1. ¿Xi nanna Jehová rizaaca ca xpinni?

 NANNA JEHOVÁ guiráʼ ni rizaacanu. Nánnabe pora nga nuunu nayecheʼ ne pora nga cayacananu (Sal. 37:18). Guizáʼ riecheʼ Jehová ora guʼyaʼ cayúninu stipa gúninu ni ná neca naná nuu ladxidoʼno. Ne cadi ngasi, racaláʼdxibe gacanebe laanu ne quixhedxibe ladxidoʼno.

2. ¿Xi runi Jehová pur ca ni naná nuu ladxidóʼ ne xi zanda gúninu pa racaláʼdxinu guidúʼyanu ximodo rapa Jehová laanu?

² Lu Salmo 147:3 riete ruchenda Jehová venda ra naná ca ni cayuubaʼ ladxidóʼ. Ruzeeteʼ textu riʼ rapa Jehová né stale cariñu ca ni naná nuu ladxidóʼ. Peru ¿xi zanda gúninu pa racaláʼdxinu guidúʼyanu ximodo rapa Jehová laanu yaʼ? Guzéʼtenu ti ejemplu. Ora napa binni ti herida la? naquiiñeʼ cheʼ ra nuu doctor. Peru para guiándabe naquiiñeʼ chinándabe ni gabi doctor laabe. Lu artículo riʼ zadúʼyanu xi rabi Jehová ca binni ni cayacaná ladxidóʼ ne ximodo zanda chinándanu ca conseju ni rudiibe laanu né guendarannaxhii ni zeeda lu Stiidxabe.

CAYABI JEHOVÁ LAANU GUIZÁʼ RISÁCANU PARA LAA

3. ¿Xiñee nuu binni riníʼ ique qué risaca?

³ Lu Guidxilayú nabáninu riʼ, maʼ huaxiéʼ rannaxhii binni. Stale binni nabé feu modo runi tratar xcaadxi binni ne rucaacabe laacaʼ guni sentircaʼ qué risácacaʼ. Ti hermana láʼ Helen a guníʼ: «Biniiseʼ ndaaniʼ ti familia ni qué rusihuinni pa nadxiisaacaʼ. Nabé naduxhuʼ guca bixhozeʼ ne guiráʼ dxi rábibe laadu qué risácadu». ¿Ñee huadxagaluluʼ xiixa casi ni huadxaagalú Helen riʼ la? Zándaca feu modo biʼniʼ tratárcabe  lii, stale biaje gudindenécabe lii o bicaacabe guni sentirluʼ guirutiʼ nadxii lii. Pa bizaacaluʼ ca ni bizéʼtenu riʼ zándaca gaca nagana para lii guni creluʼ nuu tuuxa ni dxandíʼ peʼ rizaalaʼdxiʼ lii.

4. Casi ná lu Salmo 34:​18, ¿xi zuni Jehová pur laanu?

⁴ Neca guyuu binni biʼniʼ tratar lii feu, peru guyuu seguru guizáʼ nadxii Jehová lii ne rusisácabe lii. Laabe nuube «gaxha de ca ni maʼ gucadé ladxidóʼ» (biindaʼ Salmo 34:18). Pa nácaluʼ tobi de «ca ni maʼ biree gana», cadi guiaandaʼ lii biiyaʼ Jehová ca cosa sicarú ni nuu ndaaniʼ ladxidoʼloʼ ne laapebe gucaláʼdxibe gácaluʼ tobi de ca xpínnibe (Juan 6:44). Qué zusaana Jehová de gacané lii purtiʼ guizáʼ nadxiibe lii.

5. ¿Xi rusiidiʼ ejemplu stiʼ Jesús laanu, ra bizaaláʼdxibe ca binni ni bíʼnicabe menu laacaʼ?

⁵ Zacané ejemplu stiʼ Jesús laanu guiene chaahuinu xi runi sentir Jehová pur laanu. Dxi guyuu Jesús lu Guidxilayú riʼ bizaaláʼdxibe ca binni ni cayacaná purtiʼ rúnicabe menu laacaʼ ne biabe laacaʼ (Mat. 9:​9-12). Ora ti gunaa ni napa ti guendahuará ni guizáʼ cayuniná laa gudaʼna xhábabe purtiʼ napa esperanza guianda la? gudixhedxibe ladxidóʼ ne biʼniʼ felicitarbe laa pur fe stiʼ (Mar. 5:​25-34). Zaqué nga bisihuinni Jesús modo naca Bixhoze (Juan 14:9). Nga runi, zanda chuʼluʼ seguru rusisaca Jehová lii ne ruuyabe ca cualidad sicarú ni nápaluʼ, casi fe stiluʼ ne pabiáʼ nadxiiluʼ laabe.

6. ¿Xi zanda gúninu pa runi sentirnu qué risácanu?

⁶ Yanna, ¿xi zanda gúniluʼ pa qué ganda gusaana de guiníʼ íqueluʼ qué risácaluʼ yaʼ? Biindaʼ ne guníʼ ique lu ca textu ni zeeda lu Biblia ra riete rusisaca Jehová lii (Sal. 94:19). b Pa qué ñanda nugaandaluʼ xiixa meta  ni gudixhe íqueluʼ o qué ganda gúniluʼ xiixa ni runi xcaadxi binni la? cadi guireeluʼ gana ne cadi guiníʼ íqueluʼ ca cosa ni qué ñanda ñúniluʼ. Nanna Jehová xi zanda gúniluʼ ne qué ribézabe gúniluʼ xiixa ni qué zanda gúniluʼ (Sal. 103:​13, 14). Pa dxiqué bininá tuuxa lii, cadi guiníʼ íqueluʼ lii nga nápaluʼ donda pur ni bíʼnibe lii ca. Coʼ, cadi donda stiluʼ ni ne cadi lii bicaaluʼ laabe gúnibe ni lii. Cadi guiaandaʼ lii zanabaʼ Jehová cuenta ca binni ni biʼniʼ cosa malu ne cadi ca ni gucaná (1 Ped. 3:12). Dxi naca Sandra, ti dxaapahuiiniʼ nabé bininácabe laa, laabe guniʼbe: «Rinabaʼ Jehová guuyaʼ ca cosa galán ni ruuyabe napaʼ».

7. ¿Ximodo zanda gacané ca cosa ni bizaacanu dxiqué para gúninu xhiiñaʼ Jehová?

⁷ Dxandíʼ ziuu biaje zaníʼ íqueluʼ qué zanda gacaneluʼ xcaadxi, peru zanda iquiiñeʼ Jehová lii para gúniluʼ ni. Maʼ bidiibe lii privilegiu de gunineluʼ laabe dxiiñaʼ ra guni predicarluʼ (1 Cor. 3:9). Zándaca pur ca cosa ni bizaacaluʼ dxiqué maʼ riéneluʼ ni cazaaca ne ni runi sentir xcaadxi binni. Guizáʼ zanda gacaneluʼ binni. Helen hermana ni bizéʼtenu lu párrafo chonna que, gucanécabe laabe ne yanna maʼ nánnabe ximodo gacanebe xcaadxi binni. Laabe guniʼbe: «Dxiqué runeʼ sentir qué risaca guendanabani stinneʼ, peru Jehová maʼ gucané naa guneʼ sentir nadxiibe naa ne zanda gacaniáʼ xcaadxi binni». Maʼ naca Helen precursora regular ne guizáʼ nayecheʼ nabani.

RACALAʼDXIʼ JEHOVÁ GÁNNANU MAʼ BIʼNIʼ PERDONAR LAANU

8. ¿Xi cayabi Jehová laanu lu Isaías 1:18?

⁸ Nuu de ca xpinni Jehová ante o despué de chuʼnísacaʼ runinaruʼ ca pecadu ni bíʼnicaʼ dxiqué laacaʼ. Peru galán cadi guiaandaʼ laanu bidii Jehová laanu rescate purtiʼ guizáʼ nadxii laanu. Nga runi, zanda chuʼnu seguru racalaʼdxiʼ Jehová guicaanu regalu stiʼ. Cayabi Jehová laanu: «Latáʼ, guni chaahuinu ca guendanagana nápanu». c Ne ora gúninu ni, Jehová peʼ cayabi laanu maʼ qué zietenalaʼdxiʼ ca pecadu stinu (biindaʼ Isaías 1:18). Nabe riéchenu purtiʼ Bixhózenu ni nadxii laanu rusiaandaʼ ca cosa malu ni bíninu dxiqué, peru qué rusiaandabe ca cosa galán ni maʼ bíninu (Sal. 103:​9, 12; Heb. 6:10).

9. ¿Xiñee galán guiníʼ íquenu lu ca cosa ni cayúninu yanna ne lu ca cosa ni chiguizaaca despué ne cadi lu ca cosa ni maʼ bizaaca?

⁹ Yanna, ¿xi zanda gacané lii pa runinaruʼ ca cosa ni cadi jneza bíʼniluʼ dxiqué lii yaʼ? Biʼniʼ stipa guiníʼ íqueluʼ lu ca cosa ni cayúniluʼ yanna ne ni zanda gúniluʼ despué. Guníʼ ique ejemplu stiʼ apóstol Pablo. Biuubaʼ ladxidoʼbe purtiʼ guzanándabe ca xpinni Cristu, peru nánnabe maʼ biʼniʼ perdonar Jehová laabe (1 Tim. 1:​12-15). Ngue runi qué nicá íquebe ca cosa ni cadi jneza bíʼnibe dxiqué, cásica qué nicá íquebe ca cosa risaca ni bíʼnibe ndaaniʼ religión stiʼ ca Judíu (Filip. 3:​4-8, 13-15). Ni bíʼnibe nga biʼniʼ predicarbe né stale gana ne guníʼ íquebe ca cosa sicarú ni cabeza laabe. Cásica Pablo, qué zanda guchaaluʼ ca cosa ni maʼ bizaaca. Peru zanda quixhe íqueluʼ gusisácaluʼ Jehová biaʼ zanda gúniluʼ yanna ne guiníʼ íqueluʼ ca cosa galán ni maʼ biʼniʼ prometerbe lii chigúnibe despué.

10. ¿Xi zanda gúninu pa bininanu xcaadxi binni?

¹⁰ Zándaca riuubaʼ ladxidoʼloʼ pur bininaluʼ tuuxa pur ca cosa ni cadi jneza bíʼniluʼ. ¿Xi zanda gúniluʼ yaʼ? De guidubi ladxidoʼloʼ  gunabaʼ gutiidiláʼdxicabe lii ne biʼniʼ guiráʼ ni nuu lu naluʼ para gaca chaahuiʼ guendanagana ca (2 Cor. 7:11). Gunabaʼ Jehová gacané ca binni ni bininaluʼ. Laabe zanda gacanebe laacaʼ ne zaqueca gacanebe lii gudxiilutu ni bizaaca ca ne guibiguetaʼ chuʼtu tobi si sti biaje.

11. ¿Xi rusiidiʼ ejemplu stiʼ Jonás laanu? (Biiyaʼ imagen).

¹¹ Biziidiʼ de ca cosa ni cadi jneza bíʼniluʼ ne bidii lugar iquiiñeʼ Jehová lii modo racalaʼdxiʼ. Bietenalaʼdxiʼ ni bizaaca profeta Jonás. Lugar de ñebe Nínive, casi gudxi Jehová laabe la? gadxé neza gucuaa Jonás. Guluu jneza Jehová laabe ne biziidibe xiixa de ni bizaacabe que (Jon. 1:​1-4, 15-17; 2:​7-10). Qué niníʼ ique Jehová maʼ qué gapa Jonás remediu, sínuque biquiiñerube laa casi profeta ne gúdxibe laa guibiguetaʼ cheʼ Nínive, yanna huaxa maʼ bizuubaʼ Jonás diidxaʼ. Neca biuubaʼ ladxidoʼbe pur ni bíʼnibe que, peru que nudiibe lugar nucueeza ngue laabe para nicaabe dxiiñaʼ ni cudii Jehová laabe sti biaje (Jon. 3:​1-3).

RIQUIIÑEʼ JEHOVÁ ESPÍRITU SANTU STIʼ PARA QUIXHEDXÍ LADXIDOʼNO

12. ¿Ximodo rudii Jehová laanu paz stiʼ? (Filipenses 4:​6, 7).

¹² Riquiiñeʼ Jehová espíritu santu stiʼ para quixhedxí ladxidoʼno ora guizaacanu xiixa desgracia ne ora rizaacanu xiixa ni qué randa rusiáʼndanu. Ne nga peʼ nga ni bizaaca Ron ne Carol ora biiti xiiñicabe laca laa. Laacabe guníʼcabe: «Maca huadídidu guendanagana naroʼbaʼ, peru ni bizaaca riʼ laani nga ni jma naná huadídidu. Cumu stale biaje qué randa rásidu la? runi orardu Jehová ne raqué nga ridúʼyadu rudii Jehová laadu paz stiʼ casi ná Filipenses 4:​6, 7» (biindaʼ ni). Pa cadiʼdiluʼ xiixa prueba guizáʼ nagana ne cayuni sentirluʼ naná nuu ladxidoʼloʼ, gudxi Jehová guiráʼ ni runi sentirluʼ. Zanda guiníʼneluʼ laabe stale biaje ne biaʼ tiempu naluʼ (Sal. 86:3; 88:1). Cadi guidxágaluʼ de guinábaluʼ laabe espíritu santu. Guyuu seguru zucaadiágabe ca oración stiluʼ (Luc. 11:​9-13).

13. ¿Ximodo zanda gacané espíritu santu laanu para cadi gusaana de gúninu ni ná Jehová? (Efesios 3:16).

¹³ ¿Ñee huadxagaluluʼ xiixa prueba guizáʼ nagana ne yanna runi sentirluʼ maʼ qué gápaluʼ stipa la? Zanda gudii espíritu santu lii stipa ni caquiiñeluʼ para cadi gusaana de gúniluʼ ni ná Jehová (biindaʼ Efesios 3:16). Guidúʼyanu ni bizaaca ti hermana láʼ Flora. Laabe ne xheelabe gúcacabe misioneru, peru bicheené xheelabe laabe ne guca divorciárcabe. Sicaríʼ guníʼ Flora: «Nabé triste guyuaaʼ pur ni bíʼnibe naa riʼ, bininani naa stale ne puru si laani riníʼ iqueʼ guiráʼ dxi. Ngue runi rinabaʼ Jehová gudii naa espíritu santu stiʼ para ganda gudxieeluáʼ ni. Gudixhedxí Jehová ladxiduáʼ ne neca ruluíʼ qué zanda gudxieeluáʼ guendanagana que bidiibe naa stipa para ganda guneʼ huantar ni». Gucané Jehová laabe gápabe jma confianza laa ne guni crebe qué zusaana laabe ora guidxagalube xiixa prueba. Laaca guniʼbe: «Biiyaʼ modo gucané Jehová naa guneʼ stinneʼ ca diidxaʼ ni zeeda lu Salmo 119:​32, versículo ca ná: “Né gana ziaaʼ lu neza stiʼ ca mandamientu stiluʼ, purtiʼ naguuluʼ ti lugar para laani ndaaniʼ ladxiduáʼ”».

14. ¿Xi zanda gúninu para guicaanu espíritu santu stiʼ Dios?

¹⁴ Despué de guinábaluʼ Jehová espíritu santu, ¿xi zanda gúniluʼ yaʼ? Gudixhe ique gúniluʼ caadxi cosa ni gacané lii guicaaluʼ espíritu santu stiʼ Jehová, casi cheluʼ reunión ne guni predicarluʼ. Biindaʼ Biblia guiráʼ dxi, nga zacané lii guiníʼ íqueluʼ modo riníʼ ique Jehová (Filip. 4:​8, 9).  Ora maʼ cayuundaluʼ Biblia guníʼ ique de ca binni ni riete luni, modo bidxiilucaʼ guendanagana sticaʼ ne ximodo gucané Jehová laacaʼ guni huantarcaʼ. Sandra, hermana ni bizéʼtenu lu párrafo xhoopaʼ que, nabé gucanabe purtiʼ gúpabe stale guendanagana lu xquendanabánibe. Laabe nabe: «Nabé rindá relatu stiʼ José ndaaniʼ ladxiduáʼ. Qué nixeleʼ José de Jehová neca gupa guendanagana ne bíʼnicabe laa cosa ni cadi jneza» (Gén. 39:​21-23).

RIQUIIÑEʼ JEHOVÁ CA HERMANU STINU PARA QUIXHEDXÍ LADXIDOʼNO

15. ¿Tu zanda quixhedxí ladxidoʼno, ne ximodo rúnicabe ni? (Biiyaʼ imagen ca).

¹⁵ Riguixhedxí ca hermanu stinu ladxidoʼno ora ridxaagalunu xiixa guendanagana (Col. 4:11). Riquiiñeʼ Jehová ca hermanu stinu para gusihuinni pabiáʼ nadxii laanu. Zanda quixhedxícabe ladxidoʼno ra chúʼcabe gaxha de laanu ne gucaadiágacabe modo cayuni sentirnu. Zanda cúʼcabe gana laanu ra guʼndanécabe laanu ti textu de lu Biblia o guni orarnécabe laanu (Rom. 15:4). d Zándaca ziuu biaje zusietenalaʼdxiʼ ti hermanu o ti hermana laanu ximodo ruuyaʼ Jehová ca cosa ca, zacá zacanebe laanu cadi gusaana de guni huantarnu. Laaca zanda gacané ca hermanu laanu ra gúnicaʼ xiixa pur laanu, casi chinecaʼ xiixa ni guidoʼno para guni sentirnu jma galán.

16. ¿Xi zándaca caquiiñeʼ gúninu para gacanécabe laanu?

 ¹⁶ Para gacanécabe lii, zándaca caquiiñeʼ guinábaluʼ ni. Nadxii ca hermanu lii ne racaláʼdxicaʼ gacanecaʼ lii (Prov. 17:17). Peru zándaca qué gánnacabe xi cayuni sentirluʼ o xi caquiiñeluʼ (Prov. 14:10). Pa nuuluʼ xizaa, triste o cayuubaʼ ladxidoʼloʼ, biyubi ti xhamíguluʼ ni zanda gacané lii ne gudxi laabe ximodo runi sentirluʼ. Galán gábiluʼ laabe ximodo zanda gacanebe lii. Ne laaca zanda guiníʼneluʼ tobi o chupa ancianu ni jma nápaluʼ confianza. Nuu hermana la? jma galán runi sentircaʼ guiníʼnecaʼ sti hermana ni nánnacaʼ zanda gacané laacaʼ.

17. ¿Xiñee zándaca nuu biaje qué zudiʼnu lugar cúʼcabe gana laanu, ne xi zanda gúninu para gudxiilunu ni yaʼ?

¹⁷ Cadi guyúbiluʼ chuʼluʼ stúbiluʼ. Pa nabé triste nuuluʼ zándaca ni racaláʼdxiluʼ nga chuʼluʼ stúbiluʼ. Ne ziuu biaje zándaca qué ziene ca hermanu ca lii o guiniʼcaʼ xiixa ni guniná lii (Sant. 3:2). Peru cadi gucaa nga lii guixéleluʼ de ca hermanu ne ca hermana stiluʼ purtiʼ zanda iquiiñeʼ Jehová laacabe para cúʼcabe gana lii. Ti ancianu láʼ Gavin, ni napa depresión, guníʼ: «Stale biaje qué racalaʼdxeʼ guinieeʼ ne guuyaʼ ca xhamiguaʼ». Neca zacá, runi Gavin stipa chuʼ gaxha de xcaadxi hermanu, ne nga racané laabe guni sentirbe jma galán. Ti hermana láʼ Amy guníʼ: «Pur guiráʼ cosa cadi galán ni maʼ bizaacaʼ, guizáʼ raca nagana para naa gapaʼ confianza binni. Peru caziideʼ gannaxhieeʼ ca hermanu ne gapaʼ confianza laacaʼ cásica runi Jehová ni. Nga racané naa chuaaʼ nayecheʼ ne gusiecheʼ Jehová».

RIQUIIÑEʼ JEHOVÁ CA PROMESA STIʼ PARA QUIXHEDXÍ LADXIDOʼNO

18. ¿Ximodo zabáninu despué, ne xi zanda gúninu dede ca yanna?

¹⁸ Guizáʼ riéchenu ora ránnanu mayaca zusianda Jehová laanu ne maʼ qué ziuubaʼ ladxidoʼno, ne zabeebe guiráʼ ni runiná laanu (Apoc. 21:​3, 4). Ne lu guidxilayú cubi ca la? maʼ guirutiʼ zietenalaʼdxiʼ guiráʼ ca cosa ni bininá laa (Is. 65:17). Casi maʼ bidúʼyanu, ruchenda Jehová venda ra maʼ gucananu. Cumu nadxii Jehová laanu la? huadiibe laanu stale cosa galán para quixhedxibe ladxidoʼno ne chuʼnu galán. ¡Nga runi, bidii lugar gacané Jehová lii! Ne cadi guiaandaʼ lii: guizáʼ nadxii Jehová lii (1 Ped. 5:7).