Ante gabeʼ laatu xi bizaaca despué, chigüeniaʼ laatu ximodo bizuluáʼ bineʼ servir Jehová de tiempu completu.

Guleʼ lu iza 1942, lu isla ni nuu lu caribe stiʼ Curazao. Bixhozeʼ la? gule Surinam, peru yegúnibe dxiiñaʼ Curazao. Caadxi iza ante galeʼ guyuunísabe. Laabe nga tobi de ca primé binni ni guca Testigu ndaaniʼ guidxi que. a Gúpabe gaayuʼ xiiñibe ne guiráʼ semana runi estudiárnebe laadu Biblia, neca cadi guiráʼ biaje racaláʼdxidu guni estudiardu. Dxi napaʼ 14 iza, gudixhe ique bixhozeʼ chindézadu Surinam para gapa jñaabiidaʼ.

Ndaaniʼ guidxi Surinam, gucaʼ xhamiguaʼ caadxi joven ni runi ni ná Jehová né stale gana. Huaniisicabe caadxi para naa ne nácacabe precursor regular. Nayecheʼ rihuinni nuucabe ora maʼ caníʼcabe ximodo guyeni laacabe lu predicación. Despué de cada reunión, rinidu de tema ni zeeda lu Biblia laga cayuuyadxidu ca beleguí ni cá guibáʼ. Pur gucaʼ xhamiguaʼ laacabe, bidieeʼ cuenta ni racalaʼdxeʼ guneʼ lu xquendanabaneʼ nga guneʼ xhiiñaʼ Jehová. Ngue runi guyuaanisaʼ dxi napaʼ 16 iza ne gucaʼ precursor regular dxi napaʼ 18.

Dxi nacaʼ precursor, biziideʼ stale cosa ni gucané naa para guneʼ servir de tiempu completu. Tobi de ca cosa ni biziideʼ nga guizáʼ risaca gaca capacitar ca hermanu. Dxi gucaʼ precursor guizáʼ gucané ti misioneru ni láʼ Willem van Seijl naa. b Bisiidibe naa ximodo guneʼ tender ca responsabilidad ni napaʼ ndaaniʼ congregación. Qué lica niníʼ iqueʼ pa ñacané capacitación  ni bidii hermanu que naa. Sti iza que biʼniʼ nombrárcabe naa precursor especial. Ne despué gucaʼ encargar de caadxi grupu de hermanu ne hermana ni nabeza ndaaniʼ selva stiʼ Surinam. ¡Guizáʼ rusisacaʼ guiráʼ ni bisiidiʼ ca hermanu que naa! Dede dxiqué, runeʼ stipa guneʼ capacitar xcaadxi hermanu.

Guiropa cosa ni biziideʼ nga naquiiñeʼ guibaneniaʼ huaxiéʼ cosa ne quixhe chaahueʼ ca cosa ni chiguiquiiñeʼ. Ra ruzulú beeu, naa ne sti precursor especial rinidu pabiáʼ guendaró zaquiiñedu xcaadxi semana que. Ne tobi de laadu rié capital stiʼ guidxi que para siʼ ca cosa ni zaquíʼñedu. Bínidu stipa iquiiñedu jneza bueltu ni rudiicabe laadu cada beeu. Ne guluubiaʼdu pabiáʼ guendaró guidoʼdo cada dxi ti ugaanda ca cosa stidu para ti beeu. Purtiʼ pa gueeda guirani ndaaniʼ selva que la? nagana para guidxéladu guendaró raqué. Cumu maca de nahuiineʼ biziideʼ guibaneniaʼ huaxiéʼ cosa ne quixhe chaahueʼ ca cosa ni chiguiquiiñeʼ la? gucané ngue naa para ganda guneʼ servir Jehová.

Guionna cosa ni biziideʼ nga jma galán guiziidiʼ binni de Jehová lu diidxaʼ ni gulené. Biziideʼ guiniéʼ holandés, inglés ne papiamento, laaca gunieeʼ surinamés (laaca runibiáʼcabe ni casi sranan), idioma ni jma riníʼcabe Surinam. Peru ndaaniʼ selva que bidieeʼ cuenta jma rucaadiaga binni ora runi predicardu laa lu diidxaʼ ni gulené. Guca nagana para naa guinieeʼ ca idioma riʼ, casi saramacano purtiʼ nuu ra riníʼcabe reciu ne ra riníʼcabe chaahuiʼ. Peru bisaca stipa stinneʼ purtiʼ stale iza gunda gucaniaʼ stale binni guiziidiʼ de Jehová.

Cásica rizaaca guiráʼ binni ni caziidiʼ ti idioma, guyuu ora bichee ruaaʼ ne bituí luaʼ. Ti biaje gucalaʼdxeʼ ninabadiidxaʼ ti estudiante stinneʼ ximodo nuu lu idioma saramacano, purtiʼ gunnaʼ biuubaʼ ndaaniʼ. Peru pur modo gunieeʼ que, ni gunabadiidxaʼ laabe nga pa nacaxiiñibe. Bituí lube óraque. Neca bichee ruaaʼ stale biaje, peru bineʼ stipa guinieniaʼ ca binni que lu idioma ni gulenecaʼ.

Lu iza 1970, biʼniʼ nombrárcabe naa superintendente de circuito. Iza queca guca tocar naa guneʼ presentar discursu ra nuu caadxi grupu de hermanu ni nabeza ndaaniʼ selva, ne laaca bineʼ presentar videu de caadxi foto ni láʼ «Ximodo nga central mundial stiʼ ca testigu stiʼ Jehová». Para gunda yegannaʼ ca hermanu que la? bineʼ viajarniaʼ xcaadxi hermanu lu guiiguʼ lu ti lancha de yaga. Yenedu ti generador de biaaniʼ, ti tanque de gasolina, caadxi linterna ne guiráʼ ni zaquiiñedu para gutíʼdidu videu que. Ora rindadu lugar que, ruadu guirá ca cosa stidu ne maʼ ziuudu a pie dede chindadu ra chigaca presentar programa que. Ni rietenalaʼdxeʼ de ca viaje ni bínidu nga pabiáʼ rudii ca binni que xquixe peʼ pur información ni ruluidu laacaʼ. Guizáʼ riecheʼ purtiʼ randa racaniáʼ binni gunibiáʼ Jehová ne organización stiʼ. Intiica sacrificiu  guni tuuxa, qué zanda guchaaganu ni né ca ndaayaʼ ni ricaa tobi ora runi dxiiñaʼ para Jehová.

Nannaʼ jma fácil nga guni servir tuuxa lu circuito ora solteru laa, peru neca zaqué racalaʼdxeʼ gapaʼ ti compañera. Ngue runi bizuluáʼ gunabaʼ Jehová guidxelaʼ ti xheelaʼ. Ni guni servirné naa ndaaniʼ selva que ne chuʼ nayecheʼ lu asignación que neca nagana ni. Biaʼ ti iza despué, bizuluáʼ binebiaʼyaʼ Ethel, ti precursora especial ni nuu dispuestu guni xhiiñaʼ Jehová né stale gana. Dede nahuiiniʼ Ethel nabé guyuulaʼdxiʼ ejemplu stiʼ apóstol Pablo ne racalaʼdxiʼ guni xhiiñaʼ Jehová casi bíʼnibe. Bichaganadu lu beeu septiembre iza 1971 ne juntu biʼniʼ servirdu de circuito.

Cumu biniisi Ethel né huaxiéʼ cosa la? ngue runi nagueenda biaabe dxi cayuni servirdu lu circuito ndaaniʼ selva. Ora riuʼdu listu para chigánnadu ca congregación ni nuu ndaaniʼ selva, caadxi si cosa rinedu. Riguíʼbidu lari ne rázedu ndaaniʼ guiiguʼ. Biaʼdu guidoʼdo ni gudii ca hermanu que laadu. Gúcani guchachiʼ, piraña o intiica cosa guinaazecabe. Ora rindadu ra nuu ca hermanu ni qué gapa bladuʼ la? gudoʼdo ndaaniʼ bandaga biduaa ne ra gastiʼ gudxara la? gudoʼdo né bicuininadu. Naa ne Ethel guníʼ íquedu ra bínidu ca sacrificiu riʼ para gúnidu xhiiñaʼ Jehová, gucaneni laadu para gaca guendaxheelaʼ stidu jma naguidxi (Ecl. 4:12). ¡Gastiʼ qué zanda guchaagadu ca experiencia ni bibánidu!

Ni bizeeteʼ ra bizuluáʼ historia riʼ nga ni bizaacadu ti biaje dxi biguétadu de yegánnadu caadxi congregación ndaaniʼ selva. Ora yendá lancha que ra cuxooñeʼ nisa stiʼ guiiguʼ que reciu biaaziʼ ni, peru nagueendaca biree ni. Galán nga zinedu chalecu  salvavidas ne qué ñábadu ndaaniʼ nisa. Peru bidxá nisa ndaaniʼ lancha que ne gupa xidé bisáʼbidu guendaró ni zinedu ndaaniʼ caadxi traste purtiʼ biquíʼñedu ca ni para cueedu nisa ndaaniʼ lancha que.

Cumu maʼ gastiʼ ni guidoʼdo la? biyúbidu guináʼzedu benda laga ziuudu lu guiiguʼ que, peru cadi canáʼzedu gastiʼ. Ngue runi biʼniʼ orardu Jehová para guinábadu laa ni guidoʼdo dxi que. Ne ora biluxe biʼniʼ orardu, bindaa tobi de ca hermanu que anzuelu stiʼ, gunaazebe ti benda ne bigaandame para goxhi gaayuʼ binni dede bidxá ndaaniʼ.

Dxi maʼ zinedu gaayuʼ iza lu circuito gucuaadu ti ndaayaʼ ni cadi cabézadu, gucaxiiñiʼ Ethel. Guizáʼ biecheʼ pur noticia que, peru qué niníʼ iqueʼ pa zuchaa xquendanabánidu. Naa ne Ethel guizáʼ racaláʼdxidu guni servirdu de tiempu completu dede ra gándatiʼ. Lu iza 1976 gule primé xiiñidu ni láʼ Ethniël, ne chupa iza arondaʼ despué gule Giovanni.

Cumu huaxiéʼ hermanu nuu para chigacané xcaadxi congregación ndaaniʼ guidxi Surinam la? gunabaʼ sucursal naa gacaruaʼ viajante. Dxi nahuiiniʼ ca xiiñidu, yegannaʼ ca circuito ni napa huaxiéʼ congregación. Ngue gucané naa guneʼ servir de viajante chupa semana lu ti beeu, ne xhupa semana que la? runeʼ servir de precursor ndaaniʼ congregación stidu. Riné Ethel ne ca hombrehuiiniʼ stidu naa ora rigannaʼ ca congregación ni nuu gaxha de ra nabézadu, peru ora nuu asamblea o rigannaʼ ca congregación ni nuu ndaaniʼ selva la? riaaʼ stubeʼ.

Para gunda bineʼ tender ca dxiiñaʼ ni gupaʼ ndaaniʼ congregación ne ndaaniʼ familia stinneʼ la? gudixheʼ chaahueʼ tiempu stinneʼ. Bineʼ stipa gápadu estudiu de familia guiráʼ semana. Ne ora rigannaʼ ca congregación ni nuu ndaaniʼ selva, Ethel runi estudiu de familia né ca hombrehuiiniʼ stidu. Bínidu stipa gúnidu cosa casi familia. Laaca guleedu tiempu para quitenedu ca xiiñidu o chizánedu laacaʼ xiixa lugar gaxha de ra lídxidu. Stale biaje maʼ huaxhinni raseʼ purtiʼ cayacaʼ preparar para ca dxiiñaʼ ni napaʼ ndaaniʼ congregación. Ne Ethel maʼ bisihuinni naca casi gunaa ni riete lu Proverbios 31:15. Riásabe siadóʼ para guidúʼndadu textu stiʼ dxi juntu ne guidéʼnedu ca  xiiñidu ante checaʼ scuela. Guizáʼ riecheʼ purtiʼ naca xheelaʼ ti gunaa ni runi sacrificiu, huayacanebe naa guneʼ cumplir ca dxiiñaʼ ni maʼ bidii Jehová naa.

Naa ne Ethel bínidu stipa gusíʼdidu ca xiiñidu gannaxhiicaʼ Jehová ne gúnicaʼ ni nabe. Racaláʼdxidu guni servírcabe de tiempu completu cadi pur cucaʼdu laacabe gúnicabe ni, sínuque de laapecabe guiale ni. Siempre bizéʼtedu pabiaʼ nayecheʼ ribani binni ora runi servir Jehová de tiempu completu. Neca bizéʼtedu ca guendanagana ni bidxaagaludu, laaca guninedu laacabe ximodo huayacané Jehová laadu ne ximodo huaguu ndaayaʼ familia stidu. Ne biyúbidu guieeguʼ ca xiiñidu ca hermanu ni runi ni ná Jehová primé lu xquendanabani.

Qué nusiaadxaʼ Jehová laadu gastiʼ. Laaca bineʼ dxiiñaʼ para gapa familia stinneʼ ni iquiiñeʼ. Ni biziideʼ dxi guyuaaʼ ndaaniʼ selva, dxi gucaʼ solteru ne bineʼ servir de precursor especial gucané ni naa para quixheʼ chaahueʼ ca cosa stinneʼ ne iquiiñeʼ bueltu stinneʼ jneza. Peru neca bínidu dxiiñaʼ guyuu ora biaadxaʼ laadu ca cosa ni caquiiñedu. Gucané Jehová laadu ora gudídidu lu ca guendanagana riʼ. Lu iza 1986 hasta 1992, guca ti guerra ndaaniʼ guidxi Surinam. Guyuu ora guca nagana para laadu guidxéladu ca cosa ni iquiiñedu, peru gupa Jehová laadu (Mat. 6:32).

Huayacané Jehová laadu guibánidu nayecheʼ ne qué huayuu dxi guixélebe de laadu. Riéchedu purtiʼ gunda bisiniisidu ca xiiñidu ne bisíʼdidu laacaʼ gannaxhiicaʼ Jehová de guidubi ladxidoʼcaʼ. Laaca riéchedu purtiʼ gudixhe íquecabe guni servírcabe Jehová de tiempu completu. Ethniël ne Giovanni maʼ guyecaʼ scuela ni rudii xquidxi Jehová. Ne yanna cayuni servircaʼ ra sucursal ni nuu Surinam, laacaʼ ne xheelacaʼ.

Naa ne Ethel maʼ huaniisidu, peru neca zacá cayúnirudu xhiiñaʼ Jehová casi precursor especial. Guizáʼ riuu xhiiñadu, dede qué gapaʼ tiempu para guiziideʼ xhuubaʼ. Ora riníʼ iqueʼ ca decisión ni maʼ gucuaaʼ lu xquendanabaneʼ riecheʼ purtiʼ biquiiñeʼ xquendanabaneʼ para guneʼ servir Jehová de tiempu completu.