Neca cadi ti libru de medicina nga Biblia, rudiini caadxi conseju ni zanda gacané ca ni cayuniná ti guendahuará guendabiaaniʼ sticaʼ. Guidúʼyanu chupa chonna.

«Ca binni nazaaca cadi caquiiñeʼ checaʼ ra nuu doctor, peru ca ni huará caquiiñeʼ checaʼ» (MATEO 9:12).

Biblia peʼ rabi laanu nuu tiru caquiiñeʼ peʼ chuunu ra nuu ti doctor. Stale binni ni cayuniná ti guendahuará guendabiaaniʼ stiʼ la? jma galán runi sentir ora gusiene chaahuicabe laa xi peʼ nga ni cayaca ne guicaa ti tratamientu ni gudii ti especialista.

«Racané ejerciciu cuerpu stinu binni» (1 TIMOTEO 4:8).

Pa iquiiñenu tiempu stinu ne stipa stinu para gúninu caadxi cosa ni zacané cuerpu stinu la? laaca zacané ni guendabiaaniʼ stinu. Chupa chonna de ca cosa ca nga gúninu ejerciciu gatigá, guidoʼno guendaró ni gacané cuerpu stinu ne gusaʼnu xpacaandanu.

«Ora nayecheʼ nuu ladxidóʼ binni racaneni laa para guianda, peru ora nuu binni triste la? rusirani stipa stiʼ» (PROVERBIOS 17:22).

Pa guidúʼndanu ca textu stiʼ Biblia ni cuʼ gana laanu ne quixhe íquenu gúninu xiixa ni zanda gúninu la? zacané ni laanu chuʼnu jma nayecheʼ.  Pa gúninu guiráʼ cosa stinu ne guendanayecheʼ ne guníʼ íquenu zanda gúninu intiica cosa la? zacané ca nga laanu chuʼnu tranquilu neca nápanu xiixa guendahuará ni cayuniná guendabiaaniʼ stinu.

«Ti binni nuu xpiaaniʼ la? nanna nuu cosa ni qué zanda guni» (PROVERBIOS 11:2).

Zándaca caquiiñeʼ gacané sti binni lii para gúniluʼ xiixa cosa nga runi bidii lugar gacanécabe lii. Racalaʼdxiʼ ca xhamíguluʼ ne familia stiluʼ gacanecaʼ lii. Peru zándaca qué gánnacabe ximodo gúnicabe ni. Bisiene chaahuiʼ laacabe xii nga caquiiñeluʼ, peru gunna nuu cosa ni qué zaca modo peʼ racaláʼdxiluʼ ne bidii xquixe peʼ pur guiráʼ ni cayúnicabe pur lii.

«Bidieeʼ cuenta cadi nuaaʼ diaʼ galán, ngue runi guyaaʼ ra nuu doctor. Bisiene chaahuiʼ doctora que naa xi cayacaʼ ne gucané ngue naa para guieneʼ napaʼ ti guendahuará. Laaca bisiénebe naa xi tratamientu guicaaʼ pur guendahuará stinneʼ (Nicole, a nápabe ti guendahuará ni láʼ trastorno bipolar).

«Ti cosa ni nabé racané naa nga guundaniaʼ xheelaʼ Biblia guiráʼ dxi. Nga racané naa guiníʼ iqueʼ cosa ni cuʼ gana naa guiráʼ siadóʼ. Maʼ huadieeʼ cuenta, ca dxi peʼ jma cayuniná guendahuará riʼ naa la? ridxelaʼ ti versículo ni rindá ndaaniʼ ladxiduáʼ (Peter, nápabe ti guendahuará ni láʼ depresión).

«Nacubigá que rituiluaʼ gabeʼ sti binni xi cazaacaʼ. Peru napaʼ ti xhamigaʼ ni nabé biene modo nuaaʼ que ne nabé gúpabe stale paciencia naa dede gucané ngue naa chuaaʼ jma galán ne guieneʼ cadi nuaaʼ stubeʼ (Ji-yoo, nápabe ti guendahuará ni láʼ trastorno alimentario).

«Pur ca conseju stiʼ Biblia, yanna maʼ runeʼ dxiiñaʼ biaʼ caquiiñeʼ si guneʼ ne runeʼ stipa guiziiladxeʼ. Racané ca conseju stini naa para guneʼ controlar ni runeʼ sentir» (Timothy, nápabe ti guendahuará ni láʼ trastorno obsesivo compulsivo).