¡Zanda gúniluʼ ni jneza!: Ni ná Biblia nga ni jma jneza gúninu
Pa gúninu ni ná conciencia stinu ora guicaanu xiixa decisión o guicaanu ni pur modo riníʼ ique xcaadxi, qué zanda chuʼnu seguru pa jneza zieni laanu pur decisión ni gucuaanu ca. Biblia rabi laanu xiñee risaca ni bizéʼtenu riʼ ne rusiidini laanu ximodo zanda guibáninu nayecheʼ. Ne zudiiluʼ cuenta ni ná Biblia nga ni jma jneza gúninu.
CAQUÍʼÑENU GABI DIOS LAANU XI GÚNINU
Lu Biblia, rusiidiʼ Jehová a Dios laanu caquíʼñenu de laa: purtiʼ stúbinu que zanda (Jeremías 10:23). Nga runi bidiibe laanu Biblia ni zanda gacané laanu guicaanu decisión risaca lu xquendanabáninu. Guizáʼ nadxiibe laanu ne qué racaláʼdxibe guicaanu xiixa decisión ni guniná laanu ne pur laani gápanu guendanagana lu xquendanabáninu (Deuteronomio 5:29; 1 Juan 4:8). Dios nga ni bizáʼ laanu laabe nga ni jma nuu xpiaanibe ne runibiáʼ chaahuibe laanu ne zanda gudiibe laanu conseju ni jma zacané laanu (Salmo 100:3; 104:24). Neca laabe nga bizaʼbe laanu, peru qué rucaabe laanu guibáninu modo ná ca ley stibe.
Bidii Jehová Adán ne Eva, primé hombre ne primé gunaa ni bizaʼbe que guiráʼ ni caquiiñecaʼ para guibánicaʼ nayecheʼ (Génesis 1:28, 29; 2:8, 15). Ne bidiibe laacaʼ caadxi instrucción ni cadi nagana ne gulézabe ninándacaʼ ni, peru bidiibe lugar laacaʼ cuicaʼ pa zúnicaʼ ni (Génesis 2:9, 16, 17). Triste guininu ni peru Adán ne Eva gulicaʼ gúnicaʼ ni nacaʼ ne cadi ni ná Jehová (Génesis 3:6). ¿Ximodo huayeni laanu dede dxi maʼ riguíxhenu xii nga ni jneza para laanu yaʼ? ¿Huayeni laanu galán la? Coʼ. Dede dxiqué hasta tiempu riʼ maʼ bihuinni ora qué rinanda binni ca ley stiʼ Dios qué rápacaʼ paz ne qué ribánicaʼ nayecheʼ (Eclesiastés 8:9).
Racané Biblia laanu gánnanu xii nga ni jneza gúninu, gastiʼ naca paraa nabézanu o padé laanu (2 Timoteo 3:16, 17; biiyaʼ cuadru ni láʼ « Ti libru para guiráʼ binni»). Guidúʼyanu ximodo riquiiñeʼ Dios Biblia para gabi laanu xi gúninu.
Biiyaʼ xiñee biaʼsi nga rininu naca Biblia Stiidxaʼ Dios (1 Tesalonicenses 2:13). Guyé lu jw.org ne biiyaʼ videu ni láʼ Tu guníʼ xi guicá lu Biblia.
RIQUIIÑEʼ DIOS BIBLIA PARA GABI LAANU XI GÚNINU
Rabi Biblia laanu xi huayuni Dios pur binni guidxilayú. Ora guidúʼndanu Biblia zadúʼyanu xii nga ni jneza ne ni cadi jneza para Dios, ni caninu raríʼ nga ni nánnabe zacané laanu o zuniná laanu (Salmo 19:7, 11). Zacá nga zadxélanu caadxi conseju ni zacané laanu guibáninu jneza ne qué ruchaa ca ni ra zidiʼdiʼ dxi ne laacani nga zabi ca ni laanu ximodo guibáninu cada dxi.
Guidúʼyanu tobi de ca conseju riʼ, laani nga ni ridxélanu lu Proverbios 13:20: «Tu canazané binni nuu xpiaaniʼ la? zaca binni nuu xpiaaniʼ, peru tu ridxaaga binni huati la? qué zié ni laa jneza». Cásica gucané conseju riʼ binni dxiqué zacaca cayacané ni stale binni yanna ne laani nga tobi si de ca conseju ni zeeda lu Biblia (biiyaʼ cuadru ni láʼ « Qué ruchee ca conseju ni rudii Biblia laanu»).
Zándaca guiníʼ íqueluʼ: «¿Ximodo nannaʼ dxandíʼ zacané ca conseju stiʼ Biblia ca naa ca dxi riʼ yaʼ?». Lu sti artículo ca zadúʼyanu ximodo huayacaneni binni ca dxi riʼ.
a Jehová nga lá Dios (Salmo 83:18).
