1. ¿Xiñee caquiiñenu Dios para guibáninu nayecheʼ?

 ORA dxandíʼ nayecheʼ nabani ti binni cadi ti ratu si runi sentir zacá, zanda guibánibe nayecheʼ guidubi xquendanabánibe. Lu discursu ni bidii Jesús lu Sermón del Monte bizeeteʼ xi naquiiñeʼ gúninu para guibáninu nayecheʼ. Laabe guniʼbe: «Dichoso ca ni nanna caquiiñeʼ Dios» (Mat. 5:3). Nanna Jesús guyanu para chuuláʼdxinu gunibiaʼnu Jehová ne guni adorarnu laa. Laani nga cuzeeteʼ Biblia ora ná «ca ni nanna caquiiñeʼ Dios» o ca ni napa necesidad espiritual. Ne cumu Jehová nga «Dios ni nayecheʼ» la? laanu, ca ni rúninu ni nabe, laaca zanda guibáninu nayecheʼ (1 Tim. 1:11).

2, 3. a) ¿Turuʼ guníʼ Jesús zanda guibani nayecheʼ? b) ¿Xi zadúʼyanu lu artículo riʼ, ne xiñee caquiiñeʼ guininu de laani?

² ¿Ñee caquiiñeʼ guibáninu galán para chuʼnu nayecheʼ la? Coʼ. Lu Sermón del Monte, guníʼ Jesús ti cosa ni zándaca guidxagayaanu. Laabe guniʼbe «ca ni nuu triste» pur maʼ bichee o pur cadíʼdicaʼ lu xiixa guendanagana zanda guibánicaʼ nayecheʼ. Laaca guniʼbe «ca ni rizananda binni laacaʼ pur rúnicaʼ ni jneza» o ridindené binni laacaʼ pur nácacaʼ discípulo stibe laaca zanda guibánicaʼ nayecheʼ (Mat. 5:4, 10, 11). Peru ¿ximodo zanda guibáninu nayecheʼ neca cadídinu lu ca guendanagana riʼ yaʼ?

³ Qué nusiidiʼ diʼ Jesús zabáninu nayecheʼ ora maʼ qué gápanu guendanagana, sínuque pa gunibiaʼnu Dios ne guni adorarnu laa (Sant. 4:8). ¿Ximodo zanda gúninu ndiʼ yaʼ?  Lu artículo riʼ zadúʼyanu chonna cosa risaca ni zacané laanu dxandíʼ peʼ guibáninu nayecheʼ.

4. ¿Gunáʼ nga primé cosa ni naquiiñeʼ gúninu para guibáninu nayecheʼ? (Salmo 1:1-3).

⁴ PRIMÉ: Para chuʼnu nayecheʼ caquiiñeʼ guidoʼno guendaró espiritual. Para ganda guibani binni ne maniʼ naquiiñeʼ gocaʼ. Peru binni si zanda gó guendaró espiritual, ne caquiiñeʼ gúninu ni. Nga runi Jesús guníʼ: «Cadi de pan si nga guibani binni, sínuque de guiráʼ diidxaʼ ni guiree de ruaa Jehová» (Mat. 4:4). Nga runi cadi gudiʼnu lugar tidiʼ ti dxi sin guidúʼndanu Stiidxaʼ Dios. Ti salmista guníʼ: «Nayecheʼ nga riuu hombre ni [...] riuulaʼdxiʼ guʼndaʼ ley stiʼ Jehová, ne ruundaʼ ley stibe ridxíʼ ne huaxhinni» (biindaʼ Salmo 1:1-3).

5, 6. a) ¿Xi rizíʼdinu lu Biblia? b) Pa guidúʼndanu Biblia, ¿ximodo zacané ni laanu?

⁵ Cumu nadxii Jehová laanu la? nga runi cayábibe laanu lu Biblia xi naquiiñeʼ gúninu para guibáninu nayecheʼ. Guzéʼtenu ti ejemplu, rusiidibe laanu xiñee bizaʼbe laanu, ximodo zanda gaca xhamígunu laabe ne xi naquiiñeʼ gúninu para guni perdonarbe ca pecadu stinu. Laaca rusiidibe laanu zabáninu galán despué (Jer. 29:11). Ra guni estudiarnu Biblia ne gánnanu ni rusiidibe, ruchá típani ladxidoʼno de guendanayecheʼ.

⁶ Nánnanu lu Biblia zanda guidxélanu stale conseju ni zanda gacané laanu lu xquendanabáninu. Ora rinándanu ca ni, ribáninu nayecheʼ. Nga runi, pa maʼ  bidxáganu pur ca guendanagana ni nápanu, cueenu tiempu guidúʼndanu Stiidxaʼ Jehová ne guiníʼ íquenu lu ni guidúʼndanu. Jesús guníʼ: «¡Dichoso nga ca ni rucaadiaga stiidxaʼ Dios ne rúnicaʼ ni ná ni!» (Luc. 11:28).

7. ¿Ximodo jma jneza iquiiñenu tiempu ni maʼ guleenu para guidúʼndanu Stiidxaʼ Dios?

⁷ Ora ridúʼndanu Stiidxaʼ Dios, naquiiñeʼ cueenu tiempu para «guzuiinu» ni. ¿Ximodo zanda gúninu ni yaʼ? Guzéʼtenu ti ejemplu. Guiníʼ íquenu biʼniʼ invitar tuuxa laanu ti guendaró ni riuuláʼdxinu. Peru cumu nabé cayaca puranu o nápanu stale guendanagana, gubi gúbisinu guendaró que, ne maʼ qué nuzuiinu ni. Peru ora bilúxenu bidiʼnu cuenta mejor nidoʼno jma chaahuiʼ. Zacaca zanda guizaacanu ora guidúʼndanu Biblia. Zándaca guidúʼndanu ni nagueenda dede maʼ qué gudii tiempu laanu «guzuiinu» ni. Nga runi, cueenu tiempu para guiduʼndaʼ chaahuinu ne guxuíʼlunu xi guiráʼ cayaca lu relatu ni cadúʼndanu. Pa gúninu ca ni bizéʼtenu riʼ, zabáninu jma nayecheʼ.

8. ¿Ximodo cayuni «mozo ni nuu xpiaaniʼ ne ni runi jneza» dxiiñaʼ ni gucuaa? (Laaca zanda gúʼyaluʼ nota).

⁸ Maʼ bisaana Jesús «mozo ni nuu xpiaaniʼ ne ni runi jneza» para gudii laanu guendaró espiritual ora peʼ caquiiñenu ni (Mat. 24:45). b Biblia nga ni riquiiñeʼ mozo ni nuu xpiaaniʼ para guni guendaró espiritual (1 Tes. 2:13). Racané guendaró espiritual riʼ laanu gánnanu ximodo riníʼ ique Jehová, casi riete ni lu Biblia. Nga runi, ridúʼndanu revista Torre stiʼ ni rapa ne ¡Gutaná!, ne ca artículo ni nuu lu jw.org. Laaca raca prepararnu para ca reunión ni rápanu ndaaniʼ semana ne fin de semana, ne ridúʼyanu ca programa ni riree cada beeu lu JW Broadcasting^® lu idioma ni rininu. Pa guicaanu guiráʼ guendaró espiritual riʼ, zacané ni laanu ugaandanu guiropa cosa ni chiguidúʼyanu ni zacané laanu guibáninu nayecheʼ.

9. ¿Xii nga guiropa cosa ni caquiiñeʼ gúninu para guibáninu nayecheʼ?

⁹ GUIROPA: Para guibáninu nayecheʼ caquiiñeʼ chinándanu ca ley stiʼ Jehová. Sicaríʼ guníʼ ti hombre bicaa salmo: «Nayecheʼ ribani guiráʼ binni ni ridxibi Jehová, ni canazá lu ca neza stibe» (Sal. 128:1). Guidxíbinu Jehová riníʼ ni, guni respetarnu laa ne cadi gúninu xiixa cosa ni qué riuulaʼdxiʼ (Prov. 16:6). Nga runi, rúninu stipa chinándanu ca ley ni zeeda lu Biblia ni caníʼ xii nga ni jneza ne ni cadi jneza (2 Cor. 7:1). Pa gúninu ni riuulaʼdxiʼ Jehová ne cadi gúninu ca cosa ni nanaláʼdxibe, zabáninu nayecheʼ (Sal. 37:27; 97:10; Rom. 12:9).

10. Pa maʼ nánnanu xi riuulaʼdxiʼ Dios gúninu, ¿xiruʼ naquiiñeʼ gúninu? (Romanos 12:2).

¹⁰ (Biindaʼ Romanos 12:2). Zándaca nuu tuuxa nanna napa Jehová autoridad para quixheʼ xii nga ni jneza ne ni cadi jneza, peru cadi nga si nga laa ni, laaca naquiiñeʼ chinándabe ca ley stiʼ Dios. Quíxhenu ti ejemplu. Nuu binni nanna napa gobiernu derechu quixheʼ pabiáʼ naquiiñeʼ guxooñeʼ ti carru lu carretera, peru zándaca qué náʼ chinanda ca ley ca. Nga runi zándaca gusá reciu. Yanna laanu la? pur conducta stinu zusihuínninu pa dxandíʼ runi crenu zabáninu jma galán pa chinándanu ca ley stiʼ Jehová (Prov. 12:28). Biʼniʼ cré David zacá ni, purtiʼ gúdxibe Jehová: «Ruluiʼluʼ naa neza stiʼ guendanabani.  Nuu stale guendanayecheʼ neza luluʼ; ladu derechu stiluʼ qué rirá guendanayecheʼ» (Sal. 16:11).

11, 12. a) ¿Xidé naquiiñeʼ gápanu cuidadu ora nuunu xizaa o nuunu triste? b) ¿Ximodo racané ni zeeda lu Filipenses 4:8 laanu ora cuinu cosa para gaca divertirnu?

¹¹ Ora nuunu xizaa o nuunu triste, zándaca guyúbinu gúninu xiixa cosa ni zacané laanu gusiáʼndanu ca guendanagana ni nápanu ne cadi malu diʼ ni. Peru naquiiñeʼ gápanu cuidadu cadi gúninu xiixa cosa ni nanalaʼdxiʼ Jehová (Efes. 5:10-12, 15-17).

¹² Lu carta ni bicaa apóstol Pablo ra nuu ca xpinni Cristu de Filipos, gúdxibe laacaʼ guiníʼ íquecaʼ cosa ni jneza, ni nayá, ni galán ne ni gucaa stobi gannaxhii binni (biindaʼ Filipenses 4:8). Neca cadi caníʼ Pablo xi peʼ nga cosa ni caquiiñeʼ gúninu para gaca divertirnu, peru ca diidxaʼ ni guniʼbe zacané ca ni laanu ora maʼ cabinu xiixa cosa para gaca divertirnu. ¿Xiñee qué gúninu ndiʼ? Ra zeeda diidxaʼ «cosa» lu versículo riʼ, guchaʼnu ni pur «canción», «película», «libru» o «videojuegu». Ndiʼ zacané laanu gánnanu xii nga ca cosa ni riuulaʼdxiʼ Dios ne xii nga ca cosa ni qué riuuláʼdxibe. Racaláʼdxinu guibáninu modo ná ca ley stiʼ Jehová (Sal. 119:1-3). Zacá, zápanu ti conciencia nayá ne zacané ni laanu ugaandanu guionna cosa ni zacané laanu guibáninu nayecheʼ (Hech. 23:1).

13. ¿Gunáʼ nga guionna cosa ni zacané laanu guibáninu nayecheʼ? (Juan 4:23, 24).

¹³ GUIONNA: Ni jma guisaca para laanu nga guni adorarnu Jehová primé lu xquendanabáninu. Cumu Jehová nga bizáʼ laanu la? laasibe nga naquiiñeʼ guni adorarnu (Apoc. 4:11; 14:6, 7). Nga runi ni jma risaca para laanu nga guni adorarnu laabe modo racaláʼdxibe, «né espíritu ne ni dxandíʼ» (biindaʼ Juan 4:23, 24). Ruyúbinu gacané espíritu santu stiʼ Dios laanu para guni adorarnu laabe modo rusiidiʼ Biblia. Ni jma guisaca para laanu nga gúninu xhiiñaʼ Dios neca nabézanu ti lugar ra rucueeza gobiernu dxiiñaʼ stinu. Tiempu riʼ, jma de ti gayuaa hermanu ne hermana nuucaʼ cárcel pur nácacaʼ testigu stiʼ Jehová. c Neca zacá, riuucabe nayecheʼ purtiʼ rúnicabe biaʼ randa para guni orárcabe, guni estudiárcabe ne guiniʼnécabe xcaadxi de Dios ne de Reinu stiʼ. Neca guiníʼ binni mal de laanu o sanándacaʼ laanu, riuʼnu nayecheʼ purtiʼ nánnanu nuu Jehová gaxha de laanu ne zaguu ndaayaʼ laanu (Sant. 1:12; 1 Ped. 4:14).

14. ¿Xi bizaaca ti hermanu joven de Tayikistán, ne xiñee?

¹⁴ Nuu experiencia stiʼ hermanu ne hermana ni rusihuinni pa gúninu guionnaʼ cosa ni bizéʼtenu riʼ, zanda guibáninu nayecheʼ neca cadxaagalunu guendanagana. Guidúʼyanu ni bizaaca Yovidón Boboyónov, ti hermanu joven de 19 iza de Tayikistán. Pur qué ninabe ñúnibe serviciu militar, 4 de octubre iza 2019 yendeecabe laabe ra lídxibe ne yenécabe laabe cárcel. Biseguyoocabe laabe chupa chonna beeu ne gúpacabe laabe casi ti binni malu. Ca mediu de comunicación stiʼ stale guidxi guniʼcaʼ cadi jneza ni cayúnicabe laabe. Gunna ca mediu que gudíñecabe laabe para gúnibe ti juramentu militar ne gácube ti uniforme sticaʼ. Despué de ngue guníʼcabe nácabe culpable ne biseendacabe laabe ti lugar ra raca dxiiñaʼ nadipaʼ. Ne  despué, biʼniʼ perdonar presidente stiʼ guidxi que laabe ne biʼniʼ mandar cueecabe laabe. Tiempu gudiʼdiʼ Yovidón prueba riʼ, qué nusaanabe Jehová ne guyuube nayecheʼ. ¿Xi gucané laabe yaʼ? Gúnnabe caquiiñeʼ gúnibe cosa ni gacané laabe chuʼbe gaxha de Dios.

15. ¿Xi biʼniʼ Yovidón para gucuaa guendaró espiritual dxi nuu ndaaniʼ cárcel?

¹⁵ Dxi nuu Yovidón ndaaniʼ cárcel, neca que gápabe Biblia ne ca publicación, qué nusaana de nicaabe guendaró espiritual. ¿Ximodo gucuaabe ni yaʼ? Ora riné ca hermanu que ni gobe, rucaacaʼ textu stiʼ dxi lu bolsa guendaró stibe. Zaqué nga ruundaʼ Yovidón Biblia ne runi meditar guiráʼ dxi. Dxi bireebe de ndaaniʼ cárcel, bidiibe conseju riʼ ca ni caʼruʼ tidiʼ lu prueba nagana: «Yanna laga nápatu libertad, laguni biaʼ gándatiʼ para guidxíñatu gaxha de Jehová. Ne para ganda gúnitu ni la? naquiiñeʼ gúʼndatu Biblia ne ca publicación».

16. ¿Xii nga ni jma gucuá ique hermanu Yovidón guni?

¹⁶ Hermanu Yovidón yenanda ca ley stiʼ Jehová. Lugar de nicá íquebe ñúnibe cosa malu, jma gucuá íquebe gúnibe ni ná Jehová purtiʼ ngue nga ni jma risaca para laabe. Guleebe tiempu para guiníʼ íquebe ca cosa galán ni bizáʼ Dios. Guiráʼ siadóʼ  ora guibánibe, runadiágabe maʼ cayuundaʼ ca pajaruhuiiniʼ, ne huaxhinni ruuyabe beeu ne ca beleguí. Laabe guniʼbe: «Ca cosa ni bizáʼ Jehová riʼ rusiecheʼ ca ni naa ne runeʼ sentir galán ora ruuyaʼ ca ni». Ora rusisácanu ca cosa ni rudii Jehová laanu para guibáninu ne para chuʼnu gaxha de laa, riuʼnu nayecheʼ ne rudii ni stipa laanu para guni huantarnu ca guendanagana nápanu.

17. ¿Ximodo zanda gacané 1 Pedro 1:6, 7 tuuxa ni cadiʼdiʼ lu guendanagana casi ni gudiʼdiʼ Yovidón?

¹⁷ Laaca gucuá ique Yovidón guni adorar Jehová primé lu xquendanabani. Nánnabe nabé risaca cadi gucheenebe Dios. Jesús guníʼ: «Biʼniʼ adorar Jehová Dios stiluʼ ne laasibe nga naquiiñeʼ gúniluʼ ni ná» (Luc. 4:8). Gucalaʼdxiʼ ca comandante ne ca soldadu que niníʼ Yovidón maʼ qué racalaʼdxiʼ gaca testigu stiʼ Jehová. Peru runi orarbe Jehová ridxí ne huaxhinni ne rinábabe laa gacané laabe guni huantarbe ne cadi gucheenebe laa. Neca bíʼnicabe Yovidón stale cosa ni cadi jneza, peru qué nucheenebe Jehová. Yanna nuube nayecheʼ purtiʼ bidiibe cuenta gucané prueba que laabe gaca fe stibe jma naguidxi (biindaʼ 1 Pedro 1:6, 7).

18. ¿Xi zanda gúninu para cadi gusaana de guibáninu nayecheʼ?

¹⁸ Nanna Jehová xi caquiiñeʼ binni para guibani nayecheʼ. Pa gúninu guionnaʼ cosa ni bizéʼtenu lu artículo riʼ, qué zusaana de chuʼnu nayecheʼ neca gápanu guendanagana. Ne laaca zanda guininu: «¡Nayecheʼ nga guidxi ni napa Jehová casi Dios stiʼ!» (Sal. 144:15).