1. Laanu, ca xpinni Cristu, ¿xi qué ridxagayaanu, ne xi nánnanu?

 TIEMPU riʼ qué ridxagayaanu nuu binni ni rucaalú laanu purtiʼ runi predicarnu, ne zándaca huidxe si jma zucaalucaʼ laanu (Dan. 11:44; 2 Tim. 3:12; Apoc. 16:21). Peru nanna dxíchinu zacané Jehová laanu. ¿Xiñee nánnanu ni yaʼ? Purtiʼ siempre racanebe ca xpínnibe gúnicaʼ dxiiñaʼ ni maʼ bidiibe laacaʼ neca gácani nagana para laacaʼ. Para guidúʼyanu ximodo huayúnibe ni, guzéʼtenu caadxi cosa ni bizaaca lu xquendanabani profeta Ezequiel dxi biʼniʼ predicar ca judíu ni nuu de esclavu ndaaniʼ guidxi Babilonia.

2. a) ¿Ximodo guníʼ Jehová naca ca judíu ni chiguni predicar Ezequiel? (Ezequiel 2:3-6). b) ¿Xi zadúʼyanu lu artículo riʼ?

² ¿Ximodo naca ca binni ni chiguni predicar Ezequiel yaʼ? Guníʼ Jehová naca ca judíu que binni ni qué ruzuubaʼ diidxaʼ, ni rucaalú ne ni naca tercu dede ndaaniʼ ladxidóʼ. Malu laacabe casi guichi ne runinácabe casi runiná meuxubi. Ngue runi stale biaje gudxi Jehová Ezequiel: «Cadi guidxíbiluʼ» (biindaʼ Ezequiel 2:3-6). Gunda biʼniʼ Ezequiel dxiiñaʼ ni gucuaa que purtiʼ Jehová ngue biseendaʼ laa, bidii espíritu santu stipa laa ne biquidxi stiidxaʼ Dios fe stiʼ. ¿Ximodo gucané guionnaʼ cosa riʼ Ezequiel ne ximodo zanda gacané ni laanu tiempu riʼ yaʼ?

3. ¿Gunáʼ nga ca diidxaʼ ni zándaca guluu gana Ezequiel, ne ximodo bisihuinni Jehová zacané laabe?

³ Gudxi Jehová Ezequiel: «Cuseendaʼ lii» (Ezeq. 2:3, 4). Zándaca guizáʼ guluu ca diidxaʼ riʼ gana profeta que. Purtiʼ bietenaláʼdxibe zacá gá nga ca diidxaʼ ni gudxi Jehová Moisés ne Isaías dxi gulí laacaʼ para gácacaʼ profeta stibe (Éx. 3:10; Is. 6:8). Laaca gunna Ezequiel gucané Jehová ca profeta riʼ para gúnicaʼ dxiiñaʼ nagana ni bidiibe laacaʼ. Ngue runi, ora gudxi Dios laabe chupa biaje «Cuseendaʼ lii», nánnabe zacané laabe gúnibe dxiiñaʼ que. Ne lu libru stiʼ Ezequiel stale biaje riete ca diidxaʼ riʼ: «Óraque gucuaaʼ ca stiidxaʼ Jehová» (Ezeq. 14:2). Ne laaca gatigá riete ca diidxaʼ riʼ: «Sti biaje ca gucuaaʼ ca stiidxaʼ Jehová» (Ezeq. 6:1). Ngue runi qué ñaandaʼ profeta riʼ Jehová ngue biseendaʼ laa. Ne cumu sacerdote bixhózebe la? zándaca bisiidiʼ laabe rabi Jehová ca profeta stiʼ zacané laacaʼ ora cudii laacabe ti dxiiñaʼ. Ne maca gudxi Jehová Isaac, Jacob ne Jeremías qué zaxeleʼ de laacaʼ (Gén. 26:24; 28:15; Jer. 1:8).

4. ¿Gunáʼ nga ca diidxaʼ ni guluu gana Ezequiel?

⁴ ¿Ñee zucaadiaga stale de ca israelita que mensaje stiʼ Ezequiel la? Sicaríʼ gudxi Jehová laabe: «Qué zaná ca xiiñiʼ Israel gucaadiaga lii purtiʼ qué nacaʼ gucaadiágacaʼ naa» (Ezeq. 3:7). Ra gudxiidéchecabe profeta riʼ, cudxiidéchecabe Jehová. Guizáʼ gudixhedxí ca diidxaʼ riʼ ladxidóʼ Ezequiel purtiʼ gúnnabe pa qué naʼ binni gucaadiaga laabe la? qué riníʼ diʼ ni cadi jneza cayúnibe dxiiñaʼ de profeta. Ne laaca gudxi Jehová laabe, ora gaca cumplir mensaje ni zinebe que,  zanna ca judíu guyuu ti profeta ládecaʼ (Ezeq. 2:5; 33:33). Nánnanu guizáʼ guluu ca diidxaʼ que gana Ezequiel para gunda biʼniʼ predicar ca binni que.

5. ¿Xiñee riguu ca diidxaʼ ni zeeda lu Isaías 44:8 gana laanu?

⁵ Laanu laaca riuʼnu gana ora guiníʼ íquenu Jehová nga cuseendaʼ laanu. Maʼ bidiibe laanu privilegiu gácanu ca testigu stibe (Is. 43:10). Cásica gudxi Jehová Ezequiel: «Cadi guidxíbiluʼ», laaca cayábibe laanu: «Cadi guidxibi xhaatatu». ¿Xiñee cadi naquiiñeʼ guidxíbinu ca binni ni rucaalú laanu yaʼ? Purtiʼ cásica Ezequiel, laaca Jehová nga cuseendaʼ laanu ne zacanebe laanu (biindaʼ Isaías 44:8).

6. a) ¿Ximodo maʼ guníʼ Jehová zacané laanu? b) ¿Xi riguixhedxí ladxidoʼno ne riguu gana laanu?

⁶ Maʼ guníʼ Jehová zacané laanu. Purtiʼ ante guiniʼbe: «Laatu nga ca testigu stinneʼ», bizeetebe: «Ora tiidiluʼ lu nisa, naa ziuaaʼ gaxha de lii; ne ora tiidiluʼ ndaaniʼ guiiguʼ qué zalaahualuʼ. Ora saluʼ lu gui qué zadxuíʼ ñeeluʼ, ne nin qué zuzaaquiʼ bele lii» (Is. 43:2). Nuu biaje ora runi predicarnu, riuu cosa ni rucueeza laanu ni zeeda gaca casi guiiguʼ ne ridxaagalunu guendanagana ni zeeda gaca casi bele. Peru cumu racané Jehová laanu la? qué rusaana de guni predicarnu (Is. 41:13). Cásica bizaaca Ezequiel: laanu laaca stale binni qué riná gucaadiaga laanu. Cadi guiaandaʼ laanu, pa qué naʼ binni gucaadiaga laanu la? qué riníʼ diʼ ni cadi jneza cayuni predicarnu. Ratadxí ladxidoʼno ne riuʼnu gana gánnanu riecheʼ Jehová ora qué rusaana de guni predicarnu. Apóstol Pablo guníʼ: «Cada binni zacaa premiu stiʼ pur modo biʼniʼ dxiiñaʼ» (1 Cor. 3:8; 4:1, 2). Ti hermana ni maʼ ziné stale iza de naca precursora guníʼ: «Riecheʼ stale purtiʼ nannaʼ rudii Jehová premiu laanu pur stipa ni rúninu pur guni predicarnu».

7. ¿Ximodo biʼniʼ sentir Ezequiel cada biaje bietenalaʼdxiʼ visión ni biʼyaʼ? (Biiyaʼ dibuju ni zeeda lu portada).

⁷ Biiyaʼ Ezequiel pabiáʼ nadipaʼ espíritu santu stiʼ Dios. Lu ti visión biiyabe ximodo cayacané espíritu riʼ ca ángel nadipaʼ ne ximodo cuniibi ni ca rueda naroʼbaʼ stiʼ carru stiʼ Jehová ni nuu guibáʼ (Ezeq. 1:20, 21). Laapebe guniʼbe guizáʼ bidxagayaabe dede bizuxíbibe ne gundeteʼ íquebe (Ezeq. 1:28). Zándaca cada biaje bietenalaʼdxiʼ Ezequiel visión riʼ gunna dxichi zanda guni predicar purtiʼ cayacané espíritu stiʼ Dios laa.

8, 9. a) ¿Xi gunabaʼ Jehová Ezequiel guni? b) ¿Xiruʼ biʼniʼ Jehová para gucané Ezequiel?

⁸ Ndiʼ nga ni gunabaʼ Jehová Ezequiel guni: «Xiiñiʼ hombre, bizuhuaa para guinieniáʼ lii». Gucané espíritu stiʼ Dios laabe ne orden ni gucuaabe que para gápabe stipa ne guiásabe. Laabe bicaabe: «Biuu espíritu que luguiaʼyaʼ ne bicaa ni naa guzuhuaaʼ» (Ezeq. 2:1, 2). Despué biaʼ tiempu biʼniʼ predicarbe, siempre gucané espíritu santu laabe (Ezeq. 3:22; 8:1; 33:22; 37:1; 40:1). Laaca espíritu ca nga bidii stipa Ezequiel para gunda biʼniʼ predicar ca judíu ni naguidxi ique ne ni naca tercu dede ndaaniʼ ladxidóʼ (Ezeq. 3:7). Sicaríʼ gudxi Jehová laabe: «Maʼ bineʼ luluʼ naguidxi cásica lúcabe, ne maʼ bineʼ lucualuʼ naguidxi cásica lucuácabe. Maʼ bineʼ lucualuʼ casi ti diamante, jma naguidxi que ti guié. Cadi guidxíbiluʼ laacabe, ne cadi guidxibi xhaataluʼ lúcabe»  (Ezeq. 3:8, 9). Casi xa ñaca ñabi Jehová Ezequiel: «Cadi guireeluʼ gana pur qué ruzuubacabe diidxaʼ. Naa zacaniáʼ lii gácaluʼ ti hombre nadxibalú».

⁹ Ne óraque yené espíritu stiʼ Dios Ezequiel lugar ra caquiiñeʼ chiguni predicar. Laabe bicaabe gucané Jehová laabe né stipa stiʼ. Ti semana yené profeta que para guníʼ ique ne biene chaahuiʼ mensaje ni chiguni predicar (Ezeq. 3:14, 15). Despué, gudxi Jehová laabe chebe lu ti layú ra napampa, ne raqué guyuu espíritu que luguiabe (Ezeq. 3:23, 24). Zaqué nga maʼ nuu Ezequiel listu para guzulú guni predicar.

10. ¿Xi caquiiñenu para guni predicarnu, ne xiñee?

¹⁰ ¿Xi caquiiñenu para ganda guni predicarnu? Para guicábinu pregunta riʼ, guiníʼ íquenu ni bizaaca Ezequiel. Ante guni predicarbe, bidii espíritu santu laabe stipa ni caquiiñebe. Cásica Ezequiel, laanu laaca qué ñanda ñuni predicarnu pa ñaca qué ñacané espíritu santu laanu. ¿Xiñee coʼ yaʼ? Purtiʼ cucaalú Binidxabaʼ laanu para cadi guni predicarnu (Apoc. 12:17). Stale binni riníʼ ique nadipaʼ Binidxabaʼ ne qué zanda guni ganarnu laa. Peru runi ganarnu laabe ora runi predicarnu (Apoc. 12:9-11). Ora runi predicarnu rusihuínninu qué ridxíbinu guiráʼ ni riquiiñeʼ Binidxabaʼ para gucueeza laanu. Cada biaje guni predicarnu cayuni ganarnu laabe. Nga runi pa cayuni predicarnu neca cucaalú binni laanu la? cusihuinni nga cudii espíritu santu stipa laanu ne riuulaʼdxiʼ Jehová ni cayúninu (Mat. 5:10-12; 1 Ped. 4:14).

11. ¿Ximodo zacané espíritu santu laanu, ne xi caquiiñeʼ gúninu para cadi gusaana de guicaanu ni?

¹¹ Ra biʼniʼ Jehová lú ne lucuá Ezequiel naguidxi, rusiidiʼ ni laanu sti cosa ne laa ni nga: zanda gacané espíritu santu laanu gudxíʼlunu intiica guendanagana guidxaagalunu ora maʼ cayuni predicarnu  (2 Cor. 4:7-9). Yanna, ¿xi caquiiñeʼ gúninu para cadi gusaana de guicaanu espíritu stiʼ Dios yaʼ? Gatigá guinábanu ni laabe lu oración, ne gánnanu zucaadiaga Jehová laanu. Jesús gudxi ca discípulo stiʼ: «laguinabaʼ», «laguyubi», ne «laguxhidxináʼ». ¿Xi zuni Jehová yaʼ? Zudii «espíritu santu ca ni guinabaʼ ni laa» (Luc. 11:9, 13; Hech. 1:14; 2:4).

12. Casi ná Ezequiel 2:9-3:3, ¿padé zeeda rollo que, ne xi mensaje cá luni?

¹² Bidii espíritu santu valor Ezequiel para guni predicar, ne cadi nga si, laaca biquidxi stiidxaʼ Dios fe stiʼ Ezequiel. Lu ti visión biiyabe ti náʼ ni naaze ti rollo (biindaʼ Ezequiel 2:9–3:3). ¿Padé zeeda rollo que? ¿Xi mensaje cá luni? ¿Ximodo biquidxi ni fe stiʼ Ezequiel? Beeda rollo que de ra nuu trono stiʼ Jehová. Zándaca biquiiñeʼ Dios tobi de ca tapa ángel ni maca biʼyaʼ Ezequiel para bidii laabe rollo que (Ezeq. 1:8; 10:7, 20). Lu rollo que cá ca stiidxaʼ Dios: laa ni nga ti mensaje nadipaʼ ni chigudii Ezequiel ca judíu ni qué ruzuubaʼ diidxaʼ ni nuu Babilonia (Ezeq. 2:7). Ne cá mensaje ca guiropaʼ ladu rollo que.

13. ¿Xi gudxi Jehová Ezequiel guniné rollo que, ne xiñee nanaxhi ni?

¹³ Jehová gudxi profeta stiʼ gó rollo que ne guchá ndaaniʼ. Bizuubaʼ Ezequiel diidxaʼ ne gudó guidubi rollo que. ¿Xi riníʼ ndiʼ yaʼ? Ndiʼ riníʼ naquiiñeʼ guiene chaahuiʼ Ezequiel mensaje ni chigudii. Naquiiñeʼ guni crebe ne chindá mensaje que ndaaniʼ ladxidoʼbe ti zacá gucaa ni laabe guni predicarbe. Ne bizaaca xiixa ni cadi cabeza Ezequiel, purtiʼ biiyabe nanaxhi rollo que «casi miel» (Ezeq. 3:3). ¿Xiñee yaʼ? Purtiʼ para laabe ti privilegiu guizáʼ galán nga guni representarbe Jehová (Sal. 19:8-11). Guizáʼ guyuube nayecheʼ gulí Jehová laabe para gácabe profeta stiʼ.

14. ¿Xi gucané Ezequiel para chuʼ listu ne gunduuxeʼ dxiiñaʼ ni gucuaa?

¹⁴ Despué, gudxi Jehová Ezequiel: «Bicaadiaga ne guluu ndaaniʼ ladxidoʼloʼ guiráʼ ca diidxaʼ ni cayabeʼ lii» (Ezeq. 3:10). Gudxi Jehová laabe guietenaláʼdxibe ca diidxaʼ ni cá lu rollo que ne guiníʼ íquebe ca ni. Pa guni Ezequiel ni la? zaguidxi fe stiʼ ne zacané ni laa ganna ti mensaje nadipaʼ ngue chigudii binni (Ezeq. 3:11). Biene chaahuiʼ si Ezequiel mensaje stiʼ Dios ne guluu ni ndaaniʼ ladxidóʼ, maʼ guyuu listu para guni predicar dede ra guiluxe dxiiñaʼ gucuaa (bichaaga ni né Salmo 19:14).

15. ¿Xi caquiiñeʼ guni crenu de guidubi ladxidoʼno para cadi gusaana de gúninu xhiiñaʼ Dios?

¹⁵ Para cadi gusaana de gúninu xhiiñaʼ Dios, laaca caquiiñeʼ gudiʼnu lugar guquidxi Stiidxaʼ Dios fe stinu. Caquiiñeʼ guni crenu de guidubi ladxidoʼno guiráʼ ni cayabi Jehová laanu. Tiempu riʼ, riquiiñeʼ Jehová Biblia para guiniʼné laanu. ¿Xi zanda gúninu para gacané Stiidxaʼ Dios laanu lu ni riníʼ íquenu, ni runi sentirnu ne guiráʼ ni rúninu yaʼ?

16. ¿Xi caquiiñeʼ gúninu né Stiidxaʼ Dios, ne ximodo zanda gúninu ni?

¹⁶ Raca cuerpu stinu jma naguidxi ne rápani stipa ora guidoʼno guendaró. Fe stinu laaca rácani jma naguidxi ora runi estudiarnu Stiidxaʼ Dios ne runi meditarnu. Nga nga ni rizíʼdinu lu visión stiʼ rollo que. Cásica bichá Ezequiel ndaaniʼ ora gudó rollo que, laaca ngaca racalaʼdxiʼ  Jehová gúninu né Stiidxaʼ, caquiiñeʼ guiene chaahuinu ni. Ne para nga la? caquiiñeʼ guni orarnu, guidúʼndanu ne guni meditarnu. Primé, guni orarnu para ganda chindá guiráʼ ni rusiidiʼ Dios laanu ndaaniʼ ladxidoʼno. Guiropa, guidúʼndanu Biblia. Ne guionna, guni meditarnu ne guiníʼ ique chaahuinu ni bidúʼndanu ca. ¿Xi zabeendunu yaʼ? Pa laanu guni meditarnu, jma ziene chaahuinu Stiidxaʼ Dios ne zaguidxi fe stinu.

17. ¿Xiñee nabé galán guni meditarnu ora guidúʼndanu Biblia?

¹⁷ ¿Xiñee nabé risaca guidúʼndanu Biblia ne guni meditarnu? Purtiʼ pa gúninu ni zudii ni laanu stipa ni caquiiñenu para guni predicarnu mensaje stiʼ Reinu tiempu riʼ. Laaca zacané ni laanu tiempu ra zándaca chitídxinu binni zusabanáʼ Jehová laacaʼ. Ne ora jma guiníʼ íquenu ca cualidad sicarú napa Jehová, racané ni laanu jma gaca xhamígunu laa. Ne pur nga zabeendunu chupa cosa guizáʼ galán: zatadxí ladxidoʼno ne zabáninu nayecheʼ (Sal. 119:103).

18. ¿Xi zanna ca binni ni runi predicarnu, ne xiñee?

¹⁸ Neca cadi profeta laanu casi Ezequiel, peru nápanu mensaje stiʼ Jehová ni zeeda lu Biblia. Quixhe íquenu cadi gusaana de guni predicarnu mensaje stiʼ Jehová dede ora gábibe laanu maʼ cadi gúninu ni. Ne ora guni juzgar Jehová binni, qué zanda guiniʼcaʼ guirutiʼ tu ñuni predicar laacaʼ o qué nulabi Dios laacaʼ (Ezeq. 3:19; 18:23). Zánnacabe de Dios ngue zeeda mensaje ni biʼniʼ predicarnu.

19. ¿Xi zacané laanu para cadi gusaana de gúninu dxiiñaʼ ni bidii Dios laanu?

¹⁹ ¿Xi zacané laanu para cadi gusaana de gúninu dxiiñaʼ ni bidii Dios laanu yaʼ? Ni zacané laanu nga guionnaʼ cosa ni gucané Ezequiel: guni predicarnu purtiʼ nánnanu Jehová nga cuseendaʼ laanu, cudii espíritu santu stipa laanu ne ruquidxi Stiidxaʼ Dios fe stinu. Cumu racané Jehová laanu, nga runi maʼ gudixhe íquenu guni predicarnu ne guni huantarnu dede ora «gueeda fin» (Mat. 24:13).