ARTÍCULO DE ESTUDIU 43
CANCIÓN 90 Cúʼsaanu gana laanu
Xi zanda gúniluʼ pa nápaluʼ xiixa duda ni zanda cuee gana lii
«Laguyubi chaahuiʼ xii nga ni jneza» (1 TES. 5:21).
TEMA
Xi zanda gúninu para maʼ cadi gápanu duda ni zanda gucueeza laanu gúninu jma lu xhiiñaʼ Jehová.
1, 2. a) ¿Xi duda zándaca gápanu? b) ¿Xi zadúʼyanu lu artículo riʼ?
GUIRÁʼ binni rapa duda. a Guzéʼtenu ti ejemplu, guníʼ ique ti joven ni qué naʼ chúʼnisa purtiʼ cadi nuube seguru pa rizaalaʼdxiʼ Jehová laabe. O guníʼ ique ti hermanu dxi naca joven gudixhe ique guni ni ná Jehová primé lu xquendanabani lugar de guni ganar stale bueltu, peru yanna maʼ nápabe familia ne runi sentirbe qué rugaanda bueltu ni runi ganarbe para gudiibe ni caquiiñeʼ familia stibe pur nga zándaca guiníʼ íquebe pa jneza decisión ni gucuaabe que. Guzéʼtenu sti ejemplu, ti hermanu ni maʼ huaniisi, ni maʼ huaxiéʼ stipa napa zándaca careebe gana purtiʼ maʼ qué randa rúnibe xhiiñaʼ Jehová biaʼ bíʼnibe dxiqué. Zándaca huayuu biaje huaníʼ íqueluʼ lu ca pregunta riʼ: «¿Ñee rizaalaʼdxiʼ Jehová naa la? ¿Ñee risaca ca sacrificiu ni huayuneʼ pur laabe la? ¿Ñee zándaruʼ iquiiñeʼ Jehová naa la?».
2 Pa riníʼ íquenu zacá la? zanda gusirani fe stinu ne gusaana de gúninu ni ná Jehová. Lu artículo riʼ zadúʼyanu ximodo zanda gacané Biblia laanu pa riníʼ íquenu qué rizaalaʼdxiʼ Jehová laanu, cadi jneza ca decisión gucuaanu dxiqué o maʼ qué zanda gúninu xhiiñaʼ Jehová.
XI ZANDA GACANÉ LAANU ORA GÁPANU DUDA
3. ¿Xi zanda gacané laanu ora gápanu duda?
3 Pa nápanu duda la? zanda gacané Stiidxaʼ Dios laanu guicábinu cani, purtiʼ Stiidxaʼ Dios nga ni zacané laanu chuʼnu jma gaxha de Jehová ne gaca fe stinu naguidxi (1 Cor. 16:13).
4. ¿Ximodo zanda guyubi chaahuinu xii nga ni jneza casi ná 1 Tesalonicenses 5:21?
4 (Biindaʼ 1 Tesalonicenses 5:21). Rudii Biblia laanu conseju riʼ: «Laguyubi chaahuiʼ xii nga ni jneza». ¿Ximodo gúninu ni yaʼ? Ra guchaaganu ni riníʼ íquenu né ni ná Biblia. Guiníʼ íquenu ti joven ni cadi nuu seguru pa dxandíʼ rizaalaʼdxiʼ Jehová laa, ¿ñee jneza nga guiaananebe duda ca la? Coʼ, ni jma jneza gúnibe nga guyubi chaahuibe lu Biblia para gánnabe ximodo ruuyaʼ Jehová laabe.
5. ¿Ximodo zanda «gucaadiáganu» Jehová o gánnanu xi riníʼ íquebe de duda ni nápanu?
5 Ora ridúʼndanu Stiidxaʼ Dios la? casi ñaca caniʼné Jehová laanu. Peru para ganda «gucaadiáganu» laabe o gánnanu xi riníʼ íquebe de laani la? caquiiñeʼ ora guidúʼndanu Biblia guyúbinu textu ni caníʼ de laani ne iquíʼñenu ca herramienta ni rudii xquidxi Jehová laanu para guni investigarnu de tema ca (Prov. 2:3-6). Risaca nga guinábanu Jehová gacané laanu ora maʼ cayuni investigarnu ti ganda guidxélanu respuesta ni cuyúbinu. Guyúbinu principiu ni zeeda lu Biblia ne información ni gacané laanu. Laaca nabé risaca guiníʼ íquenu relatu stiʼ ca binni ni zeeda lu Biblia ni guníʼ ique ne ni biʼniʼ sentir cásica cayuni sentirnu.
6. ¿Ximodo racané ca reunión ca laanu para maʼ cadi gápanu duda?
6 Laaca rucaadiáganu Jehová lu ca reunión ca. Pa gúninu stipa cadi guiaadxanu ca reunión ni rápanu, zándaca lu ti discursu o lu ti comentariu ni gudii tuuxa hermanu gunadiáganu ni peʼ caquíʼñenu para gacané laanu maʼ cadi gápanu duda (Prov. 27:17). Yanna guidúʼyanu caadxi duda ni zanda gápanu ne xi zanda gúninu para cadi gápanu cani.
«¿ÑEE RIZAALAʼDXIʼ JEHOVÁ NAA LA?»
7. ¿Xi zándaca guinabadiidxanu?
7 Zándaca huayuu biaje guiníʼ íqueluʼ pa rizaalaʼdxiʼ Jehová lii. Pa runi sentirluʼ huaxiéʼ risácaluʼ la? zándaca riníʼ íqueluʼ qué zanda gaca xhamíguluʼ Dios ni bizáʼ guiráʼ xixé cosa. Ne zándaca zacaca nga guníʼ ique rey David. Nabé bidxagayaabe rizaalaʼdxiʼ Jehová binni guidxilayú, ngue runi guniʼbe: «Jehová, ¿tuu nga binni para guizaaláʼdxiluʼ laa, ne tuu nga xiiñiʼ hombre ni rati para gucaadiágaluʼ laa?» (Sal. 144:3). Guidúʼyanu ximodo zanda guidxélanu respuesta stiʼ pregunta riʼ.
8. Casi ruzeeteʼ 1 Samuel 16:6, 7, 10-12, ¿xi ruuyaʼ Jehová de binni?
8 Rusiidiʼ Biblia laanu ruuyaʼ Jehová ca binni ni ruluíʼ huaxiéʼ risaca para xcaadxi binni. Guzéʼtenu ti ejemplu, biseendabe Samuel ra lidxi Jesé para guni ungir tobi de ca xiiñiʼ para gaca rey stiʼ guidxi Israel. Bichiña Jesé gadxe xiiñiʼ nezalú Samuel peru qué nuchiñabe David xiiñibe ni jma nahuiiniʼ. b Peru David peʼ nga ni gulí Jehová (biindaʼ 1 Samuel 16:6, 7, 10-12). ¿Xiñee laapebe nga ni gulí Jehová yaʼ? Purtiʼ biiyaʼ ni nuu ndaaniʼ ladxidóʼ David ne biiyaʼ nácabe ti joven ni nadxii Dios.
9. ¿Xiñee zanda chuʼluʼ seguru rizaalaʼdxiʼ Jehová lii? (Biiyaʼ imagen ca).
9 Guníʼ ique ni maʼ biʼniʼ Jehová para gusihuinni rizaalaʼdxiʼ lii. Rudiibe lii conseju ni peʼ caquiiñeluʼ (Sal. 32:8). ¿Cadi dxandíʼ para ganda gúnibe ni caquiiñeʼ gunibiáʼ chaahuibe lii la? (Sal. 139:1) Ora rinándaluʼ ca conseju ca ne ruuyaluʼ modo racanécani lii riuuluʼ seguru rizaalaʼdxiʼ Jehová lii (1 Crón. 28:9; Hech. 17:26, 27). Ruuyabe guiráʼ ni rúniluʼ pur laabe ne ca cualidad galán ni nápaluʼ (Jer. 17:10). Racalaʼdxiʼ Jehová gaca xhamigu lii ne racaláʼdxibe laaca gaca xhamíguluʼ laabe (1 Juan 4:19).
«Pa guyúbiluʼ laabe la? zudiibe lugar guidxélaluʼ laabe» (1 Crón. 28:9). (Biiyaʼ párrafo 9). c
«¿ÑEE JNEZA CA DECISIÓN NI GUCUAAʼ LA?»
10. Ra maʼ gudiʼdiʼ tiempu, ¿xi zándaca gueeda guiníʼ íquenu?
10 Ra tidiʼ tiempu, zándaca guiníʼ ique tuuxa pa jneza ca decisión ni gucuaa dxiqué. Zándaca bisaanabe ti dxiiñaʼ ra riguíxecabe laabe galán o gudixhe íquebe cadi gápabe xiixa negocio ti ganda gúnibe jma lu xhiiñaʼ Jehová. Peru yanna ra maʼ gudiʼdiʼ tiempu, zándaca gúʼyabe caadxi de ca ni runibiaʼbe ni gudixhe íquecaʼ gápacaʼ bueltu ne ruluíʼ nabánicaʼ galán. Pur nga zándaca guiníʼ íquebe: «¿Ñee risaca guiráʼ sacrificiu ni bineʼ para guneʼ ni ná Jehová la? ¿O jma galán nibaneʼ pa ñuneʼ sti cosa?».
11. ¿Xiñee guyuu hombre bicaa Salmo 73 que xizaa?
11 Pa huayuudxí guiníʼ íqueluʼ ca pregunta ni bizéʼtenu, guníʼ ique modo biʼniʼ sentir hombre ni bicaa Salmo 73. Biiyabe ca ni qué runi ni ná Jehová ruluíʼ si nazaaca nuucaʼ, nápacaʼ paz ne nápacaʼ bueltu (Sal. 73:3-5, 12). Cumu ruluíʼ si nabánicabe galán la? ngue runi hombre ni bicaa Salmo que biʼniʼ sentir qué risaca guiráʼ ni runi para Jehová, guidubi dxi riuube xizaa ne qué rusaana de guiníʼ íquebe ca cosa ni ribee gana laabe (Sal. 73:13, 14). ¿Xi gucané laabe yaʼ?
12. Casi riete lu Salmo 73:16-18 ¿xi gucané hombre ni bicaa Salmo que guiníʼ ique chaahuiʼ?
12 (Biindaʼ Salmo 73:16-18). Guyé hombre ni bicaa Salmo que ra santuariu stiʼ Jehová. Cumu raqué nuu stale paz la? ngue runi gunda guníʼ ique chaahuibe, biénebe neca ruluíʼ galán modo nabani ca binni que peru cadi galán ni cabeza laacaʼ. Biiyabe gástiruʼ sti decisión jma galán qué gúnibe ni ná Jehová, ngue gucané laabe gatadxí ladxidoʼbe ne xquendabiaanibe ne bidiini laabe stipa para gúnibe ni ná Jehová (Sal. 73:23-28).
13. ¿Ximodo zanda gatadxí ladxidoʼno ne xquendabiaaninu? (Biiyaʼ ca imagen ca).
13 Cásica hombre bicaa Salmo que lii laaca zanda gatadxí ladxidoʼloʼ ne xquendabiaaniluʼ. ¿Ximodo yaʼ? Ra guiníʼ íqueluʼ lu guiráʼ cosa galán ni nápaluʼ ne ca tesoro ni maʼ bitáleluʼ guibáʼ. Peru ca binni ni qué runi ni ná Jehová ni nápasicaʼ nga ca cosa ni rudii guidxilayú riʼ laacaʼ. Nápacabe esperanza lu ca cosa si ni zanda gápacabe lu guidxilayú riʼ ne cadi lu ca promesa stiʼ Jehová. Cayuni prometer Jehová zudii laanu jma de biaʼ riníʼ íquenu (Sal. 145:16). Laaca guníʼ ique qué zanda gánnaluʼ xi nizacaʼ de xquendanabániluʼ pa nicaaluʼ sti decisión. Peru nuu ti cosa ni nánnanu, ca ni riguixhe ique guni ni ná Jehová purtiʼ nadxiicaʼ laabe ne nadxiicaʼ prójimo sticaʼ zápacaʼ guiráʼ ni caquiiñecaʼ ne zabánicaʼ nayecheʼ.
Cadi guiaandaʼ laanu ca promesa stiʼ Jehová. (Biiyaʼ párrafo 13). d
«¿ÑEE ZÁNDARUʼ IQUIIÑEʼ JEHOVÁ NAA LA?»
14. ¿Xi rizaaca caadxi xpinni Jehová ne xi zándaca riníʼ íquecabe?
14 Nuu de ca xpinni Jehová ñuuláʼdxicaʼ ñúnirucaʼ jma lu xhiiñabe peru maʼ qué randa rúnicabe ni purtiʼ maʼ huaniisicabe, nápacabe xiixa guendahuará o nuu xiixa ni rucueeza laacabe casi pa nápacabe xiixa discapacidad. Zándaca gucaa ca cosa riʼ laacabe guni sentírcabe qué risácacabe para Jehová ne guiníʼ íquecabe: «¿Ñee zándaruʼ iquiiñeʼ Jehová naa la?».
15. ¿Xi gunna dxiichiʼ hombre bicaa Salmo 71?
15 Zacá ga nga biʼniʼ sentir hombre ni bicaa Salmo 71. Gúdxibe Jehová: «Cadi gusaanaluʼ naa ora maʼ qué gapaʼ stipa» (Sal. 71:9, 18). Peru gunna dxiichibe pa qué gusaana de gúnibe ni ná Jehová qué zusaana laabe ne zacané laabe, biziidibe riechené Jehová ca ni runi guiráʼ ni nuu lu náʼ pur guni xhiiñaʼ neca nuu ni gucueeza laacaʼ (Sal. 37:23-25).
16. ¿Xiñee zanda guininu zándaruʼ iquiiñeʼ Jehová ca xpinni ni maʼ nagola? (Salmo 92:12-15).
16 Pa nácaluʼ ti xpinni Cristu ni maʼ nagola biʼniʼ stipa gúʼyaluʼ lii casi ruuyaʼ Jehová lii. Zanda gacané Jehová lii gúniluʼ xhiiñaʼ neca maʼ qué gápaluʼ stipa (biindaʼ Salmo 92:12-15). Guníʼ ique ca cosa ni zanda gúniluʼ lugar de guicá íqueluʼ ca cosa ni maʼ qué zanda gúniluʼ. Zanda cuʼluʼ gana xcaadxi né ejemplu stiluʼ ne guizaaláʼdxiluʼ laacaʼ. Laaca zanda gábiluʼ xcaadxi modo huayacané Jehová lii lu xquendanabániluʼ ne pabiáʼ maʼ racaláʼdxiluʼ gúʼyaluʼ ora gaca cumplir ca promesa stibe. Ne cadi guiaandaʼ lii napa ca oración ni rúniluʼ pur xcaadxi stale poder (1 Ped. 3:12). Guiranu zanda gúninu xiixa pur Jehová ne pur xcaadxi binni biaʼ tiica iza nápanu.
17. ¿Xiñee cadi caquiiñeʼ guchaaganu ni rúninu né ni runi sti binni?
17 Pa maʼ bireeluʼ gana purtiʼ qué ganda gúniluʼ xhiiñaʼ Jehová biaʼ ñuuláʼdxiluʼ la? bietenalaʼdxiʼ rusisaca Jehová guiráʼ stipa ni rúniluʼ. ¡Cadi guiaandaʼ ni lii! Ne laaca cadi guchaagaluʼ ni rúniluʼ ne ni runi xcaadxi. ¿Xiñee yaʼ? Purtiʼ qué ruchaaga Jehová ni rúninu né ni runi xcaadxi binni (Gál. 6:4). Guzéʼtenu ejemplu stiʼ María ne viuda pobre que. Bichá María aceite rindáʼ naxhi nabé caru ñee Jesús (Juan 12:3-5). Peru viuda pobre que bisaba chupa monedahuiiniʼ huaxiéʼ risaca ndaaniʼ caja ra riaba bueltu stiʼ templu que (Luc. 21:1-4). Para Jesús ni biʼniʼ guiropaʼ gunaa riʼ bisihuínnini nápacaʼ fe. Rusisaca Bixhózebe Jehová guiráʼ ca cosa ni rúniluʼ purtiʼ nápaluʼ fe ne nadxiiluʼ laa neca runi sentirluʼ huaxiéʼ ni rúniluʼ.
18. ¿Xi zacané lii para maʼ cadi gápaluʼ duda? (Biiyaʼ cuadru ni láʼ « Racané Stiidxaʼ Dios lii para maʼ cadi gápaluʼ duda»).
18 Stale biaje rápanu duda. Peru casi maʼ bidúʼyanu racané Stiidxaʼ Dios laanu guicábinu cani. Nga runi, biyubi ca respuesta ni caquiiñeʼ gánnaluʼ luni. Ne zuni sentirluʼ maʼ qué zápaluʼ duda ne zápaluʼ confianza Jehová. Rizaalaʼdxiʼ Jehová lii, rusisácabe guiráʼ ca sacrificiu ni rúniluʼ pur laabe ne cayuni prometerbe zaguíxebe lii pur guiráʼ ni rúniluʼ pur laabe. Cadi guiaandaʼ lii: nadxii Jehová ne rapa cada tobi de ca xpinni ni qué rixeleʼ de laa.
CANCIÓN 111 Guiráʼ ni rusiecheʼ laanu
a IDEA RISACA: Lu artículo riʼ ora caninu nápanu duda cadi canídinu maʼ qué gápanu fe Jehová ne maʼ qué runi crenu lu ca promesa stiʼ, sínuque ni caninu nga ora raca nagana para tuuxa guni cré risaca para Jehová o guiníʼ ique pa jneza ca decisión ni gucuaa dxiqué.
b Neca qué ruzeeteʼ Biblia panda iza napa David dxi gulí Jehová laa, peru zándaca nácabe ti jovenhuiiniʼ. (Biiyaʼ revista La Atalaya 1 de septiembre 2011, yaza 29, párr. 2).
