1. ¿Tu gucané para gunda guyuu ti congregación nacubi ndaaniʼ guidxi Filipos?

DXI yendá Pablo, Silas, Lucas ne Timoteo ndaaniʼ guidxi Filipos, ti colonia stiʼ Roma, bidxélacaʼ stale binni ni guyuulaʼdxiʼ ca noticia galán stiʼ Reinu stiʼ Dios. Né stale gana gucané guidapaʼ xpinni Cristu riʼ para gunda guyuu ti congregación ndaaniʼ guidxi Filipos. Zándaca bizulú bidagulisaa guiráʼ ca discípulo que ra lidxi Lidia, ti gunaa xpinni Cristu guizáʼ nachaʼhuiʼ (Hech. 16:40).

2. ¿Xi guendanagana bidxaagalú congregación de Filipos?

² Bidxaagalú congregación nacubi que guendanagana. Bicaa Binidxabaʼ ca enemigu stiʼ Dios gucaalucaʼ Pablo ne ca xcompañeru para gusaana de guni predicarcaʼ. Bicueeza autoridad Pablo ne Silas, guluucabe vara laacaʼ ne despué guluucabe laaca ndaaniʼ cárcel. Sti dxi que guleecabe laacaʼ. ¿Xi biʼniʼ Pablo ne Silas bireesicaʼ de ndaaniʼ cárcel yaʼ? Yegánnacaʼ ca discípulo ni nuu ndaaniʼ congregación nacubi que ne guluucaʼ gana laacabe. Ne despué biree Pablo, Silas ne Timoteo de ndaaniʼ guidxi que, peru zándaca biaana Lucas raqué. ¿Xi biʼniʼ ca discípulo riʼ yaʼ? Cumu gucané espíritu santu laacabe la? qué nusaana de ñúnicabe ni ná Jiobá (Filip. 2:12). Guizáʼ biecheʼ Pablo pur ni bíʼnicabe riʼ.

3. Casi ná Filipenses 1:9-11, ¿xi gunabaʼ Pablo lu ca oración stiʼ?

³ Gudiʼdiʼ si chii iza, bicaa Pablo ti carta para ca hermanu de Filipos. Ne ora ridúʼndanu ni rudiʼnu cuenta pabiáʼ gunnaxhii Pablo ca hermanu riʼ. Sicaríʼ gúdxibe laacaʼ:  «Nadxiee irá tu, casi nadxii Cristu laanu» ne laaca guniʼbe guizáʼ cabánabe laacaʼ (Filip. 1:8). Laaca gúdxibe laacaʼ runi orarbe pur laacaʼ. Ne rinábabe Jiobá gacané laacaʼ para gannaxhiisaacaʼ jma, gánnacaʼ gunáʼ nga ca cosa ni jma risaca, cadi gúnicaʼ xiixa ni cadi jneza, cadi gúnicaʼ xiixa ni gusirá fe stiʼ stobi ne guibánicaʼ jneza. Nanna dxíchinu laaca zanda gacané guiráʼ ni guníʼ apóstol Pablo laanu tiempu riʼ (biindaʼ Filipenses 1:9-11, TNM). Lu artículo riʼ chiguidúʼyanu ca diidxaʼ bizeeteʼ Pablo ne ximodo zanda gúninu ni ná cani.

4. a) Casi ná 1 Juan 4:9, 10, ¿ximodo maʼ bisihuinni Jiobá nadxii laanu? b) ¿Pabiáʼ naquiiñeʼ gannaxhiinu Dios?

⁴ Bisihuinni Jiobá pabiáʼ nadxii laanu ra bidii Xiiñiʼ para gatiʼ pur laanu ti guixá ca pecadu stinu (biindaʼ 1 Juan 4:9, 10). Ni biʼniʼ Jiobá riʼ rucaani laanu gannaxhiinu laa (Rom. 5:8). Peru ¿pabiáʼ naquiiñeʼ gannaxhiinu Dios yaʼ? Sicaríʼ bicabi Jesús pregunta ca ora gúdxibe ti fariseu ca diidxaʼ riʼ: «Gunaxhii Dios stiuʼ de idubi ladxidóʼ loʼ ne idubi xhialma luʼ ne idubi xquenda biaani luʼ» (Mat. 22:36, 37). Qué racaláʼdxinu gannaxhiinu Jiobá ti luguiáʼ si, sínuque racaláʼdxinu gannaxhiinu laabe jma cada dxi. Gudxi Pablo ca hermanu de Filipos naquiiñeʼ gannaxhiicaʼ jma. ¿Xi zanda gúninu para gannaxhiinu Dios jma yaʼ?

5. ¿Xi naquiiñeʼ gúninu para gannaxhiinu Jiobá jma?

⁵ Para gannaxhiinu Dios la? naquiiñeʼ gunibiaʼnu laa. Biblia ná: «Ni cadi nadxii stobi la? qué huayuu dxi gunibiáʼ Dios, purti de Dios nga reeda enda ranaxhii» (1 Juan 4:8). Apóstol Pablo guníʼ zannaxhiinu Jiobá jma pa guiziidiʼ chaahuinu xi racaláʼdxibe gúninu ne guiene chaahuinu xi riníʼ íquebe (Filip. 1:9). Ora bizulú cayuni estudiarnu Biblia, bizíʼdinu caadxi cosa de Dios ne bicaacani laanu gannaxhiinu laabe. Ne ra bizíʼdinu jma de laabe ne de ca cualidad galán nápabe la? gunnaxhiinu laabe jma. Nga runi, guizáʼ risaca guidúʼndanu ne guni meditarnu ni cá lu Stiidxaʼ Dios (Filip. 2:16).

6. Casi ná 1 Juan 4:11, 20, 21, ¿turuʼ caquiiñeʼ gannaxhiinu para guiroobaʼ guendarannaxhii stinu?

⁶ Cumu nadxii Dios laanu la? nga rucaa laanu gannaxhiinu ca hermanu stinu (biindaʼ 1 Juan 4:11, 20, 21). Zándaca guiníʼ íquenu cadi nagana diʼ gannaxhiinu ca hermanu stinu purtiʼ cayúninu ni ná Jiobá ne rúninu stipa pur gusihuínninu ca cualidad stiʼ. Ne laaca zinándanu ejemplu stiʼ Jesús, laa gunnaxhii laanu dede bidii xpida pur laanu. Peru neca zacá la? nuu biaje raca nagana para laanu gannaxhiisaanu. Guidúʼyanu xi bizaaca ndaaniʼ congregación de Filipos.

7. ¿Xi rizíʼdinu de conseju bidii Pablo Evodia ne Síntique?

⁷ Evodia ne Síntique nga chupa hermana ni biʼniné apóstol Pablo xhiiñaʼ Dios. Peru zándaca pur xiixa guendanagana gúpacabe bisaana de gaca xhamígacabe. Ne pur nga bizeeteʼ Pablo lácabe lu ti carta ne bidii conseju laacabe. Gúdxibe laacaʼ «chuʼ ca tobi si» (Filip. 4:2, 3). Laaca bicaa Pablo ca diidxaʼ riʼ ra nuu guiráʼ ca hermanu de congregación que: «Laguni irá ni sin quiche ruaa tu ne sin tinde tu» (Filip. 2:14). Nanna dxíchinu guizáʼ gucané ca conseju riʼ Evodia,  Síntique ne ca hermanu de congregación de Filipos para gannaxhiicaʼ jma.

8. ¿Xi zanda gucaa laanu gusaana de gannaxhiinu ca hermanu stinu, ne xi cadi naquiiñeʼ guiaandaʼ laanu?

⁸ Cásica bizaaca Evodia ne Síntique, zándaca gaca nagana para laanu gannaxhiinu ca hermanu stinu pa nisi ra cucheecaʼ maʼ cadúʼyanu. Guiranu nga rucheʼnu. Peru pa ra cuchee si xcaadxi maʼ cadúʼyanu la? maʼ huaxiéʼ zannaxhiinu laacaʼ. Guzéʼtenu ti ejemplu. Zándaca ridxiichinu ora qué racané ti hermanu laanu guiá ra Yoo stiʼ Reinu, ne pa guzulú guiníʼ íquenu guiráʼ ni huayúnibe la? jmaruʼ si zadxiichinu ne chaahuidugá zusaana de gannaxhiinu laabe. Pa zacá cazaacanu la? cadi naquiiñeʼ guiaandaʼ laanu qué rusaana Jiobá de gannaxhii laanu neca ruuyaʼ ra cucheʼnu ne ra cuchee ca hermanu stinu. Nga runi, naquiiñeʼ chinándanu ejemplu stiʼ Jiobá ne guidúʼyanu ca cosa galán runi xcaadxi. Riuʼnu tobi si né ca hermanu stinu ora rúninu stipa pur gannaxhiinu laacaʼ (Filip. 2:1, 2).

9. ¿Gunáʼ nga caadxi de ca cosa «ni jma risaca» bizeeteʼ Pablo?

⁹ Gucané espíritu santu Pablo para gabi ca hermanu de Filipos ne guiráʼ ca xpinni Cristu gunáʼ nga ca cosa «ni jma risaca» (Filip. 1:10, TNM). Lade cani zeeda gaca santificar lá Dios, gaca guiráʼ ni naguixhe íquebe gúnibe, chuʼ paz ndaaniʼ congregación ne chuʼcaʼ tobi si (Mat. 6:9, 10; Juan 13:35). Ora jma risaca ca ni maʼ bizéʼtenu riʼ lu xquendanabáninu la? rusihuínninu nadxiinu Jiobá.

10. ¿Xi caquiiñeʼ gúninu para cadi guidxela Jiobá donda luguianu?

¹⁰ Laaca guníʼ Pablo cadi gúninu xiixa ni cadi jneza. Cadi caníʼdibe caquiiñeʼ gácanu perfectu. Purtiʼ qué zanda diʼ gácanu casi Jiobá, laa qué gapa pecadu. Nga runi, qué zadxela Jiobá donda luguianu pa gúninu stipa pur gannaxhiinu jma ne gánnanu gunáʼ nga ca cosa ni jma risaca. Ora qué rúninu xiixa ni gusirá fe stiʼ xcaadxi, rusihuínninu nadxiinu laacaʼ.

11. ¿Xiñee naquiiñeʼ gápanu cuidadu para cadi guirá fe stiʼ xcaadxi?

¹¹ Naquiiñeʼ gápanu cuidadu para cadi gúninu xiixa ni gusirá fe stiʼ xcaadxi. Zándaca pur ca ni ridúʼyanu, lari ni rácunu o pur dxiiñaʼ stinu guirá fe stiʼ xcaadxi. Zándaca cadi cayúninu xiixa cosa malu, peru cadi jneza guninanu conciencia stiʼ tuuxa ne guirá fe stibe pur ca decisión ni guicaanu. Ne Jesús peʼ guníʼ pa chuʼ ora gúninu xiixa ni gusirá fe stiʼ ti dendxuʼ stiʼ la? jma galán nugaandacabe ti guié yánninu ne nundaacabe laanu galaa nisadóʼ (Mat. 18:6).

12. ¿Xi rizíʼdinu de ni bizaaca ti guendaxheelaʼ ni naca precursor?

¹² Guidúʼyanu ximodo yenanda ti guendaxheelaʼ ni naca precursor mandatu bidii Jesús ni ná cadi gúninu xiixa ni gusirá fe stiʼ xcaadxi. Ndaaniʼ congregación ra nuucabe nuu sti guendaxheelaʼ ni deruʼ guyuunisa ne ni biniisi ndaaniʼ ti familia nabé estrictu. Para guendaxheelaʼ riʼ la? cadi naquiiñeʼ cheʼ ca xpinni Cristu cine, ne laaca qué zanda gúʼyacaʼ nin ti clase película. Nga runi, bidxiichicabe ora gúnnacabe biiyaʼ ca precursor riʼ ti película. Ne pur  ni bizaaca riʼ gudixhe ique ca precursor riʼ maʼ cadi checaʼ cine para ganda gaca conciencia stiʼ guendaxheelaʼ riʼ jma naguidxi ne guiénecaʼ pora nga jneza o cadi jneza xiixa (Heb. 5:14). Zacá bisihuínnicabe dxandíʼ nadxiicabe ca hermanu que purtiʼ gucanécabe laacaʼ (Rom. 14:19-21; 1 Juan 3:18).

13. ¿Ximodo zándaca gucaʼnu tuuxa guchee?

¹³ Laaca zanda guirá fe stiʼ tuuxa pa gúninu xiixa ni gucaa laa guchee. Guzéʼtenu ejemplu stiʼ ti binni ni cayuni estudiar Biblia. Maʼ bisaanabe de xhúdxibe neca guizáʼ nagana gúcani para laabe. Ne maʼ bidiibe cuenta maʼ cadi naquiiñeʼ guebe. Nagueendaca bichaabe stale cosa lu xquendanabánibe ne guyuunísabe. Peru ti dxi biʼniʼ invitar ti hermanu laabe ne xcaadxi xpinni Cristu ra lidxi. Ne cadi para guʼyaʼ hermanu riʼ pa zaxúdxibe o pa coʼ rabi laabe pa zeʼbe ti cerveza ne ná: «Maʼ guyuunísaluʼ ne cudii Jiobá espíritu santu lii para gacané lii. Pa randa rucueezaluʼ lii la? zanda gueluʼ neca caadxi». Aque triste pa nulabi hermanu riʼ laabe ne nuzulú nixudxi sti biaje.

14. ¿Ximodo racané ca reunión rápanu laanu para chinándanu ca conseju zeeda lu Filipenses 1:10?

¹⁴ Gadxé gadxé modo racané ca reunión rápanu laanu para chinándanu ca conseju zeeda lu Filipenses 1:10. Primé, rusietenalaʼdxiʼ cani laanu gunáʼ nga ca cosa jma risaca para Jiobá. Guiropa, rusiidiʼ cani laanu gúninu ni cazíʼdinu ne  gúninu ni jneza. Ne guionna, rucaacani laanu gúninu cosa galán ne gannaxhiinu xcaadxi (Heb. 10:24, 25). Ora riguu ca hermanu stinu gana laanu, rannaxhiinu laacaʼ jma ne laaca rannaxhiinu Jiobá jma. Pa nadxiinu Jiobá ne ca hermanu stinu de guidubi ladxidoʼno la? zúninu stipa para cadi gúninu xiixa ni gucaa laacaʼ gucheecaʼ.

15. ¿Xi naquiiñeʼ gúninu para guibáninu jneza?

¹⁵ Gunabaʼ Pablo Jiobá guibani ca hermanu de Filipos jneza (Filip. 1:11). Lade ca cosa jneza riʼ zeeda gannaxhiicabe Jiobá ne guidxi stiʼ. Laaca naquiiñeʼ gábicabe xcaadxi xi runi crécabe ne esperanza galán nuu para laacabe. Ne laaca guniʼbe naquiiñeʼ gácacaʼ «casi biaani ndaani guidxilayú cahui riʼ» (Filip. 2:15). Biaʼsi ni guníʼ Pablo riʼ purtiʼ Jesús peʼ guníʼ naca ca xpinni casi biaaniʼ lu guidxilayú riʼ (Mat. 5:14-16). Laaca biʼniʼ mandarbe laacaʼ gacanecaʼ binni gaca discípulo stibe ne gúdxibe laacaʼ zácacaʼ testigu stibe dede ca lugar jma zitu nuu lu guidxilayú riʼ (Hech. 1:8; Mat. 28:18-20). Ora rúninu dxiiñaʼ risaca riʼ la? ribáninu jneza.

16. Casi ná Filipenses 1:12-14, ¿xiñee zanda guzáʼninu casi ti biaaniʼ lu guidxilayú riʼ neca cadídinu lu guendanagana? (Biiyaʼ dibuju ni zeeda lu portada).

¹⁶ Zanda guzáʼninu casi ti biaaniʼ nadipaʼ lu guidxilayú riʼ neca cadídinu lu guendanagana. Zándaca ruluíʼ nuu xiixa ni cucueeza laanu para guni predicarnu, peru zanda gúninu ni. Nga peʼ nga ni bizaaca apóstol Pablo. Dxi bicaabe carta para ca hermanu de Filipos deguyoobe ra lídxibe ndaaniʼ guidxi Roma. Neca deguyoobe, né stale gana biʼniʼ predicarbe ca guardia ni cayapa laabe ne ca ni riganna  laabe. Nabé gucané ejemplu stiʼ Pablo ca hermanu para gácacaʼ nadxibalú ne «güi ca stiidxa Cristu» sin guidxíbicaʼ (biindaʼ Filipenses 1:12-14; 4:22).

17. ¿Xiñee randa runi predicar ca hermanu stinu neca cadíʼdicaʼ lu guendanagana? Bizeeteʼ ti ejemplu.

¹⁷ Stale hermanu rusihuinni nadxibalú cásica Pablo. Nuu de laacabe nabézacabe lugar ra maʼ bicueeza gobiernu dxiiñaʼ stinu, peru neca zacá ruyúbicabe modo guni predicárcabe (Mat. 10:16-20). Ndaaniʼ tobi de ca país riʼ gudxi ti superintendente guiráʼ publicador guni predicarcaʼ familia sticaʼ, ca xpecínucaʼ, ca ni rinecaʼ scuela, ca ni runinecaʼ dxiiñaʼ ne guiráʼ ca ni runibiaʼcaʼ. Chupa iza despué guyuu xcaadxi congregación nacubi ndaaniʼ país riʼ. Zándaca cadi cucueezacabe dxiiñaʼ stinu ra nabézanu. Peru neca zacá, rizíʼdinu ti cosa nabé galán de ejemplu stiʼ ca hermanu riʼ, naquiiñeʼ guyúbinu modo guni predicarnu jma, ne gápanu confianza zudii Jiobá stipa ni caquiiñenu para ganda gudxíʼlunu intiica guendanagana guidxaagalunu (Filip. 2:13).

18. Né ni maʼ bizíʼdinu lu artículo riʼ, ¿xi naguixhe íqueluʼ gúniluʼ?

¹⁸ Tiempu riʼ nga jma naquiiñeʼ quixhe íquenu chinándanu ca conseju ni bicaa Pablo para ca hermanu de Filipos. Ne laaca naquiiñeʼ gánnanu gunáʼ nga ca cosa ni jma risaca, gúninu ni jneza, cadi gúninu xiixa ni gusirá fe stiʼ xcaadxi, ne guibáninu jneza. Pa gúninu ca ni maʼ bizéʼtenu riʼ la? zannaxhiinu Jiobá ne ca hermanu stinu jma ne zusisácanu Jiobá, Bixhózenu ni nadxii laanu.