Ra jma ziyuu publicador jma biquiiñeʼ publicación. Ndaaniʼ Betel stiʼ Brooklyn (Nueva York, Estados Unidos) raca revista, peru qué nusaana de niguixe ca hermanu que empresa para guni imprimir libru de pasta dura. Cumu qué ñápadu libru chupa chonna beeu ne maʼ huaxiéʼ biʼniʼ predicardu, ngue runi gunabadiidxaʼ hermanu Rutherford hermanu Robert Martin, encargadu stiʼ fábrica que, pa zanda gaca imprimir libru raqué.

Sicaríʼ guníʼ hermanu Martin: «Guizáʼ bichibi ngue laadu purtiʼ caquiiñeʼ gápadu ti fábrica ra gaca imprimir libru». Gudixe ca hermanu que parte de ti edificiu para gúnicaʼ dxiiñaʼ, riaana ni calle Concord, númeru 18, guidxi Brooklyn, ne raqué gúpacabe guiráʼ ni iquiiñecabe para gúnicabe dxiiñaʼ.

Cadi guiráʼ diʼ binni guyuulaʼdxiʼ ni cayúnicabe que. Gerente stiʼ ti empresa ni biʼniʼ imprimir ca libru stidu, yeganna fábrica nacubi que ne guníʼ: «Nápatu ti imprenta de ni jma galán, peru nin tobi de laatu qué ganna iquiiñeʼ ni. Ne raríʼ xhoopaʼ beeu maʼ guca feu ni».

Hermanu Martin guníʼ: «Ruluíʼ dxandíʼ ngue ni ná gerente que, peru qué gánnabe pa cayacané Señor laadu, laa siempre nuu gaxha de laadu». Dxandíʼ ngue ni ná hermanu Martin, qué nindaa maʼ cayuni imprimir imprenta nacubi que 2,000 libru ti dxi.

Qué ñuni imprimir si ca xpinni Jehová caadxi de ca libru sticaʼ, laaca bizulú biquiiñecabe sti método nacubi para guni predicárcabe ca noticia nacubi, laani nga pur radiu. Primé biaje guníʼ hermanu Rutherford lu radiu nga ti domingu huadxí, 26 de febrero iza 1922. Bitiidibe discursu ni láʼ «Millón binni ni nabani yanna maʼ qué záticaʼ» lu emisora  KOG ni nuu Los Ángeles (California, Estados Unidos).

Biaʼ 25,000 binni bicaadiaga programa que. Nuu de laacaʼ biseendacaʼ carta ra cudiicaʼ xquixe. Tobi de laacabe nga Willard Ashford, ni nabeza Santa Ana (California). Biʼniʼ felicitarbe hermanu Rutherford pur bitiidiʼ ti discursu ni guizáʼ guyuuláʼdxibe. Laabe guniʼbe: «Galán nga lu radiu bitiidicabe discursu stiluʼ, purtiʼ cumu napaʼ chonna binni huará ra lidxeʼ la? nga runi ñaca nagana para naa nigucaadiaʼgaʼ lii nécaxa nudiiluʼ ni gaxha de ra lidxeʼ».

Xcaadxi semana despué, gudiʼdiʼ ruʼ jma programa ni caníʼ de Biblia lu radiu. Ra ziluxe iza que, revista The Watch Tower bizeeteʼ biaʼ 300,000 binni maʼ bicaadiaga mensaje stiʼ Biblia lu radiu.

Cumu guizáʼ cayecheʼ Ca Binni Ruundaʼ Biblia purtiʼ stale binni cucaadiaga mensaje stiʼ Biblia lu radiu la? ngue runi gudixhe íquecaʼ gápacaʼ ti emisora de radiu lu ti terrenu sticaʼ ni nuu Staten Island, gaxha de Betel stiʼ Brooklyn. Caadxi iza despué, biquiiñeʼ Ca Binni Ruundaʼ Biblia emisora de radiu riʼ ni láʼ WBBR, para gucaadiaga jma binni mensaje stiʼ Reinu.

Lu revista The Watch Tower ni biree 15 de junio iza 1922 bizeeteʼ zaca ti asamblea Cedar Point (Ohio) 5 hasta 13 de septiembre iza 1922. Guizáʼ nayecheʼ zeʼ Ca Binni Ruundaʼ Biblia que asamblea ni guca Cedar Point.

Lu primé discursu stiʼ asamblea que, sicaríʼ guníʼ hermanu Rutherford: «Dxandíʼ peʼ runeʼ cré Señor [...] zaguu ndaayabe asamblea riʼ ne zacanebe gunadiaga binni de Dios casi qué huayuu dxi gácani lu Guidxilayú riʼ». Ne xcaadxi hermanu ni bidii discursu lu asamblea que, gatigá guluucaʼ gana ca hermanu guni predicarcaʼ.

Viernes 8 de septiembre que guyé biaʼ 8,000 binni ra auditorio que purtiʼ guizáʼ racaláʼdxicaʼ gucaadiágacaʼ discursu ni chigudii hermanu Rutherford. Cabézacaʼ gusiénebe xi riníʼ ca letra «ADV», ni cá lu ca invitación sticaʼ. Laga ziyuu ca hermanu que, stale de  laacaʼ biiyacaʼ ti lona naroʼbaʼ ni caʼruʼ guibiá, luguiáʼ de plataforma que. Arthur Claus, ti hombre ni zeeda de Tulsa (Oklahoma, Estados Unidos), biyubi ti lugar para gucaadiaga galán purtiʼ dxiqué qué riquiiñecabe micrófono nin bocina.

Para cadi gaca distraer ca hermanu ni maʼ nuu que la? guníʼ presidente stiʼ sesión que, ca binni ni chindá huadxí qué zanda chuʼcaʼ ndaaniʼ auditorio que ora cadiʼdiʼ ca discursu que. Las nueve y media siadóʼ, bizulú hermanu Rutherford discursu stiʼ ra guníʼ ca diidxaʼ ni bizeeteʼ Jesús ni zeeda lu Mateo 4:17: «Reinu ni nuu guibáʼ maʼ bidxiña» (VM, 1910). Ra bisiénebe ximodo zunadiaga binni mensaje stiʼ Reinu, bizeetebe: «Jesús peʼ bisiene, lu presencia stiʼ zandisaʼ ti cosecha ne laani nga ra gucaalisaa ca ni dxandíʼ naca xpínnibe».

Hermanu Claus, ni zuba ndaaniʼ auditorio que guníʼ: «Cucaadiaga chaahuidu guiráʼ ni caniʼbe». Peru málasi bizulú hermanu Claus biʼniʼ sentir mal ne gupa xidé biree de ndaaniʼ auditorio que. Bireebe neca qué nabe purtiʼ nánnabe maʼ qué zudiicabe lugar chuʼbe sti biaje.

Peru ratu si que, maʼ gudiʼdiʼ ni cayácabe que. Laabe guniʼbe laga zebe ndaaniʼ auditorio que binadiágabe guizáʼ reciu cagapanáʼ binni. Bisiecheʼ ngue laabe stale. Ne guníʼ íquebe pa caquiiñeʼ quíbabe luguiáʼ de auditorio que para gucaadiaga chaahuibe discursu que la? zúnibe ni. Tiempu que nápabe 23 iza ngue runi bidxélabe modo quíbabe. Zuxeleʼ ca ventana ni nuu luguiáʼ de auditorio que ne ra zidxíñabe gaxha de laacani, bidiibe cuenta jma zunadiágabe discursu que.

Peru cadi stubi Arthur nuu raqué. Laaca dxiʼbaʼ caadxi xhamígube raqué. Tobi de laacabe láʼ Frank Johnson bixooñeʼ ne gunabadiidxaʼ laabe: «¿Nápaluʼ ti navaja racá la?».

—Napaʼ—ná Arthur.

 —Para ná Fran—canábapedu lu oración gueeda ti binni ni napa ti navaja. ¿Cayuuyaluʼ lona ngola ni nuu racá ni caʼruʼ guibiá ca la? Ti letreru ni ne naaze chupa clavu ni. Bicaadiaga chaahuiʼ ni caníʼ juez ca. a Ora laabe guiniʼbe «laguiníʼ, laguiníʼ...», bichuuguʼ guidapaʼ doo ca.

Naaze Arthur navaja que ne cabeza ora guiníʼ hermanu Rutherford ca diidxaʼ que. Qué nindaa, guníʼ hermanu Rutherford ca diidxaʼ jma risaca lu discursu stiʼ. Reciu ne stale gana guniʼbe: «Lagaca fiel ne testigu ni dxandíʼ stiʼ Señor. Cadi guireetu gana laga cabézatu guinitilú Babilonia. Laguni predicar mensaje ca guiráʼ ladu. Naquiiñeʼ ganna guiráʼ binni Jehová nga Dios ne Jesucristu nga Rey stiʼ ca rey ne Señor stiʼ ca señor. Ndiʼ nga tiempu jma risaca. ¡Laguuyaʼ, Rey ca maʼ cayuni mandar! Laatu nga ca ni chigucheeche stiidxabe. Nga runi, laguiníʼ, laguiníʼ, laguiníʼ de Rey ne reinu stiʼ».

Arthur guníʼ laa ne xcaadxi hermanu que bichuugucaʼ ca doo que ne chaahuidugá bibiá lona que. Letreru que ná: «Laguiníʼ de Rey ne Reinu stiʼ». Guionnaʼ letra «ADV» laacani nga ca primé letra stiʼ diidxaʼ advertise, lu diidxaʼ inglés ne raca traducir ni «laguiníʼ».

Asamblea de Cedar Point que gucané ni ca hermanu guiníʼ íquecaʼ pabiáʼ risaca nga guni predicarcaʼ de Reinu ne nayecheʼ guyuu ca ni nuu dispuestu guni ni. Ti colportor (ni yanna runibiaʼnu casi precursor) de Oklahoma bicaa: «Biʼniʼ predicardu ti lugar ra nuu mina de carbón ne raqué nuu stale binni pobre». Laabe guniʼbe dede ruunaʼ ca binni que ora ruundacaʼ mensaje ni zeeda lu revista The Golden Age. Sicaríʼ guniʼbe: «Biéchedu purtiʼ gucanedu ca binni que gatadxí ladxidoʼcaʼ».

Biene Ca Binni Ruundaʼ Biblia pabiáʼ risaca nga ca diidxaʼ guníʼ Jesús ni zeeda lu Lucas 10:2: «Naroʼbaʼ cosecha riʼ, peru huaxiéʼ trabajador». Ra maʼ ziluxe iza que jma gucuá ique ca hermanu que guni predicarcaʼ mensaje stiʼ Reinu né stale gana.