2 | «Quixhedxí Stiidxaʼ Dios ladxidoʼno»
NI NÁ BIBLIA: «Purtiʼ guiráʼ ni gucuá dxiqué, gucuá ni para gusiidiʼ ni laanu, ti ora guni huantarnu ne quixhedxí Stiidxaʼ Dios ladxidoʼno la? gápanu esperanza» (ROMANOS 15:4).
¿Xi riníʼ ni?
Racané Biblia laanu gánnanu xi gúninu para gatadxí ladxidoʼno, laaca racané ni laanu guni huantarnu ne rudii ni stipa laanu para gucáʼnanu ca cosa ni zanda guniná guendabiaaniʼ stinu. Laaca rabi Biblia laanu maʼ cadi candaa zaree ca guendahuará ni runiná sentimientu stinu.
¿Ximodo racané ni laanu?
Normal nga guni sentirnu triste o chuʼnu xizaa, peru ca ni napa ti guendahuará casi depresión o ansiedad la? guiráʼ dxi nga runi sentírcabe zacá. ¿Ximodo zanda gacané Biblia laacabe yaʼ?
Lu Biblia zeeda stale diidxaʼ ni zaguu gana laanu ne ni zacané laanu cueenu ca cosa ni cayuniná guendabiaaniʼ stinu (Filipenses 4:8). Zanda gacané Biblia laanu para cuʼnu cosa ndaaniʼ íquenu ni gacané laanu gatadxí guendabiaaniʼ stinu ne guni sentirnu jma galán (Salmo 94:18, 19).
Racané Biblia laanu para cadi guni sentirnu qué risácanu (Lucas 12:6, 7).
Lu Biblia zeeda stale historia ni rusihuinni cadi nuunu stúbinu, nuu ti Dios ni bizáʼ laanu ne laa dxandíʼ peʼ riene ni cazaacanu (Salmo 34:18; 1 Juan 3:19, 20).
Lu Biblia cayabi Dios laanu zedandá dxi maʼ qué lica zietenaláʼdxinu guiráʼ ni cayuniná laanu yanna (Isaías 65:17; Apocalipsis 21:4). Pa yanna peʼ cayuniná xiixa guendahuará guendabiaaniʼ stinu o runi sentirnu xiixa ni ruchibi laanu la? zudii ca diidxaʼ ca stipa laanu para cadi gusaba ni laanu.
