1, 2. Bizeeteʼ ti ejemplu para gusiéneluʼ ximodo zanda chinándanu ni ná Proverbios 4:25.

GUINÍʼ íquenu ni cazaaca chonna xpinni Cristu: ti hermana maʼ huaniisi cayetenalaʼdxiʼ ca cosa galán ni bizaaca lu xquendanabani. Tiempu riʼ jma nagana raca para laabe gúnibe caadxi cosa, peru cayúnirube ni ná Jehová (1 Cor. 15:58). Guiráʼ dxi riníʼ íquebe maʼ nuunebe familia stibe ndaaniʼ Paraísu. Sti hermana cayetenalaʼdxiʼ pabiáʼ bininá tuuxa de congregación laa, peru caníʼ ique guni perdonar laabe ne cadi gapa xiana (Col. 3:13). Ne ti hermanu cadi cusiaandaʼ ca cosa malu ni biʼniʼ dxiqué, peru cayuni stipa cadi guixeleʼ de Jehová (Sal. 51:10).

² ¿Xiñee casi ngueca nga ni caníʼ ique guionnaʼ xpinni Cristu riʼ? Purtiʼ rietenaláʼdxicabe ni bizaacacabe dxiqué, peru qué rudiicabe lugar cueeni gana laacabe. Lugar de nga la? ruyadxícabe delante, ca cosa galán chiguizaaca despué (biindaʼ Proverbios 4:25).

3. ¿Xiñee risaca cadi gusaana de guidúʼyadxinu ni chiguizaaca lu ca dxi ni zeeda ca?

³ ¿Xiñee risaca cadi gusaana de guidúʼyadxinu ni chiguizaaca lu ca dxi ni zeeda ca? Purtiʼ cásica ti binni qué zanda sáʼ derechu pa puru atrá cayuuyadxí la? laanu laaca qué zanda gúninu ni ná Jehová pa siempre maʼ cayetenaláʼdxinu ni bizaacanu dxiqué (Luc. 9:62).

4. ¿Xi zazíʼdinu lu artículo riʼ?

⁴ Lu artículo riʼ zadúʼyanu chonna cosa ni zanda gucaa laanu guicá íquenu xhaatanu ni bizaacanu dxiqué: * primé,  gacaláʼdxinu guibáninu casi bibáninu dxiqué, guiropa, gápanu xiana ne guionna, guiníʼ íquenu náparunu donda. Ra guininu de cada tobi de laani, zadúʼyanu ximodo zanda gacané ca principiu ni zeeda lu Biblia gusiáʼndanu guiráʼ ni maʼ bisaananu ne gúninu stipa para ugaandanu guiráʼ ni nuu neza ra ziuunu. (Filip. 3:13).

5. ¿Ximodo caguixhená Eclesiastés 7:10 laanu?

⁵ (Biindaʼ Eclesiastés 7:10). Lu versículo riʼ ná cadi malu guietenalaʼdxiʼ binni pabiáʼ galán modo bibani dxiqué, sínuque cadi jneza nga guiníʼ ique binni jma galán modo bibani dxiqué que yanna. Cadi guiaandaʼ laanu ti regalu stiʼ Jehová nga ca recuerdu ni nápanu. Ni cadi jneza nga guchaaganu modo bibáninu dxiqué ne modo nabáninu yanna, ne guiníʼ íquenu jma feu modo nabáninu tiempu riʼ. Sicaríʼ runi traducir sti Biblia versículo riʼ: «Cadi guinabadiidxaluʼ xiñee jma galán modo bibániluʼ dxiqué, purtiʼ cadi galán guinabadiidxaluʼ zacá».

6. ¿Xiñee cadi jneza siempre guiníʼ íquenu jma galán modo bibáninu dxiqué? Bizeeteʼ ti ejemplu.

⁶ ¿Xiñee cadi jneza siempre guiníʼ íquenu jma galán modo bibáninu dxiqué? Purtiʼ pa gacaláʼdxinu guibáninu casi bibáninu ante, ca cosa galán si zietenaláʼdxinu ne maʼ qué zietenaláʼdxinu ca guendanagana gúpanu. Guiníʼ íquenu ni bizaaca ca israelita: nin cadi xadxí de bireecabe de Egipto bisiaandacabe pabiáʼ nagana modo bibánicabe raqué ne ni bietenaláʼdxisícabe nga guiráʼ ca guendaró nanixe ni gudócabe raqué, sicaríʼ guníʼcabe: «¡Nabé ribánanu ca benda ni gudoʼdo Egipto sin niguíxhedu, ne ca pepinu, ca xandié, ca cebolla guixi, ca cebolla ne ca aju que!» (Núm. 11:5). Peru ¿dxandíʼ nga qué niguíxhecabe gastiʼ la? Coʼ. Guizáʼ caru gudíxhecabe ni gudócabe purtiʼ gúcacabe esclavu Egipto (Éx. 1:13, 14; 3:6-9). Nin qué nindaa, bisiaandaʼ ca israelita guiráʼ ca guendanagana gúpacaʼ ne bibánacaʼ  caadxi cosa gúpacaʼ Egipto. Lugar de nicá íquecabe guiráʼ ni biʼniʼ Jehová pur laacabe la? laga bietenaláʼdxicabe guiráʼ ni gúpacabe dxiqué. Guizáʼ bidxiichi Jehová pur ni bíʼnicabe que (Núm. 11:10).

7. ¿Xi gucané ti hermana para cadi guibanaʼ modo bibani dxiqué?

⁷ ¿Xi zacané laanu cadi guibánanu modo bibáninu dxiqué? Guidúʼyanu ni bizaaca ti hermana ni biʼniʼ servir Betel de Brooklyn lu iza 1945. Chupa chonna iza despué bichaganabe ti betelita ne biʼniʼ servírcabe raqué caadxi iza. Lu iza 1976 guca huará xheelabe. Dxi mayaca gatiʼ xheelaʼ hermana riʼ, bidii caadxi conseju laabe para dxi guiaanabe viuda. Gudxi laabe: «Guizáʼ nayecheʼ modo huabáninu. Stale guendaxheelaʼ qué ganna ximodo guibani nayecheʼ». Ne laaca gudxi laabe: «Cadi guicá ique xhaataluʼ modo bibáninu dxiqué, ra tidiʼ tiempu zadiʼdiʼ yuubaʼ stiluʼ. Cadi guireeluʼ gana ne cadi chuʼluʼ triste pur ni maʼ bizaacaluʼ. Bidii xquixe peʼ pur ca tiempu galán gudídinu ra biʼniʼ servirnu Jehová. Ziuu dxi maʼ qué ziuuluʼ triste ora guietenaláʼdxiluʼ pabiáʼ galán modo bibáninu. Ti regalu stiʼ Dios guiráʼ ni gudídinu juntu». ¡Guizáʼ galán ca diidxaʼ guníʼ hermanu riʼ!

8. ¿Xi ndaayaʼ gucuaa ti hermana purtiʼ qué nicá ique xhaataʼ modo bibani dxiqué?

⁸ Yenanda hermana riʼ conseju bidii xheelaʼ laa. Bíʼnibe ni ná Jehová dede dxi gútibe, dxi nápabe 92 iza. Caadxi iza ante gátibe guniʼbe: «Maʼ ziniaʼ jma de sesenta y tres iza de cayuneʼ ni ná Jehová de tiempu completu ne ora rietenalaʼdxeʼ guiráʼ ni huayuneʼ, rudieeʼ cuenta guizáʼ galán modo huabaneʼ». ¿Xiñee yaʼ? Sicaríʼ guniʼbe: «Ni jma rusiecheʼ naa nga chuaaʼ tobi si né ca hermanu stinneʼ ne guibaneniaʼ laacabe ndaaniʼ ti Paraísu sicarú ra cayúninu ni ná Jehová, Dios ni bizáʼ laanu». * ¡Bisaana hermana riʼ ti ejemplu galán purtiʼ siempre  bicá íquebe ca ndaayaʼ ni zacaabe lu ca dxi ni zeeda ca!

9. Casi ná Levítico 19:18, ¿pora nga zanda gaca nagana para laanu guni perdonarnu ne cadi gápanu xiana?

⁹ (Biindaʼ Levítico 19:18). Nuu biaje raca nagana para laanu guni perdonarnu tuuxa, jmaruʼ si pa ti hermanu stinu laabe, ti xhamígunu o ti familia stinu. Ti biaje guníʼ ti hermana gulaʼnaʼ sti hermana bueltu stiʼ, peru cadi dxandíʼ ni. Despué gunábabe hermana riʼ guni perdonar laabe, peru guca nagana para hermana que gusiaandaʼ ni bizaaca que. Zándaca qué huazaacanu ni bizaaca hermana riʼ, peru zándaca huayaca nagana para laanu guni perdonarnu tuuxa ne maʼ cadi gápanu xiana.

10. ¿Xi zacané laanu cadi guidaʼnu xiana?

¹⁰ ¿Xi zacané laanu cadi guidaʼnu xiana? Primé, naquiiñeʼ guietenaláʼdxinu ruuyaʼ Jehová guiráʼ ni rizaaca, nánnabe guiráʼ ca guendanagana cadídinu ne ca injusticia ni runi sufrirnu (Heb. 4:13). Racanabe ora ruuyabe cayacananu (Is. 63:9). Ne cayuni prometerbe laanu maʼ cadi candaa zabeebe guiráʼ ca cosa malu ni cayuniná laanu (Apoc. 21:3, 4).

11. ¿Xi zabeendunu pa qué guidaʼnu xiana?

¹¹ Laaca naquiiñeʼ guietenaláʼdxinu zabáninu galán pa qué guidaʼnu xiana. Nga nga ni biʼniʼ hermana ni bigaanicabe donda ique. Ra gudiʼdiʼ tiempu bisiaandabe ni bizaaca que. Biénebe pa guni perdonarbe xcaadxi, laaca zuni perdonar Jehová laabe (Mat. 6:14). Gúnnabe cadi jneza ni biʼniʼ sti hermana que laabe, peru gudixhe íquebe guni perdonarbe laa ne cadi gápabe xiana. Ra bíʼnibe ni, bibánibe jma nayecheʼ ne gudixhe íquebe gúnibe ni ná Jehová.

12. ¿Xi rusiidiʼ 1 Juan 3:19, 20 laanu?

¹² (Biindaʼ 1 Juan 3:19, 20). Zándaca nuu biaje guni sentirnu náparunu donda pur ca cosa ni bíninu ante gunibiaʼnu ni dxandíʼ o pur ca cosa ni cadi jneza bíninu despué de maʼ guyuunísanu. Ne cadi malu guni sentir tuuxa zacá (Rom. 3:23). Peru cadi guiaandaʼ laanu, neca gúninu stipa gúninu ni jneza «guiranu rucheʼnu stale biaje» (Sant. 3:2; Rom. 7:21-23). Cadi galán nga ora guni sentir tuuxa náparuʼ donda, peru zanda gacaneni laa. ¿Xiñee yaʼ? Purtiʼ zanda gacaneni laanu guchaʼnu modo laanu ne quixhe íquenu cadi guiábanu luni sti biaje (Heb. 12:12, 13).

13. ¿Xiñee cadi naquiiñeʼ guiníʼ ique xhaatanu náparunu donda?

¹³ Zándaca guni sentirnu náparunu donda neca maʼ guca arrepentirnu ne maʼ bisihuinni Jehová maʼ biʼniʼ perdonar laanu. Pa guiníʼ ique xhaatanu náparunu donda, zanda guninani laanu (Sal. 31:10; 38:3, 4). ¿Xiñee yaʼ? Guidúʼyanu ni bizaaca ti hermana. Guníʼ íquebe náparube donda pur ca cosa ni cadi jneza bíʼnibe dxiqué. Sicaríʼ guniʼbe: «Guníʼ iqueʼ maʼ xi para guneʼ jma lu xhiiñaʼ Jehová purtiʼ zándaca maʼ qué gapaʼ nin ti esperanza». Zándaca nuu tu laa zacá runi sentir, peru nabé risaca cadi guiníʼ ique xhaatanu náparunu donda. Riuulaʼdxiʼ Binidxabaʼ guiníʼ ique binni zacá neca cadi zacá ruuyaʼ Jehová laanu (bichaaga ni né 2 Corintios 2:5-7, 11).

14. ¿Ximodo zanda chuʼnu seguru risácanu para Jehová?

¹⁴ Neca zacá, zándaca guinabadiidxanu: «¿Ximodo zanda gannaʼ maʼ biʼniʼ perdonar Jehová naa yaʼ?». Pa huayúniluʼ pregunta riʼ, cusihuínniluʼ racaláʼdxiluʼ guni  perdonar Jehová lii. ¿Xiñee yaʼ? Raca caadxi iza sicaríʼ bisiene revista La Atalaya ni: «Zándaca maʼ bicheʼnu chupa chonna biaje pur ti cosa cadi jneza bíninu ne huayaca nagana para laanu gusaananu xiixa cosa cadi jneza bíninu ante gunibiaʼnu Jehová». Laaca bizeeteʼ ni: «Cadi guireeluʼ gana ne cadi guiníʼ íqueluʼ maʼ qué zuni perdonar Jehová lii. Purtiʼ nga nga ni racalaʼdxiʼ Binidxabaʼ guiníʼ íqueluʼ. Pa nuuluʼ triste ne cadxíchineluʼ laca lii, nga rusihuinni cadi malu lii ne zanda guni perdonar Jehová lii. Guca humilde ne cadi gusaana de guni orarluʼ Jehová para guni perdonar lii, gacané lii gápaluʼ ti conciencia nayá ne para maʼ cadi gucheeluʼ sti biaje. Cásica riniʼné ti xcuidi bixhoze ora cayaca xiixa, zacaca nga naquiiñeʼ guinínenu Jehová ne zacanebe laanu». *

15, 16. ¿Ximodo huayuni sentir caadxi hermanu ora rudiicaʼ cuenta risácacaʼ para Jehová?

¹⁵ Stale hermanu riéchecaʼ ora rudiicaʼ cuenta risácacaʼ para Jehová. Guzéʼtenu ti ejemplu, raca caadxi iza guizáʼ guyuulaʼdxiʼ ti hermanu ti historia ni biʼndaʼ lu sección ni láʼ «Gucané Biblia laacabe para bichaacabe». Raqué bíʼndabe historia stiʼ ti hermana ni guníʼ ique cadi nadxii Jehová laa pur guiráʼ ca cosa ni bizaaca dxiqué. Ne zacá runi sentirbe neca maʼ gudiʼdiʼ iza de guyuunísabe. Peru bizulú guníʼ íquebe ni biʼniʼ Jehová ra bidii xiiñiʼ para gatiʼ pur laanu ne ngue gucané laabe guchaabe modo riníʼ íquebe. *

¹⁶ ¿Ximodo gucané experiencia ca hermanu riʼ? Sicaríʼ guniʼbe: «Dxi joven naa biiyaʼ pornografía, peru bisaanani. Peru cadi tan xadxí biaba lu viciu ca sti biaje. Biyubeʼ gacané ca ancianu naa ne chaahuidugá cudxieeluáʼ guendanagana riʼ. Huayabi ca hermanu riʼ naa nadxii ne riá Jehová naa. Neca zacá, nuu biaje riníʼ iqueʼ qué risacaʼ, ne nagana gannaxhii Jehová naa». Guniʼbe gucané ni guníʼ hermana que laabe, nabe: «Yanna huaxa maʼ bieneʼ ora guiníʼ iqueʼ qué zuni perdonar Jehová naa, casi ñaca cayuneʼ menu ni biʼniʼ Jehová ra bidii xiiñiʼ pur naa para gaca perdonar  ca pecadu stinneʼ. Guluaaʼ chaahueʼ artículo riʼ para gúʼndani ne guneʼ meditar ni zeeda luni ora guiníʼ iqueʼ qué zuni perdonar Jehová naa».

17. ¿Xi gucané apóstol Pablo para cadi guiníʼ ique xhaataʼ náparuʼ donda?

¹⁷ Experiencia stiʼ hermanu riʼ racaneni laanu guiníʼ íquenu ni bizaaca apóstol Pablo. Bíʼnibe stale cosa malu ante gácabe xpinni Cristu. Bietenaláʼdxibe ca cosa malu bíʼnibe dxiqué, peru qué niníʼ ique xhaatabe cani (1 Tim. 1:12-15). Bisisácabe ni biʼniʼ Jehová pur laabe ra bidii xiiñiʼ para gatiʼ pur laabe (Gál. 2:20). Zacá qué niníʼ íquerube nápabe donda ne gudixhe íquebe gúnibe ni ná Jehová biaʼ dxi guibánibe.

18. ¿Xi chonna cosa maʼ bizíʼdinu lu artículo riʼ?

¹⁸ ¿Xi maʼ bizíʼdinu lu artículo riʼ? Primé, ti regalu stiʼ Jehová ca recuerdu galán ni nápanu. Zándaca guizáʼ galán modo nabáninu peru zabáninu jma galán dxi guibáninu ndaaniʼ Guidxilayú cubi. Guiropa, zándaca guniná tuuxa laanu pur ni gabi laanu peru pa quixhe íquenu guni perdonarnu qué zareʼnu gana. Guionna, pa guiníʼ ique xhaatanu nápanu donda, qué zúninu ni ná Jehová né guendanayecheʼ. Nga runi, cásica biʼniʼ Pablo naquiiñeʼ chuʼnu seguru maʼ biʼniʼ perdonar Jehová laanu.

19. Ndaaniʼ guidxilayú cubi, ¿ximodo nánnanu qué zietenaláʼdxinu nin ti cosa malu gudídinu dxiqué?

¹⁹ Zabáninu para siempre ndaaniʼ Guidxilayú ni cabézanu ne maʼ qué zietenaláʼdxinu ca cosa malu ni gudídinu. Biblia ná tiempu ca «maʼ guirutiʼ tu zietenalaʼdxiʼ cani» (Is. 65:17). Nuu de laanu maʼ zinenu stale iza de cayúninu ni ná Jehová ne maʼ huaniisinu. Peru cadi guiaandaʼ laanu ndaaniʼ guidxilayú cubi ca zácanu joven sti biaje (Job 33:25). Nga runi cadi guicá ique xhaatanu modo bibáninu dxiqué sínuque guicá íquenu modo nabáninu yanna ne pabiáʼ galán zabáninu lu ca dxi ni zeeda ca.