NDAANIʼ guidxi Israel nabé guyuulaʼdxiʼ ca binni que gucaadiágacaʼ música. Lu Biblia riete de caadxi binni ni bixhidxi xiixa instrumentu ne ni biʼndaʼ. Ne zanda guininu biaʼ chii por ciento de ca ni zeeda lu Biblia nácacani canción. Casi libru stiʼ Salmos, El Cantar de los Cantares ne Lamentaciones. Ti libru ni rusiene ximodo bibani ca xpinni Dios bizeeteʼ «nabé biquiiñeʼ ca israelita que música lu intiica cosa ni bíʼnicaʼ lu xquendanabánicaʼ».

Modo biquiiñecabe música lu xquendanabánicabe. Biquiiñeʼ ca israelita música para guluiʼcaʼ xi runi sentircaʼ (Is. 30:29). Ca gunaa que ruundacaʼ né guendanayecheʼ, ruyaacaʼ ne ruxhídxicaʼ pandereta ora ribí ti rey, ora raca saa para guni adorárcabe Dios ne ora runi ganar xquídxicaʼ lu guerra (Juec. 11:34; 1 Sam. 18:​6, 7; 1 Rey. 1:​39, 40). Nabé racaná ladxidóʼ ca israelita que ora rati tuuxa ne pur ngue ruundacaʼ caadxi canción ni rusihuinni pabiáʼ triste nuucaʼ (2 Crón. 35:25). Cyclopedia, de McClintock y Strong bizeeteʼ: «Nabé guyuulaʼdxiʼ ca israelita que música».

Música ni guxidxi ndaaniʼ palaciu stiʼ rey. Nabé guyuulaʼdxiʼ ca rey stiʼ Israel música. Ne rey Saúl gulí David para guxhidxi arpa stiʼ (1 Sam. 16:​18, 23). Ora guca David rey, bizáʼ instrumentu para guxhidxi música, bicaabe caadxi canción sicarú ne biyúbibe binni para chuʼ lu ti orquesta ne despué maʼ laacaʼ bixhídxicaʼ ndaaniʼ templu stiʼ Jehová (2 Crón. 7:6; Amós 6:5). Ne rey Salomón gupa hombre ne gunaa ni biʼndaʼ ndaaniʼ palaciu stiʼ (Ecl. 2:8).

Biquiiñecabe música para gusisácacabe Jehová. Ndaaniʼ templu stiʼ Jerusalén guyuu tapa mil músicu ni nanna stale, ne bixhídxicabe címbalo ne xcaadxi instrumentu casi arpa ne trompeta (1 Crón. 23:5; 2 Crón. 5:12). Peru cadi laasicabe biquiiñecabe música para gusisácacabe Jehová. Laaca guyuu stale israelita ni biʼndaʼ canción para gusisácacaʼ Jehová dxi zecaʼ Jerusalén (Sal. 120-134). Ne caadxi judíu guniʼcaʼ ruundaʼ ca israelita que Hallel a ora runi celebrarcaʼ Pascua.

Tiempu riʼ laaca risaca música para xquidxi Dios (Sant. 5:13). Ridúʼndanu canción para gusisácanu Jehová (Efes. 5:19). Racané música laanu chuʼnu tobi si né ca hermanu ne rudiini stipa laanu para gudxiilunu intiica guendanagana (Hech. 16:25; Col. 3:16). Ne laaca racaneni laanu guluinu pabiáʼ nadxiinu Jehová ne nápanu fe laa.