¿ñee tiisi bigaachibe lade ca rey chaʼhuiʼ que caníʼ nga ziásabe de lade gueʼtuʼ la? Qué riníʼ diʼ Biblia ni. Peru zándaca nuu tu laa zaníʼ ique ziásabe purtiʼ casi ná Romanos 6:7 «ni maʼ guti la? maʼ guca perdonar ca pecadu stiʼ». Peru textu ca cadi caníʼ diʼ ni guiráʼ ca ni maʼ gutiʼ ziásacaʼ de lade gueʼtuʼ, casi xa ñaca guiráʼ tu gatiʼ napa derechu de guiasa. Guiasa binni de lade gueʼtuʼ zeeda gaca ni casi ti regalu ni rudii Jehová, ne rúnibe ni purtiʼ nadxiibe binni ne racaláʼdxibe gápacaʼ oportunidad de gúnicaʼ ni nabe para siempre (Job 14:​13, 14; Juan 6:44). ¿Ñee zacaa Salomón regalu ca la? Laanu la? qué gánnanu ni, peru Jehová nanna ni. Ni nánnanu nga zuni Jehová ni jneza.

NI MAʼ NÁNNANU

10. ¿Xi runi sentir Jehová ora runitilú ca binni malu? (Ezequiel 33:11; biiyaʼ imagen ca).

¹⁰ (Biindaʼ Ezequiel 33:11). Rabi Jehová laanu xi runi sentir ora redané ti juiciu luguiáʼ tuuxa. Apóstol Pedro bicaa caadxi diidxaʼ cásica ni guníʼ profeta Ezequiel. Laabe guniʼbe: «Qué [racalaʼdxiʼ Jehová] guinitilú nin tobi»(2 Ped. 3:9). Riguixhedxí ca diidxaʼ ca ladxidoʼno. Zanda chuʼnu seguru qué runitilú Jehová binni para siempre pa gastiʼ ti razón nadipaʼ o naroʼbaʼ para gúnibe ni. Ne siempre riabe binni pa gúʼyabe nuu ti razón para gúnibe ni.

11. ¿Tuu nga ca ni qué ziasa de lade gueʼtuʼ ne ximodo nánnanu ni?

¹¹ Yanna, ¿tuu nga ca binni ni nánnanu qué ziásacaʼ de lade gueʼtuʼ yaʼ? Ruzeeteʼ Biblia chupa chonna de laacabe. b Guníʼ Jesús qué ziasa Judas Iscariote de lade gueʼtuʼ (Mar. 14:21; laaca zanda gúʼyaluʼ Juan 17:12 ne nota de estudiu). Nanna dxichi Judas xi cayuni: bicaalube Jehová ne Xiiñiʼ (biiyaʼ Marcos 3:29 ne ca nota de estudiu). Laaca guníʼ Jesús qué ziasa chupa chonna de ca líder stiʼ ca religión ni bicaalú laa (Mat. 23:33; laaca zanda gúʼyaluʼ Juan 19:11 ne nota de estudiu «del hombre»). Ne apóstol Pablo laaca bizeeteʼ ca apóstata ni qué gaca arrepentir la? laaca qué ziásacaʼ de lade gueʼtuʼ (Heb. 6:​4-8; 10:29).

12. ¿Xi nánnanu de modo riá Jehová binni? Bizeeteʼ ti ejemplu.

¹² Casi maʼ bidúʼyanu naca Jehová ti Dios ni nabé riá binni ne «qué racaláʼdxibe guinitilú nin tobi». ¿Ximodo bisihuínnibe riabe caadxi binni ni bíʼnicaʼ pecadu grave yaʼ? Guidúʼyanu ni. Biʼniʼ David caadxi pecadu grave, guyuunebe xheelaʼ binni ne biitibe, peru guca arrepentirbe. Guizáʼ biá Jehová laabe ne bitiidilaʼdxiʼ stóndabe (2 Sam. 12:​1-13). Biʼniʼ rey Manasés stale cosa qué iquiiñeʼ lu xquendanabani.  Neca peʼ gúcabe ti rey guizáʼ malu, bisihuinni Jehová riá laabe ne biʼniʼ perdonar laabe purtiʼ guca arrepentirbe de guidubi ladxidoʼbe (2 Crón. 33:​9-16). Ca ejemplu riʼ rusihuinni ca ni siempre riá Jehová ora napa ti razón para guni ni. Zandísabe David ne Manasés de lade gueʼtuʼ purtiʼ bidiicaʼ cuenta biʼniʼ cometercaʼ pecadu grave ne guca arrepentircaʼ.

13. a) ¿Xiñee bisihuinni Jehová riá ca binni de Nínive? b) ¿Xi guníʼ Jesús de ca binni de Nínive?

¹³ Laaca nánnanu guizáʼ biá Jehová ca binni de guidxi Nínive. Gudxi Dios Jonás: «Maʼ biiyaʼ ca cosa qué iquiiñeʼ ni rúnicabe». Peru ora laacabe guca arrepentírcabe de ca pecadu stícabe, guca Jehová nachaʼhuiʼ ne laacabe ne biʼniʼ perdonar laacabe. Bisihuinni Jehová jma riá binni qué Jonás. Ora bidxiichi profeta que, gupa xidé bisietenalaʼdxiʼ Jehová laabe ca binni de Nínive «qué gánnacaʼ xii nga ni jneza ne ni cadi jneza» (Jon. 1:​1, 2; 3:10; 4:​9-11). Despué, biquiiñeʼ Jesús ejemplu stiʼ ca binni de Nínive, ca ni guca arrepentir, para gusihuinni pabiáʼ jneza runi Jehová ne pabiáʼ riabe binni. Guniʼbe «dxi gueeda juiciu, ziasa ca binni de Nínive» (Mat. 12:41).

14. ¿Xi zazaaca ca binni de Nínive ora guiásacaʼ para gaca juzgarcaʼ?

¹⁴ ¿Xi «juiciu» cazaaca dxi guiasa ca binni de Nínive yaʼ? Guníʼ Jesús «ziasa ca ni biʼniʼ cosa malu para gaca juzgarcaʼ» ne zaca ni huidxe si (Juan 5:29). Caniʼbe ni chiguizaaca lu ti mil iza guni mandarbe, dxi gusibani Dios ca ni maʼ gutiʼ «ca ni biʼniʼ ni jneza ne ca ni qué ñuni ni jneza» (Hech. 24:15). Ziasa «ca ni qué ñuni ni jneza» para gaca juzgarcaʼ purtiʼ Jehová ne Jesús nga chiguuyaʼ pa zuzuubacabe diidxaʼ ne pa zúnicabe ni caziidicabe. Pa ti binni de Nínive guiasa de lade gueʼtuʼ peru qué naʼ guni ni ná Jehová la? zaca juzgarbe para gátibe (Is. 65:20). Peru pa quixhe íquebe gúnibe ni ná Jehová, zándaca guibánibe sin qué chuʼ dxi gátibe (Dan. 12:2).

15. a) ¿Xiñee cadi naquiiñeʼ guininu qué ziasa nin tobi de ca binni ni binitilú ndaaniʼ guidxi Sodoma ne Gomorra? b) ¿Ximodo zanda guiénenu ca diidxaʼ ni zeeda lu Judas 7? (Biiyaʼ cuadru ni láʼ « ¿Xi gucalaʼdxiʼ Judas niníʼ?»).

¹⁵ Guníʼ Jesús dxi gueeda Juiciu stiʼ Dios  jma naná zaca ni para ca ni gucaanáʼ laabe ne ca ni rusiidibe «que para Sodoma ne Gomorra» (Mat. 10:​14, 15; 11:​23, 24; Luc. 10:12). ¿Xi gucaláʼdxibe niniʼbe yaʼ? Ruluíʼ si caníʼ Jesús ti hipérbole c o cayuni exagerar ni caníʼ, peru cadi zacá ni, sínuque caniʼbe ni chiguizaaca peʼ, cásica bíʼnibe ora guniʼbe de ca binni de Nínive. «Dxi gueeda Juiciu» ni bizeeteʼ Jesús raríʼ zándaca laca laani nga juiciu ni guniʼbe ora bizeetebe de ca binni de Nínive. Ca binni de Nínive bíʼnicaʼ cosa malu casi ca biʼniʼ ca binni de Sodoma ne Gomorra. Peru ca binni de Nínive gúpacaʼ oportunidad de gaca arrepentircaʼ. Ne cadi guiaandaʼ laanu guníʼ Jesús «ziasa ca ni biʼniʼ cosa malu para gaca juzgarcaʼ» (Juan 5:29). Nga runi, ruluíʼ si zapa ca binni de Sodoma ne Gomorra ti esperanza. Ne zándaca ziasa caadxi de laacaʼ de lade gueʼtuʼ ne zacanenu laacabe gunibiáʼcabe Jehová ne Jesús.

16. ¿Xi ruuyaʼ Jehová para guicaa decisión ante guindisaʼ tuuxa de lade gueʼtuʼ? (Jeremías 17:10).

¹⁶ (Biindaʼ Jeremías 17:10). Ridúʼndanu lu versículo riʼ ni maʼ nánnanu: de modo runi juzgar Jehová siempre laabe ruuyaʼ chaahuibe ladxidóʼ binni ne ruuyaʼ chaahuibe ca pensamientu ni jma gaʼchiʼ stiʼ binni. Ra guicaabe decisión tu guiasa de lade gueʼtuʼ zaguíxebe «cada tobi ni naquiiñeʼ guicaa pur modo bibani». Qué zuchaa diʼ Jehová decisión ni maʼ gucuaa pa cadi caquiiñeʼ gúnibe ni, peru ziabe binni dede ra gándatiʼ pa guidxélabe ti razón para gúnibe ni. Nga runi qué zanda guininu qué ziasa ti binni de lade gueʼtuʼ, zanda guininu ni pa nuunu seguru zeeda ni lu Biblia.

«JUEZ STIʼ GUIDUBI NACA GUIDXILAYÚ» SIEMPRE ZUNI NI JNEZA

17. ¿Xi zazaaca ca binni ni maʼ guti?

¹⁷ Dede dxi bicaalú Binidxabaʼ, Adán ne Eva Jehová la? maʼ guti stale binni. Enemigu stinu «guendaguti» maʼ ziné stale binni (1 Cor. 15:26). ¿Xi zazaaca né ca binni riʼ yaʼ? Ziasa ti grupu de ti gayuaa cuarenta y cuatro mil xpinni Cristu para checaʼ guibáʼ ne maʼ qué ziuu dxi gáticaʼ  (Apoc. 14:1). Ne stale hombre ne gunaa ni gunnaxhiicaʼ Jehová ziásacaʼ ora guiasa «ca ni biʼniʼ ni jneza» ne zabánicaʼ para siempre lu Guidxilayú pa qué gucheenecaʼ Jehová lu ti mil iza guni mandar Cristu (Dan. 12:13; Heb. 12:1). Ne laaca lu tiempu riʼ «ca ni qué ñuni ni jneza», ládecabe nga nuu ca binni ni qué ñuni ni ná Jehová o dede ca ni zanda guininu biʼniʼ cosa malu, zápacaʼ oportunidad de guchaacaʼ modo nabánicaʼ ne guni adorarcaʼ Dios (Luc. 23:​42, 43). Peru ca binni ni guca nabé malu ne laapecaʼ biyúbicaʼ modo gucaalucaʼ Jehová la? maʼ gudixhe íquebe qué ziásacaʼ de lade gueʼtuʼ (Luc. 12:​4, 5).

18, 19. a) ¿Xiñee jneza ca decisión ni zacaa Jehová para ca binni ni maʼ guti? (Isaías 55:​8, 9). b) ¿Xi zadúʼyanu lu sti artículo ca?

¹⁸ ¿Ñee zanda chuʼnu seguru ora guni juzgar Jehová binni siempre jneza ca decisión ni ricaa la? ¡Jneza pue! Cásica Abrahán, nánnanu laabe nga «Juez stiʼ guidubi naca guidxilayú» qué rucheebe, guizáʼ riabe binni ne guizáʼ nuu xpiaanibe. Maʼ bisaana Jehová lu náʼ Xiiñiʼ guni juzgar guiráʼ xixé binni ne maʼ bisiidibe laa ximodo guni ni (Juan 5:22). Cásica Jehová ne zaqueca Jesús zanda guuyacabe ni nuu ndaaniʼ ladxidóʼ binni (Mat. 9:4). Nga runi zúnicabe ni jneza ora guni juzgárcabe cada binni.

¹⁹ Gápanu confianza Jehová ne gápanu confianza jneza ca decisión ni ricaabe. Laanu la? qué gánnanu guni juzgarnu, peru laabe la? nánnabe ximodo caquiiñeʼ guni juzgarbe (biindaʼ Isaías 55:​8, 9). Nánnanu jneza guiráʼ ni rúnicabe nga runi, nápanu confianza jneza modo zuni juzgar Jehová ne Jesús guiranu. Ne laaca nánnanu Jesús, Rey stinu, runi casi peʼ modo runi Bixhoze, runi ni jneza ne riá binni (Is. 11:​3, 4). Lu sti artículo ca zaninu xii nga ni qué gánnanu ne xii nga ni nánnanu de modo chiguni juzgar Jehová ne Jesús binni lu gran tribulación.