1, 2. a) ¿Xi zazíʼdinu lu artículo riʼ? b) ¿Ximodo nánnanu racalaʼdxiʼ Jehová gacané laanu?

 ZANDA gacané Jehová laanu guni huantarnu ca guendanagana ni nápanu ne gúninu ni ná né guendanayecheʼ. Lu artículo riʼ zazíʼdinu ximodo rúnibe ni ne xi caquiiñeʼ gúninu para gacanebe laanu. Peru primeru guicábinu pregunta riʼ: «¿Dxandíʼ nga racalaʼdxiʼ Jehová gacané laanu la?».

² Para guicábinu pregunta ca, guidúʼyanu caadxi diidxaʼ ni biquiiñeʼ apóstol Pablo lu carta ni bicaa ra nuu ca hebreu. Sicaríʼ bicaabe: «Jehová nga racané naa. Qué zadxibeʼ diaʼ. ¿Xi zanda guni binni naa yaʼ?» (Heb. 13:6). Caadxi diccionariu de Biblia ruzeeteʼ, ca diidxaʼ «racané naa» ni riete lu versículo riʼ caníʼ ni de ti binni ni ziguxooñeʼ para gacané tuuxa ni canabaʼ gacanécabe laa. Guxuíʼlunu ziguxooñeʼ Jehová para gacané tuuxa ni cadxaagalú xiixa guendanagana. Ndiʼ rusiidiʼ laanu cadi nuusi Jehová listu para gacané laanu, sínuque laaca racaláʼdxibe gúnibe ni de guidubi ladxidoʼbe. Pa nuu Jehová gaxha de laanu zanda guni huantarnu ca guendanagana stinu sin gusaana de chuʼnu nayecheʼ.

3. ¿Xi chonna cosa runi Jehová para gacané laanu guni huantarnu sin gusaana de chuʼnu nayecheʼ?

³ ¿Ximodo racané Jehová laanu guni huantarnu sin gusaana de chuʼnu nayecheʼ yaʼ? Lu libru stiʼ Isaías ridxélanu respuesta ca. Stale de ca profecía ni bicaa Isaías racanécani ca xpinni Dios ni nabani tiempu riʼ. Ne stale biaje biquiiñeʼ Isaías diidxaʼ ni cadi nagana ora caniʼbe de Jehová. Lu capítulo 30 biquiiñebe caadxi ejemplu sicarú para gusiénebe ximodo racané Jehová xquidxi. Lu ni riete chonna cosa.  Primé, rucaadiaga chaahuiʼ Jehová ne ricabi ca oración stinu. Guiropa, rábibe laanu xi caquiiñeʼ gúninu. Ne guionna, riguu ndaayabe laanu tiempu riʼ ne zúnibe ni despué. Guidúʼyanu cada tobi de laaca ni.

4. a) ¿Xi guníʼ Jehová de ca judíu ni bibani tiempu stiʼ Isaías, ne xi bidiibe lugar guizaacacaʼ? b) ¿Xi gudxi Jehová ca judíu ni bizuubaʼ diidxaʼ? (Isaías 30:18, 19).

⁴ Ra ruzulú capítulo 30 stiʼ Isaías, bizeeteʼ Jehová naca ca judíu tercu ne laaca guniʼbe riguurucaʼ jma pecadu lu ti pecadu. Guníʼ Jehová nácacabe ti guidxi ni qué ruzuubaʼ diidxaʼ ne qué rinacaʼ chinándacaʼ ley stiʼ Jehová (Is. 30:1, 9). Cumu qué nuzuubacabe diidxaʼ la? bidii Jehová lugar guizaacacabe ti cosa nabé triste (Is. 30:5, 17; Jer. 25:8-11). Ne zaqué bizaaca ni purtiʼ yené ca babilonio laacabe de esclavu. Peru laaca guyuu caadxi judíu ni bizuubaʼ diidxaʼ ne bicaa profeta Isaías ziuu ti dxi zudxiguetaʼ Jehová laacabe Jerusalén (biindaʼ Isaías 30:18, 19). Ne guca cumplir ca diidxaʼ ca purtiʼ gulee Jehová laacabe de Babilonia, peru gupa xidé gulézacabe ti tiempu. Ca diidxaʼ «cabeza Jehová né paciencia para gacané laatu» rusihuínnini napa xidé tidiʼ ti tiempu ante guiree ca judíu que de esclavu. Gupa xidé gudiʼdiʼ 70 iza para bidii Jehová lugar guibiguetaʼ caadxi judíu Jerusalén (Is. 10:21; Jer. 29:10). Dxi naca ca judíu que esclavu la? biinacaʼ purtiʼ nuucaʼ triste, peru dxi bibiguétacaʼ xquídxicaʼ biinacaʼ purtiʼ guizáʼ cayéchecaʼ.

5. ¿Xi cayabi Isaías 30:19 laanu?

⁵ Tiempu riʼ, laaca guizáʼ riguu ca diidxaʼ riʼ gana laanu: «Ora gucaaluʼ ridxi gacanécabe lii, laabe zacanebe lii» (Is. 30:19). Cayabi Isaías laanu zucaadiaga Jehová ca oración stinu ne nagueenda zacábibe laanu. Laaca guníʼ profeta que: «Zacábibe lii casi peʼ gunadiágabe lii». Rusietenalaʼdxiʼ ca diidxaʼ riʼ laanu cadi nuu si Bixhózenu listu gacané ca ni caquiiñeʼ ni, sínuque racaláʼdxibe gúnibe ni de guidubi ladxidoʼbe. Ra gánnanu ndiʼ, ¿cadi dxandíʼ racané ni laanu guni huantarnu sin gusaana de chuʼnu nayecheʼ la?

6. ¿Ximodo rusihuinni ca diidxaʼ ni bicaa Isaías rucaadiaga Jehová ca oración ni runi cada tobi de ca xpinni?

⁶ Lu versículo riʼ laaca rabi Jehová laanu rucaadiaga chaahuiʼ ca oración ni runi cada tobi de laanu. ¿Ximodo nánnanu ni yaʼ? Ra ruzulú capítulo 30 stiʼ Isaías, biquiiñeʼ Jehová diidxaʼ «laatu», purtiʼ caniʼné xquidxi. Peru lu versículo 19 Jehová biquiiñeʼ diidxaʼ «lii», purtiʼ caníʼnebe cada tobi de ca xpínnibe. Isaías guníʼ «dxandíʼ peʼ zusaana de gúʼnaluʼ», «zacanebe lii», «zacábibe lii». Jehová nga Bixhózenu ni nadxii laanu, nga runi ora ruuyabe maʼ cadi nayecheʼ cayuni tobi de ca xiiñibe ni nabe, qué rábibe laa: «Guca nadxibalú casi bíʼchiluʼ». Ni rúnibe nga rizaaláʼdxibe cada tobi de laanu ne laapebe ricábibe oración stiʼ cada tobi (Sal. 116:1; Is. 57:15).

7. ¿Ximodo bisiidiʼ Isaías ne Jesús laanu pabiáʼ risaca guni insistirnu ora guni orarnu?

⁷ Ora runi orarnu Dios ne rábinu laa xi naguu xizaa laanu, zándaca primé ni rúnibe nga rudiibe stipa laanu para guni huantarnu. Ne pa cadi nagueenda caree guendanagana ni nápanu ca, zándaca naquiiñeʼ guinábanu laabe stale biaje gudiibe stipa laanu para guni huantarnu. Nga peʼ nga ni canábabe laanu gúninu. Ne profeta Isaías bicaa: «Cadi gudiitu lugar guiziiláʼdxibe», ni nabe raríʼ nga cadi gudiʼnu lugar guiziilaʼdxiʼ Jehová (Is. 62:7). ¿Ximodo zanda gúninu ni yaʼ? Ra cadi gusaana de  guni orarnu Jehová, zacá nga casi ñaca qué zudiʼnu lugar guiziiláʼdxibe. Rusietenalaʼdxiʼ ndiʼ laanu modo bisiidiʼ Jesús naquiiñeʼ gaca ca oración stinu, ni riete lu Lucas 11:8-10, 13. Biquiiñebe caadxi ejemplu para gacanebe laanu guni insistirnu ora guni orarnu ne cadi gusaana de guinábanu espíritu santu. Laaca zanda guinábanu Jehová gacané laanu guicaanu decisión jneza.

8. ¿Ximodo guca cumplir ca diidxaʼ ni zeeda lu Isaías 30:20, 21?

⁸ (Biindaʼ Isaías 30:20, 21). Ti iza arondaʼ guluu ejércitu stiʼ Babilonia leʼ Jerusalén. Ne tiempu que, maʼ qué ñuu diʼ ca israelita que nayecheʼ, guiráʼ dxi guyuucabe xizaa. Peru lu versículo 20 ne 21, biʼniʼ prometer Jehová laacabe zulá laacabe pa gaca arrepentírcabe ne guchaacabe. Guníʼ Isaías Jehová nga «Maestru ni jma risaca» stiʼ xquidxi ne biʼniʼ prometer zusiidiʼ Jehová laacabe guni adorárcabe laa modo racalaʼdxiʼ. Guca cumplir ca diidxaʼ riʼ dxi biree ca judíu de esclavu ndaaniʼ guidxi Babilonia. Bisihuinni Jehová laa nga Maestru ni jma risaca stícabe. Pur gucané Jehová ca judíu gunda biguetaʼ biʼniʼ adorárcabe laa modo racalaʼdxiʼ. Tiempu riʼ laaca Jehová nga Maestru ni jma risaca stinu ne nga rusiecheʼ ni laanu.

9. ¿Gunáʼ nga primé modo racané Jehová laanu tiempu riʼ?

⁹ Ti privilegiu naroʼbaʼ nápanu purtiʼ Jehová peʼ nga cusiidiʼ laanu. Lu ca versículo riʼ cuchaaga Isaías laanu casi estudiante ni cusiidiʼ Jehová de chupa modo. Primé la? guníʼ Isaías: «Zuuyaʼ dxiichiluʼ Maestru ni jma risaca stiluʼ». Lu ejemplu riʼ la? zuhuaa maestru ca nezalú ca estudiante stiʼ. ¿Ximodo rusiidiʼ Jehová laanu tiempu riʼ yaʼ? Riquiiñebe organización stibe para gúnibe ni. Rudiʼnu xquixe peʼ Jehová purtiʼ riquiiñeʼ organización stiʼ para gusiidiʼ laanu lu ca reunión, ca asamblea, ca publicación, ca programa stiʼ JW Broadcasting^® ne xcaadxi modo. Guiráʼ ndiʼ racané laanu guni huantarnu sin gusaana de chuʼnu nayecheʼ ora cadídinu lu guendanagana.

10. ¿Ximodo runadiáganu stidxi Dios atrá de laanu?

¹⁰ Biluíʼ Isaías laanu guiropa modo rusiidiʼ Jehová. Ndiʼ nga ni guniʼbe: «Zunadiágaluʼ ca diidxaʼ riʼ neza décheluʼ». Raríʼ guníʼ profeta riʼ naca Jehová ti maestru ni zizá atrá de ca estudiante stiʼ, cayuuyaʼ ra zizácabe ne cayabi laacabe pa ladu chécabe.  Rucaʼdiáganu stidxi Dios tiempu riʼ ora ridúʼndanu Biblia. Lu ni zeeda stiidxaʼ Dios ni gucuá maʼ raca stale iza. Nga runi ora ridúʼndanu ni casi ñaca ñunadiáganu stidxi Jehová atrá de laanu, purtiʼ maʼ raca stale iza de guniʼbe xi guicá lu Biblia (Is. 51:4).

11. ¿Xi caquiiñeʼ gúninu para guni huantarnu né guendanayecheʼ, ne xiñee?

¹¹ Rudii Jehová laanu organización stiʼ ne Stiidxaʼ para guluíʼ laanu ximodo guibáninu. Yanna, ¿xi caquiiñeʼ gúninu para guni aprovecharnu ca ni yaʼ? Bizeeteʼ Isaías chupa cosa. Primé guniʼbe, «Ndiʼ nga neza ca», ne guiropa, «Guzá luni» (Is. 30:21). Nga runi cadi caquiiñeʼ si gunibiaʼnu «neza ca», sínuque naquiiñeʼ sanu luni. Pur Stiidxaʼ Dios ne ni rusiene organización stibe laanu, maʼ nánnanu xi ribézabe de cada tobi de laanu ne ximodo gúninu ni rusiidibe laanu lu xquendanabáninu. Naquiiñeʼ gúninu guiropaʼ cosa riʼ para guni huantarnu né guendanayecheʼ lu xhiiñaʼ Jehová. Zacá zanda chuʼnu seguru zaguu ndaayabe laanu.

12. Casi ná Isaías 30:23-26, ¿ximodo guluu Jehová ndaayaʼ xquidxi?

¹² (Biindaʼ Isaías 30:23-26). ¿Ximodo guca cumplir profecía riʼ dxiqué yaʼ? Ca judíu ni biree de Babilonia ne bibiguétacaʼ Israel gucuaacaʼ stale ndaayaʼ. Bidii Jehová laacabe stale cosa para guibaninécabe ne ni gucané laacabe para cadi gusaanacabe de gúnicabe ni ná. Bidii Jehová laacabe stale guendaró, peru laaca bidii laacabe sti cosa jma risaca, laa ni nga guiráʼ ni caquiiñecabe para chúʼcabe jma gaxha de laa ne guni adorárcabe laa modo racalaʼdxiʼ. Qué huayuu dxi guicaa xquidxi Dios de tiempu que guiráʼ ca ndaayaʼ galán ni zeeda de laabe. Lu versículo 26 riete bidii Jehová laacabe jma biaaniʼ, ndiʼ riníʼ gucané laacabe jma guiénecabe stiidxaʼ (Is. 60:2). Pur ca cosa galán riʼ guyuu xquidxi Dios nayecheʼ ne bidii ni stipa laacaʼ para cadi gusaana de gúnicaʼ ni nabe. Dxandíʼ peʼ guyuu ladxidóʼcabe nayecheʼ (Is. 65:14).

13. Tiempu riʼ, ¿ximodo huayaca cumplir profecía ni caníʼ zaca adorar Dios modo racalaʼdxiʼ?

¹³ Tiempu riʼ, ¿ñee laaca cayaca cumplir profecía ra caníʼ zaca adorar Dios modo racalaʼdxiʼ la? Laaca pue. Dede lu iza 1919, millón de binni caree de Babilonia guidxi roʼ, laani nga guiráʼ religión ni cadi dxandíʼ ni nuu lu Guidxilayú. Maʼ nuu ca binni riʼ ndaaniʼ ti paraísu espiritual, ti lugar  jma galán que Tierra Prometida ni gucuaa ca israelita que (Is. 51:3; 66:8). ¿Xii nga paraísu espiritual ca yaʼ?

14. ¿Xii nga paraísu espiritual, ne tuu nga ca ni maʼ nuu ndaaniʼ ni? (Biiyaʼ nota).

¹⁴ Dede iza 1919, maʼ nuu ca ungidu ndaaniʼ paraísu espiritual. b Ra maʼ gudiʼdiʼ tiempu, ca xpinni Cristu ni cabeza guibani ndaaniʼ Guidxilayú, «xcaadxi dendxuʼ», laaca cayuucaʼ ndaaniʼ paraísu espiritual ne huacaacaʼ stale ndaayaʼ ni zeeda de Jehová (Juan 10:16; Is. 25:6; 65:13).

15. ¿Paraa nuu paraísu espiritual tiempu riʼ?

¹⁵ ¿Paraa nuu paraísu espiritual ca tiempu riʼ? Cumu lu guidubi Guidxilayú nuu ca xpinni Jehová la? rugaanda paraísu riʼ lu guidubi Guidxilayú. Nga runi ra tiica si nabézanu zanda chuʼnu ndaaniʼ paraísu riʼ pa gúninu ni ná Jehová modo racalaʼdxiʼ ne de guidubi ladxidoʼno.

16. ¿Xi caquiiñeʼ gúninu para guidúʼyanu pabiáʼ sicarú paraísu espiritual ra nuunu?

¹⁶ Tobi de ca cosa ni naquiiñeʼ gúninu para cadi guireʼnu de ndaaniʼ paraísu espiritual ca nga gusisácanu congregación stiʼ ca xpinni Cristu ni lu guidubi Guidxilayú. Ne rúninu ni ora ridúʼyanu ca cualidad galán ni napa ca hermanu ne cadi ra cucheecaʼ (Juan 17:20, 21). ¿Xiñee risaca gúninu ndiʼ yaʼ? Guiníʼ íquenu ejemplu riʼ. Lu ti dani gadxé gadxé tipu yaga nga nuu. Zaqueca ndaaniʼ paraísu espiritual stinu nuu gadxé gadxé hermanu ni zeeda gaca casi ca yaga ni riete lu ejemplu riʼ (Is. 44:4; 61:3). Guidúʼyanu pabiáʼ sicarú «dani» ca ne cadi guidúʼyanu ca defectu stiʼ ca «yaga» ca. Ndiʼ rusiidiʼ laanu cadi gudiʼnu lugar ca defectu stinu o stiʼ ca hermanu stinu gucueezaʼ ca ni laanu de guidúʼyadxinu pabiáʼ sicarú congregación stiʼ ca xpinni Cristu ni nuu lu guidubi naca Guidxilayú.

17. ¿Xi zanda gúninu para chuʼnu tobi si né ca hermanu de congregación?

¹⁷ ¿Xi zanda gúninu para chuʼnu tobi si  né ca hermanu de congregación stinu? Gúninu stipa chuʼ paz ládenu (Mat. 5:9; Rom. 12:18). Cada biaje gúninu stipa gaca llevarnu ca hermanu de congregación stinu, racanenu gaca paraísu espiritual ca jma sicarú. Cadi guiaandaʼ laanu Jehová nga bichiña ca hermanu stinu ndaaniʼ paraísu espiritual riʼ (Juan 6:44). Guiníʼ íquenu pabiáʼ riéchebe ora ruuyabe rúninu stipa chuʼnu en paz ne tobi si né ca xpínnibe, purtiʼ guizáʼ risácacaʼ para laabe (Is. 26:3; Ageo 2:7).

18. ¿Xi naquiiñeʼ guiníʼ íquenu gatigá, ne xiñee?

¹⁸ Jehová rudii stale cosa galán ca xpinni, ¿xi zanda gúninu para guni aprovecharnu ca ni yaʼ? Guiníʼ ique chaahuinu ni rizíʼdinu lu Stiidxaʼ Dios ne lu ca publicación stinu. Pa guni estudiarnu ne guiníʼ íquenu, zacané ni laanu gusihuínninu cualidad ni zucaa laanu gannaxhiinu ca hermanu stinu cásica nadxiinu familia stinu (Rom. 12:10). Ra guiníʼ íquenu ca ndaayaʼ ni ricaanu yanna, jma zaca xhamígunu Jehová. Ne ra guiníʼ íquenu ni maʼ cadi candaa zudii Jehová laanu, jma ziuʼnu gana gúninu ni ná Jehová de guidubi ladxidoʼno biaʼ dxi guibáninu. Guiráʼ cosa riʼ zacané ca ni laanu gúninu ni ná Jehová né guendanayecheʼ.

19. a) Casi ná Isaías 30:18, ¿xi nánnanu zuni Jehová? b) ¿Xi zacané laanu guni huantarnu né guendanayecheʼ?

¹⁹ Ziasa Jehová para gacané laanu ora gunitilube guidxilayú malu riʼ (Is. 30:18). Cumu nácabe ti Dios ni runi ni jneza la? maʼ gudíxhebe dxi gunitilube guidxilayú stiʼ Binidxabaʼ riʼ (Is. 25:9). Cásica Jehová ne laanu, cabézanu né paciencia guedandá dxi guiree ca guendanagana stinu. Laga cabézanu guedandá dxi ca, maʼ gudixhe íquenu gusisácanu privilegiu ni nápanu de guni orarnu laabe, guni estudiarnu Stiidxabe, gúninu ni cazíʼdinu ne guiníʼ íquenu ca ndaayaʼ ni chiguicaanu. Pa gúninu ca cosa ni bizéʼtenu riʼ zacané Jehová laanu guni huantarnu né guendanayecheʼ ra gúninu ni ná.