1. ¿Xiñee zanda guininu racanenu binni guilá ora rusíʼdinu laacaʼ gácacaʼ discípulo stiʼ Cristu?

ORA rusíʼdinu binni racanenu laacaʼ guilacaʼ ne gácacaʼ discípulo stiʼ Cristu. ¿Xiñee yaʼ? Lu Mateo 28:19, 20 guníʼ Jesús «laché», «lagacané binni [...] gaca discípulo stinneʼ» ne «lacuunisa laacaʼ». Nánnanu nabé risaca chúʼnisa binni purtiʼ ndiʼ nga tobi de ca cosa ni caquiiñeʼ gúnicaʼ para guilacaʼ. Ti binni ni racalaʼdxiʼ chúʼnisa naquiiñeʼ guni cré guti Jesús pur laa ne biásabe de lade gueʼtuʼ para ganda guilá. Nga runi gudxi apóstol Pedro ca xpinni Cristu: «Bautismo ni culá laatu yanna [...] pur biasa Jesucristu de lade gueʼtuʼ» (1 Ped. 3:21). Ne dede dxi riuunisa tuuxa la? napa esperanza de guibani para siempre.

2. Casi ná 2 Timoteo 4:1, 2, ¿xi naquiiñeʼ gúninu para gacanenu binni gaca discípulo?

² Para gacanenu binni gaca discípulo, naquiiñeʼ gácanu «ti maestru ni nanna gusiidiʼ» (biindaʼ 2 Timoteo 4:1, 2). ¿Xiñee yaʼ? Purtiʼ Jesús guníʼ «laché», «lagacané binni [...] gaca discípulo stinneʼ» ne «lacuunisa laacaʼ». Gudxi apóstol Pablo Timoteo cadi gusaana de guni dxiiñaʼ riʼ ne laacaʼ gúdxibe laa: «Purtiʼ ra gúniluʼ ni zalaluʼ ne zulaluʼ ca ni gucaadiaga lii». Laaca bidiibe conseju riʼ laa: «Guyuu cuidadu [...] ximodo cusiidiluʼ» (1 Tim. 4:16). Cumu naquiiñeʼ gusíʼdinu binni para gaca discípulo stiʼ Cristu la? naquiiñeʼ gúninu ni galán.

3. ¿Xi zadúʼyanu lu artículo riʼ?

³ Guiráʼ semana rusíʼdinu millón binni ca ni dxandíʼ rusiidiʼ Biblia. Peru casi bidúʼyanu lu artículo ni gudiʼdiʼ que, racaláʼdxinu gánnanu ximodo gacanenu jma binni  para guni progresar ne chúʼnisa. Lu artículo riʼ zadúʼyanu gaayuʼ cosa ni naquiiñeʼ guni ca maestru para gacanecaʼ estudiante sticaʼ chúʼnisa.

4. ¿Xiñee naquiiñeʼ gucueeza ti maestru laca laa ora maʼ cudii estudiu? (Biiyaʼ nota ni zeeda ñee yaza).

⁴ Guiranu riuuláʼdxinu gusíʼdinu ni ná Stiidxaʼ Dios. Nga runi zándaca qué riaanadxinu de guininu de laani. Peru ora guni conducirnu estudiu stiʼ Torre stiʼ ni rapa, gutíʼdinu reunión ra riuundaʼ Biblia ne ora gudiʼnu estudiu, cadi naquiiñeʼ guininu stale. Gudiʼnu lugar gusiidiʼ Biblia. Para nga la? naquiiñeʼ gucueeza maestru ca laca laa ne cadi gacalaʼdxiʼ gusiene guiráʼ ni nanna de tema o versículo ca (Juan 16:12). * Guníʼ ique pabiáʼ nánnaluʼ de Biblia yanna ne pabiáʼ nánnaluʼ dxi guyuunísaluʼ. Zándaca caadxi si cosa de lu Biblia nánnaluʼ dxiqué (Heb. 6:1). Pa gudiʼdiʼ stale iza para biziidiluʼ ca ni nánnaluʼ yanna, cadi gacaláʼdxiluʼ gusiidiluʼ guiráʼ ni nánnaluʼ estudiante stiluʼ de jalón.

5. a) Casi ná 1 Tesalonicenses 2:13, ¿xi racaláʼdxinu guiene estudiante stinu? b) ¿Xi zanda gúninu para guiníʼ estudiante stinu de ni caziidiʼ?

⁵ Racaláʼdxinu guiene estudiante stinu lu Stiidxaʼ Dios nga zeeda guiráʼ ni caziidiʼ (biindaʼ 1 Tesalonicenses 2:13). Para ganda gúninu ni, guinábanu laabe guiniʼbe de ni caziidibe. Lugar de gusiénenu laabe guiráʼ ca textu stiʼ Biblia, guinábanu laabe gusiénebe caadxi de laacani. Gacanenu laabe para gánnabe ximodo zanda gúnibe ni caziidibe lu xquendanabánibe. Guinabadiidxanu laabe para gánnanu xi riníʼ íquebe de ca textu stiʼ Biblia ni gúʼndabe (Luc. 10:25-28). Ca ndiʼ nga ni zanda guinabadiidxanu laabe: «¿Xi cualidad stiʼ Jehová bíʼyaluʼ ora bíʼndaluʼ versículo riʼ?», «¿Ximodo zanda gacané versículo riʼ lii?», «¿Ximodo runi sentirluʼ pur ni biziidiluʼ?» (Prov. 20:5). Galán nga guiziidibe stale cosa, peru ni jma galán nga gannaxhiibe ni caziidibe ne gúnibe ni lu xquendanabánibe.

6. ¿Xiñee galán guni invitarnu ca publicador ni napa experiencia ora maʼ chigudiʼnu estudiu?

⁶ ¿Ñee runi invitarnu ca publicador ni napa experiencia ora maʼ chigudiʼnu estudiu la? Pa rúninu ni, zanda guinabadiidxanu laabe ximodo biiyabe modo biʼniʼ  conducirnu estudiu ca ne gábibe laanu pa bidiʼnu lugar gusiidiʼ Biblia estudiante stinu. Para gácanu ti maestru ni nanna gusiidiʼ la? caquiiñeʼ gácanu humilde (bichaaga ni né Hechos 18:24-26). Laaca zanda guinabadiidxanu laabe pa bidiibe cuenta cayene estudiante ca ni caziidiʼ. Pa chiguireʼnu chupa chonna semana, zanda guinábanu laabe chigánnabe estudiante stinu. Zacá qué zusaana estudiante ca de guiziidiʼ ne zuuyaʼ pabiáʼ risaca ni. Qué chuʼ dxi guiníʼ íquenu stinu estudiante ca ne guirutiʼ ruʼ zanda gacané laabe. Purtiʼ ni racaláʼdxinu nga guiziidiʼ estudiante stinu ne cadi gucueeza gastiʼ laa para guni progresar.

7. ¿Xi naquiiñeʼ gúninu para chuulaʼdxiʼ estudiante stinu ni caziidiʼ?

⁷ Nabé risaca guʼyaʼ estudiante stinu riuuláʼdxinu ne runi crenu ni rusíʼdinu de Biblia (1 Tes. 1:5). Zacá jma ziuuláʼdxibe ni caziidibe. Zanda gábinu laabe ximodo huayacané ca principiu ni zeeda lu Biblia laanu. Ndiʼ zacané laabe gudiibe cuenta laaca zanda gacanécani laabe.

8. ¿Xi zanda gúninu para chuulaʼdxiʼ estudiante stinu guni estudiar, ne xiñee?

⁸ Ora maʼ cudiʼnu estudiu, güínenu estudiante stinu experiencia stiʼ ca hermanu ni gudiʼdiʼ lu ca guendanagana ni cadíʼdibe. ¿Ñee zanda gacané ejemplu stiʼ ti hermanu ni nuu ndaaniʼ congregación stinu laabe la? Pa zacá ni, guni invitarnu hermanu ca ora chigudiʼnu estudiu. Laaca zanda güínenu laabe experiencia ni zeeda lu serie ni láʼ «Gucané Biblia laacabe para bichaacabe» ni nuu lu jw.org. * Zacané ca tema ne ca videu ca laabe gudiibe cuenta zanda gacané ca principiu ni zeeda lu Biblia laabe.

9. ¿Xi zanda gúninu para gacanenu estudiante stinu guiniʼné familia stiʼ ne ca xhamigu de ni caziidiʼ?

⁹ Pa cudiʼnu estudiu ti gunaa ni maʼ bichaganáʼ ne cadi cayuni estudiar xheelaʼ, ¿xiñee qué guni invitarnu xheelabe ora guni estudiárnenu laabe yaʼ? Gábinu estudiante stinu guiniʼné familia stiʼ ne ca xhamigu de ni caziidiʼ (Juan 1:40-45). Zanda gábinu laabe: «¿Ximodo nusiéneluʼ ndiʼ familia stiluʼ?», o «¿Xi textu niquiiñeluʼ para nusiéneluʼ ndiʼ ti xhamíguluʼ?».  Ndiʼ nga ti modo zanda gacanenu estudiante stinu para gaca ti maestru. Ne ora maʼ guni cumplirbe né ca requisitu para gácabe ti publicador ni caʼruʼ chúʼnisa la? maʼ zanda guni predicarbe né ca hermanu de congregación. Zanda guinabadiidxanu laabe pa runibiaʼbe tuuxa ni racalaʼdxiʼ guiziidiʼ de Biblia. Pa gábibe laanu nuu tuuxa la? guyúbinu binni ca nagueenda ne gábinu laa pa zacaa ti estudiu. Guluinu laabe videu ni láʼ Ximodo ridúʼndanedu binni Biblia. *

10. ¿Ximodo zanda chinanda ti maestru ejemplu stiʼ Pablo ni zeeda lu 1 Tesalonicenses 2:7, 8?

¹⁰ Naquiiñeʼ guizaalaʼdxiʼ ca maestru estudiante sticaʼ. Naquiiñeʼ gúʼyacabe laacaʼ casi ca hermanu stícabe (biindaʼ 1 Tesalonicenses 2:7, 8). Raca nagana para laacaʼ gusaanacaʼ ca xhamígucaʼ ni gúpacaʼ ne guchaacaʼ modo nabánicaʼ para gúnicaʼ ni ná Jehová. Nga runi, gacanenu ca estudiante stinu guidxélacaʼ xhamígucaʼ ndaaniʼ congregación. Pa cueenu tiempu para guidxaaganu laacabe cadi ora si maʼ cudiʼnu estudiu laacabe la? zusihuínninu xhamígunu laacabe. Zusihuínninu rizaaláʼdxinu ca estudiante stinu pa guinínenu laacaʼ, guséʼndanu ti mensaje ra nuucaʼ o chigánnanu laacaʼ gatigá.

11. ¿Xi racaláʼdxinu guidxela ca estudiante stinu ndaaniʼ congregación, ne xiñee?

¹¹ Ti proverbio africano ná: «Caquiiñeʼ gacané ti guidxi para guiniisi ti xcuidi». Ngaca nga ni naquiiñeʼ gaca né ti binni ni cacaa estudiu: «Caquiiñeʼ gacané guidubi congregación para gácabe ti discípulo stiʼ Cristu». Nga runi, runi presentar ca maestru estudiante sticaʼ ca hermanu de congregación ni zanda gacané laacaʼ. Zacá zanda gacané ca hermanu riʼ laacabe chúʼcabe jma gaxha de Jehová ne gacanecaʼ laacabe ora gápacabe guendanagana. Racaláʼdxinu gacanenu cada estudiante guni sentir risaca ndaaniʼ congregación ne naca parte de familia stiʼ Dios. Pa gacanenu laabe chuʼbe gaxha de ca hermanu la? qué zaca nagana para laabe gusaana de gaca xhamígube ca binni ni qué racané laabe gannaxhiibe Jehová (Prov. 13:20). Pa gusaana ca xhamígube laabe, ca ni qué runi ni ná Jehová, zudiibe cuenta ndaaniʼ xquidxi Dios nga zanda guidxélabe xhamígube ni gacané laabe (Mar. 10:29, 30; 1 Ped. 4:4).

12. ¿Xiñee naquiiñeʼ guinínenu estudiante stinu de dedicación ne guendariuunisa?

¹² Guinínenu estudiante stinu de dedicación ne guendariuunisa sin guidxíbinu. ¿Xiñee yaʼ? Purtiʼ ni racaláʼdxinu nga gacanenu estudiante stinu chúʼnisa ne guni ni ná Jehová. Pa maʼ zinebe chupa chonna beeu de cayuni estudiarbe ne pa maʼ riebe reunión, naquiiñeʼ gánnabe cudiʼnu estudiu laabe purtiʼ racaláʼdxinu gacanenu laabe gácabe testigu stiʼ Jehová.

13. ¿Xi guiráʼ naquiiñeʼ guni ti estudiante para chúʼnisa?

¹³ Ti estudiante ni runi stipa guni ni ná Biblia runi caadxi cosa para chúʼnisa. Primeru runibiaʼbe ne rannaxhiibe Jehová, ne laaca rápabe fe (Juan 3:16; 17:3). Despué, rácabe xhamigu Dios ne ca hermanu de congregación (Heb. 10:24, 25; Sant. 4:8). Ra tidiʼ tiempu, rusaana de gúnibe cosa malu ne raca arrepentirbe de ca pecadu stibe (Hech. 3:19). Ne fe ni nápabe Dios, rucaani laabe guiníʼnebe xcaadxi binni de ca ni dxandíʼ rusiidiʼ Biblia (2 Cor. 4:13). Últimu la? raca dedicarbe Jehová ne rusihuínnibe ni ora riuunísabe (1 Ped. 3:21; 4:2). Guiráʼ hermanu riecheʼ dxi chuʼnísabe. Nga runi, ora gudiʼnu cuenta cayuni estudiante stinu stipa para chúʼnisa la? guni felicitarnu laa ne cuʼnu gana laa cadi gusaana de guni progresar.

14. ¿Ximodo zanda ganna ti maestru pabiáʼ cayuni progresar estudiante stiʼ?

¹⁴ Naquiiñeʼ gápanu paciencia para gacanenu estudiante stinu gaca dedicar ne chúʼnisa. Peru zedandá hora naquiiñeʼ guidúʼyanu pa racaláʼdxibe gúnibe ni ná Jehová o coʼ. ¿Ñee rúnibe stipa gúnibe ni ná ca mandatu ni bidii Jesús la? ¿O runi estudiarbe purtiʼ si nuube gánnabe caadxi cosa de Biblia?

15. ¿Gunáʼ nga caadxi cosa ni rusihuinni cayuni progresar estudiante stinu?

¹⁵ Gatigá guidúʼyanu pabiáʼ ziyuni progresar estudiante stinu. Guzéʼtenu caadxi ejemplu, ¿ñee riniʼbe xi runi sentirbe pur Jehová la? ¿Runi orarbe la? (Sal. 116:1, 2). ¿Ñee riuuláʼdxibe gúʼndabe Biblia la? (Sal. 119:97). ¿Riebe guiráʼ  reunión la? (Sal. 22:22). ¿Ñee cuchaabe modo nabánibe la? (Sal. 119:112). ¿Maʼ riníʼnebe familia stibe ne ca xhamígube de ni caziidibe la? (Sal. 9:1). Ne ni jma risaca, ¿ñee racaláʼdxibe gácabe testigu stiʼ Jehová la? (Sal. 40:8). Pa cadi cayúnibe nin tobi de ca ni bizéʼtenu riʼ, guidúʼyanu xiñee cadi cayúnibe ni ne despué guinínenu laabe né diidxaʼ nadóʼ de laani. *

16. ¿Pora nga zanda gusaana de gudiʼnu estudiu tuuxa?

¹⁶ Sti cosa ni naquiiñeʼ gúninu gatigá nga guidúʼyanu pa caquiiñeruʼ gudiʼnu estudiu tuuxa binni. Guníʼ ique ndiʼ: «¿Ñee raca prepararbe ora chigudiʼnu estudiu laabe la? ¿Ñee rusihuínnibe nápabe gana chebe reunión la? ¿Ñee maʼ cadi cayúnibe cosa malu la? ¿Ñee maʼ bireebe de religión ni cadi dxandíʼ la?». Pa cadi cayúnibe ca ni bizéʼtenu riʼ ne gudíʼrunu estudiu laabe zeeda gácani casi ora nusíʼdinu tuuxa xhuʼbaʼ pa qué naʼ chuʼ ndaaniʼ nisa. Pa cadi cusisácabe ni caziidibe ne cadi nuube dispuestu guchaabe, ¿xiñee gudíʼrunu estudiu laabe yaʼ?

17. Casi ná 1 Timoteo 4:16, ¿xi naquiiñeʼ guni ca maestru ni rudii estudiu?

¹⁷ Ti dxiiñaʼ nabé risaca nga gacanenu binni gaca discípulo stiʼ Cristu. Racaláʼdxinu gacanenu ca estudiante stinu chuʼnísacaʼ. Nga runi, zudiʼnu lugar gusiidiʼ Biblia laacabe ne zusihuínninu riuuláʼdxiluʼ ne runi crenu ni cusíʼdinu. Zacanenu estudiante stinu gaca xhamigu ca hermanu de congregación, siempre zusietenaláʼdxinu laabe quixhe íquebe gaca dedicarbe ne chuʼnísabe, ne gatigá zadúʼyanu pabiáʼ ziyuni progresarbe. (Biiyaʼ recuadru ni láʼ « Ni naquiiñeʼ guni ca maestru»). ¡Guizáʼ riéchenu gúninu ti dxiiñaʼ ni rulá binni! Nga runi, gúninu stipa para gacanenu ca estudiante stinu chuʼnísacaʼ.