Lu Biblia riete ni bizaaca stale hombre ne gunaa ni dxandíʼ bibani ne ni biʼniʼ sentir stale cosa. Pa guidúʼndanu ni bizaacacabe la? zándaca zadúʼyanu nuu tuuxa ni gudiʼdiʼ ra peʼ cadídinu.

Guiranu riuuláʼdxinu guiénecabe modo cayuni sentirnu, jmaruʼ si ora cudxíʼlunu ti guendahuará ni cayuniná guendabiaaniʼ stinu. Zándaca ra gúʼndaluʼ ni biʼniʼ sentir ne ni guníʼ ique chupa chonna binni bibani tiempu gucuá Biblia, zudiiluʼ cuenta ngaca ni cazaacaluʼ. Zacané ndiʼ laanu gudiʼnu cuenta nuuruʼ tu huadxiilú ansiedad o sti tipu guendahuará ni runiná guendabiaaniʼ stiʼ binni.

• Rabi Biblia laanu xi guníʼ chupa chonna hombre dxi maʼ qué guidxélacaʼ xi gúnicaʼ ne maʼ birá stipa sticaʼ. ¿Ñee huayuu dxi guiníʼ íqueluʼ: «Maʼ qué ganda diʼ naa, maʼ bixhacaladxeʼ modo nabaneʼ riʼ»? Zacá peʼ nga guníʼ ique Moisés, Elías ne David (Números 11:14; 1 Reyes 19:4; Salmo 55:4).

• Laaca ruzeeteʼ Biblia de Ana, ti gunaa ni nabé biuubaʼ ladxidóʼ purtiʼ qué ganda gapa xiiñiʼ, guyuu sti gunaa ni rucaalú laabe ne nabé feu modo runi burla laabe (1 Samuel 1:6, 10).

• Zándaca cazaacaluʼ ni bizaaca Job, ti hombre ni riete lu Biblia. Neca gupa hombre riʼ stale fe, nabé guyuube xizaa dede guniʼbe: «Maʼ bixhacalaʼdxeʼ guendanabani stinneʼ, maʼ qué racalaʼdxeʼ guibaneʼ» (Job 7:16).

Gunda bisaana ca binni riʼ de guiníʼ íquecaʼ cosa ni runiná laacaʼ. Laaca zápanu stipa pa gúninu casi bíʼnicabe.