1. ¿Ximodo biiyaʼ apóstol Pablo ca siervu ministerial?

 NABÉ risaca dxiiñaʼ ni runi guiráʼ siervu ministerial ndaaniʼ guiráʼ congregación. Ne rudiʼnu cuenta nabé bisisaca apóstol Pablo ca hombre chaʼhuiʼ ca. Nga runi, dxi biseendabe ti carta ra nuu ca xpinni Cristu de Filipos biseendabe ti diuxi para peʼ ca siervu ministerial ne ngueca para ca ancianu (Filip. 1:1).

2. ¿Xi guníʼ Luis pur naca siervu ministerial?

² Stale hombre ni maʼ guyuunisa rúnicaʼ dxiiñaʼ sticaʼ casi siervu ministerial né stale guendanayecheʼ. Nuu de laacabe nahuiinirúcabe o maʼ huaniisicabe. Guzéʼtenu chupa ejemplu, Devan napa 18 iza dxi guca nombrar. Peru Luis la? napa jma de cincuenta iza. Guníʼ Luis ximodo runi sentir: «Nabé risaca para naa guneʼ dxiiñaʼ stinneʼ casi siervu ministerial ne jmaruʼ si ora guiníʼ iqueʼ pabiáʼ nadxii congregación naa».

3. ¿Xi pregunta chiguicábinu lu artículo riʼ?

³ Pa maʼ guyuunísaluʼ ne caʼruʼ gácaluʼ siervu ministerial, ¿zanda quíxheluʼ ni casi ti meta la? ¿xiñee racaláʼdxiluʼ ugaandaluʼ ni? ¿Ne xi requisitu stiʼ Biblia caquiiñeʼ guni cumplirluʼ? Zacábinu ca pregunta ca lu artículo riʼ. Peru ante la? guidúʼyanu xii nga dxiiñaʼ ni runi ti siervu ministerial.

¿XI DXIIÑAʼ RUNI TI SIERVU MINISTERIAL?

4. ¿Xi dxiiñaʼ runi ti siervu ministerial? (Biiyaʼ imagen ca).

⁴ Ca siervu ministerial ca nga caadxi hombre ni maʼ guyuunisa ne gulí espíritu santu para gacanécabe ca ancianu gaca caadxi dxiiñaʼ ndaaniʼ congregación. Nuu de laacabe ruuyacabe gaca predicar guiráʼ territorio stiʼ congregación o chuʼ publicación para chiné ca publicador ca predicación. Stale de laacabe racanécabe guiá ra Yoo stiʼ Reinu o guicaani mantenimientu.  Xcaadxi runi dxiiñaʼ de acomodador o ruuyacabe equipu de sonidu ora maʼ cayaca ca reunión ca. Neca rúnicabe guiráʼ dxiiñaʼ ni maʼ bizéʼtenu ca, peru ca siervu ministerial ca la? nácacabe hombre ni nuu gaxha de Jehová. Nadxiicabe Jehová ne nabánicabe modo rinabaʼ Jehová guibani ca xpinni. Ne laaca nabé nadxiicabe guiráʼ hermanu (Mat. 22:​37-39). ¿Xi naquiiñeʼ guni ti hombre ni maʼ guyuunisa para ganda gaca siervu ministerial?

5. ¿Ximodo zanda ugaandaluʼ meta de gácaluʼ siervu ministerial?

⁵ Lu Biblia nga zeeda ca requisitu ni naquiiñeʼ guni cumplir ti hombre para gaca siervu ministerial (1 Tim. 3:​8-10, 12, 13). ¿Xi zanda gúniluʼ para ugaandaluʼ meta ca yaʼ? Biʼniʼ estudiar guiráʼ requisitu zeeda lu Biblia ne biʼniʼ cani. Peru primé, biiyaʼ xiñee racaláʼdxiluʼ ugaandaluʼ ni.

¿XIÑEE RACALÁʼDXILUʼ UGAANDALUʼ NI?

6. ¿Xiñee racaláʼdxiluʼ gúniluʼ dede ca dxiiñaʼ ni jma nahuiiniʼ para ca hermanu? (Mateo 20:28; biiyaʼ imagen ni zeeda lu ).

⁶ Guiníʼ íquenu Jesucristu, hombre ni jma galán ejemplu gudixhe para laanu. Ni bicaa laabe gúnibe xhiiñaʼ Jehová nga guendarannaxhii: guendarannaxhii pur bixhózebe ne pur binni. Ne laaca guendarannaxhii ca nga bicaa laabe gúnibe dxiiñaʼ nadipaʼ ne gúnibe dede ca dxiiñaʼ ni jma nahuiiniʼ para gacanebe xcaadxi binni (biindaʼ Mateo 20:28; Juan 13:​5, 14, 15). Ngue ca nga lii, pa pur guendarannaxhii ca rúniluʼ guiráʼ cosa la? zaguu Jehová ndaayaʼ lii ne zacanebe lii ugaandaluʼ ca meta stiluʼ, casi gácaluʼ siervu ministerial (1 Cor. 16:14; 1 Ped. 5:5).

7. ¿Xiñee cadi jneza gacalaʼdxiʼ tuuxa gaca siervu ministerial para si gusisaca xcaadxi laa?

⁷ Ndaaniʼ Guidxilayú riʼ, stale binni riuuláʼdxicaʼ gusisaca xcaadxi laacaʼ. Peru ndaaniʼ xquidxi Jehová la? cadi zacá ni. Hombre ni runi guiráʼ dxiiñaʼ stiʼ, cásica Jesús la? qué zacalaʼdxiʼ guni mandar ca hermanu o gapa ti privilegiu para gusisácacabe laa. Pa ti binni ni riuulaʼdxiʼ gusisácacabe laa guicaa ti privilegiu ndaaniʼ congregación, zándaca qué zanabe gúnibe ca dxiiñahuiiniʼ o ca dxiiñaʼ ni huaxiéʼ risaca para gacanebe ca dendxuhuiiniʼ stiʼ Jehová, zándaca zaníʼ íquebe qué risácabe pa gúnibe ca dxiiñaʼ ca (Juan 10:12). Pa racalaʼdxiʼ ti hombre ni riuulaʼdxiʼ gusisácacabe laa ugaanda ti privilegiu  ndaaniʼ congregación la? qué zaguu Jehová ndaayaʼ guiráʼ stipa ni cayúnibe para ugaandabe meta ca (1 Cor. 10:​24, 33; 13:​4, 5).

8. ¿Xi gudxi Jesús ca apóstol stiʼ?

⁸ Nuu biaje, dede ca xhamigu dxiña Jesús gucaláʼdxicaʼ nicaacaʼ xiixa dxiiñaʼ, peru cadi jneza ni caníʼ íquecaʼ. Nga peʼ nga ni bizaaca chupa apóstol stiʼ Jesús: Santiago ne Juan. Gunábacabe Jesús gudii laacabe ti puestu risaca lu Reinu stiʼ. Peru lugar de ñechené Jesús laacabe pur ni caníʼcabe, gúdxibe doce apóstol stibe: «Ni racalaʼdxiʼ gaca ti binni risaca ládetu, naquiiñeʼ guni tender laatu ne ni racalaʼdxiʼ gaca primé ládetu, naquiiñeʼ gaca esclavu stiʼ guiratu» (Mar. 10:​35-37, 43, 44). Ca hombre ni racalaʼdxiʼ guicaa ti privilegiu ndaaniʼ congregación, peru purtiʼ racalaʼdxiʼ gacané xcaadxi la? zeeda gácacabe ti ndaayaʼ stiʼ Jehová ndaaniʼ congregación (1 Tes. 2:8).

¿XI ZANDA GACANÉ LII CHUULÁʼDXILUʼ GACANELUʼ CA HERMANU?

9. ¿Xi zanda gacané lii chuuláʼdxiluʼ gacaneluʼ xcaadxi?

⁹ Maʼ nánnanu nadxiiluʼ Jehová ne racaláʼdxiluʼ gacaneluʼ ca hermanu. Peru neca zacá, zándaca qué racaláʼdxiluʼ gúniluʼ guiráʼ dxiiñaʼ ni runi ti siervu ministerial. ¿Xi zanda gacané lii chuuláʼdxiluʼ gacaneluʼ ca hermanu yaʼ? Guníʼ ique pabiáʼ nayecheʼ runi sentir tuuxa ora gacané ca hermanu. Nga peʼ nga ni guníʼ Jesús: «Jma nayecheʼ riuu binni ora rudii que ora ricaa» (Hech. 20:35). Cumu siempre bíʼnibe ni ná ca diidxaʼ ca la? bidxá tipa ladxidoʼbe de guendanayecheʼ ora gucanebe xcaadxi binni. Ne ngaca nga ni zanda guni sentirluʼ.

10. ¿Ximodo bisihuinni Jesús riuu nayecheʼ ora gacané xcaadxi binni? (Marcos 6:​31-34).

¹⁰ Guzéʼtenu ti ejemplu ra rihuinni pabiáʼ guyuu Jesús nayecheʼ ra gucané xcaadxi binni (biindaʼ Marcos 6:​31-34). Ti dxi, laabe ne ca discípulo stibe guizáʼ maʼ bidxágacabe. Bireecabe zécabe ti lugar zitu para guiziiláʼdxicabe, peru guzaniruʼ stale binni lúcabe ne yendacaʼ ra zécabe que purtiʼ racaláʼdxicaʼ gusiidiʼ Jesús laacaʼ. Ñándaca niníʼ Jesús qué zuni ni, purtiʼ laabe né ca xcompañérube «qué gápacabe tiempu nin para gócabe gueta». Ñándaca nusiidiʼ Jesús laacabe tobi o chupa si cosa ne despué ñabi laacabe nibíʼcabe. Peru, cumu guiráʼ cosa ni runi Jesús, rúnibe ni pur guendarannaxhii la? «bizulú bisiidibe laacaʼ stale cosa». Ne ngue cayúnibe nin ñánnabe «guca huadxí» (Mar. 6:35). Cadi biʼniʼ Jesús ni pur obligación, bíʼnibe ni purtiʼ «guizáʼ biabe» ca binni que. Dxandíʼ peʼ racaláʼdxibe gusiidibe laacaʼ purtiʼ nadxiibe laacaʼ. Zacá nga laani: Ora gacanenu xcaadxi binni zadxá tipa ladxidoʼno de guendanayecheʼ.

11. ¿Ximodo gucané Jesús ca binni ni cucaadiaga laa? (Biiyaʼ imagen ca).

¹¹ Dxi biʼniʼ Jesús xhiiñaʼ Jehová, cadi bisiidisibe binni, laaca bidiibe cosa ni caquiiñeʼ binni. Ti dxi, bíʼnibe ti milagru para guidale guendaró, despué bidiibe ni ca discípulo ne despué maʼ laacaʼ gudiizicaʼ ni lu náʼ binni (Mar. 6:41). Zaqué nga bisiidibe laacaʼ pabiáʼ risaca nga gacanecaʼ xcaadxi binni. Ne laaca zaqué nga bisiidibe laacaʼ risaca nga gúnicaʼ xiixa pur sti binni, cásica runi ca siervu ministerial ni yanna. ¡Laguiníʼ ique pabiáʼ nayecheʼ biʼniʼ sentir ca apóstol que! Gucanécabe Jesús gudiicabe guendaró ca binni que ne «gudó guiráʼ binni que ne bidxá ndaanicaʼ» (Mar. 6:42). Dxandíʼ, cadi dxi que si nga biʼniʼ Jesús xiixa para gacané xcaadxi binni, lugar de ñuni xiixa pur laa o nizilaʼdxiʼ. Biaʼ dxi bibani Jesús lu Guidxilayú, ni jma gucuá ique Jesús nga gacané prójimo stiʼ (Mat. 4:23; 8:16). Nabé bidxá tipa ladxidóʼ Jesús de guendanayecheʼ  ora bisiidiʼ ne ora biʼniʼ xiixa dxiiñahuiiniʼ ni ruluíʼ huaxiéʼ risaca para gacané xcaadxi binni. Lii laaca ziuuluʼ nayecheʼ pa nuuluʼ dispuestu guʼnuʼ dxiiñaʼ pur xcaadxi binni, casi ti siervu ministerial.

12. ¿Xiñee cadi naquiiñeʼ guiníʼ íquenu qué zanda gúninu gastiʼ ndaaniʼ congregación?

¹² ¿Yanna pa riníʼ íqueluʼ qué gánnaluʼ gúniluʼ nin ti dxiiñaʼ yaʼ? Cadi guireeluʼ gana, nánnadu nápaluʼ xiixa cualidad ni zanda iquiiñeʼ ndaaniʼ congregación. Ti cosa ni zacané lii nga gúniluʼ oración ne gúʼndaluʼ 1 Corintios 12:​12-30. Lu ca versículo ca cusiene apóstol Pablo, cásica lii ne tutiica xpinni Jehová cayúnitu ti dxiiñaʼ nabé risaca ndaaniʼ congregación. Nga runi, cadi guireeluʼ gana pa nagasi cadi cugaandaluʼ ca requisitu ni caquiiñeʼ para gácaluʼ siervu ministerial. Biʼniʼ ni nuu lu naluʼ pur Jehová ne pur ca hermanu. Zuuyaʼ ca ancianu ca xii nga ni zanda gúniluʼ ante gudiicabe lii ti dxiiñaʼ (Rom. 12:​4-8).

13. ¿Tu guiráʼ caquiiñeʼ guni cumplir ca requisitu para guicaa ti nombramientu?

¹³ Sti cosa ni zanda gacané lii quixe íqueluʼ ugaandaluʼ gácaluʼ siervu ministerial nga, guietenaláʼdxiluʼ naquiiñeʼ guni cumplir guiráʼ ca xpinni Cristu stale de ca requisitu ca. Zacá nga laani, guiráʼ xpinni Cristu naquiiñeʼ chuʼcaʼ gaxha de Jehová, ne guni sentircaʼ guendanayecheʼ ora gacanecaʼ xcaadxi ne gácacaʼ ti buen ejemplu para ca hermanu. Peru ¿gunáʼ nga ca cosa ni naquiiñeʼ guni ti hombre ni racalaʼdxiʼ guni jma dxiiñaʼ ndaaniʼ congregación yaʼ?

RA CAQUIIÑEʼ GÚNILUʼ DXIIÑAʼ

14. ¿Xi riníʼ diidxaʼ «gácacaʼ responsable»? (1 Timoteo 3:​8-10, 12).

¹⁴ Guidúʼyanu chupa chonna de ca requisitu ni riete lu 1 Timoteo 3:​8-10, 12 (biindaʼ ni). Ca siervu ministerial la? naquiiñeʼ «gácacaʼ responsable». Laaca randa raca traducir diidxaʼ riʼ casi «ni nápacabe respetu laa», «seriu» ne «ni riuulaʼdxiʼ Dios modo nabani». Dxandíʼ, qué riníʼ ca diidxaʼ ca qué lica zanda guxidxi ca siervu ministerial ca o gusixídxicaʼ xcaadxi binni (Ecl. 3:​1, 4). Peru caquiiñeʼ gácacabe responsable ora guicaacabe ti dxiiñaʼ, ti ganda gunibiáʼ ca hermanu laacabe casi ti binni ni zanda gápacabe confianza laa. Zacá nga zuni respetar guidubi congregación ca laacabe.

15. ¿Xi riníʼ ca diidxaʼ «cadi gusiguiicaʼ» ne «cadi nisi bueltu maʼ cá íquecaʼ ne pur laani gusaana de gácacaʼ honradu»?

¹⁵ «Cadi gusiguiicaʼ». Ni riníʼ ca diidxaʼ riʼ  nga, qué zucaachiʼ ti siervu ministerial tu naca, nayá ladxidóʼ ne zanda gápacabe confianza laa. Naquiiñeʼ guni cumplirbe ni maʼ guniʼbe ne cadi quítebe guirutiʼ (Prov. 3:32). «Cadi nisi bueltu maʼ cá íquecaʼ ne pur laani gusaana de gácacaʼ honradu». Ni caníʼ ca diidxaʼ riʼ nga, zácabe honradu pa nápabe ti negocio ne pa naazebe bueltu stiʼ congregación ne qué zuyúbibe ximodo quítebe ca hermanu para si gáxhabe bueltu laacaʼ.

16. a) ¿Xi riníʼ ca diidxaʼ «cadi xhúdxicaʼ»? b) ¿Ximodo nga gapa tuuxa «ti conciencia nayá»?

¹⁶ «Cadi xhúdxicaʼ». Ni caníʼ ca diidxaʼ riʼ nga, cadi tidiʼ zucabe ne nisadxuʼniʼ o gunibiáʼ binni laacabe casi tuuxa ni reʼ xhaataʼ. Ne laaca naquiiñeʼ «gápacaʼ ti conciencia nayá» purtiʼ nabánicabe modo ná guiráʼ ni rinabaʼ Jehová laanu lu Stiidxaʼ. Dxandíʼ, guiranu nga nácanu binni ruchee peru zanda guibáninu galán pa nuunu nayá nezalú Jehová.

17. ¿Ximodo zanda guihuinni pa zanda guni ti hermanu dxiiñaʼ ni guicaa? (1 Timoteo 3:10; biiyaʼ imagen ca).

¹⁷ Stobi de ca requisitu ca nga, «primeru guihuinni pa zanda gúnicabe dxiiñaʼ riʼ». Ni caníʼ ca diidxaʼ riʼ nga, napa xidé maʼ bihuinni zanda guicaacabe jma dxiiñaʼ. Nga runi, ora gudii ca ancianu ca laacabe ti dxiiñaʼ naquiiñeʼ gúnicabe stipa chinándacabe modo gusiénecaʼ laacabe ne chinándacabe ni maʼ gudixhe xquidxi Jehová. Naquiiñeʼ guiénecabe xii nga dxiiñaʼ ni chigúnicabe ne pora naquiiñeʼ guiluxe gúnicabe ni. Pa gúnicabe stipa pur guilúxecabe guiráʼ dxiiñaʼ ni guicaacabe la? zuuyaʼ ca hermanu de congregación ni ne zuuyacaʼ cayúnicabe stipa guiniisicabe ndaaniʼ xquidxi Jehová. Laatu ca ancianu, laguuyaʼ pa nuu tuuxa hombrehuiiniʼ ni maʼ guyuunisa ndaaniʼ congregación stitu ne ni zanda gusiiditu o guni capacitartu laa (biindaʼ 1 Timoteo 3:10). Guzéʼtenu chupa chonna ejemplu, ndaaniʼ congregación stitu, ¿ñee nuu tuuxa hermanuhuiiniʼ ni maʼ guyuunisa ne ni napa biaʼ chii hasta catorce iza o maʼ nahuiiniʼ la? ¿Ñee riuuláʼdxibe guni estudiarbe Stiidxaʼ Dios la? ¿Runi comentarbe lu ca reunión ca ne rúnibe stipa guireebe predicación la? Pa zácani la? zanda gudiitu laabe ti dxiiñaʼ biá iza stibe ne tiempu stibe. Zacá zahuinni pa zanda gúnicabe ti dxiiñaʼ ni guicaacabe. Nga runi ora guiniisicabe xcaadxi, zuuyatu pa maʼ cayuni cumplírcabe né ca requisitu para gaca nombrárcabe siervu ministerial.

18. ¿Xi riníʼ ca diidxaʼ cadi naquiiñeʼ cuʼ tuuxa xqueja ca siervu ministerial?

 ¹⁸ Ca siervu ministerial ca cadi naquiiñeʼ cuʼ tuuxa xquéjacabe. Ni caninu raríʼ nga, cadi naquiiñeʼ gúnicabe xiixa ne pur laani guiníʼ tuuxa bíʼnicabe ti pecadu grave. Dxandíʼ, guiráʼ xpinni Cristu nga zanda guiníʼcabe mal de laa purtiʼ Jesús peʼ bizaaca ni ne gúnibe laaca zazaaca ca xpínnibe ni (Juan 15:20). Neca zacá, ca hermanu ni guni stipa guibani nayá nezalú Jehová casi biʼniʼ Jesús la? zuuyacabe laacaʼ casi ti buen ejemplu ndaaniʼ congregación (Mat. 11:19).

19. ¿Xi riníʼ ca diidxaʼ «cadi gápacaʼ chupa chonna gunaa, sínuque xheelasicaʼ»?

¹⁹ Ca hombre ni racalaʼdxiʼ gaca siervu ministerial ne maʼ bichaganacaʼ laa? «cadi gápacaʼ chupa chonna gunaa, sínuque xheelasicaʼ». Naquiiñeʼ guni respetárcabe ley ni maʼ guixhe Jehová. Lu ti guendaxheelaʼ la? naquiiñeʼ chuʼ ti hombre ne ti gunaa si (Mat. 19:​3-9). Nga caníʼ ti xpinni Cristu la? cadi lica naquiiñeʼ chuʼné tuuxa ni cadi xheelaʼ (Heb. 13:4). Peru hombre xpinni Cristu ni maʼ bichaganáʼ riʼ caquiiñeʼ gúnibe sti cosa. Cadi lica naquiiñeʼ gucheenebe xheelabe, ndiʼ caníʼ cadi lica naquiiñeʼ gúnibe xiixa ni gusihuinni riuuláʼdxibe xcaadxi gunaa (Job 31:1).

20. ¿Ximodo ndiʼ rusihuinni ti hombre runi mandar familia stiʼ?

²⁰ Sti cosa ni naquiiñeʼ guni ca siervu ministerial ca nga, «gácacaʼ tuuxa ni nanna guni mandar ca xiiñiʼ ne familia stiʼ». Ca ni naca xaíque ndaaniʼ familia sticaʼ, naquiiñeʼ gánnacaʼ ti dxiiñaʼ naroʼbaʼ nga ni nápacaʼ. Naquiiñeʼ gápacabe adoración en familia guiráʼ semana. Guireenécabe familia stícabe predicación pa ganda la? guiráʼ semana. Ne laaca zacanécabe ca xiiñicabe gaca xhamígucaʼ Jehová (Efes. 6:4). Hombre ni cayapa familia stiʼ cusihuinni zanda gapa de interu naca congregación (bichaaga ni né 1 Timoteo 3:5).

21. ¿Xi zanda gúniluʼ pa caʼruʼ gácaluʼ siervu ministerial?

²¹ Pa caʼruʼ gácaluʼ siervu ministerial caguʼdu ganna lii guni orarluʼ Jehová ne guni estudiarluʼ guiráʼ ni cayete lu artículo riʼ. Biiyaʼ xi guiráʼ nga ca requisitu canabaʼ Jehová tuuxa para gaca siervu ministerial ne biʼniʼ stipa gúniluʼ ca ni. Guníʼ ique, pabiáʼ nadxiiluʼ Jehová ne ca hermanu stiluʼ. Biʼniʼ stipa cada dxi pur chuuláʼdxiluʼ gúniluʼ ni nabe (1 Ped. 4:​8, 10). Zacá zuni sentirluʼ guendanayecheʼ pur gacaneluʼ ca hermanu stiluʼ. ¡Jehová cuʼ ndaayaʼ guiráʼ stipa ni cayúniluʼ para ganda gácaluʼ siervu ministerial! (Filip. 2:13).