1. ¿Ximodo ruuyaʼ binni guendabiaaniʼ ni dxandíʼ tiempu riʼ? (Proverbios 1:20, 21).

 DXIQUÉ ndaaniʼ stale guidxi, biaʼnu guidúʼyanu ca publicador cayuni predicarcaʼ ndaaniʼ ca calle stícani ne cudiicaʼ publicación binni ni cadiʼdiʼ raqué. ¿Ñee laaca huayuni predicarluʼ lu calle casi ca hermanu riʼ la? Pa huayúniluʼ ni, zándaca maʼ guníʼ íqueluʼ ejemplu ni zeeda lu libru stiʼ Proverbios, ra riete cucaa guendabiaaniʼ ca ridxi ndaaniʼ calle para gucaadiaga binni ca conseju stiʼ (biindaʼ Proverbios 1:20, 21). Lu Biblia ne lu ca publicación stinu ridxélanu «guendabiaaniʼ ni dxandíʼ», guendabiaaniʼ stiʼ Jehová. Nga peʼ nga ni caquiiñeʼ binni para guicaacaʼ guendanabani ni qué zaluxe. Riéchenu ora ricaa binni ca publicación stinu. Peru cadi guiráʼ diʼ tu runi ni. Nuu tu qué riná ganna xi rusiidiʼ Biblia. Xcaadxi la? ruxídxicaʼ laanu, riníʼ íquecaʼ maʼ gudiʼdiʼ Biblia ca de moda. Ne nuu tu laa riníʼ ique cadi jneza ni rusiidiʼ Biblia. Riniʼcaʼ mal de ca binni ni zinanda ni ná Biblia, riniʼcabe nácacaʼ binni naduxhuʼ ne ni runi criticar xcaadxi. Neca zacá, né guendarannaxhii cudii Jehová guendabiaaniʼ ni dxandíʼ guiráʼ tu gacalaʼdxiʼ guicaa ni. ¿Ximodo rúnibe ni yaʼ?

2. ¿Paraa zanda guidxélanu guendabiaaniʼ ni dxandíʼ tiempu riʼ, peru xii nga ni jma runi binni?

² Ti cosa ni runi Jehová nga riquiiñeʼ Stiidxaʼ, Biblia, para gucaadiaga binni guendabiaaniʼ ni dxandíʼ. Tiempu riʼ, maʼ stale binni zanda gapa libru riʼ. ¿Xi zanda guininu de ca publicación stinu ni zeeda de lu Biblia yaʼ? Pur ndaayaʼ stiʼ Jehová, maʼ nuu ca ni lu jma de ti mil idioma. Ca ni gucaadiaga, o ca ni guʼndaʼ Biblia ne ca publicación stinu, ne  gúnicaʼ ni caziidicaʼ, zabeenducaʼ ni galán. Peru stale binni qué riná gucaadiaga stiidxaʼ Jehová. Ne ora ricaacabe xiixa decisión, rúnicabe ni ná xpiaanisícabe o ni gabi xcaadxi binni laacabe. Zándaca dede rúnicabe menu laanu purtiʼ rúninu ni rusiidiʼ Biblia. Lu artículo riʼ zadúʼyanu xiñee riníʼ ique binni zacá. Peru primeru guidúʼyanu ximodo zanda gápanu guendabiaaniʼ ni zeeda de Jehová.

3. ¿Xi caquiiñeʼ gúninu para gácanu binni ni dxandíʼ nuu xpiaaniʼ?

³ Ti binni ni nuu xpiaaniʼ o napa guendabiaaniʼ, riquiiñeʼ guiráʼ ni nanna para guicaa decisión jneza. Peru naquiiñeʼ guni binni sti cosa para gapa guendabiaaniʼ ni dxandíʼ. Biblia ná: «Rapa binni guendabiaaniʼ ora ruzulú ridxibi Jehová, ne ora maʼ runibiaʼnu Santísimo nga maʼ nácanu tobi ni riene» (Prov. 9:10). Nga runi ora guicaanu xiixa decisión risaca, naquiiñeʼ chinándanu ni maʼ nánnanu de «Santísimo», laa ni nga modo riníʼ ique Jehová. Ne zanda gúninu ni ra guidúʼndanu Biblia ne ca publicación. Pa gúninu ni, zusihuínninu nácanu binni ni dxandíʼ nuu xpiaaniʼ (Prov. 2:5-7).

4. ¿Ximodo nánnanu ra nuu si Jehová nga cadá guendabiaaniʼ ni dxandíʼ?

⁴ Ra nuu si Jehová nga cadá guendabiaaniʼ ni dxandíʼ (Rom. 16:27). ¿Ximodo nánnanu ni yaʼ? Primé la? purtiʼ laabe bizaʼbe laanu, ne runibiaʼbe ca cosa ni bizaʼbe (Sal. 104:24). Guiropa, purtiʼ guiráʼ ni rúnibe rusihuínnini pabiáʼ nuu xpiaanibe (Rom. 11:33). Ne guionna, racané ca conseju stibe ca ni quixhe ique chinanda ca ni (Prov. 2:10-12). Pa racaláʼdxinu gápanu guendabiaaniʼ ni dxandíʼ, naquiiñeʼ guni crenu guionnaʼ cosa ni bizéʼtenu riʼ ne gudiʼnu lugar gacané ca ni laanu ora guicaanu xiixa decisión ne lu ca cosa ni gúninu.

5. ¿Ximodo nabani binni purtiʼ qué nacaʼ guni crecaʼ ra nuu Jehová nga cadá guendabiaaniʼ ni dxandíʼ?

⁵ Stale binni ni runi predicarnu riniʼcaʼ guizáʼ galán ca cosa ni nuu lu naturaleza, peru qué runi crecaʼ pa guyuu tu bizáʼ ca ni ne riniʼcaʼ guyuu ca ni pur evolución. Xcaadxi binni runi cré nuu Dios, peru riníʼ íquecaʼ maʼ gudiʼdiʼ de moda ni rusiidiʼ Biblia ne ribánicaʼ modo riuuláʼdxicaʼ. Peru ¿ñee jma galán nuu guidxilayú riʼ purtiʼ nabani binni modo riuulaʼdxiʼ ne cadi modo rusiidiʼ Dios la? ¿Ñee dxandíʼ nabánicabe nayecheʼ o runi crécabe nuu ti esperanza ni zazaaca lu ca dxi ni zeeda ca la? Nánnanu cadi zacá diʼ ni. Guiráʼ ni cadúʼyanu cazaaca yanna, racané ni laanu guni crenu ni ná ca diidxaʼ riʼ: «Neca nuu tu nanna stale ne riene stale, peru qué zanda iquiiñeʼ ni para gucaalú Jehová» (Prov. 21:30). Ndiʼ rucaa laanu cadi gusaana de guinábanu Jehová guendabiaaniʼ ni dxandíʼ. Triste guininu ni, peru stale binni qué runi ni. ¿Xiñee yaʼ?

6. Casi ná Proverbios 1:22-25, ¿tuu nga ca ni rusegudiaga ora rucaa guendabiaaniʼ ni dxandíʼ ca ridxi?

⁶ Stale binni rusegudiaga ora rucaa guendabiaaniʼ ni dxandíʼ ca «ridxi ndaaniʼ ca neza» ca. Biblia ná nuu chonna clase binni qué riná guicaa guendabiaaniʼ ni zeeda de Dios: «ca ni qué ganna gastiʼ», «ca ni runi burla» ne «ca ni nahuati» (biindaʼ Proverbios 1:22-25). Guidúʼyanu xiñee qué riná cada tobi de ca grupu de binni riʼ guicaacaʼ guendabiaaniʼ ni  zeeda de Dios ne xi caquiiñeʼ gúninu para cadi gácanu casi laacabe.

7. ¿Xiñee nuu binni ni laapecaʼ ruyúbicaʼ gácacaʼ binni «ni qué ganna gastiʼ»?

⁷ «Ca ni qué ganna gastiʼ» nga ca ni runi cré intiica ni gábicabe laa ne pur nga nagueenda riguite xcaadxi laa (Prov. 14:15). Stale biaje ridxélanu binni ni naca zacá ora maʼ ziguni predicarnu. Dxandíʼ, nuu millón de binni ni maʼ gudxite ca líder stiʼ ca religión o ca políticu laacaʼ. Nuu de laacabe ridxiichi ora gánnacaʼ ni. Peru ca binni ni riete lu Proverbios 1:22 laapecaʼ riuuláʼdxicaʼ chuʼcaʼ zacá (Jer. 5:31). Riuuláʼdxicabe gúnicabe ni racaláʼdxicabe ne qué ruyúbicabe guiziidicabe ni ná Biblia nin chinándacabe ca ley stini. Stale binni riníʼ ique casi ti gunaa ni napa religión de guidxi Quebec (Canadá), sicaríʼ gúdxibe ti Testigu ni yeganna laabe: «Pa cusiguii sacerdote stidu laadu la? laa nga napa donda ne cadi laadu». Qué racaláʼdxinu gácanu casi ca binni ni qué ganna gastiʼ (Prov. 1:32; 27:12).

8. ¿Xi racané laanu gácanu binni nuu xpiaaniʼ?

⁸ Nga runi caguu Biblia gana laanu cadi gácanu casi ca binni ni qué ganna gastiʼ, ne cudii ni conseju riʼ laanu: «Naquiiñeʼ guiníʼ íquetu casi riníʼ ique ti binni huaniisi» (1 Cor. 14:20). Rácanu ti binni nuu xpiaaniʼ pa chinándanu ca principiu ni zeeda lu Biblia lu xquendanabáninu. Chaahuiʼ chaahuiʼ zadúʼyanu ximodo racané ca principiu ca laanu guicaanu decisión jneza ne cadi chuʼnu lu guendanagana. Galán guiníʼ íqueluʼ pabiáʼ maʼ biʼniʼ progresarluʼ. Guzéʼtenu ti ejemplu, pa maʼ napa tiempu de cayuni estudiarluʼ Biblia ne rieluʼ ca reunión ca, peru caʼruʼ gaca dedicarluʼ Jehová ne caʼruʼ chuʼnísaluʼ, zanda guiníʼ íqueluʼ xiñee caʼruʼ gúniluʼ ni. O pa maʼ guyuunísaluʼ, ¿ñee jma jneza runi predicarluʼ ne rusiidiluʼ ca noticia galán la? ¿Rusihuinni ca decisión ni ricaaluʼ zinándaluʼ ca principiu ni zeeda lu Biblia la? ¿Runi tratarluʼ binni casi ñuni Jesús ni la? Pa guidúʼyanu caquiiñeʼ guni mejorarnu, guiníʼ íquenu ca ni rusietenalaʼdxiʼ Jehová laanu purtiʼ «riguucani xpiaaniʼ binni ni qué ganna» (Sal. 19:7).

9. ¿Ximodo rusihuinni ca binni ni runi burla rucaanacaʼ guendabiaaniʼ ni zeeda Dios?

⁹ Guiropa grupu binni ni qué riná guicaa guendabiaaniʼ ni zeeda de Dios nga «ca ni runi burla». Nuu biaje ridxélanu clase binni ca lu predicación. Riuuláʼdxicaʼ guni búrlacaʼ xcaadxi (Sal. 123:4). Biblia ná lu ca últimu dxi, ziuu stale binni ni zuni burla (2 Ped. 3:3, 4). Cásica guca ca xpigudxi Lot, tiempu riʼ nuu binni qué rulábicaʼ ca diidxaʼ riguixhená ni zeeda de Dios (Gén. 19:14). Stale de laacabe ruxídxicabe ca binni ni nabani modo rusiidiʼ Biblia. Ca binni ni runi burla «rúnicaʼ cosa ni qué rusisaca Dios» (Jud. 7, 17, 18). Biblia ruzeeteʼ modo naca ca binni ni runi burla, ¿cadi dxandíʼ laaca zacaca naca ca apóstata ne ca binni ni rudxiideche Jehová la?

10. Casi ná Salmo 1:1, ¿xi zanda gúninu para cadi gácanu casi ca binni ni runi burla?

¹⁰ ¿Xi zanda gúninu para cadi gácanu casi ca binni ni runi burla? Ni zanda gúninu nga cadi guidxaaganu binni ni raca quejar pur intiica si cosa (biindaʼ Salmo 1:1). Ndiʼ riníʼ cadi naquiiñeʼ gucaʼdiáganu nin guidúʼndanu xiixa ni zeeda de ca apóstata. Pa qué chuʼnu cuidadu zándaca guzulú gácanu binni ni runi criticar, guiníʼ íquenu cadi nadxii Jehová laanu o cadi jneza ca instrucción ni rudii organización stibe laanu. Para cadi gácanu casi ca binni ca, galán guinabadiidxanu: «¿Ñee maʼ biaaʼ guiniéʼ xiixa cosa ni cadi galán ora  gusiene xquidxi Dios laanu xiixa o gudiicaʼ laanu xiixa instrucción nacubi la? ¿Ñee ruyubeʼ puru si ra cuchee ca hermanu ni zániru la?». Pa zacá rúninu, nagueendaca gúninu stipa gusaananu ca cosa ca, ne ziechené Jehová laanu (Prov. 3:34, 35).

11. ¿Ximodo ruuyaʼ ca binni ni nahuati ca cosa ni rusiidiʼ Jehová ni zeeda lu Biblia?

¹¹ Guionna grupu binni ni qué riná guicaa guendabiaaniʼ ni zeeda de Dios nga «ca ni nahuati». Zacá riete lu Biblia naca ca binni ca, purtiʼ qué rinacaʼ chinándacaʼ ca ley stiʼ Dios, ne rúnicaʼ ni riníʼ íquecaʼ jneza (Prov. 12:15). Rudxiidéchecaʼ Jehová, ra cadá guendabiaaniʼ ni dxandíʼ (Sal. 53:1). Ora ridxélanu laacabe, stale biaje nabé nadipaʼ runi criticárcabe laanu purtiʼ rinándanu ni rusiidiʼ Biblia, ne qué zanda guyúbinu laacabe para gacanécabe laanu. Biblia ná: «Guendabiaaniʼ ni dxandíʼ cadi nuuni lu náʼ binni ni nahuati; qué zanda guiniʼbe gastiʼ ruaa puertaʼ guidxi» (Prov. 24:7). Ca binni nahuati qué zanda gudiicaʼ xiixa conseju galán. Nga runi caguixhená Jehová laanu guixélenu de ca binni ca (Prov. 14:7).

12. ¿Xi zacané laanu cadi gácanu casi ca binni ni nahuati?

¹² Maʼ gadxé laanu de ca binni ni nanalaʼdxiʼ ca conseju stiʼ Dios, purtiʼ laanu riuuláʼdxinu modo riníʼ ique Jehová ne nadxiinu ca ley stiʼ. Ne jma zannaxhiinu laabe ora guiníʼ íquenu xi ribeendunu pur ruzúʼbanu stiidxaʼ ne xi ribeendú ca ni qué runi ni. Guidúʼyanu xi guiráʼ guendanagana rapa ca binni ni runi guendahuati purtiʼ qué rinándacaʼ ca conseju stiʼ Jehová. Ne guidúʼyanu pabiáʼ galán nabáninu purtiʼ ruzúʼbanu stiidxaʼ Dios (Sal. 32:8, 10).

13. ¿Ñee runi obligar Jehová laanu chinándanu ca conseju stiʼ la?

¹³ Racalaʼdxiʼ Jehová guicaa guiráʼ binni guendabiaaniʼ ni zeeda de laa, peru qué runi obligarbe binni guni ni. Peru riniʼbe xi zazaaca ca binni ni qué chinanda ca conseju stibe (Prov. 1:29-32). Ca binni ni riguixhe ique cadi guzuubaʼ stiidxaʼ Jehová rápacaʼ guendanagana pur ni gúnicaʼ. Ra tidiʼ tiempu pur modo nabánicabe zápacabe stale guendanagana ne qué zabánicabe nayecheʼ, ne últimu la? zunitilú Jehová laacabe. Peru ca binni ni gucaadiaga ca conseju stiʼ Jehová ne chinándacaʼ ni, zaca cumplir promesa riʼ luguiacaʼ: «Ni gucaadiaga naa zabani galán, qué zadxibi purtiʼ caníʼ ique guizaaca xiixa desgracia» (Prov. 1:33).

14, 15. ¿Xi rusiidiʼ Proverbios 4:23 laanu?

¹⁴ Pa guibáninu modo rusiidiʼ Dios la? zacané ni laanu. Casi maʼ bidúʼyanu, cadi nagana para guidxela guiráʼ binni ca conseju stiʼ Jehová. Guzéʼtenu ti ejemplu, ca conseju ni zeeda lu libru stiʼ Proverbios huayacané ca ni binni dxiqué ne laaca  racané ca ni laanu tiempu riʼ pa chinándanu ca ni lu xquendanabáninu. Guidúʼyanu tapa de ca conseju ca.

¹⁵ Gápanu ladxidoʼno. Biblia ná: «De guiráʼ xixé cosa ni naquiiñeʼ gápaluʼ la? jma gupa chaahuiʼ ladxidoʼloʼ, purtiʼ de laani nga zeeda guendanabani» (Prov. 4:23). Para cadi gaca huará ladxidoʼno la? naquiiñeʼ guidoʼno guendaró ni gacané cuerpu stinu, gúninu ejerciciu ne cadi gápanu xiixa viciu. Zacagá nga naquiiñeʼ gúninu para gápanu ladxidoʼno ni riete lu libru stiʼ Proverbios. Guiráʼ dxi naquiiñeʼ guidúʼndanu Stiidxaʼ Dios. Laaca caquiiñeʼ gaca prepararnu para ca reunión, chuunu, guni comentarnu ne guireʼnu predicación. Ne guixélenu de ca cosa malu ni zanda guni biidiʼ xquendabiaaninu, casi entretenimientu inmoral ne cadi guidxaaganu binni ni qué runi ni ná Jehová.

16. ¿Xiñee guizáʼ racané conseju ni zeeda lu Proverbios 23:4, 5 laanu tiempu riʼ?

¹⁶ Chuʼnu nayecheʼ né biaʼ nápanu. Cudii Biblia conseju riʼ laanu: «Cadi guibániluʼ para si guyúbiluʼ cosa risaca. [...] Ora guyadxiluʼ ca ni, riniti ca ni, purtiʼ zaree xhiaa ca ni casi xhiaa bisiá ne maʼ zipapa ca ni guibáʼ» (Prov. 23:4, 5). Ca cosa material ca zanda gunítinu ca ni nagueenda. Neca zacá, ca binni ricu ne pobre ruyúbicaʼ gápacaʼ jma bueltu. Cumu nabé ricá íquecabe gápacabe jma la? rúnicabe intiica cosa neca guiníʼ binni mal de laacabe, guníticabe ca xhamígucabe o dede gaca huarácabe (Prov. 28:20; 1 Tim. 6:9, 10). Nga runi, guendabiaaniʼ ni dxandíʼ ca racané ni laanu para cadi guicá íquenu guyúbinu gápanu stale cosa risaca, sínuque chuʼnu nayecheʼ né biaʼ nápanu (Ecl. 7:12).

17. ¿Ximodo zanda guininu «diidxaʼ ni riníʼ ti binni nuu xpiaaniʼ» casi riete lu Proverbios 12:18?

¹⁷ Guiníʼ íquenu ante guininu. Pa qué chuʼnu cuidadu zanda guninanu tuuxa pur ni guininu. Biblia ná: «Zeeda gaca ca diidxaʼ ni riníʼ ti binni sin guiníʼ ique casi ora ridaabi ti espada, peru ca diidxaʼ ni riníʼ ti binni nuu xpiaaniʼ la? rusianda ni ra nuu ti herida» (Prov. 12:18). Pa cadi sanu guininu chisme de xcaadxi, ziuʼnu galán né ca hermanu (Prov. 20:19). Para guininu  diidxaʼ ni gacané xcaadxi ne cadi guninanu laacaʼ la? naquiiñeʼ guidúʼndanu ne guiníʼ íquenu lu Stiidxaʼ Dios (Luc. 6:45). Ora guiníʼ íquenu ca conseju ni zeeda lu Biblia zaguixhedxinu ladxidóʼ binni ne zaguʼnu gana laacaʼ pur ca diidxaʼ ni guininu (Prov. 18:4).

18. ¿Ximodo racané Proverbios 24:6 laanu guni predicarnu jma jneza?

¹⁸ Chinándanu ca instrucción ni rudii xquidxi Dios laanu. Biblia cudii conseju riʼ laanu: «Ora gúniluʼ guerra stiluʼ gucuaa ca conseju stiʼ binni nuu xpiaaniʼ; ora nuu stale tu cudii conseju raca ganar» (Prov. 24:6). Guiníʼ íquenu ximodo racané principiu riʼ laanu guni predicarnu ne gusíʼdinu jma jneza. Lugar de guni predicarnu modo rábinu la? chinándanu ca sugerencia ni ricaanu. Lu ca reunión ricaanu sugerencia galán, laaca rizíʼdinu stale de ca discursu ne ca demostración ni rutiidiʼ ca hermanu. Ne laaca napa organización stiʼ Jehová stale publicación ne videu ni racané binni guiene Biblia. ¿Ñee maʼ biziidiluʼ iquiiñeluʼ ca herramienta riʼ la?

19. ¿Xi riníʼ íqueluʼ de guendabiaaniʼ ni rudii Jehová laanu? (Proverbios 3:13-18).

¹⁹ (Biindaʼ Proverbios 3:13-18). ¡Guizáʼ riéchenu pur guiráʼ conseju galán ni zeeda lu Stiidxaʼ Dios! ¿Xi ñúninu pa qué ñuu ca ni yaʼ? Maʼ bidúʼyanu caadxi conseju ni zacané laanu ni riete lu libru stiʼ Proverbios. Laaca rudii Jehová laanu stale conseju lu xcaadxi libru ni zeeda lu Biblia. Quixhe íquenu guicaanu guendabiaaniʼ ni zeeda de Dios. Stale binni qué rusisaca guendabiaaniʼ ni zeeda de Dios, peru laanu nánnanu pa qué gundaʼnu ni zabáninu nayecheʼ.