1. ¿Xi esperanza cudii Jehová laanu?

 TI ESPERANZA sicarú maʼ bidii Jehová laanu nga guibáninu sin qué chuʼ dxi gátinu. Caadxi xpinni Jehová nápacaʼ esperanza guibánicaʼ sin qué chuʼ dxi gáticaʼ guibáʼ né ti cuerpu de espíritu (1 Cor. 15:50, 53). Peru jma stale binni cabeza guibani lu Guidxilayú riʼ sin qué chuʼ dxi gatiʼ, guibánicaʼ nayecheʼ ne cadi gaca huaracaʼ (Apoc. 21:3, 4). Pa esperanza stinu nga guibáninu guibáʼ o lu Guidxilayú, guiranu rusisácanu esperanza stinu.

2. ¿Padé zeeda esperanza stinu, ne xiñee?

² Ora cusiene Biblia de esperanza, rucaa ni laanu guiníʼ íquenu zazaaca cosa galán. Nanna dxíchinu zaca cumplir esperanza ni nápanu purtiʼ Jehová nga cudii ni laanu (Rom. 15:13). Runibiaʼnu ca promesa stibe ne nánnanu runi cumplirbe ca ni (Núm. 23:19). Dxandíʼ peʼ runi crenu zanda guni Jehová guiráʼ ni maʼ guníʼ ne racalaʼdxiʼ guni ni. Nga runi, esperanza stinu cadi ti bacaandaʼ ni o cadi ti cosa si ni racaláʼdxinu guizaaca nga laani, sínuque nápanu prueba dxandíʼ zazaaca ni.

3. ¿Xi zadúʼyanu lu artículo riʼ? (Salmo 27:14).

³ Nadxii Bixhózenu ni nuu guibáʼ laanu ne racalaʼdxiʼ gápanu confianza laa (biindaʼ Salmo 27:14). Pa naguidxi esperanza ni nápanu Jehová, zanda guni huantarnu ca guendanagana ni tídinu, gácanu nadxibalú ne guibáninu nayecheʼ. Lu artículo riʼ zadúʼyanu ximodo rapa esperanza stinu laanu. Primeru guidúʼyanu xiñee zanda guininu zeeda gaca esperanza stinu casi ti ancla ne ti cascu. Ne despué zadúʼyanu ximodo zanda guquídxinu esperanza ca.

4. ¿Xiñee zeeda gaca esperanza stinu casi ti ancla? (Hebreos 6:19).

⁴ Lu Carta para ca Hebreos, bichaaga apóstol Pablo esperanza stinu casi ti ancla (biindaʼ Hebreos 6:19). Nabé biʼniʼ viajar Pablo lu nisadóʼ, ngue runi nánnabe riquiiñeʼ barcu ti ancla para cadi cheni ladu tiica. Ti dxi, laga zebe lu barcu málasi bizulú ti tormenta naroʼbaʼ. Ne biiyabe ximodo bisaba ca marineru ca ancla que ndaaniʼ nisadóʼ para cadi guidxelasaa barcu que guié (Hech. 27:29, 39-41). Cásica racané ancla ti barcu para cadi cheʼ ladu tiica si, zacaca racané esperanza stinu laanu para cadi guixélenu de Jehová ora tídinu lu guendanagana ni zeeda gaca casi ti tormenta. Pa dxandíʼ runi crenu maʼ cadi candaa zabáninu galán la? zacané ni laanu gudxíʼlunu ca guendanagana ni nápanu. Cadi guiaandaʼ laanu guníʼ Jesús zazananda binni laanu (Juan 15:20). Ra guiníʼ íquenu guiráʼ ni cayuni prometer Jehová gudii laanu, racané ni laanu cadi guiréʼchunu de lu neza stiʼ.

5. ¿Ximodo gucané esperanza stiʼ Jesús laa dxi mayaca gatiʼ?

⁵ Guidúʼyanu ximodo gucané esperanza ca Jesús para cadi gucheené Dios neca nanna nabé feu modo chigati. Lu Pentecostés stiʼ iza 33, guníʼ apóstol Pedro ti profecía ni zeeda lu Salmos ni rusihuinni pabiáʼ nuudxí Jesús ne napa confianza Dios ca dxi ante gatiʼ. Ndiʼ nga profecía bizeeteʼ Pedro: «Ne zapaʼ confianza lii lu xquendanabaneʼ, purtiʼ qué zusaanaluʼ naa ndaaniʼ Baʼ, ne qué zudiiluʼ lugar guiuʼdxuʼ cuerpu stiʼ siervu stiluʼ ni qué rusaana lii. [...] Ne zuchá típaluʼ ladxiduáʼ de guendanayecheʼ ora maʼ nuaaʼ nezaluluʼ» (Hech. 2:25-28; Sal. 16:8-11). Neca nanna Jesús zati, dxandíʼ peʼ biʼniʼ cré zandisaʼ Bixhoze laa de lade gueʼtuʼ ne zabiguetaʼ guibáʼ ra nuu Bixhoze (Heb. 12:2, 3).

6. ¿Xi guníʼ ti hermanu de esperanza ni napa?

⁶ Esperanza ni napa ca xpinni Cristu huayacané ni laacaʼ guni huantarcaʼ ca guendanagana sticaʼ. Guidúʼyanu ni bizaaca Leonard Chinn, ti hermanu ni guleza Inglaterra. Lu Primera Guerra Mundial, guluucabe laabe ndaaniʼ cárcel purtiʼ qué ninabe ñuube lu ejércitu. Chupa beeu qué nudiicabe lugar niníʼnebe tuuxa ne despué bicaacabe laabe gúnibe dxiiñaʼ nadipaʼ. Gudiʼdiʼ si tiempu, sicaríʼ bicaabe: «Ni bizaaca que bisiidiʼ ni naa, para ganda guni huantar tuuxa la? nabé risaca guicá ique esperanza ni napa. Ejemplu stiʼ Jesús, stiʼ ca apóstol, stiʼ ca profeta ne zaqueca ca promesa ni zeeda lu Biblia racané ca ni laanu gápanu esperanza para lu ca dxi ni zeeda ca ne rudii ni stipa laanu para guni huantarnu». Guca esperanza ca casi ti ancla para Leonard ne zaqueca zanda gácani para laanu.

7. ¿Ximodo riguidxi esperanza stinu ora ridídinu lu guendanagana? (Romanos 5:3-5; Santiago 1:12).

⁷ Jma naguidxi raca esperanza stinu ora runi huantarnu guendanagana. Ridúʼyanu ximodo racané Jehová laanu tídinu ca ni ne riuuláʼdxibe ni rúninu (biindaʼ Romanos 5:3-5; Santiago 1:12). Nga runi jma naguidxi esperanza stinu yanna que dxi bizulú cazíʼdinu de Jehová. Racalaʼdxiʼ Binidxabaʼ cuee ca guendanagana ca gana laanu, peru zacané Jehová laanu gudxíʼlunu cada tobi de laaca ni.

8. ¿Xiñee zeeda gaca esperanza stinu casi ti cascu? (1 Tesalonicenses 5:8).

⁸ Laaca cayabi Biblia laanu zeeda gaca esperanza stinu casi ti cascu (biindaʼ  1 Tesalonicenses 5:8). Riquiiñeʼ ti soldadu cascu para cadi gacaná ique ora maʼ cudxiilú enemigu stiʼ. Laanu laaca nuunu lu ti guerra, cadindenenu Binidxabaʼ nga runi caquiiñeʼ gápanu íquenu o xquendabiaaninu. Riquiiñebe stale cosa para gucaabe laanu gucheʼnu ne laaca riquiiñebe xiixa idea para quítebe xquendabiaaninu. Cásica rapa cascu ique ti soldadu, zaqueca rapa esperanza stinu xquendabiaaninu para cadi guchéʼnenu Jehová.

9. ¿Xi rizaaca ora qué gapa binni esperanza?

⁹ Pa guiníʼ íquenu esperanza de guibáninu sin qué chuʼ dxi gátinu, zacané ni laanu guicaanu decisión jneza. Peru pa guiníʼ íquenu puru si ni riuuláʼdxinu la? chaahuidugá zunítinu esperanza ca. Nga peʼ nga bizaaca caadxi xpinni Cristu ni bibani ndaaniʼ guidxi Corinto. Maʼ qué ñápacabe fe ti promesa stiʼ Dios, laani nga ziasa binni de lade gueʼtuʼ (1 Cor. 15:12). Pablo guníʼ ca binni ni qué runi cré promesa riʼ nabánicaʼ para gúnicaʼ ni riuuláʼdxisicaʼ (1 Cor. 15:32). Tiempu riʼ, stale binni qué runi cré ca promesa stiʼ Dios ne pur nga nabánicaʼ para si gúnicaʼ ni riuuláʼdxicaʼ. Peru laanu runi crenu ca promesa ni maʼ biʼniʼ Dios. Esperanza stinu zeeda gácani casi ti cascu purtiʼ rápani xquendabiaaninu ne racaneni laanu cadi gacaláʼdxinu gúninu puru si ni riuuláʼdxinu ne guxheleʼ ni laanu de Jehová (1 Cor. 15:33, 34).

10. ¿Ximodo racané esperanza ca laanu para cadi guiníʼ íquenu cosa ni cadi dxandíʼ?

¹⁰ Esperanza ni zeeda gaca casi ti cascu laaca rápani laanu para cadi guiníʼ íquenu cadi naquiiñeʼ gusiéchenu Jehová. Guzéʼtenu ti ejemplu, zándaca chuʼ tu guiníʼ ique: «Qué ziuu dxi guicaaʼ guendanabani ni qué zaluxe. Qué zanda guneʼ guiráʼ ni rinabaʼ Dios ca xpinni». Cadi guiaandaʼ laanu ngaca gudxi Elifaz Job ná ndaʼ xhamigu laabe. Sicaríʼ guniʼbe: «¿Zándaxa gaca ti hombre ni rati nayá [...]?». Ne laaca guniʼbe: «Biaaʼ, qué gapa Dios confianza ca santo stiʼ, nin guibáʼ ca cadi nayá nezalube» (Job 15:14, 15). ¡Cadi dxandíʼ nga! Cadi guiaandaʼ laanu Binidxabaʼ nga racalaʼdxiʼ guiníʼ íquenu zacá. Nánnabe, pa nisi laani guiníʼ íquenu la? chaahuiʼ chaahuiʼ zunítinu esperanza ni nápanu Jehová. Nga runi cadi guiníʼ íquenu guendarusiguii ca, sínuque guicá íquenu ca promesa stiʼ Jehová. Ne cadi guiaandaʼ laanu racaláʼdxibe guibáninu sin qué chuʼ dxi gátinu ne zacanebe laanu ugaandanu ni (1 Tim. 2:3, 4).

11. ¿Xiñee caquiiñeʼ gápanu paciencia laga guedandá dxi gaca cumplir ca promesa ni cabézanu?

¹¹ Nuu biaje zaca nagana para laanu guquídxinu esperanza stinu. Zándaca nuu biaje guirá paciencia stinu laga cabézanu guni cumplir Dios ca promesa stiʼ. Cadi guiaandaʼ laanu qué gapa Jehová ra guiluxe ne maʼ gadxé modo ruuyabe tiempu (2 Ped. 3:8, 9). Zuni cumplir Jehová guiráʼ ni maʼ gudixhe ique, peru zándaca cadi ora racaláʼdxinu nga gúnibe ni. ¿Xi zacané laanu guquídxinu esperanza ni nápanu ne cadi guirá paciencia stinu laga cabézanu guedandá dxi guni cumplir Jehová guiráʼ ni maʼ biʼniʼ prometer laanu yaʼ? (Sant. 5:7, 8).

12. Casi ná Hebreos 11:1, 6, ¿xiñee caquiiñeʼ gápanu fe Jehová para gápanu esperanza?

¹² Zaca esperanza stinu naguidxi pa chuʼnu gaxha de Jehová purtiʼ laa nga chiguni cumplir guiráʼ ni cabézanu. Para gápanu esperanza laaca caquiiñeʼ gápanu fe nuu Jehová, ne «rudiibe premiu ca ni ruyubi  laabe sin guiree gana» (biindaʼ Hebreos 11:1, 6). Ra jma guni crenu nuu Jehová, jma zápanu confianza zúnibe guiráʼ ni maʼ biʼniʼ prometerbe. Guidúʼyanu xi zanda gúninu para jma gaca xhamígunu Jehová ne gaca esperanza stinu jma naguidxi.

13. ¿Ximodo zanda gaca xhamígunu Dios?

¹³ Guni orarnu Jehová ne guidúʼndanu Stiidxaʼ. Dxandíʼ qué zanda guidúʼyanu Jehová, peru zanda gaca xhamígunu laabe. Zanda guinínenu laabe ora guni orarnu, ne nápanu confianza zucaadiágabe laanu (Jer. 29:11, 12). Rucaʼdiáganu laabe ora ridúʼndanu Biblia ne riníʼ íquenu ni nani. Ora ridúʼndanu ximodo gupa Jehová ca xpinni dxiqué, jma riguidxi esperanza stinu. Guiráʼ ni cá lu Stiidxaʼ Dios «gucuá ni para gusiidiʼ ni laanu, ti ora guni huantarnu ne quixhedxí Stiidxaʼ Dios ladxidoʼno la? gápanu esperanza» (Rom. 15:4).

14. ¿Xiñee galán guiníʼ íquenu ni maʼ biʼniʼ Jehová pur xcaadxi?

¹⁴ Guiníʼ íquenu ximodo maʼ biʼniʼ cumplir Jehová ca promesa stiʼ. Guiníʼ íquenu ni biʼniʼ Jehová pur Abrahán ne Sara. Cumu maʼ huaniisicabe la? maʼ qué zanda gápacabe xiiñicabe, peru biʼniʼ prometer Dios laacabe zudii laacabe ti xiiñicabe (Gén. 18:10). ¿Xi biʼniʼ Abrahán óraque yaʼ? Biblia ná: «Gúpabe fe zeeda gácabe bixhoze stale guidxi» (Rom. 4:18). Para ti binni la? nagana gaca ni guníʼ Dios que, peru gunna dxichi Abrahán zuni cumplir Jehová promesa stiʼ. Ne zaqué peʼ gúcani (Rom. 4:19-21). Relatu riʼ ne xcaadxi ni zeeda lu Biblia rusiidiʼ ca ni laanu zanda gápanu confianza Jehová purtiʼ runi cumplir ni riníʼ neca para laanu ruluíʼ nagana ni.

15. ¿Xiñee naquiiñeʼ guiníʼ íquenu ca cosa ni maʼ biʼniʼ Jehová pur laanu?

¹⁵ Guiníʼ íquenu ca cosa ni maʼ biʼniʼ Jehová pur laanu. ¿Ñee maʼ bidúʼyanu ximodo  maʼ guca cumplir caadxi de ca promesa stiʼ Jehová lu xquendanabáninu la? Guzéʼtenu ti ejemplu, biʼniʼ prometer Jesús zudii Bixhoze laanu guiráʼ ni caquiiñenu para guibáninu (Mat. 6:32, 33). Laaca guníʼ Jesús zudii Jehová laanu espíritu santu pa guinábanu ni laa (Luc. 11:13). Maʼ biʼniʼ cumplir Jehová ca promesa riʼ. Ne zándaca rietenaláʼdxinu maʼ biʼniʼ cumplirbe ca promesa riʼ lu xquendanabáninu; maʼ biʼniʼ perdonarbe laanu, maʼ gudixhedxibe ladxidoʼno ne qué rusaana de gudiibe laanu guendaró espiritual (Mat. 6:14; 24:45; 2 Cor. 1:3). Pa guiníʼ íquenu guiráʼ ni maʼ biʼniʼ Jehová pur laanu, zaguidxi esperanza ni nápanu lu ni chigúnibe maʼ cadi candaa.

16. ¿Xiñee naca esperanza stinu ti regalu risaca?

¹⁶ Ti regalu stiʼ Dios nga esperanza de guibáninu sin qué chuʼ dxi gátinu. Cabézanu guedandá dxi gácani ne dxandíʼ peʼ runi crenu zácani. Naca esperanza stinu casi ti ancla purtiʼ racaneni laanu gudxíʼlunu guendanagana, sanándacabe laanu ne dede gudxíʼlunu guendaguti. Laaca zeeda gaca esperanza stinu casi ti cascu purtiʼ rápani xquendabiaaninu ne racaneni laanu gucáʼnanu cosa malu ne gúninu ni jneza. Esperanza ni rudii Biblia laanu ruchiña ni laanu gaxha de Dios ne rusihuínnini pabiáʼ nadxiibe laanu. Pa naguidxi esperanza stinu zacaneni laanu guibáninu galán.

17. ¿Xiñee rusiecheʼ esperanza stinu laanu?

¹⁷ Sicaríʼ gudxi apóstol Pablo ca xpinni Cristu de Roma, lu carta ni bicaabe ra nuucaʼ: «Lachuu nayecheʼ pur esperanza stitu» (Rom. 12:12). Guyuu Pablo nayecheʼ purtiʼ nanna zacaa guendanabani ni qué zaluxe guibáʼ pa qué gucheené Jehová. Laanu laaca zanda guiéchenu pur esperanza ni nápanu purtiʼ nánnanu zuni cumplir Jehová ca promesa ni maʼ biʼniʼ. Nga runi biaʼsi nga ni guníʼ ti hombre ni bicaa salmo: «Nayecheʼ nga [...] ni napa esperanza Jehová Dios stiʼ, [...] ni siempre runi ni riníʼ» (Sal. 146:5, 6).